Ka Nupepa Kuokoa, Volume XXI, Number 23, 10 June 1882 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXI. HELU 23     POAONO, IUNE 10, 1882.    NA HELU A PAU 1071.

 

KA NUPEPA

Kuokoa me ke Au Okoa

I HUIIA.

 

KA MOOLELO

o

ONILA MAKA!

KA MAKAI KIU KAULANA

o

ENELANI!

A O KA MEA

POHIHIHI O KA 1868.

MOKUNA XIII.

Hoapaapa imua o ka waha o ka pu---Haawi pio---Loaa na mea kaua----He papu lewa---Hoopaa ia na lima---He niele no ka mea kahiko---Ka hiki ana ma ke ka-e o ka auwai---He hana hoopahaohao.

 

KA hoomaopopo iho a ua Makai Kiu nei i kona kulana, o kekahi keia o na kulana pilikia loa ana i ike ai iloko o na makahiki he lehulehu o kona noho ana iloko o ka oihana.

       No ka mea, aole i loaa iaia he manawa kupono e noonoo ai no kona pono.

       Ia wa, kahea mai la ke kanaka ma ka puka aniani iaia:

       Auhea oe e kahi Olelo E, ina oe e hoao ana e kue mai.  alaila, e ki koke ia no oe!  Nolaila, o ka pono wale no ia oe, o ka haawi pio mai ina aole, e make ana oe!

       No ke aha ko'u mea e haawi pio aku ai?  Ua pupule ia paha oukou.  Heaha auanei ka'u mea i hana iho nei, o ka oukou hele ana mai nei me na pu a me na pu panapana, a olelo mai, e ki mai i kuu poo!

       Aole e hiki ia makou ke hoopau wale i ko makou manawa i ka hoolohe ana i kau mau olelo e kena kanaka ino!  He pio oe na makou.  Nolaila, ke hopu nei au ia oe ma ka inoa o ka Loio Apana.

       No ke aha oe e hopu mai ai ia'u?

       No ka pepehi kanaka!

       Ka! ua pupule ia oe!  Owai ia mea a'u i pepehi ai, no ka mea, he malihini au?

       E wawahi aku i ka puka e na hoa!  wahi a ke kanaka me ka pu i kona mau hoi.

       Lohe aku ia ka Makai Kiu i ke koele o ka puka.

       Mahope iho o kona hoolohe ana aku i ke koele a ka puka no na manawa ekolu, pane aku ia oia:

       Alia a wehe aku au i ka puka; paikole, aole i maopopo ia'u ke kumu o ko oukou hele ana mai imua o'u me he mau pipi ahiu ia.  Paikole, ua pupule maoli oukou!

       Mai ae aku iaia e wehe mai i ka puka, o holo ino mai auanei wahi a Koma.

       Pehea e hiki ai ia'u ke holo ino aku, no ka mea, aia no ia oe ka pu, a malia o ki mai oe ia'u ina au e hoao ana e mahuka?

       Ia wa, lohe aku la keia i ke koele mai o waho o ke pani puka, no ka mea, e noke ana i a kanaka mawaho i ka hamare i ke pani puka me ka pauku laau nui.

       Hele ku la ka Makai Kiu a kokoke i ka puka.  ia manawa, kahea hou mai la ka mea e paa ana me ka pu:

       E ku malie iho oe e kena pupaka, o ki ia aku oe e a'u!

       Ua ike mua ua Makai Kiu la mai kinohi mai, aole keia poe kanaka he poe makai kumau no ke aupuni, aka, he poe makai kauwai lakou no na kuaaina; nolaila, hopohopo iho la keia, maiia iloko o ko lakou hupo e ki ia mai auanei lakou iaia.  nolaila, ku malie iho la keia iloko o kona wa i kaheaia mai ai e ku malie.

       Aia no nae ke hoomau mai la na mea mamua o ka puka i ka wawahi a hiki i ka wa i nahaha liilii ai ke pani puka a haole mai la iloko.

       E keaka, hopu ia aku a paa, a o oe hoi e Bila e kokua aku oe!  wahi a ka mea e paa ana i ka pu.  (Aole keia o Keaka Ilikini.) 

       I kona wa i hopu ia mai ai, aole oia i kue ako ia lakou, aka, ua holo koke ae la ka wela hahana o kona koko a puni kona kino.

       O ka mui loa keia o kona haawi pio ana aku iaia me ke kue ole aku i kona poe nana oia i hoopaa iloko o kona mau la.

       Aka, ua ike no paha oia, he mea kupono ole iaia ke kue ana aku i ka poe nana oia e hoopaa nei.

       No ka mea, he poe hoopono lakou, a ma kana hoomaopopo iho, e lawelawe ana lakou i ka mana o ka oihana i waihoia aku ma ko lakou mau lima.

       E huli iho ma kona kino i na mea eha!  wahi a Koma.

       Hoomaka iho la na kanaka e huli me ka pupuahulu ma ke kino a puni o ua wahi Olelo E nei, a loaa aku la he mau pu panapana me kekahi pahi o pipi loihi.

       Paikole!  He papu lewa ka keia kanaka pupuka!  wahi a Keaka mahope iho o ka loaa pakahi ana aku o keia mau mea a pau.

       Mahope iho o ka loaa ana aku o keia mau mea a pau ma kona kino, imi iho la lakou i kaula e hoopaa ai i kona mau lima a paa. 

       I ka wa a na kanaka e hoopaa ana i kona mau lima, nana pono iho la keia i ka hawawa o ka lakou nikiniki ana i kona mau lima, a mino aka iho la keia, aka, i ka nana ae, aohe ona wahi e pakele ai.

       He oiaio paha ia manao on a, oiai, aole i maopopo lea iaia ka hopena o keia hana.

       No ka mea, ua like na sekona a me na minute iaia me ka momi, a e haule hope ana paha kana mea i lawelawe ai no kekahi mau pule, mamuli o kona paa ana aku i ka hale paahao.

       Aole i hookuu iho o Koma i kana pu ilalo, a hiki i kona wa i ike aku ai ua paa kona mau lima i ka hoopaa ia.

       Aia ihea kau wahi i waiho ai i ke kino make e kena kanaka ino?  wahi a Keaka.

       O ke Kino hea kau e ninau mai nei?  Paikole!  Me he mea la, he poe pupule oukou i mahuka mai nei mailoko mai o ka hale pupule, o ka oukou hele ana mai nei e hana ino i ka mea noho malie e like me keia.

       E hoike aku ana makou ia oe i ko makou ana pupule e kena puuwai eleele, nolaila, he mea pono ia oe ka hai pololei mai i kau wahi i waiho ai.

       Heaha ia mea a'u e hai aku ai?  Paikole aole i maopopo ia'u ka oukou mea e kamailio mai nei.

       E ike no auanei oe i ka makou mea e kamailio nei.  Heaha na mea o loko o kena eke?

       Iloko o keia eke?  Aole na'u keia eke.  Pehea e maopopo ai ia'u na mea o loko o keia eke.

       Lalau iho la kekahi o na kanaka i ke eke a wehe ae la a hoohuli iho la i ka waha ilalo a haule aku la na aahu i oki loa i ke koko iluna o ka papahele.

       I ka ike ana iho o ua kanaka nei i na mea o loko o ke eke e waiho ana iwaho ua hele a oki loa i ke koko, hooho like ae la lakou me ka leo kahaha a o kekahi hoi o lakou, iloko o kona hora o ka pihoihoi, kui aku la oia i ka Makai Kiu me ka ikaika a haule aku la oia ilalo o ka papahele ma ke kuono. 

       I ka wa i haule aku ai ua Makai Kiu la ilalo, moe malie iho la no oia malaila.

       Aole oia i uwe ae no ka eha, aole no hoi oia i puana ae i kekahi leo huhu, aka, ua hiki loa nae ke ikeia ka hulili o kona mau onohi.

       Aole loa oe i pono e Keaka i ko hana pela, wahi a Bila, a hele aku la oia e kokua i ka lakou pio e waiho ana ilalo.

       Paikole, aole e hiki ia'u ke uumi iho i ko'u inaina, wahi a Keaka a pane hou aku la:  Ua makemake loa e haehae liilii aku au i na lala a pau o kena kanaka ino.

       Mai hana hou pela, wahi a Bila.  No ka mea, ua paa kona mau lima i ka nikii ia, nolaila, aole oe e pono e kui hou iaia.

       He oi kou a ka puuwai aloha i ka limakoko!

       Mai manao oe pela.  No ka mea, ina e hoopaiia ana kela kanaka, a ina hoi, aohe mea manao koa e ae o keia aupuni nana e oki ke kaula li kanaka, alaila, owau no ka mea nana e oki: aka, aole paha i kupono ka hana ino e ana mamua ae o ka manawa.

       I ua wahi Olelo E nei i hapaiia ae ai a ku iluna, me kona lohe i na olelo a Bila, puana ae la oia:

       He keonimana oe, nolaila, kehoomaikai aku nei au ia oe.  Aohe i maopopo iki ia'u ke kumu o ko oukou hopu ana mai ia'u me ka hoopaa pu iho i ko'u mau lima, a ina no hoi ua nui ko'u hewa, aole ia he mea na oukou e hana ino mai ai ia'u.

       Auhea oe e kena wahi elemakule, eia me makou na hoike oiaio no kau hana ino e hiki ai ke hia oe, nolaila, o kou pono ka hoike mai me ka oiaio i kahi i waiho ai o ke kino kupapau.

       O ke kino hea kau e olelo nei?

       Ke kino o ke kanaka i pepehi ia ai.

       Ke kanaka hea ia?

       Ke kanaka no hoi au i pepehi ai: ke kanaka nona keia mau aahu.

       Aole au i pepehi i kekahi kanaka, a aole no hoi au i ike i ka mea nona keia mau lole.

       He makehewa wale no ia oe ka hoole ana, no ka mea, he kumu ia nou e pakele ai ina oe e hai pololei mai ana.

       Aohe a'u mea e hai aku ai.

       No keia pane a ka Makai Kiu, ku ka hou iho la lakou no kekahi minute a pane ae ia o Bila:

       Ke ku nei au ma ka manao e lawe pololei i ka kakou pio a hiki i ka hale paahao.

       Aka, kue mai la nae o Keaka me Koma no kona manao, oiai, ua piha loa ia laua me ka houoli no ka laua mea i ike ai, nolaila, ua manaopaa laua e hoomau aku i ka imi ana a loaa ke kino kupapau o ka mea i pepehiia, i mahuahua ae ai ko laua mahalo ia e na kanaka, a maluna ae hoi o ia mea, o ka imi e papahi i ka lei hanohano o ka inoa kaulana.

       Malia ua kuhihewa kakou e na hoahanau? No ka mea, ma ka nana ana i na hana a keia kanaka, aole ia o ka hana i maa i ka mea hewa, aka, ma ka aui hou ana ae a nana aku i keia mau hoike leo ole, ua maopopo lea, iloko no ia o kona mana, a ua moakaka hoi kona hewa ma ia kumu.

       Pehea ia e kuhihewa ai kakou?  E nana aku i kela kulu koko iluna o ka papahele!  Aole anei keia mau aahu i oki loa i ke koko na lole o Hale Keleneka i aahu ai ma kona la hope i ike ia ai oia---a aole anei i lako pono keia kanaka i na mea make ma kona kino i kona wa i hoopaa ia ai?

       He oiaio ia, aka, aole nae keia o ke kanaka a kakou i manao ai e loaa ana ianei, a aole no hoi keia o ka hale o keia kanaka.

       Ka!  Hele oe pela.  Ua loaa ia kakou ke kanaka a kakou i manao ai; nolaila, he makehewa wale no ka lauwili ana.

       I na makai e kuka ana no ka lakou pio, e hoolohe ana no nae ka Makai Kiu i ka lakou mau olelo a pau.  

       Ua hauoli loa oia no ka lakou mau kamailio, no ka mea, malia iloko o ka lakou mau kamailio e loaa ai iaia kekahi mau meheu hou e hiki ai iaia ke lawelawe hou i kana hana.

       Aole anei oe e mihi mai i kahi au i huna ai i ke kino kupapau, wahi a Koma i ninau hou aku ai i ka lakou pio.

       Aole i maopopo ia'u ke kino o ka mea a oukou i kamailio iho nei, wahi a ka Makai Kiu.

       Ia wa hoomaka iho la lakou e imi a puni ua wahi hale nei.

       He hapalua hora ka loihi o ka manawa o ka lakou imi ana me ke ko ole o ko lakou makemake.

       Mahope iho pane mai la o Koma:

       E pono kakou e lawe aku iaia nei a waiho aku ma ka lima o ka mea malama hale paahao.

       Nolaila hooholo iho la lakou e lawe i ka lakou pio i ka halepaahao.

       Ua hoike mua ia aku imua o oukou, he kanaka wiwo ole o Onila Maka, a ua komo kino hoi oia iloko o na kulana pilikia he lehulehu, aka, aole pala lakou i oi aku mamua o keia.

       Alakai ia aku la keia mai ua wahi pupupu hale nei me kona paa i ke kiai ia ma kela a me keia aoao o kona kino, oiai hoi o Koma e hahai aku ana mahope o kona kua me kana pu i makaukau i kela a me keia manawa.

       Ia lakou e alakai ana i ka lakou pio ua hoao hou aku la o Keaka e ninau iaia e mihi mai.

       Pane aku la oia iaia penei:

       He mau hoahui no anei kekahi ou iloko o keia karaima?

       Hele oe pela, ua pupule ia oe, wahi a kahi Olelo E.

       Iloko oia manawa, hiki mai la lakou nei ma ke ka-e o kekahi auwai a malaila hoi kahi i hanaia ai o kekahi mea hou.

                     Aole i pau.

 

KA MOOLELO O KA

AHAOLELO

KAU KANAWAI

O KA

A. D. 1882.

 

       La Hana 23, Poaha, Iune 1, 1882.

       Halawai ka hale e like me ka mau.  Heluheluia ka moolelo o ka la i hala a aponoia.

Na Palapala Hoopii.

       Na Kamakele mai Makawao e noi ana e hoomauia aku no ka olelo Hawaii iloko o na kula Aupuni.  Waihoia i ke komite hoonaauao.

       Na Mahoe mai Waialua mai e noi ana e ae aku e uku ia na lilo o ke kaahele ana o ka Moi, a puni ka honua.  Waihoia i ke komite waiwai.

       Na Kaluhi mai Koolau e noi ana e kukuluia i elua kula haole ma kela a me keia apana a puni ka aina.  Waihoia i ke komite hoonaauao.

       Na Gardner mai Hana e noi ana e hookuuia na makua mea keiki e hoouna ana i ka lakou mau keiki i ke kula mai ka auhau.  Waihoia i ke komite aina aupuni.

       Na Lilikalani mai Manoa e noi ana e hoakea ia ka inu waiona.  Waihoia i ke komite hookolokolo.

       Na Lilikalani mai Manoa e noi ana e hookomo ia i $5000 no ka hana hou ana i na alanui.  Waihoia i ke komite o na aina aupuni a me na hana hou.

       Na Lilikalani mai Honolulu e hoomau ia no ke Kuikahi a e aeia aku ka aie $10,000,000.  Waihoia i ke komite waiwai.

       Na Gardner mai Hana e noi ana e hoohana ia na paahao ma na apana pakahi o lakou i hoahewa ia ai.  Waihoia i ke komite hookolokolo.

       Na Lahilahi mai Honolulu e aeia kekahi kanaka i loaa kana wahine i ka mai pake e mare i ka wahine hou me ka hele ole imua o ke kanawai.

Hoike a na Komite mau.

       Hoike mai o Nawahi Lunahoomalu o ke komite waiwai, ua noonoo lakou i ka palapala hoopii mai Makawao e noi ana e aeia ka aie $10,000,000, a mai Kona He ua e pili ana no ia mea hookahi; a mai Hana e noi ana e ae ole ia ka aie $10,000,000, a mai Kona Akau e pili ana no keia mea hookahi; na manao ke komite e waiho ma ka papa.  Aponoia ka hoike a ke komite.

       Mai ia komite hookahi no na palapala hoopii mai Hanalei no ke aku o na wai wai paa a me lewa he 50 keneta, me ka palapala hoopii mai Makawao e noi ana e hoop@i@ ka auhau iho. a mai Puna mai e hoomahuahua ia ka eku o na Makai, a m@ Makawao mai e hoomahuahua ia ka uku o ka Moi i $45,000.  a mai Kona Hema e hoopaa ana i ka auhau o na moku@ keiki lehulehu, ke noi aku nei kou komite e waihoia keia mau hoike ma ka papa.  Aponoia ka hoike a ke komite.

Hoike a na Komite Wae.

       Hoike mai o Kalua Lunahoomalu o ke komite wae no na palapala hoopii mai Molokai, e noi ana i $3000 i uwapo pae ma Pelekunu, $2000 no na alanui, a i $400 no na lawe leta, ua hoike mai ke komite ua ano kanaloa lakou no ka like o ka lima kakau, a ua noi mai e hoopanee loa.

       Noi mai o Nakaleka e waihoia ma ka papa.  Hooholoia.

       Noi mai o Kalua e haawi hou ia aku i manawa hou no lakou; hooholoia.

       Noi mai ke'la Kapena e haawi hou ia aku i manawa hou no ke komite hooholomua i ke O@ Leta; hooholoia.

       Noi mai @ @ P@ e haawi hou ia aku i manawa; hooholoia.

Na Olelo Hooholo.

       Na Pilipo he olelo hooholo i $500 no ka hana ana i wahi pae ma Holoaloa.  Waihoia i ke komite o na aina aupuni.

       Na Aholo he olelo hooholo e kauoha ana i na Komisina o na Kanawai e hoike mai i ka lakou hoike; hooholoia.

       Hoike mai ke'la Kapena na hana lakou a ua makaukau aka no ka noho koke ana o ka Ahaolelo ua manao ia he mea pono e kali iki a pau ae ka noho ana o ka Ahaolelo, malia o hoolo'i ia kekahi mau kanawai alaila komo pu aku iloko o na kanawai mua.  Hooholo ia ka olelo hooholo.

       Na ke'lli Wilimana he olelo hooholo o na palapala hoopii a me na olelo hooholo e waiho nei ma ka papa e kali ana no na haawina, e haawiia i ke komite o na aina aupuni a me na hana hou, a e hooholoia e ohi hou ia i 5 lala hou a e pakui hou aku me na lala mua, mai kela a me keia mau mokupuni.  Hooholoia.

       Eia na lala hou:  W H Rice, S K Mahoe, J A Kaukau, J M Kauwila, ke 'lii Kapena. 

       Heluhelu mua loa mai ke 'lii Kapena he kanawai e hoonohonoho hou ai i ka Papa Hoopae Limahana.  Waihoia no ka heluhelu alua.

       Na Haupu he olelo hooholo i $3000 no na poe e hoomoakaka ma ke awa o Hilo.  Waihoia i ke komite o na aina aupuni a me na hana hou.

       Nana mai no he olelo hooholo i $2000 i hale makeke no ka apana o Hilo.  Waihoia i ke komite o na aina aupuni a me na hana hou.

       Heluhelu mua mai o Kaunamano he bila kanawai e hoololi ana i ka Pauku 267 o ke Kanawai Kivila ma ka hoopau ana i kekahi mau lalani.  Waihoia no ka heluhelu elua.

       Hoolaha mai o Nawahi e lawe mai ana oia he bila kanawai e hoololi ana i ka Mokuna 46 o na Kanawai o 1876.

Na Hana o ka La.

       Heluhelu alua ana o ke kanawai hooponopono ana i ka Ohi Auhau mai Hawaii a hiki i Niihau.  Hooholoia a waihoia i kekahi komite wae, Kaulukou, Kauai, J M Smith, Aholo, Loio Kuhina. 

       Hoopanee a hora 2.  Noho hou ka hale ma ka hora 2 P M.

       Heluhelu alua ana o ke kanawai e hoololi ana i ka Pauku 57 o ke Kanawai Kivila e pili ana i na auhau laikini liilii.

       Noi mai o Kaunamano e haawiia i kekahi komite wae---Richardson, Pahia, P P Kanoa, Kaunamano, Nakaleka.

       Heluhelu alua ana o ke kanawai e haawi ana i aku hoomau no J P E Kahaleaahu.

       Noi mai o Kaulukou e haawiia i ke komite i haawiia ai ka noonoo no ka uku hoomau o Kuihelani; hooholoia.

       Heluhelu lua o ka bila kanawai e hoololi ana i ka Pauku 2 Mokuna 35 o ke Kanawai Kivila e pili ana i ka la Sabati.  Noi mai o Kaulukou e hooholoia e kakau poepoe.---Noi mai o Kalua e hoopanee loa.  Hooholoia e haawi i ke komite wae, Kaunamano, Brown, J Kaae, Ake, Lilikalani.

       Heluhelu alua ana o ka bila kanawai e haawi ana i aku hoomau no Mrs. Nihoa Kipi Waihoia i ke komite ia lakou na bila mua elua.

       Hoopanee ka hale.

La Hana 24, Poalima, Iune 2, 1882.

      Halawai ka Hale e like me ka mau.  Heluheluia ka moolelo o ka la i hala a aponoia.

Na Palapala Hoopii.

       Na Kamakele mai Makawao e noi ana aole e hiki i kekahi haku kaawa ke hoopaa i kana paahana no ka mai a pela aku mai ka hana.  Waihoia i ke komite hookolokolo.

       Na Lilikalani mai Manoa e noi ana e hookaaia ka auhau Kula.  2 E auhauia na pake maauwa poi.  3 E auhauia na lio maluna o ko lakou mau kulana.  Waihoia i ke komite lehulehu.

       Na Lilikalani mai Manoa e noi ana e weheia kekahi alanui kahiko i keakea ia e kekahi poe kuleana.  Waihoia i ke komite o na aina aupuni a me na hana hou.

       Na Lilikalani mai Manoa e noi ana e auhauia na bipi kano kaa a me na bipi wai@ i 50 keneta.  Waihoia i ke komite o na alua aupuni a me na hana hou.

Hoike a na Komite mau.

       Hoike mai o Nawahi Lunahoomalu o ke komite waiwai, ua noonoo lakou i na palapala hoopii i waihoia aku ia lakou, a noi mai e waihoia ma ka papa.  Apono ia ka hoike a ke komite.

Hoike a na Komite Wae.

       Hoike mai ka Loio Kuhina i kona manao e pili ana i ka hookapu loa ana ka waiona, ua hoike mai oia ma kona manao kanawai aole he keakea ma kekahi ano e keakea ana i ka hookapu ana o ka waiona i ka hookomo ana mai iloko o ka aina.

       Na Kauai he olelo hooholo i $9000 no ka hana ana i uwapo ma ka muliwai o Waimea, Kauai.  Waihoia i ke komite o na aina aupuni.

       Na Mahoe he olelo hooholo i $50 no ka hana hou ana i ka hale hookolokolo ma Waialua.  Waihoia i ke komite o na aina aupuni.

       Na Aiwohi he olelo hooholo i $5000 no ka hoomahuahua ana i ke awa pae o Mahukona.  Waihoia i ke komite o na aina aupuni a me na hana hou.

              (E nana ma ka Aoao 3.)

 

MAIKAI KA HOI KA PAPA

A ME

KA LAAU O KOU HALE!

NO HEA LA?

KAI NO HOI NO KAHI O

WAILA MA!

Nana aku no hoi ia la

       Ohi ka Io o ka Laau o Makawao

              I ka ua mea hoi o ka nau

Na Papa!  Na Papa

A ME

NA PONO KUKULU HALE

O NA ANO NO A PAU

 

Aia ma ke kihi o na

ALANUI PAPU me MOIWAHINE

HONOLULU

MALAILA E LOAA AI

       E LIKE me ka MAKEMAKE

NO KE

KUMUKUAI MAKEPONO LOA

 

PAPA, PAPA, PAPA,

       Na Papa Huluhulu,

              Na Papa Manoanoa,

                     Na Papa i kahiia,

                     Na Papa Kepa,

 

              Papa Hole Keokeo,

              Papa Hole Ulaula.

 

NA LAAU, NA LAAU

 

Na Kua,

       Na Kaola,

 

              Na Aaho,

                     Na Molina,

                           Na Peapea.

Pine Huluhulu

       Pine i kahua.

 

NA Papa a me na Laau Ulaula

       Pili ulaula,

       Pili Keokeo,

       Pani Puka,

              Pani Puka Aniani

              Ipuka Aniani,

              Puka Olepelepe.

 

PENA O NA ANO A PAU

 

Hulu Pena mai ka Liilii a ke Nui

       Aila Pena.

              Aila Hoomaioo,

                     Wapiti, Pate. 

NA LAKO O KELA A ME KEIA ANO

 

       Na Ami Puka Hale,

              Na Ami Puka P@.

ANIANI!

 

Pepa Hale a me na Lihilihi

 

E LOAA NO MALAILA.

 

PAAKAI HELU 10 KAKAAKO me PUULOA

 

       No ke Dala Kuike, e loaa no na mea a pau i hai ia ae la, no ke Kumukuai Emi loa.  O na kauoha mai Hawaii a Niihau, e loaa aku no ia lakou, e hooko koke ia no ia me ka lawa pono.  E kipa nui ilaila i ike i ka oiaio. 906 tf