Ka Nupepa Kuokoa, Volume XXII, Number 22, 2 June 1883 — KAHI MANU KANIKANI. [ARTICLE]

KAHI MANU KANIKANI.

E KUOKOA; Aloha oe— Ua hoea mai nei o Kaulainamoku, ua hele a kuululu. E hoike ana i kona manao hilinai ia Kipikona a hilinai ole ia Rev. H. H. Paleka. Ea ! nani ka hanohano o Kipikona i ka hilinai ana o ke kilo nana lima o na poopoo o Kepohoni. A e poino ana paha o Rev. H. H. Paleka no ka hilinai ole ana o keia kakaolelo kaulana o na pipa alanui. He keu no hoi o B. W. Kaulainamoku. Nui kona hooio. E kaena mau ana i kona naauao. Oia anei ka mea i loaa ole ai kekahi oihana kiekie a naauao iaia? Oia anei kona noho ana maloko o kela poopoo ma Kepahoni? Ua oi io anei kona hilinai ia mamua o Nalimaapa ma? Hilahila ole, ka hele auwana wale ma na ipuka hale e noi dala ana no ka nana ana i na kahakaha o ka lima a hai hoopunipuni ae la—e waiwai ana oe; e mea ana oe; e mea ana a mea iho a mea ae. Ka hupo nui. E ka haukae, ua kaupaona ia oe a ua hooiaio ia kou olohaka. Mai hokae hou. MEAKAUPAONA.