Ka Nupepa Kuokoa, Volume XIX, Number 43, 23 October 1880 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke au Okoa

I HUIIA.

No ka Makahiki, $2.  Eono Mahina, $1.  Dala Kuike ka Rula.

 

KOMITE HOOPONOPONO.

SAM'L KAAIKAULA.

HEZEKIA AEA.

 

POAONO.  OKATOBA 23, 1880.

HOOLAHA AHAHUI KULA SABATI.

            E halawai ana ka ahahui kula Sabati o na mokupuni o Maui, ma Haiku ma ka Poalua mua o Novemaba M H 1880, oia hoi ka la 2, nolaila, ke kauoha ia aku nei ka poe a pau i kuleana ma ia halawai, e hele mai me ka makaukau.

            O Nawahine.

 

HOOLAHA KULA SABATI.

            Ina lala a pau o ka ahahui kula Sabati o na mokupuni o Maui nei, ke kauoha ia aku nei oukou a pau, e akoakoa ae oukou ma Haiku, Hamakua.  Ke hiki aku i ka Poalua mua ae nei o Novemaba, oia ka la 2 oia mahina, hora 10 am, e hele mai na kahu kula Sabati a me na elele pu mai no.

            J K Iosepa, Kakauolelo.

 

NA KULA SABATI O HAMAKUA.

            O ka la 16 o Novemaba ae nei, e malama ia ana ma ka luakini o Eleio, Kukuihaele me na hana hookelakela a na kula Sabati o Hamakua.  1 Hoike baibala e like me ka mea mau.  2 Lulu dala no ka waihona o na kula Sabati.  Nolaila, ke paipai nui nei au ia oe a Waiamau, e ala oe, e ike ia kou mau papalina iloko oia la, hoopau ia ae ka moe kau moe hooilo, no olua hoi e Kaala me Maunahoano, ku lia a maloeloe naue mai; aole a'u hana mai Paauhau a Waipio, ua kau pono lakou i ke aki.  A ke kauoha ia nei ka poe makemake e naue ae, i ike pono i na hana.  Me ka mahalo.  Owau no me ka haahaa.

            W A Mio.

            Waipio, Hamakua, Okatoba 15, 1880.

 

            Laupahoehoe, Hilo.

            Okatoba, 13, 1880.

                        Aloha oe:--

            Oluolu no maua, akahi no wau a hoi mai nei i ko'u kihapai, a ke lawelawe nei i ka hana, aole nae i kamaaina loa aku i na hoahanau.  Ke hooikaika nei lakou i hale no ke kahu, a ua loaa na dala 106 a ke hoomaka nei e kukulu, a o ke kumu no hoi ia o maua i kali ai, o ka nele i kahi hale ole.

            A ia mahope e hai hou aku no wau ia oe no ka'u hana, ke manao nei au i na e kokua mai ana ka Haku e holo pono ana ka hana.

            Pokii iloko o Kristo.

            D K Pa.

 

            Butaritari, July 19, 1880.

                        I ka Makua aloha.

            Rev C M Hyde D D.  Aloha oe:--

            I ke kakahiaka o keia la makou i hiki mai nei i Butaritari nei, no na la holo he 28, o ke kumu o ka loihi loa, no ka nui o ka malie o ka moana.

            Ua halawai pu makou me Rev J W Kanoa a me kona ohana i ka auina la o keia la, a ua hele e makaikai i ka aina no kahi kupono e ku ai o ke kula kahunapule; a aole i hooholo paa loa ka manao, no ke ku ana o ke kula kahunapula maanei nei.

            Ua lohe i na mea hou o ka aina mai ia Mr Kanoa mai.

            Iloko o keia mau la, akahi no oia a ike i ka makemake nui o na kanaka i ka buke, a ua hele mai lakou e kuai, a ua pau kana mau buke, a ke koi hou mai nei no lakou ia ia i buke hou na lakou.  Ma na poe o ka aina kahi a na kanaka i noho ai, aia malaila ka nui o ka poe makemake a o waena iho, he ano paakiki no, wahi a laua, a i na pela, alaila, ua manao au, ua kokoke mai no ka manawa a ka Haku e ninini mai ai i Kona Uhane Hemolele maluna iho o keia mau mokupuni.

            O ke lii o keia aina, he ano muhee no, i ko makou hiki ana mai, ua ona oia, a ua hahai no na kanaka mamuli o kana hana.

            Ua oluolu maikai loa ko Hattie nawaliwali, no na la ekolu mai Honolulu mai, ka loihi o kona nawaliwali kino a mahope mai, ua ano oluolu i kekahi wa, a ano nawaliwali no hoi i kekahi wa a hiki i ka pae ana i ka aina a ua loaa nae ia ia ka ikaika e like me mamua  E hai i ko maua aloha ia Mrs Hyde.  Me ke aloha nui.

            Sol K Maunaloa.

 

Lawe pio i ka Papu.

Storm the Fort.  White Robe.

1

Ho!  na hoa, nana ae la,

E ia no Iesu,

Ke paipai la, ke kena la,

Naue a paio u,

Cho.  Naue ae, owau mamua.

Hahai mai oukou.

Naue, pii a lawe pio

Ko ka po papu.

2

Aia hoi, paapu ka lewa

i na enemi,

Ko ke ao, me ko Satana

Ku a alu ae.

Cho.  Naue ae, &c.

3

Loa no ke kaua ana,

Me ka wela no,

Nana nae; ke hanee ana

Ko ka po papu.

Cho.  Naue ae, &c.

4

Nana hou, ua hanee loa.

Lilo ia papu.

Puhi ia i ke ahi.

Oli o kakou.

Cho. Naue ae, &c.

                        HAWAII.

 

Haawina Kula Sabati

HE PAPA KUHIKUHI O NA HAAWINA NO KEIA HAPAHA.  OCT. a me DEC.

            1.  Oct 3.  Ka hoomaikai ia o Isaaka.  Kin 29: 12-25.  O ka hoomaikai ia o Iehova, oia ka mea e waiwai ai.  Na Sol 10: 22.

            2. Oct 10.  O Iakoba pu me Esau.  Kin 27: 22-40.  Mai huli ae oe i ka lima akau, aole hoi i ka lima hema; e huli nae kou wawae mai ka hewa aku.  Na Sol 4: 27.

            3.  Oct 17.  O Iakoba ma Betela.  Kin 28: 10-22.  Aia hoi, me oe no wau, a e malama auanei ia oe i na wahi a pau e hele ai.  Kin 28: 15.

            4.  Oct 24.  Ka pule lanakila a Iakoba.  Kin 32: 9-12; 22-30.  He pono ke pule mau, aole e hoonawaliwali.  Luka 18: 1.

            5. Oct 31.  Iosepa i kuai ia aku ma Aigupita.  Kin 37: 1-5; 23-36.  Owai la hoi e hiki ke ku imua o ka huahua.  Na Sol 27: 14.

            6. Nov 7.  O Iosepa iloko o ka hale paahao.  Kin 29: 21-23; 40: 1-8.  E noho malie ia Iehova, a e kali ahonui ia ia.  Hal 37: 7. 

            7.  Nov 14.  O Iosepa ke alii naauao.  Kin 41: 41-57.  Ua ike anei oe i ke kanaka miki ma ka hana?  E ku no ia imua o na alii.  Na Sol 22: 29.

            8.  Nov 21.  O Iosepa a me kona poe hoahanau.  Kin 44: 30-34; 45: 1-8.  E ao no lanakila ka hewa maluna ou, aka, e hoolanakila, i ka pono maluna o ka hewa.  Rom 12: 21.

            9.  Nov 28.  Iakoba a me Parao.  Kin 47: 1-12.  He lei nani ke poohina, ke loaa ia ma ka aoao o ka pono.  Na Sol 16: 30.

            10.  Dec 5.  Na la hope loa o Iakoba, Kin 48: 8-22.  I mai la o Iseraela ia Iosepa Eia hoi, ua kokoke au e make, a e noho ana no ke Akua me oukou.  Kin 48: 21.

            11 Dec 12.  Kin 50: 14-26.  Na la hope loa o Iosepa.  O ka hoomana ana i ka mea hoopono, he mea hauoli ia.  Na Sol 10: 7.

            12  Dec 19.  Ka hoike hope.

            13  Dec 26.  Ka haawina i koho ia e na Kula Sabati.

 

HELU 6, SABATI, NOV. 7, 1880.

KUMUHANA.

Iosepa iloko o ka hale paahao.  Pauku Baibala.  Kin 39: 21-23.  40: 1-8.

            21  Me Iosepa no o Iehova, aloha nui mai la ia ia, a haawi mai la ia ia i ka pono imua o na maka o ka mea nana i malama ka hale paahao.

            22  Waiho ae la ka mea nana i malama ka hale paahao i ka poe paa a pau o loko o ka hale paahao i ka lima o Iosepa, a o na mea a pau i hana ia malaila, nana no ia i hana.

            23 Aole hoi i nana aku ka luna o ka hale paahao i kekahi mea malalo iho o kona lima, no ka mea, aia no o Iehova me ia, a hoopomaikai ma la o Iehova i ka hana a pau ana i hana ai.

            1 A mahope iho o keia mau mea, hewa ka mea lawe kiaha, a me ka mea kahuai o ke alii o Aigupita, i ko laua haku, i ke alii o Aigupita.

            2 Huhu aku la Parao i kana mau luna elua, i ka luna lawe kiaha, a me ka luna kahuai.

            3 A hahao aku la oia ia laua iloko o kahi paa o ka pale o ka luna koa, ma ka hale paahao i kahi o Iosepa i paa ai.

            4 Kauoha aku la ka luna koa ia Iosepa no laua, nana e malama mai laua, a nui na la a laua i paa ai.

            5 Moe iho la laua a elua i ka moe, i ka po hookahi ko laua moe ana, ma ka oiaio ke ano o ko laua moe, o ka mea lawe kiaha, a me ka mea kahuai o ke alii o Aigupita, o na mea i paa ma ka hale paahao.

            6 A ao ae la, hele aku la o Iosepa io laua la, nana aku la ia laua, aia hoi, ua kaumaha iho la laua.

            7 Ninau aku la ia i ua mau luna la me ia, ana i malama ai ma kahi paa o ka hale o kona haku, i aku la, No ke aha la i inoino ai na maka o olua i keia la?

            8 I aku la laua ia ia, Ua moe maua i ka moe, aohe mea nana e hai mai ke ano o ia mea.  I aku la o Iosepa ia laua, Aole anei na ke Akua ke ano oiaio?  e hoike mai olua ia'u.

            Pauku Gula.  Hal 37:7, huli a hoopaa.

            Manao nui.  Ka hana maikai iloko o ka popilikia ka mea e hoopomaikai ia ai.

            Na heluhelu la.  1 Kin 39: 1-23.  2 Kin 40: 1-23, Luk 16: 1-12, 4 Hal 91: 1-16, 5 Hal 40: 1-17, 6 Hal 23: 1-6, 7 Hal 37: 1-29.

            Mele.  "Ke naue aku nei."  Lei Alii 139.

            Pule i naue aku kakou a pau i ka lani.

Ka Wehewehe me ka Ninau ana.

            Kin 39: 1-20.  He puuku malama pono Iosepa ma ka hale o kona haku o Potipara.  Mahalo loa kona haku ia ia, a hoolilo ia ia iluna nui, a waiho i kona mau mea a pau me kona lima.  O Iehova pu no hoi me Iosepa.  Maopopo ia i kona haku.

            Ua loaa nae kekahi pilikia nui ia Iosepa, he hoowalewale nui na ka wahine a kona haku.  Ikaika loa oia i ka pale aku.  O kona makau i ke Akua ke kumu o kona ikaika i ka pale ana.  I pakele oia i ka upena hoohihia, holo loa aku oia.  No ke ko ole o ka makemake o ka wahine, wahahee oia i kana kane no Iosepa.  Ma ia wahahee ana.  Me he la ua huhu loa ke kane ia Iosepa, a kena a e hoolei ia iloko o ka hale paahao.  No ke aha kona oki ole ana i ke poo o Iosepa?  Ke kanawai paha ia no ia karaima.  No kona kuhi ana, aole paha i hewa Iosepa.  Ka loa keia o na pilikia nui o Iosepa.  He mau pilikia nae e hoomakaukau ana i alanui e hookiekie nui ia ai oia a lilo i mea hoo a i ko Aigupita, a i kona poe hoahanau.       

            He mau makahiki he 10 paha i noho ai Iosepa me Potipara?  Pehea e loaa ai?

            P 21-23.  Me Iosepa no Iehova ia ia me Potipara.  Me Iosepa hoi o Iehova iloko o ka hale paahao.  No ka ike ana o ka Iune o ka hale paahao, aia o Iehova me Iosepa, a ua maikai kana mau hana, he kanaka oluolu, akahai, hoolohe pono i na kanawai o ka hale paahao, nolaila, hoolilo oia ia ia i mea nui, i luna no na paahao.  a no na hana a pau.  Aole oia i nana i kekahi mea, i kekahi hana.  Ia Iosepa wale no ka nana ana, ka hooponopono ana.

            Mok 40:1.  He mau malama paka i noho ai Iosepa ma ka hale paahao, a hookomo ia he mau hoa paahao nui elua.  Owai laua?  Heaha ka laua oihana?  Owai ko laua alii?  Parao hea keia?  He inoa alii Parao, e like me Kaisara, Kamehameha.

            Nui na Parao.  He Parao okoa kela i ka wa ia Aberahama.  He Parao okoa keia.  Aphophis 'Apopika' kona inoa maoli.  Ua hewa keia mau luna elua ma ka manao o ke alii.

            P 2-4.  Huhu ke alii aha i keia mau luna?  Heaha ke kauoha a ka luna koa?  Loihi anei ka paa ana?  Ua makahiki paha.  Paa laua no ka hewa.  Paa Iosepa me ka hewa ole nae.

            P 5-8.  He mau moe uhane ko na luna o Parao.  He mea hookaumaha ia ia laua i ka ike ana o Iosepa i ko laua helehelena inoino, heaha kona ninau?  Pane laua pehea?  A pane aku Iosepa pehea?

            Nawai e hai mai i ke ano io o na moe?  A noi aku Iosepa ia laua e hoike mai i ke aha?  E ike ia ana ke ano kaula o Iosepa ma kona wehewehe ana i ke ano o ia mau moe.

            P 9-13.  Hai mai ka moe mua, me ko Iosepa wehewehe ana i ke ano.

            P 14, 15.  Heaha ka Iosepa noi ana i ka luna kiaha?  No ke aha?

            P 16-19.  Heaha ka moe a ke kahuai, me ke ano ma ko Iosepa wehewehe ana?

            P 20-22.  Hai mai i ka hooko ana o keia mau moe.  He kaula io ea,  Iosepa.  Owai kai hookuu ia?  Hoomanao koke anei ka luna kiaha ia Iosepa, a uwao nona i hookuu ia aku?  No ke aha ka poino ana?  Mai ke Akua mai paha, no ka mea, aole hiki ka manawa pono e hookuu ia ai.

            Na kane.  Heaha ke kumu hana?  Mai hea i lawe ia ai Iosepa a i Aigupita?  Kuai ia oia ia wai?  Heaha ke kumu kuai a Potipara i haawi ai nona?

            Heaha ka Paulo kauoha i na kauwa?  Epe 6: 5,6.  1 Tim 6: 1.  Ma ke aha i hookiekie ia ai Iosepa a lilo i mea nui?  Ma ke aha e hookiekie ia ai kakou?  Heluhelu Luka 16: 10-12.  Ke malama pono nei anei oukou i ka mea uuku i haawi ia mai?  Ka pono ia ke makemake oukou e loaa na mea nui ma keia ao, me ka lei mae ole ma kela ao.

            Na wahine.  Ma ke aha i like ai ka wahine a Potipara me Ewa?  Ma ke aha i like ole ai Iosepa me Adamu?  Ua like anei kekahi poe wahine Hawaii me ka Potipara wahine?  Pela ma ka nana aku, aka, e hoopau ia ano hoowalewale.  Heaha ka hope o ia hoowalewale ana?  Heaha ka hope o ko Iosepa hoopaa ia ana iloko o ka hale paahao?

            Na ui me na keiki.  Ehia makahiki o Iosepa i ka wa i hoopaa ia ai oia ma ka hale paahao?  28 paha.  No ke aha oia i hoopaahao ia ai?  Ma ke aha oukou e hoohalike ai me Iosepa ke hoowalewale ia?  Ke makau nei anei oukou i ke Akuo, a nolaila, ka pale ana i ka hoowalewale?  No ka makau i ke kanawai anei ka pale ana i ka hewa?  Ina aole he kanawai hoopai karaima, pehea?  Lilo anei ka hewa?

            Heaha ke kumu o ka naauao?  E makau i ke Akua.  E holo kiki mai ka hoowalewale aku.  Mai noho a ae iki aku.  Hai mai Sol 1: 10.

            Ke kula a pau.  Heaha ka pauku gula?  Heaha ka manao nui?  Owai kai hoopomaikai ia ma o na popilikia?  Nui anei na wahine me Potipara wahine?  Nui anei na Iosepa?  Nui anei na Parao?  Owai ka inoa maoli o keia Parao?  ma ke aha i maopopo ai he kaula Iosepa?  Na moe owai kai kona i wehewehe ai mahope?  Nui anei ka poe hoopoina i ka poe iloko o na hale paahao?  Ka hoopoina aha i lilo ai i mea hoopomaikai i kekahi paahao?  Heaha ka kakou e hana ai no ka poe iloko o na hale paahao, a iloko o na pouli hoomanakii?

            Mele.  "Na keiki, na keiki."  Lei Alii 141.

            Pule no ka poe iloko o ka puali hoomana,

            Haawina no Nov 14.  Kin 41: 41-57.

 

Na Moolelo Kula Sabati o Oahu a me Hawaii Komohana.

            Halawai ka Ahahui Kula Sabati o ka mokupuni o Oahu ma Kalihi.  Oct 12 1880.  hora 31-2 auina la.  Hoomaka ia na hana, mahope koke iho o ka hoopanee ana o na hana o ka Ahahui Euanelio Mokupuni.  Rev M Kuaea ka lunahoomalu; koho ia o E S Timoteo i kakauolelo, hoomaopopo ia na lala a pau o ka aha i hiki mai.

Na Kula Sabati                                                Kahu                                       Elele

Kawaiahao

Kaumakapili,                                                   Rev C M Hyde                       Kanakaokai

Kalihi & Moanalua                                          Geo Nahoku                            Keawe

Ewa                                                                 T Kaehuaea

Waianae

Waialua                                                           Rev E S Timoteo                     S Kaili

Kahuku

Hauula                                                             G B Koekoe                            D Kaaukai

Waikane                                                                                                          Kalili

Kaneohe                                                                                                          W E Pii

Waimanalo                                                                                                      Naholowaa

 

            Koho ka lunahoomalu i komite imihana, Rev S Paaluhi.  W E Pii, J W Naukana, heluhelu mai ka lunahoomalu o ke komite imihana i na kumuhana.

            1 Ka hoike o na kula Sabati, 2 Ka hoike hui o na kula Sabati, 3 Ka hoeseu i na kula Sabati.

            Hapai ia ka noonoo i ke kumuhana mua.  hoike mai ka elele a me ke kahu o ke kula Sabati o Kaumakapili, no ke kula Sabati o Kaumakapili, heluhelu mai o Keawe i ka hoike o ke kula Sabati o Kalihi me Moanalua, na D Kaaukai i hoike mai no ke kula Sabati o Hauula, a me ke kahu, na Rev J N Paikuli i hoike mai no ke kula Sabati o Waikane, na W E Pii i hoike mai no ke kula Sabati o Kaneohe, na S Naholowaa me Rev S Waiwaiole i hoike mai no ke kula Sabati o Waimanalo.  Noi mai o J W Naukana e hoopanee i ka halawai a halawai hou i ka auina la hora 2 o ka la apopo, hooholo ia.

La hana 9, Oct 13.

            Halawai hou ka aha e like me ka hoopanee ana, Hoomaka ia na hana me ka pule a W E Pii, heluhelu ia ka moolelo o ka halawai i hala a apono ia, hoike mai o T Kaehuaea no ke kula Sabati o Ewa, na S Kaili i heluhelu mai no ke kula Sabati o Waialua.

            Hapai ka noonoo no ke kumuhana elua.  Ka hoike hui o na kula Sabati, noi mai o T Kaehuaea, e hoopanee i keia kumuhana a hiki i ka malama o Aperila hooholo ia.

            Hapai ia ka noonoo no ke kumuhana ekolu, ka hoeueu i na kula Sabati, waiho mai o T Kaehuaea he olelo hooholo, e koho keia aha i komite kaahele iwaena o na kula Sabati o Oahu nei.

            Ma ka ninau ana, ua hooholo ia.  Koho ka aha ia Rev E S Timoteo a me G B Koekoe, noi mai o Rev S Waiwaiole e hoopanee keia halawai, a halawai hou ma Waialua i ka wa a ka Ahahui Euanelio e halawai ai, a e hapai ia ka hoike o ke kula Sabati o Waialua.

            Ua hooholo ia, heluhelu ia ka moolelo o ka halawai hope a apono ia.

            E S Timoteo, Kakauolelo.

 

HELANI, KONA AKAU, HAWAII.

            La hana 1, Sept. 2, 1880, hora 5 pm.

            Halawai ka Ahahui Kula Sabati o Hawaii Komohana, ma kahi a me ka manawa hoike ia maluna; o Z Kalai ka lunahoomalu, o S Aiwohi ke kakauolelo.

            Heluhelu ia ke kumukanawai o ka aha, hoomaopopo ia na lala o ka aha.

Kula Sabati,                                        Kahukula Sabati,                                 Elele,

Hamakua waena                                  J Welewele                                          Kilohi

Waipio                                                 J W Kaumelelau

Waimea

Kohala Akau                                       Z Kalai

Kohala Komohana                              W H Kailimai

Kohala Hema

Kekaha N Kona                                                                                              J W H Kukapu

Kailua N Kona                                    D Alawa                                              C G Meemii

Helani N Kona                                    J G Hoapili

Kona w N Kona                                  G S Hoomainoino                               Kaiwi

Kealakekua S Kona

Ponomau S Kona                                Manunu

Pukaana S Kona                                                                                              Kanui

Kapalilua S Kona                                                                                            G W Kalaukoa

Waiohinu, Kau

            Na lala mau, W A Mo, Kahukula Sabati nui o Hawaii Akau, na Rev E Bona, S C Luhiau, J Waiamau, G P Kaonohimaka, S Aiwohi, S W Papaula, S W Makaike, H Manase, A O Forbes.

Z Waiau, haiolelo, Kamalimali, Kapaona, J W Punihaole, Apana a me Palea.

            Noi ia mai e lilo o J Waiamau i lunahoomalu, D Alawa i kakauolelo, hooholoia.

            Koho ia o Meemii.  Mio a me Hoapili i komite imi kumuhana.

            Noi mai o Bona, e koho ia i komite hooponopono kumukanawai no keia aha, hooholo ia.  E ia na lala oia komite:

            Bona, Kaonohimaka a me Welewele.

            Hoike hapa a ke komite imi kumuhana.  1 Hapalua hora haipule, mamua o ka hoomaka ana o na hana, 2 Hoike kihapai o na kula Sabati, 3 Lulu dala no ka waihona o na kula Sabati, 4 Pehea la e ala mai ai na kula Sabati?  5 Heluhelu haawina, apono ia.

            Hapai ia ke kumuhana II.  Na Kaumelelau i heluhelu mai i ka hoike kihapai o ke kula Sabati o Waipio, hoike o ke komite hooponopono kumukanawai, apono ia.

            Pauku 1.  E kapaia keia aha kula Sabati, ke kula Sabati o ka Ahahui Euanelio o Hawaii Komohana.

            Pauku II.  O kona mau lala, oia na kahu ekalesia a me ko lakou mau elele i koho pono ia; na kahu kula Sabati a me ko lakou mau elel i koho ponoia; na lala mau a me na mea e ae a ka aha e koho ai.

            Pauku III.  O kona mau luna, oia ka lunahoomalu a me ke kakauolelo i koho ia ma ka barota, i kela a me keia halawai ana,

            Pauku IV.  O na hana a keia aha, o ka imi ana i na mea e holo ai na kula Sabati, a me ka hoike ana i na kula Sabati ma keia mau apana.

            Pauku V.  Elua no halawai a me ka hoike kula Sabati o keia aha i ka A D, ma kahi a me ka manawa a ka Ahahui Euanelio e halawai ai.

            Pauku VI.  E hiki no ke hoololi ia keia kumukanawai, ke ae ka 2-3 o ka aha.

            Na Kalai i heluhelu mai i ka hoike kihapai o ke kula Sabati o N Kohala, i kokua ia mai e ka hoike waha a Bona a me Kapaona.

            Noi mai o Forbes, a lilo na haiolelo e noho mai nei i mau lala mau no keia aha, hooholo ia.

            Na Welewele i heluhelu mai ka hoike kihapai o ke kula Sabati o Hamakua waena.

            Na Kailimai i heluhelu mai i ka hoike kihapai o ke kula Sabati o Kohala Komohana.

            Na Luhiau i hoike waha mai no ke kula Sabati o Kohala Hema

            Na Kukapu i heluhelu mai i ka hoike kihapai o ke kula S o Kekaha.

            Na Alawa i heluhelu mai i ka hoike kihapai o ke kula Sabati o Kailua, i kokua ia mai e ka hoike waha a Meemii.

            Na Hoapili i heluhelu mai i ka hoike kihapai o ke kula Sabati o Helani, i kokua ia mai e ka hoike waha a Waiamau no keia mau kula Sabati a elua.

            Na Waiau i hoike waha mai no ke kula Sabati o Pukaana.

            Noi mai o Hoapili, e koho i komite hooponopono i na hana o ka hoike kula Sabati o ka la 3 o Sept., hooholo ia.  Eia na komite: Hoapili, Mio, a me Kalai.

            Noi mai o Bona.  e hoopanee ia keia halawai a hui hou i ka la 3 o Sept mahope iho o ka pau ana o na hana o ka hoike kula Sabati, hooholo ia.

            Hoopanee ia me ka pule a W H Kailimai.

            Aole i pau.

 

ASA KAULIA,

Loio a Kokua ma ke Kanawai.

Ua makaukau au e lawelawe i na hana a pau ma keia Oihana imua o na Aha a pau o ka mokupuni o Oahu.  E loaa no au ma Koolaupoko, Heeia, a ma Honolulu i kekahi wa Hooko ia na kauoha mai na wahi a pau o ka mokupuni me ka eleu a me ka hikiwawe.

 

BENJ H. AUSTIN,

LOIO A HE KOKUA MA KE KANAWAI.

Alanui Kaahumanu, Helu 13.             970 tf.

 

CHRISTIAN CERTZ

Mea Hana Buti

ME

KAMAA MAOLI!

Alanui Papu, makai o ke Keena o Lui & Dickson

KE HAI AKU NEI OIA I NA MEA A PAU,

Ua hoi mai oia mai Kapalakiko mai,

Ilaila Oia i ohi kino mai nei i na waiwai nanai a paa o kona oihana, a ke waiho ia aku nei no ke kuai ana no na kumukuai o ka manawa.

HE MAU WAIWAI PIHA O NA BUTI

Na KAMAA HAAHAA a me na ano kamaa no na Lede.  Na Buti, na Kamaa Haahaa a me na ano kamaa e ae a pau no na Keonimana.

NA BUTI & KAMAA HAAHA!

A ME NA ANO KAMAA E AE A PAU

NO NA KAMALII!

NA KAMAA O NA ANO HE NUI

O NA KAMAIKI OPIOPIO.

O neia mau mea a pau ua hanaia me ke akamai loa a me k paa o na ano hou loa, a ke hooia ia aku nei ia mau mea e like me ka mea i olelo ia.

E lawe ia no na kauoha mai na Mokupuni me ka maiau me ka eleu.

3m942

 

LOLE MAKEPONO

Ke Kuike.

E LOAA NO IA MA KAHI O

KAKELA ME KUKE!

E LAA NA

Ahinahina, Kalakoa, Keokeo, Leponalo, Pena, Aila, Aniani,

NA MEA PIULA!

Kopa, aila honua, aila hoomaloo

Kui Kakia, Pakeke, Tabu, Kaula, Noho Lio, Hulu Palaki, na Pulumi.

A ME

AGENA NO HOI NO NA MOKUPUNI O HAWAII NEI NO NA

Lainakini-nao, Lainakini Maoli, Palule Kalakoa, Alapia, Kelepa, Kilika, Na lole kupono i ka wawae, Palule Huluhulu, Na Lole Huluhulu, Na Lole no ka hoohelelu ana, Lipini, Lihilihi, &c.

LIPINE, LIHILIHI, &c.

A ME NA

Mikini Humuhumu MakeponoLoa!

A ME

MAU MEA AI KAHI

Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c.

A he Laau Lapaau Kaulana Loa

a Dr Jaynes

Laau Kunu, Laau Hoomaemae Koko, Laau Hoopau Naio, Penikala, Huaale

A ME NA LAAU HAMO, A PELA'KU!

840 tf

 

OLELO HOOLAHA.

 

OLELO HOOLAHA.

Ua papa ia na mea a pau, aole e komo hewa a @@@@ na lawaia ma na kai @ ku Ahupuaa o Honouliuli ma @@ka aku a hiki i Waimanalo, ma ka mokupuni o Oahu.  apana o Ewa.  Ua hookohuia o AARONA HATTON i luna maluna no na kai lawaia o Honouliuli, aohe mea e ae.

Kakauia ma Honouliuli, Oct 9, 1879

933 tf              JAMES CAMPBELL

 

UA MAKEMAKE IA

NA ILI BIPI, NA KIWI BIPI, NA IWI BIPI,

E haawi ia no ke kumukuai kiekie o ko kakou makeke nei e H. Hackfield & Co.

Honolulu, Mei 25, 1880

 

KA MAKEPONO!

A ME

KA OLUOLU!

Na Pila Umeume maikai, Na Pila Hamonica, Na Violina me na kaula Gita, Na Kopa Aala,

Na waiwai nani o kela me keia ano.

Na Pale Ili oluna, Na Pale Ili Wawae, Na Uhi Moe, Na Mamalu Liilii.

O keia wale no ka hale emi a makepono  Ua lawe @@@ a mai na waiwai.

PICKERING & Co.

Helu 92 Alanui Alii.  Hookahi puka mai ke Alanui Papu mai

972 3m

 

NU HOU!  NU HOU!

Mahope aku o ka la 1 o Ianuari, 1880 E hoomaka ana makou malalo o na rula

DALA KUIKE,

I ka Loaa ana aku o ka Waiwai i ka Mea Kuai.

E hookahua ana makou i ka makou oihana malalo o ke DALA KUIKE, e kuai ia aku ana na lako waiwai a pau no ke Kumukuai malalo iho o ka

MEA I IKE IA MAMUA E LIKE ME KA LILO.

He Huina nui ko makou o na Oo, Kopala Ho, &c., &c. i kuai ia mamua ae o ka hoopii ia ana o ka auhau o ka poe nana i hana.

HE MAU LAKO NUI KO MAKOU

O NA

PALAU

A makou e kuai aku ai no ka $7 a hiki ka $7.50  Malalo iho o ke Kumukuai mua no kela a me keia PALAU.

Ano ko oukou manawa kupono e loaa ai na waiwai makepono loa.

E hele mai Hookahi, E hele mai a pau loa.

DILINAHAMA MA.

942 ts              37 Alanui Papu.

 

PAPA, PAPA

AIA MA KAHI O

LEWERS & DICKSON!

(O LUI MA.)

MA KE KAHUA KAHIKO MA

Alanui Papu a me Moi

E LOAA AI NA

Papa Nouaiki

o kela a me keia ano.

Na Papa Nani a Paa no ke Kukulu ana i na Hale!

Na Pani Puk, Na Puka Aniani, Na Olepelepe, Na Pou, Na O-a, Na Papa Hele, Na Papa Ku, A me na Papa Moe nui loa

NA PILI O KA HALE

O NA ANO A PAU.

Na Pepa Hoonani, Na Pena o na Wai a pau, Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano.  Na Aila Hoomaloo, he lehulehu wale, Na Aila e ae o na ano a pau.

NA WAIVANIKI

A ME NA

WAI HOOHINUHINU NANI!

o na ano a pau loa.

NA BALAKI ANO NUI WALE

A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana

NO KA

UKU HAAHAA LOA!

E like me ka mea e holo ana mawaena o LAUA a me ka MEA KUAI.

E hele mai!  E na Makamaka!

A e lawe no hoi ko oukou makemake me ka oluolu a me ka maikai.

845 tf