Ka Nupepa Kuokoa, Volume XXIV, Number 24, 13 June 1885 — No Hilo Boy. [ARTICLE]

No Hilo Bay

i Na kekahi makamaka o Hilo mai e hoike ana penei : Ina manawa ua ikaika loa o Hilo nei, e pulumi ana ka wai i na opala a me ka lepo a ahu aku iloko o kahawai, a na ka wai hoi o ke kahawai e alako aku i kai. Aole nae keia. opala e hele ana a komo loa iloko o ke kai, aka, e pau ana i ka ili ma ka nuku muliwai a hoakoakoa malaila a hiki i ke ku ana me he wahi mokupuni la. He mea maa mau keia ma ka muliwai o Wailuku, Wailoa, a ma Waiolama no i kekahi manawa. He mau hana ano kupanaha ka keia i ka manao o kekahi poe kakaikahi olaila, no ka mea, ua manao lakou, o na mea ano e a pau e hoea ana ma ia mau muliwai alaila he poino no ka aina a he make paha no kekahi poe kiekie o ka aina, a he nui wale aku na kohokoho o ua poe kakaikahi la. Ma ka hoomaopopo aku i ka poe e pane ana pela, ua hiki ke oleloia aole i loaa he manao maikai o ke kanaka iloko ona, a he pupule paha ma kekahi ano. He mea kupanaha loa ka ikeia ana aku o na puu one e kuku mai ana iwaena o ka wai, me he pakaukau la, a me he pahu kupapau la hoi kekahi, a ua kamailio nui lakou, e mea ana, a e mea ana, a pela wale aku na haanui o keia poe. Wahi a keia makamaka, ua hopohopo ia no ka lilo o na opio ma ke koho lalau ana e like me keia, a mamuli o ia mau ano ua lilo i mea nune nui iwaena o lakou.