Ka Nupepa Kuokoa, Volume XXIV, Number 7, 14 February 1885 — KEIA ME KEIA. [ARTICLE]

KEIA ME KEIA.

Ma ke ahiahi aku nei o ka La Poni Moi ua malamaia he Aha Mele mauka o Kalihi. He hookahakaha ka na Hui Kinai Ahi o ke kulanakauhale nei ma na alanui ma ka Poaha nei. Ma ka Likelike i ka Poakahi nei i [illegible] aku ai ke Kiaaina Dominis no ka mokupuni o Maui. O na lono e wawaia nei, e kukulu hou ia ana he hale holo hau ma alanui Beritania. He hale nui keia e hana ia ana ana. Ma ke awawaw o Manoa, ua hanau mai na Mr. & Mrs. M. Kapakaula he opuu rose kaikamahine no ke au hooola lahui. Ma ke ahiahi o ka la 5 o Feb., ua hoohuiia e Rev. S Kaili o Waikapu, Maui, o Mr. Nuupe me Miss Kiake ma ka berita o ka mare. Ma ka Poakahi nei i holo aku ai ka mokuahi Tokio, a e haalele ana oia ia Kapalakiko ma ka la 26 o keia mahina a ku hou maanei ma ka la 7 o Maraki, no ka hoihoi hou ana aku i ke Kanikela Irwin. Ua hopuia iho la he ekolu pake puhi okolehao ma Molokai, a ua loaa pu iku me na pono hana no ke puhi ana. Ua hookolokoloia a hoopaiia no $50, no elua pake, a hookahi i lawe ia mai no Honolulu nei. Ma Kapalama-uka, ua make ma ka [illegible] o keia mahina o Paulo, he pua mohala ae mai ka puhaka mai o Mr. a me Mrs. Edward Harbottle, a ua mae nae. E ku mai ana ka mokuahi Zealandia maanei mai Kikane mai, a malaila mai e lohe ia ai na lono no ka heihei waapa pukahi mawaena o ko laila mau keiki me ka moho hoehoe waapa pukahi o Amerika. Ma ke ahiahi Poakahi iho nei, ua hopuia iho la ka haole puhi ahi o ka mokuahi kolo Alert me ewalu tini opiuma ma kona kino. A ma ka mokuahi Mariposa hoi he paku puhi ahi no ka i hopuia me 41 tini opiuma. Ma ke ahiahi Poakahi nei i ku mai ai ka mokuahi kolo moku Alert iloko o na la holo he 15 mai Kapalakiko mai, a oiai oia e hookomo mai ana, ua holo aku la ka Moi mawaho i ukaliia e ka Loio Kuhina no ka hoau mua ana [illegible]ia. Ma ka Poaono hope o ka mahina i hala i lawe aihueia aku ai he heluna dala nui mai ka pahu aku o Amina Ahiona, oia hoi he 90 dala ma ka bila, a he ekolu hapaha ma ke gula. Eueu no hoi keia piko pau i ka iole. O keia la o makou e hoea aku nei, oia no ka la hapenuia o na keiki o ka aina pua, a ke loheia aku nei na leo o na pake me na kanaka Hawaii i ka hooho hapenuia pu ana, (konohi.) He pake ae nei ka hoi oukou. Ma ka la Sabati aku nei, oiai kekahi wahine e hoi mai ana mai ka pule mai, a hiki ma ka hale o kekahi makamaka, ua haule iho la ia a make loa. O Kahikimua ka inoa o keia wahine. Ua ku mai ka mokuahi Tokio mai Iokahama mai ma ka la Sabati nei me na paahana Iapana elike me na itamu i hoolaha mua ia e keia pepa. He heluna mahuahua keia o ka Iapana. Heaha mai nei la hoi nei o ka moku Elele, o ka haule wale no ka ia o na luina iloko o ke kai. I ka apulu no paha o kahi moku, apulu pu me na rigini, i ka wa e pii ae ai na luina, pahu au ana iloko o ke kai. M. M. O. B. Ma ka po o ka la 28 o Ian. i hala, ma Malanahai, Hamakua, oiai ke alii wahine o ka po e hoalu ana, a ia kuuna mai i kona nani piha, a mailoko mai o ia kuu'na ana mai i kona nani piha, i mohala mai ai he opuu daimana (keikikane) na Mr. & Mrs. Eli Keahua. Ua pa ae ka makani Kona ma Kau, Hawaii, iloko o ka pule i hala me ka ikaika, a ua holapu ae la no hoi ke ahi ia 12 eka ko o ka Hui Pahala. He kau papaa la loa no hoi keia Kau. E kamailio ana o Prof. Wayland imua o na anaina hui o Kaumakapili a me Kawaiahao ma ka luakini o Kawaihao, ma ke ahiahi o ka la apopo hora 7:30. He kumu oia no kekahi kula loio ma Amerika, a na kona makuakane i haku kekahi mau buke hoonaauao i unuhiia ma ka olelo Hawaii, a i kula ia ma ke kula nui o Lahainaluna.

Ma ke kakahiaka nui Poakolu i kaalo ae ai ka mokuahi Arabic mawaho o ko kakou awa nei mai Kapalakiko mai. Ua hoike ia mai ma o ke pailata la, i hele huli mai nei oia i ka mokuahi San Pablo o ia laina hookahi. Iaia i holo mai ai, aole oia i ike i kekahi moku ma kona ala hele; ua kaalo mua ae nei oia ma Hawaii, Maui a hoohiki loa mai nei i Oahu nei. Mawaho no oia kahi i kalewa ai a holo loa no. I ka nupepa KUOKOA :– E oluolu kou ahonui e hookomo iho i keia wahi hunahuna mea hou ma kahi kaawale o kou mau kolamu i ike mai ai na kini ou mai Hawaii a Niihau, a oia keia malalo iho nei: Aia ma ka Poaono la 31 o Ian., ua lilo i ka piko pau i ka iole he $90 ma ka bila a me ekolu hapaha ulaula, mai ka waihona dala aku o B. Amina Ahiona, ma alanui Kula. B. M. MENESE.