Ka Nupepa Kuokoa, Volume XXIV, Number 6, 7 February 1885 — Page 4
| This text was transcribed by: | Vernon Gomes |
| This work is dedicated to: | Charlene Gomes |
Ka Nupepa Kuokoa
KE KILOHANA POOKELA NO KA LAHUI HAWAII.
No ka Makahiki...$2.00
No Eono Mahina...1.00.
KUIKE KA RULA
Poaono...Feberuari, 7, 1885.
E HOOMAMAO MAI IA'U.
(Remember Me.)
G.H. 167.
1
Auwe! Ua kahe anei no'u
Ko Iesu koko e?
Make anei ka Moi o'u
No kahi enuhe nei?
Cho. Nou mau no au, e kuu Iesu,
Kuu kino, kuu naau.
A ma ke aupuni nani ou,
E hoomanao mai ia'u.
2
No ko'u mau hewa anei e
I make ai Iesu?
Alona lua ole nei!
Aloha Kamahao!
Cho. Nou mau no &c.
3
Nana ka la, a huna mai
I kona nani mau.
Olai, hanee na pali e.
Me e ke kanikau!
Cho. Nou mau no &c.
4
E kahe na waimaka o'u,
E uwe a mihi pu,
A lilo loa no Iesu.
Ka mea i make no'u.
Cho. Nou mau no &c.
HAWAII.
Haawina Kula Sabati.
Mar. 1, 1885. Kumuhana, ka hoounaia ana o Paulo ia Pelika. Pauku Baibala, Oih. 23: 12-24.
AWANAAO, ohumu kuikahi mai la kekahi poe Iudaio e hoohalua iaia, hoohiki ae la, aole loa lakou e ai, aole hoi e inu, a pepehi lakou ia Paulo.
13 He kanaha lakou a keu aku i ohumui pela i keia hoohalua ana.
14 Hele mai lakou i na kahuna nui a me na lunakahiko, i mai la, Ua hoohiki makou ia makou iho i kahi hoino nui, aole loa makou e ai a pepehi makou ia Paulo.
15 No ia mea, ano, e nonoi aku oukou me ka ahalunakanawai i kai luna tausani,e e kai mai iaia io oukou nei, i ka la apopo, me he mea la e ninau hou aku i mea e akakai'i nona: a o makou nei, ua makaukau makou e pepehi iaia i ka wa aole ia e hiki kokoke mai.
16 A lohe ke keikikane a ke kaikiahine a Paulo i ko lakou hoohalua ana, hele aku la ia, komo aku la iloko o ka pakaua, a hai aku la ia Paulo.
17 Alaila, hea aku la o Paulo i kekahi o na lunahaneri, i aku la iaia, E alakai oe i keia kanaka opio i ka lunatausani; no ka mea, he olelo kana e hai aku ai iaia.
18 Nolaila, lawe ae la oia iaia, alakai aku la i ka lunatausani, i aku la,
I hea mai nei ia'u o Paulo ka mea i paa, a nonoi mai ia'u e alakai mai i keia kanaka opio ia oe, he olelo kana e hai aku ai ia oe.
19 Alaila, lalau ae la ka lunatausani i knoa lima, a hele malu ae la, ninau aku la Heaha kau mea e hai mai ia'u?
20 I aku la ia, Ua ohumu ka poe Iudaio e noni aku ia oe e kai aku ia Paulo i ka ahalunakanawai, i ka la apopo, me he mea la e ninau hou aku i mea nona e akaka'i.
21 Mai ae aku oe ia lakou; no ka mea, ke hoohalua nei nona hookahi kanaha kanaka, akeu o lakou; ia hoohiki lakou ia lakou iho i kahi hoino nui, aole e ai, aole hoi e inu, a pepehi lakou iaia: Ano hoi ke makaukau nei lakou, e kakali ana no kau olelo.
22 Nolaila kuu mai la ka lunatausani i ua kanaka opio la, papa ma la, Mai hai ae oe i kekahi kanaka i kou hoike ana mai ia'u i keia mau mea.
Nolaila, kii aku la ia i na lunahaneri elua, i aku la, E hoomakaukau i no koa, elua haneri, e hele i Kaisareia, a me na hoohololio, he kanahiku, a me na kanaka ihe' elua haneri, i ke kolu o ka hora o ka po;
24 A e hoomakaukau i na holoholona hoi, i kau lakou ia Paulo maluna, a e lawe maikai aku iaia ia Pelika la, i ke alii kiaaina.
Pauku Gula, Ina i hoehaia kekahi no Kristo, ma hilahila oia. 1 Pet. 4:16. Manao nui, E kokua pu ana na mea a pau e pono ai ka poe aloha i ke Akua.
NA HELUHELU LA.
Poakahi Oih. 23: 12-24.
Poalua Oih. 23: 25-35.
Poakolu Hal. 7: 1-17.
Poaha Hal. 37: 1-40
Poalima 1 Pet. 4: 1-19.
Poaono Dan. 3: 1-30.
Sabati Dan. 6: 1-23.
Mele. "Ka Makua Aloha e." Hoku Ao Nani, 152. Pule, I lilo i koa kupaa no Iesu. e like me Paulo.
NA NINAU.
Mahea ka haalele ana i Paulo? Owai ka i launa me ia ma ia po? E aha ana na lala o ka Ahalunakanawai ia po? Heaha ka mea i hooholia? p 42. Pehea ko lakou hoohiki ana? Pono anei e hoohiki e hana i ka hewa? Ina he hoohiki ku i ka hewa, ua pono anei ke hooko? Ehia o lakou i hoohiki e pepehi ia Paulo? p. 13. Ia wai ko lakou hele ana? p. 14. Heaha ka lakou i makemake, a noi aku i na kahuna nui? p. 15. He hana maalea anei keia a lakou i manao ai? Ua makemake io anei lakou e lone hou nona?
Pehea e maopopo ai ko lakou apiki? E aha ana lakou? p. 15. Nawai i hookeakea i keia manao ino? Hal. 34: 15. 91: 2,3. Owai ka i lohe no keia hoohalua ana? p. 16. Ia wai kona hele ana? Ua ae anei ia Paulo e launa me kanaka oiai ua paa ma ka pakaua? Ua haiia mai anei ma kauwahi no ko Paulo ohana? Aole mea i haiia no keia keiki, o kona hele ana e hai aku ia Paulo ka mea i manaoia nona. Heaha ka olelo a ka Haku ia Paulo ma ka pauku 11? E pakele ana paha? Oiai ua paopopo ia Paulo e hiki aku ana no ia i Roma, pehea oia, ua noho wale anei? Kauoha oia i ka lunahaneri e lawe i keia kanaka imua owai? E aha?
No hea keia poe koa? He Roma o Paulo, ua pono anei e malama lakou iaia? Heaha ka pilikia ke lilo ka paahao a lakou? Lilo auanei ko lakou ola nona. Ua imi anei o Paulo i ka mea e pakele ai oia? Ua pono anei? Kokua mai ke Akua i kanaka, a ua makemake e kokua no ia lakou iho. Nana i haawi i ka aina, ka wai, a me na mea e pono ai, a na kanaka e mahi. E hoike aku ia ka manaoio ma na hana. Ua ae aku anei ka lunahaneri i ka Paulo? p. 18. Ua hoolohe anei ka lunatausani i kana? p. 19. Ua makemake anei oia e hoopakele ia Paulo?
Heaha ka Lusia kauoha i keia kanaka? p. 22. Kahea ka lunatausani ia wai? p. 23. I hea kekeahi o laua e hele ai? p. 31. A hoomau ka lua a i hea? p. 23 Owai ka mea e noho ana ma Kaisareia? p. 24. Ehia koa e hele pu me Paulo ilaila? Ehia hoohololio? Ehia kanaka ihe? No keaha keia hua ka nui e ukali iaia? He nui ka poe hoohalua; he nui na powa ma ka aina. Eia hoi e kokua ana ka ahalunakanawai iii ka poe hoohalua, a e ake ana o Lusia e hiki pono aku o Paulo i Kaisareia.
I ka wa hea ko lakou haalele ana i Ierusalema? O mka hora ehia ia? Hora eiwa o ka po? No keaha keia hele ana i ka po? Ihea aku ia pa? p.31. Owai ka i hoi hou mai i Iesusalema mai Anetipateri mai? p.32. Owai ke kiaaina? Owai kana wahine? Oh. 24: 24. He kanaka maikai anei? Wahi a kekahi, ua kaulana no kana mau hana ino. He kanaka makaukau a ikaika maka hana.
Pehea ka palapala a Lusia i kakau ai i ke kiaaina? p. 26-30. Ua aha ia o Paulo ma Kasareia? p. 36. E kali kona hookolokolo no wai? Heaha ko ke Akua manao no Paulo? p. 11. Heaha ko Paulo makemnake? Rom. 1: 10, 11. E kokua ana anei kaeia mau mea i ka hooko ana ia manao? Pehea ka Paulo oeleo ma Rom. 8: 28? Heaha ka Pauku Gula? He nui anei ka poe i hoehaia no Iesu? Ua manao anei kekahi poe ua pomaikai lakou ina hoehaia no ka Haku? Owai kekahi poe i hoeha ia Nona? Owai na kanaka ekolu i hooleiia iloko o ka imu ahi? No keaha? Ua make anei? Owai ka i hooleiia iloko o ka lua liona? Pakele anei? Owai ka i make? Nawai i pepehi ia Iesu? Ua manao anei lakou e kokua i ko ke Akua makemake ma ia hana?
Mele, "Iesu ke Alakai." Hoku Ao Nani 202. Pule, I lilo na hana hookeakea a ka poe hewa i inea e ko kua ai i ka hana a ka Haku.
NA HAKINA MANAO.
Na ke Akua malama i kona poe kanaka; no ka mea, ua ikaika ko lakou mau enemi. Maanei he 40 e kue ana i ka mea hookahi: ua hoohiki lakou e pepehi, a ua hana me ka maalea a me ka hoopunipuni
Ua oi ko ke Akua mana. Nana i hoike i ka manao ino, a hoala i makamaka na Paulo, a alakai aku iaia me kia pilikia ole.
Hoomoana mai ka anela o Iehova a puni ka poe weliweli iaia, a ua hoopakele hoi ia lakou, wahi a Davida. Hal. 34: 7.
Na ke Akua mai ka olelo hoolana i ka po: Ua ikeia kona malama ana ia Paulo, ma ka hoa'loha oiaio i hele aku i ona la, a ma ka huakai nui o na koa Roma i hele pu me ia.
Me he la ua oi aku ka ikaika o na iini hewa o ka poe ino, mamua o ko kakou i ka pono. Holo mama lakou ma ke ala o ka make, a hakalia kakou ma ke ala o ke ola.
Ina ua hoohiki hewa kekahi mai hooko. O ka mea hoohiki ino ana aole e nele kona hoopunipuni ana. Aole mehameha ka hele ana o na hewa, hele huakai no.
E hana pu me ke Akua i loaa ka pomaikai nui ana i makemake ai e haawi mai. Ina noi aku i wahi mea, e imi pu i loaa mai. Mai noi aku i ai, me ka manao e ulu wale ana ke kalo ma kou loi, me ke kanu ole ana i na huli, &c.
E kokua pu ana na mea a pau e pono ai--a na ke Akua e hoolilo i na manao a me na hana o kanaka i mea e holo ai kana mau hana.
I ka wa e kaua ana ma Sebastapol, ma ka hema o Rusia--ua pahu kekahi o na boma o ko Rusia, ma kekahi puu mawaho ae o ke kulanakauhale, a kahe mai ka wai o kekahi punawai, a kena ka makewai o ka pualikoa i hoonohoia ma ia wahi, iloko o na la a pau i koe o ke kaua ana.
Lilo ka mea make o ko Rusia i mea e ola'i ka enemi. Penei kekahi wahi kaao o Pereria: Hana mai ke Akua i ka honua--he wahi papu akea, palahalaha--panoa, aole wahi mea uliuli i ikeia. Aole pua, aole laalaau, aole kumu laau e ulu ana. Hele mai Oia e makaikai i ka ea hou ana i hana'i; a manao iho la oia e hoonani ia wahi: nolaila hoouna OIa ia kana Anela e lulu i na hua maikai, makamae mai o a o.
Ma kauwahi ua haule na hua alani, a ma kahi e na magenolia, Ma na wahi a pau o ka honua ua luluia na hua, e ulu ae a nani ke nana aku.
Hookahi o Satana me kona eheu uliuli, a ike kela i na hua e waiho wale ana mao a maanei: i iho la ia, "Na ka Mea Mana keia, a e hoopau auanei au" Hoomaka oia i kana hana, a o na hua a pau i loaa iaia, ua uhiia me ka lepo; a i mea e pau pono ai kana hana, ua kahea i na ao naulu e hoohaule mai i na ua o ka lani, ia ma u ka lepo a popopo na hua.
Ku mai la ia, me ka aka henehene ana, e kali ana no ka hiki ana ae o ka Haku a nana i ka makehewa o kana hana. Oiai e ku nana wale ana, ua omaka na hua, a ulu ae a paapu ka honua i na mea uliuli--me e ka nani! O ka mea ana i manao ai ua poho ua lilo i Edena nani lua ole!
Ua wela la waha o D. H. Kaailau i ka hua nioi, ke keke mai nei na niho.
I ke KUOKOA:--
E oluolu hou mai ia'u a me kou mau hookele, e hookau ae oe i kuu wahi pahi kahi umiumi maka puana-i o D. H. Kaailau o Honomakau. Ua puoho a oili mai nei ke poo nio puhuluhulu o D. H. Kaiialau ma ka Pae Aina o Ianuari 24, Helu 4 o keia makahiki, me na maka ano hapopo, me ka nau o na ku-i niho, me kona mau au loloa e naka ana a pu-ke na kuli, i ka mea o ka ikaika o ka hana a ka omole coniaca maluna a Kaiilau, ke kanaka i hoonaauao maikai ia e na makua o ka pono, Revs. E Bona a me D. B. Laimana. O ka laua hana i ao ole mai ai ia D. H. Kaailau, oia ka piepiele kuai rama me ka laikini ole, oia nae kana hana e hoopu malie nei iloko o ke koloka o ka hookamani, e huna malu ne@ iloko o ke kapa pouli o ka maalea, e like me ke akamai a me ka maalea o ka popoki, pela no oia e hana malu nei me he pahi umiumi la. O keia Kaailau ka makamua loa o ka lawelawe ana ma keia hana karaima a puuwai eleele ma keia mau apana, a na keia Kaailau i kanu hou aku nei, ua ulu, ua kawowo, a ke lalapa nei ke ahi o ka rama ma keia mau ap[ana. He kanaka keonimana maopopo o Kaailau ma kona mau hiohiona a me kona kulana; aka, ma kona waha a hiki i kona opu, he lua kupapau hamama.
Hookikina ,ai nei nae o ua o Kumulaau ino nei ia'u, no kuu hele ole ka e hoohiki i palpala hopu nona a me na haumana ana, hai aku au ia oe i ka oiaio, ua lia mua ia oe e a'u a me kuu hoa kakele ma ka oihana makai Pulaa, oiai ko maua mau la, a malalo o kekahi mau kumu, i like me keia: E aloha aku oe i kou Akua me kou naau a pau, me kou ikaika a pau, ua like no hoi ka lua me ia, e aloha aku oe i kou hoalauna e like me kou aloha ia oe iho. Ina no hoi aole oe he keiki papa no keia mau apana, hai aku au ia oe, he lehua mua oe, a he pio maopopo na ke kanawai.
Me na maka aniani poaeae o Kalua ke kupunakane o ua o Kaailau i waiho mai ai iaia, me ia mau maka aniani poaeae o ua o D. H. K. i kupaka ae nei me ka namu pake maloko o ka Pae Aina, e ohi hapuku ana ka wahie o Kapaau, me he kanaka Kiribati la, me kou manao paha i kau hoolaha pane ano ole, oia ka mea e nalowale ia ka hohono o kou inoa malalo o ka hana kuai rama, me kou manao e pahemo aku ana oe mai na umii a kuu wahi peni laho lio, aole oe e hala e ke kalohe nui o Honomakau, ua ki pololei ia ka poka boma i ka mea kalohe, aole i ka makani wahi a Nelekona.
Namu pake hou mai nei no o ua o Kaailau, he malama buke au na Paumano, aole pela oe e hoike hoo punipuni ai; e olelo ae no oe penei: He malama buke ka make loa wau na Kamalamailalo, oia ka unuhi pololei ana. A mailoko ae o ua buke nei a olua me ko kumu, i hana naaupo ai oe ia Hairama kau keiki, a me ua wahi buke nei no a olua, i hana naaupo hou ai oe i ko wahi punua peepoli. Namu Kiribati hou mai nei no ia'u no kuu mahalo ia W. White, a mahalo ole au ia J. W. Moanauli, ma kena no ua hana naaupo oe e Kaailau; kupono hoi paha ka mahalo ia W. White, ua ikeia kana mau hana mai kona hoomaka ana e lawelawe i ka oihana a hiki i kona kaawale ana mai ka oihana ae. Ma ka wa a'u i hoolaha'i ma ke KUOKOA i ka mea au e lili ino maka welawela mai nei ia'u no kuu huna ole ia oe a me au haumana, a mamua iho o ia wa, oia ka manwa i noho ae ai o J. W. Moanauli ma ka oihana, he wa kupono anei ia ia oe e ka hupo nui e mahalo aku ai? Oiai aole i keia ka hana, aole no hoi i hala he manawa mahuahua o ka lawelawe ana a J. W. Moanauli i ka oihana, e akaka'i ke ano o kana mau hana; i mai nei oe he lili au ia Moanauli no ka haawi ole mai ka o Moanauli ia'u i ka oihana makai a lilo ka hanohano ia S. W. Kawahamae; hoike au ia oe i ka mea oiaio: Aole ia mea iloko o ko'u puuwai; ua manao paha ka ona puuwai ahi o ka Pae Aina he oiaio na olelo pelo a alapahi a Kaailau, me ka uhiuhi lau mamane ka wai o Kapapala.
Aole au i manao e pane no keia; aka, no kuu manao o lilo na olelo alapahi a Kaailau i mea oiaio no ka ekeme ole ia aku, nolaila, hooi hou aku nei au i ka iakaika o ka mahu, i ike oe e Kaailau i ka wela ou mau maka i ka ehu o ka nioi, a mano oe e kua-i kaanai hou mai, ua oki kaua ma na hoolaha nupepa; oiai, eia no kaua a elua i Kohala nei, e waiho kela mau olelo, Ke lalapa nei ke ahi o ka rama iwaena o na kanaka maloko o keia mau apana o Hawi a me Honomakau, i kumu paio na kaua, ma ka hoole mai oe, a ma ka hooiaio aku au.
J. H. KELIINOKAHA.
WAIALUA FEMALE SEMINARY.
OLELO HOOLAHA.
I na lala o ka Ahahui Euanelio o Hawaii Komohana.
Ka haiia aku nei ka lohe, e hui ana ka Aha ma Waiohinu, Kau, i ka Poaha mua o Maraki la 5. O na lala o ka Ahahui Euanelio a me na lala o ka Ahahui Kula Sabati ma na Hamakua a hiki i na Kohala. Ua aeia ka Malulani e kii mai i ko na Kohala ma Mahukona, me ko na Hamakua & Waimea Kohala H. ma Kawaihae, he $100 ka uku paa o ka moku, ina he 50 ohua, he $2 o ka lala hookahi, a ina he 100 lala, he $1 ka uku no ka hele ana a me ka hoi ana mai. No na Kohala a me na Hamakua keia uku paa, koe ko na Kona. E ala e ko na Kohala a me ko na Hamakua i keia Maraki ae, no ka kakou hana maikai ma Kau, ua oluolu ka uku moku.
S. C. LUHIAU,
Lunahoomalu.
Kupilikii loko.
Ke KILOHANA POOKELA:--
Ia'u i holo mai ai no Honolulu nei a haalele aku la i ka ohana, a iwaena o lakou he kupuna palupalu oia o Mr. Puniwai. Ua make oia i ka la 21 o ka malama i hala, ma Keokea, Kona Hema, i ke 95 a oi o kona mau makahiki; he mau keiki a he mau moopuna kana e ola nei me ke aloha.
JOS. KAEO JR.
Ua hooneeia aku ke keena o ke Ana Aina Aupuni a i Kapuaiwa Hale.
I Maui aku nei ke Kuhina o ko na Aina e i ka pule i hala a hoi mai no i ka Poaono.
Ua ku mai ma ke kakahiaka Poalua nei he manuwa Farani, he 30 la holo mai Callao mai.
Ua lilo ae nei ia Mr. W. L. Wilcox ka hoolako ana i ka poi no ka Halemai Moiwahine.
I ka hora 7 A. M. a oi iki o ka Poaono o ka pule i hala, i haalele mai ai ka hanu hope loa o Mrs. Lowela Kamika i ke kino.
Ua hiki mai nei a Sam. Macy, ka mea i hookuhia i makai no na kaa, ma kahi o W. Wond Ua hoomaka oia e lawelawe i ka la mua o keia mahina.
Ua hoonanea ae ka Puali Puhi Ohe ma ka Home Lunalilo i ka Poaono i hala Ian. 31. E hoomanao e na makamaka, oia ka piha ana o na la hanau he 50 o ka Moi Puuwai Aloha Lahui Lunalilo, ina ia e ola ana.
Haleiwa ma Waialua.
Aole e haohao ana kekahi hapanui o ko makou poe heluhelu i na helehelena o ke kii maluna ae. Oia no ka halekula kaikamahine o Waialua o na makahiki i hala ae mahope. Ua hoomaka mua ia keia kula e ka Rev. O. H. Kulika ma Waiohinu, Hawaii, a mahope iho o kahi mau makahiki ua hoihoi ia i Waialua, Oahu, ilaila kai i malamaia ai e Miss M. E. Gelina me kona mau kokua a hala he mau makahiki, a hookuu loa ia. He lehulehu na kaikamahine Hawaii i hoopomaikai maloko o keia kula. Aole i makehewa ke ao ana a me ka luhi o no kumu nana i malama ke kula.
He kula emi loa keia o ka uku, he $25 wale no ka uku makahiki o ka haumana, ke ole makou e kuhihewa. Aohe kula hanai o ka aina i hiki ke ola ina oia ka uku makahiki o ka haumana. Iloko no nae o keia uku haahaa aole no i kaa pono a pau. Aloha o Haleiwa me kona mau haumana a pau a me kona mau kumu. Ua holo pono kana hana, a o na anoao i luluia maluna o ia kahua, aole loa i poho, ua ulu, a ke ulu nei, a e hoomau aku ana ka hua.
Mamuli o ka lokomaikai o kekahi o na haumana kahiko o ia kula, a he makuakane no hoi o na keiki lehulehu, i loaa mai ai he mele no ia hale kula, a oia keia malalo iho:
HALEIWA SONG.
[HAKUIA E MRS. P. PUUOHAU]
1-- Aloha no Haleiwa,
Ka home hoonui ike
O na opuu rose,
O ka lai kupolua.
Cho.-- Aole no he lua,
O kuu home ehukai;
Aloha no aloha,
Aloha no Haleiwa.
2-- Aloha kou mau rumi,
Me kou nani a pau
Na mala pua aala,
Vabine la anoano.
3-- Aloha no na kumu,
Na makua hanai
Me na hoa kula,
O ka imi naauao.
4-- Aloha no Anahulu,
Ka muliwai lailai
Me kona wai huihui,
E iniki hoolu ana.
5-- Aloha no na hoa,
E noho kaawale nei
Aole e hui hou ana,
Ma ka poli o Haleiwa.
6-- Aloha ia home olu,
Iu ano i ka ehukai
Aole no poina,
I na kau a kau
7-- Ua meha no Haleiwa,
Anoano ke ike aku
Aole lohe hou ia
Na leo mele hauoli.
8-- Mamina no o Haleiwa,
Ke kihapai nani
O ka hooulu lahui.
E ola'i Hawaii.
9-- Na kumu ma Iapana,
Kakou ma Hawaii nei
E hui pu kakou
Ma ka home mlai ma o.
10-- Aole no he lua,
O ia home kamahao
Mau a mau ke aloha
Aloha no na hoa.
OLELO KAHEA.
E noho ana ke Komiter o ka Ahahui Euanelio o ka mokupuni o Oahu, ma ka luakini wa Waiawa, Ewa, i ka la 14 o Feb. hora 3 P. M.; no ka ninaninau ana, a hoonoho ana ia S. P. K. Nawaa no ka Oihana Kahu, ma ke Sabati ae la 15, hora 11 A. M. Nolaila e akoakoa ae na lala o ke Komite.
Rev. C. M. Hai,
" J. N. Paikuli,
" S. Waiwaiole,
" E. S. Timoteo,
a me na Kahunapule, ma kahi a me ka manawa i oleloia maluna.
J. WAIAMAU,
L. H. o ke Komite.
KOHOIA NA LUNA.
Ma ka po Poalua la 3 o keia malama ua kohoia na Luna nui o ka Oihana Kinai Ahi Helu 4 ma ko lakou hale mau, a eia na Luna nui:
Luna Hoohana me } Jas H. Boyd
Puuku
Kokua Mua Peter Souza
" Elua David Kekulu
Kakauolelo Samuela Kamaka
Mahope iho o ka pau ana o na hana ua haawi ae ka Puuku he wahi papaaina na na hoa, ua ai, ua inu i na kohi kelekele a ka puukolu. Mahalo i na hoa i ka hoomau ana aku i ka Luna Hoohana ma kona kulana mau.
NA HOOLAHA HOU.
WAI! WAI!
Ke kauohaia aku nei ka poe a pau he pono hookahekahe wai ko lakou, mai keia la aku, o ka manawa hookahekahe wale no i aeia oia na hora mai ka 6 a ka 8 A. M., a mai ka hora 4 a i ka 6 P. M.; aole ma na manawa e ae.
Ma ke Kauoha
CHAS. B. WILSON,
Luna Wai.
Honolulu, Ian 30, 1885. 2009-tf.
HALEPAI O THOS. G. THRUM
--O KA NUPEPEA--
SATURDAY PRESS me KUOKOA
ALANUI KALEPA, HONOLULU
Malaila e paiia ai na ano a pau o na
BUKE,
HOIKE O NA KULA,
HOIKE A NA KOMITE,
NA HAAWINA KULA SABATI,
PAPA KUHIKUHI O NA ANO A PAU,
HOOLAHA NUNUI A LIILII,
BALOTA, LIPINE PAPALE,
TIKETA, WAHI LETA,
BILA PAI HAKAHKA,
HOOLAHA KUDALA,
&c., &c., &c.,
Iloko o ka wa pokole a me ka auhau haahaa.
A ma ka halekuai o THOS. G. THRUM
ma ALANUI PAPU, e loaa ai na
Kalana kakau o na ano a pau,
Wahi Leta " " "
Inika " " "
Penikala " " "
Mea Hoopipili, buke hoomanao,
Peni gula a me kumu gula,
Kii, a me na laau,
Buke kii o ka ohana,
Buke kii a na keiki,
Kaa a na keiki,
Kaa huila lua o na opio.
A he Agena no ke ana lole pepa o na
Keiki a me na wahine
No ka hailona ana i na lole me na inoa ponoi e hookoia na kauoha a pau no na papa inoa ke waihoia ma keia halekuai me ka uku pu o ka papa inoa i makemakeia. Uku no ka inoa hookahi me ka inika a me ka hulu, $1,50 ina ma ka papa inoa keleawe, a ina ma ka papa inoa dala, $2.
O na kauoha pau mai na mokupuni e hookoia ina e hoouna pu ia mai me ke dala a me ka moakaka pono o na hoakaka ana.
THOS. G. THRUM
NA MEA I LOAA NO KA PAPA HAWAII NO KA MAHINA E PAU ANA OKATOBA 31, 1884.
No na Misiona Kuwaho.
Mai ka ekalesia o Helani--S. W. Kawewehi...$13 60
Ekalesia o Kohala-- E. Bona..........................200 00
Ekalesia o Kaukeano--J. A. Cruzan.................65 55
Mai na Kilibati ma Kekaha Kauai...................12 20
Mai ka aina hoolimalima ma Hilo...................30 00
Mai a L. Kaaua--Vernon, Cala.........................20 99
Mai Ponape, Mortlock, Ruk me Puiglap, ma o
Rev. F. T. Doane..............................................72 75
Mai ka Paemoku Kilibati--Rev E A Walkup...19 60
------------
$435 70
NO NA BAIBALA AMERIKA
Na buke i kuaiia ma Ponape--Doane.......25 00
Na buke i kuaiia ka Paeaina Kilibati...81 65 $106.70
No ka pomaikai o ka Oihana Pai Palapala ma Kilibati.
Na buke i kuai ia ma Kilibati........81 65
Huina 624.00
W W Hall--Kakauolelo.
NA HOOLAHA KUMAU.
W A. KINI
LOIO, LOIO, LOIO.
KEENA HANA: Helu 15 Alanui Kaahumanu, Honolulu. tf
W O. SMITH.
LOIO, LOIO, LOIO.
KEENA HANA: Helu 36 alanui Ka@@pa
tf.
W R. KAKELA:
LOIO A HE KOKUA MA KE KANAWAI
He Luna Hooia@o PalaPala.
tf.
A ROSA (AKONI.)
LOIO A HE KOKUA MA KE KANAWAI
He Luna Hooiaio Palapala.
KEENA HANA: Ma ke Keena Loio K@h@i
tf.
S B. DOLE.
LOIO, LOIO, LOIO.
He Luna Hooiaio Palapala.
KEENA HANA: Ma Alanui Kaahumanu
tf.
CECIL BROWN.
LOIO A HE KOKUA MA KE KANAWAI
A he Agena Hooiaio Palapala no ka Mokupuni o Oahu
KEENA HANA: Helu 8 alanui Kaahumanu
tf.
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hooiaio Palapala.
KEENA HANA: alanui Kalepa.
RICHARD F. BICKERTON.
(PEKEKONA.)
LOIO A HE KOKUA MA KE KANAWAI
KEENA HANA: Helu 27 alanui Kalepa
tf.
WILDER & CO. (WAILA MA)
Mea kuai papa a me na lako kukula o na ano a pau, a me na me @@ pono a no ka hale.
Kihi Alanui Moiwahine me Pap@
WILLIAM AULD.
I una Hooiaio Palapala Kepa Puah@@ no ka Apana o Kona.
KEENA HANA: Ma ke Keena Wai@@ Honolulu.
S H. MEEKAPU.
Tela humuhumu lole.
HALE HANA: Helu 11 alanui Nuuanu
C BREWER & CO. ( BURUA MA.)
Ua makemake ia ka poe mea ILI K@MALOO a me na ILI BIBI, a pela h@@ na ILI MIKO o na ano a pau, e kuai mai lakou mau ILI me makou, a e haawi no @ kou i ke KUMUKUAI KIEKIE LOA o kakou Makeke.
JNO. M. KEALOHA.
LUNA Hooiaio Palapala Kopa P@@@@ no ka apana o Kawaihau, K@@ai Agena no ka Hooiaio ana i na Palapala no ka apana o Kawaihau, Kauai Komisina Palena Aina no ka apana Kawaihau, Kauai, a @o Luna H@@ Mar@ no ka Pae Aina holookoa.
1163-1yr.
DILLINGHAM & CO.
Mau Mea Kuai Lako H@@
Alanui Papu, Honolulu
FRANK PAHIA.
ANA AINA! ANA AINA!!
KEENA HANA: Aia ina alanui Moi, k@ ke loa i ka Uwapo o Hooliliamanu.
C C. COLEMAN.
Amara a he mea hana Meki@
Kapili Kapuai hao lio.
A ME KA
Hana Kaa Lio ana, etc
Halo Hana ma Alanui Alii,
905-tf E kokoe ka i ke Alanui P@
PAPA! PAPA!
AIA MA KAHI O
LEWERS & COOKE
(O LUI MA)
ma ke kahua kahiko ma alanui Papu a me Moi
E loaa ai na
@PAPA NOUAIKI@
o kela a me keia ano.
Na Pani Puka, Na Puka Aniani, Na Olepele Na Pou, Na O-a, Na Papa Hele, Na Papa Ku, A me na Papa Moe nui loa
Na Pili o na Hale o na Ano a Pa@
Na Pepa Hoonani, Na Pena o na Wai e i@ Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano Na Aila Hoomaloo, he lehulehu wale, Na Aila e ae o na ano a pau.
NA WAI VANIKI
A ME NA
WAI HOOHINUHINU NANI
O NA ANO A PAU LOA.
NA BALAKI ANO NU! WALE
A ke hai ia aku nei ka lono i na Makamaka pau, ua makaukau keia mau Makamaka o oukou e hoolawa aku ma na mea a pau e pili ana ma ka laua oihana
NO KA
UKU HAAHAA LOA.
E like me ka mea e holo ana n@@@@@@
LAUA a me ka MEA KUAI.
E Hele mai! E na Makamaka
lawa no hoi ko@ makemake
A ka oluolu a@@ @@ kai.