Ka Nupepa Kuokoa, Volume XX, Number 38, 17 September 1881 — NA MEA HOU O HILO. [ARTICLE]

NA MEA HOU O HILO.

Ma ka la 28 o Augate nei, ua hoopii ia o Jes Maikaaloa imua o ka lunakanawai G W Akao Hapai no ka haawi waiona, a i ka nana ana a ka aha, ua hewa ka mea i hoopii ia, nolaila ua kau aku la na laau hahau maluna ona, he $33.70. A ua haawi ka aha he mau olelo ao kupono ia ia, oiai oia kekahi o na kanaka i hoonaauao pono ia, eia nae, ke malama nei oia he hale hoohainu waiona i na kanaka ma Kahalii. Waa Kahuli. Ma ke ahiahi o ka la 27 o Augate nei, kau aku la o Kanekoa a me Kailianu me 2 keiki maluna o ka waa, a huki i ka pea a kia aku la ka iho o ka waa no Keaukaha, a lakou e hoononoho la i ka lawe a ka pea, i ke kau-li hoi a ka hookele, a hiki lakou i ka lae o Kamaholehole, hulihia iho la ka waa, a au nui iho la i lalo, ua laki loa ia nae, aohe ola i poino. Ka hana a ka Pele. Aia he lua nui ma Kukunui mauka aku aia ilaila ka pele i keia wa, a ua neo loa hoi o kai mai, aie nae ma kela lua, ua ike ia aku ua hana mai la ua pele nei i ka pahoehoe ano like me he mau pahu kupapau la, a he mea makaikai nui loa ia iho la ia i keia wa e pii nui ia nei e na kanaka. Owao iho, James K Kahaina. Hilo, Sept 1 1881.