Ka Nupepa Kuokoa, Volume XXIII, Number 44, 1 November 1884 — Na Hana Hoomakaukau. [ARTICLE]

Na Hana Hoomakaukau.

- Ke hoomakaukau nei na anaina eiua o Kaukeano amc ka halepule Betela ma Polelewa no kekahi mau halawai pule hoomau iloko o na la hope o ka malama o Novemaba. Ua lohe mua no paha ko makou poe heluhelu ma na kolamu o keia pepa, ua konoia aku o Mrs. Hampson, kekahi wahine makaukau ma ka hana haiolelo, e hele mai i Honolulu a e hapai i ka hana euanelio. Ua ae mai oia, a ua manaoia e hiki mai ana oia iloko o na la hope o keia mahina A o na hana hoomakaukau i oleloia, he mau hana e pili ana i na halawai hoomau malalo o na alakai ana oua lede nei i oleloia. Aia ma ka hale o ka Ahahui o ka Poe Opio o na haole kahi e hui mau nei i na ahiahi o na Poaha a pau no na hana hoomakaukau mua, ma ke alanui Hotele. Ua maopopo mua no i ko makou poe heluhelu na mea ino e laha nei a e ulu nei ma Honolulu. O ka mea hookahi e maikai ai o Honolulu, oia ka Pono. O ka Pono iloko o kanaka, oia ka paa kai o ka honua —oia ka pomaikai i oi, oia ke ola oka aina. Ua make o SoRoma a me Gomora o ke au kahiko no ko laua nele i ka poe pono. Ua hiolo no hoi na aupuni ikaika mamuli o ko lakou puni lealea me ka puni waiwai. O ko Honoluluwaiwai io ame kona pomaikai nui, oia ka mahuahua o kona poe pono. O ka waiho i ka hana hewa a ao i ka hana pono, oia ka naauao e ola ai. Kc noi aku nei keia pepa i kona poe heluhelu e komo pu iloko o keia mau hana hoomakaukau no na halawai hoomau, aole ma ka hoakoakoa pu ana me na anaiua i oleloia, aka ma ka lawe ana i keia mau la hope o ka makahiki i wa e noonoo ai kela a me keia nona iho. A iloko no hoi o na halawai la Sabati a la noa, he mea kupono ke alakaiia na manao ma keia kumuhana ano nui, oia hoi ka hoomakaukau ana no ka hana a ka Haku. Maikai ke lawe na ahahui opiopio, a me na anaina haiawai Poakolu i keia kumuhana no keia mau pule iho. A na ka I,ani e hoopomaikai ia Honolulu.