Ka Nupepa Kuokoa, Volume XXVIII, Number 34, 24 August 1889 — HE HAIOLELO. [ARTICLE]

HE HAIOLELO.

Ua haiolelo o Rev. Dr. Dwinell ma Kaukeano i ka la Sabati, Augate 18, i hala iho nei. Aia kana poolelo ma Mataio 11:29,30. Ua pili ke kumuhana no ka halihali ana i ka auamo a ka Haku, a me ka noho ana malalo o kana mau ao ana. Na manao nui o ka haiolelo, ua pili i ka noho ana akahai. E ae aku i kana ao ana a me kona makemake. E hele aku e halawai me na popilikia o keia ao me ka hopo ole a me ka manaolana. E aloha aku ia hai, a e lawelawe aku no ka pono o hai. O ke aloha kekahi mea i paipai ia mai imua o ke anaianai. O Kristo ke kumu o ka pono a pau. O ka mea e like ai kakou me Kristo, oia ko kakou noho haumana ana malalo Ona ina Oia ke kumu a o kakou na haumana, a noho kakou malalo o Kona alakai ana, alaila, e like auanei kakou me Ia. Iloko o ko Kristo mau olelo e ike ai kakou i kona makemake a me kana mau ao ana mai ia kakou. O ka poe i ao ia e ia, a i haliahli hoi i kona auamo, o lakou ke ike maopopo i ka mama o kona ukana a me ka oluolu o kana auamo.