Ka Nupepa Kuokoa, Volume XIX, Number 7, 14 February 1880 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIX. HELU 7}          POAONO, FEBERUARI 14, 1880.  {NA HELU A PAU 950.

 

KA NUPEPA

Kuokoa me ke Au Okoa

I HUHA.

NA OLELO HOOLAHA: O na Olelo Hoolaha he 10 laina kakau lima, he Hookahi dala no ka puka mua ana; elua puka ana, he $1.50; no hookahi mahina, he $2.00.

NA KANIKAU A ME NA MELE: He 10 Keneta ka uku no ka lalani hookahi, ua like me $1.00 no 10 lalani.

HOOLAHA MAU: E hoomanao na makamaka a e hookomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.

            E hoomanao e na lehulehu, aole e hoopukai kekahi Olelo Hoolaha, Kanikau a me ke Mele ke ole e hookaa mua ia mai ka uku.

 

KA MOOLELO O

BERIANA KA WIWO OLE

 A ME

MAHONE KE KOA:

MOKUNA XVII.

 

A ka nee aku la ka moneka Malaki me ke 'lii Mukada me ko laua mau wahi koa uuku imua me ka hopo ole, me na manaolana ana e hiki mai ana no na kokua.

            Honee ae la lakou i ko lakou mau koa imua o ke alo o ka pakaua, a hoouna aku la ke 'lii Mukada he elele e noi aku ana i ka haawi pio anu mai o ka pakana i ka Moi Beriana.

            I ka hele ana aku o ka elele imua, a pupuhi aku la i kana o-le, ike mai la ke 'lii Powa iaia mai ka pakaua mai a pane mai la:

            Heahu ka manao a kou haku e hoike mai ai ia'u, e Sir Elele.

            K kamailio pu anei au me ka mea i kapaia ka Haku Powa o no kuahiwi? wahi a ka elele i pane aku ai.

            E kamailio pu oe me ka mea i haawi ole iaia iho e kulou imua o ka mea pakaha wale, oia o Beriana o Tekomona, a ina ua kupa mai kou haku ia'u he powa, alaila, ke kapa aku nei au iaia, imua hoi o kona alo he hoopunipuni nui oia.  Ua paio pu au me ia iloko o ko'u mau la opiopio, a e palo hou aku me ia a hiki i ka make.  Heaha kau e imi nei ia'u ma keia wahi.  E pane koke mai ano, o hoihoi aku au ia oe i kou haku me na maka iho wela o na pua ma kou kino.

            Na ke 'lii Mukada i hoouna mai i ke kauoha imua ou e ka powa o na kuahiwi, pela o Mulaki o Mia i hui pu aku ai me ia e kue aku i na enemi a pau o Erina maloko o kou pakaua.  Ina he poe kanaka koa io oukou me ka oiaio, alaila, e puku aku oukou a e halawai pu me lakou ma ke kahua akea a e hooili kaua.  Ua aa mai lakou e paio he ihe a he ihe, pahikaua a me ka pahikaua, a i lanakila oukou, e komo lanakila aku oukou iloko o Dubelina.

            He kauoha maikai kela, wahi a ke 'lii Kale, oiai oia e ku ana ma ka aoao o ke 'lii Powa ia manawa.  E puka aku kakou iwaho a e halawai me lakou ma ke kahua akea.

            E nana aku oi ilalo i na koa lio me na laau ihe e maalo ae la ma ke ala, wahi a ke 'lii Powa.  E poholo pu auanei ko kakou nui i ko lakou; a no Malaki hoi, he koa oiaio wiwo ole oia.  Aole au i kanalua no ke ku ana aku imua o lakou ma ke kahua akea aka, ina e komohia ana oe e auamo i na maewaewa o ke kaua ma Clontarf, alaila, he mea makehewa ia kakou ke puka aku e halawai me lakou i keia wa.

            A heaha kau e haua'i? wahi a ke 'lii Denemaka i ninau aku ai me ke ano kanalua.  E pau kakou i ka luku ia ianei, e like hoi me na ilio hae iloko o ko lakou mau lua iho.

            E hoolana i kou manao e ke 'lii, wahi a ke 'lii Powa.  E paa kakou i ka pakaua o kuu mau kupuna e like me ka hiki.  Aka, ina kakou e auhee, e paulele maluna o'u a na'u e alakai aku ia oukou me ka maluhia a i na paia pohaku o Dubelina.  Nolaila, e makaukau oukou no ka puka aku, ke hoohiolo mai lakou i na paia o ka pakaua.

            Alaila, haliu aku la ke 'lii Powa i ka elele a pane aku la:  E lawe aku i ka'u olelo a hoike aku i kou haku.  E hai aku oe i ke koa Malaki, he mea ehaeha no'u ke kau ana i ko'u lima maluna ona i keia po.  E hoike aku hoi oe i ke 'lii Mukada, ke hoino nei au iaia a me na kanaka Delakasiana ona a pau, ana e lawe mai ai no ka hoao ana e lawe i ka pakaua.  Nolaila, e kaawale aku ano, aole he olelo hou aku e hoike aku ai.

            I ka wa a ka elele i huli hoi mai ai me ka olelo i kona haku, ia manawa i lele makawalu mai ai na pua mai na huini mai o ka pakaua a i na koa e hoao aku ana e lele kaua aku maluna o lakou, oiai na leo hooho o ka hoomaewaewa a me ka hoino e pahola ana ia wa me ka ikaika.

            E hoohiolo kakou i ka lua o na powa, wahi a ke 'lii Mukada.  E oki aku i na laau opiopio e na Delakasiana, a e hana aku i mau alapii.  E hooluolu ia oukou iho malalo o ka malumalu o ka malu o ka pali, a hiki i ka wa e makaukau ai kakou no ka lele ana aku maluna o lakou.

            Eia hou ae he mau puali koa hou e Mukada, wahi a Malaki, iaia i kuhikuhi aku ai ilalo o ke alahele.  Ua hiki ia kakou ke hooneoneo ia lakou.

            Na na leo hooho hauoli i hoike aku i ka poe e pii ana ma ke ala mauna i ko lakou hui olioli pu ana; a me ka poe iloko o ka pakaua, no ka hiki ana mai o na kokua o ko lakou mau enemi.

            Haawi aku la ke 'lii Powa i ke kauoha i kona mau kanaka pana pua e hoomau i ka hoolele ana aku i ka lakou mau pua i na Delakasiana i okioki ana i na laau opiopio ma ka aoao o ke kuahiwi, oiai iloko o ka ponaha waho o ka pakaua na Denemaka a me na kanaka Leinster e ku makaukau ana ma ka aoao o ko lakou mau lio kaua no ka puka ana aku iwaho, ke puka aku ka huaolelo mai ko lakou haku aku.

            Iloko o keia manawa, e hookokoke aku ana o Mahone a me Donala maluna o ko laua mau lio ma ke ala e hiki ai i ka pakaua me ka awiwi nui, oiai ko laua mau puuwai e kapalili ana me ka pihoihoi nui no na leo hooho ka hauoli e hookokoke mau mai ana io laua la.

            Ia laua i hiki ai i ka piko o ke kuahiwi, ike aku la laua he puali Delakasiana imua no ka hoouka kaua ma ke alo o ke alahaka huki, oiai kekahi poe e hoao ana e pii aku ma na paia pohaku o ka pakaua me na alapii

            I ka wa a ka naita opio a me kona ukali i hiki mua ai ma kahi e waiho hamama ana imua o ka pakaua, o na Delakasiana malalo o ke alakai ana a Mukada, ua hookahua iho la i ko lakou mau kapuai ma na aoao o ka pakaua.

            E lele kaua aku, wahi a Donala, iaia i lele iho ai mai kona lio iho, a holo aku la no kekahi o na alapii.  E luki ia na iliohae o ke kuahiwi e kakou maloko o ko lakou poopoo.

            Ua anehe aku ke koa opio e ukali aku i kona hoa, aka, kahea mai la ke koa Malaki iaia, a pane mai la: E ku iho e Mahone.  E hoomakaukau ia oe iho no ka lele ana aku maluna o ka enemi me a'u.

            I ka oili ana aku o ka huaolelo mai kona waha aku, o ka manawa no ia i hookuu ia mai ai ke alahaka me ka hikiwawe, a puka mai la ka puali holookoa o ka enemi.

            E komo aku mawaena o lakou a holo aku ma ke ala, wahi a ke 'lii Powa, iaia i puka mai ai me na Denemaka opio pu me ia.

            E hopu i na enemi a me na pio, wahi a Malaki i kahea mai ai.

            E kou ma na lio, i pa-e mai ai ka leo o ke 'lii Mukada mai ka aoao mai o ka pakaua. Ua pakele aku lakou.

            Na ka nakeke ana o na makakila, na leo hooho o na enemi a me ka leo mauliawa o ka poe make, oia wale no na leo lohe ia ma ka piko o ke kuahiwi ia wa.

            Aole i pau.

 

HE MOOLELO KAAO

-NO-

VONA KA WIWO OLE

-A ME-

FINITI KA UI

-O-

NOREWAI.

 

            A HALA ka hora a oi aku, puoho hou mai la ia a kahea mai la i oi pakolu ae ka nui i ka leo i ko ke kahea mua ana; "Aole anei i makaukau?"  Kahea aku la ke kolu o na kulu koko: "Ua makaukau."  Ala ae la ua kanaka nui nei, a noho iho la iluna o ka inoe, anaanai ae la i kona mau maka, a nana ae la mao a maanei me ke ako e ike aku i ka mea nona ka leo e pa-e mai nei; aka, he mea makehewa ka nana ana aku, "ua hala ka Puulena aia i Hilo ua imi aku la ia Papalauahi."  "Pupuhi ka ia o Ukoa."  Aohe mea ana i ike aku ai.

            Kahea aku la oia me ka huhu, "E Finiti, no keaha ka mea i makaukau ole ai ka mea ai maluna o ka papa kaukau?  Aohe haina i pa-e mai.  Piha loa iho la ua kanaka nei i ka ukiuki, lele aku la oia mai luna mai o ka moe, a lalau aku la i kekahi puna kioe supa i like kona helehelena me kekahi o na ipu hao ninini hao o Ulakoheo a kioe ae la i ke supa mai loko mai o ka ipu hao, a hoao ae la.  Kahea aku la oia ia Finiti me ka huhu, i aku la, "E Finiti, no keaha ka mea i hookomo ole ai oe i paakai iloko o keia supa?"  Heaha ke ano o keia supa?  Aohe ano mea ulu, aohe no hoi he ano io."  Aohe no hoi mea i pane mai, aka, ike iho la ia i kona moena iloko o ka ipu hao, aole i palahe i ka paila ia.  Ma kona ike ana aku i keia mau mea i hana ia, piha loa iho la kona manao i ka huho, a hiki ole i kona mau wawae ke kaohi iho i ka huki ana a na io paahana.

            Lapuwale maoli! wahi ana i kahea ae ai; ua hana mai oe i kekahi hana pono ole imua o'u, aka, e uku ana oe no ia mea.

            Ia wa koke no, o ka holo aku la no ia o ua kanaka nei me ka pauku laau ma kona lima.

            Iloko wale no o ka hapaha hora, o ka ike ia aku la no ia o ua mau wahi mahuka nei ua kaawale loa no mai kahakai mai.  Ia manawa, o kona kahea aku la no ia me ka leo nui i piha i ka hauoli e haalulu ai ka honua nona na mile he 36 ke anapuni.

            Ku malie iho la o Finiti me ka haalulu.

            Imua e Kereva! wahi a Vona, aohe no hoi i mamao loa kahakai, ai ae no hoi la; e hiki e ana no kaua mamua o ka hiki ana mai o ka enemi.

            Ei ae! eiae ua kanaka nei, wahi a Finiti me ke kuhikuhi ana aku o kona lima i ke kanaka nui e holo mai ana, me he mea la, aole i hiki aku i ka haneri iwilei ka mamao mai o laua aku.

            E make ana kaua ke ole e hoola mai keia mau puupuu ia kaua.  Lalau iho la o Finiti i ka puupuu keleawe a hoolei aku la i ka honua, me ke kahukahu ana ae, "E ka puupuu keleawe ke noi aku nei au ia oe, e hoola mai oe ia maua, e hoopaa i ke kanaka nui ma kona alahele."  Ia manawa koke no o ka owa koke ae la no ia o ka honua a kaawale mai o ao, me ka halulu nui, a owaawaa iho la ke alanui, a ike ia aku la he lua hoonu launa ole i hiki ole ke ike ia aku kona papaku no lalo, a oia ke kumu nana i hookaulua i ko Kahekili hopu koke ana mai ia laua, a lele ino aku la oia ma o a maanei me ka ikaika nui, me he mea la e alualu ana i kana mea e ale ai.

            "E u holo kaua! wahi a Finiti i kahea ae ai.  Hopu aku la o Finiti i ko Vona lima a kauo aku la, oiai oia e nana ana i ka lalama mai a ke kanaka nui, me ka lele ana mao a maanei me kona ikaika nui a pau.

            Holo aku la ua kanaka nui la i hope, imua, i o, ia nei, me kona ikaika a pau, e like me ka hea i hoopaa ia iloko o ka pa hao e imi ana e loaa ona wahi puka e puka aku ai i waho.

            Pela okoa iho la no ua kanaka la i hana ai, aka, he mea ole ia hoooikaika ana.   Ike aku la oia i kekahi kumu laau oka e ku ana lele ino aku la oia a hopu aku la i ke aa o ua kumu laau la, a lewalewa ae la kona kino nui pepeekue i ka lewa, a me kona hooikaika nui i hauhili ae ai oia ma na lala o ua kuinu laau la, kau aku la oia ma kela aoao.

            I kona kau ona aku ma kela aoao, ike aku la oia i na mahuka (Vona a me Finiti) ua aneane hiki loa aku i kahakai, a aia imua o ko iaua alo ke uhola mai la na poianalu o ke kahakai.

            Auwe! hookahi mea pilikia, aohe he wahi moku hookahi ma ia wahi, aohe mea i koe, hookahi wale no o ka noonoo iloko o laua, aia laua iloko o ka poho lima, o ko laua haku me ka ike ole i kana mea e hana mai ai, o ka make paha, o ke ola paha, aia i kahi a ka aumakua e hoopomaikai mai ai.

            O ko Vona ano mau no hoi o ke ano koa, lalau iho la oia i na pohaku ilalo me ka manao e lele aku maluna o ke kanaka nui ko laua enemi a e lawe ae i kona ola.  Hoolei aku la o Finiti i kekahi o na puupuu kala me ke ano haalulu i ka makau nui me ke kahukahu ana ae.

            "E ka puupuu kala, he hulali a he aliali kou.

            E hoola mai oe ia maua mai ka lima mai o keia kauaka nui weliweli."

            A i ka pau ana ae no o keia mau huaolele kalokalo a Finiti, o ka manawa koke iho la no ia i hoeo mai ai o kekahi moku nani mai na ale anaanapa mai o ka moana me he nene la e pahaha mai ana i kona mau eheu i ka ili o ke kai e lawe palanehe ia mai ana e na aheahe makani o ka moana.

            Lele aku la o Vena a me Finiti iloko o ke kai a au aku la i ka moku, aia hoi hoolei ia mai la kekahi kaula ia laua na kekahi lima i ike ole ia, a huki ia aku la laua nei kau ana iluna o ka moku.  A i ka hiki ana mai o ke kanaka nui i kahakai, aia hoi ua puhalahiu aku la laua'a iluna o ka moku; o ka hao a na pea heke, ahu iho la ka hoka i kapakai.

            He mea mau, he makau na kanaka nui oia ano i ka wai, nolaila, aole oia i au aku i ka wai (kai) ia manawa.

            Ua hoike ia keia mea iloko o na moolelo kahiko i kakau ia e Homera kekahi kanaka ka@iana o ka wa kahiko ma ke kakau moolelo a me ka haku mele.

            Kahea ae la oia me ka leo nui (Kahekili) i kona ike ana aku i kana mau kauwa e u holo ana.

            Holoholo ae la oia ina na kapakai me ka wela o ka inaina, a kipehi aku la me na mamala pohaku nui maluna o ka moku, a he mea laki loa ka haule ana ae oia mau pohaku ma na aoao o ka moku, a o kahi a keia mau hohaku e haule aku ai, ua ike ia aku he mau pohaka lua eleele iloko o ka wai.

            Ike iho la oia, he mea ole wale no kana hooikaika ana, ano ka piha loa ana mai o ka inaina iloko o ua kanaka la, aohe ana mea i koe e noonoo ai, hookahi wale no o ka au aku a loaa ka moku.

            Ia manawa, lele poo aku la oia iloko o ke kai, a hoomaka aku la e au me kona mama nui.

            Iloko o ke au hookahi ana a kona wawae, na loaa he 40 kapuai ka loihi o kahi i hala mahope ona.

            O kana puhi ana, ua like no ia me ka ke kohala; a e holo ana oia e like me ka holo ana a ke kohola ka oloio iloko o na ale hanupanupa o ka moana kai lipolipo.  He manawa pokole, aneane keia e hopu aku i ka hoeuli o ua moku nei.  I kona makaukau ana e popu aku i ua moku nei, ia manawa, hoolei aku la o Finiti i ka lua o na puupuu kala iloko o ke kai, a kalokalo ae la me na waimaka e hiolo ana ma kona mau papalina

            "E ka puupuu kala, he alohilohi me ka hulalikou

            E hoola mai oe ia maua mai ka lima mai o ke kanaka nui weliweli."

            Ia wa koke no, puka mai la kekahi a-u nui (ia) mailoko mai o ka hohonu o ka moana me kona nuku oi aole i emi iho kona nuku loa i ka iwakalua kapuai.

            Lele pololei mai la ua au la maluna o ke kanaka nui, a no ka hiki ole ia ia ke luu iho ilalo, ua alualu ia mai la oia e ua ia la ina na wahi a pau ana e holo ai; a peia wale no oia i hana ia'i e ua au nei, a hiki i kona pae ana aku i kahaone me ka nawaliwali a ua lanakila mai la ka ia o ke kai maluna o ua kanaka la.

            Imua e Kereva, wahi a Vona i kahea ae ai.  Pane aku la oia ia Finiti, "pakele kaua la, aohe pilikia i koe, o ko'u manao, ua make aku la paha ua kanaka la."  Auwe no hoi oe" wahi a Finiti i pane aku ai me ka haalulu.  Aole oe i ike aku i ka hopena; he makuahine kupua ko ia la la, i na oia e haawi mai ia kaua ma ka poho o ka lim o kana keiki, oia iho la no, aohe o kaua wahi e ae e pakale ai.

            Auhea oe e Vona kuu aloha, ke hai mai nei na lia ana ia'u i kekahi mau minute pokole, e piha loa ia ana wau i ka makau ma na mea a pau.

            Kahea ae la o vona i ae la, "ma na mea i kaulana 'i o ko'u mau mua kaikuaana; e loaa no auanei ia oe ka puuwai o ka hare aole o ke koa wiwo ole."

            Aole anei au maanei?  I hele mai nei anei au e kala aku ia oe?   Ke manao io nei anei oe e hoopakele mai ana na aumakua o ke kai ia kaua, mai ka waha mai o ke alii o ke kai a hooili aku ia kakou ma ke a wa ka moku?

            Akaaka ae la oia me ke ano hooio, a ua liko ia mau manao i mea na Finiti e akaaka malu iho ai iloko o kona naau me ke kaumaha pu.                     Aole i pau.

 

Ka Moi Makaainana

Kenela Ulesia S. Kalani.

EI AE A HIKI MAI.

            I ka pule i hala iho nei, ua hai aku makou i ka lono i ko makou poe makamaka, ua hoe mai, a eia ke luana nei ma na paia wehe olu o "Maemae i ke Kai ka Pua o ka Hala," ka makou makana i ka poe a pau i hooko i ko makou mau rula. –oia hoi ke Kii o ke kanaka kaulana nono ka inoa ma ke poo o keia manao.  Ua kaulana keia kanaka ma kela a me keia wahi o ka honua nei, a oiai oia e hele makaikai ana i ka honua nei, e kaapuni ana hoi i ka poepoe ma ka aina a me ka moana; ua ulu nui ka iini o na kanaka e ike i kona mau helehelena, a me he mea la, aole paha he kanaka e ola nei a i make paha, i lawe nui ia ke kii o kona mau helehelena ma na aina a pau e like la me Kalani.  Ua lawe ia kona kii me na lilo nui, aka, ua minamina ole nae kanaka a wiwo ole ia mau lilo, o ka loaa ana o kona kii ka mea nui ia lakou, a loaa kekahi o na hiona nana e hoonani a hoohanohano na paia o ko lakou mau home.

            Ma keia wahi, e kala ia makou ke pane ae no makou iho, keia kekahi o na makana nani a kilakila i haawi ia e na nupepa ma keia paemoku.  O kekahi o na kumu nui nana e hookelakela loa keia ku, oia no ka hooiaio ia ana mai, aia o Kenela Kalani ke naue mai nei ma ke ala e kamoe ana i Hawaii nei, a ke hiki aku i na la mua o ka mahina ae nei o Moraki, alaila.

Hehi o Kalani i ka Lepo o Hawaii!

Nolaila, ua manao iho makou o kekahi keia o na makana maikai ina, oiai, i kona hiki ana i ko kakou aina nei, aia hoi, ua hoea e a ua kamaaina kakou me kona mau helehelena – ka mea hoi nona ka lima kakau nana i hoopaa i kona inoa e apono maluna o ke kino @@ o ke Kuikahi Panailike, ka hooiaio ana hoi i kona manao aloha a makemake e haawi mai kona aupuni i na kokua ana i ke aupuni a lahui Hawaii, ka mamo hoi a ua Repubilika Nui la i hanai aialo ai a ku a heie.  He oiaio, o ka mea e loaa ana keia kii, e loaa ana ia ia ka pomaikai o ka ike kumaka ana i na helehelena o neia kanaka kaulana nui wale.

            Ua hiki ole ia makou ke kapae ae i ke kamailio pokole ana no kekahi o na hana koa wiwo ole a keia kanaka maluna o ke kahua kaua, imua hoi o ka waha o na pukuniahi, a iwaena ua elele a ka pauda, ka poka kepau weliweli.  Aia ma ke kahua o ka hoouka kaua weli hahana ma Pittsburg Landing; i ka hiki ana aku i ka aluna ahiahi, a ua pouli ka lewa me ka uwahi, a kaumaha hoi ke ea me na ahe makani polopolona o ke koko kino kanaka, a e waiho mokaki ana na koa poino me he lau laau la mahope iho o ka pa ana o kekahi kikiao makani kona ikaika – ia manawa, e ku ana ua Kalani nei ma kekahi wahi oneanea, aohe ana pono kaua, ua waiho aku i kana pahi ma kahi e no ka manawa.  E ku ana oia malaila e noonoo ana no ka hana hope aku a kona mau koa e oni ai, a oiai oia e ku hookahi ana, ua haupu wale ae la no kona manao no kekahi mea ana i hoomaopopo ole iho ai iloko ona, aka, na ia haupu ana i hoaui ae i kona mau noonoo ana a leha'e la kona mau maka ma ke kini akau o kona mau laina koa a lele ino ae la kona oili i ka hoomaopopo ana aku, e like me ka pii ana ae o kekahi ale nui kawaha a emi iho, pela kona mau laina koa oia aoao e nee aku ai a emi hou mai la i hope, me ka hooikaika nui no nae, aka, me ka nui no nae o ka make, oia no oe o na kumu raiki e kamoeia ana e ka oi o ka pahi a ke kanaka oki.  Poina iho la ia i na mea a pau, a lele aku la me ka holo mama loa ana, a hou aku la mawaena o na koa a ku ana imua o lakou.  Ia manawa, akahi no oia a hoomaopopo iho ua olohelohe kona kino, aole kana mau pono kaua, aka, kulou iho la oia ilalo, hopu iho la i ka pu a kekahi o kona mau koa e moe ana i kia moe puauanu, a huli mai la ihope a pane mai la: "Imua e o'u mau koa wiwo ole, a na'u oukou e alakai a lanakila mamua o ka napoo ana'ku o ka la!"  A ua oiaio kela mau huaolelo.  I ka hoomaopopo ana mai o kona mau koa i ko lakou alakai imua o ke alo o ka make, aia hoi, ua holo ae la ka wawalo o na leo kupinai hae o ka hauoli mai kela a me keia puuwai he mau tausani, a nee aku la lakou imua, e like la me ka oku ana'e o na nalu o ke kahakai, poha mai la a olokaa mai la me ka nee lalani ana i mua, pela iho la na koa o ke aupuni ia la, me ko lakou alii aloha e alakai ana, he pu ma kona lima.  Mamua o ka napoo ana o ka la, ua auhee aku la na koa o ka aoao kipi, a e welo ana i ka welelau o ke ahe makani ka hae nani kaulana o Amerika maluna oia kahua kaua weliweli, a moe iho la ke poo o kela a me keia kanaka koa ia po malalo o na hiona hauoli, i loaa'i na moeuhane hoomama a hoohoihoi puuwai o ka halawai kino uhane ana me na makua, ka wahine a keiki paha, ma na home he mau haneri lehulehu mile ka mamao mai ia honua hookahe koko aku.  Ia po, mamua o ka hookuu ana o kela a me keia no ka hooluolu ana i na kino maluhiluhi, ua lohe ia aku na leo pule hoomaikai i ke Akua, a ua puana ia'e ka inoa o ko lakou alakai aloha maloko o ka lakou mau noi no na hoopomaikai ia mai.  He oiaio, ua kupono ka olelo kaulana a kahi keiki hoomani pahu o kona mau kou, he umikumamalua wale no makahiki – "O kona mau koa kana mau keiki, a oia hoi ko lakou makua i ka wa o ke kaua, a i ka wa o ka hoomoana."

 

Palapala Hoomaikai.

E na Makaaikana. Aloha oukou:

            O makou o ka poe nona na inoa malalo iho, ka poe i hoio ma ka Paa Balota hookahi, ke haawi aku nei makou i ko makou mahalo me ke aloha pumehana ia oukou i ka poe i hoomanawanui, e koho kapaa ma ko makou mau inoa, a hiki i ka hope o ke koho ana.

                        Ed. K. Lilikalani

                        R. Hoapili

                        G. H. Lahilahi

                        D. Kahanu

            O maua hoi o Ed. K. Lilikalani, a me R. Hoapili Baker, ke hoike aku nei maua ia oukou, na makaainana o ka Apana koho o Honolulu ma o maua iho, e hooko maua, me ke koho kaulike, ma na kumuhana a pau, e hoea mai ana iloko o ka Hale Ahaolelo o keia Kau e hiki mai ana.

                        Ed. Lilikalani

                        R. Hoapili.

            Haimoeipo, Honolulu, Feb. 4, 1880.

 

MAIKAI KA HOI KA PAPA!

-A ME-

KA LAAU O KOU HALE!

NO HEA LA!

KAI NO HOI NO KAHI O

WAILA MA!

Nana aku no hoi ia la

Ohi ka lo o ka Laau o Makawae

I ka ua mea hoi o ka nani o

 

Na PAPA! Na PAPA!!

-A ME-

NA PONO KUKULU HALE

O NA ANO NO A PAU.

 

Aia ma ke kihi o na

ALANUI PAPU me MOIWAHINE

HONOLULU

MALAILA E LOAA AI

E LIKE me ka MAKEMAKE

-NO KE-

KUMUKAUI MAKEPONO LOA!

 

PAPA, PAPA, PAPA,

Na Papa Hululu,

Na Papa Manoanoa,

Na Papa i kahua,

Na Papa Kepa,

Papa Hole Keokeo,

Papa Hole Ulaula.

 

NA LAAU, NA LAAU

Na Kua,

Na Kaola,

Na Aaho,

Na Moli

Na Peapea,

Pine Huluhulu,

Pine i kahua

 

NA Papa a me na Laau Ulaula!

Pili ulaula,

Pili Keokeo,

Pani Puka,

Pani Puka Aniani,

Ipuka Aniani,

Puka Olepelepe.

 

PENA O NA ANO A PAU

Hulu Pena mai ka Liilii ake Nui,

Aila Pena,

Aila Hoomaloo,

Waniti, Pate.

 

NA LAKO O KELA A ME KEIA ANO!

Na Ami Puka Hale.

Na Ami Puka Pa.

ANIANI!

 

Pepa Hale a me na Lihilihi

            E LOAA NO MALAILA.

PAAKAI HELU I O KAKAAKO me PUULOA

            No ke Dala Kuike, e loaa no na moe a pau i hai ia ae la, no ke Kumukuai Emiloa.  O na kauoha mai Hawaii a Niihau, e loaa aku ano ia lakoa, e hooka koke ia no ia me ka lawa pono.  E kipa nui ilaila, i ike i ka oiaio.             905tf