Ka Nupepa Kuokoa, Volume XIX, Number 11, 13 March 1880 — Na Leta a na Makamaka. [ARTICLE]

Na Leta a na Makamaka.

– Ua loaa mai kau leta e Daniela Kikaha a ke hooko ia aku nei e awiwi mai i kau mau dala no ke ola o ka nupepa. – O kau kauoha makana e S. Kaili, ua hooko ia aku nei. — Ke hooponopono ia aku nei kau e E. H. Umiamaka e kakau pololei mai i ka papainoa. – O kau e J. H. Pahio, ua hookoia. — O kau e D. Kapule, ua hookoia. – O kau e F. Lua. ua hoouna ia aku; a pehea la i hiki ole ai? Ke hoouna hou ia'ku nei e like me kau kauoha. – Ua loaa mai kau e J. N. Uahinui o Kaunakakai, e hai mai ana no ka makaukau o na ko a Mr. R. W. Meyers ma ke awa, no ka hoouna mai i Honolulu nei; a e hai pu mai ana oe i ke akamai o kaua mau keiki i ka hana; he hua ia na ka manaoio hana; he mea waiwai ole ka haanou i ko hai pomaikai, o ka mea nui, o ka ukali aku mahope o kona meheu, a pela e pomaikai ai; aka, ua mahalo no. — O kau e J. B. Kahoohuli e hai mai ana no ka makau o na kanaka i ka hana a na haku, e pono ia oe e paipai ia lakou e hele i ka hana, oia ke kahua o ka noho ana ulakolako a kuonoono; aka, i na ua paa lakou ma ka lakou mau hana ponoi, ua pono no. A no ke ano o ka aina a me na kanaka, ua like no ia me na wahi e ae. – Ua loaa mai kau e Rev. S. Paulo o Molokai e hai mai ana i a make ana o Kelupaina, he kaikamahine opio oia nona na makahiki he 16 wale no, a ua aloha nui ia oia no kana mau hana ku i ke aloha a me ka mahalo ia. Pomaikai wale, i na pela ka hapanui o na kaikamahine Hawaii. — Ua loaa mai nei kau e Samuela Nalehuaolihau o Olowalu e hai mai ana i ke kahuli ana o ka waa o kekahi mau kamaeu oia wahi a luu poo ana iloko o ke kai–laki nae ihea la ka olali o kai. E pono no e akahele ka hookelakela i na la ino. — Ua loaa mai nei kau e S. R. W. Puuolai o Wailuku, e hai mai ana i ka "lapaau hoopunipuni o • • • o Honuaula a ua huli aku ka L. K. A. oia wahi mamuli o na pahele a ua kanaka la. He 15 akua o ua kahuna la: akua namu Pake, akua namu haole, akua leo iki a pela aku. Aole makou e kamailio nui ana no ka poe oia ano; oiai, ua nui wale ke kamailio ana no ia poe i ka nupepa i hala; aka, no ka poe e hahai aku ana i ka lakou alakai hupo ana, me ka ike aku no o ke kanaka i hoonaauao ia he mau hana hupo ka ia la, eia nae, hahai aku la ia poeleele. "He mea kupanaha keia," wahi a Puuolai–"Ke lilo nei ka henehene aku i ka poe naauao i ka naaupo." — Ua loaa mai nei kau e Petero o Kipahulu, no ka nui o ka nalu o Kipahulu, ua pakele ke ola o kekahi poe ohua o ka Mokolii mai poino. — Ke kali iki nei makou i kau e E. Kahaleohu no kau kauoha makana a hooko aku no ma o ko oukou luna la. — Hana mau ka ua mao ole no Hilo, wahi a Pahio. — Ua loaa mai he leta na J. Kahualoa o Kohala, e hai mai ana no ke kuulala ia o kekahi poe ona, aole i hooko ia aku ke kanawai maluna o lakou. He mea keia i kamalio nui ia ma na pepa i hala iho nei; a o ke kumu nui hookahi no ia nana e hoomahuahua ia hana o ke komo pu o ka poe nana e hoomalu i ke ala ana mai oia mau hana hoohaunaele, aole i kiuai ia. Ina e komo pu ka mea hoomalu me ka poe ana e hoomalu aku ai, ma ka hana hookahi, alaila, ua aloha kekahi i kekahi, aole e kue aku. — O kau e G W K Koaliopio, ua mare ua o Keaupuni me Kaupena. Ua hanau ia o Kamaluwahine – Mahalo i na makamaka.