Ka Nupepa Kuokoa, Volume XXVII, Number 33, 18 August 1888 — Page 4
| This text was transcribed by: | Lawrence Gersaba |
| This work is dedicated to: | Judith Nalani Kahoano Gersaba |
Ka Nupepa Kuokoa
KE KILOHANA POOKELA NO KA LAHUI HAWAII.
Nupepa Kuokoa.
No ka Makahiki,.................$ 2.00
No Eono Mahina,................. 1.00
- KUIKE KA RULA. -
Poaono...............Augate 18, 1888.
Haawina Kula Sabati.
HAPAPA EKOLU.
HAAWINA XXIX. Sepat. 2, 1888.
Ka hooona ia ana i na kiu i Kanaana.
Nahelu 13: 17 - 33.
17 Hoouna aku la o Mose ia lakou e makaikai i ka aina o Kanaana, i aku la hoi ia lakou, E haele oukou ma keia aoao kukuluhema, a e pii iluna i ka mauna.
18 E nana i ke ano o ka aina, a me na kanaka e noho ana ilaila, he ikaika, he ikaika paha lakou, he nawaliwali paha; he hapa paha lakou, he nui loa paha;
19 Me ka aina hoi a lakou e noho la, he maikai paha, he ino paha; a me na kulanakauhale a lakou e noho la, ma na halelewa paha, ma na pakaua paha;
20 A me ke ano o ka aina, he momona paha , he wi paha; he laau paha ilaila, aole paha: i nui hoi ka ikaika o oukou, e lawe mai i ke kahi hua o ka aina. O ka manawa ia o ka huawaina pala mua.
21 Pii aku la lakou a makaikai ae la i ka aina, mai ka waonahele aku o Zina a hiki aku i Rehoba, ma ke ala e hele aku ai i Hamata.
22 A pii aku la lakou ma ke kukuluhema, a hiki aku i Heberona, i kahi o Ahimana, o Sesai ame Telemai, na keiki a Anaka. (Ua hookumuia o Heberona ehiku makahiki mamua o Zoana i Aigupita.)
23 A hele aku la lakou i ke kahawai i Esekola, a oki iho la i kekahi lala me ka huiwaina hookahi, a amo mai la maluna o ka mamaka mawaena o na kanaka elua. O na pomeraite kekahi me na fiku.
24 Ua kapaia ia wahi o Esekola, no ka huiwaina a na mamo a Iseraela i oki ai malaila.
25 A hala na la he kanaha o ka makaikai ana i ka aina, hoi mai la lakou.
26 Hele mai la lakou a hiki o Mose la me Aarona, me ka anaina kanaka a pau o na mamo a Iseraela, i ka waonahele o Parama, i Kadesa; a hoakaka mai la lakou ia laua, a i ke anaina kanaka a pau, a hoike mai la i ka hua o ka aina.
27. Olelo mai la lakou ia ia, i mai la, Ua hele aku makou i ka aina au i hoouna aku ai ia makou, a he oiaio no e kahe ana ka waiu a me ka meli ilaila; eia hoi ka hua o ia wahi.
28. Aka, ua ikaika na kanaka e noho ana ma ia aina; a ua paa i na papo haku na kulanakauhale, a nui loa: eia hoi kekahi, ua ike makou i na keiki a Anaka malaila.
29. E koho ana ka Ameleka ma ka aina kukuluhema o ka Heta, me ka Iequsa, a me ka Amora, ua noho lakou ma na mauna: a ua noho ko Kanaana ma ka moana a ma kapa o Ioredane.
30. Hoomalielie iho o Kalepa i kanaka imua o Mose, i mai la, E hele koke aku kakou, a e komo i ka aina; no ka mea, e hiki pono no ia kakou ke lanakila maluna ona.
31. Aka, i mai la na kanaka i hele pu me ia, Aole e hiki ia kaku ke hele kue i ua poe kanaka la; no ka mea, ua oi aku ko lakou ikaika i ko kakou.
32. A lawe mai la lakou i ka olelo hoino i ka aina a lakou i makaikai aku ai i na mamo o Iseraela, i mai la, O ka aina kahi a makou i kaahele ai e makaikai aku, he aina ia e hoopau ana i na kanaka e noho ana malaila: a o na kanaka a pau a makou i ike ai malaila, he poe kanaka nunui.
33. Malaila makou i ike ai i na kanaka nunui, i na keiki a Anaka, na ka poe kanaka nunui mai: ua like makou me na uhini i ko makou maka, a pela hoi makou imua o ko lakou maka.
PAUKU GULA.
E hele koke aku kakou a e komo i ka aina; no ka mea, e hiki pono no ia kakou ke lanakila maluna ona.
Nahelu 13: 30.
Poakahi Nah 11 1-23
Poalua Nah 11 24-35
Poakolu Nah 12 1-16
Poaha Nah 13 13, 17-33
Poalima Kana 1 1-26
Poaono Hal 106 1-26
Sabati Hal 106 27-48
Na lono mai ke kanawai hou mai.
I. Ka hele ana a hiki i na palena o ka aina. Pehea ka loihi o ka noho ana o ka Iseraela ma ka mauna o Sinai? I ka wa hea ka naue hou ana imua? 10:11. Malalo o ke alakai ana owai? Heaha ka pilikia i loaa ia lakou? Mok. 11. Heaha ka haunaele malaila? 12. Ua hiki aku lakou ihea ma na palena o Kanaana? 13:26. Kana 1:19. Pehea ka loihi o ia hele ana? Nah 10:11 me 13:20. Ehia kanaka ma ka huakai? Nah 1:46, 47.
II. Ka hele makaikai ana o na kiu? 17 - 25. Heaha ka hana i kupono i na kanaka i ka hiki ana i Kadesa? Kana 1:21. Ina ua paulele lakou i ke Akua, aole anei i komo lanakila aku i ka aina ia wa? Heaha ka lakou i manao ai? Kana 1:22, 23. Ehia na kiu i hoouna ia? E aha lakou? Pehea ka loihi o ko lakou hele makaikai ana? Heaha ka lakou i paa aku ai i ka hoi ana ae?
III. Ka hoike a na kiu? 26 - 33. Heaha ka olelo a na kiu no ka maikai o ka aina? Heaha na mea a lakou i hoike aku ai i mea e ike ia ai ka oiaio o ka lakou olelo no ka momona o ka aina? Heaha na pilikia ma ke ala? Heaha ke ano o na kanaka? Pehea lakou ma ka manao o kekahi o na kiu? 33. Heaha ka olelo i poni ia a lakou Puk 12:25. Heaha na hana mana a ke Akua i hana ai mamua i mea e hoopakele ai ia lakou? Ua like ane8i ka hoike o na kiu a pau? p 30, 14:38. Owai na mea kue? Heaha ka pomaikai i loaa i na kiu i hoike maikai no ka aina? Heaha ka poino o na mea e ae? 14:23, 30.
IV Heaha ka aina i hoohiki ia no kakou? Heaha kekahi pomaikai o ka haipule? Io 14:27. Pil 4:7. E ike ia anei ke ano o ka haipule e ko ke ao nei? Mat 5:14. Heaha na hua haipule oiaio e lawe mai? Gal 5:22, 23 Heaha na keakea ma ke ala? Ep 6:12. Io 14:36. O ka loaa ana i na keakea ma ke ala, he kumu anei ia e komo ole ai i ka aina maikai?
I Ke alakai nei ke Akua ia kakou Kaana hou.
II He pilikia no ma ke ala, he enemi, he hoowalewale.
III Ua hiki anei i ke Akua e kokua i lanakila?
IV Ke hoike mau nei na haipule no ka pono o ke Akua, ma na hana a ma ka olelo.
V O ka poe e lilo ana i ka hewa, a paulele ole i ke Akua, he hoike kue ka lakou.
VI O ka poe e noho pono ana, e paulele ana i ke Akua. e hauoli ana, a lawelawe ana i na hana maikai, he maikai ko lakou hoike ana.
VII He pono e lilo i Karistiano me ka nana ole i na pilikia, na mea e akeakea ma ke ala.
KAU AHAOLELO O
1888.
NA HANA O KA AUWINA LA.
Akoakoa hou na hoa ma ka hora 1.
Hoomau ia ka noonoo ana no ke kanawai e pili ana i ke alanui alahao o Honolulu. Ua lehulehu na hoa i kamailio mai, e laa na Kuhina Loio me Kalaiaina, na Hon. Kamika, Wilimana, Iana, Tausani a me Kini, a ua lehulehu na hoololi i aponoia.
Noi mai ke Alii Kole e hookomo ia i pauku hou e hoomana ana i ke Kuhina Kalaiaina e hana i rula no ka akeakea kupono ole ia o ke alanui a e pili ana i ka nui o na manawa a na kaa e holo ai i kela a me keia la. Ma ke noi a Mr. Kini ua hoopanee loa ia ka pauku hou.
Noi mai ke Alii Kamika e noonoo hou ia ka pauku 1. Hooholo ia ke kanawai no ke kakaupoepoe ana, a i keia Poalua ae e heluhelu ekolu ia ai.
A ma ke noi ua hoopanee ka Hale ma ka hora 4:05 a ka hora 10 kakahiaka Poakahi.
LA HANA 57, AUGATE 4.
Wehe ia ka Hale ma ka hora 10 a. m., o ka Peresidena ma ka Noho. Hoomaka ia na hana mau, kahea ia na inoa i hiki ole mai.
NINAU I KE KUHINA KALAIAINA.
Ninau mai o Mr. Kamauoha i ke Kuhina Kalaiaina ina ua mana ka olelo hooholo a ka elua hapakolu o ko Kona Papa Alanui? A ina ua hana aelike lakou e hana ia kekahi wahi o ke alanui no kekahi uku, ua paa a ua mana no anei ia aelike ana i hana ai?
HELUHELU KANAWAI HOU.
Heluhelu mai ke Alii Dole, no ka wa mua he kanawai e hooponopono ai i ka auhau o na kaa a me na kaa hana, e hoolilo ana hoi i $2 ka auhau makahiki mau. Haawi ia i ke Komite Pa'i.
Heluhelu mai o Mr. Paehaole, no ka wa mua, he kanawai e hoololi ana i ka Pauku 62 o ke Kumukanawai, e pili ana hoi i ke kuleana koho balota. Noi mai o Mr. C. Balaunu e hoole ia ke kanawai. Hooholo ia.
NA HANA O KA AUWINA LA.
Akoakoa hou ma ka hora 1.
Heluhelu ekolu ana o ke kanawai e papa ana i na mea hoopahu ma ka lawaia ana. Hooholo loa ia.
Heluhelu ekolu ana o ke kanawai e pala aku ai i ka lawe ia mai a hoolaha ia o na ma'i o ka lau kope. Hooholo loa ia.
Heluhelu ekolu ana o ke kanawai e hoololi ana i ke kanawai oki mare. Noi mai ke Alii Hikikoki e hoopanee loa ia. Ua nui na kukai kamailio ana no keia kanawai, a mahope ua kahea ia na ae a me na hoole no ka hoopanee loa, a ua koho he 22 ma ka ae a he 19 ma ka hoole. Nolaila, ua hoopanee loa ia ka kanawai.
MAU KANAWAI I APONO LA.
Hoike mai ke Kuhina o ko na Aina E ua kakauinoa ka Moi i na kanawai elua e pili ana i na uku kula.
NOONOO HOU IA.
Noi mai ke Alii Hikikoki e hapai hou ia ke koho e hoopanee loa ana i ka kanawai oki mare. Ae ia. A ua noi hou mai oia e hoopanee loa ia ua kanawai la. Haule. Noi mai o Mr. C. Balaunu e hapai hou ia ke kanawai i ka Poalua. Hooholo ia.
HELUHELU KANAWAI.
Heluhelu ekolu ana o ke kanawai e hoololi ana i ke kanawai e hooponopono ana i aa Oihana A'o Palapala, e pili ana hoi i na Agena Kula. Hooholo loa ia.
Heluhelu elua ana o ke kanawai opiuma. Hooholo ia no ke kakaupoepoe ana, a i ka Poaha e heluhelu ekolu ia ai.
Heluhelu elua ana o ke kanawai e hoopakele ana i na i'a liilii mai ka lawaia ia Haawi ia i kekahi komite wae, penei: na Hon. Paehaole, B. Balaunu, Likikini, Bele a me Luhiau.
Hapai ia ke kanawai e pili ana i ka Banako Hoahu Hale Leta, noonoo pakahi ia na pauku, a hiki i ke noi ia ana mai e hoopanee.
Ua hoopanee ka Hale ma ka hora 5 a noho hou ma ka hora 10 o kakahiaka Poalua.
LA HANA 58, AUGATE 8.
Wehe ia ka Hale ma ka hora 10 a. m., o ka Peresidena ma ka Noho Hoomaka ia na hana mau, kahea ia na inoa a hoomaopopoia na hoa i hiki ole mai.
HOIKE A NA KOMITE.
Waiho mai ko Komite o na Aina Aupuni a me na Hana Hou he hoike maluna o na palapala hoopii, (1) no kekahi alanui mai alanui Moi aku a Hauhaukoi, (2) no $1,600 no kekahi alanui mai Kailua a Oopuloa, Makawao, Maui, (3) no $1,000 no ka hana hou ana i ke alanui mai Puna a ka hanahou ana i ke alanui mai Puna a ka Lua o Pele, (4) no $3,000 no ka hana ana i ke alanui e holo la iuka o ke Awawa o Kalihi. O ka palapala hoopii mua ua hoike mua ia no e ke komite ma ka la 17 o Iulai, a o na palapala hoopii ekolu iho mahope ua manao lakou e waiho ia ma ka papa a noonoo pu ia me ka Bila Haawina. Apono ia.
Hoike mai no ia komite no na paipu wai a hoea i Iwilei. Ua loaa aku i ke komite he elua a ekolu no paha wahi i hoohui ole ia me ka oihana wai o Honolulu, a o ka lilo paha no keia hana i noi ia mai e hiki aku ana ia i ka $1,500 a $2,000 paha. Ua oi loa aku na pono wai e hoolawa ia nei me ke paipu nui ma alanui Moi mamua ae o kahi mau wahi e aku. Aole he mea kupono e lawelawe koke ia ka hooko ana aku i ka hana i keia wa, a ua manao ke komite e haawi ia ka hoopii i ke Kuhina Kalaiana. Apono ia
Na ia komite hookahi mai no he hoike no ke kanawai e hoomana ana i ke Kuhina Kalaiaina e hoolilo aku i kekahi aina i na Kahu Waiwai malalo o ka palapala kauoha a ke Alii ka Moi Lunalilo i kekahi apana ma Kaiwiokaihu, Kona, Oahu, e pili la i ke kahua o ka Lunalilo Home. Ua nana a makaikai ke Komite i ka aina i olelo ia. Waiho mai lakou he mau hoololi a mea ia mau hoololi e hooholo ia ke kanawai.
Waiho ia ma ka papa a noonoo pu ia me ke kanawai.
Noi mai ke Alii Tausani e hooloihi ia aku ka manawa o ke Komite o ka Oihana Kinaiahi. Pela no hoi he Alii Kamika no ke komite e pili ana i kela @15,000 o ka Aie Lahui. Pela no hoi o Mr. Paehaole no ke Komite o Kalawao, a o Mr. Kini hoi no ke Komite Alakohola. Ua ae ia keia mau noi a i eha.
Waiho mai ke Alii Walakahauki he hoike no ke komite maluna o ke kanawai e pale ana i ke kuai malu ia o na waiona, e apono ana i ka bila, aka, me ka manaoio aole ia i lawa pono no na mea i manao ia, ua waiho mai lakou he bila hou. Lawe ia mai ka hoike a heluhelu ia ke kanawai hou, no ka wa mua, ma ke poo.
Heluhelu mai ke Alii Hikikoki i ka hoike a ke komite wae maluna o ke Kanawai Koho Balota. Waiho mai ke komite he bila i hooponopono a i hoololi hou ia. Ua kakauinoa ia ka hoike D. H. Hikikoki, Kikila Balaunu, L. A. Kakina, C. W. Akepoka. Ua lokahi no ke Alii Kamika ma ka hoike, koe wale no ma kahi e pili ana i ke kuleana o na hoa a me na hoopai ana malalo o ke kanawai. Waiho ia ma ka papa no ka noonoo pu ana me ke kanawai.
Na ke Alii Likikini i heluhelu mai ka hoike no ke komite wae e pili ana i ka itamu o $5,000 maloko o ka Bila Haawina no ka Ahahui Kapiolani Paka. Ua nana a ua noonoo akahele ke komite i na mea a pau e pili ana, a mamuli hoi o na mea i hoike ia mai, ua manao ke komite e hooholo ia ka haawina, me ka manaolana e hiki ana i ka Ahahui Kapiolani Paka ka hooponopono me ka Hui Heihei Lio Hawaii no ka hookaawale loa ana i ka pa holookoa a i kahi wahi paha e poaipuni ana i ke kahua heihei, iloko o na makahiki elua e hoea mai ana. Kakauinoa ia ka hoike, J. Likikini, H. Walakahauki, W. A. Kini. Hoike mai o Mr. Kawainui he hoike hapauuku e lokahi no e haawi ia ka haawina, aka, e hookaawale mua ia ka pa e hoopuni la i ke kahua heihei mamua ae o ka loaa hou ana aku o kahi dala o ka lehulehu.
Ua ala nui mai na kike komailio ana no keia mau hoike, a ua hoomau ia ka hoopaapaa ana o na hoa a hiki i ke awakea, a ua noi ia mai e hoomaha.
LA HANA 59, AUGATE 9.
Weheia ka hale a hoomaka ia na hana e like me ka mea mau.
HOIKE A NA KOMITE.
Na ke Alii Likikini i waiho mai no ke komite wae i haawi ia ai o ke kanawai e pili ana i ka hoopakele ana i na i'a liilii, e waiho mai ana i pauku hou ma kahi o ka pauku 1 e hoolilo ana hoi i hewa ka lawaia a lawe ana i kekahi i'a opio malalo o 2 iniha ka loihi, Ma keia ae la ua manao lakou e hooholo ia ke kanawai. Ua lawe ia mai ka hoike a waiho ia ma ka papa no ka noonoo pu ana me ka bila.
MAU NINAU I KE KUHINA O KO NA AINA E.
Ua waiho mai ke Alii Likikini i na ninau malalo iho i ke Kuhina o ko na Aina E, penel:
1. Ua hoohalahala mai no anei ke Aupuni Iapana ma o kono luna la, no ka ae ole ia o na kanaka Iapana mai ka pono e koho i lunamakaainana i ka Ahaolelo?
2. Ina pela, heaha ka pane i haawi ia aku no ia hoohalahala ana?
3. E waiho ana anei ke Aupuni i na kope o na kukai palapala ana ma ke pakaukau?
NA HANA O KA LA.
Heluhelu ekolu ana o ke kanawai e pili ana i na pa a me na holoholona ae a, a pela aku. Hoohoio loa ia.
Heluhelu ekolu ana o ke kanawai e pili ana i ka bela. Hooholo loa ia.
Heluhelu ekolu ana o ke kanawai e papa a e hookapu ana e ka hookomo ia mai a me ke kuai ana aku i ka opiuma. Ua hoihoi hou ia ke kanawai i ke Komite Kakaupoepoe no ka hooponopono hou ana i ka olelo Hawaii.
A me ke noi ua hoomaha ka Hale ma ka hora 11:50 a ka hora 1 o ka auwina la.
NA HANA O KA AUWINA LA.
Noho hou ka Hale ma ka hora 1, aka, aole i lawelawe ia na hana a ka hora 1:12.
BILA KANAWAI KOHO BALOTA.
Noho ka Hale iloko o ke komite holookoa, Mr. F. Balaunu ma ka noho, no ka noonoo ana i ka bila kanawai koho balota.
I ka makahiki 1886, ua koho ia he komisina ma o kekahi olelo hooholo i hooholo ia, oia o W. R. Kakela, F. H. Hayselden (Kikaha), a me J. E. Bush, no ka hooponopono hou ana i ke kanawai koho balota o ka aupuni. I ka la 6 o ka mahina o Iune i hala, na ke Alii Kikila i waiho ae ka hoike a ke komisina ma o kekahi bila kanawai hou. Ua haawi i keia bila kanawai hou. Ua haawi i keia bila i kekahi komite, oia na Alii Kakela a me Kamika, Loio Kuhina, Kuhina Kalaiaina a me Mr. C. Balaunu, a ma ka aoao o ke komite ua waiho ae lakou i ka bila kanawai me na hooponopono a me na hoololi.
Na pauku 1, 2, 3, 4, 5, 6, 7, 8, 10, 11, 12, 13, 17, 18, 20, 21, 22, 23, 24, 27 a me 28, ua hooholo ia e like me ia ma ka bila.
O ka pauku 9, ua hololi ia ma ka hookomo ana "Mokupuni o Kauai me Niihau," ma kahi i ka "Mokupuni o Kauai."
He hooponopono a hoololi no hoi kekahi o ka pauku 13, a o ka pauku 15 ua waiho ia ka noonoo ana a no kahi wa aku, a e like me keia lapaau ana o keia mau pauku ae la, pela no me na pauku 16, 19, 25, 26, 29, a me 30.
OLELO HOOHOLO.
Na ke Kuhina Kalaiaina he olelo hooholo e lilo ka bila kanawai e pila ana i na Luna Helu a me Ohi Auhau i hana no ka Poalima. Hooholo ia.
A ma ka hora 4:35 ua hoopanee ka Hale a ka hora 10 o kakahiaka Poalima.
LA HANA 60, AUGATE 10.
Weheia ka hale a hoomaka ia na hana e like me ka mea mau.
OLELO HOOHOLO.
Na ke Alii Hikikoki he olelo hooholo, mahope aku o ka Poakahi Augate 13, e noho mau keia Hale ma na hora 9 a pau o na kakahiaka. Hooholo ia.
NA HANA O KA LA.
Heluhelu ekolu ana i ka bila kanawai e pili ana no ka mea hoahu dala ma ka Banako Hale Leta, holo.
Heluhelu elua o ka bila kanawai e pili ana i na Luna Helu a me na Luna Ohi Auhau. Noonoo pakahi ia na pauku.
Pauku 1, e mahele ana i ka Aupuni iloko o eha Apana, (1) Oahu, (2) Maui, (3) Hawaii, (4) Kauai a me Niihau.
Pauku 2, e hoike ana i ka we e hoohoku ia ai o na Luna Helu me Ohi Auhau mamua o ka la 1 o Aperil, 1880.
Waiho ia ma ka papa a noonoo ia ke pau na hana a ka la.
Hapai ia ka noonoo ana o ka bila kanawai o na Luna Helu me Ohi Auhau, a mahope iho o kekahi hoololi ma ka pauku 2, ua hoomaha ka Hale.
NA HANA O KA AUWINA LA.
Noho hou ka Hale ma ka hora 1, a hoomau ia ka bila Luna Helu, a pela aku.
Hooholo ia ka pauku 2 me kekahi mau hoololi, pela ka pauku 3, a o ka pauku 4, 5, 6, ua hooholo ia e like me ka pila, a o ka pauku 7 ua hooholo ia me kekahi mau hoololi.
OLELO HOOHOLO.
Ma ke noi a ka Loio Kuhina, a i aw ia hoi, ua waiho mai oia i keia olelo hooholo, penei:
E hooholo ia o ka noonoo hou ana i ka bila kanawai helu 70, "He Kanawai e hooponopono ai i ka malama ia ana o na Buke Helu e ka poe i loaa ia lakou na laikini kuai kukaa a me kuai liilii, i hoihoi hou ia mai i ka Hale nei e ke Alii ka Moi me kona hoapono ole, e noonoo koke ia i keia la. Hooholo ia.
Pahu Hale Leta 351 Bele Telepone 274
KA AGENA OIHANA HAWAII.
No. 68 ALANUI PAPU KIHI O ALANUI KALEPA, HONOLULU, H. I.
HE AGENA OIHANA, A ME AGENA OHI DALA NO NA BILA A PAU.
KEENA OIHANA.
Na Waiwai paa - kuai a hoolilo aku, a me auhau uku ana.
Na Hale hoolimalima, Rumi, Keena, Aina e hoolimalima, a aelike e ohi i na uku hoolimalima o na ano a pau.
Na Moraki e ae ia ma na ano waiwai a pau.
Na Pepa kuleana aina, e kakau a hooponopono ia me na Pepa a pau e pili ana ma ke kanawai.
Kope a me ka Unuhiolelo ma na olelo a pau iloko o keia aupuni.
Na Panihakahaka ola, Hale, a me na waiwai o na ano a pau i na Ahahui Panihakahaka helu ekahi.
Na Malama ana i na Buke a me ka hooponopono ana.
E haawi ia no ka mikiala no na Ohi aie ana.
Na Gula, Kala me na Bila kikoo dala, kuai a hoolilo.
Na Hooponopono Hale Dute e pili ana i na waiwai mai ko na aina e mai.
Na Ukana o kela a me keia ano, e kuai a hoolilo aku.
Na Kauoha o na Mokupuni, e hooko ia no me ka eleu.
O na hana a pau a na makamaka e haawi mai ana no ka hooko anu i ke kauoha, e hooko ia no me ka eleu a me ka mikiala.
Agena Oihana Hawaii.
2170 1yr. Mar.
FRANK GERTZ
103 Alanui Papu.
UA WEHE AE NEI AU I NA KAHIKO AULII O NA
Kamaa o na Ano a Pau
No na Wahine, na Kane a me na Keiki i wae pono ia e Mr. Gertz iloko o Amerika.
- o -
HE OLUOLU KE KUMUKUAI MA KE KU IKE
- o -
E loaa mau mai ana na waiwai mana mokuahi a pau.
mr 31 ftn
B. F. EHLERS & CO.,
PAINAPA.
Poe Kuai i na Ano Lole a Pau.
Helu 99 alanui Papu, Honolulu.
E loaa mau ana na lole hou o na ano a pau maluna o kela a me keia moku.
Ka Waiwai o ka Hilinai
A AYER Laau Sasaparila, kai kaulana a
hilinai mui ia no ka hoomaemae koko, ma ua
wah a pau o ka honua, ne aneane 40 ma ka
hiki i hala ae nei, a ua lawelawe nui ia hoi
iwaena o na oihana lapaau. O keia
LAAU SASAPARILA, no loko ae ia o ke
aa Sasaparila Honedura maoli; ua loaa ka
mana hoomaemae ma o ka hui pu ia ana me
kekahi mau aa laau e ae, a me kekahi mau
mea no loko o ka honua a me ka hao.
HE koko inoino a nawaliwali anei kou? Ua
a wili pu anei me na ano mai i ikaika? A ua
hui pu anei me na wai awaawa hoopehu
Na keia
LAAU e hoomaemae ia mau mea ino a paua
a maikai. O na kauka lapaau a pau o Amerika
ike ke ano o ka AYER SASAPARILA, ua
olelo lakou, aole he mea maikai e ae no ka
hoomaemae koko ana mai na mai i awili pu
ia, aka o keia wale no. No ka
HOOMAEMAE ana i ke koko, a me ka
hookahua pono ana i na mea a pau ma kekahi
mau ano ma ii ikeia, o ka AYER SASAPARILA
wale no ka laau nana e hoomaemae hakalia
ole mamua ae o kekahi ano laau e ae O ke
KOKO ino hakuhaku, a nawaliwali hoi kona
holo pono ana ma ke kino, e hoomaemae ia
a e hooikaika pu ia no hoi ma o ka ai ana i
keia LAAU SASAPARILA A AYER, He
maalahi a he
MIAKAI loa hoi keia Laau, aole no ka
hoomaemae wale ana no i ke koko, aka, no
ka hookaawale pu ana kekahi i na ma'i,
hoomomona hou ana i ke koko ino, a me ka
hooikaika pu i kona holo pono ana ma na aa.
He lehulehu wale na hooia ana mai na wahi
a pau o ke ao nei i hoohana mau i keia laau
mamua o kahi mau laau e ae.
A HILINAIIA no ka ikaika kupono o ke
ola kino, ma ka maemae ana o ke koko,
hoomake pu ia na ma'i, a pela aku. He nui
laau hoomaemae koko i hoolaha waha hee
wale ia malalo o na inoa lehulehu, aka, o na
hilinai a me na hooia wale no a ke ao
holookoa, maluna o ka
Ayer Laau Sasaparila.
I HOOMAKAUKAU IA E
Kauka J. C. Aver & Co., Lowell, Mass.
HOLLISTER & CO.
Na A ena ma ka Paeaina Hawaii.
Helu 100. Alanui Papu, Honolulu
2086 tf
Kakela a me Kuke
HALEKUAI NUI O NA WA@
E laa na pahiolo, koi bole,
hamale, koi mai a me liilii, kila.
wili puaa, rula, apuapu kai o na ano
a pau. kala kaa. hao hoopaa puka.
pohaku hoana, kepa lei ilio, kaula
hao ilio, pahi, upa, pahi aminmi,
kalapa, kope hulu, palapala, oepa
kalakala, lina hao, ami, keehi, a me
ke
- KAULA OPU. -
Palau o na ano a pau,
Oo, ho, kopala, pe, kipikua,
hao kope, au ho a pela aku,
kua bipi, lei bipi, kaula
hao bipi, uwea pa.
uwea kekeawe. hao pili
piula, kaa palala, ipuhao,
ipu ti
PA-PALAI MAKAU ME KE AHO.
Ili wai, papa holoi, kopa ala, kaula
kuaina, hu'akai, ehi wawae,
hulu pena, a pela aku.
Pena wali, kini nui a me liilii o na
ano a pau, me ka pepa kuhikuhi,
pena keokeo, aila pena, aila
hoomaloo, vaniki kaa, a me
vaniki moe,
PENA HOOMALOO
- a me aniani hale -
AILA MAHU, AILA MIKINI, AILA
HAMO ILI, AILA KAA, INIKA
KAMAA.
PAUDA, KUKAEPELE, KIANA
PAUDA, UIKI IPUKUKUI O NA
ANO HE NUI A LEHULEHU.
LOLE MAKEPONO
-E laa na -
AHINAAHINA, KALAKOA. KEOKEO,
LEOPONALO, HULUMANU,
UWE-WAHINE, KUI HUMUHUMU,
A ME KA LOPI.
Ke Kuike e loaa no ia na kahi o
Kakela & Kuke!
NA MEA PIULA,
Mikini Humuhumu
Mekini a WHEELER a me WILSON
MIKINI A WIILCOX ME GIBBS
NA MIKINI A
- REMINGTON. -
He nui loa na mea hao me na ukana e
ae o na ano a pau, aole hiki ke hai pau
ia aku, hewa i ka wai na maka ke ike.
Laau Lapaau Kaulana Loa
A DR. JAYNE ,
LAAU HOOMAEMAE KOKO
LAAU HOOPAU NAIO, LAAU
KUNU, PENIKILA, HUAALE,
PAAKAI, LAAU HOOPAA HI, A
Me na Laau Hamo, a Pela 'ku.
KAKELA & KUKE