Ka Nupepa Kuokoa, Volume XXII, Number 21, 26 May 1883 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA  NUPEPA

 

KUOKOA  ME  KE  AU  OKOA.

[ I  Huiia. ]

 

No ka Makahiki.....$ 2 00

Eono Mahina..........  1 00

            Dala Kuike ka Rula.

 

            POAONO,  MEI,  26, 1883

 

  Palia e Thos. G. Thrum, ma ka Halepai o ka Nupepa Saturday " Press. "

 

HOW CAN I KEEP FROM SINGING?

---

Gospel Songs,  Buke IV. No. 66.

 

1

Ke panee no ke ola o ʻ u,

A @oa kuu uhane.

Aohe u a kanikau ;

Ua mau ka milimili.

Ke pa nei ma kuu pepeiao

Ko luna mau hosana.

Pehea la au e ae e pau

Kuu mele oli ana ?

 

2

A luni au a ane pau

Koonei mau mea ola ;

Mau nae ke ola o Iesu,

A mau no kona aloha.

A kau na ino o ke ao,

Hee nae i Kona mana.

Pehea la au e ae e paa

Kuu mele oli ana?

 

3

Ke nana nei kuu maka e

Iluna i ka lani.

Ikea na nani o luna ʻ e,

Lohea na leo nanai.

He malu iloko o ʻ u,

A kani na hosana.

Pehea la au e ae a pau

Kuu mele oli ana?

                                    Hawii.

 

HAAWINA  KULAA SABATI.

 

---

 

HELU  II,  SABATI,  IUNE  10.

 

---

 

Kumuhana  Paulo ma ma Ikenio me Lusetera---@Pauku @Baibala, Oih.  @14: @1 -18.

 

           Aia ma Ikonio, komo ae la laua iloko o ka hale halawai ona Indaio, a no ka iaua olelo ana, nui loa na Iudaio a me na Helene i manaoio aku.

           2  Aka, o ka poe Iudaio i hoomaloka, hookonokono lakou, a hoonaukiuki i na uhane o ko na aina e i na hoahanau.

            3  Loihi loa nae ko laua hoomau ana e oleo wiwo ole aku no ka Haku, nana no i hoike mai i ka oiaio o ka olelo o kona lokomaikai, a haawi mai la no hoi ia i na hoailona a me na mea kupanaha a ko lana lima i hanai ʻ i.

           4  Mokuahana ae la ka aha kanaka o ke kulanakauhale ; me na Iudaio kekahi, me na lunaolelo kekahi.

             A i ka wa i hoao ai ko na aina e, a me ka poe Iudaio, me ko lakou alii, e hana ino aku ia lauua; a e hailuku aku,

           6  Ike e no laua, a mahukaaku la i na kulanakauhale o Lukonia ia Lusetera a me Derebe, a me kaaina i puni mai.

            7  A malaila laua i hai mai ai i ka euanelio.   

            8 E noho ana kekahi kanaka ma Lusetera, ua nawaliwali na wawae, ua oopa ia mai ka opu mai o kona makuahine, aole loa ia i hele.

           9  Lohe aku la oia ia Paulo e olelo ana, a haka pono mai la oia iaia, a ike iho la, he manaoio kona e hoolaia ʻ i.

           10  I mai la ia me ka leo nui,  E ku pololei ae iluna ma kou mau wawae. Lelele ae la ia a hele aku la.

           11  Ike aku la ka ahakanaka i ka mea a Paulo i hana ʻ i, hookiekie aku la lakou i ko lakou leo, i aku la, ma ka olelo Lukaonio, ua iho mai na Akua i o kakou nei, ma ke ano o kanaka.

           12  Kapa aku la lakou ia Barenaba, o Dia, a me Paulo hoi o Hereme, no ka mea, iaia no ka olelo.

           13  Na ke kahuna o Dia, o ka mea make alo o ua kulanakauhale la, nana no i lawe mai i na bipi kane a me na lei, ma na puka pa, manao iho la e kaumaha aku me ka aha kanaka.

           14  A lohe na lunaolelo, o Barenaba laua o Paulo, haehae laua i ko laua aahu, a holo aku la iwaena o ka aha kanaka, e hea aku ana

           15  I aku la, e na kanaka, no ke aha la oukou e hana mai ai i keia mau mea ?  he mau kanaka no maua, o ko kakou ano no.  A ke hai aku nei no hoi maua ia oukou i ka olelo maikai, i huli ai oukou mai keia mau mea lapuwale aku a i ke  Akua ola, ka mea nana i hana ka lani a me ka honua, a me kai, a me na mea a pau iloko o lakou.

           16  I na haumana mamua, waiho wale aku no ia i ko na aina a pau, e hele ai ma ko lakou aoao iho.

           17  Aka hoi, aole ia i waiho wale iaia iho, me ka hoike ole ia mai, hana maikai mai no ia, a haawi mai no ia i ka ua, mai ka lani mai, a me na kau ai e hoopiha mai ana i ka naau i ka ai, a me ka olioli.

           18  I ka laua olelo ana i keia mau mea, mai hiki ole ia laua ke hoopaa mai i ka aha kanaka, i ole lakou e kaumaha aku na laua.

             Pauku Gula.  P. 3.

           Manao Nui.  Kokua ke Akua i ka hai pono ana i kana olelo.

             Na heluehlu la.  1.  Oih.  14, 1-18,  2.  Mat. 11, 1-12,  3.  Mat. 15, 4-31,  4.  Oih. 17, 16-31,  5. Rom. 1, 7-25,  6.  Hal. 145, 2-21,  7.  Tim. 2, 1-17.

           Ka manawa, A. D. 48-49.

           Kahi i hanai ai.  Ikonio,  Lusetera, Derebe.

            Paulo, 46 ona mau mak, ma kona kaapuni mua ana.

            Na ʻ lii.  Claudio Caesara, ka Emepera o Roma, Kumanu, Kiaaina o Iudea, Veseopasina ma Besetania.

            Mele.  "He koa liilii au la. "  Hoku Ao Nani p. 199.

 

            Pule i aia na koa liilii a pale no kapono.

KA WEHEWEHE ME KA NINAU ANA.

 

            I ke kipakuia ana o Paulo ma mawaho o Anetioka o Pisidia hele laua ma ke alanui mawaena o Epeso me Euperata he 60 mile ma ka hikina hema a hiki i Ikonio, kahi i hoomaka ʻ i ka haawina o keia la.

 

            NA  MAHELE.

 

            I Paulo me Barenaba ma Ikonio, p. 1-5.  1  Ikonio, he kulanakauhale ia no Lukaonia he 60 mile hikina hema o Anetioka.  Konie ka inoa o keia wa, 25,000 kanaka paha.  He pohaku maoli, a pohaku lepo na hale.  He hale halawai Iudaio malaila.  Malaila ka hele mua ana o Paulo ma e hai mua i na Iudaio i ka olelo a Iesu.  He mea mau ia ia laua.  Heaha ka hua o keia haiolelo ana ?  Huli pu na Iudaio me na Helene, na kanaka e, e pili ana i na Iudaio.

            2  Pehea na Iudaio hoomaloka ?  Ke ano ia o na hoomaloka e keakea i ka huli ana o na kanaka.

            3  Pehea nae Paulo ma ?  Hoomau i ke aha ?  A aha ka Haku i ka laua hana ?  Ka pono ia o na haiolelo, e hoomau, e hana me ka wiwo ole.  Mai wikiwiki e hooki i ka hana.

            4  Heaha ka hua o keia hoomau ana ?  Huli, ea, kekahi hapa mamuli o Paulo ma.

            5  Ua mau nae ke kue o kekahi poe Iudaio, me ko na aina e, me na luna, a e hoomakaukau ana lakou e aha ia Paulo ma?  Kupanaha, ea ?

            II Ka holo ana i Lusetera me ka hana malaila.  P. 6-18.

            6  I ko laua ike ana i keia mea, mahuka laua ihea?  Me ke kauoha ma Mat.  10: 23.  Lusetera me Derebe, he mau kulanakauhale laua no hea ?  Lukaonia ka mokuaina ma ka akau ia o Pamepulia.  He aina ino, naaupo, ahiu, aole paha he hale halawai Iudaio malaila.  He aina hoomana kii loa.

            7  Heaha ka laua hana malaila ?  Pela ke kauoha e hoonaauao i ka poe naaupo.

            8 - 10.  He kanaka aha ma Lusetera?  Pehea oia i ka Paulo olelo ?  A ma ka nana ana o Paulo, he aha ko keia kanaka?  A mai ke Akua mai paha kekahi ike.  Kauoha Paulo e aha oia?  A pehea hoi oia ?  Mana ea, ka Paulo olelo ?  Nohea mai nae ka mana ?

            11  I ka ike ana o na kanaka i keia mea kupanaha, heaha ka lakou olelo?  Ma ka olelo Lukaonia, he olelo ano e paha, hapa Helene, hapa aha la, he olelo pili ia aina wale no.

            12  Owai ka inoa i kapaia ʻ i o Barenaba ?  Dia, ka makua ia o na akua a pau a o na kanaka, ma ko lakou manao.  Mai kekahi kaao ilaila no Dia ma ke ano kanaka me Hereme no, i kekahi manawa mamua aku.  Kapaia Paulo owai?  Hereme, oia ka elele o na akua.  He haiolelo akamai ia.  Nolaila i kapaia ʻ i Pauolo o Hereme, no kona makaukau i ka haiolelo.

            13  He heiau no ko Dia.  O ke kahuna o ia heiau, heaha kana i hana ʻ i?  Me ka manao e aha ia laua?  E hoomana me he akua la laua.

            14  A pehea laua?  Ae anei e hoomanaia?  Aha la laua?  Holo a hea pehea?

            15  Heaha ka ninau ?  He mau aha laua?  He mau kanaka no maua elike me oukou.  A ke hai aku nei maua ia oukou i ke aha? Owai wale no ke Akua?  Ka mea nana i aha?

            16  Ua waihoia na aina mamua pehea?  Elike me Hawaii nei ea.  Ua waihoia iloko o ka naaupo a loihi loa.  A hiki mai owai?  Me ke aha?

            17  Ua nele loa anei kanaka ma ia wa naaupo i ka mea nana e hoike he Akua nui no?  Heaha na mea hoike?  Ae, ua ike na kanaka Hawaii i keia mau mea, i ko ka lani, i ko ka honua, i ko ke kai, aole nae i manao i ka mea nana i hana.  Hoomana no i na mea i hanaia me ko Roma Poe.  Rom. 1 ; 19-25.

            18  A pehea?  Ua hoomana anei na kanaka ia laua?  Mai hoomana no.  Aka, ikaika no laua i ka pale ana, a lanakila no.

           

            KA  HOOPILI  ANA.

 

            1  Mau no ke ano o na Iudaio me na kanaka e.  Hoomaloka kekahi, hoomaau, hana ino.  Huli kekahi, a malama i ke Akua a manaoio ia Iesu.

            2  Nui loa na aina i like me Lukaonia, naaupo loa, hoomana kii loa.  E pule no lakou, a e hoouna aku i ka malamalama i o lakou la.

            3  Nui na hoike no ke Akua.  Ka baibala ka hoike nui.  He baibala ko na kanaka Hawaii.  E malama o lilo ia i hoike kue ia oukou, i mea hoi e make ai no ka malama ole ia.

            4  Mai ae kekahi e hoomanaia.  Ka poe i manao nui ia lakou iho, a imi nui e mahaloia, akena i ko lakou waiwai, i ko lakou hanohano, i ko lakou akamai ; me he la e makemake ana e hoomaauia, e hoakuaia.  Auwe !  E makau, e pale aku ia.

            Owai ka i make mainoino no ke ae e hoomanaia ?

            Mele.  "Aohe mea paa. "  Hoku Ao Nani p. 266.

            Pule, i imiia na mea paa.

            Haawina no Iune 17, Oih.  14 : 19-28.

 

HE  MOOLELO  EEHIA

 

            ---NO  NA---

 

HANA  HOOWELIWELI

 

            ---O  KE---

 

TOWERA  O  LADANA.

 

            ---

 

[ Mai ka peni a ka mea unuhi moolelo o "Beriana ka Wino Ole, a me Mahone ke Koa. ]

 

            ---

 

            MOKUNA  V.

 

            Ua lawa paha ka manawa no ke Dukke e hoomaopopo pono ai i kona kanalua, no ka hana a ke aliiwahine Jane mamuli o ke alakai ia ana o kekahi poe okoa.  Mahope koke iho o ka haalele ana o Guilafoda Dudele no kana huakai no Siona Hale, e ike me ka mea i hoike mua ia ae nei, ua hookupilikii loa ia kana wahine nona, me ka hooiaio ole ana i ka lono no ka hoi ole mai o kana kane i hai ia mai iaia; aka, ua hoopau koke ia ia manao kanalua, mamuli o ka hiki kino ana mai o kekahi palapala mai kana kane ponoi mai, e hoike mai ana, aole oia e hoi mai a apono aku kana wahine i kona manao i noi mai ai iaia;  i ka ike ana o ka wahine i keia mau olelo o ka palapala, hiolo makawalu koke mai la kona mau waimaka a hoi koke aku la oia i kona keena ponoi, kahi ana i noho hookahi ai no kekahi manawa e hoomama ana i kona manao i pilihua.

            A iaia i hoea hou mai ai, ua hoomaopopo koke ia aku kona nanaina ma ka loli ano e ana ae, he mau hoailona e hoike mai ana, ua komo kuhohonu ia oia iloko o ke kaumaha.  Aka, aia nae he ouli kuoo me ka luli ole kai luna ona, a o kekahi mea ana i hoolala ai a hooholo i kona manao, e kupaa no oia me ka luli ole iluna oia mea.

            Kauoha aku la oia i na mea koikoi, ia Arunadela a me Pemeboroke imua ona, me ka hoakaka pono aku imua o laua i na mea ana i lohe ai, oia ka makemake ana o ka aha kukamalu e hapai ae i kana kane iluna o ka nohoalii; aka, ua ike mua nae oia, e ukali mai ana ka pilikia a me ka poino me ka hoopoino pu ana i kona aupuni.

            "He mea oiaio ka kou kiekie i hooholo ai,"  wahi a Pemeboroke i pane aku ai.  "E olelo ia no auanei, mamuli o ka hookiekie ia ana ae o kana keiki, e imi ana ke Duke Nothumberland e hookiekie pu ae iaia iho i mea nui loa."

            "A e lilo ana ia olelo i mea oiaio, e kuu haku,"  i pane aku ai ke aliiwahine.  "Aka, ina o kou manao keia, alaila, no ke aha i pa-e ai kou leo e kokua i keia hana ?"        

            "Aole he kanaka i kono ia e hoahewa iaia iho,"  wahi a Pemeboroke.

            "Aka, ua kono ia na mea a pau e hoike i ka oiaio, e kuu haku,"  wahi a ke aliiwahine.  "A nolaila, ke ninau hou nei au ia oe, heaha kou mea i haawi ai i kou hooia no keia hana, e like me ka mea i hoike ia mai e oe, ua koou me ka popilikia. "

            "He enemi ke Duke Nothumberland no ʻ u," i pane aku ai o Pemeboroke me ke ku io.  "Ina e hooko ia aku keia keehina, alaila, e hooko ia aku no auanei kona hopena."

            "Ke kamailio akea nei oe, e kuu haku," i pane aku ai ke aliiwahine; "aka, ua poina paha oe, o ko ʻ u hopena pu hoi kekahi e kau mai ana."

            "He makaainana oiaio au nou e ke ʻ lii," wahi a Pemeboroke, "a e haawi no au i ke koko hope loa iloko o ʻ u e keakea aku i ka maluhia o kou leialii; aka, aole loa au e haawi pio ia ʻ u iho i na hana a ke Duke."

            "A nolaila, e kuu haku, ua aie aku oe iaia.  Aole loa e lilo o Sir Wliama Herbert i Earl o Pemeboroke, aka, mamuli wale no o ka hooikaia ana o ke Duke i ko makou cousini ia Edewada.  Nolaila, he mea hilahila, e kuu haku, kou haliu kue ana aku iaia, oiai ua aie nui aku oe iaia," wahi a ke aliiwahine Jane i pane aku ai me ke kalaka.

            "Aole loa au i aie aku iaia,"  wahi a Arunadela, "a nolaila i hiki ai ia ʻ u ke kamailio akea ae nona me ke kanalua ole, e like me na mea i hoike ia mai e oe ke alii, e kau ana i ka ahewa maluna o Pemeboroke.  Ina aole e hoonalohia koke ia ka mana hookiekie o ke Duke Nothumberland, alaila, o ka hopena auanei kona haulehia ana ilalo, a me ka poe a pau i kokua aku mahope ona."

            "Ke mahalo aku nei au i kou manao e kuu haku," wahi a ke liiwahine; "a ke hookupaa ia mamuli o kou manao huna, e hookau ia aku auanei ka poe i koe i ke kulana kiekie e like me a ʻ u."

            "E hooko loa ia auanei ka oiaio o ka ʻ u mea e hoike nei, e kou kiekie, ke hoole aku oe i ka launa kuka pu ana me ka ke Duke Nothumberland mau kuhikuhi:"  wahi a Pemeboroke.  "Aka, e ike no auanei oe i ka hopena, ke ole nae kou halawai mua ana me kekahi mau kumu paakiki, aka nae, he alanui pohihihi a me ka popilikia no ka hooko ana."

            "Mao kekahi la, nona na heluna makahiki pokole, aka, ua oo nae iloko o ka mana e like me oe e ke alii;" i pakui aku ai o Arunadela; "aka, he mea makehewa ke olelo ae, i ke keehina mua o ka nee ana o kou nohoalii, e like me ka nee ana o ke kahua kaua, ua oi aku ka loa ana o ka lanakila.  Nolaila, ina oe e hole alaila, o ka pau noia.  No ka mea ma keia alanui hookahi wale no ke Duke e hoomaopopo ai i kau mea e hana ana, a lilo mai oia i kauwa nau, a i ole.  i haku maluna iho ou.  Mao kona ano no hoi kekahi, e hoomaopopo koke ai oe i ka mea e hana ia mai ana e ia ma keia mua aku. "

            "Ke hoopaa nei au i ka ʻ u olelo hooholo, e kuu mau haku," i pane mai ai ke aliiwahine.  O ke alanui a ʻ u i hooholo ai, e pili anai ke Duke, e lohe no olua ke halawai kakou iloko o ke keena kuka, ma o kona hiki kino ana mai a kamailio nona iho--aina he mea hiki iaia ke pale nona iho.  O ko ʻ u manao, oia ka hoomaka ana o ko ʻ u nohoalii me ka maluhia.  Nolaila, ina i makemake elua no ko ʻ u kokua ana, alaila, e hoopoina olua i ko olua mau manao konakona i ka mea kiekie ke Duke, me ka hui lokahi pu ana mai me a ʻ u.  Iwaena o ka hooko ana i ko ʻ u mana, ke hilinai nei au ua hiki ia ʻ u ke hoomalielie aku iaia me ka hoea hou ole ana mai o na kekeue ma kela ʻ mua aku me a ʻ u, me ka hoopau koke ia o kona manao uahoa."

            "E hilinai ana oe i na alakai ana a kou ahakuka," wahi a Arunadela.

            "Me ke kanalua ole, e ko ʻ u haku," wahi a ane.  "Nolaila, e hooko aku i ka hana a ʻ u e kauoha aku nei ia olua.  Malia paha ua hiki aku ka lohe ia olua ua haalele iho ka ʻ u kane aloha i keia kakahiaka no Siona Hale me ka manao maikai ole, mamuli o ko ʻ u hoole ana e hooko aku i kona mau iini."

            "Ua lohe maua i keia mea,"  wahi ana keonimana.

            "O ko ʻ u makemake wale no, e awiwi olua e hele aku i ona la a noi oluolu aku iaia e hoi mai me ke kaulua ole," wahi a Jane.

            "Alaila, ua hala ole oe e ke ʻ lii!"  i hoolo mai ai o Pemeboroke.

            "Aole pela e o ʻ u mau haku, e hookieaku no au iaia i ke kulana like me kona luaui, ae lilo oia i keiki alii, aka, aole i Moi."

            "Ke noi aku nei au ia oe e ke ʻ lii, e hoopau i kou manao, oiai, aole i komo hohonu loa aku oe iloko o na hana o keia ano," wahi a Arunadela.

            Ua hoike mua aku nei au, ua hoopaa mua au i ka ʻ u olelo hooholo, nolaila, eia wale no ka ʻ u ia olua, e hoike aku olua iaia i na olelo a ʻ u i hai aku ai ia olua, me ka uwalo aku iaia e hoi mai oia," wahi a Jane.

            "E uwalo aku iaia!" i hooho mai ai o Pemeboroke me ke ano henehene.  "Aole ia he mea kupono i kou kiekie ka uwalo ana aku iaia, aka, e kauoha aku.  Imua o ke kuahu i puana aku ai na lehelehe o ka Moiwahineo Enelani i kana olelo paa e hoolohe, ua holoiia ia i ka wa i puana ia ai.  He makaainana   kau kane nou e ke ʻ lii; nolaila e haawi mai i ka mana ia maua e lawe mai iaia imua ou, a e hiki mai no oia ma ka paepae o ko nohoalii iloko o ka pokole loa.            ( Aale i pau. )

 

            MOOLELO  EUANELIO  O  KAUAI.

 

            Halawai ka Ahahui Euanelio o Kauai ma Koloa Aperila 25, 1883.

            Kohoia a o D. Nuuhiwa i Lunahoomalu, a o R. Puuki i Kakauolelo.

            Eia na lala i hiki mai.

            No ka ekalesia o Hanalei.  Kahu, D. Nuuhiwa.  Elele, J. W. Kahele.

            No ka ekalesia o Kilauea.  Kahu, J. H. Mahoe.

            No ka ekalesia o Anahola.  Elele, Kaipu.

            No ka ekalesia o Kapaa, Kahu, J. M. Kealoha.  Elele, A. Panui.

            No ka ekalesia o Lihue.  Kahu, J. B. Hanaike.  Elele, Kauahoa.

            No ka ekalesia o Koloa.  Kahu, S. U. Kapahi.  Elele, J. Alapai.

            Na lala mau, J. W. Smith, R. Puuki.

            Koho ka lunahoomalu ia J. B. Hanaike, J. H. Mahoe, a me J. M. Kealoha i komite imi hana.  Na kumuhana.

            1  Hapalua hora haipule

            2  Hoike kihapai.

            3  Heluhelu haawina.

            4  Komite hoike o na ekalesia i ka Ahahui Euanelio ma Honolulu a me ke komite hoike o na hana ka Ahahui. 

            5  Koho ana i na Elele.

            6  Na kihapai Kahu ole.

            7  Ke ola o na Kahu.

            8  No ka mahina hou.

            9  No na kula Sabati.

            10  Na kula keiki kane.

            11  Kahua o na halepule a me ka hale o na Kahu.

            12  Ka ona.

            13  Ka hoeueu ana i na ekalesia.

            14  Hoike a ke komite poni ia D. Nuuhiwa.

            15  Komite imi haawina.

            Hapaiia ka noonoo ana i na kumuhana.

            Kumkhana  1.  Hapa hora haipule.

            Kumuhana. 2.  Hoike kihapai.  Na D. Nuuhiwa i hoike waha mai no Kilauea.  Na Kaipu i heluhelu mai no Anahola.  Na J. M. Kealoha i heluhelu mai no Kapaa.  Na S. U. Kapahi i heluhelu mai no Koloa.

            Na ka lunahoomalu i koho ia J. B. Hanaike i komite hoike o na ekalesia, a me S. U. Kapahi i komite hoike o ka Ahahui.

            Kohoia o J. W. Smith, J. M. Kealoha, a me S. U. Kapahi i komite imi haawina.  Hoopanee ka hale a noho hou ma ka hora 2 P. M. Pule o J. M. Kealoha.

            Halawai hou ka aha ma ka hora a me ka pule ana a ka lunahoomalu.

            Kumuhana 3.  Heluhelu haawina.

            Na D. Nuuhiwa i heluhelu mai i kona haawina:  "He lua ahi io maoli anei o Gehena ?"

            Na R. Puuki i heluehlu mai i kona haawina ma Mat. 26:29.

            Na J. H. Mahoe.  Heaha la ke koi i hoikeia ma Mat. 3:10.

            Na J. M. Kealoha i heluhelu mai i kona haawina ma Oih. 3:19, hapa hope.

            Kumuhana 5.  No ke koho ana i na Elele.  J. W. Kahele, A. Panui kona hope.  Kaipu, J. Alapai kona hope.  W. M. Kekoa.

            Kumuhana 6.  Na kihapai kahu ole

            Ua kuka nui ka aha no keia kumuhana.  Hooholoia e koho i komite e launa aku me na ekalesia kahu ole.  J. B. Hanaike no Waimea, D. Nuuhiwa no Anahola.

            Kumuhana 7.  Ke ola o na Kahu.

            Nui ka noonoo ana no keia kumuhana no na kahu pilikia, a eia ka mea i hooholoia.  E noi aku kela aha i ka Papa Hawaii e kokua mai ia J. H. Mahoe i  $100.  no kona kaahele ana mawaena o na Gilibati.

            Kohoia o D. Nuuhiwa i komite e launa aku me na hoahanau o Kapaa no ko lakou aie i ke kahu.

            Kumuhana 8.  No ka mahina hou.

            Aohe mea i hooholoia no keia kumuhana.

            Kumuhana 9.  Kula keiki kane.  Aohe mea i hooholoia.  Hoopanee ka halawai a hui hou apopo hora 9 a. m. me ka pule a D. Nuuhiwa.

           

            LA  HANA  2.

 

            Halawai hou ka aha ma ka hora 9 Aperila 26.  Lunahoomalu ma ka noho.  Malamaia ka hapa hora haipule, a heluheluia ka moolelo o ka halawai i hala a aponoia.

            Kumuhana 11.  Kahua o na halepule a me ka hale o na kahu.

            Kamailio nui ka aha no keia, a eia ka mea i hooholoia:  J. W.  Smith ke komite e hui aku ai me kekahi loio no keia mea.

            Kumuhana 12.  No ka ona.  Kamailio nui ka aha no keia mea, aohe mea i hooholoia.

            Kumuhana 13.  Ka hoeueu ana i na ekalesia.

            Eia ka mea i hooholoia:  E komo aku a komo mai na kahu ekalesia ma kela a me keia kihapai e hoeueu ai.

            Kumuhana 14.  Komite poni ia D. Nuuhiwa, a ua apono aku ka aha ia hoike.

            Kumuhana 15.  Komite Imi Haawina.

            1  Heaha ka ka ekalesia hana i na keiki mahope iho o ko lakou bapetizo ia ana.  Rev. D. Nuuhiwa.

            2  He oiaio anei e pau loa ana keia lahui?  Ina he oiaio, heaha na hoike ?  Rev. J. H. Mahoe.       

            3  He pono anei i ke kahunapule ka waiho ana aku i kona kahu ekalesia Rev. R. Puuki.

            4  Wehewehe ia Hebera 13:8.  Rev. J. M. Kealoha.

            5  Wehewehe ia Luka 16:8.  Rev, J. B. Hanaike.

            6  Heaha la na hoike e akaka ai kekahi e lilo oia i hoahanau ?  Rev. S. U. Kapahi.

            7  He manawa mihi anei kekahi mahope o ka make ana o ke kino ?  Rev. J. W. Smith.

            Aponoia ka hoike a ke komite.

            Na J. B. Hanaike i heluhelu mai i kona haawina.  "He hiki anei i kekahi hewa uuku ke kala ia me ke koko ole o Iesu ?"

            Hoopanee keia halawai a halawai hou i Okatoba pule mua.

            Heluhelu ia ka moolelo, a hookuuia me ka pule a ka lunahoomalu D. Nuuhiwa.                   R. Puuki,  Hope Kakauolelo.

 

            HOOHENO  IA.

 

            Ke ku kilakila nei ka halekuai lole o na Hawaii o ka Hui Opiopio o Hookena, a me kekahi mau keiki lae oo o ka ua Naulu nei no lakou na hoakaka ana i kela helu aku nei, a ke hooheno nei ke kuai ana o ko lakou mau waiwai ma ka aina haaheo o Kohala nei.

            He nui kuu mahalo i ka hana a ka Hui Opiopio o Hookena, oiai, ua haku ia na kanawai me ka noeau, a ua hana ia na rula me ka maikai; oiai, ma ka la 12 o Aperila i hala iho nei, ua lawe ia mai ke kumukanawai e ke kakauolelo T. K. Robata a waiho ia mai imua o makou, a hoike pu ia mai me ke ano, a me na wehewehe ana.

            A malalo o keia mau kumu, ua komo pu aku la kekahi mau keiki iwikani o ua lai nei e hooheno pu me keia hui; a ma ka Poaono nei Mei 12, ka wehe mua ana o na waiwai o ka halekuai ma Halawa Kohala, a ua loaa no he mau dala.

            Uleu mai la oe e Kona kai opua i ka lai i ke kui lima ana mai me Ulelewai.

            Nolaila, e oluolu na makamaka e naue mai e ike, a e kuai i na waiwai me ka makepono loa.  Me ka Mahalo.            L. S.  Keaniani,  Kawaihae-uka

 

NA  HOOLAHA  KUMAU.

 

ASA  KAULIA,

LOIO  A KOKUA  MAKE  KANAWAI

 

Jno.  Lota  Kaulukou,

LOIO  A  HE  KOKUA.

@

 

W.  O.  SMITH,

LOIO !          LOIO !

Helu 36 Alanui Kalepa, Honolulu.

 

W.  R.  KAKELA,

 

He Loio a he Kokua ma ke Kanawai.

 

            He Luna Hooiaio Palapala.

 

W.  L.  HOLOKAHIKI.

He Loio a he Luna Hoolaio Palapala.

Keena Wehe kaulaula Alanui Betera.  1101 tf

 

SAM.  L.  KAWELO.

LOIO !            LOIO !!

                                    E loaa no ia ma ke Keena Loio o J. L. Kau lukou mauka iho o ka Halewai, Honolulu.                     1195 tyr.

 

A.  ROSA,

( AKONI.)

He Loio a he Kokua ma ke Kanawai.

A he Luna Hooiaio Palapala.  Keena hana, aia ma ke Keena o ka Loio Kuhina.                  1101 tyr.

 

S.  B.  DOLE,

 

He Loio a he Luna Hooiaio Palapala.

 

---

 

KEENA HANA--Ma Alanui Kaahumanu.

 

CECIL  BROWN.

Loio a he Kokua ma ke Kanawai.

 

---

 

A he Agena no ka Hooiaio ana i na Palapala no ka Mokupuni o Oahu.

Helu 8 Kaahumanu, Honolulu, H. P, A.                     2-ty

 

Richard  F.  Bickerton,

[ PEKEIONA.]

 

Loio a he Kokua ma ke Kanawai.

Keena hana Helu 23 Alanui Kalepa.

Elua puka ma o aku o ka hale kauka o Kauka Minuteole.

 

JAMES  M.  MONSARRAT,

[ MAUNAKEA]

 

Loio o he Kokua ma ke Kanawai.

---

A HE LUNA HOOIAIO PALAPALA

Keena hana alanui Kalepa.

Jan. 3, 1880.                            944 ty

 

KALE  KULIKA,

Luna hooiaio

PALAPALA  KUAI  MOLAKI

A ME NA PALAPALA OIA ANO.

---

Luna Hooiaio Palapala Aelike mawaena o na

Haku a me na Kauwa.  Luna Haawi

Palapala  Mare.

 

Ma ke kihi o ke Alanui Moiwahine me Kaahumanu,

kulanakauhale o Honolulu, ko Hawaii Pae Aina.

159 tf

 

C.  C.  COLEMAN,

Amara a he mea hana Mekina

Kapili Kapuai hao lio.

 

A  ME  KA

Hana ana Kaa Lio, etc.,

Hale Hana ma Alanui Alii,

905 tf              E kokoke la i ke Alanui Papu.

 

HALA  TELA  HOU !

KAUKAIWA

Helu 11, Alanui Nuuanu.

KOKOKE  I  KA  UWAPO.

S. H MEEKAPU.

Iune 22 1880.                          1075 tf

 

ANA  AINA !                       ANA  AINA !!

Frank Pahia a me

Samuel M. Kaaukai.

KEENA HANA--Aia ma Alanui Moi, kokoke loa ka Uwapo o Hooliliamanu.                    1096 tf

 

MAKEMAKEIA.

 

Ua makemake ia ka poe mea ILI KAO MALOO a me na ILI BIBI, a pela hoi me na ILI MIKO o na ano a pau, e kuai mai i  ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.                        C.  BREWER & CO. (Burua Ma.)

 

Joseph  E. Wiseman,

LUNAHOOPONOPONO  O  NA  WAIWAI  PAA

 

---A  ME---

Luna  Imi  Hana,

Helu 27 Alanui Kalepa, Honolulu

 

Luna Hoolimalima no na Rumi, na Hale, a me

Luna Kuai me Hoolimalima o na Waiwai

Paa ma na wahi a pau o ka Paemoku.

Luna imi Hana no ka poe a pau i ele

i ka hana ole ma na wahi a pau i ake-

makeia ma kekahi mokupuni o

ka Paeaina.

            N. B.--Na Palapala Hoolimalima e hanaia me ka eleu ; e ohiia na Bila Aile a me na hana e ae a pau e pili ana i na hana Oihana kalepa me ke eleu a me ka pololei.  O na Unuhiolelo a me na Maheleolelo ana, e hookoia me ka maikai.  O na kauoha a me na kamailio ana maloko o na leta no kekahi o na hana maluna ae, e hookoia me ka eleu loa.      1076 1y

 

UA  MAKEMAKE  IA

 

NA ILI BIPI.

            NA KIWI BIPI,

                 NA IWI BIPI,

 

E haawi ia no ke kumukuai kiekie o ko kakou makeke nei e  H.  HACKFELD  &  CO.

 

A  HOOLAHA  KUMAU.

 

KA  MIKINI

 

HUMUHUMU  LOLE

 

MAIKAI

 

ST.  JOHN

 

E LOAA NO MA KA @

 

MR.  GEO.  F.  WELLS

 

---

 

O ka Mikini Humuhumu @ @

 

loa keia, i hiki ke @ @

 

hope, a i ikeia ma ka Pae Aina

 

Hawaii nei.  He M@

 

maikai loa no na ka

 

naka  Hawaii,

 

he mikini

 

luhi

 

ole.

 

---

 

KUMUKUAI  $ 55.00

me Hookahi Gita (Ki-

ka)  hookani maikai

loa makana.

 

---

 

O ka poe ma na kuaaina e ake a @ @

keia ano mikini humuhumu, e @ @

kou i ke dala ia

 

GEO.  F.  WELLS

 

ma Honolulu, a nana no e @ @ @

hi i makemakeia, me na m@ @ @

moku, me ke kaki ole ia o ka @ @

mekini la.

 

  O ka oe a pau e holo ma@ @ @

lu nei, mai poina lakou i ke kipa ana o

halekuai o

 

GEO.  F.  WELLS

 

Ma Alanui Papu, a e kilohi ia @ @

humuhumu la, oia ka

 

Royal  St.  John

 

Eia pu no me ia na pila hookani na ano

pau, o ka loaa koke ana mai @

no ia mai Amerika

a me Europa

mai, oia

 

Na Pila Guitar ( Kika ), he 150 ka @

 

mai ka $5 a hiki i ka $125 ke ku

 

mukuai o ka pila hookahi.

 

200 Koliana mai ka $2 a hiki i ke @

 

ke kumukuai o ka pila hookahi.

 

100 Ohe Puluka, $2.50 a hiki i ka @

 

ke kumukuai o ka ohe hookahi

 

12 Pahu Hookani nunui, a me 25 P@

 

Hookani liilii, a me na ano mai @

 

keleawe a pau, e loaa no ma kau ha

 

lekuai i hoikeia maluna me ae

 

KUMUKUAI  EMI  WAIPAHE

 

Na Piano nunui maikai e loaa ai

 

me ke Kumukuai Emi Loa :

 

ike ole ia ma Hawaii nei

 

---

 

  He nui aku no na mea i koe na kela a me keia e kilohi nona iho ke ma ae ma ko ʻ u halekuai ma Alanui Papu

 

  E hookoia ka makemake o kela ame keia me ka eleu.

 

            GEO.  F.  WELLS.

 

1094  tf                      Alanui Papu.