Ka Nupepa Kuokoa, Volume XXIV, Number 32, 8 August 1885 — KAIKOO NUI MA KALAPANA, KAIMU A KAHAUALEA. [ARTICLE]

KAIKOO NUI MA KALAPANA, KAIMU A KAHAUALEA.

Ma ka la Sabati Iulai 26, ua ikeia kekahi kaikoo nui ma na wahi i haiia ae la. Ma Kalapana nei, ua hoomaka mai no ke ano o ke kaikoo ma ka Poaono la 25; aka, aole i manaoia e nui loa mai ana. aka, ma ka la 26, oia ka la a ke kai i hoike mai ai i ka hana io, oiai na hora awakea o ua la nei ma kela ahua one nui e moe loihi ana mai Huiepa a Pelekane a haU !oa aku i Kohao, aole ia ahua one i keia wa, ua lawe ke kai i kekahi hapa, a ua pahola ia aku la iloko o Waiakolea kekahi. A o ka nana ana o ka aina i keia wa, he iliwai like mai ke kai a i ka aina, a me he mea la e hele mai ana ko ke kai poe iuka nei, a pela hoi ko uka nei poe i ke kai; no

ka mea, i ka wa kai piha, e pahola ana kekai mai o a o o ua one nei; aka, i ka wa kai maloo, ua hoolilo ia iho la kekahi wahi o keia one i muliwai, a e like ana me Waiolama ma Hilo. He aneane pilikia loa ka hele ana malaila i ka wa hohonu me ka holoholona, a he pilikia nui ia no makou a me na malihini pu. Oiai o ke alanui no ia e hele mau ia ai, a he mea hoohewahewa no hoi ia na na malihini i ike mua, ke ike hou a me na kamaaina i hele i kahi e ke hoi hou mai e ike i na hiona o ka aina hanau Ka pa aupuni i kukulu ia mauka o ka loko o Waiakolea, oia ke po i ana a ka nalu ma ua la nei, a ua pau loa i ka hiolo. O kela loko i-a kaulana o Waiakolea, ua hooilina ia ia wahi no na pohaku na laau a me ke one, a he nui ka poino malaila. Ka hale laau hou o S. H. Haʻaheo, ua komo ia e ke kai, aole nae he mea i poino; oiai, ua pau e no na pono i ka lawe ia. Ka luakini Maunakea hoolana pu ia e ke kai, a he po-i ana ia na ka nalu ma ia la, a ua nui ka pi-o-o o na kanaka no keia kai, a haalele kekahi poe i ko lakou mau hale a holo no ka makaʻu, me ka lawe ana i na pono a pau a koe ka hale. NO KAIMU. O ka hale o Palea e noho ia nei e ka makuahunowai wahine ua komo ia e ke kai, me ke aa. Ka hale o Kalawaia, a me ko Bila, oia haawina hookahi, pau na pa pohaku i ka hiolo a nui ka poino oia mau makamaka. A pakele ke ola o J. Paakaula ma ia la, i o-pa pu ia e ka nalu, a poino kana mala uwala a me ka Kahoalalua. A nui aku no na poino. MA KAHAUALEA. E noho ana ka halawai o ka papa a Maunaloa, me ka ike aku no i ke kai; aka noho no, a hoopaa aku la i ka puka o ka hale i ke kaula me ka manao paha e paa; aka, hookahi no nalu i ka lua lele liilii ka hale a me na kanaka pu, a he pomaikai ko lakou pakele ana ma ia hana ana, a ua pilikia ke alakai oia papa a Maunaloa i ka hale ole. He nui aku no na mea i koe no na hana a ke kai ma keia mau wahi ae la; aka, ua lawa no keia. S. T. PIIHONUA. Kalapana, Puna, lulai 27, 1885.