Ka Nupepa Kuokoa, Volume XVIII, Number 20, 17 May 1879 — Ko Honuaula mau Anoai. [ARTICLE]

Ko Honuaula mau Anoai.

No ka La. Ua nui ka la i keia mau makahiki ekolu, aole wahi mea ua iho, owela ke kula ke nana aku. No ka Wi. Ma Honuaula nei, he nui ka wi, aia no ke ola i Wailuku, o ka poe mea lio hiki i Wailuku, o ka mea lio ole aole e loaa kahi pai ai, o ka uala no ko Honuaula nei ai mau a i keia manawa hoi neo. No ka Ia. O ka ia ka mea e loaa ai o ke pai, ekolu no manini hapalua. No ke Kula Sabati. Ekolu Kula Sabati o Honuaula nei, ma Kanaio, Ulupalakua a me Keawakapu, o ka mea e kakau nei oia ke Kahu Kula Sabati, aole no he nui o na haumana. No ka Ekalesia. O Rev. S. K. Kauwe ke Kahu o keia Ekalesia, he ikaika na hoahanau i ka huli dala e pau ai ko lakou pilikia, ua hiki no i keia Ekalesia ke malama iaia iho, me ke kaukai ole aku ia waho mai, ua lulu dala no ka luakini e paa ai, a ua kuai ia i ke pili laau, a ua lulu dala hou iho nei no, no ka hale noho o ke kahu, a ua loaa $200. aia i Honolulu he hiki mai koe o ka laau. No ka Mahina Hou. Ke malama nei no keia Ekalesia i ka lulu mahina hou, ekolu dala e lulu ai ka apana hookahi, eono apana, ua like me $18.00 i ka mahina hookahi, alaila mahele, i ka hanai kahu kekahi hapa, a i ka mahina hou kekahi hapa, pela aku a pau ka makahiki he uuku na hoahanau e auamo nei i keia mau haawina, eia nae, he mama wale no ia lakou, aole kaniuhu o ko lakou manao i hookahi puuwai. D. H. Aukai. Honuaula, Maui, Aper. 25, 1879.