Ka Nupepa Kuokoa, Volume XXVII, Number 11, 17 March 1888 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXVII,  HELU II.  HONOLULU, POAONO, MARAKI 17, 1888.  NA HELU A PAU, 2172.

HOOLAHA KUMAU.

GEORGE P. KAMAUOHA

 

He loio a he Koua ma ke Kanawai.

A Me Mea

ANA AINA

E loaa no ma Kohala Akau, Hawaii.

2091 1y

 

VOLNEY VAILLANCOURT ASHFORD,

AKEPOKA

He Loio, Hoakala, Pale ma ke Kanawai, Kakau olelo, Lunahooponopono a me ka hana ana i na Palapala hoolilo.

 

LAWELAWE ILOKO O NA AHA A PAU O KE AUPUNI

 

E hana ia no na Palapala pili Kanawai a pau.

 

Kaena Hana Helu 21, Alanui Kalepa Honolulu Hale. (2150 1y)

 

A ROSA (AKONI)

LOIO O HE KOKUA MA KE KANAWAI.

He Luna Hooiaio Palapala

KEENA HANA: Ma ke Keena Loio Kuhina. tf

 

CECIL BROWN.

LOIO A HE KOKUA AMA KE KANAWAI?

HE Agena Hooiao Palapala no ka Mokupuni o Oahu

KEENA HANA: Ma alanui Kalepa. Tf

 

WILLIAAM C ACHI.

Loio a he kokua ma ke kanawai imua o na Aha a pau o keia Aupuni.

 

He Mea Ana Aina a he Boroka ma na waiwai paa.

 

Keena Hana, Hele 15, Alanui Kaahumanu Honolulu, oia ke Keena mua iho nei o Kini me Peterson.  2114-y

 

JOHN MAHIAI KANEAKUA

LOIO A HE KOKUA MA KE KANAWAI. HE MEA UNUHIOLELO MA KA OLELO BERITANIA A ME KA OLELO HAWAII.

Keena Hana, maluna no o ka Banako o Hihopa ma. 1 yr.

 

JAMES M. MONSARRAT (MAUNAKEA.)

LOIO A HE KOKUA MA KE KANAWAI

He Luna hooiaio Palapaia.

            E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

KEENA HANA: Alanui Kalepa.

 

KAMIKA, KAKINA a me KINI, LOIO, LOIO, LOIO

KEENA HANA: HELU—Alanui Papu, @ Honolulu

 

S.B. DOLE, LOIO, LOIO, LOIO.

He Luna Hooiaio Palapala

KEENA HANA: Helu 15 alanui Kaahumanu 2070 1y

 

W.R. KAKELA,

LOIO A HE KOKUA MA KE KANAWAI

He Luna Hooiaio Palapala.

 

M. THOMPSON, LOIO MA KE KANAWAI.

Keena Hana, aia iluna o ka Hale Pohaku o Kimo Campble, kihi o na alanui Papu me Kalepa, Honolulu.

 

HE LOIO IMUA O NA AHA.

            Ina i makemakeia, alaila e haawai no oia kona manao kanawai ma ke kakau ana ma ka pepa, no ke ano o ka hihia e manaoia ana e hoopii maluna o na olelo ike e waiho ia mai ana e ka mea nana ka hihia. 2121-1y.

 

WILDER & CO. (WAILA MA.)

            Mea kuai papa a me na lake kukulu hale na ana a pau, a ma ka mo ne pono a pau no ku hala.

Kihi Alanui Moiwahin me Papu. tf

 

E.G. HITCHCOCK (AIKUE HIKIKOKI)

LOIO, A KOKUA MA NA MEA A PAU E PILI ANA MA KE KANAWAI.

E ohi ia no na Bila Aie, me ka wewi HILO, HAWAII. 2114. 1 YR.

 

S.K. MAHOE.

LOIO A HE KKOKUA MA KE KANAWAI.

 

Ma Agena Hooiaio Palapala Kope ne ka Makupuni o Oahu.

 

He Luna Hooiaio Palapala Kepa Paahana me ka Apana o Waialua, Oahu.

E loaa no ma Waialua, Oahu. 2128-1y.

 

WILLIAM McCANDLESS.

            HALEKUAI BIPI O WILLIAM MA KALALENA ma Ulakoheo. Na ano Bipi a me na ia a pau o ka makeke no na kumukuai oluolu. Uala Kahiki a pela`ku. 2002-1y.

 

EDISEPA FERIDO

KA HIENA KAULANA O BAGALIA

KA OLALI O NA MEA HUNA POHIHIHI

Ka Aina Lewa pahaohao o Mauna Bevia

Ke Kuhikuhi Puuone Poupou Kamahao, a o

ka Liona hanu meheu Pololei.

He Moolelo Enelani i unuhi ia na he Kuokoa

            Aohe kupaa i nele kona hina i ka nani o ua Reina Tamerasina la, aole hoi he nani i nele kona mahalo ole iaia, a ina he kanaka huhu loa kekahi, i kona wa e ike ai i na helehelena o ua kaikamahjine la, e oluolu no auanei oia e like me ka muliwai kahe malie.

            Ea, nani io keia kakamahine, nona paha ka hooheno ana:

            Nani molale ke kula o ka ehaeha

            I ka holo kainepu a ka lio keokeo.

            O ka mea nae i kaulana loa ai o keia nohea oia no kona kupaa luli ole, aole oia e make make e launa me kekahi kane, a he huhu loa hoi oia i ka hoohai ia mai, a he hoopailua aku hoi aoia i kekahi mea hooipoipo mai iaia, aohe no ana mea lealea mawaena o na kane.

            He nui a he lehulehu wale na keiki alii i hoao iaia ma na ano a pau e hei ai, aka, aole oia i huli iki mai, aole no hoi i puni, okiloa aku hoi na minoakaka ana ma kona mau paplina.

            Ua like ka lakou maunu me ka maunu ekaeka, a he papai ka ia e hoi ai.

            E ka mea heluhelu, ke ike ae la no kaua i ke kupaa o keia wahine, a oia ka kou mea kakau e puana ae nei ina paha o kaua pu kekahi ilaila, ina ua hoao kaua i ka mana a ka Hawaii i ka laau kaulana ia Kaili Poniuniu.  "Lawe no a lilo, hiu no a wela, nana ia e loha, a pau ae la keia."

            Ua ike ae nei hoi kaua i kona makemake ana e hele e ike ia Edisepa ka imi pohihihi kaulana e ka houna, a pehea ana la kona ano, e lilo ana paha, aka, e nana aku kakou i ka laua mau kukai olelo ana.

            No kekahi mau la loihi keia huakai hele a ua kaikamahine luliole la, hoea aku la oia no ke aupuni o Pelekane i Enelani.

            I kona hiki ana aku no ke uwapo, ua wawa ia ae la ma na huina alanui ka hiki ana aku o ua kaikamahine ihu kani la o Peresia.

            Ua hoopiha ia na alanui a me na hale i na makaikai o ka aina no ka nana ana i ka nani nohea Reina Tamerasian.

            He mea oiaio, ua pahola ia mai na leo mahalo mai o a o ka lehulehu me ka hooho ana:  Auwe!  Ka nani o na nani o Peresia eia ae!!

            Aole i liuliu hiki mai la ke kaa alii mai ia Edisepa mai, i hoouna mai i kaa no ua nohea la, aka, ua hoole aku ua kaikamahine la me ka pane ana aku:

            "Aole au e kau aku maluna o kou kaa hoowalewale."

            Hoi aku la ke kaa alii o Edisepa, a hoike aku la na kanukaa i na mea i olelo ia aku i na mea olelo ia mai ia lakou, aole nae i pane mai ua Edisepa la.

            Hoolele ia mai la ke kaa o ua nohea la a me kona mau lio.

            Ua hana ia kona kaa mai ke gula a me ke dala mai, a o na ili huki a me na pono a pau o ka lio he gula maemoe wale no.

            Kau ae la ua kaikamahine la iluna o ke kaa a me kona mau haia wahine a pau he 500.

            Ia lakou no hoi a noho pono, ua huku koke aku la na paa lio he iwakalua i ke kaa, a hoomaka aku la ke kaa no ka holo pololei ana no ka hale alii.

            Oiai ke kaa alii o ua kaikamahine la o Peresia e holo ana, a no kekahi mau minute hele wale no, hiki aku la lakou no ka hale alii o Edisepa.

            Lele iho la ua kaikamahine la mailuna iho o ke kaa, a komo aku la oia a me kona mau haiawahine a pau me ai iloko o ka hale alii, ua kii mai la o Bakinerosa iaia a lawe aku la no kona noho i hoomakaukau ia.

            I kela wa, ua haiamu mai la na alii o ka aina me na maka hanohano a pau o ke alo alii no ka makaikai ana no ka nani o Peresia.

            Oiai ua Reine Tamerasina la o Peresia e noho ana maluna o kona noho me ka hiehie nui, ua haalulu na mea a pau i ka ike ana i kona nani, aole hookahi mea i nele kona nana pono iaia, i ua nohea la o Peresia a huli ae, ua huli ae, ua huli like ae la ka maka o na mea a pau.

            I ua Reine Tamerasina la e au ana na maka i ka mea imi pohihihi; a no ka nele o kona ike ana iaia, huli ae la oia a ninau ae la ia Bakinerosa, auhea la kau kane, ka mea hoi i kaulana i ka imi mea pohihihi?

            Pane aku la ua Bakinerosa la, kokoke oia e puka mai, e kali iki.

            Aole no hoi i liuliu iho oili mai la ua Edisepa la a kakou me kona hiehie nui, nana aku no hoi i ua Edisepa la a kaua

Nani molale ka Ihe a Kawela

I ke ku oheohe i ka malie.

Haa ana na kini o ke Koolau

Uwe ka piko i kai o Mokuhano.

            Ma ka nana ana i na helehelena o ua Edisepa la, he nani kona a me ka hiehie luaole, ahohe nani e like me ia, o ka nani o Peresia, oia wale no kona hoa e kohukohu ai i ka noho kapae.

            Iloko o keia nani nui i uhola iho maluna o Edisepa, aole ia he mea na ua kaikamahine nohea la o Peresia e oluolu iho ai o kona manao haakei, he oia mau no kamahoa ano uole'a.

            Ia Edisepa e noho ana maluna o ka noho, haawi aku la oia i na hoomaikai piha no ua kaikamahine la o Peresia, me ka pane ana aku:

            E ka nani o Peresia, heaha la ka mea nui iloko o kou naau i hiki mai nei oe mua o'u?

            Ina he mea no'u e poino ai e hoike mai, a ina he mea e pomaikai ai, alaila e pomaikai no kaua.

            Pane aku la ua kaikamahine la o Peresia:

            He manao nui no ko'u i hele mai nei, a oia ka'u e hoomahele aku nei penei:

            O ka iwakaluakumamaha keia o ko'u mau makahiki o ke ola ana maluna o keia ilihonua, aole au i ae e mare kane, aole i ka hooipoipo, a okiloa hoi ke hoopa mai ma kekahi o ko'u mau lala, nolaila, e haawi makana no au ia oe i na oe e hoike mai ana i ka mea oiaio, e mare kane ana anei au?

            Pane aku la o Edisepa, mamua ae o kou mare ana i ke kane, e haumia ana oe.

            Pane mai la ua kaikamahine la me na maka ioena o ka mea i piha i ka huuu.  Pehea i maopopo ai ia oe?

            Pane aku la o Edisepa, ua ike au ia oe ma kou mau ano a pau, o kou kupaa i keia wa, he an okapekepeke no.

            Ia wa hoohiki paa mai la ua kaikamahine la me ka pane ana mai i keia mau huaolelo penei:

            Ke hoohiki paa loa aku nei au imua ou a imua o na mana lani, e hoao oe ia'u ma na ano a pau i wahi no'u e puni ai, aole loa au e puni ia oe, aole hoi e haule i kekahi hewa, oiai ua ike au i na mea a pau.

            Ano, ke ku nei au a hoi no ko'u aupuni, a e hoao ae oe ma na ano a pau i mea no'u e haulehia ai, aole hoi au e maliu mai ana i kau mau pelo hoowalewale.

            I ka pau ana no o keia mau huaolelo a ua Reina Tamerasina la, ku ae la oia me na helehelena iwaena o ka mea i piha i ka huhu a hoi aku la lakou no ka moku.

            Ia auina la no, hoi aku la lakou no ko lakou aupuni.

            No kekahi mau la loihi hoea aku la ua nohea la no kona aina

            Iaia maloko o kona hale alii, kauoha ae la oia i na koa a pau he 60,000 e kiai iaia, i 5,000 i kela a me keia po, a he 5,000 no hoi i ke ao, a pela mau no a puni ka makahiki.

            I ua kaikamahine la iloko o ka nanea nui me ka noonoo mua ole e hiki mai ana kekahi mea nana e hoopahua i kona kupaa.

            I waenakonu o ka po, me he mea la o ka hora 2 ia o ka wanaao, e moe ana no ua nani la o Peresia maluna o kona wahi moe ia wa.

            Iloko nae oia nanea nui, aia hoi, ua puiwa loa ia oia i kona pa ana me kekahi mea kino.

            Iaia i nana iho ai, ike iho la ia i kekahi keiki kanaka ui e moe ana ma kona aoao, i kona nana pono ana iho, aia hoi, o ke kanaka no ka ana i kamailio pu ai ma ke aupuni o Enelani, nona hoi ka inoa ka imi Pohihihi kaulana o ke ao.     (Aole i pau.)

 

LAUDILA.

KA NAITA HOOPAHAOHAO O NA

KAKAI MAUNA ME NA KAEI PALI O ITALIA

Ka Olali oke Kahua Kaua.

Ka Eueu nana i hookauihi ka Opohi malamalama o ka

La:  ka Ui kelakela i malamaia mawaena o na kua-

hiwi me na kualone; ka nani nana i hoomalule

ka puuwai o na aliiwahine a pau o europa

a i eha ka "eha lima oie a ke aloha."

Ka Makani Puahiohio Wiliau o ka Hikina.

A o ke kupueu Iwikani o ka Makakila

            O oe e ke alii a me ka'u moopuna, o olua pu ke kaana like ana ia haawina o ke kaumaha, a o makou aku mahope.

            Ina pela ua pono, e kipa aku au e makaikai i ka nani o kou aupuni, no ka mea, akahi hoi au a ike i ke aupuni he hiki ka iaia ke hele i ka lewa nei.

            Ae, e kuu haku, he kokua ikaika no hoi ia nou iloko o kou mau la o ka pilikia.

            Ia lakou i hiki aku ai ma ka puka o ka halealii, ua puka mai la ka ui Hiaralia a haawi mai la i kona aloha i ke keikialii, a pela ua hoi keia i haawi aku ai i kona aloha.

            Ia wa i iho mai ai ka ui Hiaralia a hiki i ke anuu o lalo loa, a pane mai la oia:

            E oluolu ana anei oe e ka mea hoeha puuwai e komo mai maloko o ko makou wahi halealii nei.

            Ua oluolu au i na mea a pau au e olelo mai ai e ke alii wahine.

            Ia wa i lalau mai ai na lima o ka ui Hiaralia i na lima o kana mea i kau nui ai a kuikui lima pu aku la laua no ka Inmi alii ka pahu hopu.

            Ia laua i unoho like ae ai iluna o na noho, me ka hooheno ana o kahi i kahi, e hoomahie ana hoi kekahi i kahi e hai malule wale mai ana no hoi kekahi i kahi.

            Ia wa, ua huki ae la ka ui Hiaralia i kekahi kaula gula e kau ana ma ka aoao o kona noho daimana no ekolu manawa.

            He halulu ana ka mea i lohe ia aia hoi, ku ana imua o ua kaikamahine nei kekahi mau liona he 26.

            O ko lakou mau a'i ua apo ia me ke apo daimana.

            Pane like mai la lakou, e ka haku o na haku a me ka ui o na ui, heaha ka makemake i hiki ai i kou mau kauwa ke kokua aku a ke hana aku hoi i kou makemake.

            Pane aku la ka ui Hiaralia:

            I kauoha aku nei au ia oukou ko'u mau pukaua, oia keia:

            E makemake ana au e ki mai oukou i ko kakou aupuni a uuku, o na ki a pau he 16, e ki oukou a paa alaila e hookele pololei oukou i ko kakou aupuui a hiki i ke aupuni o ke kupua Lopina Gula, a maluna auanei o ka halepaahao o ka ehaeha e hookahua iho ai oukou i ko kakou aupuni, a oia ka wa a oukou e hele mai ai e hai ia'u i hele aku ai au a me ka mea a kuu puuwai i lia mau ai.

            I ke kuu ana iho o na olelo a ka ui Hiaralia, ua pane like mai la lakou:

            Kai no he olelo kau, eia ka aole.

            Pane hou aku la ka ui.

            Ua ike no nae paha oukou i ke aupuni o ua kupua la.

            Ae like mai la lakou a nalo aku la ua poe lioea la no ka hooko ana i na kauoha a ko lakou aliiwahine.

            He mau minute mahope iho, ua naueue ae la ua wahi aupuni la, a ke lohe aku la hoi ke keikialii i ka halulu mai o lalo o ke kumu o ua wahi aupuni la ke lohe pu ia aku la no hoi ke kani o na me o lalo o ua wahi aupuni la.

            O ka hale hoi keia ke naka haalulu la me he mea la e opa pu ia mai ana a hiolo iho:

            Nolaila i pane aku ai ke keikialii:

            E kuu makamaka maikai e hanee iho ana paha keia hale maluna o kakou, a pau iho kakou i ka make e, aole hoi i ike i ka maka o na makua, make e hoi.

            Ia wa i pane aku ai ua ui la:

            E ke aloha a ka puuwai e, mai kau maha kou naau no ia mea, no ka mea, i lawe mai kau wahi kauwa i keia aupuni i alanui nou e hui kino aku ai oe me kou mau makua me ka maikai, no ka mea ina maluna mai nei oe o kou alanui he kulanalana ka noho ana, i ahona oe i ka eheu o ko kahu hanai nana e palulu ae i ka wela o ka la

            O keia he noho iho no iloko o ka ka nani a me ka maikai a hiki i kau wahi i manao ai, e hele mai au e kokua ia oe, he ma'u hoi ia wahi kokua la, malia o aloha mai kuu lani haku ia'u i kana wahi kauwa nei, a lawe aku i wahi kauwa nana oia wale ino la no ko'u makemake nui.

            I ka lohe ana o ke alii opio i keia mau olelo, ua pane aku la oia:

            E ke aliiwahine, e ninau aku ana au ia oe owai la ka'u kauwa au i olelo mai nei.

            Aka mai la ka ui Hiaralia a pane mai la:

            No kau ninau e kuu haku, eia ka pane,

            Owau no hoi kau kauwa, aole au kauwa e ae owau wale no ke makemake oe.

            Ia wa i pane aku ai ke alii opio:

            Aole paha au e pono ke kapa aku ia oe he kauwa oe na'u no ka mea, he alii nui no oe no kou aupuni a me kou mau kanaka, a pela no hoi au.

            Nolaila, mai hoolilo i kou kino i kauwa na kekahi mea no ka mea.

            E ke alii e, he pono no hoi paha ia ina aole i hewa mau kuu waha.

            Pane aku la ke alii kane:

            Heaha ka mea i hewa ai o kou waha ?

            Eia ia'u i lohe ai nou ma kuu aupuni no kou kulana ka ui a me ka nohea.

            Nolaila, kupu ae la ko'u manao a hoohiki iho la au malalo o ko'u kupunakane.

            Oia hoi i ko'u wa e ike ai i kou mau helehelena, alaila, e lilo no au i kauwa nau a hiki i ko'u mau la hope o ko'u ola ana maluna o ka ili honua nei.

            A nolaila, i keia manawa, ua lilo au i kauwa nau a na ka make wale no e hookaawale ae.

            Nolaila, eia au mahope ou a hiki i ko haule ana o kuu wahi kino nei ilalo o ka lua pa-u o ka make.

            E ke aliiwahine ka mea a'u e kapa aku nei:

            Ka haku alii o ke aupuni pahaohao, ka mea i kapa ia ka nani kamahao o ka lewa nei, aole loa o'u manao e lawe mai ia oe i kaupa na'u.

            Aka, e lawe mai no au i hoa kui lima pu no'u, ma na wahi a pau a kaua e hele aku ai.

            A he au ko ka manawa a he ouli ko na mea a pau.

            Oia auanei kuu wa e hai aku ai i kuu manao ia oe mahope iho o ka loaa ana o na makua o kaua.

            Alaila, e kui ia auanei kaua a elua iloko o na manai a ke aloha, a e lilo auanei kaua i mau mea i hipuu paa ia iloko o ke aloha.

            I ka lohe ana o ka ui Hiaralia i ka olelo a ka mea ana i kau nui ai, ua pane mai la oia:

            E ka mea a kuu puuwai i aloha ai, oia maoli no ko'u makemake o ka lilo o kaua i hookahi pana ana iloko o ke aloha hookahi.

            E ike auanei oe e haaheo no ka lewa nei a puni i ko kaua mau inoa, a e kau auanei ka weli maluna o na kupua a pau o ka lewa nei, a me ka honua a hala loa aku i na papaku hohonu o na moana kai lipolipo.

            Nolaila, i me no kaua e nani ai, pela iho la kaua e pono ai.

            I ka pau ana o ka laua mau olelo ana, oia no ka wa i lalau ae ai ua ui Hiaralia la i kekahi kaula gula e lewalewa iho ana ma ke kihi akau o kona nohoalii, a huki mai la no elua manawa.

            Oia no ka manawa i kani kapalii mai ai ka leo o kekahi pu puhi no elua manawa.

            I ka pio ana iho, oia no ka manawa i holo mai ai o kekahi kanaka pilikua a ku ana imua o ua kaikamahine la.

            Pane mai la oia:

            E kuu haku, heaha ka makemake o ke kauoha ana ae nei i kau kauwa e hele mai imua o kou alo ihiihi.

            E kuu pukaua nui, i kauoha aku nei au ia oe e hele mai imua o'u no kekahi me a'u makemake ai, oia hoi keia mea.

            E hoi aku oe a hoomakaukau i kou puali kaua malalo o kau alakai ana.

            E hoomakaukau no hoi lakou no ke kahi hoouka kaua nui e hiki mai ana ma keia mua aku.

            Nolaila, o ka lohe kou a e hooko oe i ka'u mau kauoha.      (Aole i pau.)

 

HE MOOLELO NO

Lonoikamakahiki

---KA---

Pua Alii Kiekie na Kalani.

Ke Alii Nui o Hawaii.

[KAKAU IA NO KA NUPEPA KUOKOA.]

A HOLO hookahi aku kela ia huakai hele a hiki i Kauai.

Ua hoohui pu ia na haawina a ke aloha maluna o ko Kahuhihewa mau kanaka e lohe la i na olelo hoalohaloha a kaukau hoi a ke kahu o ke alii o Hawaii, oia o Hauna.

A ua loaa like no ia haawina hookahi he aloha ia Kakuhihewa i kela manawa.

Nohea aloha ole hoi ua haalele ia iho la lakou e ka iwi koko, ka iwi e loaa ai ka pono

I ka nana aku no i ke alii Lonoikamakahiki, ua kulu no kona mau waimaka i kona haalele iho ia lakou.

Aohe no hoi he ae o ke alii, o holo pu no kakou.

Owau no holo, a o oukou holo a hiki kakou i Kauai.

Aole nae pela, o na hana hooheno no paha a ke alii.

ia manawa i ea ae ai ke poo o ke alii iluna a nana mai la kona mau maka maluna o kona kahu a me kona mau kanaka.

Me na haloiloi waimaka ana.

A hoopuka mai la i kana olele me na leo nanahe o ke aloha.

E auhea oe e kuu kahu aloea.

E Hauna, inoa o kuu makuakane.

Ua lohe ae nei au i kau mau olelo i ku i ke aloha mai ka mua mai a hiki i ka hope.

He mea ehaeha ia i ko'u manao i ka lohe ana i kau mau huaolelo mai ka mua a ka hope.

Aka, e kuu kahu aloha, e hoolana i kou manao.

O ka'u kauoha o kau wale no ia e hoolohe ai.

E noho oe, a me kuu keiki a me na hoewaa o kaua.

E holo no hoi wau a hiki i Kauai.

O ka ike aku ka hoi ia aina.

Alaila pa no ka waha hewa.

O ko'u huli hoi mai no hoi ia, a loaa no hoi oukou i Oahu nei e noho ae ana i ka aina nei.

A ina no hoi oukou ua hoi i ko kakou aina i Hawaii, aole hoi ana olelo ana.

A na'u no hoi wau e hoi aku, a loaa aku no hoi oukou i Hawaii.

Aka hoi, i noho no hoi oukou i Oahu nei.

A i lualai iho no hoi ka noho ana, a nanea paha oukou ia Oahu nei.

I makemake oukou e noho loa, ua pono no ka manao ana pela, he aina no kakou i na'i ae nei a hiki i ka lilo ana.

E noho oukou me na manao lokahi a me ke aloha.

E hoolohe oukou i ka leo o ke alii Kakuhihewa, a e kuikahi oukou ma ka noho ana, a e kuikahi ma ka hana, a e kuikahi ma na hooponapono ana o ka aina, a e kuikahi hoi ma na loaa o ka aina.

Nolaila, e kuu kahu aloha e Hauna, mai hopohopo i kou manao, a mai hookaumaha i kou naau.

E hoolana i kou manao me ka hauoli nui.

A e loaa pu hoi ia haawina i ko kaua mau hoa hoomanawanui o ka popilikia

Oia ka'u kauoha hope loa no oukou, e noho me ka malama i ka leo alii.

I holo hoi au i ka'u huakai a huli hoi mai, i na ua hooko oukou me ka malama pono loa i ka'u kauoha.

Alaila he mea ia na'u e hauoli nui ai, no kona hooko pono i ka'u kauoha mai a'u aku.

E like me ka'u kauoha i ke alii Kakuhihewa.

Pela auanei oukou e malama ai i ka'u kauoha.

I@ wau e huli hoi mai, a aole oukou i malama i ka'u mau kauoha.

Alaila, ua maopopo ia'u, ua hoowahawaha oukou i ka'u mau mea i olelo aku ai ia oukou.

A ina no hoi na malama no oukou i ka'u mau kauoha e like me ka mea i maa ia oukou i ka hoolohe i ka'u mau kauoha mai mua mai, aole hoi ana olelo ana.

Oia no ka'u mea e olelo aku nei ia oe e kuukahu, a e hoolohe no hoi oe i keia mau olelo alii e hoike ia aku nei imkua ou.

E noho pu ana kakou iloko o keia mau la, a nala na la i olelo mua ia aku nei no ko'u wa e holo aku ai.

Alaila e haalele iho ana ua ia oukou a holo aku.

 Ua noho io iho la no oia me ke alii Kakuhihewa a me kona mau kahu ia mau la.

I ka la i o Kaloakukahi, i aku la oia i kona kahu ia Hauna:

I ka la i Kaloa pau, e haaleloe iho ai au ia oukou, a e noho oukou malalo o ke alii o Oahu nei.

A i hoi mai wau, aole oia i malama kupono ia oukou, alaila, e like auanei me kana i hana ai ia oukou, a pela auanei wau e hana aku ai maluna ona ke hoi mai au.

Mai hookaumaha i ko oukou mau manao i ko'u wa e kaawale aku ai mai a oukou aku.

He manawa no e hui hou aku ai kakou ma keia mua aku.

ia manawa ua hoopau ae la oia i ke kamailio pu ana me kona kahu.

A hui aku la oia me kana keiki hoo kama, oia no hoi o Hokuula, aole paha oe e poina ana e ka mea e heluhelu ana i keia moolelo i ua keiki hookama nei.

Me ka oleio ana aku iaia, e kuu keiki, e hoolana i kou manao, i ko'u kaawale ana, mai hookaumaha i kou naau, he manawa no e hui hou ai kaua ma keia hope aku.

Mahope iho oia wa, ua hele aku la no ua alii nei e hui pu no me kona mau hoewaa.

I aku la oia i kona mau hoe waa penei:

E kuu mau hoe waa aloha, na hoa paio o ka ale hanupanupa o ka moana kai lipolipo.

He mea ole ia olua ke kai loa, a me na makani paio lua o ka moana.

Ma ka ikaika hoe waa, na elua e lawe haaheo ka hae o ka lanakila.

Ka mea a'u e kaena ae ai, o olua ka oi o ka ikaika ma nei mea o ka hoe waa.

Aka, ua kokoke mai ka manawa a'u e haalele iho ai ia olua.

E holo ana au i Kauai i ka la i (kaloa-pau).

E noho olua mai hookaumaha i ko olua manao, i ko'u wa e kaawale aku ai mai ia olua aku.

No ka mea, he au ko ka manawa e halawai hou ai kakou ma keia hope aku.

Ia manawa i hiolo makawalu mai ai ko laua mau waimaka mai ko laua mau maka mai.

Oia ka kou mea kakau i hooheno ai i keia mau hoohuai.

Kalae ka waimuka

Uwe ka opua

He waimaka pua ia na ke kehau

Eia ua aloha la ke aloha nei.

Ua hiki ole i na hoe waa ke uumi iho i ko laua manao aloha.

No ka mea, akahi no laua a lohe e kaawale ana ka ko laua haku lani mai a laua aku.

Ka laua ai, ka laua ia, ka hale, ke kapa a me ko laua noho ana.

Ia manawa laua i hoike aku ai i ko laua manao imua o ka laua alii i aloha nui ia.

E, auhea oe e ke alii, o oe hele, o maua hele, i na hoi kau huakaihele a mauka nei o ka aina, aole la hoi he olelo ana.

Aka, aia kau huakaihele ma ka moana.

O ko maua aina ia, ua hoonoho mai ko makuakane ia maua he mau hoe waa nou.

A pehea la oe i manao ai e haalele mai ia maua, no ka mea, o ka maua apana hana ia.

Nolaila, mai hoonoho mai oe e ke alii ia maua.

E ae mai no oe ia maua e hoe aku no ia oe a pae aku no i Kauai i ka la hookahi, i ole oe e holo loihi loa i ka moana i ka mea poluea.

Oia hoi ka hale o ke alii o Kauai.

O Manokalanipo.

Ia manawa i olelo aku ai ke alii Lonoikamakahiki i kona mau hoe waa penei:

E auhea olua e au mau hoe waa aloha.

E kuu mau pokii ahonui.

(Aole i pau.)