Ka Nupepa Kuokoa, Volume XXV, Number 8, 20 February 1886 — Pono Ole. [ARTICLE]

Pono Ole.

Maloko o kekahi nupepa haole a na Kuhina a me ka ona miliona, ua naku hele ae na olelo pale a ia aoao, no ke kulana a me na hoohana ia ana o na koa i ka la koho balota no ka pahu pololei ia ana mai o na olelo pane hoehaeha a kekahi o na nupepa kuokoa no ia mea. Ma ka laua paio ana, ua anai pu ia aku ka aoao pale i na hana ekaeka a hoohaahaa o ia la. He nui no na hana iho a me na hana kolohe i hoohana ia e ka aoao aupuni ma na wahi a pau o ka aina,—ka aua ana i ka pono koho o ke kanaka ; ke kipe ana i ke dala ; ka hooweliweli ana i ka poe kuokoa o ka manao e noho ana ma ka oihana ; ka hoopau ana i kekahi poe ; ka aua ia ana o ka pono kamailio ma ke telepona ; ka lawe ia ana o ka pahu balota mai ka rumi koho a kekahi rumi e aku ; na hana lapuwale no a pau i pa-umi aku i ko ke ano koho i ike ia mamua. Ua like loa no na hana ana ; ka aoao kuhina, me he la ua aihue lakou, a ua maka'u loa o loaa aku a ike pono ia ko lakou hewa. Aka, no na koa, he mea hoohaahaa i ke kulana a me ke ano o ke kanaka, i ka ike aku i ka houluulu ia a paikau hele ia aku o lakou me ko lakou mau aahu koa, a hiki i koho balota. Ma ke aupuni Amerika aole he kuleana koho ko na koa kumau, a o na koa puwalu ka i ae wale ia no e koho ma ko lakou ano makaainana, me ka piha pono o na makahiki ma ke kanawai. I ko lakou wa e hele ai e koho, ua haalele mua lakou i ko lakou mau aahu koa, aole hoi e like me ko kakou poe ka hele pu me na pahu, a pela aku. Ua like keia mau hana i keia keneturia malamalama, imua o kekahi lahui naauao, me ka hoao ana o kekahi kanaka e hoouluulu i kekahi bipi hae ma ke kiani ana aku i ka welu ula koko imua o kona maka.