Ka Nupepa Kuokoa, Volume XXVII, Number 29, 21 July 1888 — Page 1
| This text was transcribed by: | Chantellee Spencer |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
@UKE XXVII, HELU 29.
HONOLULU, POAONO, IULAI 21, 1888.
NA HELU A PAU, 2190
GEORGE K KAMAUOHA
Loio a he Kokua ma ke Kanawai
A HE ME
A NA AINA
@@@@ Kohala Akau, Hawaii
2091-@@
@NEY VAILLANCOURT ASHFORD
AKEPOKA
@ Loko, Hoakaka, Pale ma ke Kanawai
Kakauolelo, Lunahooponopono a me ka hana ana i na Palapala Hoolilo
LAWELAWE ILOKO O NA AHA PAU O KE AUPUNI
@ hana ia no na Palapala pili Kanawai a
@ Keena Hana Helu 21, Alanui Kalepa @@@@ Hale (2150 @y)
ROSA (AKONI)
@O A HE KOKUA MA KE KANAWAI
He Luna Hooiaio Palapala
Keena Hana: Ma ke Keena Loio Kuhina.
tf.
CECIL BROWN
LOIO A HE KOKUA MA KE KANAWAI?
He Apana Hooiaio Palapala no ka Mokupuni o Oahu
KEENA HANA: Ma alanui Kalepa.
Tf.
WILLIAM C. ACHI
Loio a he kokua ma ke kanawai imua o na la a pau o keia Aupuni
He Mea Ana Aina a he Boroka ma na waiwai paa.
Keena Hana, Helu 15, Alanui Kaahumanu
Honolulu, oia ke Keena mua iho nei o Kini @ Peterson
2114-y
@OHN MAHIAI KANEAKUA
LOIO A HE KOKUA MA KE KANAWAI
HE MEA UNUHIOLELO MA KA OLELO BERITANIA A ME KA OLELO HAWAII
Keena Hana, maluna ae o ka Banako o Bihopa ma
1yr.
S. K. MAHOE
LOIO A HE KOKUA MA KE KANAWAI
He Apana Hooiaio Palapala Kope no ka Mokupuni o Oahu
He Luna Hooiaio Palapala Kepa Paahana no ka Apana o Waialua, Oahu
E loaa no ma Waialua, Oahu 2128 Iy
W. A. KINNEY, (KINI)
LOIO
Keena hana ma ke Keena o J. A. Makuna, @@@S Helu 42 Alanui Kalepa 1y
W.O SMITH
Loio ma ke Kanawai.
Helu 65, Alanui Papu, Honolulu. @@4-1y
W K. KAKELA
LOIO A HE KOKUA MA KE KANAWAI
He Luna Hooiaio Palapala
Tf
WILDER & CO. (WAILA MA.)
@ea kuai pepa a me na lako kukula hale @@@@@ a pau, a me na ma @@ pono a pau no ka hale
Kihi Alanui Moiwahin me Papu, tf
PACIFIC HARDWARE COMPANY
Na hope o Dilinahama Ma
Mau Mea Kuai Lako Hao
Alanui Papu. Honolulu
HOOLAHA
W. A. HAPAI
He Luna Hooko Mar@
A HE
AGENA HOOIAIO PALAPALA
E loaa no ma Hilo taona,Hawaii, ma na Manawa a pau 2152 ty
E G HITCHCOCK
(AIKUE HIKIKOKI)
Loio, A KOKUA MA NA MEA A PAU E PILI ANA MA KE KANAWAI
E ohi ia no na Bila Aie, me kalawiwi
HILO, HAWAII 2114 1 yr
SAMUEL K. KANE
Loio a he loea ma ke Kanawai
Imua o na Aha Hookolokolo a pau o keia Aupuni. Keena hana e Ki@i o na alanui Moi a me Betela, pili pu me ke keena o ka nupepa ke Alakai o Hawaii. 3m-218a
Lutanela Roge
KE
Kiu o ke Kaikuono
O MOBILE
Ke Kiu a Adimarala Faragata
i hoouna ai e Ana a e huli
i na Topido ma ka Papaku o
ke Kaikuono o Mobile.
He Moolelo iloko o ke Kaua Kuloko o ka Akau me ka Hema.
"Aohe o ʻ u kanalua no ia," wahi a ua wahine la i pane mai ai a haule pu iho la kana pahikaua i ka honua. "O oe ke kanaka nana i hoehaeha mai i kuu puuwai, a hookaawale ae i ke alahele o kou aloha no kekahi kaikamahine opioopio maloko o keia kulanakauhale nei ma ka inoa o Edita Taila. Aole loa au e haalele ia Mobile nei a hiki i ka wa e hooko ia ai o ko ʻ u makemake maluna ou."
I ka wa i haule pahu ai o keia hou pahi a ka wahine ia Kapena Venona, ua lele koke mai la oia a paa aku la ma na lima o kana wahine, a kaili ae la i ka pahikaua a paa ma kona lima, huli ae la oia a hele aku la iwaho o ke alanui me ka pane ana mai i keia mau olelo hope--
"E noho oe ma keia wahi a mai hahai mai ia ʻ u. O kou ola, e hookoe no au i keia manawa."
"Aole loa au e haawi pio ia oe e ke kanaka lapuwale a hiki i ka make ana o Moneteze."
Ia wa ua wahine la i wehe hou ae ai i kekahi pahikaua hou mai kona puhaka ae a alualu aku la ia Venona mahope, a oiai laua ma kae o ka uwapo, ua hui hou ae la laua i kahi hookahi, oia ka ua wahine la i pahu aku ai i ka pahi ma ka umauma o Venona me ka pane ana aku me keia mau olelo--
"E make oe e pono ai e ke kanaka lokoino i kau wahine a me kau mau keiki, a"-----
Ua wehe koke ae la o Kapena Venona i kana pahikaua, a me ka eleu nui, pale iho la oia i ka hou pahi a kana wahine, a pane mai la me keia mau olelo hope loa----
"I keia manawa au e hoike ai i ke kumukuai i hookawale ia nou e ka wahine, ma ka hoopokole ana i ko ʻ u ola o hoopilikia mai auanei ia ʻ u. O Mobile, aole ia iloko o ke kulanakauhale o Havana. O kau pahikaua, aole iaia @a kumu e hiki ai ke hookaawale ae ia ʻ u mai ka oihana a na Mokuaina Kuikahi Hui o ka Hema i kau mai ai."
Me ka lima o ka menemene ole a me ka pepehi kanaka o ka hilahila, ua wiliwili ae la o Venona i kana pahikaua mamua ona me ka hoopuka ana aku i keia mau olelo hope loa i kana wahine---
"E pale oe nou iho e ka wahine hohe wle."
Ua pahu io aku la o Venona i kana pahikaua i ka puuwai o ua wahine la a komo pono aku la iloko o kona kino, a na ka walania hoi o ka ehaeha o ka make i kulai aku iaia i ka honua a hoopuka ae la i kana mau olelo hope loa----
"E haawi aku i ke aloha i ka kaua mau keiki; me ka hai pu aku, ua--ua--ua make ia ko laua makuahine mai ka pahikaua mai a ko laua makuakane."
Huki mai la ke kanaka lokoino i kana pahikaua, me kona manao aole la i make kana wahine. I kona wa i nana pono iho ai, ua ike io iho la oia i ka oni ole a me ka hanu ole ae, nolaila, ua kaualako aku la oia iaia a kiola ma kae o ka uwapo, huli ae la a pii aku la ma ke alanui me ka hoopuka ana ae i keia mau olelo
"Wele--o keia iho la kona hopena. Ua hoomaopopo mua loa au i ka wa ana i ku mai ai mawaho o ka lanai hale o Swisher, a ua maopopo kana ike ana mai ia ʻ u. Ha! Ha! Ua ike aku la oe i keia minute i ka papaku o ke kaikuono o Mobile."
Ua hoopau loa ae o Venona i kona noonoo ana i kana wahine me ka leo o ka akaaka loihi, a mahope iho o kona hoopau ana, ua halawai aku la oia me kekahi o kona mau koa o ka papu, oia kana i pane mai ai---
"Ua hele huli aku nei au ma na wahi a puni ke kulanakauhale."
"I ka manawa hea oe i hiki mai nei i ke kulanakauhale nei?"
"I ke ahiahi nei."
"Heaha kou makemake o ka huli ana ia ʻ u?"
"He leta na Kenola Page i haawi mai nei, a eia la."
"O!"
Lalau koke aku la o Veuona i ka palapala, a ho-a hoi ke koa i ke kukaepele, a no elua minute, opiopi ae la i ka leta a pane hou mai la i ke koa---
"E hoi oe a hai waha aku ia Kenela Page, he hapa wale no o keia leta ka ʻ u e hooko. O kekahi hapa, ua pau mua i ka hooko ia mamua o ka napoo ana o ka la. O kela Lutanela kiu a Faragata, ua puhi ia oia aia iloko o ke aouli kahi i hoilani ai. Ina e hoao ua Adimarala Amerika la e komo mai me kona mau aumoku i ka la apopo, alaila, o ka hohonu o ke kaikuono nei o Mobile kahi oi loa aku o ka hauoli iloko o na la o kona ola ana, a na kona koko auanei e papahi iho i ka hanohano o ka lanakila no na Mokuaina Kuikahi Hui o ka Hema."
Ma keia wahi e hoi hou ai ko kakou kamailio ana no Roge me kona hoaloha negero.
MOKUNA III.
Oiai o Roge me Josh e holo nei no na aumoku, ma ka hora 7 o ke kakahiaka nui, ua pili aku la ko laua nei waapa ma ka aoao o ka mokukaua Hakapoka, mahope iho o keia holo ana no 18 mile mai ke kaikuono mai. Ua pii aku la laua nei iluna o ka oneki, a mahope o na lulu lima aloha ana, ua haule aku la o Roge a hooluolu i ka maluhiluhi nui o keia holo ana mai la i keia po.
Ua hoomaha iki o Josh ke kauwa hoolohe, a ma ke ahiahi o ia la no, ua hoihoi ia aku oia e ka waapa o ka moku a hoolele ia aku ma kekahi wahi okoa aku.
Ma ke kakahiaka nui o kekahi la ae, ua pane ae la o Adimarala Faragata i kekahi o kona mau ukali me keia mau olelo---
"E kii aku la Lutanela Roge, a hoouna ae iaia ilalo o ko ʻ u keena, ina ua maha kona mau maluhiluhi o ka hoi ana mai i ka po nei.
He mau minute wale no he umi mahope iho o ia manawa, ua hiki aku la o Roge imua o kona haku, lulu lima a pau, noho iho la ma ka noho ma kekahi aoao mai o ke pakaukau.
Ua manao au, ua lilo ia oe ka hanohano o kau huakai i ke kulanakauhale o Nu O@ina? " wahi a Faragata i pane aku ai me kekahi minoaka ma kona mau papalina.
"Aole au e hiki ke olelo, ua lilo pau loa mai iaʻu," wahi a Roge.
"Ua lanakila anei oe maluna o lakou? Oia kaʻu i makemake ai ia oe e hai mai e ke kanaka opio," wahi hou a Faragata i pane mai ai me ka wehe pu ana ae i kona hainaka a holoi ae la ma kona lae.
"Ae, no ekolu hora iloko o na mahina eono, ma ka oneki au o ka moku kaua hao hou Tenesi, a owau ka malihini a Adimarala B@kanana i hoikeike mai ai i ke kulana ikaika o kona moku a me na hoolilo dala nui hewahewa no kona helu ekahi."
He mau nanaina ano e ma ko Faragata mau helehelena i kela manawa no keia mau olelo a Roge, oia hou kana i pane mai ai--
"Ua manaoio au i kela mau olelo au e ka Lutanela, aka, o ka@u ai ia oe, mai ae e lawe hou i kela kulana imua o ka waha ponoi o ka make. I kou wa i makaikai ai i ka oneki o ka moku kaua Tenesi a me ke kulanakauhale, ua loaa paha ia oe kekahi mau ni hou ano nui. E hai mai ia ʻ u i kekahi hapa o kau huakai."
Ua hai aku la o Roge i ka moolelo piha o kana huakai hoomakakiu i ke kulanakauhale, iluna o na moku o ka enemi, a me ka holo ana maloko o ke kowa i piha me na haneri topido, a me ka make ana o kekahi waapa a puhi ia i ka lewa, na kela mau mea i hookaakaa ae i na maka o Faragata no kela mau weliweli, oia kana i pane koke mai ai---
"O kau mau lono, ---he waiwai a he hiki ole ke poina ia oe. E ae hou mai ia ʻ u, mai hana naaupo hou oe e like me keia. Ina i manao mua au aia oe @waena o kela mau mikini topido, ina aole au e hiki ke hiamoe i ka po nei. Me ke kokua ana mai a na Mana Lani, he lana kuu manao, e lilo no lakou a pau i mea ole iloko o na la pokole."
E huli iki ae ko kakou heluhelu ana i ka ikaika piha o ka enemi, a me ka lakou mau olelo kaena no ka hiki ole ia Adimarala Faragata ke komo aku me kona mau aumoku iloko o ke kaikuono.
Ua manao na mana kaua o Mobile, aohe kanaka koa e ae e loaa ma ka wiwo ole e like me Adimarala Bukanana. O keia ke kanaka nana i alakai ka moku kaua Merimaka ma kela hoouka kaua me ka Monita, a i ka wa i nahaha ai, ua kapili ia he moku kaua hao hou Tenesi iloko o elua makahiki i ke ao a me ka po, a nona hoi ke kumukuai he elua miliona dala ma ke gula.
Ua lawe ia mai na hoonauki a me na hoomokuahana ana ia Faragata i mau kumu hoonaukiukl loa i ka enemi no kona noho iwaho o ke awa aohe komo aku iloko e hui me ko lakou ikaika. Pela pu me Faragata, ua kauoha pu aku la oia i kona aupuni me keia mau olelo o ke koa ---
"E hoouna koke mai i mau moku kaua hao monita no ʻ u, a e komo no au iloko o Mobile me ke kaulua ole."
Ma ke ahiahi no o ia la, ua hiki io mai la na moku a Faragata i noi ai, a o ka hana wale no i koe ma kona aoao, o ke komo ae a hoouka kaua aku i ka enemi.
Ua hoouna aku o Faragata i ke kauoha i na aumoku, o ka hora 3 @anaao o ka la 5 o Augate ka manawa e hookomo ai o na aumoku ma ke kowa no ka hoouka kaua aku i na papu. Aka, o keia kauoha, ua ulolohi loa ia a hiki wale i ka hora 6 kakahiaka, akahi no a makaukau na moku i ke komo ana malalo o na kauoha.
Ua hoopii aku na aumoku kaua ehiku i ka nuku o ke awa me ka ukali ia e na moku hao monita mahope, a i ko lakou wa i ano kokoke aku ai i na papu elua ma ka nuku o ke kowa, ua huki like ae la lakou i na hae aupuni Amerika ma na kia, a oia hoi ka wa i wehe pu ia ai o na panipu a hoopuka ia aku ka waha o na pukuniahi me ka makaukau no ka hooili kaua.
He la malie ua kakahiaka la me ka pa ole ia e kekahi makani, a ua halana maikai ka wai me ka aleale ole. I ka wa a ka la i oili mai ai ma na puu mahope aku o ke kulanakauhale, oia ka manawa a Adimarala Faragata i pinana ae ai ma na rigini a hiki i ke ku ʻ i owaena maluna o ke kia, owili ae la iaia iho me ka pea, a lilo ae la iaia ke pailaka ana i na aumoku ma ke kowa me kana mau kauoha mai luna iho o ke kia, a ia Lutanela Roge hoi ka oniu ana i ka hoeuli o ka Hakapoka.
He mau minute ia no ka pihoihoi nui o na mea a pau, a o kali ana i ka manawa a ua Adimarala wiwo ole la e haawi mai ai i ke kauoha mai luna iho o ke kiawaena, oia ka wa i lohe ia aku ai o kona leo i ka pane ane iho i ka Lutanela huki hae i keia mau olelo
"E huki ae i ko kakou hae hoailona no ka hoomaka ana."
Iloko o ia sekona i huki ia ae ai ka hae hoailona ma ke kiamua o ka Hakapoka, a ki papalike aku la na aumoku i na papu elua ma ka nuku o ke awa, me ko lakou hoomau no i ka holo ana iloko o ke kowa no keia helu ae.
(Aole i pau)
HE MOOLELO
NO KE
KOA O KANAHELE,
A I OLE IA
KA NAITA O KE KAPA KILA LAHILAHI
KE ANA O NA POWA
MOKUNA II
A i ka pau ana o ka lakou paina, ua makemake lakou e hoi ma ko lakou wahi e hooluolu ai, ua lalau ae la o Melina i ka ipukukui a alakai aku la ia lakou iloko o ka rumi.
Aia ma kekahi kihi o ke ana, hookahi no puka, a he eha moe o loko, haalele aku la o Melina ia lakou, a hoi aku i ka rumi o na makua e noho mai ana.
I kela wa a na makua i ike mai ai iaia nei, ua hooki koke iho la ko laua kamailio ana.
Manao iho la keia, aohe o laua makemake ia ia nei e lohe i ka laua mea e kamailio ana, nolaila, ua honi aku la keia i ka makuahine a hoi aku la iloko o kona rumi.
Ua pane mai la ke kane i ka wahine penei---
Aohe pono i koe, aohe nana no ka puu o ke kua, ina ia e ae mai i ko ʻ u makemake. O kana mea e noi nei, aole au e ae aku.
E koi mai ana i keaha? i pane mai ai o Iudika.
Ae, koi mai, koi paakiki, e hai aku au ia e e ka wahine, ua hoowahawaha au i kela keiki, ina ia e noho loa make ia ia ʻ u.
Make ia ia oe, ua hoopakele nae ia i kou ola.
Oia ka hoi paha, o ka ikaika hoi paha ia ana e huna nei iloko ona, ina hoi paha ia e hui mai ana me a ʻ u a hoohiki ia malalo o ko ʻ u mau kanawai alaila, pono. Malia no hoi o make e no hoi au, e lilo no kuu inoa alii iaia, a ina e mau kona paakiki, aole e ae e hahau i kana pahikaua malalo o kuu hae, e hoohiki mai oia ia ʻ u a ku aku a hele.
E hoohiki no keaha?
Ae, he hoohiki e hiki ole ke hai i ko makou hoailona, a me ka makou mea huna.
Hilahila ole oe e Takuina. Ua ike no oe aole e kumakaia ana ke keiki ia oe, e lilo e kona ola mamua o kona hana ana pela, aole no ona makemake i keia ano hana au, aka, he aloha no nae ia oe.
E loaa anei ia ʻ u ka oiaio, e like me ko ʻ u ike ana i ka puu o kona kua? wahi a Takuina.
Ku ae la ka wahine me ka manao e haalele iho iaia.
Hoi mai oe e Iudika, a hookuu aku i ke keiki e hiamoe.
Manao au, he naita Karitiano paha Sir Manfred?
Ae, a pehea iho hoi kekahi naita o laua.
Kana keiki?
Ua makapo ia paha oe. He manaoio anei kou he keiki ia na Kaluna?
A heaha no la noi kou mea o ka manaoio ole ana?
Ua hana mai no anei oia ia oe me he keiki la?
Pela nae paha na keiki o ia kulana, o lakou ke hele mamua, mahope mai kahi makuakane e hahai mai ai? ina ia he keiki, maikai no ia e noho e ma ke pakaukau, a na ka makuakane e lawelawe mai nona.
Aohe ka paha oi ike? Aohe ka paha e hiki ai oe ke koho ae i ka mea malalo o kou malu i keia po, e hookau iho oe i ko wahi papale kapu noonoo, a nana pono iho.
Nana pono aku la keia i ke kane, a eopu aku la i kona lima, me ka pane ana aku---
Ua ike no oe aohe ka la o ke k@@@ a Kalune.
Ae, hiki no ia ʻ u, a o kou ola ka panai. Aole au i ike ia @rie Kaluna mamua, aka, o keia kanaka, ua kamaaina wau iaia e like me kou mau kanaka ponoi.
E Takuina, e hai mai oe ia ʻ u, owai la ia.
Ua hoohanohano ia mai kaua ma o ka hiki kino ana mai nei o kela Kale ka Ohule.
Ka Moi?
Ae, o ka Moi o Palani, o ke keiki bebe keia a Luisa le Debonere me Iudika o Bawaria, kahi one i hanau ia ai. Ua nunui na kaikuaana, hanohano maoli kaua. E nana iho oe, aia maluna ona kekahi apana o ke kuloka o Kalemagana.
Ae, o ka hapa nui o ke koloka o ua kanaka kaulana la, no ia nei, aka, @a i ke kaikuaana ka inoa emepera.
Aka, o Kale, o ke keiki ku loa no ia i ke kupunakane. E nana ae ia Fonetinoi, ilaila kahi o lakou i kaua ai no ko lakou pono iho. Aole anei o Kale ka mea i hee ai, a nana i hoihoi aku ko ka emepera mau pono?
Ae, o na mea i ike ia, pela io no; a o na mea i ike ole ia, he okoa. E hoomanao iho oe ilaila au, a mahope au o Lohere, o Kale oia no ke alakai o kona puali, a o ko lakou hoaloha maikai o Sir Manfred o Kalune, oia ka mea nana i kuhikuhi a eo ai, a pehea la o Sir Manfred i aa ai e lawe mai i kona haku alu ia nei, me kona ike mai no nou keia wahi.
E kuu kane, aole i pono o Kalune i kona manao ana, aole e hoopilikia ia ka poe i loaa i ka ino, ke kipa i kou wahi a malalo o kou malu?
Ae, e ka wahine, i ka wa malalo o kou malu, aole au e hoopakele iaia i na wa a pau.
Aole, aole, e hoomanao oe o Kale o Parani he enemi ia nou. Ina o Lotere o Lorene a me Lui o Helemania, ua kau inoa laua no ka maluhia, a owau aole. Aka, e haalele iho ana no ia nei me ka maikai, a e hanai ia no a maona hookuu aku.
A pehea aku?
Alaila, e malama lakou ia lakou iho aole anei oe i ike i kela pine nui e kau ana iluna o ka papale o ke alii a me ka lei kula ma ka ai? Naaupo, aole e hiki iaia ke hahai holoholona iloko o ko kakou nahelehele nei me ka lawe pu ole mai i na mea nani o kona aloalii, pehea auanei au e hookuu aku ai iaia?
E Takuina, aole paha oe e hana ino ana i ka Moi?
Heaha ka hewa? A heaha iho la oia no ʻ u?
Oia ka Moi o Farani, a he malihini oia na kaua. E hai mai, pehea oe e hana ai iaia?
He oi ae mamua o kau e manao ala.
E akahele oe, ina oe e hapai i kau pahikaua a hookahe i ke koko o ka Moi Kale o Palani, alaila, e ike oe mahope i ka weliweli.
E ka wahine
Aole, aole, e kuu kane, i hai aku nei au ia oe, ua ike au ina he minamina i kou ola, mai hoopoino i ke ola o ka Moi.
Mai hoonui wale no i ka olelo, aole i manao e hanaino i ka kaua malihini. He mea maopopo, ua ka@ mai no kona lima maluna o ʻ u ma Baganake, a ua eo iaia ka lanakila i Fonotenoe, aole nae ia i lanakila maluna o ʻ u, a aole no hoi au i haawi pio aku iaia. A nolaila, e kuu makuahine, e hookuu no au ia lakou a mahope aku au e uhai ai ia lakou, hopu a paa, hoihoi mai he mau paahao me ka malama maikai ia, a me ka puu dala nui wale no e hemo ai. E kapa iho no au ia ʻ u iho, he hupo ina wau e hookuu ana, aole paha e loaa hou kekahi laki e like me keia.
I ke keena waiwai o Palani, no ʻ u ia, aia ia i ka poho o kuu lima, a e like me ka ʻ u mea e makemake ai, pela no e hana ia mai ai.
Aohe mea hewa ina wau e lawe i ke kula mai ka waihona ae, alaila, ua lawe mai no au mai na kanaka mai, a e hoihoi hou aku no au ia lakou i kekahi wa.
I kinohi, manao iho la oia i umi kaukani kala.
Aole, uuku loa ia, aole ia i lawa no ke Kauna o Kalune. I kanalima kaukani kala no ka Moi, wahi ana i kana wahine.
(Aole i pau)
KAU AHAOLELO O
1888
LA HANA 33, IULAI 7
Halawai ka hale e like me ka mau a hoomaka ia na hana.
HOIKE A NA KOMITE
Na ke Alii Balauwina he hoike no ka hapanui o ke Komite Waiwai, no ke kanawai e hooponopono hou ana i na auhau kuleko.
Na ke Alii Kamika o ke Komite Hookolokolo, he kanawai e hoomana ana i ka uku ia o na lilo o ke Aupuni ma mua o ka hooholo ia ana o ka B@la Haawina.
Na ke Alii Kimo Pelekane o ke Komite o na Aina Aupuni, he pala pala hoopii e hooloihi ia alanui Moiwahine, ua manao ke Komite, i $5000 no ia hana.
LA HANA 34, IULAI 9
Halawai ka hale a hoomaka ia na hana e like no me ke ano mau. Ka hea ia na inoa a hoomaopopo ia na hoa i hiki ole mai. Heluhelu ia a apana ka moolelo o ka la i hala.
PALAPALA HOOPII
Na Mr Laiki mai Koloa mai, e noi ana e hoopau loa ia ka uku ana i ke kao o Wailua.
Na Mr Balaunu mai Koolauloa mai, e hoopau loa ia ke Kanawai Papa Alanui o 1887.
Na Mr Kawainui mai Hana mai keia mau hoopii--
E mahele liilii ia na aina leialii, a hoolilo aku i na kanaka Hawaii wale iho no.
2 E hana hou ia ke awapae ma Palekai.
3 E hoonui ae i ke kula Enelani ma Keanae.
4 Aole e auhau ia na makua e hoouna ana i ka lakou mau keiki ma na kula Enelani.
5 I haawina o $5000 no kekahi alanui mai Heleleikeoho a hiki aku i Oopuola.
6 No ka hana a hoomaemae ana i elua alahaka.
7 Aole pili ke kanawai mare i ka poe loohia i ka mai lepera.
Na Mr Helekunihi, he ewalu mau palapala hoopii e noi ana.
1 E hoopau ia na kauka haole no ka hiki ole ia lakou ke lapaau i ka mai lepera a ola.
2 Aole e uku na makua e hoouna ana i ka lakou mau keiki i na kula ao Enelani.
3 E kukulu ia i mau halemai ma na mokupuni a pau.
4 E kaa ka hooponopono ana i ka Oihana Makai malalo o ka hoomalu a ka Loio Kuhina.
5 E hoopau ia ka Pauku 44 o ke Kanawai Kivila.
6 Ke loaa ke kane a wahine i ka mai lepera, ua hiki i kahi o laua ke mare hou me ke oki ole ia. E hoopau ia na Pauku 2 me 3 o ke Kanawai Kivila.
7 Aole e hooko hou ia ka ʻ o ʻ ana, aia wale no a makemake ia e ka lehu.
Hoolaha Kanawai Hou.
Na Mr Kamauoha i hoolaha mai e lawe mai ana oia he kanawai e hoololi ai i ka pauku 280 o ke Kanawai Kivila a me ka pauku 3, Mokuna LIX o ke Kanawai Hoopai Karaima.
A ua noi mai no hoi oia e kapae ia na rula i hiki ai iaia ke heluhelu i ke kanawai ana i hoolaha mai ai. Hooleia.
Heluhelu Kanawai.
Heluhelu mai ke Kuhina Kalaiaina, no ka manawa mua loa, i ka bila kanawai e hoohoihoi ai i ke kanu kope ana. Haawiia i ke Komite Pa ʻ t.
NA HANA O KA LA.
Heluhelu ekolu ana i ke kanawai uwea uwila telegarapa moana. Hooholo loa ia.
Heluhelu ekolu ana i ke kanawai e hoomana ai i ka uku ia o kekahi mau lilo o ke Aupuni aia mahope aku o ka hooholo ia ana o ka Bila Haawina no 1888 a 1890. Waiho mai ke Alii Kamika he hoololi e uku ia na uku o na lunakanawai kokua ekolu me eha, a ua nui na kukai kamailio hoopaapaa ana