Ka Nupepa Kuokoa, Volume XXVII, Number 8, 25 February 1888 — AWAIAULU IA. [ARTICLE]

AWAIAULU IA.

Ma ka po Poakahi iho nei, Feberuari 20, ma ka home noho o Mr. August Dreier, ma Ululani, Kulaokahua, ua hoohui ia o Mr. John Markham a me Miss Anna Dreier ma ka berita maemae o ka mare, na ka Bihopa o Olba i hipuu ia laua a paa a lilo i hookahi, "Hookahi puuwai, hookahi pana ana." He nui na maka maka a me na hoaloha i hoea ae ma laila e ike ai ia laua, a ua pahola ia mai imua o lakou na hookipa pumehana a me na hoolauna oluolu ana. Mahope koke iho o ka mare ia ana, ua lulumi aku la na hoaloha e haawi i ko lakou mau hoomaikai ana no na opio i hipuu ia, a mawaena o ia poe ka Hon. A. S. Cleghorn a me Mr. a me Mrs. Boardman, na poo o ka Oihana Dute o ke Aupuni, a me na kakauolelo opio o loko o ia keena, Mr. F. A. Schaefer, ke Kanikela o Italia, Mr. Nakayama, ke Kanikela Iapana, a me kekahi poe maka hanohano e ae o keia kulanakauhale. Pau ae la ka ike ana kono ia mai la na mea a pau i akoakoa ae e hele i ka papaaina—ua ai a ua lawa, ua inu a kena, a koe okoa aku na mea maikai i pahola ia mai e ka lokomaikai o Mr. Dreier, ka makuakane o ka ui nohea opio i mare ia iho la Malaila pu ae o Mr. Berger a me kana mau keiki puhi ohe kahi i hoohonehone ai me ka la kou mau mea kani, a ua malama ia he aha hulahula mahope iho o ka paina ana.

I ke ahiahi Poalua nei ke ee ana aku o na mea i mare ia maluna o ka mokuahi Mikahala a holo aku la no Kauai e hoohala ai no kekahi mau pule, a ke puana ae nei makou e hahai ia ko laua alahele ma keia mua aku me na hauoli a me na pomaikai he nui.