Ka Nupepa Kuokoa, Volume XXVII, Number 36, 8 September 1888 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXVII, HELU 36.     HONOLULU, POAONO, SEPATEMABA 8, 1888.           NAHELU A PAU, 2197

 

W.O. SMITH.

Loio ma ke Kanawai.

@66. Alanui I'apu, Honolulu. fy 4-1y

 

W R. KAKELA.

LOIO A HE KOKUA MA KE KANAWAI

He Luna Hooia@o Palapala.

            tf

 

WILDER & CO. (WAILA MA.)

Mea kuo@ papa a me na lako kukulu hale na ano a pau, a me na me ne pono a pau no ka hul@.

            Kihi Alanui Moiwahin@ me Papa. tl

 

CECIL BROWN.

LOIO A HE KOKUA MAKE KANAWAI?

@ Agena Hooiaio Palapala no ka Mokupuni o Oahu

KAENA HANA: Ma alanui Kalepa.

            tf

 

WILLIAM C. ACHI.

Loio a he kokua ma ke kanawai imua o na Aha a pau o keia Aupuni.

            He Mea Ana Aina a he Boroka ma na waiwai paa.

            Keena Hana, Helu 15, Alanui Kaahumanu Honolulu, oia ke Keena mua iho nei o Kini me Peterson.            2114-y

 

JOHN MAHIAI KANEAKUA

LOIO A HE KOKUA MA KE KANAWAI.

HE MEA UNUHIOLELO MAKE OLELO BERITANIA A ME KA OLELO HAWAII.

Keena Hana, maluna ao o ka Banako o Bishop ma.

1yr.

 

PACIFIC HARDWARE COMPANY

Na hope o Dilinahama Ma.

Mau Mea Kuai Lako Hao

Alanui Papu. Honolulu.

 

HOOLAHA

G.W.A. HAPAI.

            He Luna Hooko Mare.

A HE

AGENA HOOIAIO PALAI'ALA.

            E loaa no ma Hilo-taona, Hawaii, ma na manawa a pau.        2152-1y

 

E G. HITCHCOCK.

(AIKUE HIKIKOKI).

LOIO, A KOKUA MA NE MEA A PAU E PILI ANA MA KE KANWAI.

E Ohi ia no na Bila Aie, me Ka'awiwi

HILO, HAWAII.

            2114.1yr.

 

GEORGE P. KAMAUOHA.

He Loio a he Kokua ma ke Kanawai.

A HE MEA

ANA AINA.

E loaa no ma Kohala Akau, Hawaii.

2091-ty

 

VOLNEY VAILLANCOURT ASHFORD,

AKAPOKA.

He Loio, Hoakaka, Pale ma ke Kanawai

Kakauolelo, Lu@ooponopono a me

ka hana i na Palapala Hoolilo.

LAWELAWE ILOKO O NA AHA A PAU O KE AUPUNI.

E hana ia no na Palapala pili Kanawai a pau.

@ Keena Hana Helu 21, Alanui Kalepa, Honolulu Hale.      (2150 1y)

 

A ROSA (AKONI.)

LOIO A HE KOKUA MA KE KANAWAI.

He Luna Hooiaio Palapala.

KEENA HANA: Ma ke Keena Loio Kuhina.

tf.

 

JAMES M. MONSARRAT.

(MAUNAKEA.)

LOIO A HE KOKUA MA KE KANAWAI

He Luna Hooiaio Palapala.

            E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii.  Dala no ka hoaie ma ka moraki ma na waiwai paa.

            KEENA HANA: Alanui Kalepa.

 

W.A. KINNEY, (Kini.)

LOIO.

Keena hana ma ke Keena o J.A. Makuna, 2168         Helu 42 Alanui Kalepa.          1y

 

SAMUEL K. KA-NE.

Loio a he loea ma ke Kanawai.

            muaI o na Aha Hookolokolo a pau o kei Aupuni Keena hana: Kihi o na alanui Moi ame Beela, pili pu me ke keena o kanupepa Alakai o Hawaii.    @2182

 

HE MOOLELO

NO KE

Koa o Kanahele,

A I OLE IA

Ka Naita o ke Kapa

Kila Lahilahi.

MOKUNA IX.

HE MAU MEA ANO HOU.

            A hala aku la ke keikialii a me kona mau hoa, wehe ae la ka naita i kona papale kila, a papale iho la he papale veleveta, a hele aku la ma kai o na kaikamahine e kali ana e hoomaikai mai iaia.  Hele aku la oia a kokoke ma kahi o lakou e kuku ana, a ku iho la oia no kekahi minute pokole me ka ike ole i kana mea e hana aku ai, a ua kahaha kona manao i ka ike ana aku i keia mea nani e ku mai ana imua ona a aole hoi ana mea nani e ae i ike mamua.

            Hoomaopopo aku la keia oia ko lakou haku, no ka mea, ma kana olelo e hoolohe no lakou a pau, a pane mai la oia iaia nei me ka haawi pu ana mai i kona lima akau:  E ka naita, he hana nui kau i hana iho nei no makou, a ke hoomaikai aku nei makou ia oe, a ina aole oe i paa i kekahi hana okoa aku, alaila, ke nonoi aku nei au ia oe e hele pu me makou a hiki i ko makou wahi i hoomoana ai.

            I kahi anei i hoomoana ai o Louis o Keremani?

            Ua pololei oe, a mamuli o ko makou makemake iho, ua hale mai makou e holoholo iloko o ka nahelehele.  He poe powa ka makou i hopohopo ai, a aole hoi o ka poe i kapa iho he poe keonimana a'u i ike iho la, a e hai mai oe ina ua ike oe i kekahi o lakou?

            Aole e ka lede, he malihini au maanei.

            Mai ke alo alii mai anei o Farani?

            Ua koho pololei mai la oe e ka lede; ua haalele aku nei au i ke kakela o Clune he mau la mamua aku nei, a hele e mai nei au me kuu ukali no kona makemake e ike i kona mau makamaka ma Leige, a malaila mai nei maua.  Apopo e hiki mai ai ka Moi Kale, nolaila, manao i iho nei maua e moe iloko nei o ka nahelehele a hiki mai lakou alaila hookahi hoi ka hele pu ana aku.

            Pela no hoi ko makou poe i manao ai e moe ianei a apopo no hoi ka la i manao ia ai e hiki aku ana makou.

            Aole, aole e ka lede maikai, e hai aku no au ia oe i kau mau mea i ninau mai nei, a owau no ke kali a ka wa kupono.  E ike oe owau ka i kapa ia mai o Ulia o Kalune, a hoolilo ia e ka Moi Alapono a me Leona o Auseturia i naita, a maka makemake o ia mau Moi i kokua ia e ka Moi Kale o Farani, ua kapa ia mai au ke Duke o Tamora, aole paha e maopopo ana ia oe, aka, oia wale iho la ka'u wahi mea hiki ke hai aku no'u i keia wa.

            He oiaio, e ka naita, o oe a me kau kauwa ua lilo olua i mea kamailio nui ia maloko o na mele a ka poe haku mele o Keremania, a aia maloko o na buke moolelo a na koa i hoi mai mai ke kaua mai, a aia hoi iwaena o na ohana ke akoakoa ae lakou.  Ai keia wa hoi, ke ike nei au me o'u mau maka ia Sir Uleria o Kalune.

            Me keia mau olelo kau aku la ua lede nohea nei i kona lima ma ka a i o ka naita me ka hookohukohu nui, me ne mea la he kuleana kekahi ona malaila.  A iaia nei hoi e nana iho ana i ua kaikamahine nei, i iho la oia iloko ona, ina hoi he hiki ia'u ke puili mai ia oe iloko o kuu poli, lawe ia oe e a'u a lilo.

            Hele aku la lakou a kokoke i kahi i hoomoana ai, ike aku la ka naita i na koa e kiai ana mawaho, a pane aku la oia i kona kamaaina: E ka lede, aole au e komo pu aku ana me oukou e hele ma kahi e kokoke aku ana i ko oukou poe, a halawai aku kakou i Ai La Kapele, a ke hui kakou malaila, oia auauei ka manawa e hoopomaikai ia mai auanei au no ka'u mea i noi aku nei.

            Ku malie iho la laua a pane mai la ka lede:

            Heaha keia ou e Melina e kau pono mai nei kou mau maka ia'u?  Aole i pane aku o Melina, nolaila, ua pane hou aku la ko lakou haku:

            Ua aha, ua pupuka loa ia anei au, a i ole, ua ui loa ae nei paha au?

            E kala mai e kuu haku, he auwai okoa ka kou manao e kahe nei, e nana pono ana au i na lei a i, me he mea la ua ano e kou noonoo e Sir Uleria, wahine ui maoli kela, o ka oi kela a'u i ike ai.

            Ua pololei oie e Melina.

            A ua ano hoohie ia oe.

            Mai hoohenehene oe ia'u pela no paha ia e hana aku ai ina no he mea e ae ka i hiki mai.

            Pela no e kuu haku, ma lia paha ua hana no pela mamua a e hana hou aku ana no paha ma keia hope aku.

            Kulikuli oe, a lalau i ho la keia i ka lei a i a honi iho la.

            Ke noi hou aku nei au ia oe e kuu haku e kala mai no ia'u, ua hoohie maoli io ko ka leke ia oe.

            E kuu haku, aole au he makapo, aole paha i hoonaue ia paha kona puuwai e kekahi hoa'ihoa mamua e like me ka hoonaue ia ana i kona halawai ana iho nei me oe.

            Ike maoli no ka hoi kou mau maka.

            Ae, a e hooiaio aku au ia oe i ka ike o kuu maka, ua oi ae kau mea i ike mamua o ka puuwai o ka lede.

            A heaha ia mea au i ike ai?

            O kou puuwai hoi paha, ua ike au e kau mai ana iloko ou mau maka, au e i iho ana oe, ina he kuleana kou e puliki mai iaia ma kou poli, a malaila ia a hiki i kou make ana.  Aole a nei pela?

            Kulou iho ia keia a ea ae la me na waimaka e helelei ana a pane aku la:

            Ua pololei oe e Melina, ua ike oe i kuu puuwai.

            Kau ae la laua nei i na lio a holo aku ia.  A i ke kokoke ana e poeleele hiki aku la laua ma kekahi wahi kipa pali me kekahi wahi kahawai uuku e kahe ana, a ia wa i pane aku ai ka naita:  Maanei kaua e hoomaha ai.  Lele iho la laua ilalo a wehewehe ae la i na noho o na lio, a hookuu aku la, a hoomakaukau iho la laua e paina, a i ka pau ana o ka laua paina ana, haule aku la laua hiamoe.

            A ike kakahiaka i ka puka ana o ka la, o laua nei kekahi iluna o na lio e hele ana ma ko laua alahele.  Hookahi hora mahope iho ike aku la laua i kekahi huakai nui e hele mai ana maluna o na lio, a ike pu aku la laua i ka hae o ka Moi Kale o Farani, a hou ae la laua i na kepa i ko laua mau lio a holo aku la a halaway me lakou.

            O ka Moi Kale hoit he kanaka opiopio oia i ko kakou hui mua ana me ia, he iwakalua-kumamalima makahiki, a i keia wa hoi a kakou e halawai hou nei me ia, aa piha kona mau makahiki he kanakolu-kumamalima, ua nui a maikai kona ola kino, me he mea la ua ai no i ka momona o kona aupuni.

            Hui mua aku la ka naita me ka Moi e like me ka mea maa mau, a pau ia huli ae la keia no kona mau kanaka i aloha loa ai oia o Sir Manafera a me Sikimana, ua nui hou ae ko laua mau maka hiki, aka, o ko laua mau helehelena he oia mau no, o ko laua mau lauoho wale no ka i kualei.

            Ma ka nana mai a ka lehulehu i ko lakou nei wa i hui ai, me he mea la ua piha no lakou i ke aloha ia lakou iho.

            I ko lakou nei wa i kokoke aku ai, hoouna mai la ka Emepera i kekahi o kona mau kanaka e ukali aku i ka Moi o Farani a alakai ae ma ka aoao o ka hale i hoomakaukau ia nona a me kona mau ukali.

            O ko Kalune ale i pili kokoke akui ka hale o ke alii he lehulehu wale na keena noho a me na keena lio.

            O ka elemakule a me ka naita ua pili po ko laua mau keena, o ko ke kauna hoi, o kona ke keena ma ke kini a me na keena o na kauwa e pili koke mai ana.

            Ia la ua ike ia he elua mau kanaka e hakilo hele ana mawaho o ka pa alii.  I ka ninau ia ana aku e na koa kiai, hai mai la laua no Farani mai laua, a e kali aku ana o ka hiki mai o ko maua haku.

            A i ka poeleele ana iho o ua la nei, ike hou ia aku la no ua mau kanaka nei maka aoao ia Kalune ma e kamailio ana me na koa kiai.

            O Sir Uleria, ka Naita Elekle, oia paha ke keiki a ke Kauna o Sir Manafera o Kalune?  Wahi a ka laua ninau.

            Ae, o kana keiki hookahi wale no ia.

            A he kauwa kuapuu anei kana?

            Pela ko n aua lohe, ua ike hoi paha maua iaia i kona wa uuku, a o ka maua mea ia i hele mai nei.  Ua lohe no nae paha oe i kona mau makua?

            Ae, ea lohe au, mai ka puali powa kona lawe ia ana mai.

            Ae, o ke alli powa no kona makuakane a o ko maua mea ia i hele mai nei, i lawe mai nei maua he huaolelo mai kona makuahine mai, he makemake maua e halawai me ia.

            A eia ae no la ke hele mai nei, e kahea ae au, ea?

            Aole, aole, ua oki, aole maanei, a aole no i kei wa.  Ma kahi mehameha; aia a hala ae, ukali aku maua.

            Ia wa hele mai la o Melina a puka loa aku la iwaho me ke komo ole mai o kekahi manao iaia he hoohalua kema ia wahi.

 

MOKUNA X.

HE MANAO KAHAHA.

            I ke kuapuu no a hala aku iwaho, hoomaka uku la ua mau kanaka nei e hahai mahope ona. 

            Kahea aku la ke kiai puka, e laua la, heaha no hoi ko olua mea i kakali ole ai a hoi mai, alaila, hai aku olua i ko olua manao?

            Aole e pono pela, e halawai koke maua me ia e pono ai.

            A heaha no hoi ko olua mea i olelo ole aku nei iaia i puka ae nei?    

            Ka, Ua kuhi paha maua maanei no e kamailio ai?  Aole maua i loke mua he keena ponoi no kona?  E hahai ae no maua la a loaa aku hoi pu mai no makou.

            Haalele iho la ua mau kanaka nei i ke koa kiai a hahai aku la mahope o ke keiki.  He mau haneri kudui e a nana iluna o ka pa a iluna o na pahu laau a me na kumu laau, a ma na wahi kiekie a pau, a ma ka lima kekahi o na koa a me na kauwa e holoholo ana ma o a maanei.  Ku iho lalaua a nana ae la ma o a maanei i ka laua mea i makemake ai aole nae o laua nei i ike aku.

            A loihi ko laua ku ana, ike aku la laua iaia e hele malie ana oia ma ka pili pa malalo o ka malu o ke kukui e kokoke 'aku ana i kahi pouliuli o ke alanui a mawaho o kekahi hale inu bia, a malaila ku iho la oia a hoolohe aku i ka uwe mai o ka poe o loko, a ole nae oia i ike aku ia lakou, nolaila, neenee mai la oia a mamao iwaho.  O na kanaka hoi ike aku la laua iaia e ku ana ma kahi pouli, manao iho la lana o ka pono ia e hana ai i ka hana a laua i manao ai.

            Pane ae la kekahi o laua, o ko kaua wa keia, nau e paa kona waha, no ka mea, o kou na lima oolea, a na'u e hou kona puuwai i ka pahi.

            Ia laua e kamailio ana, o ka wa no ia i puka mai he eono kanaka, a huli pu ae la o Melina a komo aku la iloko o ka hale.

            Ku iho la laua nei a liuliu mawahi o a pane ae la kekahi, e komo paha kaua iloko a ilaila kaua e ike ai i ka kaua mea e haoa ai?

            Ae mai la kekahi a komo aku la laua.

            E noho ana o Melina ma kekahi pakaukau oia wale no a e inu ana he koaha bia, a o ko laua nei wa no ia i komo aku ai a noho iho la ma kekahi aoao o ke pakaukau a Melina e noho nei.

            Ia wa i pane aku ai o Melina, o kena mau noho e kia mau kanaka, no ko'u mau mau joa'loha ia, a o ka'u ia e kali nei o ko lakou hiki mai.

            Pane mai la kekahi, aole maua e liuliu, a pau ae no ko maua mau kiaha bia o ko maua hele aku no ia.

            Pau ae la no ka ianei pane ana a hoomau aku la no keia i ka inu ana i kona kiaha bia.

(Aole i pau.)

 

Lutanela Roge

K.F.

Kiu o ke Kaikuono

O MOBILE.

 

Ke Kiu a Adimarala Faragata

ihoouna ai e Ana a e hulii

na Topido ma ka Papaku o

ke Kaikuono o Mobile.

 

He Moolelo iloko o ke Kaua

Kuloko o ka Akau me

ka Hema.

 

            I ka wa a ka wahine kui o Mobile i haalele aku ai i ka hale o Edita, ua noho hookahi hou iho la ua kaikamahine nei iloko o ia mau hora aumoe e like me mamua, oia kana i hoopuka ae ai i keia mau olelo-

            "Noho hookahi hou no au iloko nai o ko'u hale mahope iho o ka makaikai ana mai o eha poe i hiki mai i keia ahiahi, oia hoi o Roge, Kapena Venona, Kapena Davikekona a me kela wahine kiu.  E hoomaikai ia na Lani no ke kiai a me ka hoopakele ana mai ia'u maluna o na haawina pilikoa loa a'u i kokoke ai e komo kino."

            Oiai ke kaikamahine e noonoo ana i kana mea e hana ai, ua lohe aku la oia i kekahi halulu waeae kapuai kanaka mawaho o ka lani, wehe mai la i ka ipuka a komo ana ke poo o kekahi negero, a ike aku la o Edita o kana kauwa no ia ma ka inoa o Josh, ua pane aku la oia i keia mau olelo-

            "Ha-lo, Josh!  Ua hoi mai nei oe i ka wa kupono.  Ua lohe anei oe i kakehi mea no Roge?  Eia oia iloko o Mobile nei i keia hora!"

            Ia wa ke kauwa negero i pane aku ai i kona haku wahine-

            "O!  Misa Edita, -wau hai oe kekahi nu hou kaumaha loa keia manawa."

            Ua holo ae la ka haalulu i ke kaikamahine no keia mau olelo a kana kauwa, a ua hiki iaia ke ike aku i kana nu hou e hai mai ana, ua loaa paha o Roge i na koa kiu.  Ua kau pololei aku kona mau maka maluna o Josh me ka hiki ole ke pane aku, a oia hou ka ua negero la i pane mai ai-

            "Kela manawa wau makemake pii ma ka hale nei, wau ike nui loa koa lawe akahi kanaka ma kela wahi Kenela Levieta.  Akahi aliikoa olelo, kela kanaka hopu keia po, iaia no pii mai kela moku Faragata kuu kela heleuma ma kela kaikuono.  Wau nana pono iaia maalo malalo kela kukui, a owau no ike kela Roge no, kela kanaka hele pu wau mawaho kela moana nana kela topido akahi po mamua.  Wau no ku loihi mawaho a hiki kela manawa lakou lawe hou iaia no kekahi wahi, hele no li kela Roge keia kakahiaka."

            "He mea kanalua ole ia no ko lakou li ia Roge," wahi a ke kaikamahine i pane aku ai i kana kauwa.  "Ke loaa ole kekahi mea nana e akeakea ko lakou hana ana pela.  Ihea ka lakou wahi o ka lawe hou ana aku iaia?"

            "Kela wau aole maopopo.  Wau no hoi koke mai ma ke hale nei hau kela nu hou kaumaha," wahi a Josh i pane mai ai.

            "E imi ana au iaia i keia po," wahi a ke kaikamahine i pane aku ai me ke ku pu ana ae iluna a hoopuka hou iho la i keia mau olelo-

            "Aole loa e make o Roge ma ke kupuka kaula li kanaka a na koa kipi o ka Hema, ina he mea hiki ole ia'u ke akeakea aku no ia make manoino a me ka hanohano ole okekahi kanaka ma keia ola ana."

            Ua halele iho la o Edita ikana kauwa negero ma ka @mi nui a komo aku la maloko o kona @mi moe, komo iho la oia i ka lole kane o na aliikoa o ke Hema ma kada huakai imi o ke ola no kana ipo aloha, oia o Lutanela Roge.

            "Akahi wale no keia Edita Taila ma kela ao holookoa, oia no kela haku wahine oluolu loa wau," wahi a Josh i pane hou ae ai iaia iho, a noho iho ia oia a kali no kona haku wahine i komo aku la iloko o kekahi @mi.

 

KE KAIKAMAHINE WIWO OLE MA KE ALA O KA HOOPAKELE

            He wahi manawa polole aole i oi aku mamua o umi minute, ua komo hou mai la Edita maloko o ka rumi a Josh e noho ana me kona aahu koa o ke aliikoa kipi o ka Hema.  Ua komo mai kona mau lima iloko o na mikina-lima, a me kekahi wahi umiumi uuku ma kona lehelehe, me kekahi apo ili ma kona ouhaka me ka pahikaua, he mea hiki ole ia i ke kanaka malihini ke hoomaopopo aku i kona ano wahine, a oia ka Josh i hoopahaohao loa ia ai no keai mau hana ano e a kona haku wahine, ua pane aku la oia me keia mau olelo-

            "Bai-Gole!  Wau kuhihewa oe ka naka okoa kela manawa puka mai maloko kela rumi," wahi a ka negero me kona mau manao o ka puiwa me ka pihoihoi.  "Oe aole hele like pu kela lole koa keia po?"

            "Aole au e komo i keia lole koa ina aole au e hele ana ma kekahi huakai i keia po," wahi a ke kaikamahine i pane aku ai i kana kauwa negero.  "E hele ana au e huli i kahi i lawe ia aku nei o Roge, a ina e loaa aku ana oia ia'u iloko o na minute hope loa no kona li ia maluna o ka amana, e hoao ana au e haaei aku i kekahi kokua ina he make ke mea e ukali mai ana ia'u mahope."

            "O!  Wau no ike nao- Misa Edita.  Wau no kauwa negero oe, hiki hoolohe pau loa manawa kela kauoha hele pu oe keia huakai imi no kela Roge."

            "Aole au i makemake ia oe e Josh e hele pu me a'u ma keia huakai i keia po," wahi a ke kaikamahine i pane aku ai.  "Aka, e noho malie oe i kiai no ka hale nei.  I na oe e hele pu m@ a'u, mahope au ike ia, no ka mea, ua kamaaina na poe o Mobile nei ia oe he kauwa oe na'u."

            "Oiesa!  Wau poina no kela.  Ia lakou no ike koke oe ina wau hele pu ma kela aoao oe.  Wau noho malie ma ka hale nei hiki kela manawa oe hoi mai, a ina kekahi kanaka kolohe pii mai, ia Josh no hanahana eha loa kela kanaka makemake kolohe."

            "Ae, a e makaala loa oe maloko nei a mawaho o ka hale, oiai, eia no he mau kiu ke hoohalua nei mawaho," wahi a ke kaikamahine i pane iho ai i kana mau olelo hope i ka negero a puka aku la iwaho a nalowale iloko o ka pouli.

            I ka wa a ke kaikamahine i haalele aku la i kona home, oia ka manawa like a ke kiu wahine o Mobile e hai nei i ka moolelo o Roge ia Kenela Levieta, i kona wa i ike ai iaia mai ka uwapo mai.  Ua hiki iaia ke hooiaio aku, aia he waapa no ke kiu Amerika ke lana la ma kai o kahakai i keia minute, a oia ka Levieta i hoouna mai ai i kona Elele e hele pu me ke kiu wahine a imi i ka oiaio o keia mau lono.

            Ua hoomau aku ke kaikamahine opio i ka hele ana imua me na kapuai awiwi, ma ke alahele e hiki aku ai ike kahua hoolulu mana kaua o Mobile mala'o o Kenela Levieta, a malia o halawai aku oia me kekahi heluna kanaka nui e kamailio ana no ka loaao ke kiu Amerika i keia po ma ke kulanakauhale, a oia auanei kana e ninau aku ai i kahi i lawe ia ai o ua kiu Amerika la.

            O ka ia nei mau kuko ana pela, ua haule wale kona mau nanaolana ma ka halawai ole ana me kekahi anaina kanaka o ia ano a hiki wale i ko ia nei wa i kaalo ae ai mawaho o ke kahua hoolulu kaua o Kenela Levieta, ua ike aku la keia i kekahi poe aliikoa e kuku ana mawaho o ka lanai o ka hale a puhi i ko lakou mau kika, a o ke kukui nui e kau ana ma ka ipuka pa, ua wehe ia ae la ke poi o mua a lele ae la kona malamalama i ke alanui a ahuwale ke kaikamahine wiwo ole e iho aku nei ma kona alahele, oia kana i lohe aku ai i ka leo o ke koa kiai i ke poha ana mai me keia mau olelo mua-

            "He-lo: Ua ike aku la au ia oe, he aliikoa e iho ala ma ke alanui."

            Ua lohe aku ia o Kenela Levieta i keia hoopuka ia ana ae he aliikoa mawaho o ka pa, oia kana i haawi mai ai i ke kauoha-

            "E kahea aku i kela aliikoa e komo mai."

            Ua poha hou mai la ka leo kauoha mai ke koa kiai puka mai me keia mau olelo-

            "Ua makemake ia oe e ka Alihikaua Nui e kela aliikoa e iho ae la ma o e komo mai."

            I ka wa i haawi ia mai ai o kela olelo kauoha i ke kaikamahine, ua ike iho oia nona iho, e loaa pono ana oia i keia manawa, a he kiu maopopo oia ma ke ano apuka i ke komo ana i ka lole kane o na aliikoa o ka Hema ke ike pono ia oia.  Aole oia i kuihe, a aole hoi i kanalua, aka, o ka haalulu ka mea i pii ae ma kona kino a e kapalili ana kona puuwai e like me ka hele ana a ke sekona, oia kana i hapai ae  ai i kona mau lima ma ka umauma a hoopuka ae la i keia mau olelo iaia iho me ka leo mama,-

            "E akahele hoi oe ia'u e kuu puuwai.  He huakai imi keia o ke ola no ka hoopakele ana i ka'u kane-ina he make ka haawina i hoomakaukau mua ia no ko'u halawai aku."

            Aloha ino keia mau huaolelo a ke kaikamahine i pane iho la i kona puuwai, e kauoha iho ana iaia e akahele hoi kana mau kikoni ana i kona mau manao o ka pihopihoi, oiai oia ma ke alahele o ke aloha kane e haawi aku i kekahi kokua, ina he mea hiki i kona mau lima ke hopu aku, a i kona wiwo ole hoi ke hoohana.

            Aole e hiki ia Edita ke pale a hookuli i keia kauoha, a o ka mea pono wale no ana e hana ai, o ka hooko aku e komo iloko o kela hale.  Ua komo io aku la ua kaikamahine opio la iloko o ka ipuka-pa a hiki i ka lanai o ka hale, e ku ana kekahi aliikoa konela ma ka puka-komo, ua pane mai la oia i keia mau olelo o ka hoolauna-

            "E komo mai iloko nei e ke Kapena.  Ua makemake ka Alihikaua ia oe e lawe i kekahi kauoha, oiai, o kou hiki ana mai nei i keia po, he kokua nui loa ia ma ka aoao o ka Alihikaua iloko o keia mau hora o ke aumoe."

            Aole i pane aku ke kaikamahine oiai kona mau maka i nana aku ai i ka makena o na aliikoa e kuku ana mawaho o ka lanai, aka, ua haawi aku oia i ke ano aloha o ka oihana koa me kona lima akau, a komo loa aku la keia iloko o ka rumi nui i hoopiha ia me ka malamalama o ke kukui, a ike koke aku la no oia ia Kenela Levieta e kakau ana ma ke pakaukau, ku iki iho la oia malaila no kekahi mau minute pokole a hiki wale i ka wa a ua elemakule la i alwa ae ai iluna a nana pololei mai la i ke kaikamahine

            "E kala mai ia'u, e ke Kapene.  O kou inoa, o, o, o---------"

            "O Kapena Rikeke Buluka, malalo o ka hooko kauoha no kekahi hana i keia manawa," wahi a ke kaikamahine i pane aku ai me na kikoni ana a ka alapine e kapalili nei ma kona puuwai.

            "I ka wa hea kou komo ana iloko o ka oihana koa?"  wahi hou a Kenela Levieta i pane mai ai.

            "I ka mahina aku nei o Aperila i hala."

            "Pela no ka'u i manao ae nei ma o kou mau helehelena opiopio a me ka malihini--ha, ha, ha," wahi a Levieta i akaaka iho ai me ka haalo'ulo'u a pane hou mai la i ke kaikamahine-

            "Alaila, aole oe i honi mua i ka uwahi o ka pauda, ea?"

            "Aole," wahi a ke kaikamahine me kona hoopapa ana ae i kona umiumi e kau ana ma ka lehelehe.

            "Wele----e oluolu anei oe e ke Kapena e lawe i ka'u palapala kauoha ia Ilamuku Noutana ma ka halepaahao?"

            "Ae, me ka oluolu."

            Lalau iho la ua elemakule nei i kana peni a hoomaka aku e kakau, huli hou ae la'i ke kaikamahine a pane mai la,

            "O ko'u inoa, o-------- o wai la hoi?"

            "O Kapena Rikeke Buluka," wahi hou a ke kaikamahine i pane aku ai a alawa ae la oia ma kekahi aoao o ka rumi, e nana pono ia mai ana kona ano e kela poe aliikoa e ku ana mawaho o ka lanai.

            (Aole i pau.)