Ka Nupepa Kuokoa, Volume XXII, Number 16, 21 April 1883 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

KUOKOA ME KE AU OKOA.

(1 Huila)

No ka Makahiki $@.00

Eono Mahina 1.00

Dala Kuike ka Rula.

POAONO, APERILA, 21, 1883

Paiia e Thos. G. Thrum, ma ka halepai o ka nupepa Saturday "Press."

THE GOLDEN LAND.

Leo. Love. Buke hou. No. 65.

1

Kei ka aina Gula lai!

Aina lani ma o ae.

Kahi o na hale mau,

Kahi o ka Hoku Ao,

Ma ka aina Gula lai,

Aina lani ma o ae.

Cho.  Aina lai ------ma o ae-------

Aina lai -------aina lai--------

Aina lai------- ma o ae-------

Aina lani ma o ae.

2

Lohe ia ia aina lai,

Na Iesu la i hai mai.

Oia no ke ala e,

Oia hoi ke Alakai

I ka aina Gula lai,

Aina lani ma o ae.

Cho.  Aina lai &c.

3

Aina Gula maemae nei;

Aohe mea haumia e,

Hookamani, wahahee,

Aloha ole, kue e,

Ma ia aina Gula lai,

Aina lani ma o ae.

Cho. Aina lai, &c.

4

Nui na puali e,

Na puali mele lai,

Na puali anela,

Na haipule poe kupaa,

Ma ia aina gula lai,

Aina lani ma o ae.

Cho. Aina lai &c.

5

Ala, hooikaika e,

E na hoa mele nei,

I loaa ka makaukau

E hui pu a mele mau

Ma ia aina Gula lai,

Aina lani ma o ae.

Cho. Aina lai &c.  HAWAII.

 

HAAWINA KULA SABATI.

HELU 6.  SABATI, MEI 6.

KUMUHANA - Haiolelo Petero i ko na Aina e,

Pauku Baibala Oih. 10:30-44.

30 I aku la o Korenelio, Eha la mamua aku nei, e hookeai ana au, a hiki i keia hora; a i ka hora aiwa, pule iho la au ma ko'u hale, aia hoi, ku mai la kekahi kanaka imua o'u me ka aahu hinuhinu.

31 I mai la, e Korenelio, ua loheia kau pule, ua hoomanaoia no hoi kau mau hoomanawalea ana imua o ke Akua.

32 Nolaila e hoouna aku oe ma Iope, e kii ia Simona, i kapaia o Petero; ua hookipaia maloko o ka hale o Simona ka hanaili, aia ma ke kahakai; a hiki mai ia, nana no e olelo mai ia oe.

33 No ia mea, hoouna koke aku la au i ou la, a ua hana pono oe i kou hele ana mai.  Eia hoi makou a pau loa imua i ke alo o ke Akua e hoolohe i na mea a pau i kauohaia mai ai ia oe e ke Akua.

34 A oaka ae la ko Petero waha, i mai la, Ke ike nei au he oiaio no, aole ke Akua i manao mai i ko waho o ke kanaka:

35 Aka, ma na lahui a pau, ua oluolu ia i na mea i makau iaia, a me ka hana pono.

36 O ka olelo ana i hoouna mai ai i na mamo a Iseraela, e hai ana i maluhia ma o Iesu Kristo la: (oia no ka Haku no na mea a pau.)

37 Ua ike no oukou i ka olelo i kaulana ma Iudea a pau, ma Galilaia ka hoomaka ana, mahope iho o ka bapeti@o a Ioane i hai mai ai.

38 O Iesu no Nazareta, ua poni ke Akua iaia me ka Uhane Hemolele, a me ka mana; nana no i kaahele e hana maikai ana, a me ka hoola ana i na mea a pau i hooluhiia e ka diabolo; no ka mea, o ke Akua pu kekahi me ia.

39 He poe hoike makou i na mea a pau ana i han'i ma ka aina o na Iudaio, a me Ierusalema; na lakou no ia i pepehi, a kau aku hoi maluna o ka laau.

40 Hoala mai ke Akua iaia i ke kolu o ka la, a hoike mai no hoi iaia ma ke akea:

41 Aole nae i kanaka a pau loa, aka, i ka poe hoike a ke Akua i wae mua ai, ia makou no, i ka poe i ai pu a i inu pu me ia mahope o kona alahouana, mai ka make mai.

42 Nana no makou i kauoha iho, e ao aku i kanaka, a e hoike aku, oia ka mea i hooholo e ia e ke Akua, i lunakanawai, no ka poe ola, a me ka poe make.

43 Ua hoike maopopo mai ka poe kaula a pau nona, e loaa ke kala ana o ka hala ma kona inoa, i ka poe a pau i manaoio iaia.

44 I ka Petero hai ana mai i keia mau olelo, haule mai la ka Uhane Hemolele maluna o ka poe a pau i lohe ia olelo.

Pauku Gula. Oih. 10:45

Manao nui.  O ka poe imi io, e loaa mai no.

Na heluhelu la.  1. Oih. 10: 1-29.  2. Oih. 10: 30-48.  3. Oih. 11: 1-18.  4. Rom. 10: 1-15.  5. Ia. 2: 1-26.  6. Gal. 3: 1-29.  7. Ep. 2: 1-22.

Ka manawa. A.D. 40, 41 paha.

Kahi i hanaia'i.  Kaisareia, ma ka hale o Korenelio.

Mele.  "Hoku Ao Nani e." Hoku Ao Nani p. 39.

Pule i kau ka lama o ua Hoku nei ma na aina pule a pau.

 

KA WEHEWEHE ME KA NINAU ANA.

Waiho kakou ia Petero mahea?  Iaia ma Iope, ua kiiia oia e hele i Kaisareia.  Nana ma ka Palapala Aina.  Aia Iope ma ka hema, a o Kaisareia ma ka akau aku, he kulanakauhale no e pili ana i ke Kaiwaenahonua.  No Kanaana no.  Aka, ua lilo ia Roma.  Noho ko Roma poe malaila.  Ua kapaia kona inoa Kaisareia, mamuli o Auguseto Kaisareia, ka Empera o Roma.  He aina e keia.  He poe hoomanakii malaila, oia hoi ko Roma poe.  Aole Iesu i hele ilaila e ao ia poe.  Aole hoi i hele kana mau haumana ilaila e ao i ko na aina e.

He 10 makahiki i hala, aole i hele na haumana e ao i ko na aina e.  Ua hiki mai nae ka manawa e hoopauia ai ke kapu, a e wehe ia'i ka puka e komo ai ka malamalama euanelio ma na aina e.

He kanaka ma Kaisareia, o Korenelio kona inoa.  He lunahaneri no ka papa koa i kapaia ka Italia.  No Italia na koa.  He kanaka Pegana no.  Aka, he Pegana haipule keia, a makau i ke Akau, me ko kona hale, he manawalea, a pule mau no i ke Akua.  Aka, aole oia i ike i ke ala o ke ola ma o Iesu la.  E pule ana oia ma ka hora 9, oia hoi ka hora 3 ahiahi ia kakou.  Ma ia pule ana, ua loaa kekahi hihio, ua ao ia oia e kii aku ia Petero.  Aia a hele mai oia, nana i kuhikuhi i ka mea e ola'i.

I ole e kanalua Petero no ka hele ana i ka aina haumia, a i ke kanaka haumia, ua loaa ia ia ma kana pule ana ma ke awakea kekahi hihio.  Ma ia hihio, ua aoia oia, aole make e kapa ia he mea haumia ka mea a ke Akua i hoomaemae ai.  Nolaila, i ke kiiia 'na e hele i ka aina e, a i ke kanaka e, ku no kela a hele me ke kanalua ole.  He poe Iudaio Karistiano ka i hele pu.

P. - 29.  Ma ka p. 30 ka hoomaka ana o ka Haawina o keia la.

 

NA MAHELE.

I Na olelo hoakaka a Korenelio. P. 30-33.

Ua puka Petero i kahi o Korenelio.  Ua akoakoa no na kanaka malaila.  I ka ike ana o Korenelio ia Petero, moe oia imua ona, a mai hoomana iaia.  Papa aku nae Petero, me ka olelo ana, he kanaka wale no au.  Ua ike oukou, he mea kapu i ke kanaka Iudaio e nononoho pu me ke kanaka e.  Aka, ua ao mai ke Akua ia'u, aole e kapa i kekahi kanaka, he pono ole, a he haumia.  Ua hiki mai au maanei.  Nolaila ke ninau aku nei au, no ke aha la oukou i kii mai ai ia'u?

30 Ko Korenelio pane ana.  I na la ehia mamua aku?  E aha ana oia ma ka hora 9?  Heaha ka i ku imua ona?  Me ka aahu aha?

31 Pehea mai ua kanaka nei?  He anela ia mea.

32 Heaha ke kauoha a ua kanaka nei?  Aia mahea Petero?

33 Ua hana anei Korenelio pela?  A olelo oia ia Ptero pehea?  Ua pono oe, he hana maikai kau i kou hele ana mai.  Eia makou.  Ua makaukau e hoolohe i na mea a pau i kauohaia ia oe e ke Akua.

II. Ko Petero pane ana. P. 34-43.

34 Heaha ka Petero olelo mua?  Aole ke Akua e nana i ko waho, he Iudaio, he Helene, he kanaka e, he ili keokeo, he ili eleele, ili ulaula, he kino nui, he kino liilii, he Hawaii, he Pake, he Beritania.

35 Ma na lahui a pau, ua oluolu ke Akua ia wai?  Ae no ke Akua e lilo ia poe, i poe nona, i poe hooilina no ka waiwai o kona aupuni, ke hui pu nae ka manaoio ia Iesu.

36 Heaha ka olelo i hoounaia i na mano a Iseraela?  Ka maluhia ma o wai la?  Oia o wai?  Iesu, aole oia he kanaka wale no, Ka Haku ia o na mea apau.  Ma o na la e loaa'i ka maluhia o ke kino, o ka uahe, o ka aina, o ka lani.

37 Heaha ka lakou i ike ai?  Ua lohe lakou no na mea e pili ana ia Iesu mahope o ka Ioane bapetizo ana.  Ua lohe pohihhi, aole i hoomaopono lea.  No Kaisareia Pilato ke Kiaaina.  Na Pilato i hookuu ia Iesu e make ma ke kea.  Nana no hoi i kakau maluna o ko Iesu kea ma na olelo ekolu Hebera, Helene, Latina, o Iesu no Nazareta keia, ke Lii o ka poe Iudaio.

38 Heaha na hana a Iesu no Nazareta i hana'i ma kona kaapuni mau ana?  Aole lakou i nele i ka lohe ana ia mau hana mana a lokomaikai.  Owai pu me ia ma ia mau hana?

39 Owai na hoike no keia mau hana?  Nawai hoi i pepehi a kau ia Iesu ma ka laau?

40 Nawai ia i hoala?  Ma ka la ehia?  A hoikeia oia mahea?

41 Hoike Iesu iaia iho ia wai?  i ka poe i aha pu me ia?  Mahope o ke aha?  Ehia makahiki mamua aku keia ike ana o Petero ma?

42 Heaha ka Iesu kauohaia Petero?  E ao aku ia wai?  Ua hooholo e ia e ke Akua e lilo Iesu i aha?  Nowai?  I ka manawa hea ia hooholo e ana?  Io. 5:22, 27.  Dan. 7 13, 14.  Hal.  2: 6.  Is. 9: 6, 7.

43 Heaha ka na kaula i hoike ai no Iesu?  Is. 53: 11.  Ier. 31: 34.  Dan. 9: 24. Mil. 7:18. Mal. 4:2.

Nui a loihi ka wehewehe ana o Petero i ka ke Akua olelo ia Korenelio ma, me ka paipai ana, e hoolohe, a e malama i loaa ke ola.

III Ka hope o ka Petero haiolelo ana.

P. 44 Aole pau ka Petero haiolelo ana a aha ka Uhane Hemolele?  Me ia ma ka la Penetekota.  Ka mana keia e kamailio ai lakou ma na olelo e.  Ua ano hou lakou ma ka naau, ma ka olelo, ma ka hana.  Haohao na hoa i hele pu me Petero.  Hauoli hoi no ka loaa like ana o na haawina o ka Uhane Hemolele i na Iudaio a i ko na aina e.  A ua bapetizo koke ia lakou.

 

KA HOOPILI ANA.

1 Oi ka pono o kekahi poe Pegana i ko Hawaiipoe.  He Pegana Korenelio.  Pule mau nae ia Iehova.  Pule no ma kona ohana.  Aole anei he nui na poo ohana Hawaii i pule ole ma kahi mehameha , a ma ka ohana hoi?

E makau o komo e ko na aina e i ke aupuni o ke Akua mamua o kekahi poe kanaka Hawaii.

2 Hemahema ko na aina e ke loaa ole ka olelo a Iesu.  E kokua nui ko Hawaii poe i ka hoouna aku ia olelo ia lakou.

3 Pohihihi anei ka mea e ola'i?  E kii i ka poe ike.  E hele hoi i o lakou la a e ninau aku.  Naauao loa ka na kanaka Hawaii.  Ua akaka lea ka, na mea e ola'i.  Paulele lakou i ko lakou naauao.  Aole hele i ka hale o na kahu ekalesia, e ninau i ke ala o ke ola!  E makau o lilo ko oukou naauao iho i mea e make ai.

4 Auhea na koa, na kanaka Hawaii?  E hoohalike me Korenelio ka lunakoa, me ona mau koa.

5 Auhea oukou ka poe lohe i ka ke Akua olelo ma na halawai, a ma na kula Sabati?  E hoolohe pono, e weliweli, e mihi e huli koke, manaoio koke ia Iesu, a e bapetizo kokeia iloko o kona inoa.

Mele.  "Lawe pio i ka Papu."  Hoku Ao Nani.  p. 207.

Pule i hoopaaia na papu o Satana a pau.

Haawina no Mei 13, Oih. 11:79-30

 

LETA MAI KA PAEAINA NUUHIWA.

O keia mau manao malalo iho, ua laweia mai e makou ma na mea ano nui mai ka leta a Rev. J. Kekela o Puamau Paeaina o Nuuhiwa, i ka Rev. C.M. Hyde o keia kulanakauhale, a penei kana:

"C.M. Hyde,

"Aloha nui oe a me kou ohana.

"Ua hauoli nui makou i ka ike ana ma kau leta i na mea a pau i hanaia ma ka paeaina Hawaii, i ka hoohuli nuiia o kekahi poe opiopio e lilo i mau koa no ka Haku, a me kau hoike no hoi no ka hoolaaia ana o kekahi o kau poe haumana o kau kula; he ola a he nani ia no ka paeaina Hawaii.  A he kaumaha no hoi makou i ko ke alii ka Moi hoonoa ana i ka rama iwaena o kona lahui kanaka.  Ke kiola ala ke alii iaia iho me kona lahui iloko o ka make mau loa.  E aho no o Kamehameha I, ka mea i ao oleia i ka olelo a ke Akua mamua o keia Moi, ka mea i hoonaauao ponoia - aole nae he malama pono; aloha ino ka poe make iloko o ka hoomaloka.

"Ma ko makou Ahaolelo i malamaia ma Uapou ma ka mahina o Mei o kela makahiki aku nei, ua loaa mai ia makou he leta mai na misionari haole pope o Tahiti, e noi mai ana, ina he mea pono i na ekalesia o ka paeaina Nuuhiwa ke hoohui pu ia me na ekalesia o Tahiti a lilo i hookahi.  Ua paneia aku e ko makou komite, aole he maopopo ka hoohui aku me lakou.  Ina ua ae ka Papa Hawaii na ko Tahiti poe makou e malama, alaila, ua maopopo e haalele ana lakou ia makou.

"Ma ka mahina o Novemaba o kela makahiki, ua hele mai o Kauwealoha e kokua ia makou i ke kukulu ana i halepule no makou; he 40 kapuai ka loa o keia luakini, a he 20 kapuai ka laula, a he 12 kapuai ke kiekie o na pou; ua hoopuniia na aoao me na papa a ua hahau papa ia ka papahele - aole i pau pono na hemahema.

"Ke hooholumua nei na luna Farani i na hana maanei; ke hanaia nei na alanui, ke kanuia nei na pulupulu, a ke makaala loa ia nei ka hoouna ana o na makua i na keiki ma na kula; o ka poe hana ole ma ke kanu pulupulu, e hoopaahao a hoohana ooleaia lakou, a peia no me na makua e hoouna ole ana i na keiki i ke kula, e hoopaahaoia no me ke keiki pu.

"Ke ola maikai nei ka ohana misionari a pau.  Ua make maule ka wahine a Z. Hapuku no hapalua hora, ua ola no nae oia."

 

KA TALMUD.

Heaha ke ano o keia hua haole, "Talmud"?  Eia ke ano:  He Buke Kanawai Iudaio keia.

Ma ka manao o na Iudaio, ua haawi mai ke Akua ia Mose ma ka mauna o Sinai i na kanawa i pono ke kakauia a me na kanawai i pono ole ke kakauia, oia hoi na kanawai e hai waha wale ia ana, e hoopaanaau ia e ka poe lohe mua, a na lakou e hai waha aku i na keiki, e hoopaanaau na keiki a hai waha aku i ka lakou mau keiki, e like me na Kuauhau a me na kaao Hawaii.

Ua haawi aku o Mose, wahi a na Iudaio, i keia mau kanawai waha ia Iosua, a haawi aku o Iosua ia mau kanawai i na Iunakahiko he 70, a na lakou i hai aku ia i na kaula, a na na kaula i hai aku i ka Sunegoga Nui.  Ka lala hope o keia Sunegoga, oia o Simona ka Roma, a mai iaia aku a i na Rabini.

No ka mahuahua ana o ua mau kanawai waha la, me ka wehewehe ana i ke ano, puka mai ka makau.  E nalowale auanei paha ke waiho ia pela me ka paanaau wale no.  Nolaila, ua manao kekahi poe Iudaio, e pono ke pai ia ua mau kanawai nei.

He Rabi, Iuda Hakadosa ka inoa, oia ka mea i pai mua ia mau kanawai ma ka A.D. 190, 220 paha, a kapa ia buke, "The Talmud." Ka Telamuda.  He buke keia i manao nui ia, a paulele nui ia e na Iudaio, e like me ka baibala Hebera.  He mea ole hoi ka baibala Hebera ke loaa ole ka Telamuda nana e wehewehe i ke ano o na kanawai i kakauia.

Maikai no kekahi mau olelo iloko o keia buke, aka, aole na ke Akua mai keia mau kanawai waha.  Kue no kekahi i ke kanawai oiaio o ke Akua.  Nana Mat. 15:3-6.  Ka moolelo Iudaio, oia keia kanawai waha.  Eia malalo iho kekahi mau olelo ano maikai noloko mai o ka Telamuda.

Ua kukulu ia ke ao nei maluna o ka mea i hoikeia, oia hoi na kanawai o ka hoomana, a o ke aloha kanaka.  Simona ka Pono.

Mai hana e like me na kauwa i uku ia, aka, e hana e like me na kauwa i manao ole i ka uku, a e kau ka makau o ka lani maluna o oukou.  Anetigonu.

E makemake a e imi i ka maluhia, o ka mea au i hoowahawaha ai, mai hana aku ia i kou hoalauna.   Hilele.

Aole ka naauao, aka, o ka hana oia ka mea nui.  Simeona o Gamaliela.

Ka hoopono, ka oiaio me ka maluhia, oia na kahua o ke ao.  E mano i ko hai waiwai me kou waiwai ponoi.  Rabi Iose.

Ua oluolu ke Akua i ka mea a na kanaka i oluolu ke Akua i ka mea a kanaka i oluolu ai.  Ua like ia me "Ka leo o na kanaka, oia ka leo o ke Akua."  Vox populi, vox Rabi Kanania.

E hookipa me ka olioli i na kanaka.  Rabi Isemaela.

Owai ke kanaka naauao?  O ka mea i ae e ao ia mai e kela me keia kanaka.  Owai ka mea mana?  O ka i hoomalu iaia iho.  Owai ka mea waiwai?  O ka mea i oluolu i na mea i loaa mai.  Owai ka mea hanohano?  O ka mea i hoohanohano i na kanaka.  Beni Zoma.

Mai hoowahawaha i kekini mea, mai ohumu no kekahi mea, no ka mea, he wahi kupono no no kela a no keia mea.  Beni Azai.

He lani keia ao ma ke alo o kela ao.  E hoomakaukau oe ma keia lanai e komo aku iloko o ka hale alii.  Rabi Iakoba

Mai imi e hooluolu i kou hoa oiai e waiho ana kona mea make imua ona.  S. Bene Eleaza.

Mai haouli ke haule kou enemi.  Samuela opio.

O ka mea i malama i kekahi kanawai, ua loaa nona kekahi mea uwao.  O ka mea i hana i kekahi hewa, ua loaa nona kekahi mea hoopii.  Rabi Elieza bene Iakoba.

E wiwo ole me ka leopadi, e mama me ka aeto, e lele me ke dia, a e ikaika me ka liona i ka hana ana i ka makemake o kou Makua ma ka lani.  Iuba bene Tema. 

Unuhiia e Hawaii.

 

MOOLELO O KA AHA EUANELIO O OAHU.

Halawai ka Aha Euanelio o Oahu ma Ewa, ma na la 10 me 11 o keia mahina.  Weheia na hana me ka pule, a pela aku.

Hoomaopopoia na lala i hiki mai.

EKALESIA          KAHU        ELELE

Kawaiahao                    Hailama

Kaumakapili                 S. H. Oni

Kalihi & Moanalua       S. Paaluhi   D. Kaneheana

Ewa                               G.M. Keone

Waianae     J.Kekahuna

Waialua      E.S. Timoteo

Kahuku                          Luiki

Hauula        J.W. Kaapu H. N. Kahulu

Waikane     J. N. Paikuli         Kaoheloahi

Kaneohe                        J. Meemano

Waimanalo          S. Waiwaiole       Mahoe

Na Makua Misiona       C.M. Hyle, A. O Polepe.

Koho ka Lunahoomalu i na Komite kumau.

Hoike hapa mai o Hyde kekahi lala Imi Hana i na kumuhana.  Hapalua hora haipule.  Na hoike kihapai.  Hehuhelu haawina.  Na ekalesia kahu ole.  Ka hoike a na komite.  Na palapala hoopii.  Na kula kaikamahine.  Kula kahunapule.  Ka hoike o na komite.  Ka Olelo Hooholo i hoopaneeia.  Hoole waiona.  I mau keiki no ke kula kahunapule.  Na kahua aina o na ekalesia.  Olelo hoike a ke Kakauolelo o ka Papa Hawaii.  Ua kupono anei i keia Aha ke noonoo i Ahahui Nui no na Ahahui Opio mai Hawaii a hiki i Kauai.  Kahi e halawai hou ai ka Aha.

Hoapono ka Aha.

Kumuhana 2, na hoike kihapai.  Heluhelu mai o Hailama, Oni, Paaluhi, Keone, Kekahuna, Timoteo, Luiki, Kaapu, Paikuli, Meemano, Waiwaiole i na hoike o na kihapai o lakou.

Koho ia oo S.R. Hapuku G.B. Meheula i mau hoa kuka.

Kumuhana 3, heluhelu haawina.  Heluhelu mai o S. Paaluhi i kona haawina.  Heluhelu mai o Keone i ka haawina o ka ekalesia o Ewa.  Heluhelu mai o Timoteo i kona haawina.

Hoopanee ka Aha a halawai hou i ka hora 1.

Hora 1, heluhelu mai o Kaapu i ko na haawina.  Heluhelu mai o Paikuli i kona haawina.  Heluhelu mai o S. Kapu i ka haawina o ka ekalesia o Kaneohe.  Heluhelu mai o Waiwaiole i kona haawina.

Kumuhana 4, na ekalesia kahu ole.  Aohe mea i hooholoia.

Kumuhana 5, ka hoike a na komie.  Hoike mai o Waiwaiole ke komite a ka Aha i koho ai e hele i ke noi dala no ka luakini o Kaumakapili, a penei kana hoike:  Apana o Pololu, $73.  Niulii, $120.  Makapala, $450.  Pakolea, $100.  Halawa, $150.  Halaula, $130.  Kapaau, $212.  Honomakau, $100.  Kahei, $250.  Rev. S.C. Luhiau, $12, Kauai. $98c. Lahaina, $15.

Kumuhana 6, na palapala hoopii.

1 - Palapala hoopii na ka ekalesia o Kaumakapili, e noi ana e lilo o Henere Walakahauki i kahu no lakou: waihoia i ke komite, oia o Kauka Hai.  Kaapu, Timoteo, a mahope o ka lakou noonoo ana, ua hooleia ka palapala hoopii noi.

2 - Palapala hoopii no Ewa, e hoopau i ka noho haiolelo ana o S.P.K. Nawaa; ua hooleia ka palapala hoopii, mahope iho o ka noonoo ana o na komite, Timoteo, Kaapu, Kekahuna.  3 - Palapala hoopii na Mahu o Kalihi no Paaluhi; ua haawiia i ke komite, a mahope o ka noonoo ana a na komite, Kapu, Polepe, Kahea, ua hooleia ke kuleana o ka noonoo ana o ka Aha no ia palapala hoopii.

Kumuhana 7, hoike kula kaikamahine.  Na Kauka Hai i hoike mai.

Kumuhana 8, hoike kula kahunapule.  Na Kauka Hai no i hoike mai.

Kumuhana 9, hoike a na komite imua o ka Ahahui Nui ma Iune.  Na Timoteo e hoike imua oia Aha, ka hoike o na ekalesia, na Waiwaiole e hoike imura o ia Aha, na hana o keia Aha, na Elele ma ia Aha, Hailama, Kahulu, Keone, Nawaa.

Kumuhana 10, ka olelo hooholo i hoopaneeia, hoololi i ka pauku kumukanawai o keia Ahahui; hooholo keia Aha e halawai i ka Poalua mua o Aperila a i ka Poalua mua o Okatoba.

Kumuhana 11, hoole waiona.

Kumuhana 12, na keiki o ke kula kahunapule.  Hooholo keia Aha 200 dala a na ekalesia o keia Aha e kokua ai no ke kukulu ana i ka halekula kahunapule; kohoia o Kauka Hai, Waiwaiole, Meemano, i mau komite na lakou e mahelehele na haawina, a penei ka mahelehele ana:  Ekalesia o Kawaiahao' $55.  Kaumakapili, $50.  Kalihi & Moanalua, $15.  Ewa, $5.  Waianae, $10.  Waialua, $15.  Kahuku, $5.  Hauula, $15.  Waikane, $10.  Kaneohe, $15.  Waimanalo, $10.

Kumuhana 13, na kahua aina o na ekalesia.  Waihoia ma ka lima o ke komite, Hyde, Polepe, Kahulu, Kekahuna, Timoteo.

Kumuhana 14, olelo hoike a ke Kakauolelo o ka Papa Hawaii.  Hoike mai o Polepe.

Hoopanee ka Aha.

La hana 2, Poakolu.

Halawai ka Aha e like me ka mau. 

Kumuhana 15, ua kupono anei i keia Aha ke hoonoo i Ahahui Nui no na Ahahui Opio mai Hawaii a Kauai.  Waiho i kekahi komite, Hai, Waiwaiole.  Paaluhi.

Heluhelu mai o Polepe komite Imi haawina.  1 - O ka babetizo ana a Ioane ia Iesu ma ka muliwai o Ioredane, ua hooluu maoli ia anei, aole paha?  S. Waiwaiole.

2 - E wehewehe i ka pauku 17 o Hal. 51.  Rev. J.N. Paikuli.

3 - O ka noho ana o Melezizekeka i Kahuna Nui no Iehova, ua nele maoli no anei oia i ka makuakane, a me ka makuaine ole, i nele ai kona moolelo ma Kinohi, Rev. E. S. Timoteo.

4 - E wehewehe i ka pauku 12 o Tesaronite 1 mokuna 2.  Ekalesia o Kaneohe.

5 - E wehewehe ia 1 Ioane 5:7.  S. Paaluhi.

6 - Pehea la e lilo ai na lawelawe ekalesia ana ma na ekalesia o Hawaii nei, i mea e hooulu nui ia ai na hana misiona?  Rev. J.W. Kaapu.

7 - E wehewehe ia 2 Tesaronite 2:3, 4.  Ekalesia o Ewa.

8 - Ina e mau no na haipule io a ola, pehea e kupono ai ke ao ana ia lakou e kiai ma ka pule o make lakou.  Rev. C.M. Hyde.

9 - E wehewehe i ka manao o ka mokuna 12 o Hoikeana.  Rev. J. Kekahuna.

10 - E wehewehe i ka pauku 1 o ka mokuna 16 o Hoikeana.  Ekalesia o Kahuku.

Heluhelu mai o Paaluhi he palapala hoopii na Haupu ia Keone, waihoia ma ka lima o kekahi komite, Hai, Kaapu, Kapu.

Hapai hou ia ke kumuhana 4.  Noonoo ka Aha no ka ekalesia o Kahuku.  Hooholo ka Aha e waihoia ma ka lima o kekahi komite, Timoteo, Kaapu, Paikuli.

Kumuhana 16, kahi e halawai hou ai keia Aha.  Ina e hoopanee keia Aha, e halawai hou aku ma Kaumakapili i ka Poalua mua o Okatoba, M.H. 1883. 

Heluheluia ka moolela a hoaponoia.

Hookuu ka Aha ma ke mele a me ka pule.  S. PAALUHI

Kakauolelo.

 

Ma Waimea, Kauai, i ka Poaono ka la 7 o keia mahina i make ai o Isaaka Kapuniai, ko laila Lunakanawai Apana.

 

NA HOOLAHA.

 

ASA KAULIA,

LOIO A KOKUA MA KE KANAWAI

 

Jno. Lota Kaulukou,

LOIO A HE KOKUA.

@

 

W. O. SMITH,

LOIO!  LOIO!

Helu 36 Alanui Kale@a. Honolulu

 

W. R. KAKELA,

He Loio a he Kokua ma ke Kanawai.

He Luna Hooiaio Palapala.

 

W. L. HOLOKAHIKI.

He Loio a he Luna Hooiaio Palapala.

Keena Wehekealaula Alanui Betera.  1101 @

 

SAM. L. KAWELO.

LOIO!  LOIO!

E noho mau ana ma ke kulanakauhale.

Honolulu Oahu.  1104 M

 

SAML. K. KAEO.

L O I O !  L O I O!!

E loaa no ia ma ke Keena Loio o J. L. Kau@lukou mauka iho o ka Halewai, Honolulu.

110@ 1 yr.

 

A ROSA,

(AKONI.)

He Loio a he Kokua ma ke Kanawai.

A he Luna Hooiaio Palapala.  Keena hana, aia ma ke Keena o ka Loio Kuhina.

1101 1 yr.

 

S. B. DOLE,

He Loio a he Luna Hooiaio Palapala.

KEENA HANA - Ma Alanui Kaahumanu.

 

CECIL BROWN.

Loio a he Kokua ma ke Kanawai.

A he Agena no ka Hooiaio ana i na Palapala no ka Mokupuni o Oahu.

Helu 8 Kaahumanu, Honolul, H.P.A. 2-1y

 

Richard F. Biekerton,

(PEKETONA.)

Loio a he Kokua ma ke Kanawai.

Keena hana Helu 23 Alanui Kalepa,

Elua puka ma o aku o ka hale kauka o Kauka Minuteole.

 

JAMES M. MONSARRAT,

(MAUNAKEA)

Loio o he Kokua ma ke Kanawai.

A HE LUNA HOOIAIO PALAPALA

Keena hana alanui Kalepa

Jan 3, 1880  944-1 y

 

KALE KULIKA,

Luna hooiaio

PALAPALA KUAI, MOLAKI.

A ME NA PALAPALA OIA ANO.

Luna Hooiaio Palapala Aelike mawaena o na

Haku a me na Kauwa.  Luna Hawi

Palapala Mare.

Ma ke kihi o ke alanui Moiwahine me Kaahumanu,

Kulanakaauhale o Honolulu, ko Hawaii Pae Aina.

1@94f

 

C.C. COLEMAN,

Amara a he mea hana Mekina

Kapili Kapuai hao lio.

A ME KA

Hana ana Kaa Lio, etc.,

Hale Hana ma Alanui Alii,

905 tf  E kokoke la i ke Alanui Papu.

 

HALA TELA HOU!

K A U K A I W A

Helu 11, Alanui Nuuanu,

KOKOKE I KA UWAPO.

S. H@MEEKAPU.

Iune 22, 1882  1075 tf

 

ANA AINA! ANA AINA!!

Frank Pahia a me.

Samuel M. Kaaukai.

KEENA HANA - Aia ma Alanui Moi, kokoke loa ka Uwapo o Hooliliamanu.

1096 tf

 

MAKEMAKEIA.

Ua makemake ia ka poe mea ILI KAO MALOO a me na ILI BIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.

C. BREWER & CO. (Burua Ma.)

 

Joseph E. Wiseman,

LUNAHOOPONOPONO O NA WAIWAI PAA

A ME

Luna Imi Hana,

Helu 27 Alanui Kalepa, Honolulu

Luna Hoolimalima no na Rumi, na Hale, a me Luna Kuai me Hoolimalima o na Waiwai

Paa ma na wahi a pau o ka Paemoku.

Luna imi Hana no ka poe a pau i neie i ka hana ole ma na wahi a pau i makemakeia ma kekahi mokupuni o ka Paeaina.

N.B. - Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei.  O na Unuhiolelo a me na Maheleolelo ana, e hookoia me ka maikai.  O na kauoha a me na kamailio ana maloko o na leta no kekahi o na hana maluna ae, e hookoia me ka eleu loa.

1076-1 y

 

UA MAKEMAKE IA

NA ILI BIPI,

NA KIWI BIPI,

NA IWI BIPI,

E haawi ia no ke kumukuai kiekie o ko kakou makeke nei e

H. HACKFELD & CO.

Honolulu Mei @, @  @1y 964

 

NA HOOLAHA.

 

KA MIKINI

HUMUHUMU LOLE

MAIKAI

ST. JOHN

E. LOAA NO MA KA @

MR. GEO. F. WELLS.

O ka Mikini Humahuma @ M@ loa keia, i hiki ke ha@ @ @ hope, a i ikeia ma ka @ Hawaii nei.  He Mikini maikai loa no na kanaka Hawaii, he mikini luhi oel.

 

KUMUKUAI $55.00

me Hookahi Gita (Kika) hookani maikai loa makana.

 

O ka poe ma na kuaaina e ake @@ keia ano mikini humuhumu, e @ kou i ke dala ia.

 

GEO. F. WELLS

 

ma Honolulu, a nana no e @ hi i makemakeia, me na mea a @ ka mikini, a nana e hookau aku @

moku, me ke kaki ole ia @ mekini la.

O ka poe a pau e holo mai ana @ lu nei, mai poina lakou i ke kipa @ halekuai o.

 

GEO. F. WELLS

 

Ma Alanui Papu, a e kilohi iho @ humuhumu la, oia ka

 

Royal St. John.

Eia pu no me ia na pila hookani @ pau, o ka loaa koke ana mai nei no ia mai Amerika a me Europa mai, oia

Na Pila Guita (Kika), he 150 @ mai ka $5 a hiki i ka $125 @ mukuai o ka pila hookahi.

 

200 Koliana mai ka $2 a hiki @ ke kumukuai o ka pila hookahi.

 

100 Ohe Puluka, $2.50 a hiki i ka @ ke kumukuai o ka ohe hookahi.

 

12 Pahu Hookani nunui, a me 25 Pahu Hookani liilii, a me na ano mea @ keleawe a pau, e loaa no ka keia @ lekuai i hoikeia maluna me ke

 

KUMUKUAI EMI WAIPAHE

Na Piano nunui maikai, e loaa @ me ke Kumukuai Emi Loa i ike ole ia ma Hawaii nei.

 

He nui aku no na mea i koe, na @ la a me keia e kilohi nona iho, ke @ ae ma ko'u halekuai ma Alanai @

 

E hookoia ka makemake o kela a me keia me ka eleu. 

 

GEO. F. WELLS.

1094 tf  Alanui Papu.