Ka Nupepa Kuokoa, Volume XIX, Number 16, 17 April 1880 — Ke Kula o Waialua. [ARTICLE]

Ke Kula o Waialua.

He mea i kupono i ka mahalo ia ka hooikaika ana o na haumana o ke Kula Kaikamahine o Waialua e hapai nei e hooholo mua ia kula ma ka hoomaemae hou ana i ko lakou mau hale. O kekahi no hoi keia o ko kakou mau kula piha loa. He kanaono ka huina o na haumana, wahi a ka lono i loaa mai. Ua kokua no hoi ka Papa Hoonaauao he mau haawina dala no ke kula. a ua loaa no hoi he haawina dala mai kahi e ae no ke kula. Aka nae. aole i lawa pono keia mau dala no ka hoomaemae pono ana i na hale a ku pono i wahi e noho pu ai na haumana me na kumu. Ke waiho la na hale me na hemahema he nui. Iloko o keia mau mahina i hala ae nei, ua hapai na haumana o ke kula i noonoo ana, pehea la e hiki ai ke hana hou ia ko lakou wahi a maikai, a maemae kupono e kapa ia ma ka inoa he hale hoonaauao? Ua hoopuka lakou he leo kahea ma ke KUOKOA, e paipai ana i na makua me na makamaka e alu like a e kokua pu ma keia hana. Ua hooikaika no hoi lakou me ko lakou mau lima ponoi ma na hana mikiala a ko lakou mau lima no ka imi ana i ke dala e hiki ai keia hana a lakou e noonoo nei. Ua noonoo lakou e imi i $2000 no ia hana. O ka mea hilu loa iloko o keia, he manao keia i ulu ae no loko ae o ka noonoo o na keiki o ke kula. aole mai na kumu aku. Na na haumana i hookumu keia manao a na lakou e hooikaika nei no ka hooko ana. Ua maliu ia no hoi ko lakou leo e kekahi poe, a ke kokua pu nei lakou. Aole anei he hana keia i kupono ke mahalo ia, a aolehoi o ka mahalo wale no, aka o ke kokua pu ia e na makua a me na makamaka a pau? Ua oi aku ka maluhia o Hawaii i na kula maikai mamua o na pakaua he tausani a Hoapili ma. He punawai hoola ke kula maikai no ka lahuikanaka.