Ka Nupepa Kuokoa, Volume XXII, Number 23, 9 June 1883 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KA NUPEPA

KUOKOA ME KE AU OKOA.

[I Huiia.]

No ka Makahiki...............................$@ 00

@@ Mahina.....................................  @ 0@

Dala Kuika ka Rula.

 

POAONO, IUNE, 9, 1883.

 

FOR ME HE CARETH.

Leo. Paradise.  Gospel Hymn. No @87.

            1

  Aloha Iesu, aloha ia'u,

  A make oia no'u.

  A kena aloha oia ia'u

  E lilo nona a mau.

Cho.  Mai ke kea hea Iesu,

  Hele @@ a hahai pu.

  Nana ia@@@ lele pau,

  I ola n@@ mau a mau.

 

            2

  Kahea ia, kahea ia'u,

  Ma o'u nei e maha 'i.

  E ke ae au a hele no,

  A maha pomaikai.

Cho. Mai ke kea, &c.

 

            3

  Hookipa ia, hookipa ia'u,

  H@ lawehala nae

  Hoomaemaeia a kau ka lei

  Maluna o kuu lae.

Cho. Mai ke kea, &c.

 

            4

  Kai oia, kai malie ia'u.

  I kahi kula lae,

  A hanai ia, a hanai ia'u,

  A kiai a maikai.

Cho. Mai ke kea, &c.

 

            5

  Hoala ia, hoala ia'u

  Ke hiamoe e.

  Paipai no oia, paipai ia'u

  I ala koke mai.

Cho. Mai ke kea, &c.

 

            6

  Kauoha ia, kauoha ia'u.

  E hana nona no.

  A koi kona aloha ia'u

  E hana no hai pu,

Cho. Mai ke kea, &c.

 

            7

  He kupanaha kuu Iesu,

  Aole lua, e.

  Maluna, a ma ke ao pu no.

  Pookela oia nei.

Cho. Mai ke kea, &c.

            HAWAII.

 

HAAWINA KULA SABATI.

 

HELU 13. SABATI IUNE 24.

 

  Kumuhana, ka Hoi Hope Ana.  Pauku Baibala, Oih. mok. 8:14, malaila aku a hiki i ka mok. 14, a pau ia mok.

 

  Pauku Gula.  Mar 16; 15.

  Manao nui.  No ke ao nei a pau ka Euanelio.

  Na heluhelu la.  1,Oih. 8; 14-40, 2,Oih. 9: 1-42, 3.Oih. 10; 1-44, 4, Oih. 11; 1-30, 5,Oih. 12; 1-25, 6,Oih. 13; 1-52, 7, Oih.  14; 1-28.

  Ka manawa.  A.D. 37 49. 13 makahiki.

  Kahi i hanaia ai, Ierusalema, Samaria, Damaseko, Anetioka, Kupero, Asia Uuku.

  Na 'lii.  Galigula, Kelaudio, Kaisera, na Emepera o Roma, Kumanu Herode, &c. na Kiaaina.

  Mele.  "Hamau" Hoku Ao Nani p. 147.

  Pule hoomaikai no na mea i hanaia, &c. iloko o keia hapaha.

  KA WEHEWEHE A NINAU ANA.

  He Hoike aha keia? Ka Hoike ehia keia o ka mak. 1883?  Mahea ka Hoike mua?  Ehia mokuna o Oihana i pau @a ia Hoike?  Heaha ka hana nui ma na makahiki iloko o ia Hoike?  Ke kukuluia ana o ka ekalesia karistiano.  No na makahiki ehia ia mau hana?

  No na makahiki ehia na hana iloko o keia hapaha i hala, oia hoi ka hapaha elua?

 

NA MAHELE.

 

   I      Ka hoonuiia ana o ka Ekalesia Karistiano.

 

  Owai ka mea nui i hookomoia iloko o ka ekalesia? Heaha ke ano mua o Saulo? Nohea ia? Mahea Tareso? Mahea Kikilia? Mahea Asia Uuku?  He kanaka naauao Saulo, ua hana naaupo nae.  Heahaia hana naaupo?  Iaia e hoomaau a pepehi ana i na haumana a Iesu. Heaha ka mea kupanaha i loohia'i oia ma ke alanui?

  Nawai oia i babetizo?  Heaha kana mau hana karistiano mua?  Mahea?  Owai kekahi diakona i lilo i haiolelo?  Mahea Pilipo i haiolelo ai? Heaha kana hana ma Samaria?  Owai ka i hele e kokua?  Owai ka i makemake e kuai i ka Uhane Hemolele? No ke aha? Owai ke kanaka ma Aitiopa i huli mai? Ma ke aha i huli mai ai oia?

  Owai ka luna koa no Italia i lilo i karistiano?  Hai mai i ke ano o kona huli ana. Owai kekahi lala mua o ka ekalesia i lilo i misionari?  Barenaba paha.

  Owai ka wahine kaulana no ka hana manawalea ana? Heaha na hana a Doreka?  Owai ke Kiaaina i hoohuliia mai?  Owai ke kanaka ui no Lusetera i huli mai a lilo i hoahana me Paulo? (Hoakaka.  Na ke Kahu e puunaue aku i na Ninau i na papa, i na haumana, %c.)  Mele.

 

  II      Ka hoonuiia ana o ka ekalesia me na hana mana.

 

  Na hana kupaianaha.  Ma ka hana kupaianaha aha i huli ai Saulo?  Owai na hihio elua i kakauia?  Ko Petero me ko wai?  Owai ka i kuhikuhi ia Korelenio i ka mea e pono ai oia?  Heaha ka wanana i hookoia?  Owai ka mea i make, a ua hoola hou ia?  Owai na mea mai i hoolaia?  Na pule owai ka i hooko kokeia?  Ka pule a Korelenio, me ka pule no Petero.  Mahea Petero ia wa?

  Owai na mea elua i hoomakapoia no ka manawa pokole?  No ke aha hoi?  Heaha ka like me ka like ole o Saulo me Eluma? Ia wai ka haawi ana i na haawina mana o ka Uhane Hemolele?  I ko Samaria poe, i ko Korelenio poe, &c.

  He mau mea aha keia mau hana mana, hana kupaianaha?  He mau mea hooiaio mai ke Akua mai, ka hoomana karistiano ma ko Iesu ala hou ana mai ka make mai, &c.

 

  III Ka hoonuiia ana o ka ekalesia iwaena o na mea keakea

 

  Pehea i lilo ai ka hoomaau ana ma Ierusalema i mea e hoolahaia ai ka euanelio?  Owai ka i hoohuliia mai iaia e hoomaau ana?  Mahea ko Paulo hoomaau mua ia ana?  Ma ke aha hoi oia i hoopakeleia ai?  Mai na kulanakauhale ehia i kipakuia ai Saulo ma ka hoomaauia ana?  Mahea i kapaia ai Paulo ma i mau Akua?  Pehea laua i pakele aku ei ia inoa?

  Owai ka haumana a Iesu i pepehiia e Herode?  Herode hea keia?  Owai ka haumana a Herode i hoopaahao ai?  No ke aha?  Pehea ko Petero hoopakeleia ana?  Owai ka poe i hoomaau nui ia Paulo?  Kona lahui no, ea.  Kupanaha?  Owai na kilo elua i keakea i ka hana ekalesia?  Simona, a owai?  Heaha ko laua hope?  Mele.

 

  IV  Ka mahuahua ana o ka ekalesia.

 

  Ia wai ka haiolelo mua ana?  I na Iuadaio paha.  Ka lahui no na mai Iesu.  Ma ke aha i ae ai na Iudaio e hui pu ko na aina e me lakou?  Owai ka mua o ko na aina e i huli mai?  Ma ke aha i ae ai Petero e hele e ao ia Korenelio ma, a e babetizo ia lakou?  Ma ke aha i hoike ai ke Akua i kona hoapono ana i keia hana a Petero?  Mahea ka huli alua ana o ko na aina e?  Owai ka i hookaawale mua ia no ka oihana misionari?

 

  V Ka Oihana Misoinari.

 

  He misionari anei kekahi kaula kahiko?  Ua kauohaia Iona e hele ihea?  No ke aha?   He ano misionari paha ia.  Aka, aole i hiki mai ka manawa e hoomaka ai i ka hana misionari ponoi.

  Owai ka misionari mua?  Mae hea mai ko Iesu hele ana mai?  Nawai i hoouna mai?  A ihea? E aha? Ia wai ka Iesu kauoha ana e hele e ao i na lahuikanaka a pau.  Ehia makahiki i hala mamua o ka hiki ana mai o keia kauoha?  Ma ka nana 'ku owai ka misionari mua, Petero anei?  Pilipo paha?  Hele Pilipo ihea? Hele Petero ihea?  Koho ke Akua ia Paulo i lunaolelo nowai?  Nawai i olelo.  E hookaawale ia Paulo me Barenaba no ka oihana misionari?  A nawai laua i poni a hoouna aku no ia oihana? Owai ka waenakonu o keia oihana?  Hai mai i ke ano o Anetioka.  I ka hele ana o Paulo laua me Barenaba mai Anetioka aku, ma ke kaahele misionari mua owai ka i hele pu?  A ihea ka holo mua ana?

   O ka mea i paanaau e ku a kuhikuhi i na wahi i hele ai Paulo ma, i ka hele ana aku, i ka hoi ana mai, me na hana, me na pilikia ma kela a me keia wahi, a hiki hou i Anetioka.

 

Ka heluna o na Hua.

  Ehia mak. mai ka hookumu ana i ka ekalesia  karistiano a pau keia hapaha ekolu? 20. Ma na aina hea i haaia aku ai ka olelo a Iesu?  Mahea i kukuluia ai a hooponoponoia na ekalesia?  Pehea ka nui me ke ano o ka poe i huli mai?  Uuku anei ia ke hoohalikeia me ka hana misionari iloko o na makahiki he 20 i hala?

  Na manao paipai.

  Mele.  "He Leo Kahea." Hoku Ao Nani p.140,

  Pule no ka hapaha e hiki mai ana.

  Haawina no Iulai I, Iosua 1; 1-9.

 

MOOLELO AHAHUI O MAUI.

 

  Halawai ka Ahahui Lunakahiko ma Wailuku Mei 2, 1883.  Rev. W.P.Kahale ka Lunahoomalu a o O. Nawahine ke Kakauolelo.  Weheia na hana ma ka himeni a me ka pule.

 

  Ekalesia.       Kahu.             Lunakahiko.

  Paia,            Rev.J.P. Kuia, A. Kualii.

Haiku,            Z.S.K.Paaluhi,            H.Kawaimaka.

Huelo,            P.Keaupuni,    -

Hana,             J.K.Iosepa,                  -

Kipahulu & Kaupo,     -           Kawaiaea.

Honuaula,        -           Pakualani.

Waikapu,         S.Kaili,            Naonohielua.

Wailuku,          D.Keaweamahi,          J.Haole.

Waihee,           O.Nawahine,   D.Kapai.

Honokohau,    -           B.Nakoaka.

Kaanapali,       J.K.Hihio,        Wainui.

Lahaina,          A.Pali,             P.Kamanonui.

Olowalu,         S.K.Kamakahiki,         -

Kaluaaha.        -           Heneri.

 

  Na lala mau, Rev. W.P, Kahale, Rev. W.P.Alexander.  Ma ke noi ua lilo o Kaiwi i hoa kuka; koho ka Lunahoomalu ia Kamakahiki, Paaluhi, a me Pali i komite hoonohonoho hana, a ia Keaweamahi, Kaili, me Haole, i komite imi haawina.

  Hoike mai ke komite imi haawina. 1 hapaha hora haipule, 2, na hoike kihapai, 3, heluhelu haawina, 4, na palapala hoopii, 5, ke Kula Kahunapule, 6, na ekalesia, 7, hoike a na komite mau, 8, ke ola kahu, 9, na elele o keia aha no ka Aha Euanelio o ka Paeaina ma Honolulu, 10, komite hoike o na kihapai a me ke kulana o keia aha i ka Ahahui nui ma Honolulu.  Aponoia ka hoike a ke komite.

  Na hoike kihapai.  Na Kuia, Keaupuni, a me Iosepa i hoike mai i ko lakou kihapai: noi mai o Pali e apono aku ka aha i ka palapala hookohu o Manase, mai ka Ahahui mai o Hawaii Komohana: aponoia.

  Noi mai o Alexander e hookuu aku keia aha ia Rev. J.M.Alexander a e hui aku oia me ka Ahahui nui o Kapalakilo; aponoia.  Hoopanee ka aha.

  Hui hou ka aha ma ka hora 1 me ka hapa.  Koho ka aha ia Keaweamahi i Kakauolelo no ka manawa.  Na ke kakauolelo i heluhelu mai i ka hoike o Kipahulu me Kaupo, na Nakoaka i heluhelu mai no Honokohau, na Hihio i heluhelu mai no Kaanapali.  Pali, no Lahaina.  Kamakahiki no Olowalu.  Manase no Kaluaaha.  Pakualani no Honuaula, Paaluhi no Haiku.

  Hapai ka aha i ke kumuhana 4.  Na palapala hoopii.  He palapala hoopii na Kauwe e noi ana e hookuu aku iaia mai ka aha aku; a hooleia a no ia wa aku.  He palapala hoopii na ka ekalesia o Kaluaaha, e kahea ana ia Manase i kahu no lakou: waihoia i ke komite.

  He palapala hoopii na Puhi e noi ana e hookuuia oia no ka elemakule; waihoia i ke komite.  Hoopanee ka aha.

  La hana 2.   Halawai ka aha elike me ka mau.  Hoike mai ke komite o ka palapala kahea kahu o ka ekalesia o Kaluaaha; ua apono ka aha, a ua haawiia ua palapala la i ke kahu i kaheaia.  Kohoia i komite nana e hoonoho iaia i kahu.  Na Haole i hoike mai no Wailuku, Kaili no Waikapu, Kawaiaea no Kaupo; ma ia hoike ua ikeia ka pilikia o ke kahu; ua waiho oia i ka onawali a ka pilikia a ka mai no na mahina elima a iloko o ia manawa, aole he wahi kokua iki a ka ekalesia, nolaila, ua ulu ae na manao aloha iloko o ka aha, a lulu lakou no ia kahu a loaa na dala he 52,65, a ua hooholo ka aha e haawi ae ka Papa Hawaii na ua kahu la i 50. dala.  Na Nawahine i hoike mai no Waihee, a hoopanee ka aha.

  La hana 3.  Halawai ka aha elike me ka mau.  Kohoia o Paaluhi i kakauolelo no ka manawa.  Hoike mai ke komite o ka palapala noi a ke kahu o Kipahulu; aponoia e ka aha ka hoike a ke komite.  Noonooia ke kumuhana 8.  Ke ola kahu.  Kukaia a ua hoomauia ka olelo hooholo mua.  Kumuhana 7; ka hoike a na komite mau. Hoike mai ke komite no ke koena aie o ka ekalesia o Honuaula. Hoike mai ke komite no ka palapala hoopii a ka ekalesia o Paia e hoopau i ko lakou kahu.

  3  Ua hanaia keia Palapala Hoopii e kekahi enemi, a lawe hele aku la e kakau inoa ia mai.

  4  Ua lokahi ka manao o na haumana a pau aole o lakou e kue i ke kahu.  O Nawahine.  Komite.  Hoike mai ke Komite hookohuia o S.Z.K.Paaluhi, i kahu no ka Ekalesia o Haiku.  Nov. 5, 1882.  Ua lawelawe ko oukou komite i kei hana, J.K.Iosepa,  P.Keaupuni.  Komite.  Hoike mai ke Komite.  Ua hookohu pono ia o D.Keaweamahi, i kahu no Wailuku, a me S.Kaili i kahu no Waikapu, W.P.Alexander.  O Nawahine W.P.Kahale.  Komite, D.Kapoi, J.Haole, Henere, Hao, Kawaimaka, i mau Elele no ka Ahahui nui o ka Pae Aina no Honolulu.  Hoopanee ka Aha apopo hora 9. Pule o P.Keaupuni.  La hana 4 Mei, 5. Akoakoa hou mai ka Aha, malamaia ka hapa hora haipule, heluheluia ka moolelo mua a aponoia.  Kumuhana 10.  I mau Komite i ka Ahahui nui ma Honolulu, D.Keaweamahi.  E hoike no na Kihapai, na S.Kaili, no ke kulana ano nui a me na hana a keia Ahahui.  Kumuhana 6.  Na ekalesia kahu ole: kohoia o Manase, no Pelekunu, Wailau, a me Siloama.  a ua hoomauia na komite mua.

  Hookuu keia Aha ia Mr. Leina a hui pu aku me ka Ahahui o Kapalakiko.  Kumuhana 5.  No ke kula Kahunapule.  Ua lawe keia Aha e kokua aku i ka kula Kahunapule $150.00, Penei na mahele.  Lahaina, $14.00 Olowalu.  $5.00 Kaanapali, $6.00, Waihee, $14.00 Wailuku, $14.00 Waikapu, $7.00 Honuaula, $5.00 Kipahulu, & Kaupo, $10.00 Hana. $10.00 Keanae, $5.00 Huelo, $10.00 Haiku, $10.00 Paia, $5.00 Kaluaaha, $14.00 Halawa, $10.00 Honokohau, $4. Pelekunu Wailau, $7.00.   Pali, Iosepa, Haole Komite.  Kumuhana 4  Heluhelu Haawina.  Na ke kakauolelo i heluhelu mai i ka Paaluhi Haawina, na Kaili i kana Haawina, hoomaha ka Aha, a hoi hou mai ma ka hora 1 1/2.  Noho hou ka Aha e like me ka hoopanee ana.  Hoike mai ke komite o na Haawina.  1 O ka Bapetizo ana i na keiki a ka poe i hoahanau ole, ua ku anei ia i na kauoha a ka Haku? Paaluhi.  2 O ka uwao ana a ko kakou Haku, he oiaio anei ua kaawale aku na poino mai o kakou aku, Kaili.  E hoomau ia na Haawina i heluhelu ole ia.  Keaweamahi, Kaili, Haole, Komite.  Ninaninau ia ke keiki a ka Aha.  Hooholoia, e hoi aku oia a lawelawe pu me na luna ma na hana ekalesia, a e noho pu aku me Iosepa ma ka ao ana.  Waiho mai o Iosepa he olelo hooholo.  Hooholoia.  E mahalo aku keia Aha i na Ekalesia o na Waieha,  no ko lakou malama pono ana i na hoa o keia Aha, i na mea maikai, a mikomiko e oluolu ai ko lakou mau ola kino.  Waiho mai o Keaweamahi he olelo hooholo. Hooholoia.  E malama mai na Ekalesia i na komite hoeueu e kipa aku ana i o lakou la, ma na mea e pau ai ko lakou mau pilikia.  Heluheluia ka moolelo hope a aponoia.  Noi mai e hookomo i ka moolelo o ka Aha, ma ka NUPEPA KUOKOA. Hookuu ia keia Aha, a huo hou mai ma ka Poakolu mua o Nov. 1883, me ka Himeni a me ka pule.

            O NAWAHINE.

            Kakauolelo.

 

HAAWINA HELUHELU NO KE KULA SABATI O MANOA.

 

Heaha la na kumu e holo mua ai ke Kula Sabati o Manoa?

  O ke Kula Sabati, he hana ihiihi, anoano, eehia no keia, me he mea kino la i hiki ke lawelawe ia; aka, aole nae pela. Aole ia he mea kino moakaka lea, i hiki ai i na ike i loaa i ke kenaka ke hoohana. He kumuhana nae i hoomaopopoia, he kukohana wale iho no, aole nee imua, aole hoi i hope.

  Nolaila, i wahi hoohalike moakaka ia kakou.  Pehea la e holo ai ka moku?  E hoolako mua i na hemahema, na pea, na mea ai, na sela; na mea pili i ka holo moana, ka makani, ke Kapena; a lako keia mau mea, alaila, e holo auanei ka moku.  Pela auanei hoi ke aupuni; aia a ulu ka lahui, ka oihana mahiai, ke kalepa waiwai ana mawaena o na aupuni, a he nui wale aku na mea i koe, a pela no hoi paha ko kakou kumuhana.

  Heaha la na kumu e holomua ai ke Kula Sabati o Manoa?

  E hoohui i na apana hana a pau i kahi hookahi, alaila, e holo auanei ke Kula Sabati.  E nana aku kakou i ka hale, oia no ka hoohuihui ana o ke kamana i kana mau apana hana, kui, papa, o'a, pou, a lilo ia he mea nani he hale, Pela no ke Kula Sabati; aka, mamua ae o ko kakou hiki ana aku i ka pahu hopu o ko kakou kumuhana, ua hookahua mau au i ko'u manao, oia hoi keia:

  Ke koi maoli ia mai nei kakou e komo iloko o keia, ma ke Kula Sabati;  aole nae me ke kino, koe ka manao, koe ka ikaika, aole nae o ka ikaika hakaka, koe ka uhane, koe ke keiki.  O na apana hana i olelo ia, oia no na makuakane, na makuahine, a me na keiki, na alakai, aole o ka wahine wale no, koe ke kane, koe ke keiki; ha hele hoi paha ko ka wahine, uwe hoi ke keiki, a he kaohi hoi ka ke kane.  Nolaila, e lokahi wale no ke kupono o ka makuakane, ka makuahine, a me na keiki pu, na kumu Kula Sabati, na luna ekalesia, ke kahu Kula Sabati ke alakai ma na kula himeni, ka hoomoakaka ana ma na mea o ka olelo a ke Akua, alaila e holomua auanei ke kula o Manoa nei.

  Ua lawa paha keia wehewehe  ana ma ko kakou aoao nei, a ma ko Iesu kokua ana mai e hiki ai ia kakou ke hoomau aku a hiki i ka hopena, a e mahuahua auanei ka holomua ana o ka pomaikai o na kanaka, a e ohi mai i na hua ono ma kela ao pau ole.  E like me ka Iesu:  "Owau pu no me oukou i na manawa a pau a hiki i ka hopena o keia ao."  Mataio 28:20. Ioane 14:18.  "Aole au e haalele ia oukou a nele, aka, e kokua mai no oia i ka poe a pau e hana ana i kona makemake."  Eia ka Paulo.  "Mai hoopalahea i ka hana maikai, no ka mea, i ka wa pono, e ohi auanei i ka hua." Eia hou.  "O ka mea ike i ka hana pono, a hana ole, he hewa ia no kakou e na koa kula Sabati o'u o Manoa nei; e hookanaka a e hooikaika kakou, a mai paupauaho, o nele auanei.  Me ka mahalo.

            L.W.KAHELEULA.

 

HEAHA NA KUMU E KEAKEA AI I KA HOLO MUA ANA O KE KULA SABATI O MANOA.

 

I o'u hoa o ke Kula Sabati o Manoa nei, ua ili mai maluna o'u ka hanohano nui e pane aku i ka haina o ka ninau e kau ae la maluna a me na wehewehe kupono.

  Mamua ae o ko'u hai ana aku ia ka haina o keia ninau; he pono no'u e kala mua ia mai e oukou, i na ua hemahema ka'u mea e hoike ai.

  Maanei, pono no ke ninau - O ke Kula Sabati, heaha ia?  Haina.  Oia no ka hui ana o ke Kahu Kula Sabati me na kumu Kula Sabati, na haumana Kula Sabati a me na Pokii.

  Maloko o keia haina, aole i kaawale o Kahunapule, a me na Luna o ka Ekalesia a me na hoahanau, no ka mea, o lakou no na koo a me na apo kupono o ka oihana Kula Sabati.

  O ke Kula Sabati, oia no kekahi Haawina ano nui o ka Ekalesia e hoonaauao ai i na makua me na keiki, a me ka poe hoi e auwana wale ana iloko o ka pouli,k he kumu no hoi e hoomalamalama kupono ia ai ma ka pono o ke Akua, i ike ai lakou he ola ko lakou iloko o Iesu Karisto.

  Maanei, ua hiki mai kakou i kahi o keia ninau e kau ae la maluna, oia hoi keia:  "Heaha la na kumu e keakea ai i ka holomua ana o ke Kula Sabati?"

  Haina.  Oia no ka hui pu ole o na Kumuhana malalo o ka manao lokahi.

  I mea nae hoi e moakaka ai ia kakou ina he mau kumu kupono ia, a ina paha aole, eono mea e hoomaopopo ia.

  1  Na Luna o ka Ekalesia.  O lakou no na koo a me na apo o keia oihana Kula Sabati.  Ia lakou i noho ai ma o ko lakou mau apana ekalesia iho, aia no o Kula Sabati malaila.

  O Luna Ekalesia, he elele ia o ka malamalama e hoomalamalama ana i kona apana iho, ia lakou no ka paipai ana i na hoahanau kane a me na hoahanau wahine, na makua me na keiki, i ka poe auwana a pela aku, ka hoohuli ana mai ia lakou mailoko mai o na manao palaka, ka hoohauoli ana ia lakou e hele i ka pule a me ke kula Sabati.  Ina hoohana ole na luna i keia apana hana, alaila, pehea lakou e hiki mai ai; i na aole lakou e hiki mai, alaila, mahea iho la ke Kula Sabati e hiki ai.  He mea maopopo he kumu keakea keia i ka holomua ana o ke Kula Sabati.

  2  Na Kumu Kula.  Oia no ka ma kua o ka ike naauao e hanai ana i ka ike i kana mau keiki, a ua hahai lakou mahope o kana alakai ana, a oia no kekahi luna paipai kupono no kana mau keiki, no ka hele ana i ke Kula Sabati, elike me Nohoua o Waikiki-kai, ina ua hana ole na kumu kula a paipai ole i kana mau haumana, ao ole paha i kana mau haumana i na himeni Kula Sabati i mea e hoohoihoi ai i kana mau haumana no ka hele ana i ke Kula Sabati, ina ua hana ole ke kumu kula a ao ole i kana mau haumana pela, he mea maopopo, ua hele auwana wale no keia mau keiki i na la Sabati a pau.  O ka mea maopopo, he kumu keakea keia i ka holomua ana o ke Kula Sabati o Manoa nei.

  3  Na makuakane, na makuahine, na kupuna, na makua hanai, o lakou no na alakai kupono no ka lakou mau keiki a me lakou iho; ina ua noho lakou me ka palaka, molowa i ka hele i na pule Sabati, a me na halawai, a nele paha i ke ao ana aku i ka lakou mau keiki i na mea e pili ana i ke Kula Sabati.  He mea maopopo ua haule pu no hoi ka lakou mau keiki mahope o ko lakou molowa, oia kekahi kumu e keakea ai i ka holomua ana o ke Kula Sabati o Manoa nei.

  4  Na Kumu Kula Sabati.  O lakou no kekahi mau alakai ikaika ma ke kono ana aku i na makua me na keiki e hele i ke Kula Sabati, a he mau komite kupono i ka paipai ana a me ka hoolana manao; a ina ua hoohemahema lakou i ka lakou mau apana hana, oia hoi ka wehewehe pono ana i ke ano o na haawina baibala i mea e naauao ai na makua me na keiki, ka honaauao pono ana ma ka alakai ana ma na himeni Kula Sabati ka haawi ana i na olelo hoolana a me na mea e hauoli ai.  Ina ua hana ole na kumu kula Sabati, pela, he mea maopopo ole na kumu keakea no ka holo mua ana o ke kula Sabati o Manoa nei.

  5  Na lulu Kula Sabati. Ina ua hoomau ole ia na haawina lulu Kula Sabati, a ulu ole keia apana hana, alaila, pehea la hoi e hoopauia ai na hemahema e pili ana i ke Kula Sabati, a he kumu keakea no ia i ka holo mua ana o ke Kula Sabati o Manoa nei.

  6  Makaukau ole na buke Kula Sabati - Oia no na buke na Himeni.  Ina lawa pono ole na haumana ma keia mau haawina buke i hoike ia, he kumu keakea no ia i ka holo mua ana o ke Kula Sabati o Manoa nei.

  Ina hoohuiia keia mau kumu hana alaila, loaa no ko kakou haina, oia hoi keia.

  Oia no ka hui pu ole o na kumu hana malalo o ka manao lokahi.

            J. PANIANI.

 

NA MEA HOU O KA PAIAALA O PUNA.

 

Ma ke Sabati la 15 o keia malama, ua hoonohoia o Rev. S.P.Kaaia i kahu no ka ekalesia Hui o Kalapana me Opihikao, e like me ke kahea a ka ekaleisa iaia imua o ka Aha ma Hilo, na Rev. J.H.Pahio me J.N.Kamoku i hoonoho iaia i kahu, ma ke ano komite.  Ua pau ko makou pilikia nele kahu ua loaa ke kahu ikaika ma ka hana.

  Ma ka la 17 o kela malama, oia ka Poaha, oiai ka waapa o W.H.Shipman e hoopuka aku ana mai ke awa aku o Kula, ua pii mai la kekahi nalu nui a poi iho la iluna o ka waapa, a o ka wa no ia i wihia ai ka waapa me na kanaka iloko o ka nalu a nahaha liilii ka waa pa, aole apana lawe.  Elima kanaka o ka waapa, hookahi kapena oia o Capt. J.A.Kahunanui, eha kolu.  Ua aneane paupauaho loaia keia poe, oiai na ale huhu o ka moana e paialewaia ana na kino, aka, aole nae he ola i poino.

  O ka waiwai io o na waiwai i poho, he ekolu haneri dala a oi.  Ua hoopihaia ka waapa me na pono kino o W.H.Shipman me ka ohana, oiai e hoi loa ana ua keiki lalawai nei o Puna i Hilo.

  Ke pii awiwi nei na hale laau o Puna nei; mawaena o ka poe malama dala keia hana; a ke nana aku i na hale me he mau kapa keokeo la ke kuakea mai.  E ko ka Paiaala, imua kakou a noho i na home maemae.

            J.N.KAMOKU.

            Paiaala o Puna, Hawaii.

 

  Ua ku mai ka mokuahi lawe leta Zealandia mai na Panalaau o ka Hema mai i ke kakahiaka o ka la Sabati nei, a ua holo loa aku oia no Kapalakiko i ka hora 12 o ka po, me kona lawe pu aku he mau ohua mai ko kakou mau poai aku.

 

NA HOOLAHA KUMAU.

 

ASA KAULIA,

LOIO A KOKUA MA KE KANAWAI

 

Jno. Lota Kaulukou,

LOIO A HE KOKUA.

901-tf

 

W.O.SMITH,

LOIO! lOIO!

Helu 36 Alanui Kalepa, Honolulu.

 

W.R.KAKELA,

Ha Loio a he Kokua ma ke Kanawai.

He Luna Hooiaio Palapala.

 

W.L.HOLOKAHIKI.

He Loio a he Luna Hooiaio Palapala.

Keena wehekealaula Alanui Betera. 1101tf

 

SAM.L.KAWELO.

LOIO! LOIO!

  KEENA HANA. Puakalehua, alahui Maunakea, Honolulu.           tf.

 

SAML.K.KAEO.

LOIO! LOIO!!

1195 1 yr.

 

A. ROSA

(AKONI.)

He Loio a he Kokua ma ke Kanawai.

A he Luna Hooiaio Palapala.  Keena hana, aia ma ke Keena o ka Loio Kuhina.

1101 1 yr.

 

S.B.DOLE,

He Loio a he Luna Hooiaio Palapala.

KEENA HANA - Ma Alanui Kaahumanu.

 

CECIL BROWN.

Loio a a he Kokua ma ke Kanawai.

A he Agena no ka Hooiaio ana i na Palapala no ka Mokupuni o Oahu.

Helu 8 Kahumanu, Honolulu, H.P.A. 2@1y

 

Richard F. Bickerton,

[PEKETONA.]

Loio a he Kokua ma ke Kanawai.

Keena hana Helu 23 Alanui Kalepa,

Elua puka ma o aku o ka hale kauka o Kauka Minuteole.

 

JAMES M.MONSARRAT,

[MAUNAKEA]

Loio o he Kokua ma ke Kanawai.

A HE LUNA HOOIAIO PALAPALA

Keena hana alanui Kalepa.

  Jan 3, 1880.  144-IV

 

KALE KULIKA,

Luna hooiaio

PALAPALA KUAI, MOLAKI

A ME NA PALAPALA OIA ANO.

Luna Hooiaio Palapala Aelike mawaena o na

Haku a me na Kauwa.  Luna Haawi

Palapala Mare.

Ma ke kihi o ke alanui Moiwahine ma Kaahumanu,

kulanakaauhale o Honolulu, ko Hawaii Pae Aina.

150-tf

 

C.C.COLEMAN,

Amara a he mea hana Mekina

Kapili Kapuai hao lio.

A ME KA

Hana ana Kaa Lio, etc.,

Hale Hana ma Alanui Alii,

905-tf  E kokoke la i ke Alanui Papu.

 

HALA TELA HOU!

KAUKAIWA

Helu 21, Alanui Nuuanu,

KOKOKE I KA UWAPO.

                        S.H@MEEKAPU.

Iune 22 1882.  1075tf

 

ANA AINA! ANA AINA!!

Frank Pahia a me

Samuel M. Kaaukai.

  KEENA HANA - Aia ma alanui Moi, kokoke loa ka Uwapo o Hooliliamanu.

1096 tf

 

MAKEMAKEIA.

  Ua makemake ia ka poe mea ILI KAO MALOO a me na ILI BIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.

            C. BREWER & CO. (Burua Ma.)

 

Joseph E. Wiseman,

LUNAHOOPONOPONO O NA WAIWAI PAA

- A ME -

Luna Imi Hana,

Helu 27 Alanui Kalepa, Honolulu

 

 Luna Hoolimalima no na Rumi, na Hale, a me Luna Kuai me Hoolimalima o na Waiwai Paa ma an wahi a pau o ka Paemoku.  Luna imi Hana no ka poe a pau i nele i ka hana ole ma na wahi a pau i makemakeia ma kekahi mokupuni o ka Paeaina.

  N.B. - Na Palapala Hoolimalima e hanaia me ka eleu; e ohiia na Bila Aie a me na hana e ae a pau e pili ana i na hana Oihana Kalepa me ke eleu a me ka pololei.  O na Unuhiolelo a me na Maheleolelo ana, e hookoia me ka maikai.  O na kauoha a me na kamailio ana maloko o na leta no kekahi o na hana maluna ae, e hookoia me ka eleu loa.

1076-1y

 

UA MAKEMAKE IA

NA ILI BIPI,

NA KIWI BIPI,

NA IWI BIPI,

  E haawi ia no ke kumukuai kiekie o ko kakou makeke nei e

            H. HACKFELD & CO.

 

NA HOOLAHA KUMAU.

 

KA MIKINI

HUMUHUMU

MAIKAI

ST. JOHN

E LOAA NO MA NA @@@

MR. GEO. F. WELLS

 

O ka Mikini Humuhumu @@@@

loa keia, i hiki ke @@@@@

hope, a i ikeia ma ka @@@

Hawaii nei.  He mikini

maikai loa @@@

naka Hawaii.

he mikini

luhi

ole.

 

KUMUKUAI $55.00

me Hookahi Gita (Kika) hookani maikai loa makana.

 

  O ka poe ma na kuaina e @@@ keia ano mikini humuhumu, e ha@@@@ kou i ke dala ia

 

GEO.F.WELLS

 

ma Honolulu, a nana no e h@@@@@@@hi i makemakeia, me na mea apau @@@@@ ka mikini, a nana e hookau @@@@@@@ moku, me ke kaki ole ia @@@@@@ mekini la.

  O ka poe a pau e holo mai ana @ Honolulu nei, mai poina lakou i ke kipa an @@@ halekuai o

 

GEO.F.WELLS

 

 Ma Alanui Papu, a e kilohi@@@ humuhumu la, oika ka

 

Royal St. John.

 

Eia pu no me ia na pila hookahi @@@ pau, o ka loaa koke ana m@@@ no ia mai Amerika a me europa mai, oia

 

Na Pila Guitar (Kika), he 150 ka @@ mai ka $5 a hiki i ka $125 ke @ mukuai o ka pila hookahi.

 

200 Koliana mai ka $2 a hiki i ka $20 ke kumukuai o ka pila hookahi.

 

100 Ohe Puluka, $2.50 a hiki i ka $15 ke kumukuai o ka ohe hookahi.

 

12 Pahu Hookani nunui, a me 25 @@@ Hookani liilii, a me na ano me@@@@ keleawe a pau, e loaa no ma @@@@@lekuai i hoikeia maluna me ke

 

KUMUKUAI EMI WAIPAHE.

Na Piano nunui maikai, e @@

me ke Kumukuai Emi Loa:

ike ole ia ma Hawaii nei

 

  He nui aku no na mea i koe, ma kela a me keia e kilohi nona iho, ke@@ ae ma ko'u halekuai ma Alanui Papu.

  E hookoia ka makemake o kela a me keia me ka eleu.

 

GERO. F. WELLS.

 

1094 tf            Alanui Papu.