Ka Nupepa Kuokoa, Volume XXVII, Number 28, 14 July 1888 — Page 4
| This text was transcribed by: | L. A. Marchildon |
| This work is dedicated to: | Any Canadians calling Hawaii home...I'm so envious !! |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
No Ka Makahiki, $2.00
Eono Mahina, 1.00.
--KUIKE KA RULA.—
Poaono Iulai 14, 1888.
Haawina Kula Sabati.
HAPAHA EKOLU.
HAAWINA XXVI. Iulai 29, 1888
Ka Halelewa. Puk. 40:1—16.
OLELO mai la hoi o Iehova ia Mose, i mai la,
2 I ka la mua o ka malama mua, e kukulu oe i ka halelewa o ka halelole o ke anaina kanaka:
3 A e waiho oe maloko o laila i ka pahu kanawai, a e uhi i ka pahu i ka paku.
4 A e lawe oe i ka papaaina iloko, a e hoonohonoho i na ohana maluna iho; a e lawe mai hoi i ka ipukukui manamana, a e hoa hoi i kona mau ipu aila.
5 A e kau oe i ke kuahu gula no ka mea ala imua o ka pahu kanawai, a e kau aku i ka pale o ka puka o ka halelewa.
6 A e hoonoho oe i ke kuahu no ka mohai kuni imua o ka puka o ka halelewa o ka halelole o ke anaina kanaka
7 A e kau oe i ka ipuauau mawaena o ka halelole o ke anaina kanaka, a me ke kuahu, a e ninini hoi i ka wai maloko.
8 A e kukulu oe i ka paku kahua a pau, a e kau aku i ka pale ma ka puka o ke kahua.
9 E lawe no hoi oe i ka aila poni, a e poni iho i ka halelewa a me na mea a pau maloko, a e hoolaa ia mea, a me kona oihana a pau, a e lilo ia i mea laa.
10 A e poni no hoi oe i ke kuahu no ka mohaikuni, a me kana oihana a pau, a e hoolaa i ke kuahu, a e lilo ia i kuahu laa loa.
11 A e poni oe i ka ipuauau a me kona kumu, a e hoolaa ia mea.
12 A e lawe mai oe ia Aarona a me kana mau keikikane i ka puka o ka halelewa o ke anaina kanaka a e holoi ia lakou i ka wai.
13 A e hookomo no oe maluna o Aarona i na kahiko laa, a e poni iaia a e hoolaa iaia, i lawelawe oia na'u ma ka oihana kahuna.
14 A e lawe mai no hoi oe i kana mau keikikane a e hookomo maluna o lakou i na palule:
15 A e poni oe ia lakou e like me kou poni ana i ko lakou makuakane, i lawelawe lakou na'u ma ka oihana kaluina; no ka mea he oiaio, e lilo ko lakou poni ana i mea no lakou e kahuna mau loa ai, i ko lakou mau nanauna aku.
16 Pela o Mose i hana'i: e like me na mea a pau a Iehova i kauoha mai ai iaia, pela no ia i hana ai.
Ma Manao Nui.
1 Ka halelewa.
He hale na Iehova, he hale paa ole i kahi hookahi. He 45 paha kapuai ka lea, a he 15 ka laula, a pela no hoi ke kiekie.
Ke komo aku oe iloko o ka halelewa o ka rumi mua ua kapaia, kahi hemolele, a iloko loa aku kahi hemolele loa. Aia ma ka palapala a Paulo i ko Hebera na wehewehe nui ana no ka halelewa. He ki ia no na buke mua elima o ka Baibala.
2 Ka pahu kanawai.
Maloko o keia pahu kahi i waiho ai na papa pohaku elua, kahi i kakau ia ai na kanawai he umi.
He hoailona ka pahu kanawai no ka noho ana mai o ka Mana Lani me na kanaka. O ka Mana o ke Akua a me kona kanawai e noho mau iwaena o ka naka e pono ai.
3 Ka papaaina, pauku 4.
He hoailona keia no Kristo, ka bere na o ke ola. Aohe kino e ola ke ai ole i ka ai, aole no hoi uhane e ola ke loaa ole o Kristo Iesu.
4 Ka ipukukui gula, pauku 4.
O Kristo keia a me ka ekalesia o Kristo: oia ka malamalama o ke ao nei.
5 Ke kuahu gula, pauku 5.
He hoailona keia o Kristo ma kona ano he uwao.
6 Ke kuahu no ka mohaikuni, pauku 6.
Maanei kakou e ike ai i ko Kristo ano mohaikalahala. E nana ma Hebera 9:11—14; 10:1—9.
7 Kainu auau, pauku 7.
O keia wai auau he hoailona ia no ko Kristo hoomaemae ana i na kanaka Aole hiki i kekahi mea ke komo iloko o ke ola ke ole ia e hoomaemae ia. Na ka Haku Iesu e hoomaemae.
8 Ka paku, pauku 8:
He hoike keia no ka hookaawale ana o ko ke Akua poe kanaka a me ko ke ao nei. Ua kaawle ka poe pono a me ka poe hewa.
9 Ka poni ana o ka halelewa, pauku 9—11.
Pela e poni ia ai kahi mau mea a laa no ke Akua, hookaawale ia no kona aupuni; kekahi hana o ka manawa e laa ka la Sabati; kekahi mau hale e like me na luakine; kekahi hapa o ka waiwai e hookaaawale, a e poni ia no ke Akua.
10 Ka poni ia o na kahuna, pauku 12—16.
Pauku Gula. Aia ka halelewa o ke Akua me kanaka, a e noho ana oia me lakou. Hoikeana 21:3.
Hoole Waiona.
[Na ka Ahahui W. C. T. U.]
Ma Kaleleonalani, oia hoi o "Ema Hale" ma Honolulu.
He halawai i kela me keia Poalima hora 7:30 o ke aniahi.
He halawai Hoole Waiona, o ka Ahahui o ka Lipine Bolu o Honolulu.
Ke kono ia aku nei na kanaka, kane, wahine, keiki,na mea kiekie, na mea haahaa, ka poe waiwai, ka poe ilihune, ka poe hoole waiona, ka poe kanalua, na mea a pau, e akoakoa ma ia hale i kela me keia pule. Pela no me na malihini maina mokupuni e mai, e komo, a hui me makou ma keia hana kuonoono, "No ke AKUA a me ka HOME, a me ka AINA HANAU." !!
[W. C. T. U.]
NO'U PONOI KO'UIPUKAI I KE IA WA.
Komo ae la kekahi kaneka i maa i ka inu rama ma ka halekuai rama, he wahi apana palaoa wale no ma kona pakeke, ua lilo na kenikeni a pau ma ka rama.
Noho iho oia ma kahi pili i kapuahi kahi e palai ana ka wahine i apana puaa hama
I kona huli ana ma kahi e, ua ho-oke kanaka i ka palaoa iloko o o ke kai a ai ia.
Mahope iho ua loaa pono ka wahine iaia e hana ana me ia, a me ka olelo ino, ua kipaku iaia iwaho me ka i ana e ho o i kou palaoa iloko o kou ipukai aole iloko o ko'u.
Hele aku keia kanaka m e ka noonoo he nui na dala i lilo ma ia wahi no na waiona; he nui no hoi ka pilikia i loaa iaia ma ia hana, a eia ka, e kipaku ia naa, no ka mea ua nele i kahi kenikeni ole
Aole no e oluolu ana i wahi inai i ai pu me kahi palaoa i mea e ono ai
A hala na malama ekolu ua maalo hou ae oia ma ka ipuka o ua hale nei me ona lole maikai, a kahea ka wahine iaia, ea, pehea oe, e komo mai, e komo mai i mea inu nou.
Aole no, no'u ponoi ko'u ipukai i ke ia wa.
Ea, e hoohalike me keia kanaka, a imi i na mea e kuonoono ai me na kenikeni au, mai kiola wale no ua waiona
NA ANOAI O KALIHI-KAI.
E ka Nupepa KUOKOA, Aloha oe:--
E oluolu kou hanohano e kui iho i keia wahi materia ma kahi kaawale o kou mau kolamu, i ike mai ai na kini puni mea hou o kaua e noho ana mai Hawaii o Keawe a ka mole olu o Lehua, oia keia malalo iho:
Ma ka Poahiku nei (Sabati) la 8 o keia mahina, ua pii makaikai aku la kou mea kakau ma kahi nona ke poo manao e kau ae la maluna, a ua ike i na mea i hana ia, oia hoi ua uhi ia kekahi mau wahi taata e na Daimonio a ke kiaha @ia, o ka hele ia a noho pono ka noe iluna pono o Waolani, a oia ka kou mea kakau i hooheno ae ai i keia mau wahi lalani mele:
Noenoe ua kea o Hana
Hoa pili o ka Malualua
Elua maua i ka piko
I kolu i ke ala lipoa
Aia hoi mahope iho o ia manawa ua kiola pau aku la au i ko'u lena ike maluna o kela me keia mea pakahi@ he nani wale no a he ku no hoi i ka maemae na helehelena ke nana aku, a @ na waahi taata hoi i hai ia ae la maluna i nana aku ka hana he mea nui ma ko laua mau lima, e wa'uwa'u ana kekahi i ua mea nui nei, a e hoolewa ana hoi kekahi o laua i kahi pauku kino, o ka hele ia o ka lewa a hu mawaho o ka pa lena, a lawe no hoi a lilo a kau i ke kani a-i, a o na ona hale he puuwai waipahe ko laua a no laua ko'u mahalo ana i ke kinai ikaika ana e pio na hana Daimonio, a mahope iho o ia ma nawa ua hooko ia ka makemake o na ona hale, he 12 ka nui o na poe i kipa aku i ka home noho o kekahi o na ka maaina o ia wahi ke hui ia me kou mea kakau.
Ha Elemakule Auwana.
Aia ma ka apana o Kauluweia, kekahi elemakule kahi i noho ai i kekahi manawa o Kaaea kona inoa, e hele ana keia elemakule @ ko hai ipukahale e holapu ai, me he ano pupule la, he mau keiki no kana e oia nei aia no ma kahi i hai ia ae la maluna ina e ike ana keia elemakule he kupa i a ko kauhale, o ka hele mai la no ia a wehe i ke poi, a noho e ai i kekahi mea o loko, nolaila oia ka kou mea kakau e kono aku nei i ka poe nana kela elemakule e malama iaia o pili auanei ke kanawai iaia.
Me ke Mahalo.
B. M. Kiumeahou.
KUEWA HOOKAHI I KE ALA ME KA WAIMAKA.
Mr. Lunahooponopono, Aloha oe:--
Ke noi aku nei au i kou oluolu me kou ahonui e ae mai ia'u i ke kauwahi kaawale o kou kino no ka'u wahi huna huna materia e panee aku nei, a i mea hoi na na kini makamaka o maua e ike iho ai a hoomanao ae.
Ua hala ka puulena aia i Hilo, ua imi aku la ia Papalauahi, auwe @ aloha ino.
Ma ka la 19 o Iune i aui aku nei, M. H. 1888, ma ka Panalaau Ma'i Lepera o Kalawao nei, Molokai, ua haalele mai la ko'u muli pokii kuahine ia'u Miss Ceresia Paniani, a naue oni ole hookahi aku la ma kela aoao ehaeha o ka ma ke, a haalele mai la oia ia'u e noho pokii ole ma keia aina, a e kuewa hookahi hoi i ke ala me ka waimaka, auwe kuu pokii kuahine e!
Ua hookaawale ia mai oia ma ka ma na o ke aupuni mai ke alo mai o na makua o maua ma ka la 2 o Feb. M. H. 1888, no ka mai hoehaeha puuwai (lepera) mai Kawaihae-uka mai, S. Kohala, Hawaii, a no ka aina pahaohao o Kalawao nei ka pahuhopu, me ka lana o ka manao e loaa no ka maha, aka ano, aole i li'u iho na la, a loaa e no ka wa e hooluolu ai ke kino, aka, e hoomanao no e na makamaka,he wa ko kakou a pau.
He kaikamahine keia i hilinai nui ia e na makua, no ka mikioi, ka hoolohe, a me ka noeau o kana mau hana.
He hoomaemae i ka noho ohana ana he heahea a hookipa i na hoaloha mai ka mea kiekie a ka mea haahaa, aka, ano, e lohe auanei oukou e kona mau makamaka, na hoaloha ka ohana a me ka lehulehu a pau, o ko oukou hoaloha oiaio Miss Ceresia Paniani, ua hala i ke ao polikua a Kane, a he ala hiki no nae hoi ke hookolo ia.
A mamua ae o keia, ke haawi aku nei au i ko'u aloha a me ka aina kupa o maua. Ka Ua Naulu, aloha oukou.
L. S. Keaniani.
Kalawao, July 5, 1888.
KA LA EHA O JULY MA KA PANALAAU O KALAWAO.
Mr. Lunahooponopono; Welina.
Oiai au e hiolani ana maluna o ko'u wahi moe i ka po ana iho o ka la 3 a ao ae hoea mai la ua la nei a ke kamahao nui wale, a o ka hora 10paha ia o ia po a'u e hooipo ana me na moeuhane palaualelo, ua lohe mahui ae la au i na leo o ka poe himeni hooniau o ke kuluaumoe a ka hookalohe nui wale e hanehane mai ana iwaena o na kauhale a e uina mai ana hoi ka leo hana wi o na ohe a me ka pahu o ka nukup@u launa ole, a hoomanao ae la au he mau hooheno ka keia a ua poe nei a ke kino wailua o ka Leper Settlement for the Forth of July.
I ke ao ana ae, o ka la 4 ponoi ia, ua ike aku la kou wahi kiu i na makamaka like ole e haukawewe ana ma na alanui iluna o na lio me na papahi owi lilei mailelau@i like ole, a e hiu ana hoi ko Kalawao no Kalaupapa, a o ko Kalaupapa mai hoi no Kalawao, a ko'u wa no ia i hoomanao ae ai i na hooheno o kuu aina ua naulu.
Lawe no oe a lilo
Hiu no au a wela
Aloha no.
Mahope iho o ka hora 2 p. m. ua ho omaka koke aku la au e olohio iwaena o keia aluka no ke kula o Papaloa ka ilina, a hoao iho la au e peepoli iwaena o na pupuweuweu e kiu i na mea hou a hoolai iho la au me ka malie.
He wa ia no ka huikau lua ole ona kanaka e kainepu ana i ua kula nei e kuu ana i ka loa a me ka laula i ka holo a ka lio, a me he mau kamani la no Hanalei ka hele hoi a pali ke kua mahina ke alo, heahu la ia, niua wale.
Ke hele ia pipii ke kai o Kealalaua.
He mau minute i hala o ko'u lualai ana iho malaila, ua ike koke aku la au i kekahi kane i aahu iaia iho me ke kapa wahine i uhi ia ka maka a paa me ka uhimaka, a e holo ana maluna o ka lio iwaena o ka lehulehu me ka hoike ana i kana mau hana kamahao, a hoomanao ae la au i na huaolelo a Opuahikiahiahi i pane mai ai ia'u ma ka moeuhane. Ua like no oe a like, me ka uwahi pi o ka wao. Aloha oe e Uha.
A pau ae la hoi ko'u makaikai ana no keia nei wahi kolohe, o ko'u wa no i ike aku ai he kane a me ka wahine i hookui ae ai i kahi hookahi a pahu ana ilalo i ka honua, a mai lilo ka uhane ia Hio ina ua hoi nele ke kino @ ke kula o Malama, no ka mohio ka olelo ana, a kaualupa ia aku la oia no ka rumi e hooluolu iaia.
A o ka lede hoi keia, a kele a kele no ka ma@, aka ua laki nae oia i ka loaa ole ana o na ulia poino iaia.
He la ka keia i hoomanao nui ia e ko keia panalaau nei; i oi ae mamua o ka la 11 o Iune i hala aku nei, nani ke ohohia o na makamaka.
A no ka hapalua o ka hora 5, o ko'u wa ia i haalele aku ai i na pupuweuweu o Papaloa, a hiu mai la au maluna o Linaholomae horse no Kalawao ka ule le ana. Me ke aloha ia oukou e na keiki o ka wai kaulele a ka makasila o ka papapai.
L. S. K. Ulelewaihuiakanaulu.
Kalawao, July 5, 1888,
NA MATERIA HOONI PUUWAI O KE KAI HAWANAWANA.
Mr. NUPEPA KUOKOA, Aloha oe:--
Hana Paakai.
He mea haohao ia'u ka hoike ana aku i keia ano hana, oiai kou mea kakau ma keia wahi.
Ma na makahiki mua aole au i ike i ka huliamahi o na kane me na wahine, ma keia ano hana. He elua dala o ke eke mauu ke piha, laki no na kaikamahine hoolewa paakai o ua makani olauniu nei.
Make me Hanau.
Ma na la hope o keia mau pule i hala, ua kii mai la na lima palanehe o ka make i ka hanu hope loa o kekahi luahine oia o Mrs. Awala a lawe aku la ma kela aoao mau o keia ola ana, he @kahine kahiko loa keia ua piha ke 95 makahiki, he nanaina kona e hoike mai ana i kona mau la loihi ma keia ao.
Ma keia wahi no ua hanau mai o Mrs. Hana na Akima pa@e, he keiki k. ma ka la 19 i hala. Mahalo piha i ko ka Haku lawe aku a me kona haawi hou mai i pulapula hou no ke au hooulu o Kaulilua.
Ua heo aku.
Ma kela pule iho nei ua hele aku he makai no ke aupunin ma Puako no ka hopu ana ia W. K. Kalua, no ka mai hookae a ka lehulehu @ kau maluna, o ka hoahanau aloha, a heahea, a o ka inoa o ua makai la o J. Kupele.
I kona wa i puka aku ai aole i loaa iaia ka mea ana i upu ai e loaa, ua ahai aku la ka manu o Kaula aia i Kuhaimoana. Ua hoi mai la ka makai me ka neo, aiai aole i loaa iaia, oia hoi, ua heo, ua heo, ua heo i Kauahip@ookawao.
Eia hou ua Hawaii Imiloa.
Ma ka la 2 o Iulai nei, ua lilo ae la na kakele hoopono ana o ka halekuai me uwapo o Kawaihae nei, i ko makou makamaka William Hooknanui, ma ka hi o Jno. Stupplebeen e hoi aku ana no Hilo Bay.
Eia wale no ka keia makapeni e pua na ae, a oiai hoi ua like a like na ili, e ike ia kakou kanaka o kipa hewa ke aloha ia hai.
O ka elua keia o na kanaka Hawaii e hookele nei ma na mea imi pono kino ma keia ano hana ma Kawaihae nei.
He ma'u mea hou ia la o kuaaina nei,
Me ka welina i ke KUOKOA a me kou Lunahooponopo, a no ke keiki hoonoho hua ko'u hoohenon pu ana
Kou oiaio.
Thomas S. K. Nakanelua.
Kawaihae, Hawaii, July 6, 1888.
HUAKAI MAKAIKAI I KA PANA LAAU O MOLOKAI
E ka Nupepa KUOKOA e; Aloha oe:
Ma ka lokomaikai o ke komite a me ka oluolu o ka Papa Ola, ua ae ia mai mai la kou mea e kakau nei e holo e makaikai ia Kalawao a me Kalaupapa; kahi a ko kakou mau makamaka e noho mai la i ka aina kahi i hookaawaleia no ka mai hookaawale ohana.
O ka hora 9 p. m. o ka Poaono la 23 o keia mahina, haalele iho la ke aliiwa hine aukai o ka ua lani haahaa i ka awapo o Ainahou, e lawe ana i ke komite a ka ahaolelo a me ka poe a pau i ae ia e ka Papa Ola, e holo pololei ana ma kona alahele no Kalaupapa ka pahu hopu, hora 5 a. m. a puehu ae o ka la 24 o Iune, haule ka heleuma i ke awa o Kalaupapa.
Nani a maikai ka aina ke nana aku, a he ku maoli no i ka mahalo ka lawe ana ae a ka Papa Ola ma ia panalaau kahi e noho ai o na makamaka i loaa i i na palapu a ka mai.
Lele aku la au iuka me na hoohanohano a ka ahaolelo a komite hoi, ua piha pono o uka i na hoa kanaka, nana aku i kekahi mau hoaloha o'u he ku i ke aloha a manene ko'u uhane i ke alo ha no lakou, a halawai aku la au me ko'u makuakane Adamu Puaaloa, helelei ko'u mau waimaka nona a o ko'u makua hoi ia o na la pok@o wale, aloha wale ka hulu makua.
Ua makaikai ia Kalaupapa a me Ka lawao, a hiki i Waikolu kahi i hoomoe ia iho nei o ke paipu wai hou, a hoi mai au, me ko'u hoa hele kuu hoa paua o ka hana a ka Haku Rev. S. Luhiau.
A komo maua i ka pule i ka halepule o Siloama, lilo ia maua ka hana o ia Sabati, maluna ae o na mea a pau a'u i ike ai, a i lohe mai ai au i ko'u makuane a me na hoaloha a pau malaila ua puana mai lakou i keia huaolelo:
He makehewa ka noho ana me ka ohana a me na makamaka e holo pee ai i ka nahelehele, mamua o ka hele ana mai i Kalawao nei, no ka mea ua like keia me ka aiua i olelo ia ma ka Baibala, kahi e kahe ana o ka waiu a me ka meli, he oluolu ka noho ana maanei a he lako i na mea a pau.
A pela no ko'u ike a me ko'u mau hoahele.
Ua makaikai au i na mea a pau a ua ike au i ka noho ana, ne ku io no i ka mahalo,
Ua ninau au i ko'u mau hoaloha malaila a ua hooia mai lakou.
Nolaila, e o'u mau hoaloha mai Hawaii a hiki i Niihau, mai holo iloko o na ana a me ka nahelehele e pee ai, ana, e hoi no Kalawaao a me Kalaupapa
Ma keia hope aku e malama ana ka Papa Ola a e lapaau ia aku ana e na kauka akamai ma keia hope aku, pela ka haiolelo kaulana a Hon. W. A. Kini, a pela no ka manao o ka Papa Ola, e hooki i ka makau wale no'u iho, ua loaa ia'u na manao uluku no ka lawe ia ma Kalawao o ko kakou mau makamaka, aka, i ko'u hele ana aku nei a ike pono ua pau kuhihewa ia Hilo-paliku, no ko'u manaoio maoli no he aina keia i kupono ole no ke ola kino o ka poe i loaa i keia ano mai, eia ka auanei aole pela
E na makamaka, malia o oukou kekahi i like pu me ko'u mauao, nolaila, ke nonoi hou nei au ia oukou e hoopau ia mau manao.
Ma ka hora 3 p. m. a oi ae haawi aku la i ke aloha hope i na hoaloha a kau la ma ka waapa, a huli hoi mai la no luna o ka moku.
Ho@a 5 p. m. paha haalele aku la ka moku ia Kalaupapa.
Hora 9 p. m. ku mai la i ke awa o Honolulu.
Ke haawi aku nei au i ko'u aloha i na keiki o ka halepai.
Me ka mahalo.
J. K. Iosepa.
Kawaiahao, Iune 25, 1888.
Ka Waiwai o ka Hilinai
A AYER Laau Sasaparila, kai kaulana a hilinai nui ia no ka hoomaemae koko, ma n@ wah a pau o ka honua, ne aneane 40 makahiki i hala ae nei, a ua lawelawe nui ia hoi iwaena o na oihana lanaau. O keia
LAAU SASAPARILA, no loko ae ia o ke aa Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.
HE koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoop@hu Na keia
LAAU e hoomaemae ia mau mea ino a pau, a maikai. O na kauka lapaau a pau o Amerika ike ke ano o ka AYER SASAPARILA, ua olelo lakou, aole he mea maikai e ae no ka hoomaemae koko ana mai na mai i awili pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e hoomaemae hakalia ole mamua ae o kekahi ano laau e ae O ke
KOKO ino hakuhaku, a nawaliwali hoi kona holo pono ana ma ke kino, e hoomaemae ia a e hooikaika pu ia no hoi ma o ka ai ana i keia LAAU SASAPARILA A AYER. He maalahi a he
MIAKAI loa hoi keia Laau, aole no ka hoomaemae wale ana no i ke koko, aka, no ka hookaawale u ana kekahi i na ma'i, hoomomona hou ana i ke koko ino, a me ka hoo@ kaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi mau laau e ae.
A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku. He nui na laau, hoomaemae koko i hoolaha wahahee wale ia malalo o na inoa lehulehu, aka, o n@ hilinai a me na hooia wale no a ke ao holo okoa, maluna o ka
Ayer Laau Sasaparila.
I HOOMAKAUKAUIA E
Kauka J. C. Ayer & Co., Lowell, Mass.
HOLLISTER & CO.
Na A ena ma ka Paeaina Hawaii.
Helu 100, Alanui Papu, Honolulu
2086-tf
Pahu Hale Leta 351. Bele Telepone 274.
KA AGENA OIHANA HAWAII.
No 68. ALANUI PAPU KIHI O ALANUI KALEPA, HONOLULU, H. I.
HE AGENA OIHANA. A ME AGENA OHI DALA NO NA BILA A PAU.
KEENA OIHANA.
Na Waiwai paa—kuai a hoolilo aku, a me auhau uku ana.
Na Hale hoolimalima, Rumi, Keena, Aina e hoolimalima, a aelike e ohi i na uku hoolimalima o na ano a pau.
Na Moraki e ae ia ma na ano waiwai a pau.
Na Pepa kuleana aina, e kakau a hooponopono ia me na Pepa a pau e pili ana ma ke kanawai.
Kope a me ka Unuhiolelo ma na olelo a pau iloko o keia aupuni.
Na Panihakahaka ola, Hale, a me na waiwai o na ano a pau i na Ahahui Panihakahaka helu ekahi.
Na Malama ana i na Buke a me ka hooponopono ana.
E haawi ia no ka mikiala no na Ohi aie ana.
Na Gula, Kala me na Bila kikoo dala, kuai a hoolilo.
Na Hooponopono Hale Dute e pili ana i na waiwai mai ko na aina e mai.
Na Ukana o kela a me keia ano, e kuai a hoolilo aku.
Na Kauoha o na Mokupuni, e hooko ia no me ka eleu.
HO na hana a pa a na makamaka e haawi mai ana no ka hooko aku i ke kau oha, e@ hooko ia no me ka eleu a me ka mikiala.
Agena Oihana Hawaii.
2170 1yr. Mar.
FRANK GERTZ,
UA WEHE AE NEI AU I NA KAHIKO AULII O NA
Kamaa o na Ano a Pau
No na Wahine, na Kane a me na Keiki i wae pono ia e Mr. Gertz iloko o Amerika.
--O—
HE OLUOLU KE KUMUKUAI MA KE KU IKE
--O—
E loaa mau mai ana na waiwai ma na mokuahi a pau.
m@ 31-tfn
B. F. EHLERS & CO.,
PAINAPA.
Poe Kuai i na Ano Lole a Pau.
Helu 99 alanui | Papu. – Honolulu.
E loaa mau ana na lole hou o na ano a pau maluna o kela a me keia moku.
Kakela a me Kuke
HALEKUAI NUI O NA WAIWAI.
E laa na pahiolo, koi hole,
hamale, koi nui a me liilii, kila,
wili puaa, 'rula, apuapu, kui o na ano
a pau, kala kaa, hao hoopaa puka
pohaku hoana, kepa, lei ilio, kau-
la hao ilio, pahi, upa, pahi umiumi,
kalapu, kope hulu, pulupulu, oena ka
lakala, lina hao, ami, keehi, a me ke
--KAULA OPU.—
Palau o na ano a pau,
Oo, ho, kopala, pe, kipi-
kua, hao kope, au ho a pe-
a aku, kua bipi, lei bi-
pi, kaula hao bipi, uwea
pa, uwea keleawe, hao pili
piula, kaa palala, ipuhao, ipu ti
PA-PALAI MAKAU ME KE AHO
Ili wai, papa holoi, kopa ala, kaula kuaina, hu'akai, ohi wawae, hula pena, a pela aku.
Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe,
PENA HOOMALOO
--a me aniani hale—
AILA MAHU, AILA MIKINI, AILA HANO ILI, AILA KAA, INIKA KANAA.
PAUDA KUKAEPELE, KIANA PAUDA, UIKI IPUKUKUI O NA ANO HE NUI A LEHULEHU.
LOLE MAKEPONO
--E aa na—
AHINAHINA, KALAKOA. KEO KEO, LEPONALO, HULUMANU UWE-WAHINE, KUI HUMUHUMU, A ME KA LOPI.
Ke Kuike a loaa no ia ma kahi o
Kakela & Kuke!
NA MEA PIULA,
Mikini Humuhumu
Makini a WHEELER a me WILSON
MIKINI A WIILCOX ME GIBBS
NA MIKINI A
--REMINGTON.—
He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.
Laau Lapaau Kaulana Loa
A DR. JAYNE,
LAAU HOOMAEMAE KOKO
LAAU HOOPAU NAIO, LAAO
KUNU, PENIKILA, HUAALE
PAAKAI, LAAU HOOPAA HI,
Me na Laau Hame a Pala 'ku.
Kakela a me Kuke