Ka Nupepa Kuokoa, Volume XXVII, Number 50, 15 December 1888 — Page 4

 

 

Ka Nupepa Kuokoa

KE KILOHANA POOKELA NO KA LAHUI HAWAII.

 

Nupepa Kuokoa.

No ka Makahiki,         $2.00

No Eono Mahina,        1.00

-KUIKE KA KULA.-

 

Poaono, Dekemaba 15. 1888.

 

Haawina Kula Sabati

 

HAPAHA EHA

 

HAAWINA XLI, Dek 23, 1888.

 

Ko Luka koho ana. Ru. 1:16-22.

 

            OLELO mai la o Ruta ia ia, Mai nonoi mai oe ia'u, e haalele ia oe, a e hoi aku, mai ka hahai ana ia oe; no ka mea, ma kou wahi e hele ai, malaila au e hele ai, ma kou wahi e moe ai, malaila au e moe ai: o kou poe kanaka, no'u ia poe kanaka, o kou Akua, no'u ia Akua.

            17 Ma kou wahi e make ai, malaila au e make ai, malaila hoi au e kanuia'i: o ka make oia wale no ko kaua mea e kaawale ai; ina aole, me ia hoi o Iehova e hana mai ai ia'u.

            18 A ike mai ia, ua ikaika loa ko Ruta manao e hele pu me ia, alaila, oki iho la kana olelo ana ia ia.

            19 Hele pu no laua, a hiki aku la i Betelehema. A komo aku la laua iloko o Betelehema, pioloke iho la ke kulanakauhale a pau no laua; i ae la lakou, O Naomi anei keia?

            20 I aku la oia ia lakou, Mai kapa mai oukou ia'u o Naomi, e kapa mai oukou ia'u o Mara, no ka mea, ua hookaumaha mai ka Mea mana ia'u.

            21 Ua hele lako aku au iwaho, ua hoihoi nele mai o Iehova ia'u. No ke aha la oukou e kapa mai ia ia'u o Naomi? No ka mea, ua hoohaahaa mai o Iehova ia'u a ua hookaumaha mai ka Mea Mana ia'u.

            22 Pela i hoi mai ai o Naomi, a me kana hunonawahine pu me ia, o Ruta, no Moaba, a hele mai no ka aina o Moaba mai; a hiki mai laua i Betelehema i ka manawa o ka hoiliili mua ana o ka hua bale.

 

PAUKU GULA.

            O kou poe kanaka, no'u ia poe kanaka, o kou Akua, no'u ia Akua. Ruta. 1:16.

            Poakahi           Ruth. 1:1-22

            Poalua                 "     2:1-23

            Poakolu               "     3:1-18

            Poaha                  "     4:1-22

            Poalima            Rom. 8:31-39

            Poaono                 Pil. 4:1-13

            Sabati               Rom. 12:1-21

 

Ka moolelo o Ruta

 

            1 Mahea o Betelehema? Owai na kanaka kaulana elua oia kulanakauhale? Mahea o Moaba? Owai o Naomi? Owai kana kane? Mahea ko laua home? No keaha ka haalele ana ia wahi? Ihea ka hele ana? Pehea ka hoike o ka noho ana ma Moaba?

            2 Na koho ana elua? 16-18. Owai o Ruta me Orepa? No keaha ko Naomi manao e hoi hou i kona home?

Owai ka i hoi pu? Owai o laua i hoi hou i Moaba? No keaha? Pehea o Ruta? Mahea kona koho ana? Ua manaoio anei oia i ke Akua? Aole anei oia i haalele i kona home ponoi a me na pono a pau ana ia koho ana? Heaha kana olelo ia Naomi? Ua ae anei o Naomi e hele pu oia me ia a i kona home?

            3 Ka pomaikai o ke koho pono ana? 19-22. He mau pono anei i koe ia Naomi i ka hoi ana i kona home? Manao oia e hoololi i kona inoa--owai ka inoa hou? Ua hewa anei ia haalele mua ana i kona home? Aole anei e hiki i ke Akua e kokua iloko o na pilikia? E haalele anei Iaia ina e komo ana iloko o na pilikia? He hana aloha anei ka Ruta, ma ia hoi pu ana me kona makuahonowai wahine. E hai mai i ka moolelo o Ruta ma ia hope iho?

            Nawai i kokua aloha mai? Ua pomaikai anei o Ruta? He kumu anei e hoololi i ka manao o ka poe i koho ia Iesu i Haku no lakou?

            Owai kekahi opio i koho e like me Opera? Mat. 6:24. Heaha ka pomaikai e hoaana i ka poe e koho pono ana? Mat. 10:28-30. Aole anei he pono e koho ia Iesu i Haku no kakou.

 

            I Aole e nele ka pomaikai ke paulele ia Iehova.

            II Aole ke Akua i nana i ko waho o ke kanaka.

            III Aia no i kela me keia ke koho ano e like me keia mau wahine elua.

            IV Na pilikia i loa ma ke koho pono ana.

            V Na pomaikai i loaa mai ma ia koho pono ana.

            VI E hele pu me na haipule, a e lawelawe pu ma na hana pono: e launa pu, e haipule pu, e hoomana pu i ke Akua, a e make me lakou me ka hauoli.

 

Hoole Waiona.

 

Na ka Ahahui W. C. T. U.

 

            Ma Kaieieonalani, oia hoi o "Ema Hale" ma Honolulu.

            He halawai i kela me keia Poalima hora 7:30 o ke ahiahi.

            He halawai Hoole Waiona, o ka Ahahui o ka Lipine Bolu o Honolulu.

            Ke kono ia aku nei na kanaka, kane, wahine, keiki, na mea kiekie, na mea haahaa, ka poe waiwai, ka poe ilihune, ka poe hoole waiona, ka poe kanalua, na mea a pau e akoakoa ma ia hale i kela me keia pule. Pela no me na malihini mai na mokupuni e mai, e komo, a hui me makou ma keia hana kuonoono. "No ke AKUA a me ka HOME, a me ka AINA HANAU."

 

E HOOPAKELE I NA KEIKI.

 

            O na keiki ka mea e pono ai ka ekalesia, a me ke aupuni, a penei ka olelo pinepine ana o na Napoliona mua:

            "O ka pilikia nui o Farani oia ka nele i na makuahine."

            Ma ke alakai pololei ana i na keiki ke ola o ke aupuni pela ma ko kakou aina.

            O ka poe kaulana ma ka Baibala no ka hoole waiona, ua hoomaka i ka wa opio, a aole i inu waina o Samesona a me Samuela mai ka wa kamalii mai, oiai he keiki o Daniela ua holo ka manao iloko ona, aole e hoohaumia iaia iho me ka waina a ke alii i inu ai. Ua hai ia mamua o ka hanau ana o Ioane bapetite, "aole ia e inu i ka waina, aole hoi i ka maa awawa."

            O ke kau ka wa e kanu i na hua, i ka wa ma-u, maikai ka lepo, oia ka wa e haule ana na kuaua a e pa mai ana na kukuna mehana o ka la; a oia ka wa e ulu maikai ai.

            He okoa loa i na e kanu ana i ka wa wela ino loa o ka la, a i ole ia i ka wa anu loa o ka hooilo.

            O ka wa opio, oia ka wa palupalu o ka naau a oia ka wa kupono e ao ai i na kamalii mamua o ka launa nui ana me na mea kolohe o ke ao nei.

            He aneane makehewa ke kanana i ka wai e kahe ana ma ke kahawai, oiai, he wai lepo ko ka punawai, a oia ka wai i hookahe ia mai ia punawai aku, ua aho ka hoomaemae ana i ka punawai, ka ohi ana i ka limu, a me ka hookaawale ana i ka lepo mai ka punawai aku. Ina ua pau ia hana alaila, e kahe mai auanei ka wai maikai.

            Wahi a na moolelo kahiko, ua hoahewa aku o Minosa ke alii o Crete, i na kanaka o Atenai no ka pepehi ana i kana keiki a ua kauoha ia lakou e lawe mai i mau pokii o Atenai i kela a me keia makahiki i Crete, i pau i ka ai ia i kekahi mea weliweli o laila, ua koho ia keia poe mai waena mai o ka lehulehu. Ma ka la i koho ia ai keia poe he nui na waimaka i kahe ma Atenai.

            Ua paa ka manao o ke alii o Atenai e hookaawale aku i keia ino mai ka aina aku, a i kahi wa ua hele pu me na keiki, a na ke kaikamahine alii i hoike aku iaia i ke ala e hiki aku ai i kahi o keia mea weliweli, a ua loaa i ke alii a ua make iaia, a ua pau ka pepehi ia ana o na pokii-

            Eia iwaena o kakou ka mea i oi aku ka weliweli i ko kela mea i luku ia, ka mea hoi e luku nei i kanaka.

            He 14 pokii i lawa ma Crete, aka he mau tausani o ka poe opio i lawa ma ka aina, i lilo i keia mea weliweli o ka waiona.

            Nui na waimaka i helelei ma o a ma anei no kana mau hana weliweli. E hooikaika i kaawale aku keia ino, a ma ka hoike ana i na pokii o kakou i ke ano o keia ino wale no e hiki ai.

            Ma ke komohana o Nu Ioka, he wailele kaulana i makaikai nui ia. I kekahi manawa, ua haule kekahi iloko o ka wai kahe ikaika maluna ae o ka wailele, a mai lilo na kanaka nei i ka wai ke ole i hoopakele ia e kekahi mea okoa aku, i lele iloko o ka wai a kii iaia, a pakele mai oia mai loko mai o ka make weliweli.

            Mahalo mai kanaka i ka hana, a ua pono no ia, eia nae, ua oi ka naauao ina ua hana i pale ma kapa o ia muliwai i ole e haule ka poe naaupo iloko o ia wai kahe ikaika.

            Eia iwaena o kakou he lua weliweli e hamama mai ana, kahi i haule nui ai na kanaka i kela a me keia makahiki. Ua hooikaika kekahi e hoopakele i na mea e komo ana ma ia pa-u, a ua kaawale aku kekahi o na mea ona, aka, ina ua imi i na opio na ui na pokii mamua o ka ono ana i ka rama, alaila, ua pakele anei ka lahui mai keia ino weliweli?

            Ina ua hooano hou ia ka ona, aole i hiki ke hoi hou kela i kona wa mamua ua mau nae na linalina. Ina mai ka wa uuku ke kupaa ana ma ka aoao o ka hoole waiona, ina no ua oi ka ikaika o ia kanaka, a lilo auanei i mana iwaena o ka lehulehu.

            Ua hoike ia mai no kekahi lahui i hoole waiona. Ua ike o Ionedabake keiki a Rekaba i ka ino o ka o ka uhauha a me ka ino o ka inu ana i na waiona, a ua kauoha oia i kana mau keiki, "aole oukou e inu waina, a aole no hoi na keiki a oukou a mau loa aku." Ua malama pono lakou a pau i keia kauoha.

            Aole no ka lahui Israela lakou, aka, ua loaa ia lakou ka pomaikai a ko ke Akua poe kanaka. A i ka lilo ana o ka Isaraela mamuli o ko lakou kuko ino, ua kupaa no lakou nei. A hoi hope lakou, oia mau no ka ohana a Rekaba ma ka malama ana i ke Akua.

            A hala na keneturia elua, oia mau no ka hoole ana i ka waiona, a kokoke mai ka puali koa lanakila o Nebukaneza, a ua imi lakou i ka maluhia maloko o Ierusalema, a ano e ko lakou mau hale lole i kukulu ia ma na wahi akea o ke kulanakauhale alii o Iuda, a e ano e loa ana keia hana ana a lakou, ka hoole loa ana i ka inu waiona oiai, he poe uhauha ko Ierusalema.

            I ko ke Akua makemake ana e ao i kona poe kanaka i kekahi haawina nui, ua kauoha ia o Ieremia e kono aku i keia mau keiki o ka waonahele, e komo ae ma kekahi keena o ka luakini a e waiho imua o lakou i na ipu i piha me ka waina, me ke kauoha ana i ko Rekaba e inu i ka waina.

            Aole nae i ae iki aku keia poe i paa ka manna aole no i ae i ka hoowalewale ia ana e ke kaula o Iehova, e inu i ka waina. Me ka wiwo ole no, ua pane aku lakou:

            "Aole makou e inu i ka waina"

            Pomaikai auanei ka aina o kakou, ina pela ka pane wiwo ole ana, ka pane lokahi ana o na opio o kakou: "Aole makou e inu i ka waiona."

 

Na Ekalesia.

 

            Malalo o keia poo, e hoopuka mau aku ai makou i ka moolelo e pili ana i na Ekalesia a puni ka Pae Aina. E kakau ma na mea ano nui, a e hoopuka ia aku no.

 

KA MOOLELO O KA AHAHUI LUNAKAHIKO O MAUI.

 

            Ua noho ka halawai o ka ahahui lunakahiko o Maui ma ka luakini o Raahumanu, Wailuku, Nov. 6, 1888, hora 10, me ka pule a Rev. P. Keaupuni, a koho ia o Rev. J. K. Iosepa i lunahoomalu, a hoomaopopo ia na hoa o ka aha i hiki mai, e hoomaka ana ma Paia

 

Kihapai           Kahu    Lunakahiko

Paia&Haiku     Kuia J. P.  Luna&Hao

Huelo                         S. Kaiewe

Hana    J. K. Iosepa    J. Kaiwi

Honuaula                    Aikala

Waikapu                     Mahoe

Wailuku                      W.B. Keanu

Waihee O.Nawahine              S.W.P. Kanealii

Kahakuloa                  D.H. Kaialiilii

Honokohau&Kaanapali         J. K. Hihio

aole lunakahiko

Lahaina          A. Pali

Olowalu         S.K. Kamakahiki

Kaluaaha         H. Manase

Halawa                       M. Kane

Pelekunu&Wailau Kolopapela haiolelo

            Na hoa mau. Rev. W. P. Kahale P. Keaupuni, S. Kamakahiki. Lilo o Rev. J. Bikanele, Inaina, Kaholokai Kaalauwahi i mau hoa kuka. Kohoia o Pali, Manase, Bikanele i komite hoonohonoho hana, a ia P. Keaupuni, Kuia, Kanealii i komite imi haawina.

            Hoike mai ke komite hoonohonoho hana. 1 hapalua hora haipule, 2 na hoike kihapai, 3 hoike a na komite hoeueu, 4 heluholu haawina, 5 na palapala hoopii, 6 na kihapai kahu ole, 7 ke ola o na kahu, 8 na luakini, 9 na hale kahu, 10 ka misionari kuloko, 11 ka misiona kuwaho, 12 ka manawa e koho ai i na luna kahiko e like me ka rula a ka aha Euanelilo nui, 13 kula kahunapule, 14 i mau keiki na ka aha, 15 na buke papainoa o na hoahanau, 16 no ka ona, 17 hebedoma haipule, 18 haipule no na kula, 19 komite hoalohaloha no Rev. A. O. Polepe, 20 kahi a me ka manawa e halawai keia aha.

 

Kumuhana 2

 

            Na Kuia i heluhelu mai i ka hoike o na ekalesia hui Paia a Haiku, ua emi ka ikaika nui.

            Na S. Kamakahiki no Keanae, hoopanee ka aha a noho hou mai i ka hora 1 me ka pule a Manase.

            Noho hou ka aha. Na Iosepa i hoike mai no ka ekalesia o Hana he nee malie no.

            Na Keanu no Wailuku, na Hihio no Honokohau me Kaanapali, na Pali no Lahaina, na Kamahiki no Olowalu, na Manase no Kaluaaha a me Halawa, a hoopanee ia ka aha apopo hora 9.

 

La Hana 2

 

            Noho hou ka aha e like me ka hoopanee ana.

            Malama ia ka hapa hora haipule me ka himeni 183, a heluheluia ka moolelo a aponoia.

            Na O. Nawahine i hoike mai no Waihee a me Kahakuloa, nana hou no Siloama a me Kalaupapa.

            Na Aidala i hoike mai no Honuaula.

            Noonoo ka aha i keia hoike, a ma ka manao o ka lunahoomalu, ke kauoha ia aku nei oe e Aikala e hai aku i keia:

            1 E hooikaika like na hoahanau a pau o Honuaula e hoopaa i ka hale halawai o Kanaio, 2 E hele mai ka lunakahiko me ka hoike piha no ka ekalesia okoa aole no kekahi hapa wale no.

            Noho ka aha e hoolohe i ka haiolelo a Bikanele e like me ka hooholo ana. Himeni 357 a me 355. poolelo Rom. 12, 2 hapa mua.

            Mai noho oukou a hoahalike me ko ke ao nei. Maikai na manao i hoopili ia mai.

            Noi mai o W. B. Keanu e hoomaha ka aha a noho hou i ka hora 1 me ka pule a Kanealii.

            Noho hou ka aha me ka pule a M. Kane.

            Heluhelu mai o Kolopapela i ka hoike o Pelekunu me Wailau, ua nee imua.

            Na S. Kaiewe no Huelo. Kauoha ka lunahoomalu i ka luna o Huelo e hoi a ohi aku i na dala mahina hou i ka puuku W. W. Hall, pela pu na ekalesia i hoouna ole i ko lakou mau haawina.

            Na Mahoe no Waikapu, ua palaka ia.

 

Kumuhana 19.

 

            O W. P. Kahale, O Nawahine, Kanealii, na komite hoalohaloha no ka Rev. A. O. Polepe.

 

Kumuhana 3.

 

            Na A. Pali i hoike mai no Hana, he nui ka aie i ke kahu.

            No Kipahulu. 1 aole hanai maikai o na hoahanau i ke kahu. a Ua elemakule loa o Rev. D. Puhi. aole i pono kona au'a loa i kela ekalesia, i kahu opio ka pono.

            No Kaupo, aole mea kiai pono ma keia ekalesia, auwana na hipa a me na haipule.

            No Honokohau, Kaanapali a me Olowalu, ua hooikaika keia mau kahu kekahi i kekahi ma ko laua hele ana iwaena o ko laua mau ekalesia e paipai ai i na hoahanau, no ka pono e hanaiia mai na kahu e na hoahanau e like me ka palapala kahea, a ua hana laua i keia hana mamuli o ke ao ana a ke komite hoeueu.

            No Waikapu, ua moe malie loa o Waikapu, ua kaawale ke kahu mai kono lawelawe ana i keia ekalesia a i Waipio, Hawaii, aloha no ia paahana maikai

            No Pelekunu a me Wailau, ua hana ko oukou komite i palapala kahea me na hoahanau ia Kolopapela, i kahu no lakou.

            No Halawa, ua loaa ko lakou haiolelo oia o Kekaalauahi

            No Kaluaaha, Molokai, he maikai no hana.

            No Paia, he wahi aie uuku koe, a oia iho la ka hoike a ko oukou komite A Pali a aponoia ka hoike.

            Na W. P. Kahale i hoike no na dala a na ekalesia i hoouna ia i ka Papa Hawaii a ua loaa pono aku. A apono loa ia.

            Na P. Keaupuni i malama i ka ekalesia o Hauula a ua hanai ia me ka maikai.

            Na S. K. Kamakahiki i malama ia Wailuku a ua hanai maikai ia oia.

            Na S. Kamakahiki i malama ia Keanae, Huelo, Kaupo, a ua hanai uuku na hoahanau o ia mau ekalesia iaia.

           

Kumuhana 5.

 

            Heluhelu ke kakauolelo i ka palapala kahea o Huelo ia J. P. Inaina i kahu no lakou, waiho ia i kela komite mua.

            Pela no ka palapala kahea a ko Wailuku ia Rev. Timoteo, kahu o Waialua, Oahu, hooholo loa ia, e haawiia kela palapala ia Timoteo a nana hoi e kahea mai ma o ke kakauolelo la.

            Hoike mai ke komite o na palapala kahea, 1 ua aponoia na palapala kahea elua, 2 ua apono loa ia ka palapala kahea o Huelo e lilo o J. P. Inaina i kahu no lakou, 3 ua kanalua ko oukou komite i ka palapala o Honuaula ia Kaholokai, no ka mea aole ola pono ke kahu i kela mau dala $150,00 o ka makahiki hookahi. Apono loa ia.

W. P. Kahale

                    P. Keaupuni     Komite.

H. Manase

            Hoopanee ka aha a ka hora 9 apopo me ka pule a Bikanele.

(Aole i pau.)

 

LEO PAIPAI

 

E ka Nupepa KUOKOA; Aloha oe:-

            E oluolu e hoike ae ma ke akea, i kela mau hua e kau ae la maluna i ike mai ai a'u poe lawe nupepa o ka apana o Hanalei a hoolohe mai.

            Eia au o ko oukou luna nupepa ke hea leo nui aku nei i ka poe i koe e hookaa koke mai i ko oukou aie i ka nupepa oiai he mau pule helu wale no koe pau ae keia makahiki, a pela no anei oukou e lohi apa mai ai i Puna i kua wahine.

            Nolaila ano ka wa kupono o loaa ole auanei ia oukou ka nupepa o keia makahiki ae, a o ka lohe ko oukou a eleu mai. Owau no me ka haahaa.

E. Kuapuhi.

Luna Nupepa o Hanalei.

Hanalei, Nov. 23, 1888.

 

MEA HANA LOLE

 

            Ua wehe ae nei o Mrs. M. B. CAMPBELL i ka oihana hana a me ka helehele ana i na lole, ma kona wahi noho ma ka helu 73 alanui Beretania, ma kekahi aoao o ka Hotele. O na kukua ana mai na lede maka hanohano mai ka mea i makemake nui ia, a e loaa no auanei ke ku pono o ka lole e like me ka iini. 2203-1y.

 

HE MOOLELO

-NO KE-

 Koa o Kanahele,

-A I OLE IA-

Ka Naita o ke Kapa Kila Lahilahi.

 

            Aia no ia i kona manao e ka lede aka e hoomaopopo iho oe ina oe e hehi hewa iluna o ka nahesa e huli ae no ia a nana ia oe, o ka wahine aole e hiki ke kala e noi aku ana no ia i ka lokomaikai o kekahi i kekahi wa.

            E ke keikialii, ua poina paha oe ia oe iho, a pehea la ke ano o kau mau huaolelo i hai mai nei.

            Aole keia i kali a pau pono na olelo, hehi ino iho la ka wawae ilalo me he mea la e i mai ana, ua oki oe, a nuii aku la e hele, a e ku ana kekahi mea me ke palaka ulaula a aole nae keia i pane aku, a aole no hoi i nana aku iaia a hala wale ia iwaho.

            Ae, ua hiki mai o Ulric e like me ke kauoha.

            A o oe ia e Sir Ulric, i pane aku ai ka moi Louis, me ka haawi pu aku i kona mau lima, a hoolauna ae la i kona anaina alii.

            He hoahanau keia hoa ke Duke o Darmstadt, a o Sir Robert o St Peter a he mau alii okoa iho kekahi.

            A e Ulric, e alakai aku au e ike i kuu kaikamahine, no ka mea ua makemake e ike ia oe, a alakai aku la ka moi iaia nei ma kahi a ua kaikamahine la me kona hoa e ku ana.

            E kuu kaikamahine, eia ka naita kaulana, a na ke koloka no paha e hooiaio aku ia oe o Sir Ulric keia o Cluny, a e Sir Ulric, o ke kaikamahinealii keia o Geremania nei.

            Ku iho la keia me ke kahaha, ua hewa paha kekahi mea, ua lohe hewa paha wau, a i ole ua pane hemahema paha ke alii, a pane aku la keia: Aole paha keia o ke kaikamahinealii?

            Aka, hopu koke mai la ke kaikamahine alii i ko ianei lima a pane mai la me ka mino aka ma kona mau papalina: E Sir Ulric, e oluolu oe e hoolauna aku au i kuu hoaloha i ka lede Theresa o Darmstdt.

            Haikea ae la ko ianei mau helehelena iaia e nana aku ana i na kaikamahiue o loko o ka nahelehele a aole nae e like me kana i manao ai.

            O ka mea ana i manao ai o ka lede Theresa ana i ike ai i ka nahelehele, a ana hoi i hai ai i kona aloha iloko o ka pa mea kanu a aole ka ia, a o ke kaikamahinealii ka o Geremania.

            Ua hoi aku la ka moi Louis me kona nana hou ole mai i hope.

            Ia wa ua lawe aku la ke kaikamahine alii i kana naita ma kahi mehameha a pane aku la:

            E S r Ulric, e kala mai ia'u ina ua hewa wau, aka nau no i kapa mai ia'u ma ia inoa a manao iho la wau, ina paha oe i iks o ke kaikamahinealii aole paha oe e wehh akea mai i na manao o kou puuwai, nolaila mumule iho la au, a ua mahalo iho i kau hana ana pela, a ua halawai paha oe me ka'u leta.

            Nau no ka ia leta, wahi a Sir Ulric i pane aku ai.

            Ae, na'u no, me ka lala cedar a me ka lau o ka palm, i pane aku ai ke kaikamahinealii.

            Ae, ua loaa ia'u, wahi a ua Ulric nei i pane aku ai.

            Na'u, e ka puuwai oiaio, e hai mai oe, ua kala ia anei au?

            Lalau mai la ka naita i ko ianei lima a nana pono mai la iaia nei a pane mai la: He oiaio, o ke kaikamahine alii io no oe.

            Pane mai la ke kaikamahine, ae ua lohe ko kauwa, o ka lede Theresa kekahi iloko o ka nahelehele a manao paha ola kai haawi mai ia oe i ka lei a-i a i keia wa, ua ike iho la oe, a i keia wa no hoi, ke koho nei o Constance i kana naita ka mea ana i haawi ai i kana hoohiki.

            Mai olelo mai oe ia'u pela, wahi a Ulric.

            E Constance, ua ikaika hou kuu puuwai.

            Ae, he oiaio; ina wau i ike mua o ke kaikamahinealii, aole io no paha wau e hai pau aku e like me ka'u i hana ai.

            A ua haohao paha oe, no ke aha la ke kumu o ke kaikamahinealii i aa ai e haawi aku i kona aloha ia oe, oiai he wahi naita wale no ee iloko o ka pull o kona makuakane hanuuna ka moi Kale o Farani, a e ike oe o kekahi kanaka a'u i hilinai loa ai a he laahia kana mau huaolelo, a o kana mea e koho ai e ko ana no ia, a nana no i ao mai ia'u aole au e hopohopo i kona ike ana ua lilo ko'u puuwai i ka naita o Cluny ua olioli loa ia a olelo mai e pomaikai aku ana no mahope.

            A ua olelo mai no oia ia'u, iwaena o na alii a me na naita a pau, ache mea e ae i kunono no ko'u aloha a me ko'u hilinai ana, o ka mea wale eo i kapaia, o Sir Ulric o Cluny, a pehea la hoi au e kanalua ai.

(Aole i pau.)

 

Kakela a me Kuke

 

HALEKUAI NUI O NA WAIWAI

 

@ na pahiolo, kui hole

A @@@, koi nui a me liilii, kila.

will puaa, rula, apuapu, kui o na ano a pau, kale kaa, hao hoopaa pu@

 

pohaku hoana, kepa, lei ilio, kaula hao ilio, pahi, upa, pahi umiumi,

kalapu, kope hulu, pulupulu, oepa k@lakala, lina hao, ami, keehi a me

 

-KAULA OPU-

 

Palau o na ano a pau,

Oo, ho, kopala, pe, kipikua, hao kope, au ho a pe a aku, kua bipi, lei bipi, kaula hao bipi, uwea pa, urea keleawe, hao pill piula, kaa palala, ipuhao, ipu ti

 

PA-PALAI MAKAU MEKE AHO

 

ili wai, papa holoi, kopa ala, kaula @uaina, hu'akai, ehi wawae, hulu pena, a pela aku.

 

Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe.

 

PENA HOOMALOO

 

-a me aniani hale-

 

AILA MAHU, AILA MIKINI, AILA HAMO

 

AILA KAA, INIKA KAMAA

 

PAUDA KUKAEPELE, KIANA PAUDA, UIKI IPU KUKUI O NA ANO HE NUI A LEHULEHU

 

LOLE MAKEPONO

 

-E aa aa-

 

AHINAHINA, KALAKOA, KEOKEO, LEPONALO HULUMANU, UWE-WAHINE, KUI HUMUHUMU A ME KA LOPI.

 

Ke kuike e loaa no ia ma kahi o

 

Kakela & Kuke!

 

NA MEA PIULA

 

Mikini Humuhumu

 

Makini a WHEELER a me WILSON

 

MIKINI A WILLOX ME GIBBS

 

NA MIKINI A

 

-REMINGTON.-

 

He nui loa na mea hao me na kana ae o na ano a pau, aole hiki ke hai pau ia aku, hewa i ka wai na maka ke ike

 

Laau Lapaau Kaulana Lo.

 

A DR. JAYNE.

 

LAAU HOOMAEMAE KOKO

LAAU HOOPAU NAIO, LAAU KUNU, PENIKILA HUAALE PAAKAI, LAAU HOOPAA HI.

 

Me na Laau Hamo a Pela 'ku.

 

KAKELA & KUKE

 

HALE HANA LOLE NUI

KE "PAIONIA O HONOLULU,"

Helu 17 Alanui Ema, Honolulu.

 

            O ka mea nona ka inoa malalo iho, ua makaukau oia e hoolawa aku i ka lehulehu me na aahu i maiau ia. E loaa no ke kuhikuhi no na ana lole ke ninau ae malaila.

Papale Keokeo, Paleili, Aahu Moepo, &c.

            E hana ia no na kauoha e like me ka makemake. A o na kauoha mai na mokupuni mai e hooko ia me ka eel.

A. M. MELLIS.

Bele Telepone Helu 410         1202-1011

 

B. F. EHLERS & CO.,

PAINAPA.

 

Poe Kuai i na Ano Lole a Pau.

 

Helu 99 alanui Papu.- Honolulu.

 

            E loaa mau ana na lole hou o na ano a pau maluna o kela a me keia moku

 

            Pahu Hale Leta 351.   Bele Telepone 274-

KA AGENA OIHANA HAWAII.

 

No. 6S ALANUI PAPU KIHI O ALANUI KALEPA, HONOLULU, H. I.

            HE AGENA OIHANA, A ME AGENA OHI DALA NO KA BILA A PAU.

 

KEENA OIHANA.

 

Na Waiwai paa- kuai a holilo aku, a me auhau uku ana.

Na hale hoolimalima, Rumi, Keena, Aina e hoolimalima, a aelike e ohi i na uku hoolimalima o na ano a pau.

Na Moraki e ae ia ma na ano waiwai a pau.

Na pepa kuleana aina, e kakau a hooponopono ia me na Pepa a pau e pili ana me ke kanawai.

Kope a me ka Unuhiolelo ma na olelo a pau iloko o keia aupuni.

Na Panihakahaka ola, Hale, a me na waiwai o na ano a pau i na Ahahui Panihakahaka helu ekahi.

Na Malama ana i na Buke a me ka hooponopono ana.

E haawi ia no ka mikiala no na Ohi aie ana.

Na Gula, Kala me na Bila kikoo dal, kuai a hoolilo.

Na Hooponopono Hale Dute e pill ana i na waiwai mai ko na aina e mai.

Na Ukana o kela a me keia ano, e kuai a holilo aku.

Na Kauoha o na Mokupuni, e hooko ia no me ka eleu.

            O na hana a pau a na makamaka e haawi mai ana no ka hooko aku i ke kauoha, e hooko ia no me ka eleu a me ka mikiala.

Agena Oihana Hawaii

2170 ryk. Mar.