Ka Nupepa Kuokoa, Volume XIX, Number 48, 27 November 1880 — Page 1
| This text was transcribed by: | Chelsea Nam |
| This work is dedicated to: | Rachelle Mapuana Makanani Nam |
Ka Nupepa Kuokoa
KE KILOHANA POOKELA NO KA LAHUI HAWAII.
1 HUHA
NA LELO HOOLAHA: -- O na Olelo Hoolaha he 10 laina kakau lima, he Hookahi Dala no ka puka mua ana; elua puka ana, he $1.50; no hookahi mahina, he $2.00
NA KANIKAU A ME NA MELE: He 10 Keneta ka uku no ka lalani hookahi, ua like ma $1.00 no 10 lalani.
HOOLAHA MAU: E hoomanao na makamaka a e ho okomo mai i na olelo hoolaha mamua ae o ke awakea Poaha, i ole e kaukai ia aku a kekahi pule ae.
E hoomanao e na lehulehu, aole e hoopuka i kekahi Olelo Hoolaha, Kanikau a me ke Mele ke ole e hookaa mua ia mai ka uku.
E hoouna pololei mai i na leta i ka Nupepa Kuokoa.
MOOLELO O NA LA
O KA
Haku Visakauna Nelekona,
KE DUKE O BERONETI.
KE KAUA ANA O NA AUMOKU KAUA
BERITANIA, --A ME KO ENELANI
MAU PAPU LAAU, &c.
KE KAHUA KAUA MA KOPENAHEGENA.
HOOMAU aku la na aumoku kaua Beritania i ke komo ana maloko o keia kowa, me ka alo ana i na poka e lu helelei ia mai ana mai ke Kakela mai o Koronebuga. O ka mau o ke kupinai pinepine mai o na pukuniahi e kani mau ana, a me ke ano ikaika ole mai o ka makani, ma ia mea i haawi aku i ka manaolana i ka Haku Nelekona, e ako hei e hoao iki akukekahi mao pukuniahi o kona mau aumoku e ki aku i ke Kakela.
E like me ka mana i haawi ia aku ia Nelekona mai ka Alihikaua Sir Haida Paka mai, e lilo oia i alakai a i pailata hoi no keia mau aumoku ma ke kowa, ua haawi ko ke ae la oia i ke kauoha maloko o k kahi hae hoailona i ka moku kaua Esisa, Kapena James Walker, a haalele koke iho la keia moku, a hoopuka iki ae la oia ma ka aoao akau i kaawale ai oia no ke kipoka ana i ke Kakela mai ko lakou mau laina mai.
Hoko o na minute he umi mahope mai o @ Manawa, ua kaawale ae la keia moku mai laina ka ae, a iloko o ia mau sekona pokole, i wehe ia ae ai kona mau puka pu, a hoopai ia ae la kona mau pea o na i-a nui, i ole ai oia e koiele ia i o a ianei, a lana iho la keia moku i kahi hookahi me ka makaukau no ka paio ana aku i ke Kakela.
He moku keia ma ka papa ekahi o na mea ana ikaika kaua moana, a e lawe ana oia he kanalima pukuniahi ma kona mau oneki. E like me ka mea i hoike ia aku ma keia helu mua aku nei, aole i hana ia na kaa kaua maluna o keia mau aumoku no ke kipoka ana i na Kakela ma kahi kiekie loa, aka, ua hana ia keia mau mea me ke akamai, a ua lawe ia mai he ewalu wale no o keia mau pukuniahi, me ka hoopaa ia o ko lakou mau waha weliweli me na kaulahao, a hui palaka ia ae la ka waha o na pukuniahi he eha kapuai ma ke ana pololei o na kaa kaua, a he hookah kapuai ma ka laina pololei maluna o ka hale Kakela.
Oiai keia moku e lana nei me ka makaukau, ua ike hou ia aku la kekahi hae hoailona a ke pailata Haku Nelekona, a iloko o ia manawa pokole no i owaka aku ai ke ahi ma ka waha o na pukuniahi ewalu maluna o ka moku pale Esisa, me ka hoouna ana i na poka wela i ka lewa, ua lohe ia aku ke kani me ka paia kuli o na pepeiao o na koa maluna o na aumoku, a ua lohe hoi na koa Denemaka i ke pahu ana o na poka wela maluna o ke Kakela. Ua pouli ke Kakela me ka hiki ole ke hoomaopopo ia aku, aka, ua hiki no i na aumoku ke ike aku i ke Kakela iloko o kela a me keia 15 sekona, mamuli o na poka wela e pahu pinepine nei maluna o kona mau kaupoku me ka malamalama.
O ka mau o ke kani kupinai o na pukuniahi ewalu maluna o ka moku pale Esisa, na ia mea i hoano e ae i ke kipoka ana a ke Kakela i na aumoku. He mea hiki ole i ke Kakela ke hoomau aku i ke kipoka ana i ka mahele mua malolo o ka Haku Nelekona, oiai keia moku e kaua aku nei i ke Kakela, a no ia kumu, ua haawi ae la ke Kiaaina Karita i ke kauoha, e kipoka ia aku keia moku pale e na pukuniahi he heneri i ka Manawa kookahi, a no ia hana ana a ua poe Denemaka nei pela, iloko o ka hapalua hora wale no, ua komo loa aku la na mahele ekolu maloko o ke kowa, ma kahi he 12 mile mai ke Kakela mai, a lana iho la lakoa malaila no ka manawa, me ke kali ana no ka huli hoi aku o keia moku.
Oiai lakou e lana nei malaila, ua ike hou ia aku la kekahi papu lepo o Elasenua ma na kahakai o Denemaka, he ekolu mile mai ke Kakela mai o Koronebuga, a e ki ana keia pupu lepo i keia moku hookahi no, me ka hoolei ana i na poka he kanalima a oi aku i ka manawa hookahi, a iloko o ia manawa pokole, ua kuea pono ae la na papa pu o ka Esisa, a hoolei aku la oia i na poka wela me ka hikiwawe loa i ka papu lepo.
O ka mau o ke kani ana o na pu i hiupalaka ia maluna o ka Esisa iloko o keia mau hora loihi, ua hiki ke ike ia aku ka wena o ke ahi mawaho o ka pu no ka nui o ka wela, a iloko oia mau minute pokole mahope mai o ia manawa, ua pahu ae la kekahi o na pukaniahi, me ka lele liilii ana o na apana hao ma o a maanei, a no keia ulia, he ekihu kanaka i make a hoeha ia.
I ka manawa i pahu ai, ua ike koke ia mai la keia ulia e na aumoku, a iloko o ia manawa i hoouna koke ia mai ai na moku liilii kipoka hoopahu, a na lakeu i noke aku ka papu lepo o Elasenua i ke ki me na poka pahu he haneri a oi aku iloko o na minute he 15.
Hoolana iho la na aumoku ma ka auwina la o ua la nei, a i ka mao pono ana ae o ka uahi mauka o ka aina, ua ike ia aku la ke Kakela o Koronebuga ua hiolo kona aoao hema, a ua helelei he elua hapakolu o kona mau pukuniahi i ka honua, a e ku ana hoi ke Kakela me ka poino nui, e hiki ai ke hana hou ole ia me ka paa pono iloko o na la he 30, a ua make iloko o keia kaua ana he 120 koa Denemaka, a ua pakele mahunehune aku ke Kiaaina Karita mai na poka wela i ki ia aku mai ka moku kaua Beritania Esisa aku, a ua kipoka ia hoi ke Kakela e na poka pahu aole i emi mai malalo o elua haneri.
O ka papu lepo ma Elasenua, ua kaua ia aku oia e na moku liilii ekolu, a ua hiolo kona papu lepo iloko o laila, he 70 koa Denemaka a oi aku.
O ka heluna o na poka i ki ia mai e ke Kakela i na aumoku, ua hiki ia ke koho ia aku, aole i emi mai malalo o ka ewalu haneri, a iloko o kela a me keia manawa e kani haneri ai o na pukuniahi o ke Kakela, ua holo aku ka halulu o ka honua a hiki ma ke kulanakauhale alii o Kopenehegana no na mile he 28 mai ke Kakela mai, a i ka manawa i lohe ia aku ai, ua komo mai na aumoku Beritania moloko o ke kowa no ke kulanalauhale o Kopenahegena, ua lilo ia he mea na lakou e kamailio loihi ai, owai la ke alakai nana i hookele mai keia mau aumoku, a owai la hoi ke kanaka koa nana e aa aku e paio me ke Kakela o Koronebuga.
Ma keia wahi o ko kakou moolelo e na poe heluhelu, ua hiki mai kakou ma ka pahu hope loa no ke kuamoo pololei ma Kopenahegena, no ka mea, aole he mana i koe e hiki ai ke alai mai i ka ikaika o keia mau aumoku ma ko lakou alahele no ke kahua hoopaapaa aupuni ma Kopenahegena. O ka leo kupinai o ka pukuniahi mua loa i ki ia mai ke Kakela mai o Koronebuga, he kukala kaua ana ia ma ka hapa o ke aupuni o Denemaka. Ua makemake ke aupuni o Enelani e loaa ke kuikahi iloko o ka maluhia, a ua makemake hoi ke keiki pukonakona o na ale Haku Nelekona, e loaa ke kuikahi, ka maluhia, ka noho ‘na maikai a me ka hanohano iloko a ka hookahe koko.
Hoomau aku la na aumoku i ka hookomo ana iloko o ke Kaikapu o ka Bolatika, a i ke kani ana o ka hora 12 o ke awakea o ua la nei, kau ae la ka hae hoailona a ka Haku Nelekona maluna o kona moku Sana Keoki, a ia manawa na aumoku i kuu like iho ai i na heleuma maluno iki mai o ka mokupuni o Huena, a ma keia wahi, ua ike kohuliu ia aku la ke kulanakauhale alii a me na aumoku Denemaka ma kahi mamao, a he 15 mile ke kaawale o na aumoku Beritania mai ke kulanakauhale mai o Kopenahegena.
O na Adimarala ekolu Sir Haida Paka, Haku Nelekona, Kamaki Gariva, me na Kapena Haki me Dometa, a me Kenela ka Hon. Sir Chas. Stewart a me na Lutanela Kieike, kau aku la lakou maluna o ka moku mahimahi Lark, a holo aku la no ka makaikai iloko o ke Kowa akea, a ma kahi ewalu mile ke kaawale mai ke kulanakauhale mai, kilohi ia aku la ke ano o ka laina kaua o na aumoku Denemaka, e ku laina ana lakou me ke ano pio, mai ke kihi hema a i ke kihi akau no ke pale ana i na kahakai o uka, a he elima mile ke kaawale kahi a na aumoku Denemaka e lana nei mai na pa pohaku mai o Kopenahegana.
Ma ka kora 5 o ke ahiahi, huli hoi mai la ka moku makaikai o na Adimarala i kahi a na aumoku e lana nei, a ma ka hora 7 o ke ahiahi, ua malama ae la ka Alihikaua Sir Haida he halawai kaua moana, maluna o kona moku Ladana, a iloko o keia halawai i noi aku ai ua Nelekona nei, ua aa no oia e hele a e hui kino pu me na mana Denemaka iloko o ka hookahe koko me na moku ikaika wale no he umi, a me na moku liilii iho a pau, a no keia noi hou a ka Haku Nelekona, ua oluolu i ka Alihikaua ka haawi hou ana mai iaia i elua hou moku ikaika o ka laina hookahi, a ma keia wahi, hoololi ae la ua Nelekona nei i kona moku, a kau aku la maluna o ka moku kaua Elepani, a kau hou ae la oia i kona hae Adimarala e pulelo ana i ka makani.
E hoomanao ko makou poe heluhelu ma keia wahi, o Sans Keoki, oia ko Nelekona moku ponoi, aka, no ke kaumaha a me ka holo ole o ia moku, nolaila i hoololi ai ua Nelekona nei maluna o ka moku kaua Elepani. He inoa keia no ka holoholona nui o ke ao nei a kakou i lohe wale ai, a oia ka inoa o ka moku o ua kaeaea nei i komo ai e kaua me na aumoku Denemaka.
O keia papa kuhikuhi malalo iho, e hoike ana ia i ka inoa o na ‘lii kiekie a me ke kulana o na aumoku, malalo o ke alakai ana a ka Haku Nelekona no ke kahua kaua ma Kopenahegena:
NA MOKU KAUA PAPA EKAHI.
Na Moku Kaua.
Elepani ..............Vice-Admirala HAKU NELEKON, K.B.
(Hae Adimrala Ulaula)
Kapena Kamaki Maseman@ Haki
“ Kamaki Fole
Dapiena ............ “ Keoki Murray
Kapena Rikeke Retalika
Edega ............... “ Keoki Murray
Monake ............ “ Kimo Robata Mose
Belona .............. “ Sir Kamaki Boulden Thompson
Ganges .............. “ Thomas Francis Fremantle
Rusela ............... “ Uilama Kamina
Agemona .......... “ Robata Devereux Fancourt
Adeneta ............ “ Kamaki Bertie
Plyphemus ........ “ John Loafoda
Galetona ........... “ Uilama Bligh
Esisa ................. “ James Walker
NA MOKU KAUA PAPA ELUA.
Amezon Kapena Henry Riou
Disiri ................. “ Henry Inamana
Blanche ............. “ Garehama E. Haremous
Alemine ............ “ Samuela Sutons
Iamaika ............. “ Jonasa Rose
NA MOKU KAUA LIILII LOA.
Arrow ...............Lutanela Wiliama Boletona
Data .................. “ John F. Davonshire
Karuza .............. “ James Brisbane
Harpy ................ “ Wiliama Birchall
NA MOKU HAAHAA KIPOKA PAHU.
Discovery ......... Lutanela John Conn
Explosion ......... “ John H. Martin
Hecla ................ “ Richard Hatherill
Sulphur ............ “ Hender Whitter
Terror ............... “ Samuel C. Rowley
Volcano ............ “ James Watson
Zebra ................ “ Edward S. Clay
NA MOKU AHI I PIHA I KA PAUDA
Zephyr ..............Lutenala Clotworthy Upton
Otter .................. “ George M’Kinley
Mai loko mai o keia heluna o na moku he 36 mai ke nui a ka liilii, he eone mau kao nui i piha i na kaulahao a me na heleuma, no ke kokua ana i na moku i hemahema a me na koa koikawa maluna o keia mau aumoku, i ko lakou wa e hooili kaua ai me na enemi.
Aole i pau.
He Inoa no Kaonohiulaokalani.
O ke kai haale kai moana ke ‘lii,
O ke kai mimiki ke au koieie,
Koi aku ‘la ka kai malo aaka, [halelo,
Ahu kaalelo ke koa kea i kai ka pua i ka-
O Hina, hele ka maka o ke koa,
Pupue ke koa i kai nei e Hina, [papa,
Hanau la e Hina ke koa ku koa moe koa
A akoakoa i kai nei he koa ku moana he koa halelo ula,
He ia mai ke koa nahae,
Ha ke koa i ke ‘lii nui,
O kuhihewa o ke kohola kai ahua,
Ke koa kapu o Kalanimanuia,
He pu koa ku i Lihue,
He pani wai no Halemano,
He hoihoi wai no ka hui,
He pale pumaia no ke kahawai,
O Kaonohi ke ‘lii o ka maka ia,
O ka makamaka ia a Luanuu,
O Kahe o Kukonalaa,
O ke pipi wale o Ewa;
O ka lo aikanaka ia o Halemano,
O Kahe wai kanaka, ia o Lihue,
O kaunu wai kanaka ua wai kanaka
O Kaonohi ke ‘lii ke inoa e kau la,
Haka kau manu keolewa i ka makani,
Ea mai la maluna o malamalama,
Ke koolau i ka luna o ka mahualele,
Inu iho la i ka lepo o Koialana,
I alana i ke kua o ka hele kua,
I ka pahee o ka limu o Limunui,
I ke alanui ke alo o Manuakepa i ke ua,
Ua ike no au e noho nei,
O olua no ia i maalo ae la,
Nawai ka puana o neia pua,
O Kaonohiulaokalani no he inoa.
Kaonohi no paha kou inoa,
Ke ‘lii kupono iluna o ka moku,
I noho no i kona hale,
I ai no i kona moku,
I imi pono iho nei a loaa,
Loaa ka i ko makuakane,
Kamau uli ia kona moku,
Ka moku a Kona i hele ai,
Hele Kona hele Koolau,
Nonoho iho la laua elua,
Noho a olelo kau i kanahele,
Noho laua lai olelo me ka makani,
Ka luna wale aku la i Maunahilo,
Makoli mai nei ka lau o Kuhihewa,
Maloko o Kekukuiaimakalani,
Nana ke kukui e a i ka moku,
O Kalanipoo i kaukele i ka lani,
Nana hoi ka pua e noho nei i ke ao,
O Kaonohi ke ‘lii ka inoa e kau la.
Kau Haili ka polena a ka manu,
Ka polena uahi lena a ka puulena,
Kalea i ka puuwai a ka awaawa,
E kiko-kiko ka manu i ka laau,
Pua i ka ai o ka moani,
Malailena ka laumaka o ka lehua,
Ke oho o ka ohia oo kua uli,
O ka uli nana ike a ke aloha,
Aha oe o huhu ia mai anei,
Nawai ka puana o keia pu,
O Kaonohiulaokalani no he inoa.
Ke ‘lii Kawelo no ka wai,
No ka uka o Kukaniloko,
Nolaila ka oukou na ‘lii
Na ke kahualani kou ili alii,
Kou ilihua aku la Kalanimanuia,
Lehulehu oukou na ‘lii ilaila,
Nolaila ka kau pua alii i loaa mai nei,
Ka opukana manoanoa e Kaweloaikanaka,
Ka haku hana paa i neho ia aku nei,
Loaa mai nei ka lau o Kuhihewa,
Ke kumu ka weli o na ‘lii i loaa mai ai,
I loaa i ke ka awahia manalo ole i ka wai ke ku ia,
He maku Kawelo he nenelu Kuhihewa,
He lau kupu hou no ka moku ke’lii,
E o, o Kaonohi ke ‘lii nona ka inoa,
Ea ka la o Kona o Makalii ka malama,
Ke ai hoonua ala i ke oho o ka mauu,
Ua makauli wale ka lau laau,
I ka holo o ka makani o ka Hikioe,
Hiki ua makani nei hao i ke one,
Waiho wale ka pua haakea,
Ke oho o ka ohai o Moohalaia,
Nani i nani wale no,
E o i ko inoa e Kaonohiulaokalani.
Pane o Hawaii Oiaio.
Kohu pono iho la ka Elele Poakolu malalo o keia inoa hou ona o Wahakole a me ka Manu ai mea ino, a o Tanapi waha tani kona lua.
Malalo o ka mea i hoakakaia e Hawaii Oiaio no na mea pili i na kamailio pinepine ana no na ulu-ku i hanaia ma Honolulu nei i kela mau mahina aku nei i hala a me ka poe haku manao no na mea pili i ua haunaele la i wawaia iho nei -- a me ka manao o keia Hawaii e waiho i na olelo hoala kipi; oiai ua oleloia ke apuka o na haole i ke kuokoa o Hawaii, mai ka waha ae o kekahi mea e kamilio ana maloko o ua Elele Poakolu nei. Eia nae ka pane i pane ia mai nei, he Moa au ha o Hawaii Oiaio, he hoike ana keia i ka lili a me ka manao ino maoli. Aohe i ku iho kana mau kamailio ana maluna o ke kahua o ka mea i kamailio ia. Nolaila, pela au e kapa aku nei, he Ma@u ai mea ino, a he Tanapi waha kani ka Elele Poakolu.
Oiai he okoa ke kumuhana; ke kani hewa mai nei ua wahi manu ai mea ino nei no ke kulana a me na oihana a Hawaii oiaio. Ua manao paha ua wahi manu ai mea ino nei ua ao, kani hewa, a kokolo e hoala ia tanapi waha-kani, nolaila puka ae la ka inaina a me ka awahua ma ke kolamu o na Nioi Mikomiko ma ua Elele Poakolu nei. Me ka olelo iho, e hamau. Ea! E aho o Hawaii oiaio ke olelo aku ia Elele Poakolu, ua oki na olelo ino; oiai he kee aia ilaila kahi i lolii i. Me ke aloha. HAWAII OIAIO.
Honolulu, Nov. 24 1880
Ma keia mau la ua puni o Oahu i ka uahi a Pele, ua a hou paha ka Pele o Hawaii.
O KA LOIO Kuhina hou, W. N. Limaikaika kekahi e kau mai ana maluna o ka mokuahi o keia la.
Ua hookohu ia o Curtis P Iaukea i Kakauolelo nui no ke Keena o na Aina e, ma kahi o W Jarrett i make.
O P. Jones a me ke kaikamahine a Puki o Nuuanu, ua mare ia i ka po Poalima o kela pule.
Ma ke kakahiaka o ka Poakahi nei i ku mai ai ka mokuahi Kulanakauhale o New York mai na Panalaau mai o ka Hema, a niau loa aku la ma kona alahele.
MA Kohala, ua hou aku la kekahi haole o Lo kona inoa i ka pahi ia Kalua k, aole nae i make, ma Kahua kahi i hana ia ai keia hana.
UA hoopii ia imua ka Aha Hoomalu o keia kulanakauhale kekahi mea kakau manao iloko o ka Elele, a ua waiho ia no ke kau Kiure e hiki mai ana.
J.B KOAHI.
LOIO A KOKUA MA KE KANAWAI.
IMUA o na Aha Hookolokolo a pau ma ka Mokupuni o Hawaii a i mua hoi o na Aha Hoomalu a Apana a pau o keia Aupuni. E loaa no au ma Kohala Akau Hawaii.
988 1y
Kauka N. H. VINEBAGA.
MEDALA GULA, KULANUI McGILL CANADA.)
UA NOHO lawelawe iloko a ka Halemai o na Mai Wahine a me na Kamalii, mahope iho o ka lawa ana o kona aoia ana ma Ladana, Enelani.
KEENA HANA -- Alanui Papu Helu 60.
Hora Oihana -- 8-10 A M, 2-4 a me 7-9 P M.
No ka po, e huki i ka bele. 980 3m*
CHRISTIAN CERTZ
Mea Hana Buti
ME
KAMAA MAOLI!
Alanui Papu, makai o ke Keena o Lui & Dickson
KE HAI AKU NEI OIA I NA MEA A PAU,
Ua hoi mai oia mai Kapalakiko mai,
Ilaila Oia i ohi kino mai nei i na waiwai
nani a paa o kana oihana, a ke
waiho ia aku nei no ke ku-
ai ana no na kumukuai
o ka manawa
HE MAU WAIWAI PIHA O NA BUTI
Na KAMAA HAAHAA a me na ano kamaa
no na Lede. Na Buti, na Kamaa Haa-
haa a me na ano kamaa e ae a pau
no no Keonimana.
NA BUTI & KAMAA HAAHA!
A ME NA ANO KAMAA E AE A PAU
NO NA KAMALII!
NA KAMAA O NA ANO HE NUI
O NA KAMAIKI OPIOPIO.
O neia mau mea a pau ua hanaia me ke akamai loa a me k paa o na ano hou loa, a ke hooia ia aku nei ia mau mea e like me ka mea i olelo ia.
E lawe ia no na kauoka mai na Mokupuni me ka maiau me ka eleu. 3m942
PAPA, PAPA
AIA MA KAHI O
LEWERS & DICKSON!
(O LUI MA.)
MA KE KAHUA KAHIKO MA
Alanui Papu a me Moi
E LOAA AI NA
Papa Nouaiki
o kela a me keia ano
Na Papa Nani a Paa no ke Kukulu ana i na Hale!
Na Pani Puka, Na Puka Aniani,
Na Olepelepe, Na Paou, Na O-a,
Na Papa Hele, Na Papa Ku,
A me na Papa Moe nui loa
NA PILI O KA HALE
O NA ANO A PAU.
Na Pepa Hoonani, Na Pena o na Wai a pau,
Na Kui mai ke Nui a ka Makalii,
Na Ami Puka, Na Ami Puka Aniani.
Na Ami o na ano a pau,
Na Aila Pena, o kela me keia ano,
Na Aila Hoomaloo, he lehulehu wale,
Na Aila e ae o na ano a pau.
NA WAIVANIKI
A ME NA
WAI HOOHINUHINU NANI!
o na ano a pau loa.
NA BALAKI ANO NUI WALE
A ke hai ia aku nei ka lono i na makamaka a
pau, ua makaukau keia mau makamaka
o oukou e hoolawa aku ma
na mea a pau e pili ana
ma ka laua oihana
NO KA
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na Makamaka!
A e lawa no hoi ko oukou makemake
me ka oluolu a me ka maikai!
845tf
MAIKAI KA HOI KA PAPA
A ME
KA LAAU O KOU HALE!
NO HEA LA?
KAI NO HOI NO KAHI O
WAILA MA!
Nana aku no hoi ia la
Ohi ka Io o ka Laau o Makawao
I ka ua mea hoi o ka nani o
Na PAPA! Na PAPA!
A ME
NA PONO KUKULU HALE
O NA ANO NO A PAU
Aia ma ke kihi o na
ALANUI PAPU me MAIWAHINE,
HONOLULU
MALAILA E LOAA AI
E LIKE me ka MAKEMAKE
NO KE
KUMUKUAI MAKEPONO LOA
PAPA, PAPA, PAPA,
Na Papa Huluhulu,
Na Papa Manoanoa,
Na Papa i Kahiia
Na Papa Kepa,
Papa Hole Keokeo,
Papa Hole Ulaula.
NA LAAU, NA LAAU
Na Kua,
Na Koala,
Na Aaho,
Na Molina
Na Peapea
Pine Huluhulu,
Pine i kahiia
NA Papa a me na Laau Ulaula!
Pili ulaula,
Pili Keokeo,
Pani Puka,
Pani Puka Aniani,
Ipuka Aniani,
Puka Olepelepe.
PENA O NA ANO A PAU
Hulu Pena mai ka Liilii a ke Nui,
Aila Pena,
Aila Hoomaloo,
Waniti, Pate.
NA LOKO O KELA A ME KEIA ANO!
Na Ami Puka Hale,
Na Ami Puka P@.
ANIANI!
Pepa Hale a me na Lihilihi
E LOAA NO MALAILA.
PAAKAI HELU I O KAKAAKO me PUULOA
No ke Dala Kuike, e loaa no na mea a pau i hai ia ae la, no ke Kumukuai Emi loa. O na kauoha mai Hawaii a nIihau, e loaa aku no ia lakou, e hooko kuke ia no ia me ka lawa pono. E kipa nui ilaila i ike i ka oiaio. 905il