Ka Nupepa Kuokoa, Volume XXII, Number 23, 9 June 1883 — HUI KALEPA O NA KANAKA HAWAII. [ARTICLE]

HUI KALEPA O NA KANAKA HAWAII.

Ke liuliu a hoomakaukau nei kekahi mau keiki lalawai o ua aina makani kaulana nei, e kukulu i Hale Kuai no lakou, malalo iho o ke poo e kau ae la maluna. Mai Kapaau a Kaipuhaa wale no ke komo, ua pani ia aku o waho. Ua hana lakou he mau kanawai a me na rula no lakou, a ua hooholo loa lakou ia mau mea a pau, a ua koho lakou he mau poo nui. Ua koho ia no hoi he mau komite imi hana elima, oia iho la na lala nui o keia Hui Kalepa. Ma ka Ahahui o ka la 25 0 kela mahina, ua lulu dala lakou, a hiki aku ka huina o na okeni i loaa i ka 1,056 o ka huina ia o na dala e wahiho nei ma ka lima o ka Puuku i keia manawa, aole nae i pau mai ka poe hookomo, ke manao ia nei e hala loa ana maluna o ekolu tausani, pela ka manao ke ae mai nae ka Haku mea hale. John. Mua. Kapaau, N. Kohala.