Ka Nupepa Kuokoa, Volume XXVII, Number 34, 25 August 1888 — KE KULANA O GEREMANIA. [ARTICLE]

KE KULANA O GEREMANIA.

Aia iloko o ka moolelo o Geremania no kekahi mau makahiki loihi i hala ae nei he hookahi kanaka kaulana loa ma kana mau lawelawe pili aupuni ana, oia o Bisimaka. O ke ano nui o kana mau lawelawe ana mawaho ae o na hana kuloko o ka aina, oia no kona haawi i ka nui o ka manawa a me ke akahele ma ka ikaika kaua pale o ka aina mai ka enemi mai, a ma ia kulana oia i kaulana ai a puni ke ao nei. Ina he hookahi kanaka i koe iloko o Europa e ola nei i keia manawa, he pale aku i ke kaua a he imi i ka maluhia, o ka inoa o ua kanaka la oia no o Bisimaka. Aia no iloko o Europa i keia la he hookahi kanaka e ola nei ua hiki iaia ke hapai i kekahi kaua me ke kuka kuka ole me kona Aha Kuhina a me ka Ahaolelo, oia ka Emepera ke Czar o Rusia. O keia wale no ka Moi o ke ao nei o ke ola a me ka make aia iloko o ka poho o kona lima. I ka wa e poni ia ai o ka Emepera Wiliama o Gcremania, e hoouna hou aku ana o Bisimaka iaia e hui hou me ka Emepera o Rusia, ke kanaka hiki ke olelo ia, ua hiki iaia ke hapai i kekahi kaua nui me na aupuni o Europa me ka nana ole ia o ko lakou mau kulana iloko o hookahi hebedoma. O keia na hana akamai loa a Bisimaka e onou nei i ka Emepera opio o Geremania ma ka hui launa pu ana me kekahi mau Moi e ae e rula nei ia Europa. O na hoomakaukau kaua ana, oia no ka haawina like a na aupuni e ae e hoomakaukau pakahi nei i ko lakou ikaika iho. He mea kanalua ole ka olelo ae, e like me ka nui o na hoomakaukau ana, pela ka nui o na kamailio a me na manao pihoihoi o ka makaala mau aku o kekahi aupuni i kekahi, a malia paha e ko io ana no kela olelo a Bisimaka i hai ai,—aohe i makaukau pono loa o Europa i ke kaua i keia manawa a hiki i ka makahiki 1890, alaila, o ka wa ia e poha ai ke kukaia kaua iwaena o ka puuwai o Europa.