Ka Nupepa Kuokoa, Volume XXI, Number 9, 4 March 1882 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXI. HELU 9

 

KA NUPEPA

Kuokoa me ke Au Okoa

I HUIIA.

 

KA MOOLELO

ONILA MAKA!

KA MAKAI KIU KAULANA

O

ENELANI!

A O KA MEA

 

POHIHIHI O KA 1868.

 

            I na makamaka heluhelu o ke KOUKOA, ano ke panee hou ia aku nei imua o oukou kekahi moolelo hou, i hoiloli wale ia e ko oukou makamaka no na kau he lehulehu. Ua lana ka manao o ka mea kakau e lilo ana keia moolelo oiaio i ku i alakai no ko kakou mau makai e hoani ia ai ko lakou mau manao no ka hana a lakou e paa nei, a e lilo nei na hana maalea, akamai a me ka hoomanawanui, i kahua na ko kakou oihana kaiko e hoohalike aku ai me keia kanaka kamahao.

            Mamua ae o ko kakou hoomaka ana e hoau mua i ko kakou moolelo, ke hoike mua ia aku nei imua o oukou a pau loa, e hoomaopopo oiai, eia ma Nu Ioka ka hihia a ko kakou kaeaea, kahi i imi ai a hiki i ka wa i hooko ia ai kona makemake. A hoi ka luhi o kona hoomanawanui ana i na inea a me na poino he lehulehu iloko o na malama eha o kona noho ana ma ia kulanakauhale kaulana o ke no nei.

 

 

MOKUNA I.

 

Onila me ke Keena - Ke Kama opio - Ke Kukai olelo ana – Hoike ke kama i kona inoa.

 

            MA KA makahiki i hoikeia ae la ma ke poo o ko kakou moolelo, oia no ka wa o ke kulanakauhale o Nu Ioka e piha ana i na lono kaumuha ehaeha e me na poino he lehulehu wale.

            Aka, ma kekahi la nae o ua makahiki la, ua pau aku ka hapanui o na makai a me ko lakou kapena i ka auwana ma ka lakou mau hana pakahi iho, a noho hookahi iho la o Onila maloko o ke keena no kekahi mau minute e hoomaha ai, a e kuka hoi me kona lunaikehala no kana hana.

            Iaia nae e nanea ana, aia hoi, komo mai la kekahi wahine opio iloko o ke keena, a ninau mai la, ina aia no ke kapena o na makai kiu maloko o laila.

            Aui ae la kona puo a ike aku la keia he wahine opio, nona na helehelena maikai e ku mai ana imua ona, a pane aku la.

            E noho iho iluna o ka noho, a e hoike mai i kou makemake.

            E hoike aku no nu i kuu manao ina o oe ke kapena o na makai kiu, wahi a ua wahine opio nei.

            Aole owau ke kapena, wahi o Onila, me ka haka pono ana o kona mau maka maluna o ke kama opio. Aka, he lali hoi au no ia oihana, a o na mea a pau au e hai mai ai ia’u, ua like no ia me kou hoike ana aku imua o ko makou pou, aka, ke minaminamina nei nae au i ka hoi aku ia oe, ua pilikia ia oia iloko o keia hora. No’u iho hoi, ua makaukau mau au iloko o na sekona a pau a lawelawe i na mea hiki iloko o ko’u mana, ke houko i kou mau imi. A o na mea huna hoi au a pau au e hoike mai ai ia’o, e nalo ana ia mau mea ia’u.

            Noho mumule iho la ua kama nei no kekahi manawa me ke kanalua iloko ona, o pane ku la,

            Ua hiki, aka, he makemake nae au i mea eleu a akamai.

            Ua loaa ia oe kou makemake i keia hora, wahi hou a Onila.

            Alaila, hoike aku la ua kama nei i kana mea i hele mai ai. Aka, kauo aku la nae o Onila iaia a kekahi rumi okoa, a pane aku la.

            Eia kahi kupono no kaua, oiai, aole i maopopo ia’u, ka mea ma kekahi aoao aku o keia rumi, lohe mai hoi ia i na mea e olelo ia ana.

            Ae aku la ua kama nei a haele aku la laa nei a kekahi rumi okoa, a malaila i hoike aku ai i kona manao. Aka, ike e mai ia no nae o Onila, he hana ono nui kaua i hele aku ai, nolaila, olelo aku ia aia.

            E pono kaua e hoopokole i keia. Aka, mamua nae o ko kaua huokuu ana, ke ninau nei au ia oe. Eia oe i hea e noho nei?

            Kulou iho la ua kama nei ilalo, me ke nune ana iloko iho ona, ina he mea pono iaia ka hoike ana aku i koua wahi e noho nei.

            No ka pane ole mai o ua kama nei, olelo hou aku la keia,

            Auhea oe e ka wahine opio, ma ke ano o ka’u oihana i noho ai a kuluma, aole e pono e kuka a e hoikeia hoi na manao huna, ma kahi i hiki i kela a me keia pepeiao ke lohe, aka, e hanaia me ka maluhia, i holo pono ai ka iini a kou puuwai opio. E pono e kakau iho oe i kou inoa, ka helu a me ke alanui o kou hale e noho nei maluna o keia apana pepa.

            Lalau aku ia ua kama nei i ka apana pepa me ka penikala a hoomaka iho la e kakau i kona inoa.

            Iaia i kakau iho ai i na hua leta mua loa o kona inoa, haupu hou ae la ia, aole oia e pono e hoike ae i ke akea, e a oia iloko o ke kalunakauhale kahi i noho ai. Nolaila kakau iho ia oia i keia inoa kapakapa maluna o ua apana pepa la,

            “Rahela Kekona,

            16 Alanui Broadway

            Rumi 43.”

a haawi aku la i ka makai.

            I ka wa a ua kama nei i haawi aku ai i ka apana pepa, ninau aku la oia iaia penei:

            E oluolu mai paha kou hanohano e hoike mai oe ia’u i kou inoa?

            Me ka hakalia ole, hai aku la oia i kona inoa ia ua kama nei, me ka i aku o ko’u inoa o ONILA MAKA. A maka hora ekolu hoi o keia auina la e hiki aku ai au ma kou wahi noho.

            KA! wahi a ua wahine opio nei, E ike ia mai auanei oe e ka lehulehu, malia eia kekahi poe ke hoomakaukau nei ia’u, a ina hoi au e ike ia ana me oe, e ili mai ana maluna o’u kekahi poino au i moeuhone ole ai.

            Iaia i hoopuka ae ai i keia mau huaolelo, haikea koke ae ia kona mau helehelena.

            Aka, pane aku la nae o Onila iaia me ka i’aku,

            Mai maka’u oe, ke hai aku nei au ia oe, mai keia wa aku a kaua e kamailio nei a hinki i ka hora ekulo o kei, auina la, e emi iho ana ko’u kino a like me kekahi o na elemakule nona na makahiki he kanaono. E hoomanao mau hoi oe i ko kaua wa e halawai hou ai.

            I ka manawa a Onila i pane mai ai i keia mau huaolelo, aole e hiki i ua kaina ne ke hoomaopopo iho i ke ano o kana mau olelo, a ua lilo hoi ia i mea nune nui na kona puuwai.

            Mahope iho o keia mau kukai olelo hope, haawi mai la ua kama nei i kona aloha a puka aku la e hoi no kona home hoolimalima.

            I ka wa nae a ua kama la i hala aku ai, lalau iho la oia ia ka apana pepa i kakau ia ai ka inoa a me kahi noho o ua kama la, a heluhelu ae la me ka leo nui:

            “Rahela Kekona.”

            No kehai sekona, alawa iho la oia maluna o ka apana pepa, a mino aka iho la a puana ae la:

            A, he wahi inoa maikai keia, no kekahi ui poiopio e like me kona mau helehelena.

            Hohola loa ae la ka mino aka ma na papalina o ua makai kiu mei, a hoike mai la hoi kona mau onohi hulili i ka olioli, a puana hou ae la,

            Nani wale kona mau nanaina, ia’u i olelo aku ai iaia e hana maua ma ke ano hoonalonalo a hoopunipuni hoi, me he mea la, ua manao oia o ka huaolelo “hoopunipuni” he mea weliweli; aka, ua hoike e mai nei ua ui la ia’u ma kana mau hana, ua hoopunipuni oia ia’u mai kona komo ana mai iloko o keia keena a hiki i kon hoi ana. Rahela Kekoa oi pah@, aole paha! A ha! Aole ia o kona inoa ponoi, malia paha, o loaa aku ia’u he wa e hoi hou ia me ia, e hoike aku no au iaio, aole ia o kona inoa, maoli, a e lilo auanei hoi ia mea i mea nana i hoopohihihi i kona nooneo.

            Ma na huaolelo, i hoikeia ne la maluna, oia no na hoailona mua loa i hoike ia mai imua o kakou no ka noeau a me ke akamai lua ole o Onila Maka, ma ke hakilo ana i na hiona, na hana a me na lawelawe ana a ka mea nana ka hana.

            Ma ka hora ekolu ponoi o ua auina la la, e pii malie aku ana ke kau wahi elemakule nawaliwali iluna o na anuu alapii o kekahi hale pohaku nani, a huki mai la i ka bele.

            No kekahi manawa pokole, ku iho la oia malaila, a hemo mai la ka puka, a ku mai la imua ona kekahi kaimanahine kauwa opio.

            Aole i maopopo ia’u, o ka hale pololei paha keia, wahi a kahe elemakule.

            O ka hale hea kau e imi nei? wahi a ke kaikamahine kauwa.

            I ka hale hoi o ke kaikamahine a kuu hanau mua e noho nei i keia wa.

            E kahi elemakule, owai ka inoa o ke kaikamahine a ko hanau mua?

            O Rahela. Aole anei oe i ike i kekahi mea ma ia inoa?

            Aole. Pehea au e ike ai?

            Alaila, aole oia ianei e noho nei. Malia paha, ua komohewa mai nei au. E pono paha au e haalele i ka imi ana iaia, no ka mea, aohe loaa o ka hale e noho nei.

            Ke manao nei au, aole e loaa ia oe, ina pela wale iho la no oe e hele ai e niele no Rahela. Malia, he mau tausani poe ma ia inoa hookahi e noho nei maloko o ke kulanakauhale. Owai ka inoa piha o ke kaikamahine a olua?

            O Rahela Kekona, wahi a ka elemakule.

            Kahana! Ina oia ka inoa o ua kaikamahine la a olua, alaila, ke hai aku nei au ia oe, ua loaa no oia ianei e noho nei, wahi a ke kaikamahine kauwa, e kali ana o ko hiki mai. E komo mai a e hookipa aku no au ia oe iloko o ke keena hoonanea, a e hele ae hoi au e kii iaia e iho mai.

            No ke ano onawaki maoli o ua wahi elemakule nei, ua kokua mai la ua kakamahine kauwa la iaia nei, ma ka paa ana mai i kona lima, a hiki iloko o ke keena hookipa, hoonoho iho la oia i ua wahi elemakule nei a holo aku la e hea i kona haku wahine.

            Iaia nei e noho ana maloko e ke keena hookipa, aia hoi, komo mai la ka ui opio i hiki aku ai ma ke keena o na makai kiu i ke kakahiaka o ua la ‘la.

            Wehe ia aku la na pani puka aniani, a hohola ae la ka malamalama maloko o ua keena la.

            I ka wa a ua kaikamahine nei i nana aku ai maluna o na helelena o ka elemakule, aia hoi, ua ikea a ku la na hiona o ka pohihihi ma kona mau nanaina.

            Aka, me ka leo nawaliwali haalulu, pane mai la ka elemakule:

            E kahaha ana oe i ka ike ana mai ia’u, o ka, aole nae e hiki i kuu keiki ke hele mai ianei i keia la.

            Owai kau keiki? i ninau aku ai ka wahine opio me ka leo hookiekie.

            Alawa awiwi ae la ua wahi elemakule nei ma o a maanei o ke keena no kekahi mau minute, a panu aku la iai, me ka leo haahaa,

            O ka makai kiu.

            A heaha hoi kau o ka hele ana mai nei?

            Nana hoi au i hoouna mai nei.

            I ka nana ana iku a ua wahi elemakule nei i na oiwi kilakila o ka wahine opio e ku aku ei imua o kona alo, ua halia wale mai ia no loko ona. Aole no hoi oia i kiekie loa, aka, ma kona ano a pau, ua hiki ke olelo ia ae, he ui maoli no oia no Paliuli.

            I ka wa a kahi elemakule i pane aku ai, “Nana ua i hoouna mai,” nana mai la ua kaikamahine nei me na maka o ka inaina a pane mai la me ka leo haalulu:

            Malia aole i lohe pono loa o Onila Maka i ke kahua o ko’u hiki ana aku i ke keena o na makai i keia kakahiaka. E pono oe e hoi, a hai aku iaia, ua hooholo iho nei ua e hoopau i ko’u makemake.

            Aole e lona kekahi mea e aku i hiki ke lawelawe pono i kau hana, e ka wahine opio, wahi a kahi elemakule.

            E pono oe e hoolohe mai, owau no ka lunakanawai maluna iho o ka’u mau hana. A aole hoi e hiki ia’u ke hoikeike aku ka’u hana i kekahi mea okou aku, a’u i maopopo ole ai.

            Ua hiki ia oe ke hilinai mai maluna o’u, a na’u no hoi e hai waha aku iaia i na huaolelo a pu au e hoike mai ai ia’u.

            He makehewa wale no ko kaua hoopau ana i ko kaua manawa ma ke kamaillo. Oiai, ua ehaeha loa ia au, i kuu pane kikoola ana aku nei ia oe e ka elemakule, aka. malia paha ua kuhihewa ka mea a’u i kamailio pu ai i kakahiaka nei.

            Ua lilo keia mau hana hoano e a Onila Maka iaia he mea ukiuki loa, na ua kaikamahine nei, aole nae oia i manao ae, oia no keia e apiki nei.

            Mahope iho o ke koi paakiki loa ana a ua wahi elemakule nei, ua hoike maoli mai la oia iaia iho imua ona, i kona ku ana e iluna, a pane mai ia me ka leo maokaka, me ka hene aka pu ane:

            Ua hai aku no hoi au ia oe e emi iho ana ko’u kino, a like me kekahi o na elemakule nona na makahiki he kanaono, mamua o ke kani ana o ka hora ekolu.

            Auwe! wahi a Rahela Kekona, me ka paa ana ae i koaa lae a pane mai la, He makai kiu ka oe, ea?

            Pane aku la oia, Ae, he kiu au.

            Aole i pau.

            Ua hookaulua ia ka puka ana o ka moolelo a Keaninialaokalani, a keia pule ae.

 

Ka Pahikaua me ka pu Panapana

He Moolelo no na Hakakahua kaulana ma he Aupuni o Farani.

 

(Koena mai kela Pule mai.)

 

Owau ka maka’u wale! wahi a Lucien i pane aku ai i ka Marquis me ke pale ana ae i ke kauwa; aoie loa he waha i hoopuka ae he maka’u wale o Lucien Claveau, a ua ike ia paha ia e holo ana mai kekahi pilikia mai ina paha he make ke huawai mai ana.  He mau minute i hala ae nei oiai au e nana aku ana ia oe maluna o kou wahi moe ua hele oe a mokumoku hilii a ua paapa hoi i na eha he nui me ke koko e kahe ana; ia wa i manao ae ai au me ka hoomaopopo ana, owau no ka mea nana i hookau aku ia mau poino maluna ou; poina koke iho la ko’u mau eha nui au haawi mai ai ia’u, a kala uku la au ia oe.  He nui ko’u aloha nou, a ua hookahe aku la hoi au i na waimaka e hoopulu ana i ko’u mau papalina nei me ka walohia nui nou e kuu hoa’loha, ka mea hoi a kekahi a i ole no hoi papa au e hookahe ole iho ai i mau wahi kulu waimaka no kou hoa nei. A o oe e kena ilio lapuwale, ke aka mai nei oae oe me ka hoohenehene aha mai i ka’u mau mea e kamailio aku nei ia oe, aole i maopopo ia oe na pana ana a ko’u puuwai me ke aloha kuhohonu nou. Aka e kapae aku ia mau mea ma kulakula. Nolaila i keia manawa ke hai paa aku nei au ia oe, ua inaina loa ia au nou, a ke hoino a ke hoowahawahi loa nei au ia oe. O Claveau au i kapa mai ai he holoholona a he maka’u wale, ua oi loa aku ia mamua ou ka wiwo ole; nalaila he pono anei ia kaua e hoopau ne i keia hana weliweli a karaima a kaua?

            Ke hoolohe aku nei no au i kau mau mea e kamailio mai nei ia’u; a e like me kou hoina a inaina ia’u, pela no hoi a u ia oe, wahi a ka Marquis i pane aku ai.

            E hoolohe ea! Oiai kaua ua eha ia, aole hoi he ikaika i koe iho e hiki ai ia kaua ke paa i ka kaua mau pahi, a ekolu wale no hoi kapuai kaua kaawale; nolaila, he wahi ikaika no anei koe ou e hiki ai ke paa i kau pu panapana?

            Pane mai la ka Marquis, Ua maopopo ia’u – he hakakalua me ka pu panapana. E Iosepa, wahi ana i kahi kauwa – E kii aku oe a lawe mai i na pu ei ae maluna o kapuahi; e lawe mai hoi oe a e hoopiha mai no imua o ko maua maka, a i ko maua wa e makaukau ai, alaila e ho puka mai oe i ka huaolelo “ki.”

            Aha, eia ka hoi ka maikai, e lu mua kaua, ina o ka mea e lu nui ana, alaila oia ke ki i ka pu.

            Nani kela, wahi a Lucien me ka hikiwawe. Ke lohe la no anei oe i Iosepa i kela, i hookahi wale no pu e hoopih ai.

            O kahi kauwa keia ua haalulu loa ia ia me ka maka’u i ka ike ana aku i keia mau kanaka ua hele a mokumoku hilii, me ka nui o ka eha i loaa ia laua, aia no nae o loko o ko laua naau me ka manao ikaika e ake ana e lanakila kahi mamua o kahi. Ku iho la ia me ka pane leo ole, aole no paha e emi mai ko laua manao omo koko ina ia e hoomahele aku ana; a hookahi wale no mea pono o ka hooko aku i ka laua kauoha.

            Lawe mai la ia hookahi pu, a oiai ia e huli ana i ka poka, a no ka loaa ole, kahea mai la ia. Aia ka poka ma kela rumi. E kii aku a lawe koke mai, wahi a laua i kahea like aku ai.

            Haalele iho la o Iosepa i ka rumi o laua e waiho nei, a komo aku la ma kekahi rumi akoa, a puka loa aku la ia iwaho, a pani mai la me ka ki ana i ka puke, a kii koke aku la ia i ke Kauka a me kekahi mau hoa’loha o na mea i poino.

            I ka hiki ana mai hoi o ke Kauka a me na makamaka o na mea poino, aole i emi ko laua manao e hoopau i ka laua mau hana ino; i ka nana ia ana, o ka Marquis ka mea i oi aku ka eha; a lawe koke ia aku la ia mai loko aku o ka rumi i kahi o na makamaka, a peia hoi o Lucien Claveau.

            Ua pahola aku la keia lono ma kela a me keia wahi o ka aina, “o na mea i manao ale ia ai he mau hoa’loha pili paa loa laua kahi i kahi, aia hoi ua hiki mai la ka manawa, a ikea a ahuwale ae la hoi ka mea huna weliweli iloko o ko laua puuwai.” Kakali iho la na hoa’loha no ke ola ae o ko laua mau eha a e ike hoi i ka oi a me ke akamai o laua i ke kaka pahi a me ke kipu ana.

 

            Eiua mahina mahope iho o ka hakaka ana o ua mau moho nei i kamailio mua ia ae nei, i kekahi la komo aku la ka Marquis i kekahi hale inu kope i maa mau iaia a me Lucien i ka hele pinepine; ua hala ae kona mau la o ka hie, a ua hele ia a haikea, a ma ka nana aku i kona mau helehelena ua nui no ka hoomanawanui ana i ka eha loaa iaia a me ke kahe ana hoi a ke koko. I kona hoola ana ae, ua kahuli ae kona umiumi a me kona lauoho a keekea, a ua hoihana aka me keia kekahi ano ma kona lae ana e poina ole ai, a o na onina a kona lima akau me ke ano pilikia no ia.

            O Lucien hoi i keia manawa auhea la ia? aole he mau lono i lohe ia mai nona; aka e like me na haawina pomaikai i loaa i ka Marquis, pela no hoi o Lucien; aia ma ka aoao o kona moe kekahi wahine opiopio oia hoi ka mea nana e kiai a e malama iaia me ka makaala loa i ka ao a me ka po; a ua nana aku la hoi ia i ka mea i eha me ka naau ehaeha a me ka puuwai i piha i ke aloha nona.

            Ma ke kauoha a ke Kauka ua papa ia na mea a pau e hele mai ana e ike i ka mea eha, a hiki i kona oluolu ana, a ua pani aku la hoi ua wahine nei i ka puka o ka hale kahi ana e malama nei me ka mailani nui i kaua “ipo aloha.”

            Hookahi mahina ke kiai ana o ua wahine nei i ka mea eha, a loaa ioai ia ka oluolu iaia a ola ae la hoi kona mau palapu; i ka wa i hoea aku i ka Marquis i kahi hale inu kope, ua ola loa a ikaika hoi o Lucien Claveau, aka aole i lohe ia ae kona ola ma o ka huna ana o kona kokua o ka aoio palupalu.

            I kekahi la hoike aku la ua wahine nei ia Lucien i kekahi mea huna oia hoi kokoke ia e hanau ia. I ka lohe ana o Lucien i keia mea nui loa iho la kona olioli, kukuli iho la ia ma na kapuai o ka wahine, a noi aku la e kala mai iaia, oiai aole onla wahi manao a aloha iki ia nona.

            Pane aku la ka wahine iaia me ka leo haalulu: Ke manaolana nei au e Laucien, mai keia hora aku e haalele loa aku oe i kau mau hana o ka wa i hala, a ke noi aku nei au ia oe, ina oe e makemake ana alaila e haalele koke iho kaua ia Bordeaux nei no ka wa hope loa; a owau hoi ia e kukuli aku nei imua ou i keia manawa, e hoohiki mai oe aole oe e hui pu aku me kekahi o na poe ino.

            Ke hoohiki nei au, wahi a Lucien me ka walohia. E haalele no kaua i ke kulanakauhale nei me ka kaua keiki.

            Ia manawa hoi hooholo iho la ia i kona manao e haalele loa i ke ano o kona noho ana e like me ka wa mamua.

            Ina ia e haalele ana i ka hale, e ukali mau ana kana wahine iaia maluna o ke kaa, aole hoi e hookuu iaia no kekahi minute, a ua oluolu laua me ke aloha o kahi i kahi.

            Hookahi mahina ko laua noho ana me ka oluolu me ke kuia ole i kekahi pilikia; i kekahi po hele aku la laua i ka hale keaka e hoolohe ai i kekahi hana ano nui. Ia laua i makaukau ai e hoi mai, ia wa hui pu iho la laua he alo a he alo me ka Marquis Ligaano.

            I ka wa i ike ai ka wahine i na helehelena hoomaka’uka’u o ka Marquis, lalau koke aku la ia i na lima o Lucien a paa; mai haule paha ia ilalo o ka papahele ina aole ia i puliki aku a paa na lima o Lucien.

            O Lucien hoi eia no ia ke ku nei me ka manao nui o’e ae no ia mea; a o ka Marquis hoi h-o ae la ia a pane koke mai la. Ua lohe mai au ua oluolu iki ae oe, aka aole o’u manaoio iki, no ka mea aole paha oe he maka’u wale e huna ai oe ia oe iho.

            Ua hiki no, wahi a Lucien i pane aku ai; a uhaele loa aku ia.

            Ike oe, wahi a Lucien i ka wahine; aole no’u ka hawa – o ka’u hoi koe. I uwe wale ia no e ka wahine a hiki i ka hale, a ia po iho loaa iho la ia i kekahi eha nui, a i kekahi la ue make iho la ia me ka hanau ana mai he keike make.

            Kaumaha loa iho la o Lucien me ke aloha no ka make ana o kana wahine a me ke keiki, nolaila, ano e ae la kona noonoo, puka koke aku la ia a holo pololei aku la i kahi a lakou e luakaha mau ai, oia hoi ka hale inu kope. I kona koino ano aku iloko, ua hele ia a haikea, me ka piha i ka hulu, papale ae la ia i kona mau hoa’loha, a hele pololei aku la i kona enemi.

            I ka ike ana mai o ka Marquis i kona komo ana aku, ku koke ae la ia iluna.

            Eia au la! wahi a Lucien me ka uumi ana i kona manao e lele aku maluna o ka Marquis.

            Mahope iho o ekolu la, wahi a ka Marquis; aole o’u makemake e kamailio ia oe, oiai he makau wale maopopo oe.

            Aole i pau pono ae kana mau olelo i ka hoopuka ia; ia wa lalau aku la ka luna akao o Lucien i ka a-i o ka Marquis, a o kona lima hema ma ke kui, a lawe aku ia a hoolewalewa iho la ma ka puka aniani e kupono ana i ke alanui. O keia rumi a laua i halawai ai, aia ia i ka hale ekolo, a he mea maopopo ina e haule ana e poki liihi ana ia a make.

            Ina aole oe e noi mai i ko’u kala ana, wahi o Lucien, e hookuu iho no au ia oe i ke alanui.

            Ua holo mai la hoi kahi poe a noi mai la ia Lucien aole make hoeha i ka Marquis, aka heaha la lakou iaia.

            Aole anei ou lohe, wahi hou a Lucien me ka hoolawalewa ana ilalo ke poo.

[E nana ma ka Aoao 3.]

 

MAIKAI KA HOI KA PAPA

-A ME-

KALAU O KAU HALE!

NO HEA LA?

KAI NO HOI NO KAHI O

WAILA MA!

 

Nana aku no hoi ia la

            Ohi ka lo o ka Laau o Makawao

            I ka ua mea hoi o ka nani

Na Papa! Na Papa!

 

-A ME-

NA PONO KUKULU HALE

O NA ANO NO A PAU

 

Aia ma ke @ihi o na

ALANUI PAPU me MOIWAHINE

HONOLULU

 

MALAILA E LOAA AI

            E LIKE me ka MAKEMAKE

            -NO KE-

            KUMKUAI MAKEPONO LOA

 

 

PAPA, PAPA, PAPA,

            Na Papa Huluhulu,

            Na Papa Manoanoa,

            Na Papa i kahiia

            Na Papa Kepa.

            Papa Hole Keokeo,

Papa Hole Ulaula.

 

 

NA LAAU, NA LAAU

Na Kua,

            Na Kaola,

            Na Aaha,

            Na Molina

            Na @pea

Pine Huluhulu,

            Pine i kahua.

 

 

NA Papa a me na Laau Ulani @

            Pili ulaula,

            Pili Keokeo,

            Pani Puka,

            Pani Puka aniani,

            Ipuka Aniani,

            Puka Olepelepe.

 

 

PENA O NA ANO A PAU

Hulu Pena mai ka Liilii a ke Nui,

            Aila Pena,

            Aila Hoomaioo,

            Waniti, Pate.

 

 

NA LAKO O KELA A ME KEIA ANO

            Na Ami Puka Hale.

            Na Ami Puka Pa.

            ANIANI!

 

 

Pepa Hale a me na Lihilihi

            E LOAA NO MALAILA.

 

PAAKAI HELU I O KAKAOOKO me PUULOA

            No ke Dala Kuike, e loaa no na mea a pau i hai ia ae la, no ke Kumukuai Emi loa. O na kauoha mai. Hawaii a Niihau, e loaa aku no ia lakou, e hooko koke ia no ia me ka lawe pono. E kipa nui ilaila i ike i ka oiaio.      905tf