Ka Nupepa Kuokoa, Volume XXII, Number 13, 31 March 1883 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUHOU KULOKO.

 

            E nana ma ka aoao eha o ka pepa o @ la no ka Olelo Hooholo o ka Aha Keikie.

 

            E wehe ia ana he Aha Mele e ka Ahahui Opiopio o Kaumakapili, i ka @ elua o Aperila e hiki mai ana.

 

            Ua ukali pu aku nei ke Kuhina Ka@aina i ka Moiwahine Kapiolani ma @ana huakai i Hawaii.

 

            Maluna o ka mokuahi Likelike i ka @lua nei i kau aku ai ka Moiwahine Kapiolani no Hawaii.

 

            I ke awakea o ka Poaha nei i ku mai @e mokuahi Pake me na heluna Pake 6475 no ko kakou mau mahiko.

 

            E ikeia no ke kii o ka mokuahi Ser@a a makou i hoolaha aku ai i kela @au pule aku nei ma ka halekuai buke Lopikana.

 

            Ua paa mai nei ke Ala Huki Moku Li Ma o Hilo, Hawaii, a aia iluna o @a ka mokuahi Li kahi  i kau ai no ka hoomaemae ana.

 

            Ke hooomakaia nei ka hana ana o ka @aku o lalo loa, o ka hale uinihapa @ o Kimo Kamapela ma na kihi ona @anui Papu me Kalepa.

 

            Ua hookohuia o W. O. Kamika i la@ no ka Papa Kahu o ke kula Nui o @anahou, ma kahi o Mika Holo opio i waiho aku.

 

            Eia ma na poai o ke kulanakauhale @ makai kiu mai Kaleponi mai, i holo mai nei ia nei e huli i kekahi lawehala p@pehi kanaka o ia wahi, a i manao wa@a eia oia ianei kahi i pee ai.

 

            Ke laha nui nei kekahi ano mai mawaena o na lio o ke kulanakauhale nei a no ia kumu, ua nui na lio maikai a minamina nuiia e ko lakou mau Ona pakahi. i make ma o keia mai.

 

            O Davida Flitner kekahi o na haole kamaaina o keia kulanakauhale, a i maa mau ia  ma kana hana uwati, ua @oohia ia oia i kekahi mai pupule, a ua laweia aku oia i ka Halepupule.

 

            O ka moku birigi Hazard, ua hoolimalimaia iho nei e ka hui mahiko a hoolako limahana, a e holo aku ana oia no na Mokupuni liilii o ka hema aku nei no ka huli mau limapaahana hou.

 

            O ka hale pahupahu a ai haukalima o Kamuela Nolena ma ke alanui Hotele mamua iho nei, ua lilo ma ke kuaiia ana i na Hoahanau Haka, a ke hoomaemaeia nei ua hale la no kona lilo ae i hale paina ma keia mua iho.

           

            No ka hohonu loa o ka mokuahi Tokio, a ku mai iloko o keia mau la pokole, aole oia e komo loa mai ana iloko nei o ke awa, aka, e ku ana no oia iwaho, pela ka hoikeia.

 

            O ka moku Kalepa liu Herman i komo mai ai ma ko kakou awa nei iloko o ka mahina o Ianuari, no ka manao e hana hou i kona wahi liu, ua kuuaiia iho nei oia ma ke Kudala a ua lilo ia Kimo Kamapela no na dala he 3,700.

 

            Ua hoomaha iho nei ke kula nui o Punahou no elua pule, a i ka la 13 o keia mahina ae oia ka Poalima e hoomaha ai na kula Apana Aupuni a pau. E nana i ka hoolaha a ka lunakula ma ke kolamu ma ke Kauoha.

 

            I ke ahiahi o ka Poalua nei ka make ana o Jason Perry Esq. kekahi o na kupa kamaaina o keia kulanakauhale, a Kanikela hoi o ke aupuni o Potugala, a ma ia kulana oia i noho ai a hiki wale i ke kikoo ana mai o na lima menemene ole o ka make.

 

            He 276 laikini kuleana hookele kaa hoolimalima ka i haawiia aku i na kalaiwa kaa, a mai loko ae o keia huina, ua haawiia aku i na kalaiwa kaa Hawaii, 140, 86 i na haole, a he 45 i na kalaiwa kaa Pake.

           

Ua lohe mai makou e hookuuia ana o Kauka Makipine e holo aku i na Aina e no ka hooluolu ana i kona kino, no kekahi mau mahina, a ua lohe pu mai no hoi makou, e hoonohoia ana ke Kauka Palani ma kona makalua, oiai oia e kaawale aku ana.

 

            I ke kakahiaka o ka Poaha ua hanee iho la na papa kua o ka uwapo ma ke alo ponoi iho o ka hale dute kahiko. He ahua iliili nui ka i hoahuia maluna o ua uwapo la a no kona kaumaha i hoohanee i ua uwapo la. He popopo no paha ko ka uwapo ke kumu o ka hanee ana.

 

            Aia ma ka aoao eha o ka pepa o keia la, e puka aku nei na leta a na makamaka, i hoopokoleia a i hooponopono hou ia e makou, a ma ia aoao e ike pu no hoi ko makou mau makamaka i ko makou manao no na leta a na makamaka e waiho nei ma ko makou pakaukau.

 

            Ma ka auina la o ka Poaha nei, ma ka uapo makai iho o ka hale hana o Kuke ma, he mau puaa make ekolu e waiho ana i ka la, no luna mai o ka moku a make kiola ia. A ma ia auina la no, kii aku la ekolu kanaka i keia mau puaa make a lawe i mea ai na lakou. Ua mamao aku hoi ke au o ka naaupo ia kakou, eia no ka newa nei, pau ole ka pouli ou e Hawaii. E pau kela hana ma keia mua aku - He mau Waawaa-iki naaupo oiaio keia.

 

            I ka auina la o keia la e weheia ai na ipuka o ka hale o ka poe ilihune ma Makiki, i ka poe a pau e ake ana e komo e makaikai ia loko, eia he wa kupono no ko makou mau makamaka e hele a e makaikai i keia hale nani. Malaila ana ka puali puhi ohe, a e hoholaia ana he wahi papaaina hooluana.

 

            O Mika Ioane Halliday, he haloe malama hale pahupahu ma ka Apana o Honokaa, Hamakua, Hawaii, ua hopuia mai nei oia no ke kuai waiona i kanaka me ka laikini ole, a ua hoomoeia kona hookolokolo ana a i ke kau hookolokolo kaapuni ma Hilo.

 

            I keia pule ae e hoopuka aku ana makou i ka moolelo hou o ka Towera o Ladana, i kulike ai me ka makou i hoolaha mua aku ai ma ka epa o ka la 17 o keia mahina, a ma ia pule aku paha e hoopukaia aku ai ka lua o ka moolelo i hoolaha mua loa ia ai.

 

            Ua hemo mai kekahi o na pupule o ka Halepupule i ke kakahiaka o ka Pookolu iho nei, a e paa ana oia me kekahi koi ma kona lima, ua ikeia oia ma ka "huina a Kale" e na kanaka a ua hooheiia oia i ke kaula a paa a ua hoihoi hou ia, e noke ana oia i ke alualu i na kanaka e oki i ke koi.

 

            O Lee Chat, kekahi o na Pake pilikoko o C. Afona, a he kupakako kahiko no kona halekuai, ua holo mahuka iho nei oia me ka lawe pu ana he heluna dala nui a uua nalowale oia. Ua haalele iho nei oia mahope nei he heluna nui o ka poe a na i aie aku ai e noho poino ana maanei.

 

            Ua hoao ka moku Kuna Sigela e hoolele i kona mau ukana lanahu ma ke awa o Huelo, i Maui, a aole he hiki no ka nui loa o ka ino o ke awa, a ua hoihoi okoa mai nei oia ia mau ukana lanahu ianei. E hoomanaoia no hoi ma keia awa hookahi kahi i ili ai ka moku Kuna Pirina.

           

            Ke hoopololei aku nei makou i kekahi mau manao komo hewa, i komo a i puka i ke akea ma ka moolelo hoike a ka makua Laiana o ka la 24, ma kahi e olelo ana i ka makahiki 73 "ka make ana o kuu keiki ma Amerika," o ka pololei malaila, ma ia makahiki ka make ana o Keiki, kekahi o na kumu ao i holo pu mai me Kakina ma. A ma ka makou hunahuna nuhou o kela pule aku nei e olelo ana, o ka mokuna olelo hooholo o ka Aha Kiekie e pili ana no ka hoopiikoikuleana aina o ka Moiwahi Ema, ke puka aku ana i keia pule, aole, aole oia ka pololei, aka, o ka lua o na na olelo hooholo a ka Aha Kiekie e pili ana no na waiwai o Moehonoua. ua kaa keia hemahema ma ko makou aoao, aka, ke hoopolelei hou aku nei makou i maikai ai a i pololei hoi.

 

            Ke i mai nei ka Elele o keia pule maloko o kona manao pepa mua, "he oiaio na olelo a ke KUOKOA, a aole hiki ke hoole ia," ma kana kamailio ana no ka oluolu o ka lahui. Aka, wahi a ua Elele nei, "eia ka hewa o ke KUOKOA, aole oia i hoike ae i na hana ino a me na hana hoala haunaele a ka poe aloha ole ia Hawaii." Kuhihewa loa ka Elele, ua hoike pinepine makou i na hana kupono ole a ka poe aloha ole, a no ia kumu i ili mai ai na olelo hoino a ka Elele maluna o makou. A e hiki no hoi ia makou ke pane hou, mamuli o keia koi ana a ka Elele, o ka mea i kaulana mua ma na aina e a hiki wale i ko kakou nei aina no ka apiki, a i ike maopopoia no hoi, ua awa kana mau hana, aole oia he hookele kupono no ko kakou aina e pono ai.

 

            O na Baibala hou, ua hiki mai nei, a eia no ma ke Keena Buke o ka Papa Hawaii, ma ka Hale Luina, ma Ewa ae o ka Hale Leta Aupuni. Elua ano o na Baibala i loaa mai nei. O na Baibala elua dala pakahi, a o na Baibala Luakini, nani ulaula kaekae gula, he umikumalua dala pakahi ke kumukuai. Ua loaa mai no hoi na Kauoha Hou liilii, he kanakolukumamalima keneta pakahi. Aole i hiki mai na Kauoha hou Halelu. O na Kauoha Hou hapahaole ua hiki mai, he ekolu hapaha ke kumukuai. Nolaila, o ka poe makmake i kekahi o keia mau buke, e loaa no ke kii mai, a kauoha mai paha. O na "Gospel Songs" me na leo mele ma ka olelo haole, ua pau iho nei, a e kauoha hou ia ana. A. O. POLEPE.

K. I P. H.

 

            Makehewa ka noho Peresidena ana o Kipikona no ka Papa Ola, oiai ke hookaawale nei o Kipikona i ka poe i loaa i ka mai Pake, eia nae ma kona hale ka mai Pake ka oi aku i ko kela poe ana e hookaawale nei; o ka mai o kela poe, maluna o lakou wale iho no, o ka Kipikona mai hoi e hoolaha nei, ua piha ka aina a hu mawaho, ku ka maea o ke ino o ka ua mea o ke kalohe; hemanao ko'u i na he poo e ae ko ka Papa Ola, i na la ua kiloi ia keia mea ino wale. O keia mai ino i laha i ko Kipikona hale, ua omoomo aku nei ka poe bebe o kona halepai i ka wai awa o ka naaupo, a ua maona, eia mai ke luai aku nei i ka hoopailua i ka naaupo; nawai no i i mai ke kai paakai e, o ko oukou wai e inu ia, ua ike no oukou ua liu ka maka o ka poe mua ia kai paakai a Kipikona i kapi ai, pipili aku no, e laa ka hoka la, aohe e hiki ke pale mai i ko'u manao. J.N.

 

            No ka hiki ole i na noonoo ona o ka hapa ona o ka Elele ke pane pololei mai ma ke kalana naauao i ko makou mau manao o kela pule aku nei, nolaila ua puulu ae nei oia i ko makou mau manao a i mai nei, o ka manao mua he mea a pela aku a hiki i na manao he umi a oi o makou, e like me kana o ka helu lalau ana, a i iho la ma ka hapa hope o kona manao, he opala wale ka ka nui o ka makou. No ka hiki ole i ka luna hooponopono bebe hawawa o ka Elele ke pane mai i ka makou ma ke ano naauao, a ua ike no oia, aole he wahi uiuiki iki kahi e hiki ai iaia ke pane mai, nolaila, hoolalau wale ae nei no kana pane ana, a i mai nei he opala, he mea, he olo, a pela aku. He hoike maopopo keia e hooia mai ana, aole i lihi launa kona luna hooponopono no iwaena o na poai o na luna hooponopono naauao, a iwaena hoi o na luna hooponopono kalai naauao.

 

            Ua i mai nei o Elele, no ka hele ana aku o kekahi mau mea a ninau i ka mea i kapaia he Poropeka "akamai hana hoomakeaka," malia paha i hele aku ua mea la e nana pono i ke ano o ua wahi Poropeka la-he kanaka nui a momona paha, loihi pilalahi paha, poupou a peke paha, heaha la kona ano, a i ko lakou ike pono ana i kona ano a me kona kulana, oiaia oia e hana ana malalo o kekahi mea ma ka hana he iniki hua kepau, i iho la paha laua iloko iho no o laua, ka! ina paha he Poropeka io keia mea a ka Elele e nokenoke nei, heaha la hoi ka mea i loaa ole ai kana hana kuokoa nona ponoi iho malalo o kana mau hookele "akamai hana hoomakeaka?" Heaha hoi! Ka ka Elele no ia e noke mau mai nei he Poropeka, he peni hookahi, he aloha lahui, a pela aku, aole nae he wahi mea a aponoia o kana mau kamailio ana e ka lehulehu.

 

            Ke i mai nei ka hapa ona o kahi Elele no kona helu ana i ka nui o na manawa i hoopukaia ai ka inoa o ka pepa ana e noho hapa ona nei, e makou a me ka Pae Aina, a ua ike oia ua piha ke kanakolu a oi manawa. O ka nupepa e hoolaha mau ia ana kona inoa e kekahi mau nupepa e ae ma ke ano pane a hoopololei ana paha i kana mau kalai ana, mai ka hoopunipuni, wahakole, kuamuamu, a pela aku, a i ka pololei, hoike me ka oiaio, kalai ma ke kulana naauao; he hoike maopopo loa ia e hoike mai ana imua o ka lehulehu, he nupepa ia e hoao ana e hoolaha i na manao hoopunipuni iwaena o ka lahui, a he nupepa hoi e hoao ana e ao hewa aku i ka lehulehu me ka hoouhiuhi ana i ke kaona oiaio o na kalai ana, a o ke kaona oiaio o ia mau kalai ana, ua ike ia e kekahi mau nupepa e ae, a nolaila ko lakou pane ana a me ka hoolaha ana i ka inoa o ua pepa la. He makehewa kau kamailio olalau ana e kahi hapa ona o ka nupepa Elele, o hoi no a ka Ona nui, noke iho no i ka ona.

 

            O kuu pokii aloha ua hala-Ma ka la 15 o Maraki, 1883, ma ka Panalaau o Kalaupapa, Molokai, ua haalele mai la i keia ola ana kuu pokii aloha oia o John Ailama Robinson Kekhulilani. Ua hoomailo loihiia kona kino e ka mai lepera no 12 makahiki i hala. Ua waiho mai la oia mahope nei he wahine me na keiki eha, a me ke kaikuaana. Ua hanauia oia ma Waioli, Kauai, na Mr. R. Robinson me Mrs. Keliikanakaole ma ka la 28 o Feberuari, 1849, nolaila, he 34 makahiki me 15 la kona ola ana ma keia ao mauleule, a hoi aku la i ka aoao mau o ke kanaka. Ua hoonaauao ia oia ma na kula apana a me ke kula hanai o Waioli i Kauai, ua puka mai oia mai laila mai a ua lawelawe i na hana e pono ai  ka noho ana a hiki i kona hoohuiia ana ma ka berita maemae o ka mare me Miss Kaono o Anahola, Kauai, a na laua mai he eha mau keiki e ola nei.

D. I., ROBINSON KALAKUPUAIHAWAII.

Niupaipai, Maemae.

 

HE PANAI.

            E KA NUPEPA KUOKOA. Aloha oe:- Ma kela pule aku nei i ike iho ai au i na manao wainohia a na makamaka o ka aina e pili ana no'u, no ka mea a'u i hana ai.

            He oiaio, aole au i moeuhane mua iloko o kou mau la e unuhi ana i ka moolelo o Onila Maka, e ili mai ana maluna o'u na papahi lei a ka mahalo mai kou mau makamaka mai o ke one oiwi i aloha nui ia. Aka, ia'u nae i ike ai i keia mau leta, ma na kolamu o kou kino ahonui, ua lawe mai au i keia wa i manawa no'u e panai aku ai imua ona makamaka i ko'u hauoli no ko lakou mau manao mahalo, a e hookipa mai hoi ma na keena o ko'u puuwai i na leo welina kiekie o o'u mau kini; a e lilo no hoi ia mau leta i mau kia hoomanao na ko'u naau e hiipoi mau ai iloko o ko'u mau la.

            Nolaila, e ka mea i kapa iaia iho. "Mea Lawe N. KUOKOA," a me na "Keiki paahana o ka hale hana hao o Honolulu i kakauia e ko oukou kakauolelo H. L. Iakopa," a me W. S. Waimalu jr. o Waianae, Oahu, eia mai ka mokihana a ka iini o ko oukou makamaka malihini o ka pupuu hookahi la he ALOHA, ke lawe ia aku la e ke KILOHANA, ka elele mama o ka Paeaina Hawaii nei.

            I mea hoi e kaunu mau ia ai na hoohialaai ana a ko oukou mau manao me ko kakou Kilohana ahonui, ke panai hou aku nei au i ka lua o ka moolelo Makai Kiu, elike me ka iini o ko oukou mau puuwai; a na kana mau hana akamai, maalea a me ka hoomanawanui, e hoike mai imua o oukou i kona kalikali aku mahope o Onila Maka.

            Owan no o ko oukou makamaka o ke koko hookahi.

SAM. K. KAEO.

            Kamoiliili, Mar, 29, 1883.

 

MAKE I ALOHA IA.

 

            Ma ka la 13 o keia mahina, ua make ko'u makuahine ma Kahuku, Koolauloa, Oahu. He mai hikiwawe kona no na la pokole, aole au i ike i kona manawa hope a ua hala e aku kona hanu hope loa.

            O ka nui o kona mau makahiki he 52, a ke noho u nei au nona, a me ka ohana no a pau. Ua haalele mai ia makou ka ohana e noho walohia aku me keia aoao. "Nana no i haawi mai a Nana no i lawe aku, E hoonaniia Kona inoa."   W. S. LOKAI.

 

HE HANA HOOPUNIPUNI.

 

            He hana ano hoopunipuni ka'u e ike nei ma Kapuukolo i keia mau la, a o kekahi mau hoa ua puni no lakou i keia ano hana. O kekahi haumana o ke kula kaula ke alakaia ua haohao au i kona lawelawe ana i keia hana, ua hoakoakoa oia i kekahi poe ma kahi hale, a malaila e hana ai ma ke ano lapaau, e wehe ana i ka baibala me ka hoakaka ana i ka pilikia a me ka pomaikai, a ua wehewehe oia i na moeuhane me ka hoike i ke ano, eia ka make la ua hewa oe, e pono oe e mihi; a me kona kuhikuhi aku i ke ano o ka pule ana. A ua lohe au, o keia ano hana no ka mea i hoopai ia ai o Halawale no ka hoopunipuni me ka lapaau laikini ole.

            Eia kekahi mea apiki loa, ua kuhi aku oia i kekahi makamaka i hilinaiia he anaana. Pehea la keia hana a keia haumana o ke kula kahunapule, ua hoapono no anei na kumu? Pehea la kou manao e ke KUOKOA? KAPUUKOLO.

 

OWAI O PAOPAO-APA?

 

Ua walaau hou mai nei kekahi mea ma ka Elele e pili ana no ka "Moa kani hewa," i kakau inoa ia e Paopao, nona ka hui o Elikai; me ia no kekahi lala oia hui, oia ke kahuna nuui o Kapuukolo nana e papa nei ka hele ana o na kanaka ia Kauka Pika, me kona hana i kana mau hana hoopunipuni.

            Ua hoike mai nei i kekahi mau ano paio i ko laua hoa kula S. L. D. me ka hoike ana he paio kela mau hana i hoikeia ma ka Elele, ina pela ea, ua paio o Apa i ke Akua, no ka mea, ua hawahawa ka lima ona i ka punana a kela mau makamaka e pili la i ke kula kahunapule, a ha'u ai ka waha me ka olelo ana imua o na hoa haumana, "Ua hewa au, Ua hea au," a noho he mau la loihi iloko o ke keena me he alopeka la iloko o kona lua; a ina paha he poe naau aloha ole kela poe nona ka waiwai, ina ua palakia. Eha oe la, ke hoka iho la.

            O ke kahuna nei hoi o Kapuukolo, ua paio no oia i ke Akua no ka mea, ua kuhi aku oia i kekahi kanaka ano hoopono o ka ekalesia o Kaumakapili he anaana.

            Hoao ae nei olua e hookahuuli no Maemae olua, e ka hoopunipuni, aole olua e nalo iki, ua ahu wale.

            Eia mai keia kalo paa. E aha ana olua i kela po hula Hawaii a me ka hoa kukui maloko o ka pa alii? Heaha kela mau mea a olua i manao ai e hana, me ka manao ana e nalo? aole e hiki ke nalo ua ike ia a ua maopopo he hookamani io olua. He oiaio no ka wanana a kekahi makua o ka pono, "Aole olua i kupono no ka oihana a olua e liki nei," eha olua la.

            Ua kapa aku nei olua i ko olua hoa kula he "hoopunipuni," he "uhane aea haukae," ea poino olua i ka paio i ke Akua; no ka mea, ua i mai nei olua he paio ia i ke Akua. Poino olua la e na mea i piha i ka hoopunipuni.

            Eia kekahi, ua hele aku kekahi o olua a i kekahi haole kuai buke a kauoha aku la e hoouna i mau buke himeni haole i Amerika, me ka hai aku no ke kula kahunapule au, a ua hilinai ka haole, ua hiki mai ka buke; aole nae hoi i maalo hou aku malaila, a ua olelo ka haole i ka hoopunipuni a ua poho ia ma keia hana hoopunipuni a keia haumana. O S. L. D. anei a olua e makaewaewa nei keia? Aole.

            Hele hou aku la no kahi o olua a i kekahi makamaka, a hoao aku la e hana hoopunipuni ma ka hoololi ana i ka Olelo a ke Akua i kahua no kana hana. E ke kolohe, o oe ka i oi loa o ka hoopunipuni a me ka wahahee; a i hoike no ka oiaio o keia, eia ke ike mau ia nei ma kou ipuka ka poe au i apa ai, me ka lawe ana mai ina hua i loaa ia lakou me ka hou o ko lakou lae, i mea nau e hoolawa ai i kou makemake kalohe. E hapala wale no olua i ko olua makamaka aole e hiki, o olua no ke hoka.

I.

 

NA HOOLAHA.

 

CALIFORNIA.

FURNITURE CO.

 

O KEIA HUI A HALEKUAI O

Na Lako Hoonani o na Hale !

I ike mua ia iho nei ma kona kahua mua iho nei ma ke Alanui Papu, makai iho o ka Halekuai o na Mea Kani o Geo. F. Wells

Ua Hooneeia ai Nei a i na

Helu 56 me 58 Alanui Moiwahine.

He Hookahi Ipuka ka mamao mai ka Hale Mu,

 

A malaila e loaa ai na Lako Hale Emi Loa.

Eia iho ka inoa o Li mau Lako Hale:

Na Moe maikai loa, Noho o na ano a pau, Noho koki, Pakaukau, Noho huleilua,

A HE NUI AKU.

 

EIA PU NO HOI ME MAKOU,

Na Uluna,

Na Bela Moe,

Na Kihei Moe,

A me na Pale Uluna.

 

A oiai na makou iho no e hana keia mau mea maluna ae nolaila e kuaiia aku ana me ke

Kumukuai Haahaa Loa!

E P ADAMU, Agena

 

PAPA! PAPA!

AIA MA KAHI O

LEWERS & COOKE,

(O LUI MA)

ma ke kahua kahiko ma alanui Papu a me Moi.

E loaa ai na

PAPA NOU AIKI.

o kela a me keia ano.

 

Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papu Ku, A me na Papa Moe nui loa

Na Pili o na Hale o na Ano a Pau.

 

Na Pepa Hoonani, Na Pena o na Wai e pau, Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano Na Aila Hoomaloo, he lehulehu wale, Na Aila e ae o na ano a pau.

NA WAI VANIKI

A ME NA

WAI HOOHINUHINU NANI!

O NA ANO A PAU LOA.

NA BALAKI ANO NUI WALE.

A ke hai ia aku nei ka lono i na Makamaka a pau, ua makaukau keia mau Makamaka o oukou e hoolawa aku ma na mea a pau e pili ana ma ka laua oihana

NO KA

UKU HAAHAA LOA.

E like me ka mea e holo ana mawaena o LAUA a me ka MEA KUAI.

E Hele mai! E na Makamaka !!

A e lawa no hoi ko oukou makemake me ka oluolu a me ka maikai.

 

MAKANA LA KULAIA KUAI!

MA KA

HALEKUAI LOLE NUI O

HONOLULU NEI.

E makana waleia aku ana he mau kii pena i ka mea kuai mai a hiki aku i ka $1.00 a oi aku ka lilo i ka wa hookahi.

EWEHE MUAIA ANA IKEIA LA

MA KA HALEKUAI LOLE NUI

O

HONOLULU

He Kuai Manuahi Launa ole.

He Kuai Hoopoho a Hoopakika.

E hele nui mai e na makamaka.

E wae oukou e like me ko oukou e like me ko oukou makemae iho i na waiwai o kela a me keia ano he nui wale.

A. M. MELEKI.

HELU 104 ALANUI PAPU.

 

LOLE MAKEPONO

Ke Kuike e loaa no ia ma kahi o

Kakela me Kuke.

E laa na

AHINAHINA, KALAKOA, KEOKEO, LEPONALO. PENA, AILA, AILA HONUA, ANIANI.

NA MEA PIUULA,

Kopa, Aila Hoomaloo, Kui Kakia, Pakeke, Tabu Kaula, Noho Lio, Hulu Palahi, na Palumi, ahe agena no na mokupuni o Hawaii neino na Lainakini-nao

Lainakini Maoli, Ki-lika, Palule Kalakoa, Alapia, Kelepa, Na Lole kupono i ka Wawae, Palule Huluhulu, Na Lole Huluhulu, Na ka hoohelo ana, Li Lole no pini, Lihilihi, etc.

A ME NA

Mikini Humuhumu

MAKEPONO LOA.

A he mau

MEA AI KAHI:

KA PALAOOA, KOPAA

RAIKI, PIA, HOOHU

PAAKAI, HUAALA,

PIA KULINA, KOPE,

A HE

Laau Lapaau Kaulana Loa

A DR. JAYNE,

LAAU HOOMAEMAE KOKO

LAAU HOOPAU NAIO,

PENIKILA, HUAALE, LAAU KUNU,

Me na Laau Hamo, a Pela 'ku.

840 tf

 

NA HOOLAHA.

 

PAPA! PAPA!

NO

ALLEN & ROBINSON

 

Ua wehe ae no maua

PA KUAI PAPA.

MA

Ka Uwapo o Pakaka.

 

Na Papa Ulaula o na ano a pau,

Na Papa Paina o na ano a pau,

Na Pili Hale Ulaula,

Na Pili Hale Keokeo,

Na Pepa Molina,

Na Pepa Hoonani Hale.

Na Pena a me na Aila Pena!

Na kui o ea ano a pau.

Na Pani Puka a me

Na Pani Puka Aniani,

Na Pani Puka a me

Na Olepelepe.

 

NA LAKO KUKULU HALE

O NA ANO A PAU:

 

E kuaiia ma

KE KUMUKUAI HAAHAA LOA

O keia Makeke.

 

A. ROSA,

(AKONI.)

He Loio a he Kokua ma ke Kanawai.

A he Luna Hooiaio Palapala. Keena hana, aia ma ke Keena o ka Loio Kuhina.

1101 1yr.

 

HE NUI ANEI KOU MAKEMAKE I NA

Mikini Humuhumu Lole!

Ina pela, e kipa mai no ma ka Halekuai o

Kakela & Kuke!

A malaila oukou e ike ai a makaikai i na ano

Mekini a WHEELER a me WILSON

mai ke $40 a hiki i ke $50 ke kumukuai ka mea hookahi.

NA MIKINI A SINGER!

ma ke $50 pakahi me ke ano

MIKINI A WILCOX ME GIBBS

ma ke $30 a hiki i ke $60 ke kumukuai.

I mea e pau ai ko oukou kanalua e ua makamaka no ke kupono o keia mau Mekini, e naue mai no me ke kuihe ole, a e ike no oukou iho.

628 tf

 

S. AUKAI.

LOIO! LOIO!

Honolulu, Oct, 19, 1882.        1090 3ms

 

HALA TELA HOU!

KAUKAIWA

Helu 11, Alanui Nuuanu,

KOKOKE I KA UWAPO.

S. H@MEEKAPU.

Iune 11 1882.

1075tf

 

NU HOU! NU HOU!

 

Na Waiwai Hou Loa!

NA PAIKINI O KEIA AU.

 

E Loaa no ma ka ha Halekuai o

DILINGHAMA MA.

Ma Alanui Papu.

 

Oia na waiwai malalo iho nei:

Na Palau, Kaa Huilapalala, Kopala, Piki, Oo, Koi, Koilipi, Na Hamare Kamana o na ano a pau, Na mea Hana a na Kamana, Poe Hamo Puna, na Amara a me na mea hana o ka Poe Akeakamai a pau. Pena Aila, Vaniki a me na Palaki, Pauda, Poka a me na Kukaepele, Palaki Hamo Puna, Pulumi, Pakeke, Kapu Holoi Lole a me na Papa Holoi Lole, na Iputi, na Pa Palai, na Ma kau Lawaia, Na Aho Lawaia o n a ano a pau, na Kaula o na ano a pau, na Pahi, O, a me na Puna, a he nui aku no na mea i koe.

I KUPONO NO KA HOOHIWAHIWA ANA!

NA HALE

 

I hiki ole ia makou ke huai pau aku, aka, na oukou no e hele mai a e hoonuu iho. O keia maluna ae, e loaa no ma ka halekuai o

Dilinagama Ma,

1036-3m]Ma ka helu 37, Alanui Papu.

 

NA HOOLAHA.

 

SAML. K. KAEO.

LOIO! LOIO!!

E loaa no ia ma Honolulu.

            KEENA HANA - Ma ka hikina iho o ka Hale Baneko o Bihopa Ma.

1105 tyr.

 

W. L. HOLOKAHIKI.

He Loio a he Luna Hooiaio Palapala.

            Ua hiki no ia'u ke lawelawe i na Palapala pili Kanawai a me na hihia o kela a me keia ano imua o na Aha Hookolokolo a pau o keia Aupuni.     No. 5.

            Keena Wehekealaula Alanui Retera. 1101 tf

 

SAM. L. KAWELO.

LOIO! LOIO!!

            E noho mau ana ma ke kulanakauhale o Honolulu Oahu.      1104 ft

 

AUHEA O MAN OLA?

            O na Aahu Kakimia Huluhulu nani koiawe o Kane,

NA PAA PIHA, KUKA, PULIKI, LOLEWAWAE,

O KA PAKINI IWAIWA HOU LOA

NO

$6.00

WALE NO:

MA KA

HALEKUAI KAULANA O

CHAS. J. FISHEL,

Kihi o Alanui Papu me Hotele.

1106 tf.

 

UA MAKEMAKE IA

NA ILI BIPI,

NA KIWI BIPI,

NA IWI BIPI,

            E haawi ia no ke kumukuai kiekie o ko kakou makeke nei e

H. HACKFELD & CO.

Honolulu Mei 27, 1880.

IV 064

 

S. B. DOLE,

He Loio a he Luna Hooiaio Palapala.

 

E hiki no iaia ke lawelawe i na hihia o kela a me keia ano imua o na Ahahookolokolo a pau o keia aupuni

KEENA HANA-Ma Alanui Kaahumanu.

 

NA WAIWAI HOU LOA

O NA ANO A PAU.

 

E LOAA NO MA NA HALEKUAI O

WALAKAHAUKI MA!

MA ALANUI

Papu, Moi a me Moiwahine

OIA HOI:

            Na Noho Lio hou loa o na ano a pau, Na Palule Keokeo, Huluhulu, o na ano a pau, Na Pio Ahinahina Pelekane hou loa o na ano a pau. Na Pena Kukaepele.

            Na Kopa Bulu, Na Lole o na Wahine o na ano a pau. Na Pahu Aila Mahu maikai loa. Na Silika, Pahoehoe, o na ano a pau. Kihei o na ano a pau.

HAINAKA LAU NUNUI SILIKA O NA ANO A APU.

 

He nui aku no i koe, he piha pono na Koluma o ka pepa, laa e kuai pau ia aku nei.

 

Eia hou ae a hoea mai i keia mau la iho he Lako Waiwai hou loa o na ano a pau, a he lako hou loa i wae pono ia e J. T. WATERHOUSE, JR., ma Enelani, a he mau waiwai hoi i kupono loa no ko kakou mau kaiaulu. Nolaila, e eleu mai e na makamaka a me na hoa'loha e hoonuu i keia mau lako waiwai hou loa.      1076 3m