Ka Nupepa Kuokoa, Volume XXI, Number 31, 5 August 1882 — Page 1
| This text was transcribed by: | Barbara Schafer |
| This work is dedicated to: | Pi'ilani Hawaiian Civic Club of Colorado/Schafer |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa:
KE KILOHANA POOKELA NO KA LAHUI HAWAII
BUKE XXI. HELU 311 POAONO, AUGATE 5, 1882 NA HELU A PAU 1079.
KA NUPEPA
Kuokoa me ke Au Okoa I HUIIA.
KA MOOLELO
O
ONILA MAKA!
KA MAKAI KIU KAULANA
O
ENELANI!
A O KA MEA
POHIHIHI O KA 1868.
MOKUNA XXI.
E waiho mai i keia wahine me a'u" -- Halawai o Onila Maka me Ionakana wahine he alo a he alo--He ike kapakahi no ka mea huna--Hoike ka Makai Kiu i kekahi mau olelo weliweli--Kahaha ka wahine--Kau pono iluna o ka oiaio--Ka ike hoao kue ia maalea--Elua manao maluna o kekahi kumuhana maopopo ole.
OMO aku la ka wahine iloko o ke keena me ka wiwo ole, ine na manao koa o ka ea hewa ole.
Iaia i hiki aku ai imua o ke pakaukau a ke Kapen e noho ana, pane aku la oia:
E oluolu mai ana anei ke Kapena o na Makai Kiu e kamailio iki mai me a'u no kekahi mau minute pokole?
E ka wahine maikai, ua pilikia ia ke Kapena iloko o keia hora, aka, eia keia keonimana i hoomana ia e hoolohe no na hana a ke Kupena.
O ke Kupena no ka mea i pane mai i ua wahine la, a kuhi ne la oia ia Onila Maka, ka mea i kohoia e lawelawe ma ke ano hope.
I ka wa i haawiia mai ai o ka hana, ku @ ia o Onila Maka a hele aku la imua o ka wahine a pane aku la:
Heah i ka makemake o ka malihini?
Ua hiki anei ia'u ke kamailio pu me oe @a kahi malu?
Ua hiki loa
No ka mea, aohe o'u makemake e hoike ka'u mau olelo imua o ka lehulehu.
E hele mai maanei, wahi a ka Makai, a lawe aku la i ka wahine ma kekahi rumi okoa i hookaawaleia i o na hana i kupono e like me ka nui o ua wahine la.
E noho iho iluna o ka noho, wahi a ka Makai.
Noho iho la ka wahine a noho mai ia no hoi ka Makai Kiu ma kekahi aoao, me ka @ aku o ko Onila Maka alo i ko lonakana wahine.
Mamua o ka hai ana aku o ka wahine i keia manao, ua maopopo mua i ka Makai Kiu kona iini a me kana mau olelo.
Aka, aole nae keia i hoike aku i ka wahine ua waihu wale kana no'a, a ua kamaaina hoi oia iaia, a
Nolaila pane wale ae la no oia me ke ano hoihoi ole:
Ano, ua makaukau au e hoolohe aku i kau hana.
O oe anei ke keonimana i kupono e lawelawe ma kekahi hana, ke ike oe he hana kupono ia no ka lawelawe ana?
Ae, oiai, ua hoomana ia mai au e hoolohe i kau moolelo, nolaila, ua lana kou manao, owau ponoi no ke hoouna ia ana e lawelawe ma kau hana.
He wahi hihia keia no kekahi mea i nalowale kupaianaha.
O kau kane kai nalowale?
Pehea i maopopo ai ia oe he kana ka'u? wahi a Ionakana i ninau pakike aku ai.
I ka lohe ana o ka Makai Kiu i keia mau olelo, aka ae la oia me ka manao lealea, a pane aku la i ka wahine:
Auhea oe e ka wahine, no ka mea, he 11 mailoko mai o 12 o ua hihia o keia ano, o ua kane ka hapanui i nalowale.
He oiaio paha kau, aka, aole nae o ka'u kane kai nalowale. Aka, he wahine opio oia i pili ole ia'u, eia nae, ua pili oia i ka'u kane, ma ke ano he hanai nana.
Auwe? Ua mahaka ea?
Oia ka kaua e imi ai, wahi a ka wahine maalea. Ina i maopopo mua ia makou ke kumu o kona nalowale ana, aole au e hiki mai ia nei i kokua, a e ike hoi i na mea oiaio no keia nalowale kupaianaha.
Kau mai la na hiona o ka mino aka ma na heiehelena o ka Makai Kiu.
A ma kona noonoo hoi e hawanawana ana i keia mau mamala olelo:
E ka wahine, he kiekie kou maalea, aka, he moakaka wale no na hana!
Aole oia i pane aku i kana mea i manao ai, aka, ninau aku la nae oia ma kekahi ninau:
Heaha na kahua o kona nalowale ana?
Eia, o ka mua, aole o Nu Ioka nei kona home.
Alaila, ua haalele aku oia i kona home kuaaina?
Aole oia kona manawa i nalowale ai. No ka mea, ua hono mai no oia i Nu Ioka nei a nalowale iho la oia mai ka hale aku ana a me a'u e noho ana.
Ua hiki anei ia oe ke hoomanao ae i kekahi kumu o kona makemake ana e mahuka?
Ae, ua halawai mai oia me na eha kukonukonu a ke aloha kane i kekahi mau la ae nei i hala.
A aha ua kane la?
Haalele mai la ua kane hoopalau nei ana iaia.
Ma ka la mare o laua?
Ae.
A ! Akahi no au a ike o oe ka o Ionakana wahine.
I ke lohe ana o ua wahine la i keia mau olelo, lele ino ae la oia mai kona noho ae a pane mai la:
He makemake ko'u e ninau aku i kou wahi o ka ike ana ia'u?
Eia, e hai aku au ia oe. No ka mea, ua loaa mai i na Makai ka lohe ua manao wale ia ua pepehiia o Hale Keleneka, a no ke kulike loa o na mea au i hoike mai nei me kona, nolaila, manao wale ae nei no au o Mariona Adeline ua wahine opio la i nalowale, oia hui ka wahine a ka mea i pepehiia ma kona la mare.
He mea kamahao loa ia'u ka lohe ana aku, ua maopopo ia oe keia mau mea a pau.
Aole loa ia he mea nau e pahaohao ai. Oiai o kekahi ia o ka makau apana hana o ka ike i na mea a pau i hana ia, a e hana ia aku ana paha. No ka mea, ua ike no oe ua hoouna aku makou i na Makai Kiu ma H-- i kela mau pule aku nei i hala?
Pehea e maopopo ai ia'u ia mea?
Ho ke kumu, oiai, ua lilo ia hana i mea kamailio nui ia ma H--. Kahaha! Aole oe i lohe, ua niele wale ia no na kanaka a pau e hono ana malaila iloko o na mile he elima. A o oe hoi a me ka kane, eia olua malalo o na maka o no Makai Kiu e kiai ia nei.
Haikea ae ia no helehelena o Ionakana wahine a pane mai la me ka leo huhu:
Kahaha! He mea hilahila loa kau mau olelo. O na huaolelo e like me kena, aole loa au i lohe mamua, nolaila, ua lilo kau mau olelo i mea hookaumaha i ka manao o ka wahine i loohia ia na palapa o ke kanikau a ka ehaeha.
Ina he kamaaina oe me na hana a na Makai, alaila, e hiki auanei ia oe ke hoomaopopo iho, aole he palekaua ke kuiana o kakahi iloko a ua hihia pepehi kanaka. No ka mea, o ka na Makai Kiu hana, o ka imi i na mea i ikemaka ia, a e nookolo no a uanei ko lakou mau kapuai ma kahi a lakou i manao ai, oia kahi e loaa ai na ike kupono.
A heaha hoi ke kumu e kiei ia ai o Ionakana a me a'u? Heaha la ko maua kuleana iloko o ko Hale Keleneka nalowale ana?
Aole na'u e pane aku ka haina o kau mau ninau. Eia wale iho no ka mea i maopopo ia'u, ua hoouna ia aku kekahi mau Makai no keia hana, a ua loheia ae hoi ko Ionakana kane a me ko Ionakana wahine mau inoa, ma ke ano, o laua kekahi i lawelawe lima pu iloko oia hana, nolaila, ua nieniele pu ia aku no hoi laua e like me kekahi poe e ae.
Auwe! He weliweli maoli keia hana! Owai, woai ka mea nana i hui pu i ko maua mau inoa iloko oia hana?
Eia, no ka mea, o ko kane ke kahu hanai o ka wahine opio, no ia kumu, ua hui pu ia ko olua mau inoa iloko o na lona lawahea wale he lehulehu.
Hea ka waiwai, ina maua i hana peia?
Aole i maopopo ia'u, a aole no hoi e hiki ia'u ke hoike aku i ka oiaio o ka makemake ana o kekahi wahne e halawai pu me Keaka Ilikini kekahi o na kanaka ino loa, ma ke aumoe o ka po iloko o ke ululalu.
Haikea ae la na helehelena o lou kana wahine a keokeo me he apana pepa keokeo la, a hina aoao aku la ia, me he la e maule aku ana oia.
Lalau koke ae la o Onila Maka i pika wai a ninini iho la iloko o ke kiaha a hooiou aku la iaia.
Aka, iaia nae e ninini ena i ka wai huihui, ua like ae la kona apo me ke keleawe.
Aole nae i maole ua wahine la, mahope iho o kekahi mau minute, kaakaa ae la kona mau maka a pane ae la:
Aole au i kauona ia Keaka Ilikini e hui me a'u malaila, aka, he ulia wale no ia halawai ana o maua.
Alaila, ua maopopo no ia oe keia halawai ana o olua ea? wahi a ka Makai Kiu.
Ua ike no hoi oe ua maopopo ia'u, e like me kau i hoike mai nei.
Ua hala loa ka kaua mau kamailio mawaho ae o kau mea o ka hiki ana mai nei, wahi a Onila Alaka.
Aole e hiki ia'u ke kamailio no kekahi mea e ae i keia wa, oiai, ua weliweli loa mai ia au no ko'u hoomakakiu ia e na Makai Kiu.
Aole ia he mea nau e makau ai e Ionakana wahine, aia wale no oe a hewa, alaila kupono ka makau ana; no ka mea, aole e lilo na nieie oia ano i mea makau ia e ka poe hewa ole. Eia hoi he tausani o na malama buke kalepa, kakauolelo a me kekahi poe e ae o keia kuianakauhale i nieniele ia e pili ana no keia hana no na malama la hi i hala ae nei. A ua haka pono kau hoi na maka o na Makai Kiu maluna o na Peresidena o na hale baneko a me na kanaka lawelawe malalo ona i ka po a me ke ao; a eia heu kekahi, ua lohe mai nei au, ua hoopaaia ae nei ma ka halepaahao ka mea nana i pepehi o Hale Keleneka, a aia oia ke noho ia ma kahi paa, a ua lawa hoi na ike e ahewia ai o a.
Ua hala ole ia kanaka; aole loi i hanaia kekahi pepehi kanaka, he kanaka opio ino loa o Hale Keleneka, i kona haalele ana i kaua ipo aloha, a me he la, nana no i hoolaha ae keia mea e pili ana i kona make.
Pela ka manaoio maoil o ko kane.
Pehea i maopopo ai ia oe na mea a ka'u kane e manao ai?
Ka! Ua loaa mai ia makou na mea ioaio a pau e pili ana no keia hana.
A me na mea wahahee kekahi he nui wale! wahi a ka wahine.
Pela io paha. Aka, peea hoi ka nalowale alua? He manao anei kou, i mahuka iho nei au wahine opio la i hui pu aku ai oia me kana ipo aloha ole?
Aole.
A heaha kou manao?
Auwe! Ke hopohopo nei au ua lawe oia i kona ola iho!
Heaha ke kahua o kou hopohopo ana pela?
Ke manao nei au, na loaa mai iaia kekahi mau lono, eia no o Hale Keleneka ke ola nei me ka hoomanao ole mai iaia, nolaila, iloko o kona hora o ka ehaeha, ua lawe ae la oia i kona ole.
Hoopunipuni! wahi a ka Makai Kiu.
Heaha kou mea o ka olelo ana he "hoopunipuni"?
Eia, no ka mea, aole i lawa na hooiaio ma kau mau olelo i hoike mai nei, e lawe ai oia i kona ola iho; a eia hoi kekahi, he wahine opio noonoo a hoopono o Adeline no ka manao ana ne e hana ino i ke ola makamae o ke kino a ka Men Mana loa i haawi manawalea mai ai iaia. Aole, he momi ia na kona puuwai opio i anoi mau ai e hiipoi me ka malama maluha.
Ku ae la o Ionakana wahine a pane aku la:
I hele mai nei au ianei me ka manaolana e loaa ana ia'u na kokua; aka ano ke ike nei au i ko'u kuhihewa.
E ka wahine, eia kou kuhihewa, ua maopopo mua no aole e loaa ana ia oe he kokua; aka, ke hai aku nei au ia oe me ka oiaio ano, i keia wa a kaua e kamailio nei, ua hoouna ia aku la he mau Makai Kiu he lehulehu e mai pono i keia nalowale kupaianaha o Adeline, a iloko hoi o keia a me keia sekona piha, e lohe mai ai Laua no kona make a me kona ola.
Ke hilinai nei au e loaa aku no oia e ola ana!
Oia no hoi ko'u manao, wahi a Onila Maka. Aole i pau.
KA MOOLELO O KA AHAOLELO KAU KANAWAI O KA A. D. 1882.
ALIIOLANI HALE, IULAI 21, 1882
La Hana--63 Halawai ka Hale ma ka hora 10 am e like me ka hoopanee ana, ka Peresidena G. Rhodes ma ka noho.
Pule ke Kahunapula Rev. M. Kuaea.
Heluheluia ka moolelo o ka la i hala a aponoia.
Na Hoike a na Komite.
Hoike mai ke Komite wae o waihoia aku ai ka hila e hoohoihoi ai i ka oihana mahiai e noi ana e hoohelo loa aku i ka bila, Aponoia. Waihoia ka bila no ke kakau poepoe, a e heluhelu akolu i ka Poalua.
Ma ke noi, ua hapai ia Na hana o ka La.
Hapai ia ka noonoo ma kona heluhelu alua i ka bila e mahele ai i ua loaa halemai mai na ohua mai iloko o ke Komite o ka hale. Noho o ke'lii Kamika.
Heluhelu ia ka pauku 1 a hooholoia.
" " " 2 "
" " " 3 "
Heluhelu ia ke poo a hooholoia.
Hoopau ia ke Komite a waiho ia no ke kakau poepoe a e heluhelu akolu ia i ka Poalua.
Ma ke kapae ia ana o na rula ua hoike mai ke Komite hooiaio kanawai, ua kakau inoa ka Moi i keia mau bila malalo iho:
He kanawai e hoololi ai i ka mokuna 3 o na kanawai o 1878, e pili ana i na palapala ae holo.
He kanawai e hookaawale ai i haawi hoomau no H. Kuihelani.
He kanawai e hookaawale ai i haawina hoomau no J P E Kahaleaahu.
He kanawai e hoomana ai i na Komisina aina lei ahi e haawi aku ia Wailuku.
He kanawai e hoololi ai i ka pauku 11 mokuna 55 o ke kanawai e pili ana i na hale hulahula.
He kanawai e hookaawale ai i haawina hoomau no Mrs. Nihoa Kipi.
He kanawai e pakui hou ai i kau hookolokolo kaapuni no Kau, Hawaii.
He kanawai e hoololi ai i ka pauku 1 a a me 3 o ke kanawai i aponoia i ka la 22 o lune, 1868 e pili ana i ke kuai ana i na io pipi.
Ma ke noi, ua Komite hou ka hale no ka noonoo ana i ke koena aku o ka Bila haawina. Noho ke'lii Kapena.
Uku kiai oihana me ke awa $3,000
" Luna hale papaa 3,600
" Kokua halemai Moiwahine 15,000
" Na lilo o na hihia Karaima 2,000
" Na Luna Alanui 14,400
Hoihoi i na auhau papilua 1,500
Haawina hoomau o H Kuihelani 1,200
" " " Kahaleaahu 400
" " " Nihoa Kipi 6,00
No ke awa pae o Waimanalo 1,000
Kukulu hale holoi hou 7,500
Malama kukui o ke awa ma Hookena, Kona Hema 1,00
Hoomaha ke Komite a hora 1:30 pm.
Noho hou ka hale hora 1:30 pm.
Hapai hou ia ka noonoo ana no na itamu o ka Bila haawina a penhi na itamu i hooholoia a i hookomo hou ia maloko o ka Bila haawina.
Uku kakauolelo Ilamuku nui $2,400
Uku Hope kakauolelo 1,000
Heluheluia ka pauku 2 o ka Bila haawina o hooholoia me ka hoololi; pela no ka pauka 3, 4, 5, 6.
Heluhelu ia ka poo o ka Bila a hooholoia. Noi mai ke'lii Kapena Loke e hooholo loa ia ka Bila haawina koe ka huina nui o na dala; hooholoia a ma ke noi a ke'lii Wilmana ua hoopau ia ke Komite a aponoia ka hoike a ka Lunahoomalu.
Noi mai ka Loio Kuhina e nolio hou ke Komite o ka hale i ka la apopo a o ka Bila haawina ka hana mua o na hana o ka la hooholoia.
Hoopanee ka hale a noho hou i ka la apopo Poaono hor 10 am.
ALIIOLANI HALE, IULAI 22, 1882.
La Hana 64--Noho ka Hale ma ka hora 10 am. e like me ka hoopanee ana. Peresidena ma ka noho.
Pule ke Kahunapule Rev. M Kuaea
Heluheluia ka moolelo o ka la i hala a aponoia.
Ma ke noi, ua hapai ia Na Hana o ka La.
Heluhelu ekolu o ka Bila haawina imua ka hale. Heluheluia ka bila holookoa, a penei ka huina nui: 3,367,277.86 a hooholoia no ke kakaupoepoe, a heluhelu ekolu i ka Poaha.
Heluhelu alua o ka Bila Kanawai e hoopau i ka pauku 255,256 Kanawai Kivila; he ke kakaupoepoe aheluhelu ekolu i ka Poalua.
Heluhelu ekolu o ka Bila Kanawai e hoeloh ana i na pauku 428,429 Kanawai Kivila e pili ana "no ka hookupa ana i na kanaka no aina e mai;" hooholo loa ia.
Heluhelu ekolu o ka Bila Kanawai e pili ana i ka hoomaopopo ana o ka ona o na manu ahiu a pela wale aku; hooholo loa ia.
Hoopanee ka a hale noho hou i ka Poakahi hora 10 am.
ALIIOLANI HALE, IULAI 24, 1882.
La Hana 65 -- Noho ka Hale ma ka hora 10 am e like me ka hoopanee ana. Peresidena G. Rhodes ma ka noho.
Heluheluia ka moolelo o ka la i hala aponoia.
Na Nawahi, he hoopii no Hamakua, i $5000,000 no ke alanui hao mai Hilo a Hamakua. Waihoia ma ka Papa.
Na Hoike a na Komite.
Hoike mai ke Komite o na Aha Hookolokolo no ka hoopi e hoopau ia D. F. Sandford no ke ki ana i ka pu i ka pake, e waiho ia i ka oihana o ka Loio Kuhina.
Na Olelo Hooholo me na Bila.
Na Rice i heluhelu mua mai i ka bila e pili ana i na hoopaa maluna o kekahi mau waiwai. Waihoia malalo o na rula.
Na Kaulukou i heluhelu mai no ka wa mua i ka bila e hooponopono ai i ka laikini kalewa. Waihoia malalo o na rula.
Nana no i heluhelu mua mai i ka bila e kokua ai i kekahi alanui kaa hao lio no Honolulu. Kapae ia no rula a heluhelu alua ia ma ke poo a kauoha ia e pai.
Na Kalua, he olelo hooholo, e kauoha ana i ka Aha Kuhina e noonoo i ka mea pono e hana ia aku ai no na hapawalu keneta a me na hapaha i mahele ia ma Lahaina a me Wailuku, hooholoia.
Na Mahoe, he olelo hooholo, i $w,800 no ke alahaka ma Kaupoo, Waialua. Waiho ia ma ka papa a noonoo pu me ka Bila haawina.
Na Kamakele i heluhelu mua mai i ka bila e hoopau loa ai i na mokuna 44 o na kanawai o 1876 a me ka mokuna 5 o na kanawai o 1878, e pili ana i ke kuai akea ana o na aina aupuni. Kapae ia na rula, a heluhelu alua ia ka bila ma ke poo a waihoia i ke Komite o na aina aupuni.
Na Wilimana, he olelo hooholo, e kauoha ia ke Kuhina o @ o na aina e,, e hoike mai ina ke noho hei o H A P Carter ma kekahi oihana o keia aupuni, hooholoia.
Pane mai ke Kuhina o ko na aina e, he Elele Kuhina o H A P Carter i ke alo Alii o Potugala i hookohu ia e ka Aha Kuhina mua, a ke mana la no kona hookohu a hiki i keia wa
Na Kamakele he olelo hooholo, i $10,000 no ke kukulu ana i Kia Hoomanao no Kamehameha III; ka Moi nana i hoopomaikai i keia lahui ma ka haawi ana mai i na kuleana.
Ma ke noi, ua hapai ia
NO HANA O KA LA.
Heluhelu akolu ia ka bila e kaupalena ai no ke kukulu ana i na hale pale ahi no ke kulanakauhale o Honolulu a hooholo loa ia.
Heluhelu alua ia ka bila e hoololi ai i ka pauku 1 mokuna 90 o ke Karaima, e pili ana ina i kue ua olelo Hawaii a me Beritania, alaila e paa no ka olelo Hawaii, a hoopanee loa ia.
Ma ke kahea ia o na inoa ma ka ae me ka hoole ua likea like ke koho ana, he 21 ae 21 hoole, a ua koho ka Peresidena ma ka ae, a ua holo e hoopanee loa ia he 22 ae 21 hoole.
Hoomaha hora 12.
Hora 2 pm noho hou ka hale.
Heluhelu alua ia ka bila e hoololi ai i ke kanawai e papa ai aole e hoopau ia no paahana i oi ole aku ko lakou mau ohi mua mamua o ko $15. a hooholoia e kak u poepoe a e heluhelu akolu ia i ka Poaha.
Kapae ia na rula, a hoike mai ka hapa nui o ke Komite wae i waihoia aku ai ka bila e haawi ai i haawina kumau no A P Bribkwood e hooholo loa i ka bila me ka hooemi ana i $500 ka uku no ka makahiki ma kahi o ka$1000 i olelo mua ia ma ka bila. Mahope o ka hoopaapaa Ioihi ana, ua hoopanee loa ia ka bila, penei na koho ana. Na ae e hoopanee loa he 20; Ma ka hoole he 16.
Hoopanee ka hale a noho hou i ka la apopo Poalua hora 10 am.
ALIIOLANI HALE, IULAI 25, 1882.
La Hana 66--Halawai ka Hale ma ka hora 10 am e like me ka hoopanee ana, ka Peresidena G. Rhodes ma ka noho.
Pule ke Kahunapule Rev. M. Kuaea.
Heluhelu ia ka moolelo o ka la i hala a aponoia.
Noi mai o Mahoe, e hapai hou ia ka noonoo no ka Bila o ka hawaina hoomau o Brickwood, ae ia.
Noi o kaulukou e aponoia ka hoike a ke Komite, a waihoia ka bila no ke kakau poepoe a e heluhelu ia i ka la apopo.
Noi o Aiwohi, e hapai hou ia ka noonoo o ka bila i hoopanee ia e pili ana i ka olelo Hawaii a me Beritania, o ka olelo Hawaii ka oi o ka mana, ae ia.
Mahope o ka noonoo ana, ua waihoia i ke Komite wae, Kaunamano, Kaai, Rice, Isenberg, Kauhane.
Hoike mai ke Komite o na Aha Hookolokolo i waihoia aku ai ka hoopii a ko Honolulu e noi ana i na uku hoopai o na poe huna mai hebera e hoihoi aku, e hoopanee loa aponoia.
[E nana ma ka Aoao 4.]
MAIKAI KA HOI KA PAPA
--A ME--
KALAAU O KOU HALE!
NO HEA LA?
KAI NO HOI NO KAHI O
WAILA MA!
Nana aku no hoi ia la
Ohi ka lo o ka Laau o Makawao
I ka ua mea hoi o ka @
Na Papa! Na Papa
--A ME--
NA PONO KUKULU HALE
O NA ANO NO A PAU
Aia ma ke kahi o na
ALANUI PAPU me MOIWAHINE
HONOLULU
MALAILA E LOAA IA E LIKE me ka MAKEMAKE
--NO KE--
KUMUKUAI MAKEPONO LOA
PAPA, PAPA, PAPA,
Na Papa Huluhulu,
Na Papa Manoanoa.
Na Papa i kahiia
Na Papa Kepa,
Papa Hoie heokeo.
Papa Hole Ulaula.
NA LAAU, NA LAAU
Na Kua,
Na Kaola,
Na Aaho,
Na Molina
NaPeapea
Pine Huluhulu,
Pine i kahiia
NA Papa a me na Laau Ulaula
Pili Ulaula,
Pili Keokeo,
Pani Puka,
Pani Puka Aniani,
Ipuka Aniani,
Puka Olepelepe.
PENA O NA ANO A PAU
Hulu Pena mai ka Liilii a ke Nui,
Aila Pena,
Aila Hoomaloo,
Waniti, Pate.
NA LAKO O KELA A ME KAIA ANO
Na Ami Puka Hale.
Na Ami Puka Pu
ANIANI!!
Pepa Hale a me na Lihilihi
E LOAA NO MALAILA.
PAAKAI HELU 10 KAKAAKO me PUULOA
No ke Dala Kuike, e loaa no na mea a pau i hai ia ae la, no ke Kumukuai Emiloa. O na kauoha mai Hawaii a Niihau, e loaa aku no ia lakou, a hooko koke ia no ia me ka lawa pono. E kipa nui ilaila ike i ka aiaio. 905 tf