Ka Nupepa Kuokoa, Volume XXVI, Number 50, 10 December 1887 — Page 4
| This text was transcribed by: | Kawena Komeiji |
| This work is dedicated to: | Kalowena Komeiji |
Nupepa Kuokoa.
No ka Makahiki...$2.00
No Eono Mahina....1.00
KUIKE KA RULA.
Poaono....Dekemaba 10, 1887.
Ahahui Imipono Karistiano.
Ma ka apana o Naalehu, Kau, Hawaii, ua hoala ae o J.K. Kelaula a ame J.M. Kapahu i Ahahui Imipono Karistiano, a ua koho ia o H. Kekaalua i Peresidena, Hope Peresidena, J.D. Palea; Kakauolelo, Henry; kona hope, P.H. Kahula. Na komite imi hana, C.M.W. Kanui, Kuikahi me C. Haili; ka nui o na lala he 54; na la halawai, Poakahi, paio; Poalua, halawai mau; Poalima, halawai haiolelo a me ke kakaulima.
Nolaila, ke waiho aku nei ka'u poloai imua o na lehulehu a pau mai Hawaii a Kauai, e hoala i keia mau hana i piha na kini i ka makaukau i ke kamailio ana imua o ke anina haipule, a imua o ka lehulehu, a na ke Akua e kokua mai i na hana pono.
HENRY, Kakauolelo.
Lawe ia ka Uku Malama me ka Hewa ole.
E oluolu mai oe e kuu milimili, e hoike ae i ke akea i ike ia e na lawelawe oihana Aupuni o keia au, a me ka lawe ana i ko'u uku malama ma ka noho makai ana no ka apana o South Kohala nei, a penei:
Ma ka la 1 o Iune i hala aku la, ua oluolu ia Kalanikaulilua ma o Kona kauoha ana ia Hon. J.T. Baker Makai Nui o keia Mokupuni, e koho hou ia'u i makai uku malama no keia apana, a ma ia la 1 o Iune i noho makai ai wau no ka uku he $25.00, mai ia la mai a hiki i keia la 1 o Dekemaba, 1887, a ma ke kakahiaka poniponi o ia la, ua loaa mai la ia'u mai ka luna mai o Wm. K. Kalua he wahi leta mai, ia James Bright mai a na'u ua wahi leta nei, a penei na manao maloko a'u i heluhelu iho ai.
J.H. Nahiwa Esq.; Aloha oe; mamuli o kou hoopaakiki i ka'u ao ia oe a me kou hoohaahaa ole mai ia'u, nolaila, ua lawe ia kou uku malama, a aole e loaa ana ia oe he uku malama, ua lokahi ko'u manao me ko ka Makau nui.
James Bright.
Sept. Shriff. S. Kohala.
Ma ka hoopaakiki ana @ @a i lawe ia ai? Ke haohao nei au i keia, aole no ke ano minamina ia mau dala i loaa ai ia'u o ka mahina, aka, o ka hana ka'u i minamina mamuli o na ano hana me keia, he auo hana kamalii.
Ma kuu manao, mamuli o kuu pane ana i na mea a Napoleon Pa i hoolaha ai no'u ma ka nupepa KUOKOA, no ka mea, ua keakea mai o James Bright ia'u mamua, i kela la a Napoleon Pa i mihi mai ai mamua o'u a me ua James Bright nei no kela hoolaha lalau ana aole au e pane no ka Napoleon Pa mea i hoolaha ai, ua ae aku no wau, aka, mahope iho o kuu noonoo pono ana aole e hiki ia'u ke pane ole no ia mea, mamuli manao io ia he oiaio ka N. Pa mea i hoolaha ai no'u ma ka pepa o Okatoba 29, nolaila, ua pane au ma ke ano mama no ka oiaio ole o na mea i hoolaha ia me ka hoopunipuni, a o ka'u mea i hoolaha ai ma ka pepa o Novemaba 19, oia maoli no ka oiaio, aole ma ka manao kue ia Napoleon Pa ma ia hoolaha ana, aka, i hoike no ka oiaio, a malalo paha o ia kumu ka lawe lime nui ana o ua mau poo oihana nei, ua haki no, malia aole olua i ike i ka la, a me ka hora e laweia ai ka olua mai a olua aku, e like me ko'u ike mua ole o ke kakahiaka Poaha la 1 o Dekemaba, 1887 ka la e lawe aku ai olua i ko'u wahi mana mai a'u aku. Penei hoi ka Baibala e pili ana i ke ola uhane:
Na ke Akua o ka Lani e haawi mai, a nana no e lawe aku, a o keia hoi, na ko ka honua nei akua i haawi mai, a na ke kanaka hoi i lawe aku kahi ola, me ka maopopo ole o ka hewa nui e pau ai. Mahalo piha ia olua.
A pane mai oe e James Bright, olali hou aku au.
NA HIHIA O KE KAU JURE I HOOPAU WALE IA.
1. Wm. Waikaaloa, aihue mai ka apana mai o Hamakua, hoopau wale ia.
2. Kalua Kalepa, Imiloaa hoopunipuni, mai ka apana mai no o Hamakua, hoopau wale ia.
3. Wile Tripp, hoomahuka wahine mai keia apana ae, hoopau wale ia.
4 Anotoni Amaral, pue kaikamahine pukiki 4 makahiki, mai Hilo mai, hoopau wale ia, hoopii ia ana ma Hilo no ka hoeha, ke hoi no Hilo.
5. Haole aihue lio, no Hamakua ka haole aihue lio ma ka Aha apana, hoopai ia no 100 dala me 1 makahiki hoopaahao. Hoohalahala ia imua o keia kau ka olelo hooholo a J.P. Niau, hoopau wale ia.
5. Hookahi haole hoeha i kekahi poe kepani o Papaikou, Hilo, hoopau wale ia.
O ke koena aku o na hihia, ke hookolokolo nei.
O Kau-a-i kela, pue wahine o North Kohala, ka loihia ana, aole i lohe ia ka olelo hooholo a ke Jure mamua o ka paa ana o keia leta. Me ke aloha.
JOS. H.N. KAWAIOULU.
Waimea, Dekemaba @th, 1887.
EDISEPA FERIDO
KA HIENA KAULANA O BABALIA
KA OLALI O NA MEA HUNA POHIHIHI
Ka Aina Lewa Pahaohao o Mauna Beria
Ke Kuhikuhi Puuone Poupou Kamahao, a o ka Liona Hanu Meheu Pololei.
He Moolelo Enelani i unuhi ia no ke Kuokoa.
Ano, ke makemake nei au e ike oe i ka'u mea pohihihi hope loa, ka mea hoi i olelo ia, ka iwi aoao o na iwi aoao, a me ka io hoi o na io, nolaila, e ike oe i keia wa iaia a me ka'u mau hana.
Pane mai la ua wahi Setiwa la, e hana e kuu keiki, mai kali no ka mea, ua haiki mai ko kaua wa.
Oiai ua wahi Setiwa la e ku ana imua o kana keiki, ia wa huli ae la oia a nana aku la i na helehelena o kana keiki, ua hele a mo'a unouno'a Puna i ke ahi a ka wahine; i kau a mea o ka ui, akahi no oia a ike maoli aku i ka ui o kana keiki, ka nani o kona mau helehelena a me ka hiehie lua ole.
I kela wa laua e ku ana ma kahi a Edisepa i hana ai i keia mau mea, kukuli iho la ua Edisepa la a hea iho la penei:
E ka pahu aniani o Rouseta, auhea ke pohihihi iloko ou.
I kela wa koke no, nakeke ae la na mea hana o ua pahu aniani la, a nalo iho la, lilo ae la ka pahu aniani i apana lole silika nani lua ole, a o ke kiaha pua hoi iloko i mea poepoe, a ua uhiia iho i ka lole silika.
I kela wa, hea hou iho la ua Edisepa la i na kookoo apo aloha penei:
E na kookoo apo aloha o Idiama, auhea ke pohihihi iloko o olua?
Ia wa koke no nalo aku la ua mau kookoo la a lilo ae la laua i mau mea ano e a ua nalo nae laua iloko o ka lole silika.
Ia wa, hea hou iho la oia, e ipulepo kamahao o Ilumeda, auhea ke pohihihi iloko ou.
Ia wa koke no, nalo iho la ua ipulepo la aole hoi i ike ia aku kona ano, no ka mea, ua paa e iho i ka lole silika.
Hea hou iho la oia, e ke kiaha opaka o Merodisema, auhea ke pohihihi iloko ou.
Emoole, uhi mai la ka lole silika, aole i ike ia aku ke ano o ua kiaha la.
Hea hou ae la ua Edisepa la, e na huaai o ka laau Beburosia, auhea ke pohihihi iloko o olua, lilo ae la laua i mea ano okoa, aka, ua nalo aku laua i ka lole silika.
Hea hou ae la ua Edisepa la, e na papale ooma o Nubia, auhea ke pohihihi iloko o olua.
I kela wa, hoholo loa aku la ka lole silika a nalo na mea a pau mai luna a lalo.
Ia wa, huli ae la ua Edisepa la a pane aku la i kona wahi makuakane makalii penei:
E kuu makua maikai, eia kuu pohihihi i olelo aku nei ia oe, kuu luhi, kuu aloha, kuu ipo, kuu lei mae ole i na kau a kau, he io hoi no kuu io a me ka iwi o kuu iwi, nolaila au e hai aku nei ia oe, akahi a kuu kuu luhi o keia mau kau i hele ia iho nei i ka ua a me ka makani, i ka la a me ke anu, i ke koekoe a me ka inea.
Pane aku la kahi Setiwa, heaha kau mea e kamailio mai nei ia'u, aole o'u maopopo iki, heaha ke ano o keia mea e uhi ia nei e keia lole?
O Bakinerosa keia kuu wahine, ano kou wa e ike ai, wahi a ua Ekisepa la i pane aku ai imua o kona wahi makuakane.
Ia wa, lalau iho la ua Edisepa la ma kekahi kihi o ka lole silika, a huki ae la ma kahi e, a he mea kahaha no kaua e ka mea heluhelu a me Setiwa pu kekahi i ka ike ana iho, e moe lolii ae ana ka nohea Bakinerosa iloko o kekahi pahu aniani huinaha, me kona mau helehelena i haiamu ia e ka nani a me ka maikai e like no me na kau i hala e aku mamua.
Ia wa, nani ke kamahao a me ke pohihihi maoli o kahi Setiwa i kona ike ana i keia mea kupanaha a kana keiki i hana ai.
Me he mea la, o oe paha kekahi e ka mea heluhelu i komo pu ma keia ano hana kamahao a Edisepa, a he ano like paha kou manao me ko Satiwa makalii, ae, o kaua pu no ilaila, i ka wa o alialia, alia nae kaua e pulale e wehewehe iki aku kou mea kakau no keia mau mea a pau i hiki mai ai a lilo i wahine.
I ka wa i nalowale honua ai o Bakinerosa mai ke alo aku o Edisepa, aia oia i kekahi aupuni okoa kahi i noho ai i keia wa, oia ke aupuni o na hoku hele eiwa.
Aole keia o Bakinerosa oiaio, aka, he akaku wale no keia o kona mau helehelena.
Malalo nae o ka mana o ke kumu laau kamahao a me ke kanaka pilikua, ka luahine kupua, na manu kamahao a me na moo i ka haawi ana mai i keia mau makana malalo iho:
Oia keia: O ka pahu aniani kamahao a me ka pua iloko, a o ua pua la, o ke poo akaku no ia o Bakinerosa, na kookoo apo aloha, oia no kona mau lima, ka ipulepo, oia no kona pauku kino, ke kiaha opaka, o ke kiaha opaka no ia o eha ka manao, o na hua ai elua oia no kona mau wawae, a o na papale ooma, oia no kona mau paa kamaa, a o keia pahu aniani oia no ka pahu anoano o ke poo ona i waiho ai, a i ka hui ana o keia mau mea a pau ua loaa mai o Bakinerosa ka nohea o Mauna Bevia.
Maanei e ka mea heluhelu, ua maopopo ae la paha neia mau mea a pau ia kaua, ua loaa o Bakine rosa, ua kino, ua io, ua iwi, a hookahi wahi pilikia i koe o ke ola, ka hanu, ka olelo mai ka hana a pela aku.
(Aole i pau.)
AHAOLELO O 1887.
LA HANA 23, DEC. 1.
Halawai ka Hale. Pule ke kahunapule, heluhelu ia ka moolelo o ka la hana i hala a aponoia.
NA PALAPALA HOOPII.
Na Kaumauoha he hoopii mai Honolulu he 147 inoa, e noi ana e malama pono ke aupuni i na pono wai a pau o na kanaka mai na ano hoopoino a pau mai ke aupuni. Waihoia i ke Kuhina Kalaiaina.
Na Helekunihi he hoopii mai a H.P. Halana e hoihoiia aku iaia na dala he 5.50 no kona auhau papalua ia. Waihoia ma ka papa a hiki i ke kau mau o 1888 e noonoo ai me ka Bila Haawina.
HOIKE A NA KOMITE MAU.
Na ke komite hookolokolo i waiho mai i ka lakou hoike e pili ana i ka hoopii a T.H. Davies & Co. no ka huina dala o 66.33, he dute maluna o ka lepo manu i hookomoia mai e lakou.
Ua ike ke komite ua wehe akea ia ke kanawai dute o 1882, a oiai aohe he wa e noonoo pu ia ai keia hoopii me ka Bila Haawina, ua manao ke komite e waihoia ma ka papa a hiki i ke kau mau o Mei, 1888. Aponoia ka hoike.
HOIKE KOMITE WAE.
Na ke komite wae o na waiona a me opiuma i hoike mai no ka lawelaweia ana o ka opiuma. Ua noonoo ke komite he nui wale na hana haihai kanawai i lawelaweia, a ua waiho pu mai ke komite he kanawai hou. Ma ke noi ua waihoia ka hoike ma ka papa a waiho pu ia ka bila no heluhelu elua.
Na ke komite wae ia lakou ka bila kanawai e haawi ana i ka mana i ke Kuhina Waiwai e hana aelike hoomaemae telegrapa i hoike mai, ua manao ke komite e hooholo ia ka bila me ka lakou mau hoololi uuku. Waihoia ka hoike ma ka papa a noonoo pu me ka bila kanawai.
Na ke komite wae i hoounaia e nana i ke kulana o na mai lepera ma Kakaako i hoike mai, ua ike ke komite he ekolu mahele o na mai lepera; he noho huikau, a na lakou no e lawelawe na pono ai. Ua manao pu ke komite he mea pono i ka Papa Ola ke hana mau hale hou e hookaawale pono ai i na mahele mai i oleloia maluna. Ma ke noi ua haawiia ka hoike i ke Kuhina Waiwai.
NA OLELO HOOHOLO ME NA BILA.
Na Kamauoha i waiho mai he olelo hooholo e ninau ana i ka Loio Kuhina owai la ka hope Loio Kuhina i hookohu ia no ka lawelawe ana i na hihia hewa ma ke kau kiure o Waimea e noho ana ma ka la 1 o Dec., 1887? Nana ponoi anei e lawelawe na hihia, a heaha kona uku?
NA HANA O KA LA.
Heluhelu ekolu ana i ka bila kanawai e hoopau ana i ka oihana kiaaina, ma ke noi ua hooholo loa ia ka bila no kona heluhelu ekolu. Ma ke kaheaia ana o na ae a me na hoole, he 36 ma ka ae e hooholo, a he 10 kue.
Ma ke noi a F. Palaunu, ua hapai hou ia ka bila kanawai hoomoe uwea telegrapa a me ka hoike a ke komite wae mai ka papa, ua komite ka Hale; heluheluia ka bila, hooholoia ka pauku 1 me ka hoololi.
Ma ke noi ua hoomaha ke komite a hora 1 noho hou.
Noho hou ke komite a noonoo hou ia ke koena o ka bila kanawai, a hooholoia. Ma ke noi ua hoopauia ke komite, a aponoia ka hoike a ka lunahoomalu, haawiia ka bila no ke kakau poepoe a heluhelu ekolu ma ka Poaono.
Ma ke kapaeia ana o na rula, ua waiho mai ke komite wae o na waiona i ka lakou hoike e pili ana i ka bila kanawai hoohaiki i ke kuai waiona ma na mokupuni. Ua manao ke komite e hooholo lea ia ka bila.
Noi ke 'lii Kakela, e hapaiia ae ka bila kanawai e hoohaiki ana i ke kuai waiona liilii mai ka papa, e lilo i hana no ka la, a e noonoo pu me ka hoike i waihoia mai. Aponoia.
Heluhelu elua ia ke kanawai a noiia e hooholo no ke kakau poepoe. Kamailio loihi na hoa o ka hale no ka hoopanee a ke kau mau o 1888. A ma ka ninauia ana, ua aponoia no ke kakau poepoe, a heluhelu ekolu ma ka Poaono.
Na ka Peresidena i waiho mai ka inoa ke komite wae no ka oihana wai o Hilo, oia ke Kuhina Kalaiaina Townsend, Rikikini, C. Palaunu a me A.S. Wilcox.
Ma ke noi ua hoopanee ka hale a ka hora 10 kakahiaka Poalima.
LA HANA 14, DEC. 2.
Halawai ka Hale hora 10. Pule ke kahunapule, a heluheluia ka moolelo o ka la hana i hala a aponoia.
HOIKE KOMITE MAU.
Na ke komite malama ola no ka palapala hoopii a Jno. Lopez e ae ia oia e lapaau i ka mai lepera i hoike mai; ua hooholo ke komite e haawiia ka palapala hoopii i ke Kuhina Kalaiaina, a mai iaia aku i ka Papa Ola.
Na ke komite o na aina e i hoike mai no ka bila kanawai e hooponopono ana i ka holo ana mai o na eemoku a mau limahana mai na aina e, i huiia me kekahi mau palapala hoopii, ua manao ke komite he mea pono e hooholo ia ka bila me kekahi mau hoololi i hanaia e ke komite. Waihoia ka hoike ma ka papa a noonoo pu me ka bila imua o ke komite o ka Hale.
HOIKE KOMITE WAE.
Na ke komite wae o na Bona aupuni i waiho mai i ka lakou hoike e pili ana no na dala poho ma ka hoaie dala ana ma Ladana; ua manao ke komite he maopopo ole na hoike i loaa ia lakou, nolaila ua hana lakou he olelo hooholo e kauoha ana i ke Kuhina Waiwai e huli hou aku i kekahi mau kumu e hiki ai ke puai mai na lono oiaio, a e hoopii hoi i na agena hoaie dala, a pela aku. Waihoia ma ka papa a noonoo pu me ka bila kanawai.
Na ka Loio Kuhina i pane mai no na ninau a Kamauoha i nehinei: O Jas. Bright ka hope Loio Kuhina ma ke kau o Waimea, a na D.H. Hikikoki e lawelawe na hihia; o ka uku i manao ia he 150 dala.
OLELO HOOHOLO ME NA BILA.
Na Kalaukoa he olelo hooholo, e kauohaia e ke Kakauolelo o ka Hale e hoouna aku i palapala i ka Peresidena o ka Papa Ola me ka hoakaka pu aku iaia i ke apono ana o keia Hale ia S.H. Meekapu e hele a komo aku ma ka halemai o Kakaako. Hooholoia.
Nana no he olelo hooholo e kauoha ana i ke Kuhina Kalaiaina e hoakea a hooloihi aku i ke alanui Peleula a hiki i ke kapa o ka muliwai o Makaho; a ina he mau koina kekahi e waiho ia mai ana, e hoike mai ke Kuhina Kalaiaina imua o keia Hale. Haawiia i ke Kuhina Kalaiaina.
Nana no he olelo hooholo e kauoha ana i ke Kuhina Kalaiaina e hoemi hou ae i hope kela pa laau mauka iho o ka hale hookolokolo hoomalu o Honolulu, i kaawale kekahi wahi e hoolulu ai no na holoholona a kaa paha o ka poe a pau e hele ae ana imua o ka aha hookolokolo no ko lakou hihia. Haawiia i ke Kuhina Kalaiaina.
Na Townsend he olelo hooholo e kauoha ana i ka Loio Kuhina e huli pono aku i ka poe a pau e paa nei i na bona aupuni ma Honolulu nei.
Na ka Loio Kuhina i heluhelu mai no ka wa mua he bila kanawai e hoopau loa ana i na kanawai e papa ana i na kanaka Hawaii aole e holo i na aina e. Ma ke noi a ke 'lii Likikini, ua kapaeia na rula a heluhelu elua ia ka bila ma kona poo, haawiia no ke kakau poepoe a heluhelu ekolu i ka Poaono.
NA HANA O KA LA.
Heluhelu ekolu ana i ka bila kanawai e haawi ana he mana i ke Kuhina Waiwai no ka haawi ana aku i kekahi mau bona aupuni. Hooholo loa ia ka bila kanawai ma kona heluhelu ekolu.
Noho hou ka Hale ma ka hora 1.
Noi ke 'lii Kakela e hapaiia ka noonoo ana i ka olelo hooholo a ke komite o na bona i waiho mai ai i ke kakahiaka ma ka lakou hoike no na bona. Aponoia.
Noi hou oia e hooholo loa ia ua olelo hooholo la. Kamailio pokole kekahi mau hoa a hooholo loa ia.
Heluhelu ekolu ia ka bila kanawai e huikala ana i ke Kuhina Waiwai no kekahi mau hoolilo kanawai ole, a hooholo loa ia.
Heluhelu ekolu ia ka bila kanawai e hoakaka ana i na huaolelo ka "Moi" a me ke "Alii", ma kekahi mau mea, a ua hooholo loa ia me kekahi hoololi.
Heluhelu ekolu ia ka bila kanawai e kau ana i auhau maluna na Hui Panihakahaka o na aina e i hookahi dala no kela me keia haneri dala i loaa ia lakou, a e kaupale loa ana i na auhau e ae i ua mau Hui la, a ua hooholo loa ia.
Heluhelu elua ia ka bila kanawai e hoopau ana i na Kanawai e kuai ana i ka opiuma ma keia aupuni, a e hoala hou ana i na Kanawai i hoopau ia malalo o ua kanawai opiuma la. Ma ke noi ua hooholoia ka bila no ke kakau poepoe a heluhelu ekolu ma ka Poakahi.
No ka lawa ole o na hana ma ke pakaukau o ka Peresidena, ua noi mai o Kini e heluhelu ekolu ia na bila kanawai i hooholoia e ka Hale e heluhelu ekolu ma ka Poaono i hana no keia la, a aponoia.
Heluhelu ekolu ia ka bila kanawai e hooponopono ana i ka lapaau ma na laau Hawaii a hooholo loa ia.
Heluhelu ekolu ia ka bila kanawai e hoomaopopo ana i kekahi mau hana i lawelawe ia e na Kiaaina mamua, a hooholo loa ia me kekahi hoololi.
Hoopanee a ka hora 10 Poano.
(E nana ma ka Aoao Ekolu.)
PAPA! PAPA!
AIA O KAHI
LEWERS & COOKE.
(O LUI MA)
ma ke kahua kahiko ma alanui Papu a me Moi.
E loaa ai
PAPA NOUAIKI
o kela a me keia ano.
Pani Puka, Na Puka Aniani, Na Olepelepe Na pou, Na O-a, Na Papa Hele, Na Papa Ku. A me na Papa Moe nui loa
Na Pili o na Hale o na Ano a Pau
Na Pepa Hoonani, Na Pena o na Wai e pau, Na Kui mai ke Nui a ka Makalii, Na Ami Puka, Na Ami Pukap aniani, Na Ami o na ano a pau, Na Aila Pena, o kela me keia ano, Na Aila Hoomaloo, he lehulehu wale, Na Aila e ae o na ano a pau.
NA WAI VANIKI
A ME NA
WAI HOOHINUHINU NANI
O NA ANO A PAU LOA
NA BALAKI ANO NUI WALE
A ke hai ia aku nei ka lono i na Makamaka pau, ua makaukau keia mau Makamaka o oukou e hoolawa aku ma na mea a pau e pili ana ma ka laua oihana.
NO KA
UKU HAAHAA LOA.
E likeme ka mea e holo ana mawaena
LAUA a me ka MEA KUAI.
HELE MAI E WAE NO OUKOU
MRS. THOMAS LACK,
HELU 81, ALANUI PAPU,
MEA KUAI A LAWELAWE I
NA
Mikini Humuhumu na Aahu, a nui wale Aku
HE AGENA KUAI NO NA MIKINI
White, New Home,
Davis, Crown, Howe,
Me Florence,
Na Kui Mikini o na ano a pau a Howard,
Na pepa ana lole o na ano a pau, a me kela keia mea
NA LOPI MIKINI A KALAKA.
HE AGENA KUAI I NA
Pu Raifela, Pu panapana, Pu ki manu, na Poka, Lu, Pauda, Kukaepele.
NA KAPUAHI AILA MAHU
Mai ke nui a ka liilii.
Ma ka lawelawe nui ana o'u i ka hana lima akamai o ka oihana hana pu a pela aku, ua makaukau au e hooko kaulua ole i na kauoha a pau.
WOLFE & CO.
Mea Kuai i na Ano a pau o na Mea
AI, HUA AI, O NA ANO A PAU.
Eke Paloa, Berena, Waiu Bata, Berena manoanoa, Berena huinaha, mea ono, o kela ano keia ano; Ko paa, Kope, Ti, Aila mhu, a me na ano a pau.
Helu 66, Alanui Hotele, Halekuai mua o Lewis & Co.
E loaa koke aku no na kauoha a pau loa me ka hakalia ole, a me ka maikai o na hoomalu ia ana. E hooko ia na kauoha o ke kulanakauhale nei me ka hikiwawe ma na ka me ka uku ole. O na kauoha mai na mokupuni, e lawelawe koke ia. 2985-6m
Nuhou! Nuhou! Nuhou!
AILA MAHU MAIKAI!
HOOKAHI DALE WALE NO NO KE
KINI AILA HOOKAHI!
E kuai pau ia aku ana no ka nui loa o ka aila i keia manawa.
E AU E NA MAKAMAKA! E AU!
E kipa ae ma ka halekuai o Kakela me Kuke.
B.F. EHLERS & CO.,
PAINAPA.
Poe Kuai i na Ano Lole a Pau.
Helu 99 alanui Papu. - Honolulu
E loaa mau ana na lole hou o na ano a pau maluna o kela a me keia moku.
Ka Waiwai o ka Hilinai
KA AYER Laau Sasaparila, kai kaulana a hilinai nui ia no ka hoomaemae koko, ma na wahi a pau o ka honua, he aneane 40 makahiki i hala ae nei, 2 ua lawelawe nui ia hoi iwaena o na oihana lapaau. O keia LAAU SASAPARILA, no loko ae ia o ke aa Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.
HE koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoopehu Na keia LAAU e hoomaemae ia mau mea ino a pau, a maikai. O na kauka lapaau a pau o Amerika i ike i ke ano o ka AYER SASAPARILA, ua olelo lakou, aole he mea maikai e ae no ka hoomaemae koko ana mai na mai i awili pu ia, aka o keia wale no. No ka HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e hoomaemae hakalia ole mamua ae o kekahi ano laau e ae. O ke KOKO ino hakuhaku, a nawaliwali hoi kona holo pono ana ma ke kino, e hoomaemae ia a e hooikaiak pu ia no hoi ma o ka ai ana keia LAAU SASAPARILA A AYER. He maalahi a he MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi mau laae e ae.
A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku. He nui na laau hoomaemae koko i hoolaha wahahee wale ia malalo o na inoa lehulheu, aka, o na hilinai a me na hooia wale no a ke ao holookoa, maluna o ka Ayer Laau Sasaparila.
I HOOMAKUKAUIA E Kauka J.C. Aver & Co., Lowell, Mass.
HOLLISTER & CO.
Na Agena ma ka Paeaina Hawaii.
Helu 100....Alanui Papu, Honolulu
2086-tf
FRANK GERTZ.
MEA KALEPA A LAWELAWE HANA MA
NA ANO KAMAA A PAU NO NA
Wahine, Kaikamahine a me Kane.
Na Kamaa Buti a me na Kamaa haahaa no na Keiki Kane a me na Kanaka makua, o na ano paikini hou loa
2084-6.
Kakela a me Kuke
HALEKU NUI O NA WAIWAI.
E laa na pahiolo, koi hole, hamale, koi nui a me liilii, kila, wili puaa, rula, apuapu, kui o na ano a pau, kala kaa, hao hoopaa puka.
pohaku hoana, kepa, lei ilio, kaula hao ilio, pahi, upa, pahi umiumi, kalapu, kope hulu, pulupulu, eepa ka lakala, lina hao, ami, keehi a me
KAULA OPI
Palau o na ano a pau
Oo, ho, kopala, pe, kipikua, hao kope, au ho a pela aku, kua bipi, lei bipi, kaula hao bipi, uwea pa, uwea keleawe, hao pila, piula, kaa palala, ipuhao, ipu ki
PA-PALAI MAKAU ME KA AHO
Ili wai, papa holoi, kopa ala, kaula kuaina, hu'akai, ehi wawae, hulu pena, a pela aku.
Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe.
PENA HOOMALOO
a me aniani hale
AILA MAHU, AILA MIKINI, AILA HAMO, AILA KAA, INIKA KAMAA.
PAUDA, KUKAEPELE, KIANA PAUDA, UIKI IPUKUKUI O NA ANO HE NUI A LEHULEHU.
LOLE MAKEPONO
E loaa na
AHINAHINA, KALAKOA, KEOKEO, LEPONALO, HULUMANU UWEWAHINE, KUI HUMUHUMU, A ME KA LOPI
Ke Kuike e loaa no ia ma kahi o
Kakela & Kuke!
NA MEA PIULA
Mikini Humuhumu
Mekini a WHEELER a me WILSON
MIKINI A WILCOX ME GIBBS
NA MIKINI A
REMINGTON.
He nui loa na mea hao me na ukana ae o na ano a pau, aole hiki ke hai pau ia aku, hewa i ka wai na maka ke ike.
Laau Lapaau Kaulana Loa
A DR. JAYNE.
LAAU HOOMAEMAE KOKO
LAAU HOOPAU NAIO, LAAU KUNU, PENIKILA, HUAALE, PAAKAI, LAAU HOOPAA HI,
Me na Laau Hamo a Pela 'ku.
Kakela me Kuke.