Ka Nupepa Kuokoa, Volume XXVI, Number 29, 16 July 1887 — Untitled [ARTICLE]

MALALO o ke poo hoolaha "Ma ke Kauoha," e ike iho ai ko makou poe heluhelu i ke kuahaua a ke alii ka Moi no ke Kumukanawai hou i aponoia a kau inoa ia e ia ma ka la 6 o Iulai nei 1887. Pela pu me na hookohuia ana o ka papa kuhina hou o ke aupuni, na Peresidena me na lala o ka Papa Hoonaauao, Papa Ola, a me ka Papa hoo pae Limahana. Ke puka aku nei i keia la ma ke kauoha ke Kuhina Kalaiaina.

KE OLE e koho hewa, he kanakolu a oi ae na makahiki i kaa hope aku mai ke ku ana o ko Kamehameha III. Kumukanakawai a hiki i keia wa, a he iwakalua a oi ae na makahiki mai ke ku ana o ko Kamehameha V. Kumukanawai a hiki i keia wa. A hiki i keia la a makou e puka aku nei, ka piha ana ia o na la he umikumamaono o ke ku ana o ke Kumukanawai o ke alii ka Moi Kalakaua I, mai kona la i aponoia ai. O ka makou wale no o ka mahalo a me ka hoomaikai aku ma na hana e alakai ai i ka naau alii ma ke ala pono io o ka maluhia, ke kuokoa o ke aupuni, a me ke kupaa o ka nohoalii.

O NA hana ano nui a makou i ike a i lohe iho nei iwaena o ka aha kuhina hou, oia ko lakou hoole ana i ke kakau inoa ana malalo o na bona aie aupuni me ko Enelani mau hui piepiele dala; kahea ana i ka poe he mau koina ko lakou i ke aupuni, a me ka hoao mua loa ana e hoemi iho i kekahi mau hooiilo dala nui me ka maopopo pono ole aku o kahi pomaikai loaa mai. Ua hoike makou ma ka pule i hala he hana koikoi aku ana ka keia aha kuhina hou, oia ko lakou waele mua ana i na hihipea o ke alahele holomua, a me na kinaʻunaʻu nana i hookai i ka loaa nui ana mai o na pomaikai a ka lehulehu i kaniuhu mau ai. Ma ko lakou noonoo ana paha o keia ka hana mua, alaila keehi pono aku i ke kahua o ka hana. A he mea oiaio ia i maopopo ia kakou a pau---waele mua ka mahinaai alaila kanu aku. Hookahi hana aku i koe o ke kali a hua mai. Pela ko kakou iini mai o a o, e hooulu ia ka hana a e hoohua mai.

Mamuli o na hana i lawelawe koke ia iho nei e ko Honolulu nei, a puai aku la ma na paemoku o kakou ma na waha, na leta, a me na nupepa, ua ala mai la iwaena o lakou na noonoo iike ole elua, e apono ana kekahi a e hoa hewa ana hoi kekahi. No makou iho a ma ke ano hoi he kulana kuokoa, ua apono makou ma namea ku i ka pono, a e ahewa hoi ma na mea ku i ka he wa. E maopopo ana no ia kakou a pau ma ke ano nui, ao ka hapanui no paha, ke kumu o ke ala ana mai o keia mau noonoo like ole; aka, i mea e hoikeia ai ke kaona a me nakahoaka o ia mau helehelena, e kiai i ka manawa, e nana i na ouli, e houluulu i na mea a pau e loaa ana ma ke ala o ka noonoo. A no ka wa pono e kaana, hookaulike, kalai, a hookaawale pono. Malia, aia iwaena o ia mau mea he kumu hoonaauao kupono.