Ka Nupepa Kuokoa, Volume XIX, Number 44, 30 October 1880 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

I HUIIA.

No ka Makahiki, $2. Eono Mahina, $1.

Dala Kuike ka Rula.

 

KOMITE HOOPONOPONO.

Sam'l Kaaikaula.

Hezekia Aea.

POAONO. OKATOBA 30, 1880.

HOOLAHA KULA SABATI.

 

     O ka la 16 o Novemaba 1880 oia ka la hanau o ko Kakou Moi Kalakaua Ka Nui.  E hoike hui ai na kula Sabati a pau, mai Kona a hiki aku i Waiohinu i Kau.  Ma ka luakini o Pukaana, ma Kona Hema, Hawaii. 

     E éleu mai e na hoa, e hoomaka ana ma ka hora 10 kakahiaka ponoi.  Me ka haahaa.     J.G.HOAPILI.

                                                                                                                                            Kahu Kula Sabati Nui H K.

                                                                                                                                             Keauhau, N Kona. Oct 21 1880

 

NU MAIKAI KANI AE.

Sing it out with a shout.

Hymn Service.

1

Nu maikai, Kani ae, Haleluia!

Me lakou la, me na kini maluna'e.

Eia mai ke Lii; Haleluia!

Kani ae la ko luna'e.

Hamau! he leo pa a nani e!

Ke kai mai nei i ka nuhou maikai.

Ref. - Nu maikai - Kani ae -

Eia mai ke Lii, Haleluia!

Nu maikai - Kani ae -

Eia mai Iesu ke Lii.

2

Nu maikai. Kani ae, Haleluia!

A hoolohe ae ke ao ia mele nei.

Kani pu na kai, Haleluia!

Kupinai na puu laelae.

Kai na elele i ka nu maikai,

Imanuela e, ua hiki mai.

Ref. - Nu maikai, &c. -

3

Nu maikai, Kani ae Haleluia!

Ke kakali nei ke ao e lohe ae.

Mele ko luna'e, Haleluia!

A pa mai ka leo e,

E hele no a hai ma o, maanei,

He ola ia Iesu ke Lii maikai.

Ref. - Nu maikai, &c.

                                    HAWAII.

 

Haawina Kula Sabati.

HELU 7. SABATI NOV. 14, 1880.

KUMUHANA.

Iosepa ka Luna Noiau.  Pauku Baibala.

Kin 41;41 - 57.

     41  Olelo aku la o Parao ia Iosepa.  E nana oe, ua hoonoho au ia oe maluna o ka aina o Aigupita a pau.

     42  Unuhi aku la Parao i ke komo ona, mai kona lima aku, a hookomo aku la i ka lima o Iosepa, a kahiko ae la oia ia ia i ka lole keokeo maikai, a hoolei aku la i ka lei gula ma kona a-i.

     43  Hooholoholo iho la oia ia ia ma ka lua o ke kaa ona, hea mai la lakou imua ona, E kukuli iho.  Hoonoho aku la oia ia ia maluna o ka aina a pau o Aigupita.

     44  I aku la o Parao ia Iosepa, Owau no o Parao.  A i ole oe e ae aku, aole loa e hapai kekahi kanaka i kona lima, a me kona wawae, ma ka aina a pau o Aigupita.

     45  Kapa aku la o Parao i ka inoa o Iosepa, o I Sapenapanea; a haawi aku la oia ia Asenata, i ke kaikamahine a Potipera a ke kahuna o Ona, i wahine nana.  A hele aku la o Iosepa a puni ka aina o Aigupita.

     46  He kanakolu ko Iosepa mau makahiki, i ka wa ana i ku ai imua o Parao o ke alii o Aigupita.  A hoi aku la o Iosepa mai ke alo aku o Parao, a hele aku la i ka aina o Aigupita a pau.

     47  A i na makahiki ai ehiku, hua mai la ka hua o ka honua a nui loa.

     48  Hoiliili mai la ia i ka ai a pau o na makahiki ehiku ma ka aina o Aigupita, a waiho iho la ia i ka ai maloko o na kulanakauhale, o ka ai o na mahinaai e pili ana i au kulanakauhale la:  waiho iho la ia maloko olaila.

     49  Hoiliili mai la o Iosepa i ka palaoa e like me ke one o ke kai ka nui loa, a oki iho la ka helu no ka hiki ole ke helu aku.

     50  A hanau iho la ka Iosepa mau keikikane elua, mamua o ka hiki ana o na makahiki wi, na Asenata, ke kaikamahine a Potipera a ke kahuna o Ona i hanau nana.

     51 Kapa aku la o Iosepa i ka inoa o ka hiapo, o Manase, no ka mea, ua haawi mai ke Akua ia'u i ka hoopoina i ko'u luhi, a me na mea a pau o ka hale o ko'u makuakane.

     52 A o ka inoa o ka muli mai.  kapa aku la ia, o Eperaima:  No ka mea, ua hoopalahalaha mai ke Akua ia'u, ma ka aina o ko'u popilikia.

     53  Pau ae la na makahiki momona ehiku i hiki mai ai ma ka aina o Aigupita.

     54 Alaila, hiki mai la na makahiki wi ehiku, e like me ka Iosepa i olelo mai ai.  He wi no ma na aina a pau, aka, he ai ma na aina a pau i Aigupita.

     55  Oki loa iho la ka aina a pau i Aigupita, i ka wi, a uwe aku la na kanaka ia Parao i ka ai.  Olelo aku la o Parao i na kanaka a pau o Aigupita.  O hele aku io Iosepa la; a i kana olelo ana mai ia oukou, malaila aku oukou.

     56  A uya puni i ka wi na aina a pau; a wehe ae la o Iosepa i na halepapaa a pau, a kuai aku la na na kanaka o Aigupita; a ikaika nui ai la ka wi ma ka aina o Aigupita.

     57  A hele mai la ko na aina a pau i Aigupita io Iosepa la e kuai; no ka mea.  ua nui loa ka wi ma na aina a pau.

     Pauku Gula.  Sol 22;29, huli a hoopaa.

     Manao nui, E imi e ike i ke aupuni o ke Akua, alaila e loaa mai na pono kino pu a pau.

     Na heluhelu la.  1 Kin 41:1 - 16.  2 Kin 41;17 - 36, 3 Kin 41; 37 - 57, 4 Hal 1; 1 - 6, 5 Iob 42; 1 - 17, 6 Dan 2; 1 - 30, 7Dan 2; 31 - 49.

     Mele.  "Iesu no Nazareta."  Lei Alii 142.

     Pule i maalo ae Iesu, a ala kamalii a hahai.

Ka Wehewehe me ka Ninau ana.

     Haalele kakou ia Iosepa iloko o ka hale paahao.  He mau makahiki elua paha kai hala mahope o ka hemo ana o ke kahuai me kona hoopoina ana ia ia.  He mau mea nae e hoomakaukau ana i ke ala e wehe ia ai ka puka, a hemo mai Iosepa.

     He mau moe uhane elua kupanaha kai loaa ia Parao ke lii.  Hai mai ia mau moe elua.  41; 1 - 7.  Owai kai kii mua ia e hai ia Parao i ke ano o kona moe?  A hiki ole ia lakou ke hai i ke ano, owai kai hoomanao i kona hewa a hoopuka i ka mea i hiki ke hai i ke ano o na moe?  Owai ia kanaka Hebera?  41; 8 - 13.

     41; 14 - 32.  Ke kii ia ana o Iosepa.  I ka wa i kii ia ai Iosepa, heaha kana hana hoomakaukau?  Aole i kahi na Hebera i ka umiumi.  Na Aigupita nae, kahi lakou i ka umiumi me ka lauoho a ane nemonemo loa.

     Nolaila ko Iosepa kahi ana i kona umiumi i ku kona helehelena i ka mahalo ia ke hele oia imua o Parao.  Aia Iosepa ma ke alo o ke lii.  Heaha na olelo mua a Parao, me ka pane ana a Iosepa?

     Hai no Parao i na moe ona; hoolohe pono Iosepa.  Pau na moe elua i ka hai ia ia Iosepa.  Ma ko Iosepa wehewehe ana i ke ano, heaha ke ano o ia mau moe elua?  Hai pololei mai.

     41; 33 - 40.  Me he mea nui la Iosepa imua o Parao.  Ao aku oia ia ia.  Heaha kaua mau olelo ao?  Pehea ia mau olelo i ka maka o ke lii me kana mau kauwa?  A pehea hoi Parao i pane aku ai ia Iosepa?  Maopopo lea ia Parao, mai ke Akua mai ka Iosepa mau olelo, he mau olelo oiaio no.

     P 41 - 43.  Ua hoonoho ia Iosepa maluna o ka aina a pau o Aigupita.  Pehea ko Parao hoohanohano ana ia ia?  I ka hooholoholo ia ana ma ka lua o ke kaa, kauoha ia na kanaka e aha imua ona?  Hanohano loa, ea.  Hai mai, Sol 29; 29.

     P 44. Heaha kekahi mau olelo nui Parao ia Iosepa?

     P 45.  Owai ka inoa hou i haawi ia ia Iosepa?  Heaha ke ano?  Owai ka wahine i haawi ia i wahine na Iosepa?  Potipera keia, aole Potipara, ko Iosepa haku mua.  He kahuna pule keia no Ona, Heliopoli kekahi inoa.  Betesemeta kekahi inoa, ke kulanakau hale o ka La, ka la ko lakou akua nui.  A ia no ia ma ka hikina o ka muliwai o Nile.  He wahine hoomana kii keia mamua.  Ua huli mai paha mahope mamuli o ko Iosepa Akua, aole paha.  Hele Iosepa a aha i ka aina o Aigupita?  Hoomaka koke i kana hana.

     P 46.  Akahi no a maopopo lea na makahiki i hala mai ka wa i lawe ia ai Iosepa i Aigupita a hiki i ka wa i ku ai oia imua o Parao, oia hoi ehia?  17 hui ehia a loaa ke 30?  Nui kona pilikia mamua o kona hookiekie ia ana, E naue ana i ka hooko ia ana o kona mau moe uhane.  Ehia la makahiki i koe a hoopiha ia kona mau moe?

     P 47 - 49.  Ke ko ana o ka moe mua o Parao.  Heaha ia moe?  Me kona ano?  Me ia anei ka hooko ia ana?  Pehea ka hua o ka honua iloko o na makahiki ehiku?

     Mahea Iosepa i hoahu ai i ka hua o ia mau makahiki ehiku?  No ke aha?  Pehea ka nui o ka palaoa i hoiliili ia?  Mahea kakou e hoahu ai i ka waiwai ma ka Iesu paipai ana?  He waiwai aha ia?  Pau anei i ka helu ia?

     P 50 - 52.  Ehia keiki a Iosepa na Asenata?  Owai na inoa me ke ano?  He mau mea nui anei laua mahope?  Owai ke lilo ana i mea oi?  Ma keia mau keiki ua aha na popilikia o Iosepa?

     P 53 - 57.  Ke ko ana o ka moe elua o Parao.

     Heaha ia moe, me kona ano?  Pehea ke ko ana?  I na hea ka hoomaka ana o ka wi?  Mahea kekahi wi mamua aku?  Owai kai hele i Aigupita ia wa i loaa ka ai?  E wi hou ana anei ma Kanaana?  Na mamo a wai e iho ana i Aigupita i loaa ka ai?  Mahea ka ai ma keia wa wi?  Pehea ka loihi o ka wi?

     I ka hoopii ana o na kanaka ia Parao no ka wi, kuhikuhi oia ia lakou io wai la?  A pehea Iosepa i hana ai i loaa ka ai i na kanaka?  Ma Aigupita wale no anei ka wi?  Mahea i loaa ai ka ai i ko na wahi e ae?

     Mele.  "Kanaiwa kumamaiwa."  Lei Alii 143.

Na Ninau a na Kahu.

     Na kane.  Heaha ke kumu hana?  Heaha ka pauku gula?  Ma o wai la i hooko ia ai la keia pauku?  Owai kekahi kahu hipa opiopio i lilo i alii?  Owai kekahi mea wehewehe moe uhane i hoohanohano ia a lilo i Kuhina nui no ke aupuni?  Owai kekahi pio ludaio i hoohanohano ia a lilo i Kuhina nui no ke aupuni?

     Pehea e hiki ai i na kanaka Hawaii ke hoohanohano ia a i lilo i poe nui?

     Na wahine.  Owai ka wahine a Iosepa?  Owai Potipera?  Heaha Ona?  Owai kekahi mau inoa?  Heaha ke ano?  Aia mahea ia kulunakauhale?  Ehia a Iosepa keiki na keia wahine?  Owai na inoa?

     Nohea na inoa?  Owai ka mua?  A lilo ka mua i aha?  Aia mahea na aina o na mamo?

     Na ui me na keiki.  Pehea e hiki ai ia oukou ke lilo i poe ku i ka mahalo ia, a loaa na oihana maikai.  Owai ka poe i kapa ia he aupuni alii?  Owai na keiki e kaa ana na lei alii mae ole ma ka lani?  Ke imi nei anei oukou ia mau nei?

     Ke kula a pau.  Hai like mai.  Mat 6; 19 - 21.  Nohea mai na wi?  Hai mai i ke alanui i lawe ia ai Iosepa a hiki i ke ko ana o kona mau moe.

     Ma ke aha i lilo ai Iosepa i hoailona no Iesu?  Ma ke aha e hoohalike ai kakou me Iosepa?

     Mele.  "E ia makou ke hele la."  Lei Alii 144.

     Pule i hele kakou a pau io Iesu la i ola.  Haawina no Nov 21 Kin 44: 30 - 34. 45; 1- 8.

 

NA MOOLELO KULA SABATI O

HAWAII KOHANA, MAUI

KOMOHANA ME

MOLOKAI.

(Koena mai kela pule mai.)

La hana 11, Sepatemaba 3, 1880.

     Halawai hou ka ahahui kula Sabati o Hawaii Komohana, e like me ka hoopanee ana.

     Ka lunahoomalu ma ka noho.  Heluhelu ia ka moolelo o ka la 2 o Sept a apono ia.

     Hapai ia ke kumuhana V.  Na ke kakauolelo i heluhelu mai i ka haawina o ke kula Sabati o Kohala Komohana; heaha na haawina kupono no ke kula Sabati?

     Na Alawa i heluhelu mai i kona haawina pehea la e holo ai na kokua iwaena o na kula Sabati?

     Na Hoapili i heluhelu mai i kona haawina; o ka hoonaauao ana i na kula Sabati, pehea la ka hana e pono ai?

     Na Hoomainoino i heluhelu mai i kona haawina; o na dala haole anei kekehi mea e kokua ai i na kula Sabati?

     Koho ia o Kalai, Mio a me Hoapili i komite imi haawina.

     Hapai ia ke kumuhana III.  Lawe ka aha a kuka nui no keia kumuhana me na manao momona.

     A ua paipai ia na kahukula Sabati a me na elele kula Sabati, e hoi a e hapai i keia hana me ka eleu ma ko lakou mau apana iho.

     Noi mai o Bona e hoopanee keia halawai a hoi hou mahope iho o ka hoopanee ia ana o na hana o ka ahahui euanelio, hooholo ia. Hoopanee ia.

     La hana III, Sept 4 1880, hora 4 pm.

     Lalawai hou ka ahahui kula Sabati o Hawaii Komohana, e like me ka hoopanee ia ana.  O ka lunahoomalu ma ka noho.

     Hoike a ke komite imi haawina.  Pehea la e hiki ai i ke kula Sabati ke hoala mai i na makua hoomaloka, a lilo i poe mikiala i ke kula Sabati.  Alawa Kahukula Sabati o Kailua.

     O na haawina kula Sabati e kula ia nei ma ka Nupepa Kuokoa, oia wale no anei na mea hoonaauao i ke kula Sabati ma ka Baibala.  Simeona, no ke kula Sabati o Kailua.

     Owai la ka poe kupono e lawelawe i ke kula Sabati iloko o ka apana?  Ia meemii, no Kailua.

     O ke kula Sabati, he mea anei ia e hoopalupalu mai ai i na mana paakiki a ke kanaka ma na mea o keia ao, aole paha?  Kaomea, no ke kula Sabati o Helani.

     He hana hanohano anei ke kula Sabati no na makai, ke lawelawe lakou ma ia hana me ka ikaika?  Haluapo, no Helani.

     Heaha la ka waiwai o ka hui ana o na kula Sabati ma kela me keia wahi e kukulu ia ai o ka ahahui euanelio?  Hoapili, Kahu kula Sabati o Heleni.

     O ke aha la ka mea e hanohano ai o ke kula Sabati, o ke ao paha i na mea hoolealea, o ka hoomaa paha i ka pono io?  Hoomainoino, kahu kula Sabati o Kona waena.

     Auhea la na mea lealea kupono e hana ia ma ke kula Sabati, a lilo i mea hoohauoli i ka manao?  Kahikina, hope K S o Kona waena.

     O ke aha la ka nana oi aku e hana ia iloko o ke kula Sabati, o na himeni paha, o ka hoopaanaau pauku baibala paha?  Kukupu, no Kekaha.

     He mea hooulu anei i ke kula Sabati; ka hele mau ana o na luna ekalesia a me na kanaka o ka pono e paipai ma kela me keia hale o ko lakou apana iho?  Punihaole no Kekaha.

     O na haawina i heluhelu ole ia, e hoomau ia aku no lakou, apono ia ka hoike a ke komite.

     Olelo hooholo.  E hoomaikai aku keia aha i ke Akua, no Kona hoolako ana mai i na pono ai i mea e pono ai na lala o keia ahahui kula Sabati, a e mahalo pu ia aku o J G Hoapili Esq, i kona pahola ana mai i kona mau lima kokua no keia hana nui.

     Heluhelu ia ka moolelo o ka la hana II a me ka la hana III, apono ia.

     Hoopanee ia keia aha a hui hou ma kahi e hui ai o ka ahahui euanelio o Hawaii Komohana.

     Hoolohe ka aha i na manao paipai mai ke kakau leta mai o ka Papa Hawaii, a mai ka lunahoomalu mai hoi o na ahahui e elua.

     Hookuu ia na ahahui me ka himeni a me ka pule.                                                D ALAWA, Kakauolelo.

                                                                                                                             Holualoa, Kona A Hawaii, Oct 8 1880.

 

Wainee, Oct 9 1880.

          Halawai ka ahahui kula Sabati o Maui Komohana, e like me ka hopanee ana mai Iulai 10 1880.  koho ia o Hon L Aholo i lunahoomalu, S K Kaaiai ke kakauolelo mau.  Hoomaka ia na hana me ka himeni, pule o Kalama, Napaepae a me Kaaoao.

     Ma ke noi, ua heluhelu ia ka moolelo o ka halawai i hala, a apono ia.  Noi o Pali e kakau ia ka inoa o na lala i hiki ma, a pono ia.

     Kula Sabati o Olowalu, kahu Kaaiai hope kahu, aole i hiki mai.  puuku Ciliona Kalepo kakauolelo Namealoha ua kumu, Peter Kaholokahiki. Nakai, Kaaoao, kula Sabati o Wainee, kahu aole i hiki mai, hope kahu oia neo like no, puuku Pali, kakauolelo Joel Kulailua, na kumu Mrs Pali.  Hattie Eha, Mareta Kahanu, maria Alika, Kanuku Mr Napaepae, Haili, kula Sabati o Kahana, kahu Nahia, hope kahu Samuel Paki, puuku aole i hiki mai, kakauolelo he poina mau no, na kumu.  Kaumauma, Keliipoina, Maui, Kaua, kula Sabati o Honokohau, kahu Kalama, hope kahu aole i hiki mai.  puuku oia neo pu no, kakauolelo Kahalepouli.  na kumu Lonohiwa, Mrs Mary Uula, Kapena, Lilia Mauna, Kaheaia ke komite huli kanawai no ka ahahui.  Heluhelu ia ka hoike a ke komite, ma ke noi, ua lawe ka hale e noonoo, noi o Kulailua, e heluhelu pakahi ia na pauku he 12 apono ia.  I ka lawe ana e noonoo.  au apono ia na pauku he 12, me kahi hooponopono iki ana ma a pauku 3, ma ke noi ua heluhelu ia ka hoike a ke komite imihana.

     1  E kahea ia ka hoike a na kahu kula Sabati e lawe mai i ka papa inoa o na kumu.

     2  E noonoo hou i ke kumuhana 10 o ka halawai o Iulai 10 1880.

     3  Ma keia hope auk, na ke kahu kula Sabati a o kona hope paha, e lawe mai i kana oike piha no ke ano o ka hana, ke kulana a me na hooponopono ana o kona kula Sabati iloko oia hapaha, a e kope ia me ka inika ma kekahi pepa cap a letter paha.  me ka moakaka maikai, a e heluhelu ia imua o keia aha.

     4  E hapai i ka noonoo no ke kula Sabati o Lahainaluna.

     5 E hoike hui na kula Sabati o Maui Ko mohana, i ka la 1 o Ianuari 1881 a ma Wainee, Lahaina e hoike ai.

     Noi o Pali e lawe ka hale e noonoo i ka hoike a ke komite, apono ia, noi o Kulailua e noonoo pakahi ia, apono ia.

     Kumuhana 1.  Ua kamailio nui na hoa i keia kumuhana, a i ka ninau ia ana, au apono ia ke kumuhana me kahi hooponopono ana.  Kahea ia ka buke o ke kula Sabati o Honokohau, ua holoi ia na mea i hana ia e ke kahu kula Sabati nui, halahu. - kula Sabati o Kahana, na maikai kona buke a ua makaala na kumu, he uuku na mea i haule, ua lilo ia ia ka helu o 1 o ka maemae a ke nee mua loa nei o Kahana, ke kula Sabati nawaliwali mamua, eia ka leo kauoha; e hoomau aiku, kula Sabati o Wainee a ia no i ke kahu ka buke kula Sabati o Olowalu, ua poina ia ma ka lima o ka hope kahu ka buke.

     Kumuhana 2.  Kukakukaia, a i ka ninau ia ana au hooholo ia, penei:  E hoouna kela a me keia kula Sabati i kona kahu, a elele hoi, ua hoopau loa ia ka hoouna aku i ke kahu kula Sabati ma o na elele hui, e like me ka hooholo ana, o ka halawai o Iulai 10 1880.

     Kumuhana 3.  I ke kamailio ana o na hoa no keia kumuhana, a na ka lunahoomalu i hoololi mai i ke kumuhana i olelo hooholo a e heluhelu ia penei:  Olelo hooholo, hooholo ia; ma keia hope aku, na ke kahu kula Sabati a i ole o kona hope paha, e lawe mai i kana hoike piha no ke ano o ka hana, ke kulana a me na hooponopono ana o kona kula Sabati iloko oia hapaha, a e kope ia ma kekahi pepe cap a letter paha me ka moakaka maikai, a e paa pu ia mai hoi me ka buke inoa o na kumu e like me ka hooponopono ia ana, e nana ma ke kumuhana 1.

     Kumuhana 4.  Kukakuka ia a hooholo ia penei:  E hui pu mai o Lahainaluna me keia aha, e kuka, a e noonoo pu hoi no na mea a pau e pono ai, a e hooholo ai i ka oihana kula Sabati ma Maui Komohana.

     Kumuhana 5.  Hoopaapaa ia a na Kalama i hoakaka mai i kekahi manao penei; Oiai ua wanana ia e pau ana na kanaka i ka make i ka 1881, nolaila e hoopanee aku ka hoike i ka la 5, ina aole make i ka la 1 e ola auanei kakou, a o ka la 5 ka wa pouo e hoike ai, 'hene kai nei aka' a i ka ninau ia ana, au hooholo loa ia ke kumuhana.

     Kumuhana 6.  Na ka lunahoomalu i kahea ia Hihio no kona kumumanao; heaha ka nai oi aku iloko o ka oihana kula Sabati, aole i hiki mai, na Makahiki i heluhelu mai i kona kumumanao; heaha na ke e wehge ai i ka waihona waiwai o ka oihana kula Sabati, ia Kamoahakau.  aole i hiki mai, ia Hon L Aholo no kona pau mau loa i ka hana, aohe wa e hoomakaukau ai, na Pali i heluhelu mai i kona haawina, heaha na mea e maikai ai ka oihana kula Sabati, noi o Kaaiai e hoouna ia keia kumumanao i ka Nupepa Kuokoa; apona ia, kahea ia ka hoike a ka pauku o na kula Sabati o Maui Komohana.

     Heluhelu ia ka hoike, huina o na loaa ma ka lima o ka puuku, $27.75, huina o na lilo a pau $18.37.  koena ma ka lima o ka puuku, $9.38, mahalo ia ka hoike a ka puuku.  Noi mai o Pali e hookaawale i $15 no na lilo o keia hui ana, oiai au hooholo ia i 10 dala a noi mai oia i 5 dala hou, oia hoi $15 hoopaapaa ia a i ka ninau ia ana, au apono ia ke noi, hoolaha mai o Kaaiai e hoomauia ko Aholo, Kamoahakau, Hihio, mau haawina mua apono ia, noi mai o Pali e hoopanee keia mua apono ia, noi ma o Pali e hoopanee keia halawai a halawai hou i ka Poaono elua o Ianuari 1881 ma Wainee Lahaina, pule o S K Makahiki. 

     Na haawina e heluhelu ia ana imua o ka haawai o Ianuari 1881.

     1  Heaha ka waiwai io maoli o ke kula Sabati, Joel Kulailua.

     2  Heaha na pomaikai o ke kanaka no ka oihana kula Sabati mai, D Kahanu.

     3  Heaha na hoike no ka baibala mai e hooiaio mai o na i ka pono o ka oihana kula Sabati, Chas Kaikuahine.

     Ua hoomau ia ko L Aholo.  S Kamoahakau, J K Hihio.

                                                                                                                                                SAM'L K KAAIAI Kakauolelo.

                                                                                                                                    Olowalu, Oct 16 1881.

 

     Ke hoouna aku nei au i ka moolelo e pili ana i ka'u oihana Kahu Kula Sabati no ka mokupuni o Molokai.  Ua hoomaka au i ka hoike ma ka apana o Kalawao a me Kalaupapa.

     Na Kahu Kula Sabati Apana - Kalaupapa J Kahuila.  Halemai ponoi B W Kaawa Siloama, Kalawao, E Kanoe.  Na haumana i hoike ia he 100.

     Hoike ke Kula Sabati ma Pelekunu, Kahu Kula Sabati Makalei, na haumana i hoike ia he 32.

     Hoike ke Kula Sabati o Halawa, Kahu Kula Sabati W A Kiha Esq., na haumana i hoike he 79.

     Hoike ke Kula Sabati o Honouliwai, Kahu Kula Sabati J W Leimakani, na haumana i hoikeia he 35.

     Hoike ke Kula Sabati o Waialua, Hope Kahu Kula Sabati Mose Ehu, na haumana i hoikeia he 41.

     Hoike ke Kula Sabati o Kaunakakai, Kahu Kula Sabati Iosepa Koa, na haumana i hoikeia he 34.

     Hoike ke Kula Sabti o Kaluaaha, Kahu Kula Sabati D B Kauku, na haumana i hoike ia he 76.

     Hoike ke Kula Sabati o Kawela, Kahu Kula Sabati Henere Peelua, na haumana i hoikeia he 18.

     Ka huina a pau o na haumana i hoikeia e ke Kahu Kula Sabati nui o ka mokupuni he 415.  Ka avarika o na haumana no kela a me keia Kula, kokoke 52.

     O ka haawina Baibala o Mataio, oia ka hapanui o na haawina i hoike ia, a he hapa na Kula ma na wahi e ae o ka Baibala.

     O na himeni i mele nui ia e na Kula, oia ka Buke Himeni Hoolea, a he hapa na Kula ma na Buke Himeni e ae.

     Ma na Kula Sabati o Kalaupapa a me Kalawao ka helu 1, Kaluaaha helu 2, Honouliwai & Waialua helu 3, Pelekunu & Kawela helu 4, Halawa helu 5, Kaunakakai helu 6.

     O keia ka'u Hoike Hapaha mua no na Kula Sabati o ka mokupuni o Molokai.

     E paipai aku ana au i na Kahu Kula Sabati a pau a me na Kumu, e hooikaika i ka hoala ana i keia oihana maikai; a i na makua mea keiki hoi a pau, e alakai mai i ka lakou mau keiki iloko o ka luakini, e ao ia lakou ma na mea e ike ai i ke Akua Oiaio Loa.

     I kuu kaahelo ana iho nei e hoike i na Kula Sabati ma na la SAbati, ua ike au i kahi poe keiki e holoholo ana i o a i o maluna o na lio, a o kahi poe keiki hoi e walaau wale ana ma na hale moe o na makua, a o kahi poe keiki e hele wale ana ma ke alanui.  Aloha ino.

     E na makua mea keiki o keia ano mai hoomaunauna i ka waiwai oiaio loa, oia ka pono Karistiano i laweia mai no keia lahui e ka lokomaikai o ko Amerika poe keiki.

     E malama na keiki i ka pono, i mau ka noho'na Kuokoa o Hawaii.  A o ka pono ka mea nana e hoomahuahua i ka lahuikanaka, a o ka hewa ka mea nana e hoemi.

                                                                                                                                                J W M POOHEA.

                                                                                                                                    Kahu Kula Sabati Nui o Molokai.

 

AHA LUNAKAHIKO O KALAPANA A

ME OPIHIKAO, PUNA.

     Okatoba 2, 1880 halawai keia Aha ma ka luakini o Makaaiea, Puna.  Ua wehe ia na hana me ka pule a J Paakaula.  Kohoia na Komite Iwi Kumuhana - J Paakaula, J M Kauwila, J W Kealo a me S W Alapai.

     Hoike mai ke Komite i na hana, a ua aponoia.

     Hoike mai o J Paakaula i ke ano a me na hana o kona mau apana, mai Kaimu a i Keauhou, a au ikeia ka nee mau ana imua ma na hana Karistiano.

     Hoike mai o Kaleopaa no kona apana mai Kehena a Kamaili, ua like ae la no me kela maluna.

     Hoike mai o J W Kealo he manao e pili ana i ka Hoike Kula Sabati nui ma Hilo i Ianuari, 1881.  Ua kamailio nui ko ka hale no keia mea, a ua hoopau loa ia ka noonoo ana.

     Hapai mai o J M Kauwila he olelo hooholo - E malama ia ka Hoike Kula Sabati mai Kalapana a i Pohoiki ma ka luakini o Kalapana ke hiki aku i Ianuari 1, 1881, a e malama pu ia hoi he lulu dala no na pilikia o na hale ekolu e hooulu ia nei.  Ma keia, ua lokahi na mea a pau me ka kali ole.

     Ku mai o J Paakaula a olelo mai, e kali ka hooholo loa ana a ae mai na apana a pau.  A me ke Sabati ae, ua hoike o J M Kauwila i kona apana, ua ae pualu ia mai, a pela no ko Mokaaiea.

     Hoopanee ia na hana a hui hou ma ka Poaono hope o Ianuari, 1881, me ka pule a Poohiwi.

                                                                                                                                                J M KAUWILA.

                                                                                                                                                    Kakauolelo.

 

ANO NO I LOAA MAI NEI!

Na Kaa Lio Holo Lealea!

     Na Kaa Lawe Ohua a me na kaa holo palua, mau mea hoikeike aku, mai ka Hale Hana Kaa mai o ka Hui o Cortland ma Nu Ioka.

                                                                                                                                                DILLINGHAM & Co.,

876   tf                                                                                                                                       Na Agena kuai ma Hawaii nei.

 

OLELO HOOLAHA.

     Ua papa ia na mea a pau, aole e komo hewa i @@ lawaia ma na kai o ke Ahupuaa o @ @ @ @ loa aku @ @ i Waimanalo, ma ka mokupuni @ @ @ o Ewa.  Ua @ o @ @ @ @ no na ka lawaia o @ @ @ . @ @ @ @ @ @

@ @                                                                                                                                       @ @

 

UA MAKEMAKE IA

NA ILI BIPI,

NA KIWI BIPI,

NA IWI BIPI,

E haawi ia no ke kumkuai kiekie o ko kakou makeke nei e

H. Hackfeld & Co.

Honolulu, Mei 22, 1880     964 ly

 

KA MAKEPONO!

- A ME -

KA OLUOLU!

Na Pila Umeume maikai,

Na Pila Hamonica,

Na Violina me na kaula Gita,

Na Kopa Aala.

Na waiwai nani o kela me kela ano.

Na Pale Ili oluna,

Na Pale Ili Wawae,

Na Uhi Moe,

Na Mamalu Liilii.

     O keia wale no ka hale emi a makepono Ua lawe polomi a mai na waiwai

                                                                                                                                    PICKERING & Co.

Helu 92 Alanui Alii.  Hookahi puka

mai ke Alanui Papu mai       972 3m

 

NU HOU! NU HOU!   

     MAHOPE AKU O KA LA I O IANUARI, 1880, N HOOmaka ana makou malalo o na rula.

            DALA KUIKE,

I ka Loaa ana aku o ka Waiwai I ka Mea Kuai.

E hookahua ana makou i ka makou oihuna malalo o ke DALA KUIKE, e kuai ia aku ana na lakou waiwai a pau no ke Kumukuai malalo iho o ka

MEA I IKE IA MAMUA E LIKE ME KA LILO.

He Huina nui ko makou o na Oo, Kopela Ho, &c., &c. i kuai ia mamua ae o ka hoopii ia ana o ka auhau o ka poe nana i hana.

HE MAU LAKO NUI KO MAKOU

- O NA -

PALAU

A makou e kuai aku ai no ka $7 a hiki ka $7.50 Malalo iho o ke Kumukuai mua no kela a me keia PALAU.

Ano ko oukou manawa kupono e looa ai na waiwai makepono loa.

E hele mai Hookahi, E hele mai a pau loa.

DILINAHAMA MA.

942 tf     37 Alanui Papu.

 

PAPA, PAPA

AIA MA KAHI O

LEWERS & DICKSON!

(O LUI MA.)

MA KE KAHUA KAHIKO MA

Alanui Papu a me Moi

E LOAA AI NA

Papa Nouaiki

o kela a me keia ano.

Na Papa Nani a Paa no ke Kukulu

ana i na Hale!

 

Na Pani Puka, Na Puka Aniani.

Na Olepelepe, Na Pou, Na O-a,

Na Papa Hele, Na Papa Ku,

A me na Papa Moe nui loa

            NA PILI OKA HALE

O NA ANO A PAU.

Na Pepa Hoonani, Na Pena o na Wai a pau,

Na Kui mai ke Nui a ka Makalii,

Na Ami Puka, Na Ami Puka Aniani

Na Ami o na ano a pau,

Na Aila Pena, o kela me keia ano,

Na Aila Hoomaloo, he lehulehu wale,

Na Aila e ae o na ano a pau.

 

NAWAIVANIKI

- A ME NA -

WAI HOOHINUHINU NANI!

o na ano a pau loa.

NA BALAKI ANO NUI WALE

A ke hai ia aku nei ka lono i na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana

- no ka -

UKU HAAHAA LOA!

E like me ka mea e holo ana mawaena o

LAUA a me ka MEA KUAI.

E hele mai! E na Makamaka!

A e lawa no hoi ko oukou makemake

me ka oluolu a me ka maikai.

845 tf