Ka Nupepa Kuokoa, Volume XXII, Number 28, 14 July 1883 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

Ka Nupepa Kuokoa a me Ke Au Okoa. [1 Huiia]

No ka makahiki...$2.00

Eono Mahina...$1.00

Dala Kuike ka Rula

POAONO IULAI 14, 1883

 

KA HOOPII LAIPILA A JOHN RICHARDSON

Ua lohe mua ko makou poe heluhelu i ka hoopiiia o J. U. Kaiwainui a me kona kaikaina o ka nupepa Ko Hawaii Paeaina no ka laipila. E ikeia ana ka moolelo piha o keia hihia ma kekahi mau kolamu kaawale o ka pepa o keia la. O John Richardson ka hope makai nui o Wailuku, Maui, ka mea nana i hoopii, a o ke kumu o kana hoopii, oia no kekahi leta i hoopukaia e Kawainui maloko o na kolamu o ka Pae Aina, a i kakau inoa ia malalo "Kamaaina oiaio." Mai Wailuku mai keia leta, a o ke ano e hoahewa ana i ka hope makai nui o Wailuku no kona lawe ana mai a hookipa iloko o kona ohana i kekahi wahine i manaoia e ka mea kakau leta he wahine ino, a he kupono ole ke noho iloko o na ohana maemae, a i waena hoi o na keiki opiopio. Ua manao o Keoni Likikini ua laipilaia kona inoa maikai ma keia hoolaha ana, nolaila, hoopii oia ia Kawainui, elua hoopii, he hoopii karaima a he hoopii poho. A ua hoopii no hoi oia i na ona o ka nupepa haole Hawaiian Gazette mai ia mau ano no elua, no ka mea, ua hoopuka ua nupepa he manao ano like me ko ka Paeaina, i kakauia mai Wailuku mai. Ua hanaia keia hihia imua o ka Aha Kiekie i ka Poakahi nei, imua o ka poe Kiure Hawaii. Ua lilo ka manawa o ka Aha a po ia la i ka nana ana i keia hihia. Aole liuliu ka noho ana o ka poe iloko o ko lakou rumi, a puka mai la me ka olelo hooholo, e i ana aole i hewa o Kawainui a me kona kaikaina. No ia kumu ua hoopau wale o Keoni Likikini i ka lua o kana hoopii ia Kawainui, a me kana mau hoopii a elua i na ona o ka nupepa haole (Hawaiian Gazette,) ua hoopau waleia. Iloko o keia hookolokolo ana a me keia hooholo ana o ke poe Kiure, ua lanakila o Kawainui a me kana nupepa maluna o na hoao ana a ke aupuni e uumi a e hoopio. A, aole oia wale, aka, he lanakila ana keia no ka pono ma keia aina maluna o na hoao ana a ka poe hana ino, e hoopio i kona mau waha olelo. Ma keia hope e hoomanao ana ka poe hana ino ma na wahi kiekie, he mea hiki i na nupepa ke hoolaha aku i ka lakou mau hana ma ke akea, ina ua pili ia i ka pono a i ka poino paha o ka lehulehu, Aole pono i na nupepa o ka aina ke uumi i ko lakou leo ke hanaia na mea lapuwale e na luna aupuni, a me na poe kiekie o na oihana e ae; no ka mea, i na e lapuwale ka poe malama i na oihana, o lakou ka poe alakai a hoomalamalama i ka lehulehu alaila, e hele hewa auanei na mea a pau. Eia kekahi, eia maluna o na poo kiekie o ke aupuni na hoahewa koikoi loa, ina ma o ka lakou alakai ino ana e haule ai ka lakou mau poe paa oihana malalo iho. O ka poino e hiki mai ana maluna o ko kakou aina, aole no waho mai ke kumu o ia poino, aka no kakou iho no, oia ka hopena e ulu ana mai loko ae o na hana lapuwale a ka poe nana e alakai ka lahui. A o na nupepa maikai nae, ua like me na maikai kiu nana e kiai a e pale aku i na mea e poino ai.

MAKE HIKIWAWE.

Ma ke ahiahi o ka Poakolu i hala iho la, ua hoopuiwaia ke kulanakauhale nei i ka lohe ana mai ua make emoole iho la o Mrs. Hannah Kaheleanoano Kaai, ka wahine mare a Hon. Simion K. Kaai, ma ko laua home, ma Kapalama. Ua loheia mai ua loohiaia keia pilikia mamuli o ka piha pihoihoi o ka kona manao no kekahi mea i ulu ae mawaena ona a me kekahi luahine o kona hale, a oiai ua loohia mua ia no oia me kahi mai ma kona puuwai, nolaila, ua hikiwawe loa ka pahu ana o kekahi o na mea hana ma ka puuwai, a haule iho la oia a make aku la iloko, o ka manawa pokole loa. Aole i maopopo ia makou kona moolelo, aka, ua ike no nae makou he wahine lokomaikai oia, he noho malie, a he malama i ka hanohano o ke kulana i loaa iaia. Ua 46 paha ka nui o kona mau makahiki. I ka la apopo e hoolewaia ai kona hopena.

HE AHA KA HEWA!

Ua ninau mai nei ka Elele Poakolu heaha ka hewa o na Kuhina? Ia wai la kana ninau? I ka lehulehu paha, a i kahi poe e ae paha, aohe maopopo. Aka ua hoike pinepineia ka hemahema o ka aha Kuhina, a hapa aha Kuhina hoi o keia wa, iloko o na nupepa, a ua hoomaopopo lea ia na kumu i pono ole ai ko lakou noho ana ma ka oihana. O ka pono ole o ka lawelawe ana ma ka oihana, he kumu kupono ia e hoopau ai, i na he oihana Kuhina paha. Ua maopopo loa, o ke kauwa hana pono ole, e aho e hoopauia oia. Ua ike anei ka Elele Poakolu, aohe Loio Kuhina o ko kakou aupuni i keia wa, a ke paaia nei ia wahi e ke Kuhina o ko na aina e! Ua ike anei ka Elele i keia? Mai kinohi mai o ka hookuma ana o ko kakou wahi aupuni, aohe i nele ke aupuni i ke kanaka kupono no kela a me keia oihana. Akahi wale no a ikeia ka wa i nele ai ke aupuni i ke kanaka kupono nana e noho ma ka oihana o ka loio Kuhina. Aole nae no ka nele o ka aina i ke kanaka kupono, aole o ia ke kumu o ka nele ana o ke aupuni i ka loio no kona keena oihana. Eia no ka poe makaukau ke noho nei. Aka, ua olelo ia aole kanaka maikai i aa e noho pu ma ka oihana me keia poe! Eia ka ninau, nawai la i hoolapuwale i ke kahua o ka oihana a ae ole ka poe maikai e noho ma ia oihana? O ka hoopaumaele ana i ko Hawaii inoa maikai, he hewa nui loa ia.

AHAHOOKOLOKOLO KIEKIE KAU O IULAI, 1883.

Imua o ka Meahanohano A. Francis Judd, Lunakanawai Kiekie O Ke Aupuni.

E like me ke kauoha ana a ka Aha ma ka hoopanee ana mai ka la i weheia ai ke kau, pela no i hookoia ai, a ua noho hou ma ka Poaha, Iulai 5, e like me ka hoopanee ana. Ua akoakoa ae na hoa o ka Papa Loio, na keonimana o ke Iure, a me ka poe a pau i pili i na hana. Ua hoomakaia na hana ma ia la, a penei ka moolelo o na hihia i hoolohe ia a hiki mai i ka la inehinei:

NA HIHIA HEWA I HOOLOHE IA.

Ke Lii kue ia Kong Lam, (Pake) no ka malama opiuma. He hihia keia i lawe mua ia e ko ke aupuni aoao imua o ka Ahahoomalu, a ua hoole ka mea hoopiiia i kona hewa, a ma ka hookolokoloia ana, ua ahewa ka Lunakanawai Hoomalu a kau ia ka hoopai hoopaahao me $150. Ua hoohalahala nae ka mea i hoopiiia, a ua hoopii hou imua o ka Iure. Nolaila, ma keia la, ua kukulu ia oia imua o ka aha, a ua heluheluia ka hoopii o ko ke aupuni aoao, a pau, ninauia kona hewa a hewa ole, a ua ae oia i kona hewa e like me ke hoopii. Ua noonoo ka aha no ka mihi ana o ka mea hoopii i kona wahahee ilalo, me kona hele kaokoa ana mai a hoike mai i kona hewa, mahope o ka noonoo pono ana a ua hoopuka ka aha i ka hoopai, e hoopaahao ia oia ma ka hana oolea no 3 mahina, a e uku i na dala he 50 me $4.50 koina. He $100 ka emi mai ka hoopai a ka aha ilalo. Ke Lii kue ia Quay Ong, (Pake) no ka wawahi hale a me ke aihue ana i kekahi mau waiwai komo gula, uwati, &c. no kekahi Pake okoa. He hihia keia i laweia mai ka aha mai ilalo. He wahi ano paakiki ko keia Pake i ka hooleole i kona hewa; aka, mahope o na ninaninau pono maopopo ia ana i kona hewa, ua ae oia i kona hewa, a ua kau ia ka hoopai he elua makahiki ma ka hana oolea me $100 koina. Ke Lii kue ia Francis Fareira, (he keiki Pukiki he 16 paha makahiki). Ua hoopiiia mai no ka pue a hoohaumia i ke kino o kekahi kaikamahine Pukiki. Ua hoole i kona hewa i ka la mamua, a mahope o ka noonoo pono ana, ua ae ua hewa; a ua noonoo ka aha me ka ninaninau i na ano o ka hihia, a kau i ka hoopai e hoopaahaoia ma ka hana oolea no 6 mahina me $50. Ke Lii kue ia Joseph Woodward; no ka wawahi hale. Hoole i kona hewa, a noho ke Iure; o keia J. Woodward, he keiki hapahaole opiopio wale no, he 16 a 17 paha makahiki. No Kaneohe oia, a aia no kona mau makua ke noho mai nei. Ua hoonaauaoia oia ma na kula, a he haumana ma Punahou, a ua nui na manaolana ia nona ma keia hope aku. O makou pu kekahi i manao nui iaia a i kau aku i na manao hilinai maluna ona, e lilo ana i koo kupono no na hana maikai a me ka pono a ka naauao i loaa iaia i kuhikuhi mai ai; aka, ua minamina makou no ka hoomaopopo ana ua hewa ko makou iini ana; no ka mea, ua hoike ia, ua wawahi oia i ka hale o kona ona, a ua lawe aku he mau dala ma ke ano aihue: a i ka lilo ana o ka hihia i na Iure, ua hooholo lakou, ua hewa ka mea i hoopiiia. Ma keia hihia, ua hoike ka aha i kona minamina no keia keiki opiopio i hilinai ia a i aloha ia e kona mau haku hana, a e kahi poe e ae he lehulehu i ake nui e hapai i ka lahui opio o Hawaii iluna o ke kahua naauao ma na oihana kiekie a me ka hana pololei a me ka pono. Aka, oiai ua hooiaio ia kona hewa, a ua hooholo na Iure o kona lahui ponoi i ka ahewa, nolaila ua hooko ia ke kanawai me ke ao ikaika o ka aha i ka mea i aweheia a malama i ka hana maikai ma keia hope aku; ua kau ia ka hoopai e hoopaahaoia ma ka hana oolea no 18 mahina. O Mr. J. Rukela ke pale o ka mea hoopiiia. Ke Lii kue ia J. Iona, no ke apuka i ke dala o ke aupuni i waiho ia ma kona lima. Ua hoole oia i kona hewa; a ua noho ke Iure. J. L. Kaulukou no ka mea i hoopiiia. Ma keia hihia, ua hoikeia iloko o ka makahiki i hala ae nei, ua haawi ia ma ka lima o Iona, he pepa inoa o ka poe o keia apana i hookaa ole i ko lakou mau auhau o ke aupuni mamua ae o ka manawa a ke kanawai i kauoha ai. Ua hele aku o Iona e ohi a ua loaa kahi, a ua hoihoi aku la i na dala i ka Luna Auhau oia o Kapena Luce; aka, aole nae oia i hoihoi aku a pau loa; no ka mea, ua loaa iaia he $5 mai kekahi haole mai oia o D. M. Crowley, a ua hoi aku la nae o Iona i ka Luna Auhau, a olelo aku, aole loaa o kela haole ua hoholo i ka aina e. Ia mau la, ua holo aku la o Iona no Kohala, Hawaii, ma kona ano Kapena no ka Puali koa lio, a e hoohanohano no hoi i ke kukulu ana i ke Kia Hoomanao o Kemehameha 1, ma ia wahi. A hala aku la ia, haawiia aku nei ka papa inoa ma ka lima o Capt. W. H. Tell. ke Kapena o na makai, a i ka ike ia ana o ka inoa o ua haole nei, ua imi koke ia a loaa aku la, a ua hoike mai kela he bila hookaa auhau i kakau ia e Iona no $5. Malalo o keia mau kumu, a me na hoike e ae e pili ana, ua noonoo ka Iure a hoopuka i ka lakou olelo hooholo e ahewa ana i ka mea hoopiiia. Ua nui ke kahaha o ka aha no keia hana a Iona, oiai he kanaka oia i manao ia e malama ana i na hana pono, a e hoao ana hoi e kinai i na hana kue kanawai, oiai he makai oia, aka, ua hoolilo loa i kona manao kolohe i mea nana e alakai iaia iloko o keia hana ino loa, ka aihue ana i ka waiwai o ka lehulehu. Ua kau ka aha i ka hoopai e hoopaahaoia he 18 mahina ma ka hana oolea, a e uku i na koina he $44.60. Ke Lii kue ia Kauhane; oia hoi ka hulipahu o ka mokuahi Iwalani, oiai ma kekahi awa o Kona Hema. He hihia keia no ka hoeha ana o Kauhane i kekahi o na luina o ua moku la a hemo ka onohi o ka maka iwaho. Ma ka hoolohe ia ana o keia hihia, ua hoomaopopoia, he ku maoli no i ka hoopoino ka Kauhane hana, me kona kule ana ole ua kahaha ka lehulehu i ka hoea ana mai o ka olelo hooholo a na Iure e hookuu ana i ka mea i hoopiiia; a ua hookuu ia o Kauhane. Ua lohe wale ia, o ke kumu a na Iure i hookuu ai ia Kauhane, penei no ia: Ua hoao a Kauhane e hoeha ma kahi wahi okoa o ke kino o kana mea i hoeha aku ai, aka hala ae la, a ku e aku la ma ka maka a loaa ka eha; nolaila, oiai aole i manao ino mua ia ka maka, aole hoi o Kauhane i enemi i ka maka, no laila, he poino ulia kela; a nolaila, ua hewa ole ka mea hoopiiia, oiai, aole i mainoino mua o Kauhane i ka maka o ka mea nona ka onohi i poino. Ea; i na he oiaio keia; alaila, ke mau aku penei, he aha la auanei ka hopena o na ano hana hoopilikia a hoopoino a kahi poe? O F. M. Haki no ka mea hoopiiia. Ke Lii kue ia Kikaua, no ka mare lehulehu. Ua hoole o Kikaua aole loa oia i mare lehulehu; a ua noho ka Iure. Ma ke kukulu ia ana o na hoike, ua ikeia ka olelo hoopunipuni i keia kanaka. Ua ku mai la kana wahine mare mua a hooiaio mai la i ko laua mare; a ua hooiaio mai no hoi kela i ka mare hou ana o kana kane i wahine hou, a me kona mare hou ana i ke kane mamuli o ka hookikina a ua Kikaua nei, a iloko o kona naaupo, ua ae aku la oia me ka manao o ka pau ae la no la ia, a kaawale kahi a me kahi, a noa i ke kanawai; a mahope iho nei ike i ka hewa. Aia i ka hapalua o na olelo hoike, ua maopopo loa iho la ia Kikaua kona kupilikii, a hoomaopopo iho la kona loio, oia o J. L. Kaulukou i ka hoopunipuni o kona haku hewa a e mihi aku imua o ka aha. Ua mihi koke o Kikaua, a ua piha kahaha ka aha i ke koa o keia kanaka ma ka wawahi kanawai i ka mare lehulehu ana a pau, hele aku imua o ka aha, a aa e hoopunipuni me ka hoopaakiki a komo okoa iloko o ka pilikia. Ua kau ka aha i ka hoopai e hoopaahaoia no 8 mahina ma ka hana oolea, me $200, a me $50 koina. Ma keia mau hihia maluna ae, ua lawelawe ia na hihia ma ka aoao o ke 'lii e W. A. Whiting, ka Hope Loio Kuhina no ka manawa. Ke Lii kue ia J. U. Kawainui a me B. W. Kawainui, no ka laibila. [E nana ma kekahi kolamu okoa.] Ke Lii kue ia R. Grive a me A. T. Atkinson, no ka laibila; ua haalele wale ka mea hoopii John Richardson i kana hoopii; a  ua noi ka Hope Loio Kuhina e hoopau loa, a ua ae ka aha. O na hoopii koi poho a John Richardson maluna o na Hoahanau Kawainui no $5,000 poho; a maluna o R. Grive a me A. T. Atkinson, no $5,000 poho; no ko lakou laibila ana i kona inoa maikai maloko o ka lakou mau nupepa, ua hoihoi aku ka mea hoopii i kana hoopii, a ua hoopau wale ia. E. Kekoa kue ia Mr. & Mrs. Borden, imua o ka aha wale no. He hoopii ninau kanawai keia, no ka hoomaopopa ana ina he hana ku i ke kanawai ka uku ana o ke kane i ka aie o kana wahine mare no ka uku loio ma kekahi hihia a ua wahine la i hoopii ai. Ua wehewehe na Loio a waiho ia imua o ka aha no ka hoopuka i ka olelo hooholo i kahi manawa okoa aku. J. I. Dowsett kue ia Silva; hoopii koi aie i hoomaopopo ia. Hooholo ia no ka mea hoopii ka pono. Aiana kue ia Wy Man Hop; hoopii koi aie i hoomaopopo ia. Hooholo ia ka pono no ka mea hoopii. Kealoha Kalaehao kue ia Ahlo; hoopii koi i hoomaopopo ia. Hooholo ia ka pono no ka mea hoopii. Aana Jacob kue ia B. Campbell, hoopii poho no $2,000 no ka hoopaahaoia me ke kuleana ole. Haawi ia ka pono no ka aoao pale. Ke 'Lii kue ua Nim Lock (Pake.) Imua o ke Jiure haole, no ka hewa apuka. Ua hookuu ua ka mea hoopii ia. W. O. Smith ma ka aoao pale. Inehinei, ua noho ke Jiure haole ma ka hihia hoopii laibila a Kauka Pika ia T. G. Thrum, (Ona o ka nupepa haole Saturday Press). O. J. Rukela me F. M. Hatch ma ka aoao hoopii; S. B. Dole no ka aoao pale.

HOAO E KI PU

Mamua aku nei, ua holo mai he haole mai Kaleponi a holo ma Honolulu nei. I ka pule i hala aku nei, ku mai la he wahine me na keiki kane elua me elua kaikamahine. O ka wahine keia a ua haole nei me ka laua mau keiki, he wahine nae aole i mare ia, ua noho pau nae ma ke ano ua mare ia no aneane 15 makahiki. Hiki mai la ua wahine nei ia nei, lohe iho la ke kane i kana mau hana kolohe me ka malamamoku o ka moku ana i holo mai ai. Uluku iho loa kona inaina, a i ka halawai ana, ua puka na huaolelo huhu. I ke kakahiaka, Poakolu nei, ua iho mai la ke kane a ka wahine ma ka uapo, kahi o ka moku e pili ana, hele aku la a imua o ka malamamoku, kau aku la i kana pu panapana, a ki aku la, ekolu manawa, aka, iloko oia mau manawa ekolu ua kanapi wale no ka pu. Holo aku la ka malamamoku a pee, a aumeume iho la ka mea pu me kahi poe, a hiki i ka wa i pau ai ka uluku o kona manao. Ua hopu ia oia; o ka wahine me na kaikamahine elua ua hoi no Kaleponi me ka holomalu o ka malamamoku a kahi moku i holo aku ma ua ahiahi Poakolu nei. Ua haalele ia iho na keiki kane elua mahope nei. I keia la ka hookolokolo ana o ka mea ki pu a hookuu ia, no ka mea, aole ka malamamoku, ka mea nana i hoohiki ka palapala hopu.

HE WAHI ANO HANA MAALEA.

Iloko o ka makahiki 1786, he wa ia e noho ana o Enelani iloko o ka fiva holo balota o na lunamakaainana, o ka wa ia i ikeia ai keia wahi ano hana maalea a makou e hoike aku nei i ko makou poe heluhelu. He elua mau mea i manao nui no ka holo balota, a o ko laua mau inoa. Iloko o keia wa e noho ana ma ke kulanakauhala o Ladana he mau haneri o na lahui kanaka o na aina e, a o keia poe a pau aia wale no ma ka aoao o ka inoa mua a o ka mea nona ia inoa he moho ia no ka aoao aupuni. Ua kokua nui lakou ma ka hooikaika ana e puka ka lakou lunamakaainana, a ua nui ka ikaika a me ka pii mahuahua ana o kona heluna balota. He nui no hoi na luna hooikaika o keia inoa, a ua nui na dala i lu ia no na pono koho o kekahi poe. Ua pau ma na lima o na luna hooikaika keia mau mana koho, a ua hana ia na hana a ka manao o ke kanaka i noonoo ai no ka puka a me ko lakou lanakila nui. I ka wa i makaukau ai no ka manawa koho, ua pau keia poe a pau i ka hookau ia iluna o kekahi mau moku nunui elua, no ka lawe ana aku i ua poe la i kahi koho. Ua hana ia keia mau hana me ke akahele loa a me ka malama pono ia. Maanei, e waiho kakou i ke kamailio ana no keia poe a me ka lakou inoa lunamakaainana, a me lakou no a pau maluna o ka moku, a e huli ae kakou a kamailio iki no kekahi inoa holo lunamakaainana. Aole ana hana nui. Aole ana mau hoolilo puu dala nui: aka, ua noho oia a noonoo nui no na kumu e puka ai oia. He mau lunahooikaika no kona, aka, ua ano pauaho lakou. Ua hana lakou i ka hana, a ua waiho pu. I ka la mamua ae o ka hoomaka ana e koho, hele aku la kekahi o na luna hooikaika a i ko lakou moho i aku la, (o keia luna hooikaika oia no kekahi e holo lunamakaainana ana) E kuu haku, i ehia au dala e haawi mai ai ia'u ina au e hana a puka kaua i ka la apopo? Elike me kau i makemake ai, wahi a ka pane. E haawi mai i £400 a o ko kaua puka no ia, aole mea nana kaua e keakea; ke hai aku nei au ia oe, o kaua ke lanakila ana i ka la apopo. Ua loaa ka huina dala a keia luna hooikaika i makemake ai. O kona hele no ia a i na Kapena on na moku a ka poe makaainana koho i ka balota aupuni, a kipe aku la ia laua, me kona olelo aku, e lawe i ua poe nei a hoolei aku ma na kapakai o Norewai. Ua ae na Kapena, ua hooko i ka olelo a keia luna hooikaika; ua paa na dala ma ko laua lima, a o ka hiu aku no ia o ko laua mau moku a nalowale mai ka aina aku. Ko ka olelo a keia luna hooikaika, ua waiho molaelae ke kahua koho balota no laua, a i ke koho ana, ua puka aku la laua me ka lanakila nui. Aohe mea nana i keakea ko laua alanui.

KA MOKUAHI HANKOW.

Ma ke ahiahi o ka Poaono ka la 7 o keia mahina i ku mai ai ka mokuahi Hankow mai Landana mai ma ke ala moana ae o Madeira, Sana Mikaela, o na Paeaina o Azores a me kekahi mau paeaina liilii iho, iloko o na la holookoa he 171 a ku mai nei i o kakou nei. Ua lawe mai nei oia no ko kakou mau mahiko a me kekahi mau hana e ae, he 1441 ola uhane o na kane, wahine, keiki, Pukiki. Ma ka Poakahi iho nei ko lakou hoolele ia ana mai i uka nei ma ka hoomalu ana ma Kakaako. He poe ola kino maikai keia a pau. He 3,594 tona o keia mokuahi, a he 42 kapuai ke akea. He 10 a oi mile ka holo o keia mokuahi i ka hora.

Hele ae la na kanaka elua i ka luakini e pule; he Parisaio kekahi; a he lunaauhau kekahi. Eia ka pule a ka Parisaio: E ke Akua,, ke aloha aku nei au ia oe, no ka mea, aole au i like me na kanaka e, ka poe hookaha, ka poe pono ole. ka poe moe kolohe, aole hoi me keia lunaauhau. A eia ka pule a a ka lunaauhau; E ke Akua, e aloha mai oe ia'u ka mea i hewa. Ke hai aku nei au ia oukou, oia ka mea i iho i kona hale me ka hoapono ia, aole kela; no ka mea, o ka mea i hookiekie ia ia iho, oia ke hoohaahaa ia; a o ka mea hoohaahaa iaia iho, oia ke hookiekie ia'e.         IESU.

NA HOOLAHA HOU.

Mamuli o ka mana i haawiia mai ia'u e ke Kumukanawai a me na Kanawai o keia Aupuni, a ma ko'u manao ana he mea keia i ku i ka pono. Ma keia ke Kauoha nei au. O ke Kau Hookookolo o ka Aha Hookolokolo Kaapuni Apana Ekolu a malamaia ana ma Waiohinu, Kau, Hawaii, ma ka Poaha mua o Sepatemaba 1883, ua hoopaneeia a ka POAKAHI ka la 10 o Sepatemaba i oleloia ma ka hora 10 A. M. IKEA ko'u lima a me ke Sila o ka Aha [Sila] Kiekie ma Honolulu, i keia la 12 o Iulai M. H. 1883             A. F. JUDD, Lunakanawai Nui o ka Aha Kiekie. Ikea: Henry SMITH, Hope Kakauolelo.

Aha Hookolokolo Apana Eha o ko Hawaii Pae Aina. Ma ka Hooponopono Waiwai. Ma ka Waiwai o ISAAC H. K. Hart i make kauoha ole. Imua o ka Lunakanawai Kaapuni ma ke Keena. Ma ka heluhelu a me ka waiho ana mai o ka Palapala Noi a Mrs. Elizabeth Hart e hoike mai ana o Isaac H. K. Hart no Waimea, Kauai, ua make kauoha ole ma Waimea, ma ka la 7 o Aperila, M. J. 1883, a e noi ana e haawiia ka Palapala Hookohu Lunahooponopono Waiwai ia Paul Puhiula Kanoa. Ua kauohaia, o ka POAONO ka la 4 o AUGATE, M. H. 1883, i ka hora 10 kakahiaka, oia ka manawa i kohoia no ka hoolohe ana i ua noi la, imua o ua Lunakanawai la, ma ke Keena Hookolokolo o keia Aha ma Koloa, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua Noi loa. A o keia olelo kauoha e hoolohaia ma ka olelo Hawaii, i ekolu pule ma ke KUOKOA, he nupepa ma Honolulu. Kakauia ma Koloa ko Hawaii Pae Aina, Iune 30, M. H. 1883. JACOB HARDY, Lunakanawai Kaapuni Apana Eha.

INA KAUA E KA HOA, E KIPA MALIHINI.

Ia oukou e o'u mau hoa mai Hawaii a Kauai, e ike mai ia'u he hoa kanaka. Oiai ua wehe ae nei au halekuai lole, hale inu ti me kope, hale ai poi, a pela aku, ma ke aekai o ke kai hawanawana o Kawaihae-kai, ke kono aku nei au ia oukou e o'u mau makamaka o na wahi a pau, e kipa mai a ike pono i ka hana a ko oukou hoa, a e kuai hoi i na waiwai me ka makepono loa, i oi aku ka pakika mamua o ka pahee me he wai ono la o ka meli, ke kaohi o ka ono i ka puu, e naue ae a ike pono loaa ka mea lia o ka puuwai, oiai aole pela mamua, i ka wa hookahi halekuai, ua lawe mua ia ke ola e i ala, a he hooko wale aku no i ka makemake, aka, e hoomanao i ke keiki a ka Ua Naulu, he hoa kaunu pu me oukou. Ma ka inoa o ka Hui Kalepa Hawaii. KEKAIHAWANAWANA. Kawaihae-kai, Hawaii, Iune 16 '83.

HOOLAHA PAPA.

Ke haiia aku nei ka lohe i na kanaka a pau loa, e nana mai i keia Olelo Hoolaha, aole he kuleana i kuu kane mare oia o Noah Kaa-a e hoolimalima a kuai lilo a moraki i kahi kanaka a mau kanaka paha, i na aina o kuu kane mua i make, oia o A. A. Coe, oia o Pukaauhuhu a me Niumalu ma Manawainui Kaupo Maui, a pela no hoi me na lio, bipi, hoki, miula, i kuniia no ma ka hoailona hao o kuu kane mua i oleloia, a owau ka ona i keia wa maluna o na waiwai i haiia maluna, ke ole au e hoopaa  i kuu inoa ma kekahi palapala i aponoia e a'u, a o na waiwai a pau i oleloia ma keia Hoolaha, aole he mana i kuu kane e hoolilo. E hoolohe ka lehulehu i keia. MRS. HONOLULU COE. Kona X kaha. Pukaauhuhu, Kaupo, Iulai 2, 1883.

OLELO HOOLAHA.

Hookahi mahina a oi i haalele kumu ole mai ai ka'u wahine mare o Mileka kona inoa ia'u a me ko maua moe, aole au i hookuke aku iaia aole no hoi i hoonele i kona makemake, aka, ua malama pono e like me ke ano o na kane makee wahine. Nolaila ke papa ikaika aku nei au i ka poe waiwai mai hoaie mai oukou iaia o poho auanei ko oukou waiwai, a me ka poe e hookipa ana me ke kuleana ole, o hoopii au elike me ke kanawai. Hookahi wale no wahi i koe aole i papaia ma keia hoolaha o kuu home noho ma ka aekai o Nawiliwili i Kauai. AKIONA. Nawiliwili, Kauai, Iulai 6, 1883.

OLELO HOOLAHA.

E ike auanei na kanaka a pau, owau o ka mea nona ka inoa malalo, ke papa a ke hookapu loa aku nei au i ka poe waiwai a pau loa e noho ana maloko o keia aupuni, mai hoaie mai oukou i kuu wahine mare ia Mrs. Kalua, oiai ua haalele kumu ole mai oia ia'u a me ko maua wahi moe. aole loa au e hookaa ana i kona mau aie a pau ana e aie ai, maluna iho no o oukou ia poho. Ke papa pu ia aku nei ka poe a pau mai hookipa a malama iaia ma ko oukou mau home, o hoopii au ia oukou ma ke kanawai. K. KAPI. Kahuku, Koolau, Iulai 9, 1883.

HOOLAHA AIE.

Oiai ua hookohu ponoia mai ka mea nona ka inoa malalo, i Lunahooponopono Waiwai no ka Waiwai o J. Alaryo Jackson o Makawao i make, ma keia ke hoolahaia aku nei, o ka poe a pau he kuleana ko lakou i ka waiwai o ka mea i make, e hoike mai lakou i ko lakou mau palapala kupono iloko o na mahina eono mai keia la aku, o hoole mau ia lakou. W. P. A. BREWER, Lunahooponopono o ka Waiwai a J. A. Jackson. Makawao, Iulai 6, 1883.

HENRY N. KAHULU.

Loio a he kokua ma ke kanawai.

E loaa no ma Koolauloa a ma Honolulu i kahi wa, ma ke Keena o W. L. Holokahiki ma alanui Betela.

NA HOOLAHA HOU.

Ma ke Keena o ka Lunakanawai Kaapuni Apana Ekolu o Ko Hawaii Pae Aina.

Ma ka Waiwai o MAELE k. no Laupahoehoe, Hilo, Hawaii. Ua heluheluia a ua waihoia ka palapala noi a Kahaawiola w., e noi ana e hooponoponoia ka waiwai o kona makuakane oia o Maele k. no Laupahoehooe, Hilo, Hawaii, i make, a e hooholoia i na hooilina, a e hoonoho ia D. Kamai i Lunahooponopono no ia waiwai. Nolaila, ke kauohaia aku nei na kanaka a pau i pili, o ka POALUA, oia ka la 7 o AUGATE, 1883, i ka hora 10 o ke kakahiaka, ma ka Hale Hookolokolo ma Hilo, Hawaii. oia ka la me kahi i kohoia no ka hoolohe ana i ua noi la, a me na mea kue ke hoikeia. F. N. LYMAN. Lunakanawai Kaapuni. Hilo, Hawaii, Iune 13, 1883.

Ma ke Keena o ka Lunakanawai Kaapuni Apana Ekolu o ko Hawaii Pae Aina.

Ma ka Waiwai o KAUALII k., no Wailua, Hilo, Hawaii, i make. Ua heluheluia a ua waihoia ka palapala noi o J. Palau, ka Lunahooponopono malalo o ka palapala kauoha hope loa a Kaualii k., no Wailua Hilo, Hawaii, i make, e noi ana e hoaponoia kona hoike hope a e hooholoia ka waiwai i na hooilina, a e hookuu iaia mai ka oihana a me kona mau hope. Nolaila, ke kauohaia aku nei na kanaka a pau ke pili, o ka POALUA, oia ka la 7 o AUGATE 1883, i ka hora 10 o kakahiaka, ma ka Hale Hookolokolo ma Hilo, Hawaii, oia ka la me kahi i kohoia no ka hoolohe ana i ua noi la a me na mea kue ke hoikeia. F. S. Lyman, Lunakanawai Kaapuni. Hilo, Hawaii, Iune 15, 1883.

Ma ke Keena o ka Lunakanawai Kaapuni Apana Ekolu o Ko Hawaii Pae Aina.

Ma ka Waiwai o NAHALELEPO k., no Hilo, Hawaii, i make. Ua heluheluia a ua waihoia ka palapala noi a J. P. Hanaumoe, kekahi mea i pili, e noi ana e hooponoponoia ka waiwai o Nahalelepo k., no Hilo, Hawaii, i make, a e hooholoia i na hooilina, a e hoonoho iaia i luna hooponopono no ia waiwai. Nolaila, ke kauohaia aku nei na kanaka a pau i pili, o ka POALUA, oia ka la 7 o AUGATE, 1883, i ka hora 10 o kakahiaka, ma ka Hale Hookolokolo ma Hilo, Hawaii, oia ka la me kahi i kohoia no ka hoolohe ana i ua noi la a e na mea kue ke hoikeia.  F. S. Lyman. Lunakanawai Kaapuni. Hilo, Hawaii, Iune 15, 1883.

Ma Ke Keena o ka Lunakanawai Kaapuni Apana Ekolu o Ko Hawaii Pae Aina.

Ma ka Waiwai o LAHAINA k., no Hilo, Hawaii, i make, Ua heluheluia a ua waihoia ka palapala noi o Jos. Nawahi, e noi ana e hooponoponoia ka waiwai o Lahaina k., no Hilo, Hawaii i make, a e hoonoho iaia i lunahooponopono no ia waiwai. Nolaila, ke kauohaia aku nei na kanaka a pau i pili, o ka POAKOLU, oia ka la 8 o AUGATE, i ka hora 10 o kakahiaka, ma ka hale Hookolokolo ma Hilo, Hawaii, oia ka la me kahi i kohoia no ka hoolohe ana i ua noi ma a me na mea kue ke hoikeia. F. S. LYMAN, Lunakanawai Kaapuni. Hilo, Hawaii, Iune 27, 1883.

Ma ke Keena o ka Lunakanawai Kaapuni Apana Ekolu o ko Hawaii Pae Aina.

Ma ka Waiwai o LONO k., no Puna, Hawaii i make. Ua heluheluia a ua waihoia ka palapala noi o Kamalu w. e noi ana e hooponopono ia ka waiwai o kona makuakane o Lono, no Puna, Hawaii, i make a e hooholoia i na hooilina, a e hoonoho aku ia Papapa k., i lunahooponopono no ia waiwai. Nolaila, ke kauohaia aku nei na kanaka a pau ke pili, o ka POAKOLU,  oia ka la 8 o AUGATE, 1883, i ka hora 10 o kakahiaka, ma ka Hale Hookolokolo ma Hilo, Hawaii, oia ka la me kahi i kohoia no ka hoolohe ana i ua noi la a me na mea kue ke hoikeia. F. S. LYMAN, Lunakanawai, Kaapuni. Hilo, Hawaii, Iune 27, 1883.

Ma ke Keena o ka Lunakanawai Kaapuni Apani Ekolu o ko Hawaii Pae Aina.

Ma ka Waiwai o ALEXANDER BANDERIA, (Likana) no Hilo, Hawaii i make. Ua heluhelu ia a ua waihoia ka palapala noi o Joseph Gomez me Kelopi w., e noi ana e hooponoponoia ka waiwai o Alexander Baderia (Likana) no Hilo, Hawaii. i make, a e hoonoho ia Jos. Nawahi i lunahooponopono no ia waiwai. Nolaila, ke kauaohaia aku nei na mea  a pau i pili, o ka POALIMA, oia ka la 10 o AUGATE, 1883, i ka hora 10 o kakahiaka, ma ka Hale Hookolokolo ma Hilo, Hawaii, oia ka la me kahi i kohoia no ka hoolohe ana i ua noi la a me na mea kue ke hoikeia. F. S. LYMAN, Lunakanawai Kaapuni. Hilo, Hawaii, Iune 27, 1883.

HOIKE KULA AUPUNI.

E hoikeia ana na Kula Aupuni ma ka olelo Hawaii o ka apana o Honolulu, Oahu, elike me keia hoomaopopo ano malalo iho:

POAKAHI la 23 o Iulai, 1883, ma ka luakini o Kamoiliili, na Kula o Kamoiliili, Waikiki-kai, a me Manoa.

POALUA la 24 o Iulai, ma ka luakini i Kaumakapili, na Kula o Kalihi-uka, Kalihi-kai, Moanalua, a me Pauoa.

POAKOLU la 25 o Iulai, ma Kaumakapili no na Kula o Kawaiahao, Kaumakapili, Roma K. Roma W.

E hoomaka ana ka hoike i ka hora 9 o kakahiaka o kela a me keia la i hoikeia maluna; a e hoomaha ana na Kula mai ka pau ana o na hoike, a hiki i ka Poakahi, la 17 o Sepatemaba 1883, a ma ia la e hoomaka hou ai ke kula ana. W. JAS. KAMIKA, Luna Kula. Oihana Hoonaauao, Iulai 5, 1883.

HOOMAHA O NA KULA AUPUNI.

E hoomaha ana na Kula Aupuni mai a a o mai ka POALIMA, la 27 o keia malama o Iulai e hele nei, e hiki i ka POAKAHI, la 17 o Sepatemaba 1883, a ma ia la e hoomaka hou ai ke kula ana. W. JAS. KAMIKA, Luna Kula. Oihana Hoonaauao, Iulai 5, 1883.

HOIKE KULA AUPUNI, EWA ME WAIANAE.

E hoike ana na Kula o Ewa & Waianae iloko o keia malama o Iulai e hele nei, elike me keia hoomaopopo ana malalo iho:

NA KULA HAOLE

POAKOLU, la 25 o Iulai, ma Waiawa, Ewa.

POAHA, la 26 o Iulai, ma Pokai, Waianae.

POALIMA, la 27 o Iulai ma Pokai no, na Kula Hawaii o Pokai me Makua.

E hoomaka ana ka hoike i ka hora 9 o kakahiaka o kela a me keia la i oleloia maluna. W. JSA. KAMIKA. Luna Kula, Oihana Hoonaauuo, Iulai 5, 1883.

NA HOOLAHA HOU

Aha Kaapuni Apana Eha o ko Hawaii Pae Aina. Ma ka Hooponopono Waiwai. Ma ka Waiwai o KAUAHIPU k., i make kauoha ole Imua o ka Lunakanawai Kaapuni Apana Eha. Ma ka heluhelu a me ka waiho ana i ua Palapala Noi Hii w., e hoike mai ana e pili ana ia Kauahipu k no Anahola, Kauai me ke kauoha ole ma Anahola ma ka la 14 o Sepatemaba M. H. 1883, a e noi ana e haawiia ka Palapala Hookouhu Luna Hooponopono Waiwai ia K. Mika. Ua kauohaia, o ka POAONO o ka la 27 o IULAI M. H. 1883 ma ka hora 10 o kakahiaka imua o ua Lunakanawai la, ma ke Keena Hale Hookolokolo ma Koloa, ma Kauai, a ma ia wahi no e hele mai ai na mea a pau i pili e hoike mai i ke kumu, ina he hoike ko lakou e ae ole ia ai ua Noi la. A o keia kauaoha ma ke olelo Hawaii maloko o ke KUOKOA, he nupepa lahaia ma Honolulu, i ekolu mahina mamua o ka manawa i oleloia no ka hoolohe ana. Kakauia ma Koloa, ko Hawaii Pae Aina, Iune 13 M. H. 1883. J. H. Lunakanawai Kaapuni Apana Eha.

Aha Kaapuni Apana Eha o ko Hawaii Pae aina. Ma ka Hooponopono Waiwai me ka Waiwai o PUAA k., no Moloaa, Kauai, i make kauohe ole, Imua o ka Lunakanawai Kaapuni Aupuni Eha ma ke Keena. a ka heluhelu a me ka waiho ana i Palapala Noi a Mele wahine kanemua e hoike mai ana o Puaa k. no Moloaa, Kauai, ua make kauoha ole ma Moloaa, ma ka la 7 o Mei, M. H. 1883, a e noi ana e haawiia ka Palapala Hookohu Lunahooponopono ia Puuweuweu k. Ua kauohaia. O ka POAONO o ka la 27 o IULAI M. H. 1883, i ka hora 10 o kakahiaka, oia ka manawa i kohoia no ka hoike i ua noi la imua o na Lunakanawai Keena Hookolokolo o keia Aha ma Kauai, a mai manawa a ma ia wahi no e hoike mai ai na mea a pau i pili e hoike mai he kumu oiaio ko lakou e ae ole ia noi. A o keia olelo kauoha e hoolahaia i Hawaii i ekolu pule ma ke KUOKOA nupepa ma Honolulu. Kakauia ma Koloa, Kauai, ko Hawaii Pae Aina, Iune 28, M. H. 1883. J. H. Lunakanawai Kaapuni, Apana Eha.

HOOLAHA.

Ke kauohaia aku nei na mea Aina Kula e waiho la ma Waialae-iki, e hoike mai no i ka palena o ko lakou mau aina na hoopaapaa, i mea e maikai ai a ana me ke kue ole aku kahi i kahi, maua a hala na mahina Ekolu. ana aku o keia hoolaha, ina e hoomaopopo ole mai i ko lakou palena, e hana a hoomaikai no ilaila i ka aina, manao no ke Konohiki no ia o Waialae-iki ka hoahewa ole ana mai ia maua. W. C. AKANA. CHIN WU.

HOOLAHA

Ke papaia aku nei na mea a pau aole e ae maluna o ka aina o Waialae-iki, e oki ana au i ke Kiawe e ulu la, aole no hoi e hele a hua Kiawe, e waiho make no, hoomaluaia aku nei, ina o ka poe kue i ka makepono, a e hoopii no maua e like me ke kanawai o ka aina. W. C. AKANA. CHIN WU.

HOOLAHA

Ke kauohaia aku nei na mea holoholona  a pau e hookuu wale la i ka lakou mau holoholona e holo wale la maluna o ka aina o Waialae-iki, e kii mai i ko lakou mau holoholona a e lawe aku mailuna o ka maua aina ma Waialae-iki, a e kali maua no ka manawa he 15 la mai ka puka ana o keia hoolaha, a ina kii ole mai alaila he mana ko maua a Elia ke lawe a hoopaa iloko o ka Pa Aupuni a o ka poe e makemake ana e hookuu i kou holoholona e hele maluna o ka aina, e loaa ka pu no lakou me ko maua luna ona. Eia ka maua i haawi ai i ka ana iaia. W. C. AKANA. CHIN WU.

HOOLAHA HOOKO MORAKI ME KE KUAI.

Mamuli o kekahi mana kuai i hoikeia ma ko o kekahi palapala moraki i hanaia ma waena o Laika K. Kepohoni a me Samuela Kepohoni kana kane mare no Honolulu, mokupuni o Oahu ka aoao mua, a me Jas. I. Dowsett no Honolulu i olelo ia no ka elua, i hanaia ma ka la 15 o Dekemaka M. H. 1883, a i kopeia ma ka buke kope 73, aoao 37-39 a mamuli o ka uhakiia ana o na kumu aelike, ma hope o ke oleloia o ka uku pamee i hoopaaia maloko o ua palapala moraki la. Nolaila, ke hoolahaia aku nei e ka mea nona ka aoao elua, e hooko aku oia ia mana kuai, a ma ia hooko mai i kuai kudala akea ia aku ana ka aina i hoike ia ma ia moraki ma ka Poalua la 24 o Iulai M. H. 1883 ma ke Keena kudala o Lyons & Levey ma Honolulu i oleloia ma ka hora 12 o ia la. Penei na aina e kudalaia ana: O keia mau apana aina a pau loa e waiho la ma Kalahuipuaaalua, a me Keauhou, Kalihi, mokupuni Hawaii i oleloia, no laua na eka he 200,100 a ua kakauia ma na Palapala Sila Nui, Helu 1255 a me 679. James I. Dominis. No ka Aoao Elua. Hanaia ma Honolulu Iune 9, 1883. Aia ma kahi o J. M. Monsaratt, Maunakea na hoakaka no keia mea.

OLELO HOOLAHA.

E ike auanei na kanaka a pau ke nana nei i keia Olelo Hoolaha, owau o Apoe (Pake) kaikaina ponoi o Iakoka (Pake) ua hookohu noia mai au i hope malama a hooponopono i kona mau waiwai a pau, oiai ua hoi aku la oia i Kina. Ma keia ke hoolahaia aku nei ka poe a pau i aie iaia, e hookaa koke mai a kou i ko lakou mau aie ia'u iloko o na mahina elua mai ka la e puke aku nei keia Olelo Hoolaha, a i ole, e hoopiiia no lakou ma ke kanawai. Eia kekahi, aole loa au e ae ana e hookaa kekahi aie i hoaie ia ma ko'u inoa, ke ole e kaa aku na hoapono ana mai ia'u aku. E lilo keia i kanawai mai keia la aku. Hanalai, Kauai, Iune 11, 1883.

HOOLAHA HOOKO MORAKI.

Oiai ka mea nona ka inoa malalo, Herman A. Wideman, ka Luna Hooko o kekahi palapala moraki i haawiia e ka hui o ka Hale Mele Huia Bihopa Ma, i kakau ia ma ka la 19 o Iune A. D. 1881, a i hoopaaia ma ka nuke 69, aoao 74-79, ma keia ke hoolahaia aku nei, mamuli o ka mala kuai i hoakakaia maloko o ua palapala moraki la, e hookoia aku ana ua mana kuai la no ka uhakiia o na aelike a me ka uku ole ia o na uku panee, a ma ia hooko ana i kuai kudalaia aku ana ma ke akea ma ka Poakahi ka la 16 o Iulai, ka aina i hoakakaia ma ua palapala la penei: O keia apana aina e waiho la ma ke alanui Moi ma Honolulu a i hoakakaia ma ka Palapala Sila Nui Helu 3251 i ua Hui Hale Mele, nona ka ili he 11038 kapuai kuea, a me ka hale e ku la maluna o ua aina la a me kona mau pono a pau. H. A. Wideman. F. M. Haki, Loio no ka Moraki. Honolulu Iune 13, 1883.

MAKEMAKE IA.

Ke hoike ia aku nei na mea a pau e makemake ana e loaa na PAI AI  ma ke PAKEKE a me ka PAHU paha, e kauoha mai ia'u ma ka leta no ka hoolawa ana aku i na kauoha Ai a puni keia mau Paemoku o na kauoha no ke kulanakauhale, e lawe ia aku no e like me ka makemake o ka mea kauoha ma ka ipuka o ko oukou mau hale, no ke kumukuai haahaa loa. E waiho ae i ka oukou mau kauoha ma na leta ma ka Hale Leta. Albert K. Kunuiakea. Honolulu, Mei 12, 1883