Ka Nupepa Kuokoa, Volume XXIV, Number 2, 10 January 1885 — KA MOOLELO HOU. [ARTICLE]

KA MOOLELO HOU.

Ma ka helu mua o ko kakou pepa i hoopuka mua ia aku ai ka moolelo hou a makou i hoike mua aku ai imua o na tausani poe heluhelu o ke kuokoa. He moolelo nani loa keia i laweia mai mailoko mai o na Buke moolelo kaulana o ka lahui Hinedu, a ua wae ia mai hoi me ka mikioi e ko makou mea kakau moolelo. O kekahi keia o na moolelo lua ole o ka nani i hoopukaia ma na kolamu o keia pepa, a ma ko makou nana ana i kona mau nanaina he nani maoli no me ka hoonaue puuwai. Mawaena o na po hoolualai mau o na kanaka puni kaao o Arabia, o keia kekahi o na moolelo kamailio nui ia iwaena o lakou a imua o ke alo alii o Arabia i ke au kahiko. He moolelo kamahao keia, a nona paha na hiona hoopahaohao ke hiki aku kakou i ka naele o keia moolelo. E hoolualai mai auanei ko makou poe puni moolelo me keia kaao nanea, a e hoolawaia auanei na puuwai ohohia o na ihuanu hoinainau me ka nani o ia pua. Ma ka po Poakahi nei, ua komo koloheia ka rumi moe o C.G. Parson, a lawe ia aku la he pahi umiumi a me $12. O ka oiaio paha he kanaka umiumi ua kanaka la, ke lawe pu la me ka pahi kahi umiumi. Manomano no hoi ka aihue!

He mau mea hoopahaohao nui i ko ka lehulehu manao ke naue ae ma Kawaiahao e hoolohe ai i na hana hai euanelio a Mrs. Hampson, iloko o keia mau po, ua hai mai oia i ka olelo me he leo kane la, a he kulana kane maoli kona kulana a me na hana, he keu aku keia o ke kamahao.