Ka Nupepa Kuokoa, Volume XXVII, Number 41, 13 October 1888 — Page 1
| This text was transcribed by: | Lynn Mangel |
| This work is dedicated to: | MacKenzie and Kendall Mangel |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXVII, HELU 41. HONOLULU, POAONO, OKATOBA 13, 1888.
HOOLAHA LOIO -
W. O. SMITH.
Loio ma ke Kanawai.
Helu 66, Alanui Papu, Honolulu. 1y 4- 1y
W R. KAKELA,
LOIO A HE KOKUA MA KE KANAWAI
He Luna Hoolalo Palapala,
tf
WILDER & CO. (WAILA MA.)
Mea kuai papa a me na lako kukulu hale na ano a pau, a ma na me ne pono a pau no ka hale.
Kihi Alanui Moiwahin me Papu. tf
CECIL BROWN,
LOIO A HE KOKUA MA KE KANAWAI?
@ Agena Hoolalo Palapal no ka Mo kupuni o Oahu
KEENA HANA: Ma alanui Kelepa.
tf.
W. A. KINNEY, (Kini.)
LOIO.
Keena hana ma ke Keena o J. A. Makuna,
2168 Helu 42 Alanui Kalepa. 1y
A ROSA. (AKONI.)
LOIO A HE KOKUA MA KE KANAWAI.
He Luna Hoolalo Palapala.
KEENA HANA: Ma ke Keena Loio Kuhina
tf.
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hoolalo Palapala.
E hana ia no na Palapala Kuai, Palapala Hoolimalima, a me na palapala pili kanawai e @e ma ka olelo Hawaii. Dala no ka hoaie ma ka moraki ma na waiwai paa.
KEENA HANA: Alanui Kalepa.
VOLNEY VAILLANACOURT ASHFORD,
AKEPOKA,
He lolo, Honkaka, Pale ma k Kanawai Kakauolelo, Lunahooponopono a me ka hana ana i na Palapala Hoolilo.
LAWELAWE ILOKO O NA AHA A PAU O KE AUPUNI.
E hana ia no na Palapala pili Kanawai a pau.
@ Keena Hana Helu 21, Alanui Kalepa, Honolulu Hale. (2150 1y)
WILLIAM C. ACHI.
Loio a he kokua ma ke kanawai imua o na Aha a pau o keia Aupuni.
He Mea Ana Aina a he Roroka ma na waiwai paa.
Keena Hana, Helu 15, Alanui Kaahumanu Honolulu, oia ke Keena mua iho nei o Kin me Peterson. 2114-@
JOHN MAHIAI KANEAKUA.
LOIO A HE KOKUA MA KE KANAWAI. HE MEA UNUHIOLELO MA KA OLELO BERITANIA A ME KA OLELO HAWAII.
Keena Hana, maluna ae o ka B@ Bihopa ma.
1 yr.
PACIFIC HARDWARD COMPANY
Na hope o Dilinahama Ma.
Mau Mea Kuai Lako Hao
Alanui Pa@. Honolulu
HOOLAHA.
G. W. A. HAPAI.
He Luna Hook@ Mare.
A HE
AGENA HOOIAIO PALAPALA.
E loaa no ma Hilo-taona, Hawaii, ma na manawa a pau. 2152-1y
E G. HITCHCOCK.
(AIKUE HIKIKOKI).
LOIO, A KOKUA MA NA MEA A PAU E PILI ANA MA KE KANAWAI.
E ohi la no na Hila Aie, me'ka awiwi HILO, HAWAII. 2114-1yr.
GEORGE P. KAMAUOHA.
He Loio a he Kokua ma ke Kanawai.
A HE MEA
ANA AINA.
E loaa no ma Kohala Akau, Hawaii.
2091-1yr
HE KAAO
NO
HAPAIKALA-
Hapaikamahina
KA HUA OHIA NANI
I LOAA MA KA
Piko Maunao Farani
Ka Ui nana i Kakele ke Aupuni o ka Lihilihi o na Manu.
I Kokua ia e HULUPAINA Kona Pokii.
Unuhi ia e H. Kane
HELU 3.
A EIA ka'u kauoha hope loa i@ o@, e hooko pololei oe i kau mau kuhikuhi a pau, alaila e loaa no ia oe he pomaikai, aka, i na aole oe e hooko ana, alaila, e lilo aku ana oe i keiki ilihune loa a hiki i kou hopena.
Pane aku la keia, he minamina wau ia oe, no ka mea ua make kahiko no oe, a he mea menemene hoi ia ia'u, no ka hooko ana aku i kau mau kuhikuhi ia'u. Oiai aole i hanau mai kou makuahine ia'u, i mea e hoopoino wale aku no i ka mea a ke Akua i hana mai ai.
Iloko o ka wa a laua nei e kama lio ana, ua kokoke loa ae nei ka manawa o na makua e hoi mai ai i ka hale, ua no noi aku nei o Hapaikala Hapaikamahina i ka lio, e oluolu oe e nookuu mai oe ia'u e hoi, oiai ua kokoke loa e hoi mai ou mau makua, oia he huhu loa laua ia'u i ka hele mawaho nei, a ina paha laua e ike mai ana ia'u mawaho nei, heaha la ka laua mea e hana mai ai maluna o u, ua papa loa mai laua ia'u aole e hele mawaho neime ko laua ike ole mai ia'u, aia no he manawa no kaua e hui hou ai mawaho nei, ua ae mai la ka lio i ka ia nei noi, me ke aloho pu ana mai ia ia nei, a pela no hoi keia i panai pu aku ai i kona aloha, i ka lio, a ua kaha aku la ka lio hele no ke alahele i maopopo ole i ke keiki, a o ke keiki hoi, ua hoi iloko o kona rumi, noho iho la oia iluna o kona wahi noho laau, me ka noonoo ana i na olea ka lio, me ke ano o ka hiki ana i kela lio ke kamailio me he kanaka la, iaia no e noonoo ana, ua hoi maila na makua a hiki i ka hale me ka miki ana aku no hoi e nana i ka laua milimili, a he mea mau no hoi ia laua i ka hele ana me ka hoi ana, ka hele mau e kilohi i na helehelena o ka laua lei.
Hoomakaukau mai la hoi na makua i ko lakou paina ahiahi, @ i ka makaukau ana ua naue aku la lakou nei no ka papaaina, a i ka pau ana o ka lakou paina ana, ua hoi aku la lakou hiamoe, a i ke ao ana ae, ua ala e la na makua a hele aku la e hoomakaukau i ko lakou paina kakahiaka, a i ka pau ana o ka lakou paina ana, ua hele aku la na makua no ka laua apana hana pakah@, i hoike mua ia aku ma ka helu i hala.
A o ke keiki hoi ua noho iho la oia no ke kali ana i kona ho@, oia hoi ka lio, a i kona hiki ana aku ma kahi a laua i ku mua ai, e ku mai ana ia lio, me ke aloha pu ana mai o ka lio iaia nei, pela no hoi keia i panai aku ai i kona aloha kakal i@ka i ka lio.
Pane mai la ka lio ia Hapaikala Hapaikamahina, o ka wa kupono keia au e hooko mai ai i kau apana hana, i loaa ai he pomaikai ia oe ma keia mua aku, i pane hou aku ai ka lio, aka, ina ua nele oe i ka pahi, ka mea e hiki ai ki hana; alaila, e pai oe ma kuu pepeiao aku, a i oili mai he pahi Kaimana, a o kau pahi ia e pepehi mai ai ia'u, a i pau kau hana ana maluna o ku'u kino, alaila e huna aku oe i kuu kino ma kahi au i kuhikuhi aku ai ia oe, me ke na pahi pu kekahi, oia aohe waiwai o ke na pahi, a o ka wa kupono keia nou e hooko mai ai i kau apana hana.
I ka pau ana o ka ka lio mau kuhikuhi iaia nei, i ko ia nei manawa no ia pai aku ai ma ka pepeio ak@ o ka lio, a o ka wa no ia i oili mai ai o ka pahi, me kona hopu ana iho a paa ma kona lima, hoomaka aku la keia e hooko e like me ke kuhikuhi a ka lio, ia wa i lalau aku ai keia i ka lio a hoohina i lalo me ke kau ana iho i ka pahi maluna o ka opu o ka lio.
Aka, iaia i hoomaka iho ai e oki ma ka opu o ka lio, ua ike aku la keia i ka haloiloi mai o na waimaka o ka lio, ua hooki kike ae la keia i ke oki ana iho i ka opu o ka lio, pane e maila me ka lio.
Mai menemene oe ia u o nele oe i ka pomaikai, o keia mua aku e hiki mai ana, ma keia mua aku, a e ike ae nou oe i ka pololei o ka'u mau mea i kuhikuhi aku ai ia oe.
Pane aku la ke keiki, he aloha a'u ia oe i ka haloiloi mai o kou mau waimaka. Pane mai la ka lio, mai nana oe ia mea, pane hou aku la keia, e moe hoiha kou mau make. Ua ae mai la ka lio
No ia olelo a ka lio, ua hoomaka aku la keia e hooko e like me na kuhikuhi a ka lio.
Pepehi iho nei keia a make ka lio, hoomaka aku nei keia e ohi i i na mea i kuhikuhi ia mai ai e ka lio, ke koena iho o na m@ a i koe, ua kanu aku la keia ma ka hikina o ko lakou wahi hale.
I ka pau ana o kana mau hana me ka ike ole o kona mau makua, i keia mau hana a ka laua keiki, ua hoi aku la keia a loko o kona rumi, a iaia no hoi a komo iloko o ka rumi, komo ana no hoi na makua, a hoomakaukau mai la i ko lakou paina awakea, a i makaukau ana, ua naue aku la lakou e paina, a i ka pau ana o ka lakou paina ana, ua hoi aku la lakou a loko o ka rumi hokipa, a i ko lakou noho pono ana iho, ua pane aku la ke keiki i mua o ka makuakane.
Ia oe e kuu makuakane, i na he mea oluolu ia oe, a me mama, ka hookuu ana mai ia'u no ka hele holoholo ana aku maloko o na ululaau, no ka makaikai ana aku i ka nani o ko kakou home ku@hiwi.
Ua ae mai la ka makuakane i ke noi a ka laua keiki, me ka haawi pu ana mai i ka manawa e hele ai a hoi mai, he eha hora, aole hoi e oi aku mamua oia manawa.
No ka ae ana mai o kona makua i kana noi, ua olioli loa iho la keia, a ua hoomakaukau iho la keia no kona hele ana aku i ka holoholo, i ka makaukau ana, ua hele aku la keia no loko o ka ululaau, a iaia i mamao aku ai mai kauhale mai, oia hoi ma kana hoomaopopo ana iho, he kanaha anana kona kaawale, oia kona wa i hoomaka ae ai e wehe i ka iwi kuamoo mai loko ae o kona poli, a paki iho la i lalo o ka honua, i ka paa ana iho o ka iwi ilalo o ka lepo.
Me ka hikilele oia i ike aku ai, i kekal@ lio nani e ku mai ana imua o kona alo, i lako pono me na mea hololio, me ke hiehie nui oia e ka ana, me ka haa ana i-o i a nei.
No ko ia nei piha i ka @lihia, n@ lai'a, aole hiki ia ia nei ke pane aku, aka, ua pane mai la ka lio iaia nei, E kau mai maluna o'u, no ka lawe ana aku ma kau wahi i makemake ai, aole keia i pane koke aku i ka ninau a kona lio, no ko ia i ei pane koke ole aku, ua pane hou mai la ka lio, e kuu haku, mai kanalua a makau hoi, e kau mai maluna o @'u h@kua, no ka lawe ana aku ma kau wahi i makemake ai.
Ia wa i hele aku ai ka kakou kamalei a kau iluna o ka lio, i ko ia neio hoomaka ana aku e kau, ua kukuli iho la ka lio ilalo, a kau keia iluna, ua ala hou ae la ka lio mai kona kukuli ana, a pane mai la, e kahe iho i kuu ino me ka hai pu ana iho i kau wahi e makemake ai. Hopu aku la keia i ke kaulawaha a paa pono, kahea iho ia keia i ka inoa o ka lio, e Kapaai Keleawe e lele kaua no ke kulanakuahale o Farani, me ka apu ole o ke-o o ko mau ka, puai a haule kaua@i Farani.
I lawa no a pau ka ia nei kahea ana o ka hoomaka aku la no ia o ka lio e lele, he p@ha ana kai ka honua, he kani ana hoi o ke-o ka i ka lewa.
Ia laua nei e lele ana a kokoke i ke kulanakauhale alii o Farani, ua ike mai la ke kaikamahine alii, @ia o Rose A@aa, i keia moa @@ iluna o ka lewa, me ka pane ana iho iaia iho, heaha la hoi kela mea ano e, akahi wale no hoi a@ a ike i kela mea ano e, mai ko'u wa uuku mai a nui, heaha la h@ kela mea, iaia no e noonoo ana, ua nalo aku la mai kana ike ana aku.
E waiho kakou i ke kaikamahine alii e noonoo ana no kana mea i ike ai, a e hu i ae kakou a nana ia Hapaikala Hapaikamahina me kona lio.
Ia laua nei a haule i kai o kulanakauhale, me ka pau ole o ke o o na kapuai o Kapuai Keleawe, ua haule iho la laua nei ma kahi mehameha mawaho mai o ke kulanakauhale ua lele iho la keia a haule i lalo, a me ka pane ana aku i ka lio.
E Kapuai Keleawe ina, he mea hiki ia oe ke hoololi ae i kou ano a i kino pupuka, a o ke kino hoi ia a kaua e hele aku ai kai o ke ku anakauhale e makaikai ai?
Ae maila hoi ka lio, o ka wa no ia i loli ae ai ke kino o ka lio mai ka mai kai a ka pupuka, a hoomaka aku la laua nei e hele i loko o ke kulanakauhale ia laua nei i komo aku ai iloko o ke kulanakahale, me ka hele makaikai ana mao manei, a o ka hana hoi a ke keiki o ka mahalo i ka nani o ke kulanakauhale, me ka pane ana iho iloko ona, he kanaka no ka hoi ko keia wahi, i kuu mau makua hoi, aohe kanaka o keia wahi. (Aole i pau)
NA MAKAI KIU
O
Amerika a me Europa.
HE LEI DAIMANA I AIHUI IA ME KE AKAMAI LOA.
MAHOPE iho o keia hoohoka ia ana o'u, heaha la ka'u mea e hana hou aku ai? Noonoo iho la au no keia mau mea a hooholo iho la au o ka pono wale no o ko'u hele koke e imi ia Miss Guoni, ka makai kiu wahine a'u i kauoha ai e halawai me a'u ma Cologne nei, a mahope o ko'u huli ana iaia no kekahi manawa loaa aku la oia ia'u ma kekahi o na hotele o loko o keia kulanakauhale. Hai aku la no hoi au iaia no ko'u hoohoka ia ana - o ka wahine wale no ka i loaa, a o ke kane hoi, ka mea i manao nui ia e hopu, ua heo; a mahope o ko maua noonoo like ana no kekahi manawa hooholo like iho la maua e holo oia no ke kulanakauhale o Calais, ma Farani, a owau hoi no ke taona o Cuxhaven, a i hooholo maua no ia hana pela me ka manao o ke kumu wale no ia e hiki ai ke ike ina ua mahuka aku ua kolohe la no Enelani a i ole no Amerika paha, a ina eia no paha oia ma kahi o na mana i waiho ia mai ia'u e hiki ai ke hoohana aku. Ma keia hana ana a'u pela, ua hiliani au maluna o ko'u laki no ka paa aku o ua kolohe la mamua ae o ko'u akamai huli maoli.
"Aole i hala na la elua o ko'u noh ana ma keia taona, loaa iho la ia'u na kumu kupono e hooia iho ai ua holo aku ua haku nei no ka mokupuni o Heligoland, he wahi mokupuni uuku keia iloko o ke Kai Akau, ma ka lema o Holstein; a aole hoi oia wale, aka, loaa mai la ia'u kekahi palapala mai ia Miss Guoni mai, e i m@i ana ua ike oia i kekahi o na pupu daimana i ike ia maluna o ka lei i aihue ia ai ma Napela e ua haku nei me ke kaikamahine, a o kona wahi i ike ai maloko o ke kulanakauhale o Parisa ma Farani, a e hai pu mai ana ua hai ia aku oia i ke ano a me na helehelena o ka mea nana i kuai aku i ua mau pupu daimaua noi, a o na ano a pau i hai ia aku iaia ua kulike loa me ko ke kaikamahine a 'kuu haku, a o ua kaikamahine nei i keia wa ua hoea aku oia ma Calais a holo loa no ke kulanakauhale o Dover. I ko'u lohe ana i keia, hoouna koke aku la au i leta i ua makai kiu wahine nei e papa aku ana aole make uhai i ua kaikamahine la, oiai aole o'u manao e haalele mai ana oia ia Europa, no ka mea, he manao ko ua kaikamahine la i keia wa ua palekana laua, a o ka'u mea wale no i makemake ai iaia e hana aku ano o ka huli ana i na wahi a pau e hiki ai iaia ke huli i na pupu daimana, ko lakou wahi i kuai ia aku ai, a pela aku. I ka pau ana o keia mau kuhikuhi alu, hoouna aku la au i ka leta i ko'u kokua, a kau koke iho la no au maluna o ka mokuahi e holo ana no ka mokupuni o Heligoland.
"Mamua ae o ko'u hahai ana aku i ka'u mau mea i ike ai a i hana ai ma laila, he mea pono ia'u ke hoakaka iki aku no kekahi mau mea e pili ana i ka mokupuni o Heligoland. O keia wahi mokupuni, aole ia he mea e ae he pohaku nui ulaula wale no i hoopuni ia e ke kai, he wahi kuanea a i ahona iki i na wahi laau kakaikahi e ulu ana a puni kahi hotele i kukulu ia malaila a i kapa ia ka 'Old Post.' Aka, he wahi makemake nui ia nae keia e na mea a pau no ka hoohala manawa ana, oiai he oluolu maikai na ea, he hu hui kupono ke kai no ka auau ana, a i keia wa a'u i hoea aku ai malaila o kekahi ia o na wahi auau o na ano kanaka paikini a pau mai Enelani mai. He mea maa mau ma na wahi kuaaina a pau e like me keia, no ka nele i kahi mea hou ole, nolaila, ina he la ku aku no ka moku malaila, ua lilo iho la ia me he la nui la, a ke iohe ia ae ke kani o ka pukuniahi (o ka hoailona iho la hoi ia ke ike ia ka moku) uoki oe i kela a me keia e kaoo ana no kahi kumoku, o na kane, na wahine a me na keiki, mai ka opiopio a ke oo, e ake ana o ka ike aku i na ohua e ku mai ana. No keia kumu, ke hiki i ka wa ku mai o ka moku, o kahi alahele mai ka hotele mai a hiki i kahi kumoku, he kupono loa ia ke kapa ia o kahi alahele kualehelehe, oiai n@a keia wahi e lohe ai oe i na ano kamailio a pau, mai ka nema a ka pai, e pili ana no na poe i hiki hou mai. I kapa au ia inoa no ua wahi nei pela, no ka mea, ua kokua nui loa ia au ma ka'u huli ana i keia kolohe mamuli o ka'u mau mea i lohe ai nona ma ua wahi nei.
"I ko'u hoea ana aku ma ka hotele o ka mokupuni o Heligoland, aohe o'u makemake e hoohuahualau ia mai ko'u ano, a oiai au e kakau ana i ko'u inoa ma ke ano he kanaka kalepa mai ke kulanakauhale mai o Berlin, malalo o ka inoa Werner, ua huli malu iho la au me ka ike ole ia mai no na inoa kapakapa o ua haku nei, a aohe o'u ike iki maloko o ka buke inoa o ua hotele ia i kekahi o na inoa a'u i maa ai i ua haku i ei i ke kakau ma ke ano o kona inoa ponoi ia. I ka loaa ole ana ia'u, aole au i hoonele ia mai i ka manao ikaika no ka huli ana aku, oiai ua noonoo iho la no au ina no ua hiki ua kolohe nei maanei he hiki no iaia ke lawe mai i inoa okoa aku a kakau maloko o ka buke ma ke ano o kona inoa ponoi ia. (Aole i pau.)
NA MATERIA HOOHENO O KE KAIHAWANAWANA.
E ka NUPEPA KUOKOA - Aloha oe:
E oluolu hou mai oe ia'u e kuilima pu hou aku me oe, a nona hoi keia mau wahi hooheno ana malalo iho nei.
Ua pau ke Kamipulu.
Ma na la e aui nei o keia malama, ua ike ia ka makaala, me ka eleu, a me ka hoihoi o ka makamaka maikai William Hookuanui Esq, ma ka hoomaemae ana i ka Hale Leta kahiko loa o Kawaihae nei, oia hoi, ua meamea maoli kona mau paia a pau, a he hale kuai kahiko loa no hoi mai na (Bos) mua loa mai.
Aka i ka noho ana mai o ka mea hoihoi ole i ke (Kamipulu,) ua ike ia aku no ka hoi la, he maemae, a he hiehie, o ka wa pono paha keia: Oiai, ma ka ike ia ana ma na nupepa o kakou, e laikini ia aku ana ka mai naua ana i ka i'a ma keia hope aku. Nolaila, eia ka pane a kekahi poe, O ka wa pono paha keia."
Nui hewahewa ke kawakawa i lawe ia mai i Kawaihae nei, mai na Kaha mai, e kuai ia, aole nae i pau ma kela pule i hala, ua piha ke tausani a oi.
Ko ka Moi hiki ai a mai.
Ma ke ahiahi o ka la 19 o Sepatemaba, hora 5, p m. ua ike ia aku ka huini ana mai o na kia o ka mokuahi aukai ke "St@. Kinau, me ka hae Hawaii e welo ana maluna o kona kia, eia ka o ka lani Kauhlua, ua kau mai ke Alii ka Moi maluna o ka haapa o Hon. Samul Parker, a i ke kaa ana ae mawa ho pono o ka uapo, ua haawi ia aku he ekolu huro ana A ua huli hoi loa aku no ka Home Hanakahi.
Mau mea hou ia o kuaaina nei, THOS. S. K. NAKANELUA,
Kawaihae, Hawaii, Sept. 21, 1888.
Lutanela Roge
KE
Kiu o ke Kaikuono
O MOBILE.
Ke Kiu a Adimarala Faragata i hoouna ae e Ana a e huli i na Topido ma ka Papaku o ke Kaikuono o Mobile.
He Moolelo iloko o ke Kaua Kuloko o ka Akau me ka Hema.
KE KAIKAMAHINE WIWO OLE MA KE ALA O KA HOOPAKELE.
I KA WA a ke kaikamahine e hele nei ma ka aoao o kana pio ma ke alaloa, iloko o keia mau hora pouli o ke aumoe, me na hoomanao ole ana a Roge no kona hopena, e mauna aku ana ke kaikamahine opio i hoopepe ia ka manao malalo o ke aloha kane, oia ka Edita i nee aku ai a mahope o ke kua o kana ipo, pa'i iho la ma kona poohiwi me ka pane ana iho -
"Roge! Aole anei ou hoomaopopo mai ia'u?
Na kela leo palupalu o ka wahine i hoopuiwa aku ia Roge, a haupu koke ae la oia no ke kaikamahine, ua pane hou aku la oia i keia mau olelo me ka hoike pu ana aku iaia iho -
"Owau no keia o Edita - malalo o ke aloha kane no ka hoopakele ana ia oe!"
Ua lele koke aku la o Roge a hopu i na lima o ke kaikamahine, a no kekahi mau sekona pokole i hala ae, ua pane aku la oia -
"Ae, he huakal keia au no ka hoopakele, - a ma kahi olelo ana - he kuakai keia au iloko o ka pilikia nui e niki ai ke uku ole ia ka hoopai no kekahi waiwai mawaho o kou ola ponoi. I keia manawa e Edita, ke lawe nei au ia oe i hoaloha oiaio loa no'u iloko o keia ao, a na ka la mahope iho o ka maluhia o ka aina o ka hae kahiko au i aloha nui ai, - e hoohui ia ai kaua i hookahi."
Me na helehelena o ka hauoli a me ka pu@ o ka honi, ua haawi like ae la laua i na kokohi iini o ka puuwai iloko o ka lawe lai malie ana a ke aloha o ka ipo iloko o ke aloha kane a me ke aloha wahine. Ua haki no.
MOKUNA V.
KA MAKE ANA O KE KIU WAHINE O MOBILE
"Eia kaua i ka hapalua like o ke alahele e hiki aku ai i ke kahua hoomaha o Kenela Levieta," wahi a ke kaikamahine i pane aku ai ia Roge, "a he mau manao ko'u o ke kanalua, ina e ukali ia mai ana kaua mai ka halepaa@ ao mai. E kipa aku kaua ma keia wahi alanui."
"Aole au e hiki ke hoi hou i kou hale i keia po," wahi a Roge i pane aku ai i kana ipo, a iloko o ia manawa like i kaalo ae ai ke kiu wahine o Mobile mahope o laua.
Akahi no a huli hoi ua kiu wahine la mai ka uwapo mai, ma kana huakai hooiaio i ka Elele a Kenela Levieta, a oiai ke kiu wahine i lohe ai i na olelo p@hoihoi a Roge i hoike @ua ia ae nei, ua pee iho la oia malaila a kali no ka hopena.
"He oiaio, aole au e lawe ana ia oe no ko'u home no kekahi wahi okoa ae, i oi aku ka maluhia a me ka hiki ole i kela kiu wahine ino o Mobile ke huli ia oe a loaa."
"A! O kela kiu wahine o Mobile," wahi a Roge i puana ae ai. "Ua makemake loa au e halawai koke me ia i keia po."
Ua lohe maopopo aku la ke kiu wahine i keia mau olelo, he makemake ko laua e halawai me ia, oia kana i puana ae ai meka leo malie-
"Aha, ua ana mua ka ka pahukupapau no'u e hookomo ia ai i keia po! E ukali ana au ia olua a hiki i ko olua wahi e pee ai."
MA KE KAUOHA.
KEENA KALAIAINA.
I kulike ai me ka Pauku 1, Mokuna XXVI, o na Kanawai o 1888, ua koho ia na keonimana malalo iho ma kahi o ka Papa mua, i Komisina no na Ala Liilii a me na Pono Wai ma ko lakou mau Apana iho:
HAWAII.
Hilo……………………………..C. E. Richardson
Kau………………………………J. H. S. Martin
South Kohala………………………Z. Paakiki
North Kohala…………………….E. C. Bond
Hamakua…………………………..R. A. Lyman
MAUI
Wailuku………………………………..Eugene B@l
Hana………………………………….S. W. Kaai
Lahaina…………………………………M. Makalua
Kaanapali……………………………….J. A. Kaukau
MOLOKAI.
Molokai…………………………………D. Kailua
OAHU.
Koolaupoko…………………………….G. Barenaha
Koolauloa………………………………J. Kaluhi
Waialua……………………………….S. N. Emerson
Ewa me Waianae………………………J. Kekahuna
JONA AUSTIN,
Kuhina Kalaiaina no ka Manawa.
Keena Kalaiaina, Oct. 4, 1886.
2201-3t
HOOLAHA KEENA KALAIAINA.
Ke hoolaha ia aku nei ka hoolohe ana mai o na kanaka a pau i loaa ke kuleana Luna Hooiaio no na Palapala, i ke Kanawai i kapaia "He Kanawai e Hoomaopopo ai i na Moolelo e mala ma ia e na Luna i hoomana ia e Hooiaio i na Palapala," i aponoia i Iulai 4, 1888. E hoopai ia no ka mea e hooko ole ana i keia.
LORRIN A. THURSTON,
Kuhina Kalaiaina.
Keena Kalaiaina, Sept. 22, 1888.
2200-3t
KUAI O NA AINA AUPUNI.
E KUAI ia aku ana ma ke kudala akea mamua iho o ke alo o Aliiolani Hale, i ka hora 12 awakea o ka Poakolu, Okatoba 17, 1888, he elua mau aina aupuni ma Kona Akau, mokupuni o Hawaii.
1- Maniniowali, Apana 21, nona ka ili he 84 eka. Koho kiekie, $210.
2- Awakee, Apana 20, nona ka ili he 20 eka. Koho kiekie. $5@.
L. A. THRUSTON,
Kuhina Kalaiaina.
Keena Kalaiaina, Sept. 15, 1888. 2199 4t
KUAI AINA AUPUNI.
E KUAI ia aku ana ma ke kudala akea, mamua iho o ke alo o Aliiolani Hale, i ka hora 12 awakea o ka Poakolu, Okatoba 24, 1888 he apana aina ma Kaumakani, Kipahulu, mokupuni o Maui, nona ka ili he 65-100 eka. Koho kiekie, $50.
L. A. THRUSTON,
Kuhina Kalaiaina.
Keena Kalaiaina, Sept. 17, 1888.
2199
KEENA O KA PAPA HOONAAUAO.
Ke hoike ia aku nei ma keia, o na Kumukula a pau ma na Kula Aupuni, e hiki ae lakou ma ko lakou halekula pakahi iho, he 15 minute mamua o ka hora 9 A.M., ka manawa hoi e wehe ia ai ka hoomaka ana o ke kula.
MA KE KAUOHA A KA PAPA HOONAAUAO.
2199-3t
HOOLAHA.
Malalo o ka mana o ke kanawai i kapa ia "He Kanawai e hooholo ai i mau Luna Nana Halepaahao a e hoomaopopo ai i ka lakou hana a me ko lakou mana." i apopo ia i ka la 24 o Iune, 1888, ua hookohu ia keia mau keonimana malalo he Papa Luna Nana Halepaahao o ke Aupuni:
ALFRED S. HARTWELI,
THOS. RAIN WALKER,
JOHN EMMELUTH.
LORRIN A THURSTON,
Kuhina Kalaiaina.
Keena Kalaiaina, Sept. 21, 1888.
KUDALA HOOLIMALIMA.
E kuai kudala ia aku ana ma ke alo iho o Iolani Hale, i ka hora 12 awakea, Poakahi, Okatoba 17, 1888, kekahi aina ma Ainahou, alanui Papu, Apana Aina Helu 15, a oia hoi kahi e ku nei ka halehana o J. H. Brun@.
Ka Manawa - He elima makahiki ka hoolimalima, koho kiekie $300 no ka makahiki e uku ia ma ka hapaha makahiki.
L. A. THURSTON,
Kuhina Kalaiaina.
Keena Kalaiaina,
Sepatemaba 13, 1888.
2198 4t