Ka Nupepa Kuokoa, Volume XVIII, Number 31, 2 August 1879 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XVIII, HELU 31.                              POAONO, AUGATE 2, 1879,                                  NA HELU A PAU 922.

 

KA MOOLELO O BERIANA KA WIWO OLE

--A ME--

MAHONE KE KOA:

---------

MOKUNA VII.

---------

            I ka wa a ka Moi Beriana i kauoha aku ai i kona mau koa a pau e ukali aku i na kapuai o ke alii Powa, ua koe hookahi iho la oia iloko o kela awawa mehameha no kekahi manawa e nalu ana.

            He mea kupanaha, ka hiki ana i kekahi puulu kanaka nui, ka huna ana ia lakou iho iloko o keia ululaau ma kahi kokoke i ko'u halealii. Aka, e imi au i ko lakou wahi i pee ai, malia o pelu hope hou mai kela kanaka mau-a no keia wahi.

            Na kela pohaku nui e waiho ana i ke ala, i keakea i ka Moi aoo mai ka haalele ana iho o ka ululaau hoanoano.

            Nalo aku la kona mau koa, me ka waiho ana iho i ko lakou mau lio e auwana hele ma ka aoao malalo o ke awawa.

            Lele iho la ka Moi mai kona lio iho, me ka paa ana nae i kana pahikaua me ka makaukau no ka halawai pu me ka enemi, hele aku la oia imua i kahi e waiho ana o ka pohaku, me ka manao e pii aku maluna olaila, alaila, huli aku i kahi i pee ai o na kana powa.

            Iaia i hookokoke aku ai i ka pohaku, ike aku la oia i ke ino wahine aka eleele e ku ana iluna o ua pohaku la, a mahope iho, lohe aku la oia i ka leo i wanana mua mai ai iaia i na minute mamua iho.

            E ka Moi Beriana, e ka Moi Beriana, ua aneane oe i ka welau o ka make i keia po; aole oe i hoolohe i ka'u olelo kauoha. E komohia hou ana oe iloko o ka popilikia, a malia aole au malaila e hoike aku ai ia oe i ka lohe.

            E hamau, e ka holoholona naaupo, wahi a Beriana. Aole au e hoolohe i kau mau olelo hupo a ano ole. Owai la oe, e hoike mai, a no ke aha kou noho ana ma keia awawa mehameha?

            O keia awawa, oia ko'u home, e ka Moi maikai, a owau ka mea hookahi e kiai nei maluna ou. Na'u i hoopakele i kou ola i keia po e ka Moi Beriana, a ina aole au i hiki mai maanei, ina la ua pepe liilii oe ma ka haule ana o keia pohaku.

            He oiaio, e ka mea kino ano e, he pakele mahunehune maoli no ko'u. Ina oe he hoaloha no ko makou hale, e hoike mai ia'u ano i ke ala maalahi e puka aku ai mai keia awawa aku, no ka mea, he oiaio, o ko'u mau ami kahiki aole i oi aku ka eleu e like me na la i aui ae.

            Ma keia wahi au i noho kiai a kakoo ku ia oe e ka Moi akahai. E kali iki oe no'u no kekahi mau minute.

            A nalowale aku la ka mea kino aka mailuna aku o ka pohaku.

            He kino ako kupanaha kela, wahi a ka Moi me ka leo haahaa. Ua hooia anei au a manaoio i na moolelo kahiko a ahiu? Mai hoike aku au iaia, oia kekahi o na uhane o ko'u lahui.

            Kekahi o na uhane o kou lahui ! wahi a kekahi leo i pa-e ae ai ma kona aoao. E hoeia a manaoio hoi, e ka Moi kiekie, o ka uhane o kou hale ke kiai mau nei maluna ou, a e kiai pu aku hoi maluna o kou lahui a hiki i ka wa e lilo ai ka manawa i mea ole. E ukali mai ia'u, ina he mea hiki ia oe ke imi aku o kou mau enemi, a kaihi mai i ka lei gula.

            I ka wa a ka mea kino aka i pane ai i keia mau olelo, alakai aku la oia i ka Moi wiwo ole ilalo o ke awawa, me he pale ana ae i kekahi mau opu nahelehele e ulu ana ma ka aoao o ke alahele, komo aku la iloko o kekahi ana malalo iho o kekahi malu pohaku.

            O na nahele loloa e ulu ana, oia ka mea nana i huna aku ka ipuka komo o keia ana, a oia hoi kekahi o na ipuka o ke ana nui, kahi a ke alii Powa i komo ai a loaa iaia he puuhonua e pakele ai.

            E @ ana hookahi lama ma keia ipuka, aka, ukali aku la ka Moi mahope o kona pailata kupanaha me ka pulale ole, aka, paa ae la oia i kana pahikaua imua o kona alo, me he la, o ka mea e kue mai ana iaia, ua makaukau mua oia no ka paio aku.

            Komo aku la oia iloko o ke ana mahope aku o kona pailata pahaohao, a ike iho la oia iaia iho iloko o ke keena kahi a kona mau enemi i malumalu ai ia po.

            Ea ana no na kukui lamalama iloko o ke ana nui, a ike iho la ka Moi Beriana ua noho ia oloko o ke ana.

            O keia wahi ka ka malumalu no ko'u mau enemi, iwaena hoi o na leo kupinai o na o-le ma Kinikora nei, wahi a ka Moi. Owai la ka mea i moeuhane no keia mau kupaianaha.

            He lua huna hou aku no ko ke alii Powa au i ike ole ai e ke Moi, a aole i mamao aku mai Kinikora nei, wahi a ka mea kino aka.

            A pehea i ike ai oe i keia--heaha a owai ia oe? wahi a ka Moi i pane aku ai, iaia i haka pono aku ai me na maka kuoo i ke kino aka wahine e ku ana imua ona.

            Aole e hiki i ka Moi ke ike i kona helehelena, no ka mea, ua huna ia e kekahi uhi a o kona kino ua owili ia iloko o kekahi koloka nui.

            Mai hoao e ninau hou mai ia'u e ka Moi maikai, aka, e hoolohe i ka'u mau olelo kauoha, o lohi loa auanei oe a lilo ke ola o ke koa opio.

            E kamailio mai, wahi a ka Moi Beriana.

            Ua holo aku ke alii Powa mai keia ana aku i keia po me kona mau kanaka, a elua mau pio me lakou. O kekahi o na opio, he keiki opio hoolealea, he mau hoina nohea o ke kanaka ui, a he koko ano alii kona.

            O ke koa opio anei nana i hoohaule i ke Denemaka ilalo i keia la iho nei? wahi a ka Moi.

            Oia, e ka makua. Aia kona ola iloko o ka poino, no ka mea, ua hoohiki paa ke alii Powa no kona hopena. Ina e haule a make kela koa opio, aole e loaa hou ia oe ka lei gula a Malaki i lawe haaheo ai, a e ula pu auanei ke kahua kaua o Clontarf me ke koko o na keiki o Erina i hoopio ia.

            A pehea la me a'u, e pakele anei au? wahi a Beriana, oiai kona mau maka e kulili ana me ka pihoihoi.

            Mai ninau mai ia'u i keia manawa, e ka Moi akahai a oluolu, no ka mea, owau pu me oe ma ka auina la o ka la hoouka kaua. E awiwi koke aku oe no ke poo o ka ululaau, a me keia pu puhi e kahea koke aku i kou mau kanaka e akoakoa koke. Alaila; e holo aku no ke alahele o Kilimora, a e halawai pu oe me ke alii Powa ilaila. E awiwi koke, mai kali, o lohi loa auanei oe, a pakele ole ke ola o ka opio.

            A owai la keia opio, wahi a ka Moi. Ua hanau ia anei oia he kulana kiekie, e hoike mai?

            Aole he poe kiekie i koe ma Erina makamae, e ka makua. Aole e hiki ia'u ke pane hou aku ia oe ano, no ka mea, ua sila ia ko'u mau lehelehe a ua paa. E awiwi aku no ka hoopakele ana iaia; ina e loaa aku ana ia oe ka lei gula, alaila, e hoopuehu aku i na enemi o Irelani.

            Alakau aku la ke kino aka ia Beriana mai ke ana aku, ma kekahi ala huna okoa, a kuhi aku la kona mau lima iloko o ka ululaau, a pane ae la:

            E awiwi e hoopakele, e ka Moi wiwo ole. E hoakoakoa i kou mau koa, a e hele koke aku no ke alahele o Kilimora!

            Haliu hope mai la ke kino aka a nalo aku la iloko o ke ana.

            E huli hou no au i kela ana a me ke kino aka ano e ma ka la apopo, wahi a ka Moi i nalu iho ai iloko ona. A ano ke hele nei au e hoopakele i ka opio hoolealea.

            A kaupe aku la oia ma kona ala noloko o ka ululaau, e like me ka ikaika o kona mau au e lawe awiwi ai iaia.

            Iloko o ka hihipea o ka ululaau a me ka mehameha o na alahele, i alo hele aku ai ke alii Powa me kona poe ukali a me na pio.

            Ua hakalia loa ko lakou nee hele ana imua, no ka mea, ua puni lakou ma na aoao a pau me na enemi, a e lohe ana lakou i na leo o na ohe o na kanaka o ka Moi Beriana e wawalo ana ma na paia o ka lewa iwaena oia po lai.   

            O ke koa Mahone, oiai ia e pule ana no ke kokua ia, e hoao ana oia ia manawa hookahi e wehe ae i ka palulu i umii ia ai kona waha, a ua ike ole ia ka hemo ana e na kanaka powa a puni oia.

            O ka nohea opio, ke kaikamahine a ke alii Powa, ka mea nona na pulima lahilahi i hoomakaleho mau aku me na puili palanehe ana a na pulima a ko kakou koa, oia ke ukali pu ana ma ka aoao o ke koa, oia ke ukali pu ana ma ka aoao o ke koa, me ka hakilo ana i na hoao ana o ke koa e imi i alanui e pakele ai; hoomaopopo iho la ua ui la e hoomakaukau ana o Mahone e kahea; ua piha ia oia me ka weliweli nui no kona pakele, no ka mea, ua ike no oia aole ke alii Powa e hooloihi hou aku i ko Mahone omo hou ana i ke ea, ke kummakaia aku oia iaia.

            E Mahone mai kahea oe i na koa o ka Moi Beriana, no ka mea, i na lakou e hiki mai ana, e pepehi ia ana o papa. E hoomanawanui, a na'u oe e hoopakele, wahi a ka nohea i hawanawana aku ai i kona mau pahu lono.

            E pono au ke pakele, e Finavola, mamua o ko makou haalele ana iho i keia awawa, wahi a Mahone me ka leo nahe. Ke ike e nei au, aia ke kali ia nei ka make no'u ma Glen Mama. (E hoomanao e ka mea heluhelu, ua pai hewa ia aku ka inoa o keia kaikamahine ma na helu i hala, mamuli o ke kuhihewa o ka mea hoonoho; o ka pololei ka inoa maluna ae.)

            Iloko oia manawa, hoi hope mai la ke alii Powa a kamailio ae la i kekahi o kona mau kanaka powa e hele ana ma ka aoao o ka kakou koa.

            Aia ko kakou mau enemi mamua o kakou ma ke alahele, aia lakou ma ka aoao malalo o ke awawa ma ko kakou apau. E pono kakou e lawe i ke ala ma ka hema, a i kue ia mai kakou e paio aku. E kiai makaala loa oe i na pio me ke kokua pu ana a Finavola ia oe. Ina kakou e kauhilii ana, a laila, e huli hoi hou aku i ke ana a kakou i haalele aku ai.

            Ia wa i kulou iho ai ke alii Powa a hawanawana aku la i kekahi mau olelo ma na pepeiao o ke kanaka powa, ma ke kuhi ana ae o kona lima ia Mahone.

            Manao iho la ka kakou koa, e hoaiai ana ke kanaka puuwai eleele i kona make, ke hiki ole ia lakou ke hoonou aku i ko ka Moi Beriana mau koa.

            Ina paha i lanakila kuu mau lima, a paa hou i ka pahikaua a kuu makuakane, alaila, e uhau no au i hookahi hauna pahikaua ikaika no ko'u lanakila ana maluna o kuu mau enemi haaheo inu koko, wahi a ka opio iaia iho, iaia e nana ana me na maka hulili o ka inaina i na 'lii Denemaka e kainopu ana maluna o ko laua mau lio mamua iho o kona alo.

            E ahonui me ka hoomanawanui e Mahone, wahi a ka ui i hawanawana aku ai.

            Ia manawa, ma ko lakou aoao hema i poha mai ai kekahi leo me ka moakaka, aole hoi i kanalima iwilei ka mamao mai ia lakou aku.

            Imua no ke alahele o Kilimora. Aole e hiki i na lawehala ke pakele mai io kakou aku e na Naita wiwo ole. E hoopakele ia ka opio hoolealea, a e hoihoi hou ia mai ka lei gula. E kau ia ka hoopai maluna o ka poe kue kanawai i ala kipi mai la kakou maloko o na paia o ko kakou halealii.

            Hoomaopopo koke iho la ka kakou koa opio, o ka leo i poha mai, oia ka leo ilihia o kona Moi Beriana ka Wiwo Ole, me kona manao ole ae no ke kulana o kona ola iloko oia wa, nolaila, kahea ae la oia me ka leo nui, e like me ka ikaika o kona kileo e kiola ai.

            E ola loihi ka Moi Beriana! E pio na enemi a me na Denemaka. Imua a e hoopakele.

            E ka lapuwale! wahi a ke alii Powa i pane mai ai me ka leo kaka-na, iaia i holo mai ai i kahi o ka opio i nele i ke kokua ole, me ka pahikaua ma kona lima, a pane mai la, ua kumakaia mai oe ia'u, nolaila, e make oe i ka make mainoino e pono ai.

            E kuu makua, e hoopakele iaia! I pane mai ai ke kaikamahine opio, iaia i holo mai @ me kona lio a keakea ae la mawaena o kona makua a me kona luahi i manao ai. Mai pepehi oe i ka opio Mahone imua o ko'u mau maka.

            E hookaawale ia oe iho mai ia'u aku e ke kaikamahine hupo, wahi a kona makua. E make oia e pono ai.

            Aole oia e make! I pane mai ai o Beriana. O oe ke make e pono ai, e ke kanaka ino manao eleele, E hoouka aku e ko'u mau koa wiwo ole i na enemi a me na Denemaka.

            A holo aku la ka Moi aoo imua ma kona lio me ka pahikaua ma kona lima e halawai pu me ke alii Powa.

            E akoakoa e na kanaka hopo ole o ke kuahiwi, i kahea ae ai ke alii Powa, oiai oia e pe-a pahikaua pu ana me Beriana, e pale ana i ka hauna pahikaua a ka Moi i uhau aku ai maluna ona. E hoouka ae i na kauwa kuapaa a ka pakaha wale. Ha, e Beriana, ke halawai hou nei kaua iloko o ka ehaeha. E make ka mea pakaha wale.

            E make na enemi o Erina, wahi a Beriana i pane aku ai. E ka iliohae ino o ke kuahiwi, na'u i haawi aku ia oe mamua e nali i na puupuu lepo. a e haliu kue hou 'ku no ko'u mau ami kahiko ia oe i keia manawa, e paopao i kou mau manao uilani.

                                                                                    (Aole i pau.)

 

HE MOOLELO

---NO---

EVALEKA DE MOLENA!

---KE___

KOA KAALIA OPIO WIWO OLE!

KEKAHI KEIKI OPIO KUAAINA O SEPANIA, I LILO I KOA KAVALIA PUUWAI HOPO OLE.

HE NANEA ILIHIA EHAEHA

NO KA OLALI HIENA O NA MAUNA PIRENEMEKEKAIWAENAHONUA ME KANA IPO ALOHA KA UI NOHEA OLU WAIPAHE

ROSA AMELIA.

 

"E ka manawa!

Nani kou hookahua ana,

A hookupuia mai i na hihio,

I piha i ke pahaohao a eehia,

E like me ka'u e ike nei;

I nei mau oeli ano kupanaha,

I oi aku mamua o ka mea io."

                        Dona Fanko.

---------

MOKUNA II-----HELU 8.

-----------

            A LIULIU iki ka haka ana aku o ka makua maluna o ke keiki me ke kahaha, a pela pu hoi ke keiki maluna o kona makua, ia wa i puka mai ai he ninau mai ka makua mai. He mea pohihihi maoli keia --aole hiki ia'u ke hoomaopoopo-- o kou ano kohu pupule--na huaolelo powa a me ke kipi-- he mau miterio--- (pohihihi) loa lakou ia'u. He aha keia e Franco e hai mai."

            Pane aku la o Franco, "He oiaio e kuu makua, he mea pohihihi keia, aka, aole i keia wa au e wehe ae ai i ka uhi, e huna nei i keia mea au e olelo mai nei, he miterio (pohihihi) iloko o kou hoomaopoopo ana. Aka, aole no nae i liuliu, e akaa aku no wai i ke sila e hoopaa ana i keia mea huna, a he mea hoi nau e manaoio ole mai ai."

            "Ae, he mea pono ia oe ke hai mai i hoopau ia ai ko'u pilihua no keia hiona weliweli ou, e ke keiki."

            I keia manawa i komo hou mai ai o Herada, a pane mai la, "Ua makukau na mea a pau--a pehea la, i keia wa no anei e lawe mai ai au i na mea ai?"

            Ae aku la o Franco Helio, ia wa i @@@ hou aku ai ua keiki ahiu la, aole i emo ua hoea hou mai la ia me na mea apau ana i hoomakaukau ai no ka papaaina a kona hanau mua.

            I ka pau ana ae hoi o ka Franco Helio hoopiha ana i kona houpo lewalewa, a hoihoi ia aku la na mea a pau o ke pakaukau ma ko lakou wahi mau, ua ku ae la ua koa nei iluna wehe ae la i ke apo kaliki o kana pahikaua a kau aku la ma ka paia. Hoi hou mai la ia a noho hou iho la maluna o kona noho, aloalo ae la mao a maanei me ke ano ake e ike aku i kekahi mea ana i manao nui ai, a no ka nele ana paha, huli ae la oia ninau aku la ia Herada oiai oia e komo mai ana, "Auhea ka hoi o Evakela ko kaua pokii?"

            Ia manawa i pane mai ai o Hereda, "Aia la ihea? manao nae au e i aku nei no i kana hana maa mau, o ka palaualelo ana i kona mau manamanalima me na kaula o kana gita. He keu nae hoi keia o ka hele aumoe ana a ua wahi keiki nei, aka, he hoi mai paha koe."

            I keia wa i kani mai ai na ke he 10 0 ka wati o ka halepule Sana Iakobo, a ia wa i pane ae ai o Franco, "Aumoe maoli, o ka hora 10 keia"--ua ane ala loa aku nei paha ua o Evaleka--"

            Aole i pau pono ae keia hopunaolelo a Franco i manao ai e kamailio, lohe aku la lakou i ke kamumumu o waho o ka lanai, a wehe ia mai la ka puka. I ka hemo ana mai o ka puka, ua komo mai la he keiki opio nona na hiona ia mai wa ua hele a eloelo i ka lelehune iho a ka ua lihau ano, a e lei ana hoi oia he gita ma kona ai.

            Ia ia i komo mai ai, ua kahea aku la ke poohina makuakane ia ia, "E Evaleka, e hele mai e ike i kou hanau mua, Helio,--- o kona hiki ana iho la noia mai Garanada mai,"

            Hele mai la o Evaleka, a lulu lima pu iho la me kona hanau mua loa.

            Pane aku la hoi o Helio, "E Evaleka, nani ke puanuanu o kau holoholo ana?"

            "Ae, he oiaio ia, aka, ina nae paha o oe kekahi me au, ina aole oe e i ae he puanuanu, aka, he pumehana wale no, "i pane hoomake aka aku ai o Evaleka.

            A ihea aku nei oe, akahi no a hoi mai? i ninau aku ai o Helio.

            He ano hilahila au ke hai aku ia oe, e ka hoahanau, aka, i mea nou e ninau hou ole mai ai ia'u, ke hai aku nei au, me ka hilahila no nae--I ka'u hana hoopau koalaala aku nei no au makai aku nei la, a hiki loa aku nei no hoi au mawaho pono ae o ka hale kakela o ka Makuisa Palemairo de Cano, i hahai aku ai ua opio Evaleka la.

            Kahuhu i hele aku nei no ka paha oe e hoomaaloa o mawaho ae o kahi e noho ai o ke kaikamahine a ua Makuisa la--ke oiaio he lede io no ia e kupono ai ke pakali ia e ka mea maamaalea ma ia mau ano--e like paha me oe e Evaleka, ka mea hoi nona na manamana lima i mikioi loa i ka lawe palanehe ana i ke kaula o ke gita. Pela i pane mai ai o Helio me ka hoomakeaka.

            I keia mau olelo hoi a Helio hene ae la ka aka a ua mau opio la ekolu, a ia wa no hoi i pane ano kikoola mai ai o Herada; a me kona ano leo ahui no hoi: He keu no keia o ke keiki pinai mau ilaila, me ka ike no hoi, he kanaka o Palemairo i kaulana loa no ka naau haakei a me ka haaheo--eia nae, he oi loa aku no ko ia nei pipili aku. A ina e ike ana ka Makuisa oia nei kekahi o na poe e hookaukolo nei i na manao pahele i kana kaikamahine, alaila, aole e pili maikai ana kona mau lihilihi i ka po, a hiki i kona haawi ana mai i na haawina ehaeha o ka pahikaua maluna oia nei, alaila, heaha la auanei ka ia nei mea e hana aku ai?

(Aole i pau.)

 

Hoohuiia ma ka mare.--- Ma ke ahiahi o ka Poalua o ka pule i hala, ua hoohuiia ma ka berita o ka mare ma kahi noho o Mr. M. Louisson, ma Honolulu nei o Mr. J. Hyman kekahi o na haole kalepa o Honolulu nei, me Miss B. Frankel ke kaikamahine hanauna a Mr. ame Mrs. Louisson, a he nui ka poe makaikai i akoakoa ae e ike ia laua.

 

OLELO HOOLAHA.

E. O. HALL & SON.

(E. O. HOLO MA.)

---------

NA MEA KUAI I NA MEA MAHIAI,

Na Lole, Na Pena, Na Aila, a me

Na ano Lako e ae a pau he lehulehu wale.

845                  Kihi o Alanui Papu me Moi.                           ly

 

He Nui ANei Kou Makemake i na

Mekini Humuhumu Lole?

Ina pela, alaila, e kipa mai no ma ka Halekuai

---:o:---

KAKELA A ME KUKE.

A malaila oukou e ike ai a makaikai i na ano MEKINI a WHEELER a me WILSON, mai ke $40 a hiki i ke $50 ke kumukuai o ka mea hookahi.

Ka MEKINI a SINGER,

ma ke $50 pakahi, a me ke ano

MEKINI a WILCOX me GIBBS,

 ma ke $0 a hiki i ke $50 ke kumukuai.

I mea e pau ai ko oukou kanalua e na Makamaka no ke kupono o keia mau ano Mekini, e naue mai no me ke kuihe ole, a e ike no oukou iho.                                            862tf

 

Kauka O. S. Cummings, M. D.

HOMEOPATIKA.

Oia ke kuaka i kamaaina mua ia oukou e na kanaka Hawaii ma ka inoa,

"KULU WAI LIILII"

Ua hoi mai nei oia, a e pahola hou mai ana oia i kona akamai lapaau ia kakou. Aia kona Keena Laapau a me kona wahi noho ikeia wa ma kahi o Mr. Wm. G. Iriwin, ma ke kihi o na alanui Papu a me Beretania, ma keia aoao aku o ka luakini o Kaukeano. 888 tf

 

ANO NO I LOAA MAI NEI!

 

Na Kaa Lio Holo Lealea!

Na  Kaa Lawe Ohua a me na kaa holo palua, mau mea hoikeike aku, mai ka Hale Hana Kaa mai o ka Hui o Cortland ma Nu loka.

                                    DILLINGHAM & CO.,

876f                                                                 Na Agena kuai ma Hawaii nei.

 

Ke papa ia aku nei na kanaka a pau aole e komokewa a lawe wale a hoopoino i na mea ulu, a kukulu wale a hookuu wale paha i na holoholona a komohewa paha ma ke ano e a'e maluna o na aina ponoi a me na aina i hoolimalima ia e ka Hui Mahiko o Waihee, Maui. O ka mea hookuli i keia hoopii koke ia no e like me na Kanawai o ka Aina, nolaila o ka hoolohe oa ka pono o pilikia auanei.

                                                                                    JAMES MAKEE & CO.

Waihee, Maui, Sept. 7, 1878.                                                  910 6m 933

 

AINA KUAI A HOOLIMALIMA.

He Kanalima Kumamaona eka aina ma Iwilei. (Makai iho o ka Halepaahao.) He Loko I-a, Aina Kalo, Aina kau Paakai, aina kula a me ke kai. A me kekahi mau eka aina ma Peleula, he aina kalo, aina kula a me ke kai. He oluolu ke kuai ana. E ninau ia

            Honolulu,                                                                                                        J. H. CONEY, (Koni). 865 tf

 

HOOLAHA NO HALAWA.

Ke papa aku nei au i na kanaka a pau, aole e alualu a pepehi i na Pipi ahiu hao ole e hele ana ma ke kula a me ke kuahiwi o Halawa, e hoopiia lakou ma ke kanawai, oiai, owau wale no ka mea nana keia mau bipi.

                                                                                                            J. @ DOWSETT, Kimo Pelekane.

                        Honolulu, Iulai 2, 1879.                                                                                  918 3m

 

KO BIHOPA MA BANAKO MALAMA DALA!

E MALAMA NO MAUA I KE DALA O na kanaka maloko ka Banako, penei:

            Ina hoomoe mai ke kanka hookahi i na dala $700 a emi mai paha, alaila, e uku maua i eono hapahaneri ukupanee makahiki, mai ka la o ka lawe ana mai a hiki i ka la o kena ohi ana, ke waihoia ke dala, hoomoe i ekolu malama a keu paha.

Aole ukupanee e helu ia no ka hakina o ke dala hookahi, aole no hoi no ka hapa malama.

            Ina ohi koke oia i kana dala, aole i hala na malama ekolu aole ukupanee.

            Ina i manao ke kanaka e ohi i kana dala, e pono ke hoike e mai oia ma ka Banako i kona manao ohi, i kanakolu la mamua o kona ohi ana, a o kana Buke kekahi ke laweia mai.

            Ma ke kikoo wale no a ka mea dala e haawi ai i kana, a o ka Buke kekahi ke laewia mai.

            Ma ka la mua o Sepatemeba i kela makahiki a i keia, e houluulu ai i ke dala, a e huipuia ka ukupanee me ke kumupaa o na dala i hoomoeia no na malana ekolu a keu, a mahuahua, ke kumupaa e loaa i ka ukupanee.

            Ina oi aku ke dala hoomoe mamua o $300, a laila, hooholo pu ka olelo.

            E weheia ka Hale Banako i na la hana a pau.

            851 tf                                      BISHOP & Co.

 

DR. RODGERS,

----OIA O-----

KAUKA LOKEKE.

Ua hoonee ae nei i kona keena oihana mai ka hale ae o Alikene ma Monikahaae a iloko o ka Hale Mu, helu 54 Alanui Papu.

            Ma keia hope e hoomakaukau ana ke Kauka i kona mau Laau pono a puunaue aku i ka poe kii mai.

O kona hale noho, aia no ma ka pa o ka Hotele Hawaii, ma kahi i noho mua ai.                                           851 tf

 

E. STREHZ,

(AILUENE.)

MALAILA E LOAA AI NA ANO LAAU A pau; ame na wai hoomaemae o kela a me keia ano. E hamama mau ana ka ipuka ma na po Poaono a pau. Ma ke kihi o alanui Papu a me Hotele, ma Monikahaae.                           (845 ly)

 

HOEMI NUI!

UA HOOEMIIA KE KUMUKUAI O NA HUILA HUMUHUMU LOLE,

Maia ke Kanalima Dala a hiki i ke Kanakolukumamalima Dala, nolaila, e wiki mai oukou o pau e auanei. E loaa pu no ma ko makou HALEKUAI na mea hao o na ano a pau.

O-O, KOPALA, KOI, PALAU, KOPE, PAHI, IPUKUKUI, PENA, AILA &c. &c. &c. &c.

A me na Lako Kukulu Hale o kela a me keia Ano.

E kipa mai ma ko makou Halekuai Hou ma Alanui Papu,

Helu ST.                                              DILINAHANA MA.

911 3m 923

 

MAIKAI KA HOI KA PAPA!

-A ME-

KA LAAU O KOU HALE!

NO HEA LA?

KAI NO HOI NO KAHI O

WAILA MAI

 

Nana aku no hoi ia la

Ohi ka lo ka Laau o Makawao

I ka ua mea hoi o ka nani o

 

Na PAPA! Na PAPA!!

-A ME-

NA PONO KUKULU HALE

O NA ANO NO A PAU.

------

Aia ma ke kihi o na

ALANUI PAPU me MOIWAHINE!

HONOLULU

MALAILA E LOAA AI E LIKE me ka MAKEMAKE

-NO KE-

KUMUKUAI MAKEPONO LOA!

-------

PAPA, PAPA, PAPA,

 

Na Papa Huluhulu,

Na Papa Manoanoa,

Na Papa i kahiia,

Na Papa Kepa,

Papa Hole Keokeo,

Papa Hole Ulaula.

----

NA LAAU, NA LAAU

Na Kua,

Na Kaola,

 Na Aaho,

Na Moli,

Na Peapea,

Pine Huluhulu,

Pine i kahiia.

 

NA Papa a me na Laau Ulaula!

Pili ulaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

-------

PENA O NA ANO A PAU

Hulu Pena mai ka Liilii a ke Nui,

 Aila Pena,

Aila Hoomaloo,

Waniti, Pate.

NA LAKO O KELA AME KEIA ANO

Na Ami Puka Hale.

Na Ami Puka Pa.

ANIANI!

Pepa Hale a me na Lihilihi

E LOAA NO MALAILA.

 

PAAKAI HELU O KAKAAKO me PUULOA

            No ke DALA KUIKE, e loaa no na mea a pau i haiia ae la, no ke Kumukuai Emi loa. O na kauoha a pau mai Hawaii a Niihau e loaa ku ana ia lakou, e hooko koke ia no ia me ka lawa pono.

 

E Kipa Nui Ilaila, i ike i ka Olaio