Ka Nupepa Kuokoa, Volume XIX, Number 47, 20 November 1880 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA KUOKOA

Kuokoa me ke Au Okoa

I HUIIA.

No ka Mkahiki $2.      Eono Mahina, $1.

Dala Kuike ka Rula.

 

KOMITE HOOPONOPONO

Sam'l Kaaikaula.

Hezekia Aea.

—

POAONO NOVEMABA 20, 1880.

 

HE HUA MAIKAI

 

—

 

Aloha oe e ae i Kuokoa.

 

            Ke manao nei au e hoike aku ia oe i kekahi mea e pili ana ma ke Kuia Hana: o kamou nei.

            Iloko o ke la 12 o keia mahina. ua hookuu aku no au i kekahi o kuu mau haumana no loko mai o ke a kula. Ua komo no oia iloko o keia kula i ka la 3 o Iulai 1871. Ua loihi koaa noho ana maanei, a ua hookou aku no aua ia ia me ke aloha, a me ke ano minamina nona. Iwaena o kona noho ana me makou maanei i na wa a pau. ua ike pono no au i ka pili ana o kona makua kane ma kuu aoao, ma ke ano o ke au ana. a me ka malama ana iaia, a i keia wa, ua puka no ke kaikamahine me ke aloha, a me ka mahalo o na kumu a me na haumana o keia kula.

            Ua koi mai na makua o ko Kaumakapili poe pokii ia ia. e hoi ma aila, a e kokua i ko lakou kumu. oia no a Mrs. Anna Nathaniel. no kona ano nawaliwali. Nolaila, ua hookuu no au i kuu haumana aloha, me ka manaolana nona, ma kona ano Kristiano, akahei, neauao.

            Ua komo mai nei kona pani, ma ke ano o ke helu ana o na inoa o na haumana, Annie Gilbert, he keiki mai Gilibati mai, he pokii maikai keia, he awiwi, he makaala. O kuu makemake nona eia, e loaa ia ia ka naauao. a i kona kupono, e hoi oia i ke one hanau, a e kokua i kuu kaikamahine aloha i ke ao ana i ko laila poe ma na mea maikai a pau. Aloha oe e ke " Kuokoa. "

MELE E. GELINA.   

 

Hoopau Koalaala.

—

            He mea waiwai ole na olelo e puka nei ma kahi ELELE iki waha kole no na mea e pili ana i na hana a ka Moi, na Kuhina, ame na Haole i ulu-ku iho nei i kela mau mahina aku nei. Oiai ma ka hoomaopopo ana i ka waiwai o ke kamailio loihi ana i na mea o kia ano, aohe wahi waiwai iki, ole loa no. He mea maopopo, o ka hapai mau ana i na kamailio o keia ano i keia wa no ka wa i hala loa aku la. he hoeueu kipi maoli keia, oiai o na mea i hala a ike ole ia ka waiwai oia mau mea ke kii hou ia aku nei a kamailio no i keia mau la. A oiai no hoi o na Kuhina i hoopauia iho nei e ko kakou Moi, o lakou no kai maopopo i ka lakou mau mea i noonoo ai. A pela no ko kakou Lani Moi, Oia no kai maopopo i ke kumu o Kona hoopau ana i kona Aha Kuhina mua malalo o kekahi mau kumu maopopo iaia.

            Aka, mai ka la o na Kuhina mua i hoopauia aku ai a hiki wale mai i keia mau la, aole au i ike iki, ua pine mai kahi o lakou no ko lakou kue ia, koe paha o C. C. Moreno ma o kana Kakauolelo Lunamakaainana. R. W. Wilikoki. Eia nae i ka poe mawaho ae ia e noke mai nei. me he mea la he punaluna haki a me kahi, a me he mea la no hoi he mau kupakako keia poe na ua poe Kuhina nei i paa pono ai na moolelo ia Beni ma Honolulu nei ; malalo o ka noke wahakole mau ke puka nei ua olelo i ko na haole ake e haaawi ia Hawaii nei no Amerika a pela aku.

            Eia ko'u manao ko keia Hawaii oiaio, e waiho kakou pela, a ua ke au o ka manawa e hoike mai. mai manao iho kakou e puka ia mai ana ke kuokoa o Hawaii nei a e lilo ia Amerika. Aohe o'u noonoo iki pela, Hookahi Kumu o ka lilo o Hawaii nei. O ka Hoala ia o na Olelo Kipi a Hoino i kahi poe a Lahui e aku paha. Me ke Aloha.

HAWAII OIAIO.     

            Honolulu, Nov. 15, 1880.

—

KE LII O ZIONA.

—

King of Zion

            Hymn Service.

1

Paa mau ko Ziona Puu,

Kahi noho o Iesu.

Oia no ke Lii a mau.

Ma ka lani, ma ke ao

 

Cho.    Ke Lii o Ziona.           

Iesu ke Lii, ke Lii a mau.

Mau, mau loa ma Ziona

Mau kou aupuni, mau a mau,

2

E makau i keia Alii

Ko na aina, ko na kai.

Na anela, na Moi.

Na makua na pokii,

Cho.    Ke Lii o Ziona &c.

3

Huli, huli na naau

I ae pono ia Iesu.

Pau ke kipi, ke kue,

Ae. e ae, Iesu ke Lii.

Cho.    Ke Lii o Ziona, &c.

4

Paa mau ke Ziona Puu,

Kahi noho o Iesu.

Oli aku, oli mau,

Ke Lii oia o kakou.

Cho.    Ke Lii o Ziona, &c.

Hawaii.

Haawina Kula Sabati.

—

HELU 10, SABATI, DEK. 5, 1880.

—

KUMUHANA.

Na la hope o Iakoba. Pauku Baibala.

Kin 48;8―22.

            8 A ike aku la o Iseraela i na keiki a Iosepa, ninau aku la ia. Owai laua nei?

            9 I mai la o Iosepa i kona makuakane, O laua nei na keiki a'u, a ke Akua i haawi mai ai na'u ma keia wahi. I mai la kela, E hoonoho oe ia laua imua o'u, a e hoomaikai aku au ia laua.

            10 Kauamaha no na maka o Iseraela, no ka elemakule. aole hiki ia ia ke nana; a hoonoho mai la kela ia laua imua ona, a honi aku la oia ia laua, a puliki iho la.

            11 I ae la o Iseraela ia Iosepa. Aole au i manao e ike aku i kou maka, aia hoi, ua hoike mai ke Akua ia'u i kau mau keiki.

            12 A lawe mai la o Iosepa ia laua mawaena mai o kona mau kuli, a kulou iho la ia me ka maka ilalo i ka honua.

            13 Lawe iho la o Iesepa ia laua a elua; ia Eperaima i kona lima akau, ma ka lima hema o Iseraela, a ia Manase, i kona lima hema ma ka lima akau o Iseraela, a hoonoho iho la ia laua imua ona.

            14 Hohola aku la o Iseraela i kona lima akau, a kau iho la ma ke poo o Eperaima, oia hoi ke kaikaina, a i kona lima hema hoi, ma ke poo o Manase: kau akamai no ia i kona lima; no ka mea, o Manase ka hanau mua.

            15 Hoomaikai mai la oia ia Iosepa, i mai la, Na ke Akua, ka mea a ko'u mau makua o Aberahama a me Isaaka i hele ae imua ona, na ke Akua nana wau i malama mai, mai ko'u wa uuku a hiki loa mai i neia la.

            16 Na ka Anela i hoopakele mai ia'u mai loko mai o ka hewa a pau, e hoomaikai ia mau keiki, a e heaia ko'u inoa maluna o laua, a me ka inoa o ko'u makua o Aberahama, a me Isaaka, a e laha loa laua i poe nui iwaena o ka honua.

            17 A ike aku la o Iosepa, ua kau aku kona makuakane i kona lima akau ma ke poo o Eperaima, ua hewa ia i kona maka; hapai ae la ia i ka lima o kona makuakane e hoihoi ae, mai ke poo ae o Eperaima a i ke poo o Manase.

            18 I aku la o Iosepa i kuna makuakane, Aole pela, e ko'u makuakane, o ke kaikuaana keia, e kau oe i kou lima akau maluna o kona poo.

            19 Hole mai la kona makuakane, i mai la, Ua ike au, e kuu keiki, ua ike au, e lilo no hoi ia i lahuikanaka a e nui no ia, aka, o kona kaikaina, e kula aku kona nui mamua o keia, a e lilo ana ia i lahuikanaka nui loa.

            20 Hoomaikai aku la oia ia laua ia la, i aku la, Iloko ou e hoomaikai aku ka Iseraela, me ka i ana aku, E hoohalike mai ke Akua ia oe me Eperaima mamua o manase.

            21 I mai la o Iseraela ia Iosepa, Eia hoi, ua kokoke au e make, a e noho ana no ke Akua me oukou, a e hoihoi aku no ia ia oukou i ka aina o ko oukou poe makua.

            22 Ua haawi hoi au ia oe i kekahi puu waiwai maluna o kou poe hanauna, i ka mea a'u i loaa ai ma ka lima o ka Amora, me kuu pahikaua a me kuu kakaka.

            Pauku Gula, p 21 hoopaa.

            Manao nui. K o ke Akua malama ana i ke ola kino a hiki i ka hopena.

            Na heluhelu la. 1 Kin 47; 13―31, 2 Kin 48;1―22, 3 Kin 49;1―15, 4 Kin 49;16―33, 5 Ios 17;1―18, 6 Oihk 19;30―37, 7 Gal 3;7―29.

            Mele. " Lau lei. " Lei Alii, 151.

            Pule i lilo na haumana i mau lau lei, a i mau lei rose maikai, aala, &c.

Ka wehewehe me ka Ninau ana.

            Pau ka hoonoho ia ana o lakoba ma, mahuahua ka pilikia no ka wi. Ua lohe no na kanaka, he mau makahiki he 7 e hua nui ai ka honua, me ka hahai ia e na makahiki hua ole 7. Aole nae lakou i hoahu a nui ka ai ma na makahiki ai he 7. Iosepa wale no kai hoahu i ka ai a nui loa. Pau ka ai a na kanaka. Hoopii lakou ia Parao no ko lakou pilikia. Hele oukou io Iosepa la, wahi ana.

            Hele lakou io na ala, a kuai me k kala, a pau ke kala, me na holoholonu, a pau ia, me na aina, a me ko lakou mau kino, a lilo lakou i poe kauwa na Parao.

            Haawi no Iesupa i hua mea ai, a mea kanu kekahi. A kau i kanawai auhau. He aha ia kanawai? Ka aina owai kai kuai ole ia, a auhau ole ia?

            Noho lakoba i ehia makahiki ma Aigupita? Pehea kana poe mamo malaila?

            Kokoke ka wa e mke ai Iakoba, kii oia ia Iosepa e hele io na la, e hoohiki. Heaha ia hoohiki? Mok 47;13―31.

            Mok 48;17. I ka lohe ana i Iosepa, ua mai lakoba, lawe oia i kana mau keiki elua, a hele pu i o na la. A lohe Iakoba, eia Iosepa, ala ae oia, a olelo ia ia.

            Heaha ia olelo? p 3.4. Heaha hoi kana mau olelo no Raheta, a no na Keiki a Iosepa? p 5―7.

            P 8.9. Heaha ka ninau a lakoba no na keiki i hele pu me Iosepa, me ka Iosepa pane aua? Me ke kauoha ia Iosepa no ia mau keiki?

            P 10. Pehea na maka o Iakoba? A aha Iosepa i na keiki? A aha Iakoba ia laua?

            P 11. A olelo pehea no Iosepa, a no na keiki?

            P 12.13. Aia na keiki iwaena o na kuli o lakoba. Lawe Iesepa ia laua mawaho, a hoonoho ia laua pehea? Owai ma ka lima akau? Owai ma ka lima hema? No ke aha? I kau ka lima akau o Iakoba ma ke poo o ka hanau mua, i lilo ka hoomaikai nui ia ia. Owai ka hanau mua?

            P 14.. Ma ka hohola ana o Iakoba i kona mau lima e hoomaikai pehea na lima? Maluna owai ka lima akau? A maluna owai ka lima hema? Pehea i hana ai me na lima i hiki ke kau pela?

            P 15-16. Heaha na olelo hoomaikai mua a lakoba?

            P 17-19. Aole pau na olelo hoomaikai a Iakoba, a hoohalahala Iosepa. Heaha ke kumu oia hoohalahala? Iosepa. Heaha ke kumu oia hoohalahala? Heaha kona makemake? A pane aku lakoba pehea? Owai kai pono?

            P 20. Heaha na huaolelo hoomaikai hope a lakoba? Pela anei i hooko ia ai ia wanana a Iakoba no Eperaima?

            Ua oi ka aina o na mamo a Manase. A ia mahea ko lakou mau aina elua? Ma ke aha i oi ai ko Eperaima i ko Manase? E huli i loaa.

            P 21―22. Heaha na olelo hooluolou a lakoba ia Iosepa? Heaha ka waiwai hooilina no Iosepa e oi aku ana i ko kona mau hoahanau? He ninau pohihihi keia. Na ka poe naauao e huli i akaka keia kuleana i loaa ia lakoba ma ka lima o ka Amora, me kona pahikaua, a me kona kakaka.

            Mele. " Ao Laelae. " Lei Alii 152.

Na Ninau a na Kahu.

            Na kane. Heaha ke kumuhana? Hai mai i ke ano o na la mua o lakoba. Mahea i hanau ai? Kona noho mua ana. He punahele no wai? Ke kuai ana i ko ka hanau mua pomaikai, koe anei i nele ia pomaikai; ka hana i hoopaa ia ai ia kuai ana; na pilikia i loaa ia ia mahope, ka pilikia hope ma Kanaana.

            Na wahine. Heaha ka mea i pau ai na pilikia kino o lakoba a me ke kaumaha o kona naau? Ehia mak ona ma Aigupita? Ehia ona mau mak a pau? Heaha kona makemake no kahi e kanu ia ai oia? No ke aha kona makemake e kanu ia ma Kanaana? Pela anei na kanaka Hawaii, ka makemake e kanu pu ia ma na ilina o na kupuna? He aina hooili Kanaana. He hoailona ia no ke Kanaana hou ma ka lani. Malaila paha ka manao nui o lakoba.

            Na ui me na keiki. Owai na keiki elua a Iosepa? Ua lawe oia ia laua a elua imua owai e hoomaikai ia mai? Pehea ka hana ana? Nowai ka pamaikai nui?

            He mau keiki kai lawe ia imua o Iesu e aha ia? Ua hoomaikai mai anei Iesu ia lakou? I na hele aku oukou imua o Iesu a noi aku ia ia e hoomaikai mai ia oukou, pehea oia? Ina makemake oukou e hoomaikai ia e Iesu, heaha ko oukou pono.

            Ke kula a pau. Nui loa ka pilikia ma Aigupita no ka wi, no ka loihi loa o ka hua ole ana o ka aina. Pehea i hoomau ia ai ko lakou ola kino a pau na makahiki wi? Heaha ke kanawai auhau aina kahiko o Hawaii nei? Heaha ke kanawai hou?

           Pehea na aina kahunapule ma Aigupita? Pehea ma Hawaii ne? He mau aina ko na kahuna Hawaii? Ina he aina, ua auhau ia anei?

            Heaha ke kumu o ko Ioesepa ukiuki i kona makuakane? Nohea ko lakoba ike ana, e oi ana Eperaima mamua o Manase? He kane anei Iakoba? Pehea e loaa ai na mak he 147 no Iakoba?

            Ma ke ah e lana ai ka manao o ka poe haipule ma keia ao? Mahea ka home mau o lakou?

            Mele. " Home mau. " Lei Alii 153.

            Pule i naue mau aku i ka home mau.

            Haawina no Dec 12. Kin 50;14