Ka Nupepa Kuokoa, Volume XXI, Number 49, 9 December 1882 — Page 1
| This text was transcribed by: | Rob Escuadro |
| This work is dedicated to: | ko'u punahele Kalani Kea |
Ka Nupepa Kuokoa
KE KILOHANA POOKELA NO KA LAHUI HAWAII.
NA HOOLAHA.
MAIKAI KA HOI
KA PAPA,
- A ME -
KA LAAU O KOU HALE.
NOHEA LA?
KAI NO HOI NO KAHI O
WAILA MA.
Nana aku no hoi ia la ohi ka lo o ka laau o Makawao, i ka ua mea hoi o ka nani.
NA PAPA! NA PAPA!
A ME
Na Pono Kukulu Hale
O na Ano no a Pau.
AIA MA KE KIHI O NA ALANUI
Papu me Moiwahine,
HONOLULU.
Malaila e loaa ai e like me ka makemake no ke
KUMUKUAI MAKEPONO LOA.
PAPA1 PAPA1 PAPA1
NA PAPA HULUHULU,
NA PAPA MANOANOA,
NA PAPA I KAHIIA,
NA PAPA KEPA,
PAPA HOLE KEOKEO,
PAPA HOLE ULAULA.
Na Laau, Na Laau,
NA KUA,
NA KAOLA,
NA AAHO,
NA MOLINA,
NA PEAPEA.
PINE HULUHULU,
PINE I KAHIIA.
NA PAPA A ME NA LAAU ULAULA.
PILI ULAULA,
PILI KEOKEO,
PANI PUKA,
PUKA ANIANI
PANI PUKA ANIANI,
PUKA OLEPELEPE.
PENA
O NA ANO A PAU,
Hulu Pena mai ka liilii a ke nui,
Aila Pena,
Aila Hoomaloo,
Waniti, Pate,
Na Lako o kela a me keia Ano.
NA AMI PUKA HALE,
NA AMI PUKA PA,
ANIANI
PEPA HALE A ME NA LIHILIHI,
E loaa no malaila.
PAAKAI HELU I,
- O -
KAKAAKO ME PUULOA.
No ke Dala Kuike, e loaa no na mea a pau i hai ia ae la, no ke Kukukuai Emi Loa. O na Kauoha mai Hawaii a Niihau, e loaa aku no ia lakou, e hooko koke ia no ia me ka lawa pono. E kipa nui ilaila i ike i ka oiaio.
905-tf
NA HOOLAHA.
W.O. SMITH,
LOIO! LOIO!
Helu 36 Alanui Kalepa, Honolulu
W.R. KAKELA,
He Loio a he Kokua ma ke Kanawai.
He Luna Hooiaio Palapala.
CECIL BROWN.
Loio a he Kokua ma ke Kanawai.
A he Agena no ka Hooiaio ana i na Palapala no ka Mokupuni o Oahu.
Helu 8 Kaahumanu, Honolulu, H.P.A. 2-ty
ASA KAULIA,
LOIO A KOKUA MA KE KANAWAI
Ua makaukau au e lawelawe i na hihia a pau ma keia Oihana imua o na Aha a pau o ka mokupuni o Oahu. E loaa no au ma Koolaupoko, Heeia, a ma Honolulu i kekahiu wa E hookoia na kauoha mai na wahi a pau o ka mokupuni me ka eleu a me Kahikawawe.
Jno. Lota Kaulukou,
LOIO A HE KOKUA.
Ua makaukau oia e lawelawe i na hihia a pau o kela a me keia ano iloko o na Aha Hookolokolo a pau o keia Aupuni. Ua hiki no hoi ke hana i na palapala a pau e pii i ka Oihana Loio me ka eleu. E loaa no au ma Heeia Koolaupoko, a ma Honolulu no hoi i Kekahi manawa.
901-tf
C.C. COLEMAN,
Amara a he mea hana Mekina
Kapili Kapuai hao lio.
A ME KA
Hana ana Kaa Lio, etc.,
Hale Hana ma Alanui Alii,
E kokoke la i ke Alanui Papu.
605-tf
KALE KULIKA,
Luna hooiaio
PALAPALA KUAI, MOLAKI,
A ME NA PALAPALA OIA ANO.
Luna Hooiaio Palapala Aelike mawaena o na Haku a me na Kauwa. Luna Haawi Palapala Mare.
Ma ke kihi o ke Alanui Moiwahine me Kaahumanu,
kulanakaauhale o Honolulu, ko Hawaii Pae Aina.
159-tf
Richard F. Bickerton,
(PEKETONA.)
Loio a he Kokua ma ke Kanawai.
Keena hana Helu 23 Alanui Kalepa,
Elua puka ma o aku o ka hale kauka o Kauka Minuteole.
E hele ana oia imua o na Ahahookolokolo a pau o keia Aupuni ma na ano hihia a pau, ina paha ma Oahu nei, a ma na Mokupuni e ae.
Ua Makaukau mau oia i ka hana ana i na Palapala pili kanawai o kela a me keia ano.
Ua hiki no hoi iaia ke hoaie dala aku ma ka morakiana i na aina ma ka ukupanee haahaa loa.
E hanaia na hana me ka hikiwawe a me ka uku haahaa.
George E. Sherman,
MEA HANA NOHO LIO
- A ME -
Na Lako a pau o na Pono Hololio.
Ua maa kahiko oia iloko o keia hana, a ua kamaaina i ko Hawaii nei noho ana; he oluolu na auhau ana. E hele mai i ikemaka.
AIA KONA HALE HANA MA ALANUI KULA,
Ma nae iho o ka Uwapo nui.
1076-6m
JAMES M. MONSARRAT,
{MAUNAKEA}
Loio o he Kokua ma ke Kanawai.
Imua o na aha Hookolokolo a pau o keia Aupuni. E lawelawe ana no hoi ma na hana pili i ka hooponopono waiwai, me ka imi ana i na palapala Sila Aina, ka hana ana i na Palapala Kuai, Hoolimalima a me ka hoaia dala ana.
A HE LUNA HOOIAIO PALAPALA
Keena hana alanui Kalepa.
Jan @, @ 944-@
Joseph E. Wiseman,
LUNAHOOPONOPONO O NA WAIWAI PAA
- A ME -
Luna Imi Hana,
Helu 27 Alanui Kalepa, Honolulu
Luna Hoolimalima no na Rumi, na Hale, a me una Kuai me Hoolimalima o na Waiwai Paa ma na wahi a pau o ka Paemoku. Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.
N.R. - Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei. O na Unuhiolelo a me na Meheleolelo ana, e hookoia me ka maikai. O na kauoha a me na kamailio ano maloko o na leta no kekahi o na hana maluna ae, e hookoia me ka eleu loa.
1076-1y
KA MOOLELO
- O -
Onila Maka!
ka Makai Kiu Kaulana
- O -
ENELANI!
- A O KA MEA -
POHIHIHI O KA 1868.
MOKUNA XXXIII.
KE KANI ANA O KA PU, AOHE NAE HE KAHE MAI O KE KOKO - HE PALE POKA KA MALIHINI HELEHELENA ELEELE - KAHAHA KA HAPA ILIKINI - HOIHOI HOU IA NA POKA O KA PU - E NIELE ANA I KA OIAIO - HOOLE LOA O KEAKA - KA MEA I LOOHIA I KA POINO MA KAPA KAHAKAI - HE HORA PIOIHOI - KA HOPENA.
I ka wa a Keaka i ki aku ai i kona hoa paio, aia hoi kani kanapi aku la kana pu.
A ike aku la no hoi oia i ka malihini e noho mai ana no me ka haka pono ana o kona mau maka maluna ona, a kani ae la kana aka me ka henehene mai i kona mea pepehi kanaka.
Aka, kulai hou mai la no nae o Keaka i ke kiko a ki hou aku la.
Aole nae he waiwai i loaa iaia, oiai e aa mai ana no na maka o kona hoa me ka hene mau o kana aka.
Ia wa haikea ae la na helehelena o Keaka.
Oiai, ua kao@@ ho la na lima kaumaha o ka maka'u maluna o kona kino holookoa, a puapuai mai la ka hou koekoe o ka hopohopo ma kona lae.
A hookomo iho la oia i kana pu panapana iloko o ka pakeke.
O kekahi keia o na hana akamai loa au i hana ai, wahi a ka malihini me ka leo henehene, a haawi aku la oia ia Keaka he elua mau poka i hele a uliuli i ka uwahi.
He ano okoa loa no hoi ka Keaka pu panapana, aka ua like no nae na poka oloko me kana pu.
Eia mai au mau poka, i hiki ai ia oe ke ki hou, wahi a ka malihini.
A i ki hou oe ma keia mua aku, mai ke oe i ka mea i paa i ka pale poka, aka i ka poe aohe i paa ia mea.
Ua hoohaahaa ia ua Hapa Ilikini la iloko oia wa.
Ina he kanaka koa oia, aole la oia e noho hou iho iluna o kona noho no kekahi sekona hou aku, aka e ku koke ae ia a holo ino aku iwaho, eia nae ua ike ia, aole loa e loaa iaia he pomaikai ma ia hana.
Ua makaukau anei oe e kuka pu me a'u? wahi a ka malihini.
Heaha kou manao no'u?
He makemake ko'u manao no'u?
He makemake ko'u e kokua mai oe ia'u.
Pehea e hiki ai ia'u ke kokua aku ia oe?
Eia, oiai ua powehiwehi ae nei ka hoku nana e hoike mai i ko'u mau pilikia i keia wa; a malia he mau pule okoa ia a'u e kali ai a ike hou ia aku oia, alaila, maopopo ia'u na mea e hiki mai ana no'u, nolaila he ake nui ko'u e loaa mai ia @ mai kekahi lono.
Ua kuhihewa paha oe.
He oiaio, aohe a'u mau lono e hai aku ai ia oe.
He mau lono no.
Pehea ke ano;
He makemake ko'u e ike heaha la kau i hana ai me ke kaikamahine, oia o Mariona Adeline?
Ia wa, lele ino ae la o Keaka Ilikini iluna, a ua hele hoi kona mau wawae e naka ana i o a ianei, a pane aku la me ka leo haalulu:
Aole au i ike ia kaikamahine! Heaha la kau o ka ninau ana mai ia'u nona?
E hai mai oe ia'u, owai la oe!
Owau no kou hoaloha i kamaaina ia oe, nolaila e pane mai oe i ka'u mau ninau.
Aole loa e hiki ia'u ke pane aku no kau ninau, no ka mea, aole loa au i ike ia kaikamahine.
Aia a ike aku au i kuu hoku, alaila, kuka pu au me ia, ina aole io oe i ike, nolaila e pono oe e hoike mai ia'u i keia wa, i pakele ai oe mai na poino e ili mai ana no kau mau hana karaima.
E like me ka'u i olelo aku nei ia oe aole au i ike, aka, ma kau mau olelo me he mea la o oe o kaua kai kamaaina i ua kaikamahine la
Ina aole i powehiwehi ka olino ana o kuu hoku, alaila, e maopopo auanei ia'u.
Alaila, e pono no oe e kali a ike hou ia aku ko hoku, alaila, ninau aku iaia no kau mea i makemake, a me kekahi mau mea e ae au i ike oio ai e pili ana i keia kaikamahine.
E i mai ana paha oe aole no oe i ike i ka hopena i ili aku maluna o Hale Keleneka?
Ia wa lele hou ae la o Keaka iluna me ka pihoihoi nui, a halia wale mai la no iaia kekahi mea a pane aku la:
Ua maopopo ia'u ka mea nana keia hana, aka, aole nae e hiki ana.
Owai kau e manao nei?
O ka wahine i kamaaina i keia mau hana mamua o'u.
O Ionakana wahine paha kau e manao nei ea?
Oia, nolaila ke ike nei au nana oe i hoouna mai nei.
Ua kuhihewa oe; aole loa i ike o Ionakana wahine ia'u.
O! ua maopopo ia'u.
He hiki loa ia'u ke hooiaio aku, aole loa oia i ike o ia'u.
He makemake loa ko'u e ike.
Eia, aole oia i ike mai ia oe i kou wa e ukali malie ana mahope o na kapuai o Hale Keleneka ma ka po ona e mare ai me ka wahine opio ui o Ulu Paina Iuiu, a aole no hoi oia i ike mai ia oe i kou wa i hahau aku ai iaia mahope o kona poo.
Hoomaka mai la na helehelena o ka Hapa Ilikini e like me ka helehelena o kekahi kanaka make, oiai hoi ka malihini e hoomau ana no i ke kamailio ana a pane aku la:
Owau nae kai ike ia oe!
He wahahee!
Aka, ua ike ia nae oe e kekahi mea, i na aole oe i ike ia, aole e hiki ia'u ke hoike aku i ke ano o kau mau hana ma ia po.
Aole na'u i pepehi o Hale Keleneka.
E hai aku oe ia mea ia hai, aole ia'u.
No ka mea, ua ike aku au ia oe e kauo huluhulu ana i ke kino maloko aku o ka ululaau a hiki i kahi pupupu hale a ko makuahine e noho ai.
A ike hou aku la au ia oe e lawe ana i ke kino a hiki i ka muliwai a holo aku la oe me ke kino make maluna o ka waapa a waho o ka moana. A ike hou aku la no au i ko lawe ana ae i ke kino i kiheahea i ke koko a waiho iho la iloko o ka waapa, a hookuu aku la ma ka ili hualala o ka moana wai akea e lawe hele i kana ukana luuluu; nolaila, ke makemake nei au e hoike mai oe i kahi e loaa ai o Mariona Adeline.
O ka ninau hope a ka malihini i ninau aku ai, ua haule aku ia maluna o kekahi mau pepeiao hiki ole ke lohe.
No ka mea, ua haule aku la ilalo ua Hapa Ilikini la a maule aku la.
He hapalua hora mahope iho oia wa ala hou mai la oia a noho iluna a huli aku la he alo a he alo.
A e mau ana no hoi na hiona o ke kanaka make iluna o kona mau helehelena mahope iho o kona maule ana.
Auhea oe, wahi a ka malihini, ke lohe mai la no oe i ko'u kamaaina i kau mau hana a pau e Keaka, nolaila, he mea makehewa ia oe ka huna ana aku i kekahi mea mai ia'u aku.
Malia o oe no o Satana, wahi a Keaka me ka leo huhu, aka, aole nae au e hai aku ana ia oe i kau mea i makemake ai, no ka mea aole au i ike.
Pehea hoi ina wau e hele ae ana e hai i ka Loio Apana o H - aohe anei ou manao e hoouna mai ana oia ia oe, a e hoao hoi e loaa ka mea au e hoole mai nei ia'u.
Aohe a'u mea e hai aku ai ia oe, a aohe no hoi o'u manao nui nou a me ka Loio Apana o H - .
I keia wa ua paakiki loa iho a ka Hapa Ilikini.
No ka mea, aia iloko o kona mau aa na haawina maalea a me ka paakiki o ka ohana ili ulaula o kona makuakane.
Oiai, iloko o kona kulana kupilikii me ka pu panapana imua o kona alo, a me ka hoike ia ana aku o ka moolelo o kana mau hana ino, aole oa nae oia i pu-a iki ae i kekahi huaolelo e pili ana no ia hana.
No ka paakiki a me ka hunakele loa o ua Hapa Ilikini la, nolaila, na hookuu ia ae la ko laua hui ana,
He oiaio o ka lua iho la keia o ko Onila Maka hoohoka ia ana, nolaila, haalele aku la oia i au Hapa Ilikini la.
He elua hora mahope iho o ka moolelo i hoike ia ae la maluna e noho hookahi ana o Onila Maka iloko o kona keena.
A he kakahiaka loa no hoi kona w i noho ai maloko o kona keena.
Aka, e like me ka mea mau iaia, ina oia e noho hookahi ana, alaila e noonoo ana oia no kana hana i lawelawe ai me ke kuka mau ana me kona noonoo iho, a puana ae la:
Ua manao hoi au, o ka'u wahi hana maalea i hana iho nei me ka pu panapana ana, oia la hoi ka mea e maka'u mai ai oia i ka'u mau olelo, aka, o ka oi loa aku la nae ia o kona paakiki, a heoi no hoi oia a ke kanaka maalea nui wale a'u i nieniele ai.
Ma keia wahi e hoike pokele aku ana makou imua o ko makou poe heluhelu i kahi hana maalea a ka Makai Kiu i hoike ia ae nei mamua e pili ana i ka pu panapana.
Oiai oia e launa pu ana me Keaka mamua o kona hele ana e imi i ke kanaka aihue, ua ike mau ka Makai Kiu i ka Keaka pu.
A ua maopopo no hoi iaia ke ana; a iaia i hooholo ai e hana i kana hana e like me ka mea i hoikeia ae nei maluna, ua hoomakaukau iho la oia iaia iho.
Ia laua maloko o ka hale pepa pili waiwai, a iloko hoi o ko Keaka wa e nanea ana i ka pili, ua lilo ae la ia Onila Maka kana pu mailoko ae o kona pakeke a hookomo aku la i kekahi pu okoa i hoopiha ole ia.
He wahi hana kahiko no keia ana, aka, i keia wa ua holo pono kana hana me ka loaa ole nae o kana mea i manao ai.
Ma ka la a me ka hora i ae like ia, halawai iho la ka Makai Kiu me ke kauka, a hele like aku la laua no Ierese e ike ai i ke kanaka i poino, ke kino ola i pakele mai ka Keaka mau hana lokoino.
E noho ana no hoi kahi kanaka lawaia maloko o kona home, oiai ua kanaka pupule la e hele ana no mawaho iho.
Hookahi wale no mea e laka ai ua kanaka la, nolaila hoao iho la oia e hoomalielie iaia a hiki i kona wa i noho malie ai, ia wa nana iho la ke kauka i kona wahi i eha.
O ka Makai Kiu hoi ku iho la ia ma kona aoao me na helehelena haikea.
Oiai, aohe mea e ae i ike i ka hopena o ka ke kauka olelo hooholo, aka, oia wale iho no, no ka mea, aia ma kana olelo e ike ia ai ka pono a me ka ole.
Huli iho la ke kauka me ke akanele loa me ka nana ana i ke ano o kona palapu, a huli mai la mai ka mea nona ka eha ana e nana ana.
Pehea iho la, wahi a ka Makai Kiu i ninau aku ai, a heaha hoi kou manao no ka mea i poino?
Aohe o'u manaolana no kona ola hou, wahi a ke kauka.
Aohe ou wahi monaolana iki la? wahi a ka Makai kiu i ninau aku ai me ka pihoihoi nui.
Pela ko'u manao.
Aohe no hoi au mea e ae e hoao ai?
Aohe.
Ia wa hai aku la ka Makai Kiu i ka moolelo o na kii ana i aihue ai.
Hoolohe mai la ke kauka no kekahi manawa a ninau mai la:
He kii no nae paha kau e hiki ai ia kaua e hoike ae iaia?
Ia wa hoomanao ae la ka Makai Kiu he kii no kana o Mariona Adeline - aka, i lawe maoli mai no oia no keia hana - i hiki ai ke hoao iaia i na e makemake ia ana, - he oiaio, ua ko kana mea i manao ai, a ano ke hoao ia nei.
{Aole i pau.}
NA OPIO ELUA.
HE WAHI MOOLELO OIAIO.
E noho ana he au opio elua ma kekahi kula kiekie ma Amerika, o kekahi he keiki na kekahi lunakanawai kiekie, o ka lua he wahi keiki na kekahi wahi kanaka mahiai ilihune.
Ma ko laua kulana ma ke kula ua holomua laua ma na haawina a ua mahaloia no laua e na kumu o ua kula nei.
Hiki mai la ka la hoike, hoikeia na haumana a pau, a ua loaa no ka mahaloia ia laua, a ua haawiia he mau makana ia laua, a ua loaa hoi he mau palapala hoomaikai mai na kumu mai e mahalo ana a e hoike ana i ko laua noho maikai ana me ka malama ana i na rula o ke kula.
I ka puka ana, hoi aku la ke keiki a kahi kanaka mahiai i ka home ilihune o kona wahi luaui a hooikaika pu me kona hilahila ole i ke pahenehene mai a kekahi poe iaia i ka hele i ke kula kiekie poe iaia i ka hele i ke kula kiekie a hoi mai he wahi hana haahaa ka mea e loaa, aka, aole i nana keia kanaka opio i keia mau pahenehene ana, aka, ua pii malie oia ma ke alapii o ka hoomanawanui a hiki i kona ku ana maluna o ka papahele o ka pomaikai a noho oia maluna o ka noho o ka hanohano. O kona kahua nae i hoomaka ai, a i uhau ai i kona hale oia no ke kahua o ka hoopono, a pii oia mai ka haahaa a hiki i kona lilo ana i lunakanawai kiekie no ia mokuaina.
I kekahi la ua noho oia ma kona noho e hookolokolo i kekahi hihia pepehi kanaka, a i ka wa i laweia mai ai ka mea hewa mailoko mai o ke keena paahao, he mea e ka hilahila o kona manao i ka ike ana aku, o kona hoa kula o na la opio, ua hookolokoloia a ua kau aku ka olelo ahewa a ka Aha e pani oia i kona ola, no ke ola ana i ako ai, a o ka moolelo o ka poino o keia kanaka opio ua hoike oia imua o ka amana mamua iki iho o kona liia ana, a oia keia:
Ua hoi aku oia mai ke kula aku a noho pu me kona makuakane a kokua pu ma na hana me ke ao pu mai o kona makuakane iaia i ke alanui no ka pii ana aku ma ke kualono hanohano a me ka pomaikai ma keia ao; aka, ua pale keia keiki i keia mau olelo ao a hui aku la oia me kekahi mau kanaka opio kolohe a i maa hoi i ka inu ama i na mea on a. Ua hoomaa oia iaia iho me ka ike ole o kona mau makua i keia mea ana e hana nei, a hiki i kona wa i lilo ai he kauwa kuapaa na ka waiona a hiki i ka wa i ike pono ai kona mau makua i keia hana ino ana, au lilo ia i mea kaumaha loa i ka manao o kona mau makua, oiai o ka laua keiki wale iho la no ia, ua lilo ia i mea kaumaha loa no ka makuahine, a ua lilo i mea e mai ai, a o ka hopena ua iho aku la kona makuahine i ka luakupapau me ke kaumaha; aka, aole i lilo keia mea i mea e kanahai mai ka inu ana o au opio nei - o ka make ana o ka wahine, o ka hele hoi o ke keiki i ka ona, ua lilo ia mea e pilikia ai ka makuakene, a aole i hala na mahina elua ua iho aku la ka makuakane iloko o ka luakupapau me ka puuwai mokumokuahua, a ua hoopuka ae i na olelo ehaeha e like me Iakopa no kana keiki aloha no Iosepa, a i ka lilo ana ae o au keiki nei i hooilina no ka waiwai o kona makuakane, (oiai he kanaka waiwai oia) ua lilo loa aku la oia iloko o na hana ino a hiki i ka wa i lilo ai kona mau waiwai i mea ole, a lilo oia i kanaka ilihune loa, e hele ana ma na hale inu rama e noi ai i wahi kiaha rama. A i kekahi la ua inu pu laua me kekahi hoa ona a ona, a iloko o ka wa ona ua ulu ae la he hoopaapaa a o ka hopena ua hakaka a ua hou aku oia i kona hoa inu rama i ka pahi a make loa. Ua hopuia oia a ua kau mai ka hoopai e like me ka mea i hoike mua ia ae nei, a o na olelo hope loa a ua kanaka opio nei oia keia:
"E na makamaka, o keia make mainoino e kau mai ana maluna o'u ua kau mai no ko'u hoolohe ole i ka leo aloha o ko'u mau makua a me na mekamaka, ua hoolilo au i ka waiona i hoaloha no'u, a ua alakai mai nei oia ia'u mai ke kulana maikai a me ka hanohano waiwai, a hiki i ka hilahila ilihune a me ka make maoli o ko'u kino a me ka poino o ko'u uhane, a e hele aku ana au e halawai me ke Akua o kuu makuahine aloha, auwe au! Ke kanaka poino! Rum to et - , oia na huaolelo hope loa haule iho la ke pani kahi ana e ku ana, lele aku la kona uhane e ku imua o ka mea nana ia i hana.
Make oia i ka make poi no kau maluna o kona uhane ka hoailona o Kaina. E na opio Hawaii, e na pulapula o ka lahui o Kaahumanu i aloha ai, e hoomaopopo pono oukou e ili mai ana ka poino, ka hilahila, a me ka make o ko oukou kino a me ka uhane, a e hoomanao oukou i na leo ao aloha ma kela ao aku, kahi e hiki ole ai na leo uwalo me na lea paipai; nolaila e haalele i ke ala o ka poino a me ka hilahila, a e hana i ka maikai a me ka pono, a na na lani e kokua mai ia oukou e o'u mau hoa=o o ka lahui hookahi. E maliu i keia. S. L. D.
Theological Seminary, Nov. 21, 82.
NA NU HOU O KONA AKAU.
E MR. LUNAHOOPONOPONO; ALOHA oe: -
E oluolu mai i wahi ruji no kela mau hua e kau ae la maluna.
Ke koala nei ko Helani mau opio he Hui Opiopio Karistiano. Ua oi mamua o ke kanalima lala o ka hui. Ua kohoia na Luna, penei:
S.W.Kahele, ……………………………………………………. Peresidena.
D. Namauu, …………………………………………………….. Puuku.
J.K. Nahale, …………………………………………………….. Kakauolelo.
Ke nee mua nei na hana pono.
Ma ka la 16 o Nov., ua malamaia he anaina nui, e hoalohaloha ana i ke Akua no ko kakou lani Moi. Owai la i like me Helani mai Hawaii a Kaai? Ua malamaia paha ma na wahi e ae ma na mea lealea, ina pela io, o Helani ka oi.
Ma ka la 14 o Nov., ua noho ka papa kula o Kona Akau, e hoolohe i ka hoopii a W.H.Davis ia D. Alawa, Kumukula o Holualoa. Elua hoike a ka mea hoopii i lawe mai; i ka nana ana o ka papa i keia hihia, hilahila maoli na mea i laweia mai, a ka mea hoopii ia i hana ai. Ma ka la @, ua puka ka olelo hooholo a ka papa. Ua hoopauia ko Alawa noho Kumu ana no Holualoa.
Ma Kahaluu, ua hanau ia o Joseph Kauhane, na Mr. me Mrs. Kauhane. Malaila no, hanau he keikikane na Aluli me Mahaua. He mau noo laua, ua pomaikai nae.
E aho ia, ke awiwi loa nei au. Aloha na keiki o kou keena hanohano.
ROBERT NAHUNAPALAI.
Kona Akau, Nov. 23, 188@.
KA LIONA A ME KA IOLE LIILII.
Kekahi liona ua hopu me ka manao ole i kekahi iole liilii. Ua hoohikilele oia i keia mea liilii, i kona noonoo ana i mea e pau ai i ka ai ia. Aka, ua noi ikaika ka iole e hookuu iaia. Ua nonoi oia no kona lokomaikai e haawi, mai iaia I keia mea kupono no kona mana, a no kona ikaika, a no kona hanohano nui. "Aole kupono no kou hookaulana ana," wahi ana, "e hooluu i kou mau maiuu ma ka hookahe ana i ke koko o kekahi mea liilii loa." E like me ka lokomaikai nui o ka liona, ua hookuu oia i ka iole liilii.
I ka hiki ana aku i kekahi mau la mahope iho, ua hiki mai i ka liona na pilikia. Ua hahai oia i kekahi holoholona, a ua heiia oia iloko o kekahi upena. O ka iole, ua lohe i kona halulu ana me ka hoomaopopo ana i ka leo o kona hoola. Ua holo ia e kokua iaia me ka hakalia ole, a nalinali aku ia i na kaula o ka upena.
Me keia kokua ana, au ao aku oia i kona hoola, aole kekahi mea malalo o kakou, aole hiki iaia ke hana hou i ka pono.
KA MAKANI, KA LA, A ME KA MEA KAAHELE ANA.
Ua ala mai ka hoopaapaa mawaena o kekahi poe, oia no ka makani akau a me ka la. Eia ke kumu paio, owai o laua ka mea oi aku ka ikaika. Ua lokahi laua e hoao i ko laua ikaika ma ke kaahele ana, a ike i ka mea nana ka mana e kaua iaia e wehe ae i kona aahu. Ua hoomaka mai ka makani akau e pa me ka puanuanu loa, i hui pu ia hoi me ka oi e hoeueu ana i ka ua i haule mai. Aka, ma keia a me kela mea ae la, ua kaua wale no oia ma kahi o ka hana ana a ke kanaka i waiho aku i kona kino me ia mea. Alaila, mailoko mai o ka manoanoa o na ao mau i poha mai ai ka la me ka hooauhee aku i na mahu huihui mai ke ao uli aku, a hoolele mai la i kona mau kukuna mehana maluna o ke poo o keia kaahele ana i hooauhee na makani ino. Ua kau mai ka nawaliwali me ka wela i ke kanaka, a ua hoolei aku oia i kona aahu, no ka hiki ole ke hoomanawanui no kamanawa li=oihi, a ua holo aku malalo o ka malumalu o na laau e pee ai.
Pela no ka poe ikaika a me ka poe hihiu aole e hiki ke hana aku, aka, me ka hooluolu a me ka hoomaliemalie wale no e hooko ai oukou i na hana pono.
HOOULU LAHUI.
O ke poo e kau ae la maluna, ua niniia iho nei e ke poi rama, "pio ka oe ahi, pau ka oe hana."
No ka mea o na kolamu o na nupepa ke waiho hakahaka nei aole wahi hoolaha e pili ana i na Ahahui Hooulu Lahui. Eia ka mea e ike ia nei he mau kauoha na Palaunu i na apana, e kauoha mai lakou i rama iaia a e hoounaia aku me ka eleu loa, a ina o ke pani keia o kela mau huaolelo maluna, alaila, e ulu ana a lala kukui kakou.
J.N.
Oiai ua kaawale aku ke Kiaaina o Oahu nei no Maui, ua hookohu iho oia ia Hon. A.S. Cleghorn i Hope Kiaaina no Oahu nei.