Ka Nupepa Kuokoa, Volume XXI, Number 19, 13 May 1882 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

Kuokoa me ke Au Okoa

 

I HUIIA.

KA MOOLELO

—O—

ONILA MAKA!

KA MAKAI KIU KAULANA

—O—

ENELANI!

—A O KA MEA—

POHIHIHI O KA 1868.

 

MOKUNA XI.

 

Na oleloao a ka Makai Kiu—Na olelo kue a Mariona—He manaolana no ke kanaka opio i nalowale—He aeahaukae ma ke alanui—Ninau kahi Olelo E—Loli ka olelo—Ka imi ana i na kumulaau i okiokiia—Akahele kona mau kapuai—Ka hakilo ana.

 

            UA ike iho la paha oe ia lonakana wahine; pehea la kou manao nona? wahi a Mariona i ka Makai Kiu, mahope iho o kona halawai ana aku me ia, e like me ka mea i hoikeia ma ka mokuna o kela pule aku nei.

            Ua ike mua au iaia no kekahi mau manawa lehulehu mamua aku nei, wahi a ka Makai Kiu.

            Pela!

            Ae; aka. e hoopokole kaua. He mau oleloao ka’u e hai aku ana ia oe, a hele aku au. I hele mai nei ka wahine a ko makuakane hanai e noho pu me oe no kekahi kumu.

            Pela ko’u manao wale aku no.

            Ua maopopo anei ia oe kona makemake?

            Aohe i maopopo loa.

            Mai puiwa oe ina au e hai koke aku ana ia oe i kona makemake.

            Aole au e puiwa no ia mea, aka, e koa au e like me ka niea hewa ole.

            Ina oe e make ana, alaila, e ili aku ana i ko makuakane hanai na waiwai a pau loa ana e malama nei.

            Pelu io anei.

            Ae, aka, e hoomanao, aole loa e ili mai ana kekahi poino maluna ou, aka, ua maopopo ia’u na ouli o kela wahine, oiai, aohe mea nana e kaohi i kona manao i ka hana ana i kekahi karaima i ili aku ai ka waiwai i kana kane.

            Pela no au i manao @i no kekahi manawa loihi. wahi a ua kaikamahine la.

            Maikai! o oe kekahi o na wahine opio wiwo ole a’u i halawai ai iloko o ko’u ola ana; a ina e hoohuna kou manao hopo ole me ko’u kokua, e hiki auanei ia kaua ke hoopaa i keia poe iloko o ka upena a lakou i hana ai no hai.

            O ka kaua hana mua, oia no ka imi ana aku ia Hale Keleneka. A ina aole ia e loaa ana ia kaua alaila, ua hiki no ia lakou ke lawe i ka waiwai, no ka mea. aole e hauoli ko’u puuwai ke ole e loaa mua ka mea a’u i aloha ai.

            O kekahi kena o na mapuna leo hookaumaha loa a ko’u mau pepeiao i lohe ai ia oe e hoopuka ana.

            Ua puan@ ia anei e a’u ia mau olelo me ka manao pihoihoi?

            Aole.

            Ina pela, alaila, he hoailona ia e hoike mai ana i ko’u manaoio maoli. I ka wa i make aku ai ko’u makuakane, ua oi aku ko’u aloha iaia mamua ae o na mea a pau o keia ao; aka; mahope mai. loli hou ae la ka auwai o ko’u naau, a ili aku la ka iloli o ko’u iini iaia (Hale Keleneka) ka mea a’u i manao ai e lilo ana ia i iwi a i io no’u. Aka ina au e lohe pono mai ana, ua make io ia, alaila, ua makaukau pu au e make mahope ona.

            Ka! mai olelo hou oe pela, wahi a ka Makai Kiu. Aole i make o Hale Keleneka, ao ka mea, e hoao ana au e imi a loaa keia mea hana, a ua hauoli pu hoi au i ka hai aku ia oe, aole kou enemi he mau pilikoko ponoi, a aole no hoi i komohia iloko o ko lakou mau puuwai ke aloha nou, aka, ke aneane nei e ukali ia ka’u hoomanawanui ana me na waiwai huna o ka weliweli a me ke kamahao.

            Aia ka oluolu a me ka maha o ko’u puuwai iloko o kou hoomanawanui a me kou manaoio no ka hopena o Hale.

            Eia oe iloko o ke kulana pilikia e Adeline, nolaila, e hoolohe pono oe i ka’u mau kuhikuhi a hiki i ka hopena.

            E hooko no au e like me kau kauoha, aka, ke manao nei au, ua oi loa aku paha kau mea i manao ai no ko’u pilikia mamua o ka mea kupono.

            Pela io paha, oiai, aole oe i ike i ka nui o ka pilikia, ke ike mua ole oe i na hana a lonakana wahine, e like me ko’u kamaaina iaia; aka, mai nana no ia mea, oiai, ho mea kupono ia kaua ke koho ma ka aoao e pakele ai.

            Ke ae nei au i kau.

            E haalele ana au ia oe no kekahi mau la.

            Oiai, he hoaiai mai nei ko’u noonoo ia’u, no na inea e hiki mai ana. A i ko’u wa hoi e kaawale aku ai, mai hele iki oe me Ionakana wahine ma kana wahi e makemake ai e hele; aole no hoi oe e hoi i kou home ma Ulu Paina Iuiu, a hiki i kou wa e ike hou ai ia’u, a i ole ia. mahope iho o ka hala ana o na la he iwakalua mai keia la aku.

            Heaha la na olelo kupono a’u e pane aku ai no ko’u makemake ole e hoi aku i Ulu Paina Iuiu?

            Na ke akamai no ia o kou noonoo e pale ia oe iho. Oiai, ua haawi moa aku nei au i na kuhikuhi e hiki ai ia kaua ke hui ma na huaolelo; a aole hoi oe e pono ke lawe mai i kekahi palapala i manao ia mai a’u a@u, ke ole e kau ia ko’u inoa hope, e like me ka’u i hoike aku nei ia oe maluna o kela apana pepa.

            Ke waiho mai nei oe i kekahi hana ano nui na’u e lawelawe.

            He oiaio ia; aka, hookahi no nae kikowaena o ko kaua manao e ii@i nei.

            O ke aha?

            O ka hoihoi ola ia mai o Hale Keleneka, i maopopo ai ke kupaa o kona manao mahope o ka mea i lilo ai kona kino i moepuu no ka inaina o ka poe pakaha wale.

            Ia manawa, holo koke ae la ka ula ohelohelo ma kona mau papalina lahilahi a puana mai la:

            E kala mai ia’u! Aole loa oe e lohe hou i kekahi huaolelo kue e puka aku ana mai a’u aku, no na mea a pau au e kauoha mai ai e hooko no au.

            Ua hauoli loa au no kau pane e Adeline, no ka mea, no kou pomaikai wale no ia, ke hahai oe mahope o ka’u mau kuhikuhi. He mea kaumaha paha no’u, ina mahope iho o ko’u hoopakele ana mai ia Hale Keleneka, a hai aku hoi iaia, @a ili mai maluna ou kekaki poino, a ua nalowale aku hoi oe mai iaia aku no ka wa pau ole.

            He manaopaa anei kou e loaa ana ia oe o Hale Keleneka me ke kino ikaika?

            Ae, a penei ke kahua o ko’u manao. Oiai, ua moakaka lo@ i ko’u noonoo ke kumu o ka hoomahuka ia ana o Hale Keleneka, nolaila, ua paa ko’u manao, aole oia i make, aka, ua hun@ ia oia ma kahi e hiki ole ai iaia ke hele e like m@ kona makemake iho. i wahi hoi e manao ia aku ai ua pepehi ia oia, a lawe @e hoi oe i kou ola ponoi no ka hilahila, pela e ili aku ai kou mau waiwai a pau ia laua.

            Aohe moakaka o kau mea e olelo mai nei ia’u?

            Aole nae i pane aku ua Makai Kiu la, a mahope iho pane aku la oia:

            He kaikamahine hopo ole io no oe, a ina e ili mai ana kekahi poino maluna o ko’u kino a aole hoi kaua e hoohui hou ia ma keia hope aku, alaila, e loaa auanei paha ia oe he waiwai ke ike mua mai oe i ke kahua o ko’u manao kohokoho!

            Heaha kou kumu o ke kamailio ana no ko kaua halawai hou ole aku ma ke@a hope?

            I hoike wale aku nei no au ia oe i he ano o na ulia o keia ola ani, oiai, aole i maopopo ia kaua na ulia a ka la a me ka hora e ili mai ai maluna o kekahi o kaua.

            Alaila, e hai pono mai oe, heaha na kumu o ka hoomahuka ia ana o Hale, i wahi e loaa ai ia laua kau waiwai?

            Eia, no ka mea, o kona lilo ana i mea kamailio nui ia no kona haalele ia oe, he mea ia nou e hilahila ai a lawe ae paha oe i kou ola, no ka hilahila, a ina e loaa io aku ana kou kino kupapau, alaila. e manaoio mai auanei ka lehulehu. ua lawe io no oe i kou ola iloko o kou mau hora o  ka hilahila.

            He manaoio anei kou e hana ia ana kekahi karaima weliweli oia ano?

            Pela ko’u manaoio, oiai, @ohe mea nana e kaohi aku ia lonakana wahine i ka hana ana i kekahi karaima, i mea e loaa ai la laua kou waiwai.

            I na he hiki ia laua ke hoihoi mai ia Hale, alaila, ua hiki no ia l@a ke lawe aku i ko’u mau waiwai a pau loa, wahi a Mariona i pane aku ai me ka pihoihoi nui.

            Aole, aole loa e hiki ia laua ke lawe i kekahi wahi lihi o kou waiwai, wahi a ka Makai Kiu i pane aku ai me ka leo huhu, a p@ne hou aku la: E pono oe e hahai malalo o ka’u mau kuhikuhi a pau loa, me ko waiho malie mai ia’u, alaila, e ike auanei oe e hoihoi hou ia mai ana o Hale, me ke koe o kou waiwai ia oe; a o ka mea oi loa aku hoi, aole e hiki i keia poe ke hana ino h@u mai ia oe ma keia hope aku.

            Ku iho la ua makai nei me Mariona no kekahi mau hora e kamailio pu ai me ia, a hahai aku la iaia i na kuhikuhi me na poino e ili mai ana maluna ona. A ia kakou hoi e nee aku nei imua me Onila Maka, e heikeia aku ai na poino a me na kuhikuhi a ka Makai Kiu ia Mariona.

            Ma ke kakahiaka ae mahope iho o na papa leo ana a ka wahine opio me ka Makai Kiu i hoike mua ia ae nei, e hele ana kekahi wahi kanaka i ano like me ka poe Geremania e hele ana ma ke alanui e moe ana mai H— mai a kiki i ka home kaulana i kapa ia o Ulu Paina Iuiu.

            I ua wahi Olelo E la e hele ana, namunamu malie iho la oia i kekahi mau mea ma ka olelo Beritania me ka puka pono, aole hoi e like me ka poe Olelo E malihini, he hepa ke kamailio ana.

            Oia no ka’u i manao ai, wahi a kahi Olelo E, i namunamu iho ai, O na wahi huna ahi liilii a’u i peahi iho nei, ua lilo ae nei i ahi nui; me he mea la, akahi no a ala mai koonei poe u hoomaopopo iho, ua hana io ia no kekahi karaima, aka e like me ka mea mau, o ka nune aku nune mai, a pela e pakui hele ia ai ka moolelo a hiki i kona wa e hele ai i ka loa a me ka laula o ka aina.

            I ua wahi kanaka Olelo E nei e hele hookuno@iana, halawai aku la oi me na kanaka he lehulehu.

            Ma ka wawae kekahi poe a ma na kaa hoi kekahi.

            Ua ninau aku la oia ia lakou a pau loa i ke ala kokoke e hiki aku ai i kekahi kauhale, e ku ana ma kahi mamao.

            Aka, aole nae i hoomaopopo mua na kanaka i ko ia nei ano, a aole no hoi ia he mea hou o ka ike ia ana o na aea haukae e hele ana mai kekahi kauhale a i kekahi, iloko o o ia hapa o ka makahiki, nolaila, ma ka ike ia ana o keia wahi kanaka Olelo E, aole lakou i manao nui i kana mau ninau ano ole.

            A aole no hoi lakou i moeuhane iki e ike ana lakou i kekahi mau mea ano hou loa, a lakou hoi i ike ole ai mamua, mai keia wahi kanaka Olelo E aku, a lilo hoi kana mau apana hana hoopahaohao i mea kamilio nui ia na kela a me keia.

            Hoomau aku la no u@ w@hi Olelo E nei i ka hele ana imua a hiki a koaa wa i kokoke aku ai i ka hu-a o ka @lulaau, kahi hoi a ka Makai Kiu Onila Maka i hele ai no na po elua mamua, iaia e ukali ana mahope o Keaka Ilikini.

            Iaia i hiki aku ai ma ka hu-a o ka ululaau hele malie iho la oia, me ke kau mau ana a kona mau maka maluna o na kumulaau e ku ana ma kona aoao akau, me he mea la, e ini ana oia i kekahi wahi ana i kau nui ai.

            Me he mea la, ke kokoke aku nei au i kahi a’u i okioki ai i na kumulaau; wahi ana i namunamu malie ae ai, a mahope iho. puana ho@ ae l@ oia:

            Ae, aia no na kaha a’u i okioki ai la! A@, e ani ae au e nana, malia ke kiai ia mai nei ka’u hana.

            Ku malie iho la oia, a aui ae la oia ma o a maanei, e nana ai ina ke kiai ia aku nei oia.

            Aohe poe a’u e ike nei, wahi ana i pane ae ai, a nee malie aku la oia imua ma kekahi pa laau e ku ana mawaho aku o ka ululaau.

            Iaia i hiki aku ai ma kahi o ka pa laau e ku an , noho iho la oia ilalo o ka mauu no kekahi mau minute, e like me kekahi mea i maluhiluhi.

            Hala ae la he umi minute. Aole nae ana mea i ike, aole hoi he mau leo hauwalaau, aka, koe wale iho no ke kani a na manu leo lea o ka ululaau lipolipo, a me ke kani koele o ke koi a ke kanika kua wahie.

            Aole i pau.

 

KA MOOLELO O KE KAU

AHAOLELO

KAU KANAWAI

—O KA—

A. D. 1882.

 

La hana 4, Mei 3 1882.

Halawai ka hale e like me ka mau

Na Palapala Hoopii.

 

            Na Hon Kamakele he palapala hoopii mai Makawao mai e noi ana e ana hou ia na kuleana i haule, haawiia i ke komite o na hana hou.

            Na Hon Kauila he palapala hoopii mai Puna mai e noi ana i $5,000 no ke alanui mai Puna mai a Hilo, haawiia i ke komite o na hana hou.

            Na Hon Ha@pu he palapala hoopii mai Hilo mai e noi ana e hookaawale ia ka apana o Hilo @ e mahele ia i elua apana hou. Ma ke noi a Hon Mahoe, ua waiiho ia ma ka papa a lawe mai ka luna o Hilo i bila kanawai e hoololi ai i ke kanawai mua.

            Na Hon Gardner he palapala hoopii mai Hana mai e noi ana e hookaawale ia ma ka Bila Haawina i puu dala no ke awa o Punaho@ Hana, haawiia i ke komite o na hana hou.

            Na Hon Kalua he palapala hoopii mai Molokai mai, e noi ana e hoonoa i ke koho ia ana o na Hons Kupihea a me Nakaleta, haawiia i ke komite Hookolo kolo.

            Na Hon Aiwohi he palapala hoopii mai Kohala mai e noi ana e ae ia aku i elua Lunamakaainana ma ia apana, ma ke noi a Kauiukou, ua waiho ia ma ka papa a lawe mai ka luna i bila kanawai.

            Kapaeia na rula a noi mai ke ‘lii Kaai e hoohikiia ke alii Pa@lo P Kanoa.

            Na Hon Mahoe he palapala hoopii mai Waialua mai e noi ana i $3,000 ma ka Bila Haawina no na alanui o Waialua haawiia i ke komite o na hana hou.

            Na Hon Kioila mai Puna mai, he palapala hoopii e noi ana i mau kula olelo Beritania no ka apana o Puna, haawiia i ke komite Hooaanuao.

            Na Hon Gardner o Hana mai he palapala hoopii mai Kipahulu e noi ana e kukulu ia Halehookolokolo a me hale paahao ma Kipahulu. haawiia i ke komite o na hana hou.

            Na Hon @alua he palapala hoopii mai Wailuku ma@ e noi ana aole e ae aku ke Aupuni e h@okomo mai i ka rama, haawi ia i ke komite Kalepa.

            Na ka Hon Kamakele mai o Makawao he palapala hoopii e noi ana e hoihoi hou ia na aina @aa ana liilii e waiho ana malalo o na aina e Leialii, haawiia i ke komite Hookolokolo.

            Na Hon Kauila mai Puna mai he palapala hoopii e noi ana e hoomahuahua ia na makai ku mahina ma ka apana o Puna, haawi ia i ke komite Waiwai.

            Na Hon Kauila mai Puna mai he palapala hoopii e noi ana i $4,000 no na alanui makai o Puna, haawiia i ke komite o na Hana hou.

 

Hoike a na Komite.

            Mai ke alii Dominis mai ka lunahoomalu o ke komite hooponopono bila kanawai, he hoike e pili ana i ko ke Alii ka Mo@ap@no ana i ka bila kanawai o Kaanapali.

            Mai ke alii K@e mai. lunahoomalu o ke @ ia no ka pane a ka hale Anaolelo i ka Haiolelo Alii, ua hoolohe ka hale i keia hoike a aponoia.

            Mai ke alii Bihopa mai, ka lunahoomalu o ke komite Hoonaauao, ua waiho mai la oia i ka hoike a ka Papa Hoonaauao, ua kauoha ia e pai.

            Mai ka Loio Kuhina mai ka hoike @ ka oihana Loio Kuhina, ua kauoha ia e pai.

 

Na Olelo Hooholo.

            Mai ka Hon Pilipo, he olelo hooholo e noi ana e haawi ia aku i $5,000 no na alanui a me elua awa pae waapa ma Kailua a @e Keauhou, ma ke noi a Hon Kalua ua waiho ia ma ka papa a noonoo pu ia me ka Bila haawina.

            Na Hon Faranike Baraunu i heluhelu waha wale mai no me ka pepa ole i kekahi olelo hooholo—ua rula ia a hoihoi wale.

            Na Hon Kaulukou he olelo hooholo e noi mai ana e haawiia i $50,000 no ke alanui pali o Nuuanu, ma ke noi a ke alii Wideman ua haawi ia i ke komite Waiwai.

            Na Hon Aiwohi he hoolaha kanawai e pili ana i ka hoonoho hou ana i apana ohi dute o ka mokupuni o Hawaii, no ke awa kumoku a Mahukona ma Kohala kapaeia na rula a heluhelu ia ka bila kanawai no ka wa mua.

            Na Hon Brown he olelo hooholo e kauoha ana i ka makai o ka Makai o ka hale e hoolako mai i na buke kanawai i na hoa a pau.

            Na ke alii Kaai he olelo hooholo e kauoha ana i ke Kuhina Kalaiaina e hoike mai i ke kulana o ka Hotele Hawaii i keia wa.

            Na Hon Brown he olelo hooholo e kauoha ana e haawiia i $1,000 no ke kukulu ana i hale paahao me hale hookolokolo ma Ewa Oahu, waihoia a noonoo pu ka bila Haawina.

            Na ke alii Kamika he hoolaha kanawai e lawe mai ana ia i bila kanawai e hoopau ai i ke kanawai e pili ana i na Palapala ae holo a me ke kanawai Piepiele.

            Na Hon Palohau he hoolaha kanawai e lawe mai ana ia i bila kanawai e hoololi ai i ka pauku 1419 o ke Kanawai Kivila.

            Na Hon Lahilahi he hoolaha kanawai e lawe mai ana ia he kanawai e hoopau ai i ka mokuna 41 o ke Kanawai Karaima.

            Na Hon Kaluhi he olelo hooholo e noi ana i $3,000 no na alanui o Koolauloa noi o Mahoe a waiho ia ma ka papa a noonoo pu me ka bila Haawina.

            Na Hon Kauhane he olelo hooholo e kauoha ana e haawi ia aku i $3,000 no ke alanui mai Punaluu a Pahala $1,000 no ka hale kukui ma ke awa o Kaalualu.

            Hoopanee a hora 1.

            Hoomaka hora 1:1-2Pm.

            Na Hon Aiwohi he hoolaha kanawai e lawe mai ana oia he kanawai e hoololi ai i ka pauku 780.

            Hoopanee apopo hora 10.

 

La Hana 5, Mei 4, 1882.

Halawai ka hale e like me ka mau.

Na Palapala Hoopii.

            Na Kamakele o Makawao he palapala hoopii e noi ana e hoopauia ka auhau o na makua mea keiki lehulehu elima a oi e ol@ ana. Waihoia i ke komite hookolokolo.

            Na Kaulukou he palapala hoopii mai Koolaupoko mai e noi ana e hookaawale ia ma ka bila haawina i $50,000 no ke alanui pali o Nuuanu. Noi o Aholo a waihoia i ke komite o na hana hou.

            Na Kaulukou mai Honolulu mai he palapala hoopii e noi ana e haawiia aku i $50,000 no ke alanui pali o Nuuanu. Noi o Aholo a waihoia i na komite o na hana hou.

            Na Kauila o Puna he palapala hoopii e noi mai ana aole e ae aku i ka rama e hoonoa. Noi o Aholu a waihoia i ke komite kalepa.

            Na Mahoe mai Waialua mai he palapala hoopii e noi ana e hoonoa i ka rama i na kanaka Hawaii. Waihoia i ke komite kupono.

            Na Nahiau o Kona Hema ekolu mau palapala hoopii:  1 he palapala hoopii e noi mai ana e aei@ ka Aie Mahona. Waihoia i ke komite waiwai. 2 he palapala hoopii e noi ana e hoomauia ke Kuikahi Panailike. 3 a e auhau i na lio ma ka helu waiwai. O na palapala hoopii hope ua haawiia i ke komite huikau.

            Ma ke noi a Kalua ua kohoia ke komite huikau, eia na lala: Kalua, Kuihelani, Parker, Nahinu a me Kaunamano.

            Na Mahoe mai a Kahuluna k, mai o Puna he palapala hoopii e noi mai ana e uku aku ke Kuhina Kalaiaina iaia i $31.-33. Haawiia i ke komite hookolokolo.

            Na Kauila o Puna he palapala hoopii e noi ana, aole e aie nui kuahewahewa. Noi o Aholo a waihoia a noonoo pu me ka bila aie nui kuahewahewa.

            Na Kauila o Puna he palapala hoopii e noi ana e hoomauia aku ke Kuokoa o Hawaii. Noi o Aholo a waihoia ma ka papa a hoea mai kekahi ninau e hoopaupaa ana i ke kuokoa o ka aina.

            Na Gardner o Hana he palapala hoopii e noi ana’e hoonohoia i kauka noho mau ma ka Apana Ohi Auhau o Hana. Waihoia i ke komite malama ola.

 

Na Olelo Hooholo.

            Na Kalua he olelo hooholo e noi ana e hookaawale ia ma ka bila haawina i $4,000 no ka hooloihi a hoakea ana aku i ka uwapo o ahaina. Noi o Kaulukou a waihoia a noonoo pu ia me ka bila haawina.

            Na Kaulukou he olelo hooholo e noi ana e hookaawaleia ma ka bila haawina i $5,000 no ke alahaka o ka muliwai o Auwaiwahine ma Kaneohe, Koolaupoko, Oahu, Noi o Aholo a ua waihoia ma ka papa a noonoo me ka bila haawina.

            Na Kaluhi he olelo hooholo e noi ana e hookaawaleia ma ka bila haawina i

[E nana ma ka Aoao 4.]

 

MAIKAI KA HOI KA PAPA

—A ME—

KALAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

Uni ka lo o ka Laau o Makawao

I ka ua mea hoi o ka nau

Na Papa! Na Papa

—A ME—

NA PONO KUKULU HALE

O NA ANO NO A PAU

 

Aia ma ke kihi o na

ALANUI PAPU me MOIWAHINE

HONOLULU

MALAILA E LOAA AI

E LIKE me ka MAKEMAKE

—NO KE—

KUMUKUAI MAKEPONO LOA

 

PAPA, PAPA, PAPA,

Na Papa Huluhulu,

Na Papa Manoanoa,

Na Papa i kahiia

Na Papa Kepa,

 

Papa Hole Keokeo,

Papa Hole Ulaula.

 

NA LAAU, NA LAA

Na Kua,

Na Kaola,

Na Aaho.

Na Molina

Na P@pea

 

Pine Huluhulu,

Pine i kahiia

 

NA Papa a me na Laau @la @a

 

Pili ulaula,

Pili Keokeo,

Pani Puka,

 

Pani Poka Aniani,

Ipuka Aniani,

Puka Ol@pelepe.

 

PENA O NA ANO A PAU

Hulu Pena mai ka Liilii a ke Nui

Aila Pena,

Aila Hoomaioo,

Waniti, Pate.

 

NA LAKO O KELA A ME KEIA ANO

Na Ami Puka Hale.

Na Ami Puka Pa

 

ANIANI!

 

Pepa Hale a me na Lihilihi

E LOAA NO MALAILA.

 

PAAKAI HELU I O KAKAAKO me PUULOA

 

            No k@ Dala Kuike, e loaa no na mea a pau i hai ia ae la. no ke Kumukuai Emi loa. O na kauoha mai Hawaii a Niihau, e loaa aku no ia lakou. e hooko koke ia n@ ia me ka lawa pono. E kipa nui ilaila ike i ka oiaio.      905 tf