Ka Nupepa Kuokoa, Volume XXII, Number 1, 6 January 1883 — UA HALA. [ARTICLE]

UA HALA.

Iloko o na la hope o ka makahiki i pau iho nei, i laweia aku ai, mai waena aku o ko kakou nei noho ana, he elua mau kamaaina i ike nui ia a i aloha nui ia no hoi e na mea a pau, O William Mahuia Austin ma Kapalama, i ka la 22 o ka mahina i pau iho nei; a o Mrs Peke Robinson, ma ka home o kekahi o kana mau kaikamahine, ma Pawaa i ka la 30 iho nei. He poino ko Mahuia i ka haule ana i ka lio, he ulia e like me ko Kapena Hope iho nei, ma ke alanui Papu, iloko o na mahina hope o ka makahiki i hala, a e like no hoi me ko Kale Dilinahama, iloko no oia makahiki hookahi. He kanaka opio loa o Mahuia; a ua ike ia kona ano mau, he oluolu, he aloha ina mea a pau. Ua waiho mai oia he wahine a he kaikamahine, a me na kini makamaka he lehulehu wale. He kumu alakai kupono oia no na hoa opio o ka aina e noho nei O Peke hoi, ka wahine a Kimo Pakaka, kekahi o na haole kamaaina kahiko o Honolulu i make he mau makahiki i kaa hope ae nei, he wahine maikai a he makuahine no kekahi ohana keiki nui e noho nei. Ua piha pono kona mau makahiki he kanaono a keu. He wahine ia i ikeia no na makahiki loihi wale, he makaukau ma na hana e pono ai ka lahui. O kona ohana keiki lehulehu i ulu ae nei a kanaka makua, a he meh maikai hoi iwaena o kakou ka hoike kupono nona. Pomaikai ka aina ke mahuahua na kanaka opio e like me Mahuia, a me na makuahine e like me Peke Robinson. Me na pili i hoehaehaia na manao aloha walohia o keia pepa.