Ka Nupepa Kuokoa, Volume XXII, Number 22, 2 June 1883 — HE HANA NUI. [ARTICLE]

HE HANA NUI.

Ma kahi mau lono i hoea mai io makou nei, me he la, he hiki ke hooia ia na manao hopohopo o kahi poe naauao o ka aina nei, no ka ulu ana mai o kekahi ninau hooponopono hohonu e pili ana i ka mokuahi Madarasa, mawaena o ke Aupuni o Hawaii nei a me ke Aupuni o Enelani. Ua oleloia, he hana nui aku ana keia ma nei hope aku, a ua hoomaka iho nei na Luna Aupuni o Enelani e noho nei ma Hawaii nei e lawelawe ma ka imi ana i ka pono a me na kuleana a pau o ko laua aupuni ma na lawelawe ana o ke aupuni Hawaii i na hana i pili malalo o ka hae Beritania. He mea ku no keia i ka hopohopo; aka, o ke kali wale aku no nae ko kakou no ka hopena. Ina he oiaio keia mea, alaila, e komo kukonukonu ana o Hawaii iloko o kekahi hana nui koikoi a kaumaha, a he paakiki loa ke ala e hiki ai ka hookele a puka hou iwaho me ka laelae.