Ka Nupepa Kuokoa, Volume XXI, Number 6, 11 February 1882 — Page 4
| This text was transcribed by: | Michelle Baie |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA NUPEPA
Kuokoa me ke Au Okoa
I HUHA.
No ka Makahiki. $2. Eono Mahina, $1. Dala Kuike ka Rula.
POAONO, FEBERUARI 11, 1882
THE GOSPEL TRUMPET’S SOUNDING
Gospel Hymns, No 266
1
Ke kani nei ka pu la,
Pu Iubile no nei,
Ka leo o Iesu la;
Hamau a lohe e.
Cho. E hoi, e na pio,
E hoi koke e,
Ke kani nei ka pu la,
Pu Iubile no nei,
Ka leo o Iesu la,
E hoi na pio e.
2
Haalele i ka hewa,
A ia Satana pu,
E hapai i ke kea,
A hahai ia Iesu.
Cho. E hoi e na pio, &c.
3
Ua hana no a luhi
No ke lii o ka po,
Paa i ka hale pouli,
A ane make no.
Cho. E hoi e na pio, &c
4
Iesu ka Haku olu,
Ke kani nei ka pu,
Ka Iubile a Iesu,
A Nana e hookuu.
Cho. E hoi e na pio, &c
5
E moku ae na kaula,
E hemo na kupee,
Hoolei i na auamo,
Hookani Iubile
Cho. E hoi e na pio, &c
Hawaii.
Haawina Kula Sabati.
HELU 9. FEBERUARI 29.
Ka ulu ana o ke aupuni. Mar. 4;21-34.
21 I mai la Oia ia lakou, Ualaweia mai anei he kukui e hahaoia’i malalo o ke poi, a malalo o kahi moe paha, aole anei no ke kauia maluna o kahi e kau ai ke kukui?
22 No ka mea, aole mea huna e koe i ka hoike ole ia, aole hoi he mea i uhi malu ia e koe i ka hu ole mawaho.
23 Ina he pepeiao ko ke kanaka e hoolohe ai, e hoolohe mai ia.
24 I mai la Oia ia lakou. E noonoo oukou i ka oukou mea e lohe ai; no ka mea, ma ke ana a oukou e ana aku ai, malaila e anaia mai no hoi oukou pela, a e haawi nui ia ia oukou, i ka poe e hoolohe mai.
25 O ka mea ua loaa, e haawiia’ku nana; aka, o ka mea ua loaa ole, e kailiia’ku kana mai ona aku la.
26 I mai la ia, Meneia ke aupuni ke Akua, me ke kanu ana a ke kanaka @ a ma ka lepo;
27 A moe iho, a ala’e i ka po a me ke ao e kupu ae ana ua hua la anui, aole nae ia i ike.
28 No ka mea, hoohua wale mai no ka honua, mamua ka hoomaka, mahope iho ka huhui, alaila ka hua oo maloko a ka huhui.
29 A i ka makaukau ana o ka hua, alaila hookomo koke ae la ia i ka pahi, no ka mean, ua hiki mai ka wa e oki ai.
30 I mai la Oia, Me ke aha la kakou e hoohalike ai i ke aupuni o ke Akua? A ma ka nano hea kakou e hoakaka aku ai ia?
31 Ua like no ia me ka hua makeke, i ka wai i kanu ia ai ma ka lepo, he hua liilii loa ia o na hua a pau i kanuia ma ka lepo.
32 Aka, i ka wa i kanu ia ai, kupu no ia a lilo i laalaau nui o na laalaau a pau, a opuu mai la na lala nui, a hiki no i na manu o ka lewa ke kau mai malalo o kona malu.
33 Hai mai la Ia i ka olelo ia lakou ma na olelenane e like me ia he nui loa, me lakou e hiki ai ke hoolohe aku.
34 Aole la i olelo iki aku ia lakou ma ka olelonane ole; a ma kahi mehameha, hoak@ka ae la Ia i na mea a pau i Kana poe haumana.
Pauku Gula. Halelu 72;26
Na heluhelu ia. 1. Mar. 4;21-34. 2. Io. 3;1-11. 3. Kor. 3;1-15. 4. Isa 60 5. Dan 2;31-45. 6. Oih. 1;1-9, 2;1-4, 41-47. Hoik 7.
Ka wehewehe me ka ninau ana.
P. 21-25. He mea malamalama ke kukui. I hoike ia i ka malamalama mahea ia e waiho ai? E huna anei ia malalo ae o ke poi, a o kahi moe paha? E kau ia paha ma ka papa? Poi, he wahi maloo ia, he hapa busela. Kahi moe, he laau moe ia, i uhiia i ka lole, a hiki ke huna i na mea malalo iho. He naaupo ia ke ku@i i ke kukui, a waiho malalo ae o ka pahu, a o kahi moe. E kiuia ma ka papa i malamalama kahi keena. Nana me Mat. 5;14-16, i akaka ke ano.
He kukui ka hoahanau. E hoike i ka malamalama. He kukui ka haumana. E hoike i ka naauao.
He kukui ka olelo a ke Akua. Ehoike aku ia. Mai huna, e hoolohe aku.
E ka mea pepeiao, e aha oe? E noonoo i ke ano o na mea au e lohe ai. Mai lohe lalau, o hai lalau aku, a hoahewa ia, a kapa ia, he mea holoholo olelo oe. Mai haliu i na olelo ino, o lohe a hoolaha aku, a hoino ia oe.
O ka mea i loaa pehea e loaa hou ai? A pehea e hoonele ia ai? E hana elike me ka ike. A hana ole, e lilo ana kou ike i mea ole.
P. 26-29. Ke aupuni o ke Akua, ka ekalesia oiaio ia. He mea uuku mamua, e like me ka hua i kanuia ma ka lepo maikai. Pehea ia hua mahope? Kupu malu, ulu malu, hoohua mai, a oo na hua, a ohiia. Pela anei ka olelo a ke Akua, a me ka pono io? Ae.
Elua wa ohi, ma keia ao, i ka wa komo iloko o ka ekalesia, a ma kela ao ma ka lani.
P. 30-34. He olelo nane hou. Ua hoohalikeia ke aupuni o ka lani, me ke aha? He mea uuku ka hua makake, me he huna paula. A lilo ia ia aha? Pela ka poe pono, uuku @kou mamaua. Uuku ka ekalesia euanelio mua. He 12 haumana ma ka hooma ka ana. Ehia miliona i keia manawa?
Ka hoopiliana.
1 Pono ke lilo kela haumana, keia haumana kula Sabati i kukui hoomalamalama e hoike ana i ka malmalama ma kahi akea.
2 Pono ka poe lohe i ka olelo a ke Akua, me na nu euanelio maikai, ke hai aku ia ia hai.
3 Pono ka poe aloha ia Iesu ke hoike i ko lakou aloha ma ka hapai ana i ke kea, a hahai ia Iesu ma kahi akea. Mai huna i ke aloha me ka pono malalo ae o kahi moe.
4 Ua loaa anei ka hua a e i &c? He mau hua makeke ia. E ulu ae a lilo i laau niu, laau alani, laau piki, laau piku, e hoohua ana a nui.
Mai hoomau ma ke ike uuku, ma ka pono uuku, ma ka hana maikai uuku, ma ke kula Sabati uuku, ma ka ekalesia uuku, ma ka pule uuku, ma ke kokua uuku, mai kanu a nalo loa ia ke talena hookahi.
Mai hoolilo i ka ike uuku i mea ale, a me ka ike nui i mea e make ai.
E makau ka poe noho wale, palaka, hiamoe o hele koke mai ka Haku, a hoopau i ko oukou mau pono, a hoonele loa a hoolei aku iloko o kahi pouli loa, kahi e auwe ai, a e uwi ai na niho.
Haawina no Mar. 5 Mar. 4:35-41.
HE WAHI HAIOLELO POKOLE.
“A nahaha iho la na Moku”.
2 Oihana Lii 20;37.
He mau moku maoli keia i nahaha. Elua alii kai hui pu e hana, he alii pono, he alii hewa. He mau moku kalepa e waiwai like ai paha laua.
Ua hana pu laua me na kanaka o laua a paa, ua makaukau e holo, nahaha e nae, a holo ole. No ke aha ka nahaha ana? He makani ikaika paha i pa mai.
Nohea mai ka makani? No ke Akua mai paha. Heaha ke kumu o ka pa ikaika ana mai o keia makani? Ka ae ana o ke lii pono i ke lii hewa e hui pu me ia ma ka hana’na ia mau moku. Ukiuki ke Akua a hoala ia makani ikaika e naha ai na moku, a poho na luhi me na lilo.
Ma ka hoopili ana.
E Hawaii O Keawe, ke aupuni kou moku ka Moi ke kapena, na Huhina me na luna na malama moku, na kahu moku, na sela ka poe kokua i ka hookele ana, na kanaka o kela ano, o keia ano, o kela lahui, o keia lahui, lakou na ohua.
E noonoo pono ka poe hookele, a me ka poe kokua i ka hookele ana i kou moku, e makau i ka hui ana o ka poe pono me ka poe hewa; o ka poe naauao me ka poe naaupo; a o ka poe aloha io me ka poe aloha hookamani, o ukiuki mai ke Akua a hoala mai i ka makani ikaika a komo ka moku iloko o na nalu ino, a ili a nahaha.
E noonoo pono i ke ano o na ohua e ae ia’na e lawe ia maluna o ka moku, oia hoi na ohua no kahi e mai, ka poe naaupo, ka poe hoomanakii, a hoomana lalau, a hui pu me ka poe hoomana ia Iehova, a kaumaha ka moku i keia mau ohu@ huikau. A nana mai ke Akua me ka ukiuki, a hookuu i ka makani ino, a kahuli ka moku, a paholo loa ilalo, a hiki ole ke hoala hou ia’e.
Nau na Minamina Aupuni.
HEAHA KA MILENIO, A ME KONA ANO, A HEA LA IA HIKI MAI?
Ke olelo nei ka baibala i ka hoi hou ana o Iesu ka Mesia ma Kona kino ponoi, me ka nani loa, Mat 24;30 a me 26;64, Oih 1;11 & 3;20,21, 1 Kor 1;17, T@ 2;13, Heb 9;28.
Ke hoike nei ka baibala i keia mau mea ekolu i hiki mua mai, oia no 1 ka hoolaha ana i ka euanelio maluna o ka honua a pau loa, Io 45;22, Hos 2.23, Mat 24;13, Mk 13 10, Rom 11;25,
2 ka hoohuliia ana o ka lahui Iudaio me he lahui kanaka ia, e like pu auanei ko lakou hoolei ana a me ko lakou hoi hou ana, Tek 12;10, Rom 11 a pau, 3 ka hiki ana mai a Anikristo, i Io 4;3 a me ka ino nui o ka mea i haule iloko o ka hewa.
Pili pu me keia hoi hou ana a ka Haku ke ala hou ana o na mea a pau i make ai, ka la hookolokolo, ka pau o keia ao nei; a me ka piha pono o ke aupuni o ka Haku.
Ke hoike nei ka olelo wanana i ka mana wa maluhia a me ka noho pomaikai ana o ka lehulehu. E hoohulua na lahui kanaka a pau loa i ka manaoio.
E hookomoia iloko o ka ekalesia na Iudaio a pau loa, e pakui hou ia lakou iloko me he lala maoli la o ko lakou laau oliva ponoi. E like auanei keia hoi hou ana me ka hoola hou ana i ka poe i make, ke lana loa nei na manao o ka ekalesia no keia mau hua olelo moakaka a me ka maikai, aole he mea ma@lahi e hookaawale aku i na olelo e pili ana i keia wa pomaikai ma ka honua nei a me ke kukulu ana a piha pono i ke aupuni o ka Haku ma ka pomaikai lani, pela no ua hiki ole i ka poe Iudaio kahiko ke hoomaopopo i ke ano okoa o na olelo e pili’na i ka hoopakele ana ia lakou iho mai lalo mai o Babulona a me ka hoopakele ana e oi aku i ka poe hewa a pau loa malalo aku o Iesu, aka hoi ua maopopo loa, mai Babulona mai kekahi, ma o ka Mesia kekahi, pela no i keia wa ano, ke lana nei ka manao e hiki mai ana ka maluhia a me ka pomaikai o ka Milenio ma keia honua nei a me ia hoi ka nani a mau loa o ka poe manaoio e hoi aku ai iloko o ka lani, a kapi ia keia wa maluhia a me ka pomaikai o ka Milenio, o keia hauoli mai na huaolelo Latina, Mille a me Annua, penei ke ano ma ka olelo Hawaii, ‘he makahiki tausani,’ ke olelo nei ka baibala i ka Milenio, Hoik 20;1-7, i wehewehe ia e ka poe heluhelu ma ke ano maoli he mau tausani makahiki, ke wehewehe nei no hoi ka poe akamai i keia olelo me ka manao ke olelo nei keia mau pauku baibala i ka manawa maluhia a me ka pomaikai no na makahiki he lehulehu aole i helu ia me ka pololei maoli, me he tausini wale la no.
He manao naaupo ka ka poe e wehewehe ana i kela manawa i keia manawa i oleloia oia no 360.000 mau makahiki, me ka helu ana i na la 360 ma ka makahiki wanana me ka hoohalike ana i hookahi la i 1 makahiki, no keia kumu paha, ua oleloia.
He like pu ka la hookahi imua o ke Akua me na makahiki he tausani.
Iloko o ka milenio auanei e nui loa a e oi aku ai mamua o na manawa i hala ka maluhia a me ka pomaikai o ka ek.
E like auanei ka noho kupaa ana ma ka pono o ka poe manaoio a me ke ano hana kupono o ka poe i pepehi ia no ka olelo a ke Akua a no ka oiaio a lakou i hoike ai.
Nolaila e like auanei keia wa maikai me ke ala hou ana o kela poe pono a me ka manaoio i make loa ai i ka wa kahiko loa, me he mea la ua ike hou ia o Elia me Ioane Bapetite, pela no e ike ia ai ka poe manaoio i kupaa ma ka pono a pau loa, ma o ka poe hoahanau o ka milenio.
A pau keia wa maluhia, e nui auanei ka poilikia, me he mea la’e ala hou ana ka poe a pau loa i hoomaau mamua i ka poe Karisetiano.
O keia ke ala elua hou ana i oleloia, Hoik 20;4,5,8,9, na uhane o ka poe i okiia, ola pu lakou, i ola ke koena o ka poe make.
Ke hoike nei na olelo wanana i keia maluhia e pili ana i ko ke ao nei aole e pili’na i ko kela ao aku.
I ka wa e hiki hou mai ai o Iesu e hoopau ia ka honua ka lani a me keia ao nei, mahope o ua wa la e ike ia ka ekalesia, aole ma keia honua nei, aka nae ma kela iani hou.
Ke hoike nei ka baibala i ka hoopalahalaha ana i ke Iesu aupuni maluna o keia honua a pau loa.
Nolaila ke pili nei keia hoopalahalaha’na i ka euanelio i ka manawa mamua o ka hoi hou ana o ka Mesia.
E ninini ana ke Akua i Kona Uhane maluna o na kanaka a pau loa, e lako auanei ka naauao.
E pau na kaua ma kela wahi keia wahi, aole he mea hoopilikia paha, aole he mea hoino paha ma Ko’u mauna hemolele, wahi a ke Akua.
Aole pili keia olelo i ka hoopauia ana o ka hewa, o ke eha, o ke ino, aka nae i ka hoomau ia ana o ka pomaikai, ka maluhia, ka hana pono iloko o ka milenio loihi.
Aole auanei e lilo na kanaka a apua loa i poe Karisetiano io, e hoomahuahua pu na zizania a me na huita, e malama ia na hana haipule, e like me ka mea maa mau.
E mau ana ka hoohuli ia ana i ka pono a me ka hoohemolele ana i ka poe manaoio, e like ka pomaikai milenio me ka pomaikai o ka poe pono i keia wa ano, aka hoi e hoonui ia, e hookuku ia ka pomaikai.
Aole keia ka hopena o keia ao, mahope o keia milenio, mahope o kekahi emi hopeano nui, e hiki mai ana ka hopena o keia ao nei.
He nui na kumu no ka hooikaika ana i keia manao mawaho o ka baibala.
1 He koho pono keia ma ka noonoo pono ana i ke ano o ka euanelio. Ina kupono keia olelo hoopomaikai no hookahi kanaka a no kookahi lahui ina ua kupono hoi no na kanaka a pau loa a no na lahui a pau.
2 Aole pili ko ke Akua lokomaikai i ke ano okoa o ka ili kanaka, aka nae, o ka pono oia no ka poe oluolu i ke Akua, ina no ka pomaikai o kekahi mau kanaka ua hoouna ia ka euanelio, alaila, e hoouna ia oia no ka pomaikai o na kanaka a pau mamuli o ko ke Akua lokomaikai.
3 Pela no ke kauoha a ka Haku a me ka makemake o ka poe manaoio e hoopalahalaha i ka euanelio i na wahi mamao o keia nouna nei.
4 Ua lako keia pomaikai i na kanaka a pau loa, ina e mik@ ana a me ka ikaika ka poe manaoio ma ka hana a ka Haku, ina e hoopomaikai me ka wikiwiki ko ke ao nei a pau.
Ina no ke tausani makahiki e mau ka maluhia a me ka pomaikai, e oi aku na kanaka o ua milenio la mamua o ko na keneturia mamua he pa umikumamahiku tausani.
He oiaio maoli ka olelo wanana o ka baibala, aole na oleo hoohalike wale no Io 2;2, Dan 2;34,35, Hal 72:8-11, Hoik 11;15 a me 20;2.2, aka hoi na huaolelo kupa Kio 22 18. Hal 2;8, Mal 1;11, Mar 24;14.
Mamuli o ka manao lalau o kekahi poe wehewehe baibala, ke olelo nei lakou i ka hoi hou ana o ka Haku mamua o ka milenio.
Penei ko lakou manao, 1 aole e hoohuliia na lahui i ka pono, aole nae e hoihoiia ka la hui Iudaio a hiki i ha hoi hou ana o ka Haku.
2 ka manaopaa o keia hoi hou ana no ke kukulu ana i Kona aupuni ma ke ana kanaka ma Ierusalema, Kona kulanakauhale alii.
3 i ka wa e hoi hou ai ka Haku e hoopau ia a make ka poe hewa, e ala hou an ka poe manaoio i make, e hoololi ia ka poe kino ola i ua manawa la, no ka poe hoahanau ekalesia ke noho alii pu me ka Haku.
4 e hoihoi ia ka poe Iudaio i ko lakou aina ponoi, a no lakou ka lawelawe ana ma ka hoohuli ana i ko ke ao nei i ka pono.
5 e nani loa ko ka Haku aupuni no na ma kahiki he tausani.
6 mahope o ka milenio ke ala hou ana o na kanaka i make i koe mua, ka ia hookolokolo, ka hopena o ko ke ao nei.
He nui a me ka ikaika na kumu no ka hoole ana i keia manao lalau.
1 he manao keia e like me ko ka Iseraela manao e pili ana i ka Mesia a me Kona aupuni anao kanaka.
2 kue keia ia ka baibala ma ka olelo ana i ke ala hou ana o ka poe hoahanau ekalesia wale no mamua iho o ka milenio.
Penei ka oiaio, no ka poe i hala a pau loa ke ala hou ana, poela no ka oiaio i hoike ia.
Ioane 11;14, Oih 17;31, 1 Tes 4:16,17, 2 Pet 3;7, i ka wa e hoi hou ana ka Haku, e ku iluna imua Ona na lahui a pau no ka hookolokolo ana.
4 mamuli o keia manao lalau, aole no ka poe pono i ala hou ka hookomoia ana iloko o ka pomaikai lani, aka iloko o ka pomaikai emi, aka nae, he oiaio, i ka wa e hoi hou ai ka Haku, e komo Kona poe manaoio iloko o Kona nani mau loa.
5 kue keia manao lalau i ke ano maoli o ko ka Haku aupuni, aole he aupuni ano kanaka, Mat 2;5,5, aole ka pomaikai ma ko ke ao nei, Ioane 6;62,63, aole e mau ke ano okoa o ka poe Iudaio a me na lahui e, aole e hoopauia ke ola ana ma keia honua, a no ka poe hewa wale no.
6 ke hoowahawaha nei keia manao lalau i ka euanelio ma ka hoike ana i ka inaina o ke Akua ma ka hoopai ana i ka poe hewa, oia no ke kumu no ka hoohalahala ana i ka pono, aka nae, he oiaio no, mamuli o Kona aloha keia huli ana.
7 ke kue nei keia manao lalau i ka noonoo pono, no ka mea, aole kohu kekahi i ke kahi no ka hapa o ka manao, ke unuhi nei lakou i na huaolelo baibal ma ke ano hoohalike ole no kekahi hapa, aole pela no kekahi hapa.
E hoihoiia ka poe Iudaio i ko lakou aina ponoi, pela no keia wehewehe ana, aka hoi, pehea ka pii ana o na lahui kanka a pau loa i Ierusalema, no kela a me keia mahina, i kela a me keia la Sabati, Is 66;22, 23, he mea hiki anei keia? Aole loa.
He olelo hoohalike wale no ma kela a me keia pauku i kuhikuhiia.
Aole he mea p@ ka wa e hoomaka ai keia olelo hoopomaikai e hooko ai, he mau mea i ikei, na mea mamua iho Ona, ma paha ua olelo ka baibala i na makahiki i helu ia, aole hiki ia kakou ke hoomaopopo i na la palena.
E heluhelu ia Dan 7;25, e haawiia ia mau mea iloko o kona lima a hiki i ka manawa a me ka mahele o ka manawa @ paha ke like pu nei keia piuka baibala me Hoik 12;14, ua hanaia oia i ka makahiki a me ka hapa o na makahiki, oia no na la 1260, Hoik 12;9, he oiaio paha, no ka mea, o ka huina pau o na la ma ka makahiki hookahi, @a mak 2 a me ka hapa mak, he 360 na la no ka makahiki, oia no 1260.
Aka hoi ke puka nei ka ninau kanalua, pili keia olelo wanana i ka mana Pope? i ka wa he@ e hoomaka ai keia mau mak 1260, hiki paha ia kakou ke ana ana i keia manawa mai ka mh 606 mai, no ka mea, ua haawi ke alii Roma Poka i ka noho alii maluna o ka ekalesia katolita.
Ina pela, ka hope oia no ka mh 1866, ua hoopau ia ka mana aupuni o na Pope, ina paha e hoomaka kakou i ka mh 754 i ka wa o ka Pope i hapai mua ai i ka mana aupuni; e hoopau ia ka mana Pope mh 2014.
Ina paha ke pili nei keia olelo wanana i ka poe mahometa, i puka ai i ka mh 622, o ia auanei ka hopena o ka mh 1882.
Aka nae, he mea pohihihi ka pili pu ana o keia manawa a me na palena o ka wa oleloia.
Ua uhi ia ka wa milenio ma na wanana baibala, ina paha ua wehewehe hapaia kela wa maikai.
Ua hoike na kaula i na anuu o na manawa, aole laa ka nui o keia mau wanana.
KA HAIOLELO A GUITEAU.
(Koena mai kela Pule mai.)
O ka hana e hanaia nei maluna o’u me he mea la ke holopono nei. O ka lunakanawai, ua manao au ua hupono oia no keia hihia no ka mea he akahele oia he noonoo a he kanaka akamai.
O na Kiure he poe maikai a ke manao nei au e hooholo ana lakou i ka pono ma ko’u aoao. Ma ko’u nana ana a kilohi hoi i ko lakou ano, he akahele a he manao paa a ma ka lakou olelo hooholo no ko’u hihia e hooholo ana lakou no ko’u pono: Ua lawe ka aoao aupuni o ka Aha nei i kana mau olelo kupono ole a no ia kumu i pu ai k@mama a pane kikoula au ana o ka’u mea makemake ole ia. Ke manao nei au o ka pono kaulike ke kanaia maluna o ko’u hihia a o ka’u mau hena e holomua mau. Ke i mai nei na makaainana, ina o ke makemake ia o ka Mea Mana Loa e pono e hookuuia keia kanaka.
O kenela Arthur he hoa’loha maikai ia no’u a ke hanini nei ma o a maanei o ka aina kana mau hana maikai. Ina i hana o Gafila e like me ka Arthur e hana nei ina eia oia ke ola nei. He kanaka maikai oia aka he nawaliwali kona noonoo ma na hana e hooholomua ai i ka aina. He hauoli nei au i ka Arthur mau hana i keia wa a o ka’u mea ia i makemake ai iaia e hana, oia hoi kona hoopau ana i na omamalu o ke kaua ma ka aoao Repubalika i kimu e maluhia ai ka aina holookoa.
O ke ano o ko’u noho ana mai ko’u mau la opiopio a hiki i keia manawa, he ano noho’na o ke kaumaha a me ka pilikia. He makuakane maikai ko’u he hoahanau. Ua alakai oia ia’u iloko o na hana pono a iloko au o ia hana a hiki i keia la.
Aka mai noonoo nui kakou no ia mau inea i hala hope o ko’u ola a e haliu aku kakou i na mea e hiki mai ana o mua. O kahi hoolulu o ko’u uhane aia no ia ma ka poli o ka Mea Mana Loa ka’u mea e hoomana mau nei, e hoonani mau nei a ina he hookahi makahiki a kanakolu makahiki paha o’u e ola ai ma ka honua nei ma keia mua iho, Nona mau au. Ke manao nei au e lilo ana au i Peresidena no keia aina nui palahalaha, oia maoli no ka manao o na makaainana e nonoho mai nei.
He mau makahiki i hala ua hanauia o Iesu Kristo iloko o ka ilihune a me ka nui o na keakea ia e na kanka Iudaio. Ua kaapuni oia ia Iudea, a ua ao aku oia i na kanaka me he mea mana la aole e like meka poe Kakauolelo. He nui no kanaka i hahai iaia. Ua nui na mai daimonio ana i mahiki ai, hoola i ka poe mai, hookakaa i na makapo, a ua hoike aku oia i na kanaka i kona ano a me kana hana i hiki mai ai i ka honua nei, aole wahi e hoomoe ai i kona poo aole ana dala, aole na buke i kakau ai, ua hoino ia oia a o ka hopena ua kau ia oia ma ke kea; pela no au ua hana au i ka’u hana i kauoha mai ai ia’u e hana e like me kona hoouna ia ana mai e kona Makua ma ka lani e hana i kana hana, pela au i hana iho nei.
E akahele ke kanaka e hoao ana e hoahewa i ke kanaka pono o ka Mea Mana Loa, e kau mau maluna ona ua hoomaewaewa ana.
HOOLAHA HOOKAPU AINA.
O maua na mea nona na inoa malalo, ke papa a ke hookapu loa aku nei maua i ka hookuu wale ana o na holoholona a me ka hele wale ana o na kanaka maluna o ka aina o maua i keia ma ka inoa o AWALUA, ma Kohala Akau, Hawaii. E hoopii ia no ma ke Kanawai ka poe e kue ana i keia, e ko maua hope oia o Wahine. PAAHAO k, KAHELE w. 1051 3t*
RICHARD F RICKERTON.
[PEKETONA.]
LOIO a he KOKUA ma ke KANAWAI!
E HELE ANA OIA IMUA O NA AHAHOOKOLOKOLO a pau o keia Aupuni ma na ano hihia a pau ina paha ma Oahu nei, a ma na Mokupuni e ae.
Ua makaukau mau ola i ka hana ana i na Palapala pili ka nawai o kela a me keia ano.
Ua hiki no hoi iaia ke hoale dala aku ma ka moraki ana ina aina, ma ka ukupanee haahaa loa.
E hanaia na hana me ka hikiwawa a me ka uku haahaa.
Keena hana, Helu 23 Alanui Kalepa, elua puka ma o aku o ka hale kauka o Kauka Miniteole.
840 ly
PAPA KUHIKUHI MANAWA HOLO
- O KA –
MAKUMAHU HAWAII
“LIKELIKE,”
KAPENA KING.
AOLE AIE NO NA UKU OHUA
Ke hooleia aku nei ka aie no na aku ohua, a ke hoikeia aku nei i ke akea, ina he mau paiki, ukana a puolo hooili ko lakou e pono e hoailona ia me ka moakaka KA. Aole no e ae ia ka lawe ana i na ukana, paiki a me paoio i hoailona ole ia ke ole e kakauia ka loaa ana mai.
HE KUIKE K UKU UKANA.
Ma na ukana a pau a na makamaka, e pono e uku mau ia. A e hookoia no na kauoha no ka lawe a hiki i kahi i makemake ia. A e malama la no me ka makaala na ukana, paiki a me na puolo, lio, pipi a me ka hoki.
E hoailona ia me ka moakaka na Pahu Rama a me Waina.
O ka poe no lakou na ukana o keia ano e pono e hoailona ia me ka moakaka, a i ole e kakauia me ka moakaka ka loaa ana mai o ka poe no lakou keia mau waiwai.
O na koina no na pilikia a me na poho, e pono e hoike koke ia mai iloko o ka malama hookahi.
Aole e ae ia na hookele kaa, na keiki a me na mea like, e pii iluna o ka mokuahi i ka wa e pili mai ai i ka uapo, aia wale no a paa ae ehua aepakeke i ka lele.
No ke ake nui e hoopomaikai ia ka lehulehu kaahele, ua hoololi ae nei na Ona o Likelike i ka Papa Hoike Manawa ola Mokuahi a like me ma ua.
Ma ka Hale Oihana e loaa’i na Palapala.
Aole keena o hope a lilo, aia wale no a kaa mua mai ka aku moku. Aole e @ ka hewa, no ea paiki, ukana a puolo paha, @ e kakauia ka loaa ana mai. E hookaaia ka uku ukana ka wa e nolia aku ai. WAILA MA
LOLE MAKEPONO
Ke Kuike
E LOAA NO IA MA KAHI O KAKELA ME KUKE
- E LAA NA –
Ahinahina, Kalakoa, Keokeo, Leponalo, Pena, Aila, Aulani, NA MEA PIULA!
KOPA, AILA HONU, ILA HOOMALOO
Kui Kakia, Pakeke, Tabu, Kaula, Noho Lio, Hulu Palaki, @ Pulumi.
- A HE –
AGENA NO HOI NO KA MOKUPUNI O HAWAII NEI NO NA
Lainakini-nao, Lainakini Maoli, Palule Kalakoa, Alapia, Kelepa, Kilika.
Na lole kupono i ka wawae, Palule Huluhulu, Na Lole Huluhulu, Na Lole no ka hoohehelu ana, Lipini, Lihilihi, &c.
LIPINI, LIHILIHI, &C.
- A ME NA –
Mikini Humuhumu Makepono Loa!
-A HE –
MAU MEA E KAHI
Ka Palaoa, Kopaa, Raiki, Pia, Hoohu, Paakai, Huaala, Pia Kulina, &c
A he Laau Lapaau Kaulana Loa A DR. JAYNES.
Laau Kunu, Laau Hoomaemae Koko, Laau Hoopau Naio, Penikila, Huaale
A ME NA LAAU HAMO, A PELU ‘KU
840 tf
PAPA, PAPA
AIA MA KAHI O LEWERS & COOKE!
(O LUI MA.)
MA KE KAHUA KAHIKO MA
Alanui Papu a me Moi
E LOAA AI NA Papa Nouaiki o kela a me keia ano.
Na Papa Nani a Paa no ke Kukulu ana ia na Hale!
Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na papa Ku,
A me na Papa Moe nui loa
NA PILI O KA HALE O NA ANO A PAU.
Na Pepa Hoonani, Na Pena o na Wai a pau, Na Kui mai ke Nui a Ka Makalii, Na Ami Puka, Na Ami Puka Aniani, Na Ami o na ano a pau,
Na Aila Pena, o kela me keia ano, Na Aila Hoomaloo, he lehulehu wale,
Na Aila e ae o na ano a pau.
NA WAI@ANIKI
- A ME NA –
WAI HOOHINIHINU NANI!
O na ano a pau loa.
NA BALAKI ANO NUI WALE
A ke hai ia aku nei ka lono ia na makamaka pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana
- NO KA-
UKU HAAHAA LOA!
E like me ka mea e holo ana mawaena o LAUA a me ka MEA KUAI.
E hele mai! E na Makamaka!
A e lawa no hoi ko oukou makemake me ka oluolu a me ka maikai!
8454tf.