Ka Nupepa Kuokoa, Volume XXIX, Number 13, 29 March 1890 — Page 4
| This text was transcribed by: | Liisa Laurila |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA
-------------
NO KA MAKAHIKI---- $2.00
NO EONO MAHINA-----1.00
KUIKE KA RULA.
Poaono, Maraki 29, 1890
Haawina Kula Sabati
---
HAAWINA III. Aperila 20,1889
---
Ke aloha a me ke kala ana. Lu 7:36 50
KONO ae la kekahi Parisaio iaia e ai pu me ia. A komo aku la oia iloko o ka hale o ua Parisiaio la, a noho hilinai iho la e ai.
37 Aia hoi, he wahine ma ia kulanakauhale, he wahine lawehala ia, a ike aku la ia e noho ana ia e ai maloko o ka hale o ua Parisaio la, lawe mai la hoi ia i ka ipu alabata poni.
Ku iho la ia mahope, ma kohna mau wawae, e uwe ana, hoomaka iho la ia e hoopulu i ko Iesu mau wawae me ka waimaka, a holoi iho la me ka lauoho o kona poo, a honi iho la i kona mau wawae, a poni iho la me ka mea poni.
39 A ike ae la ka Parisaio nana i kono ia Iesu oleelo iho la ia iloko ona, i iho la, ina he kaula keia, ina ua ike ia i keia wahine i hoopa iaia a me kona ano; no ka mea, he wahine hewa ia.
40 A olelo mai la o Iesu, i mai la iaia, e Simona, he wahi olelo ka'u ia oe. I aku la oia, e ke kumu, e olelo mai no.
41 O kekahi kanaka, elua ana mea aie; elima haneri denari ka aie a kekahi, a kanalima hoi a kekeahi.
42 Aole a laua mea e hookaa aku ai kala wale aku la oia ia laua. E hai mai hoi oe, owai hoi ko laua mea i aloha nui mai iaia?
43 Hai aku la o Simona, i aku la, ke manao nei au, o ka mea nana ka aie nui ana i kala wale ai. I mai la oia iaia, ua pono kou manao.
44 A haliu ae la ia i ka wahine, i mai la oia ia Simona, ke ike nei anei oe i keia wahine? Ua komo mai nei au iloko o keia hale, aole hoi oe i haawi mai i wai no ko'u mau wawae; aka, ua hoopulu iho keia wahine i ko'u mau wawae me ka waimaka, a ua holoi iho hoi me ka lauoho o kona poo.
45 Aole oe i honi mai ia'u; aka, o keia wahine, mai ko'u komo ana mai, aole ia i hooki i ka honi ana i ko'u mau wawae.
46 Aole oe i poni mai i kuu poo me ka aila; aka, ua poni mai keia wahine i ko'u mau wawae me ka mea poni.
47 Nolaila hoi, ke olelo aku nei au ia oe, o na hewa ona he nui loa, ua pau ia i ke kala ia; no ka mea, i nui ai koua aloha; aka, o ka mea iaia ka mea uuku i kala ia, oia ke aloha uuku.
48 I mai la ia i ka wahine, ua kala ia na hewa ou.
49 A o ka poe e noho pu ana, i iho la lakou iloko o lakou iho, owai keia e kala nei i ka hala?
50 I mai la oia i ka wahine, ua ola oe i kou manaoio ana; e hele aku oe me ka pomaikai.
---
PAUKU GULA.
Ua aloha kakou iaia, no kona aloha mua mai ia kakou. 1Io 4:19
MANAO NUI.
O ka mea i nui na hewa i kala ia, oia ka mea e aloha nui ana.
NA HELUHELU LA.
Poakahi . . . . Lu 7:36-50
Poalua . . . . Mat 11:16-30
Poakolu . . . . Mat 18:23-35
Poaha . . . . Lu 15:1-10
Poalima . . . . Lu 15:11-32
Poaono . . . . 1Io 1:1-10
Sabati . . . . Io 15:9-27
I --- Elua ano o ka poe hewa e imi ana ia Iesu. 36,37
Ua ae anei o Iesu i ke noi ana o ka Parisaio e hele e ai pu me ia? Heaha kai ae la ia kakou? Hoik 3:20 19:9 Mat 26:29. Owai ka inoa o keia Parisaio? Ua launa aku anei o Iesu me @@@@ na pono uhane? Owai @@@@ ka ahaaina e makai @@@@i olelo a Iesu? @@@@opo ko Iesu mana e kala i na hewa. Lu 5:18 24. Ua lilo anei na ao ana a Iesu i pono nana? Ina e hoolohe wale i olelo ao, aole nae i hana mamuli o ia ao ana, he pomaikai anei?
II --- Pehea ka hoike ana o keia wahine i kona manaoio? 37,38. Ma ke aha i ike ai kona mihi? Pehea ka hoike ana i kona aloha? He mea mau anei keia ka imi ana e hoike i ka manaoio a me ke aloha ma na hana? Ua hiki anei e hoike i ke aloha ia Iesu ma na hana? Mat 25 40. Ina ua nele i ke aloha, e lawelawe anei nana?
Pehea ka hana o ka Parisaio ia Iesu Ina ua aloha ia Iesu, aole anei he pono e hoike aku?
III --- Ka Olelo Nane.
Heaha ko Simona manao? Heaha ka Iesu pane iaia? 85 dala ka aie o ka mua, he 17 keneta ko ka lua. Ua aha ia laua? Owai ka poe aie i ke Akua? Ua like anei ka nui o ko kakou aie i ke Akua? Owai ka mea e kaumaha ana no kona hewa - O ka mea i paakiki iloko o ka hewa anei, o ka mea paha imua ia Iesu e kala i ka hewa?
IV --- Ekolu pomaikai i loaa i ka mea i mihi. 47 50.
Heaha ka Iesu olelo i ka wahine? Ma ke aha i maopopo ai, ua kala ia oia? 47. Ua ola ma ke aha? Ua mihi, ua manaoio, a ua aloha keia wahine. Ua kala ia oia, ua loaa ke ola, ua pomaikai. Nowai mai keia mau pono nana?
I -- Ua hele o Iesu iwaena o kanaka, ma kahi e loaa ana, e alakai ia lakou.
II -- E ilke me ka hele ana o ka mea pololi i ka ahaaina i maona, pela i hele ai ka mea e mihi ana ia Iesu.
III -- E hoike ia ana ke aloha oiaio ma na hana, aole ma ka olelo wale no.
IV -- Ua hiki no e hoike i ke aloha ia Iesu, ma ke kokua ana i ka poe ilihune, ka poe mai, ka poe pilikia.
V -- He hiki ole e hookaa i ka aie o ka hewa.
VI -- Ua hele mai o Iesu e imi a e hoola i na auwana. E hoohalike me ia.
VII -- O keia wahine, ua mihi, ua manaoio, a ua aloha. Na Iesu i kala, hoola a hoopomaikai.
------------------------------
Na Ekalesia.
------------------------------
Malalo o keia poo, e hoopuka mau aku ai makou i ka moolelo e pili ana i na Ekalesia a puni ka Pae Aina. E kakau ma na mea ano nui, a e hoopuka ia aku no.
E MAKAALA.
---
I na Ekalesia Kristiano Euanelio o ka Mokupuni o Hawaii.
Aloha oukou:---------
E makaala i ka oukou kokua no na Elele i ka Ahahui Euanelio Nui ma Honolulu, i ka hebedoma mua o Iune M.H.1890, e like me ka mea i hooholoia e ko oukou Ahahui Euanelio ma ka M.H. 1998, a hoouna mai ia'u, he ekolu dala pakahi i kela a me keia Ekalesia. Owau iho no,
Sam'l Kaili,
Lunahoomalu.
---
NA AHAHUI KULA SABATI.
A ME KA AHAHUI OPIOPIO O NA MOKUPUNI O MAUI A ME MOLOKAI.
---
E ke Kuokoa: Aloha oe ---
Ke hoike ia aku nei ka lohe i na Kula Sabati a me na Ahahui Opiopio o na Mokuni o Maui a me Molokai, e akoakoa pau ae na lala o ia mau aha a elua, maloko o ka luakini o Kaluaaha ma Molokai, ke hiki aku i ka Poakolu la 30 o Aperila, 1899, penei:
1 -- No ka Ahahui Opiopio, e noho ana ma ka hora 9 a.m.
2 -- No na Kula Sabati, e noho ana ma ka hora 1 @@ p.m.
3 -- E hoomakaukau mua na Peresidena na Kahu Kula Sabati a me na Elele a pau, i na papa hoike helu pakahi, na hoike a na elele, me ka pono a pololei hoi.
4 -- E koho ia na elele a pau o na aha a elua e ea ahahui pakahi, me ke aponoia e ka Ahaluna Ekalesia, a i ole e na Kahu Ekalesia paha, ma ke Sabati elua o Aperila, 1890.
5 -- E lawe ae na Peresidena, na KahuKula a me na Elele, i na dala auhau mau he hookahi dala, a imua o ka Aha mokupuni e noho ana ma Kaluaaha, Molokai.
6 -- O na ahahui opiopio i haawi ia a i loaa aku na haawina heluhelu, ma ko lakou mau lima, e lawe ae me ka makaukau.
7 -- O na Kahu Kula Sabati, na Elele hoi a pau, e pono e noonoo a kuka pu me na kula Sabati o lakou iho, no ka wae ana a waiho mai i na inoa kupono o na Kahu Kula Sabati Nui o ua apana a elima o Maui a me Molokai no ka makahiki 1890 a me 1891.
8 -- E pono e hoolako maikai ia na Elele me na kokua kupono mai na Ahahui mai. Me ka mahalo.
Luther W.P.Kanea @@
Kakauolelo mau.
Waihee, Maui, Maraki 25, 1890.
---
MOOLELO O KA AHAHUI EUANELIO O KA MOKUPUNI O HAWAII.
---
La Hana 1, Maraki 12, 1890.
Halawai ka Ahahui Euanelio o ka mokupuni o Hawaii maloko o ka luakini o Kauahaao, hora 9 a.m. Lunahoomalu ma ka noho, hoomaka ia na hana me ka himeni a me ka pule a ka lunahoomalu. Hoomaopopoia na hoa o ka aha, penei:
EKALESIA KAHU ELELE
Haili Rev Desha Honuakau
Onomea " " komite aole
Hakalau " Kamakawiwoole Unea
Laupahoehoe " Kahooio aole
Hamakua hik Kamakawiwoole "
Hamakua wae&kom Kaili Mio
Waimea Rev Kalino Paakiki
Kohala ak " Kekuewa Nakikiao
" kom aole aole
" hem " Kalino komit "
Kekaha " Kalaiwaa Kapa
Kailua&Hel " " komit aole
Kona wae&Keal " " aole
Pukaana Rev Waiau Naope
Milolii " " Kaui
Waiohinu&Kap Rev Kauhane Naeole
Kalapana me O@h aole aole
Puula Rev Desha komit aole
Na lala mau, Rev O P Emesona a me K Paakaula. Ma ka balota ana, ua koho ia o Rev S Kaili i lunahoomalu, a ia Rev Kamakawiwoole i kakauoleleo ma ka o lima ana.
Koho ka lunahoomalu i na komite mau, komite imi kumuhana, O P Emesona, Desha, Kalino. Komite imi haawina, Kekuewa, Kauhane, Kalaiwaa. Hoike hapa mai ke komite imi kumuhana a aponoia. No ka hapa hora hai pule, ua pau mua. Hoike kihapai.
Na Desha i ko Haili, na ke Kakauolelo i ko Onomea, me Hakalau, na Kahooio i ko Laupahoehoe, na Kamakawiwoole i ko Hamakua hik., na Kaili i ko Hamakua waena me komohana, Kalino i ko Waimea me Kohala hema, Kekuewa i ko Kohala ak. Kalaiwaa i ko Kekaha, Kailua a me Helani, Kona waena a me Kealakekua, Kauhane i ko Waiohinu a me Kapaliiuka, Desha i ko Puula. Noi mai o Kalino e lilo na hoa e ae i mau hoa kuka no keia aha, a hooholoia. Na palapala hoopii. Mai na Ekalesia huiia o Kona waena a Kealakekua ia Kamakawiwoole i kahu no lakou, lawe ka aha a noonoo a hooholo e waihoia ma kona lima a pane mai no hookahi hora. Mai ka ekalesia mai o Hamakua waena a me komohana imua o ka aha e noonoo a e kokua aku ma ka hoopau ana i ko lakou aie he $120; lawe ka aha a noonoo a hooholo e koho ia Kamakawiwoole a me Kalino i mau komite no ka hana ana e hoopau ia aie.
Mai Puula mai ia Kalawe i Kahu ekalesia, no mai o Desha e hoopau loa keia aha no ka noonoo ana, oiai, ua haule ia manaolana, hooholoia.
Heluhelu haawina. Noi mai o Haluapo e hoopanee loa ia kumuhana a noho hou ka aha ma Sept 1890 nei, a ua hooholoia. Oihana Kuwaho. Na Emesona i hoike mai no ia kumuhana a me na hoa e ae, a hooholoia e hoi na hoa a hana aku. Oihana Kuwaho. Ua hoakaka mai o Emekona me ka manao lana o ka olioli no ia oihana. Na Ekalesia kahu ole, he nui ke kuka ana o ua hoa, a mai ia Emesona mai e koho ia l komite nana e noonoo i ka olelo hooholo kupono no keia kumuhana a ua koho ka hale i ke komite Desha Kauhane Kamakawiwoole. Noi mai o Desha e hoopanee ka aha a noho hou i ka hora 1:30 me ka pule a Kalino.
Noho hou ka aha i ka hora i hoopanee ia me ka pule a Unea. Hoike mai o Kamakawiwoole imua o ka aha no ke kahea mai Kealakekua a Kona waena, he elua no manao ana i hoole ai ia kahea, penei: Aole i loaa na kumu ma ka aoao o ka ekalesia a'e e haalele ai iaia. Aole no hoi ma ko'u aoao.
Na hale kahu. He nui no na hoa i kamailio, a o ka pono e hooikaika no e huli no na hemahema. Ke ola o na kahu. Ma ke kuka ana o na leia ua hoike mai o Emekona e lilo oia i mea hooikaika no ke ola o na kahu i emi malalo o $300 o ka makahiki a ua hooholoia. Hoike mai ke komite o na ekalesia kahu ole, i na kumu penei: He mea pono i na ekalesia i lako i na kahu ma ke kokua ana i na ekalesia kahu ole no ka malama ana i ka ahaaina a me na hemahema e ae. Ma ka hele ana o ia komite i mau la mamua iho o ke Sabati e malama ia ai ka ahaaina e komo ma na hale. O na komite nana e malama i na ekalesia kahu ole no keia hapa makahiki, oia keia: Kamoku no Hakalau, Kalino no Kohala hema, Kalaiwaa no Kekaha a me na ekalesia huiia o Konawaena a me Kealakekua, Kauhane no Kapaliiuka, Kamau no Puula. Lawe ka aha a noonoo, a pakui mai o Kalaiwaa penei: O na dala a pau i lulu ia no ke komite ma ia hele ana, @a pili ia n@ana me ka mahele hou ole ia, aponoia ia hoike a me ka hoike a ke komite.
Rev S L Desha
" J Kauhane Komite,
Rev C M Kamawiwoole
Mai la Desha, e kohoia o Emesona i komite no ka hoike ana aku no ka pane a Kamakawiwoole no ke kahea o Kona-waena a me Kealakekua. Na @o@a halawai apana o na ekalesia. Mai a Desha mai e hoopanee keia kumuhana a noho hou keia aha. Na keiki a ka aha. Ua pane mai o Kamae ma ka leta ina e ae ka H@k@, e komo ana oia i ke kula kaula ma Okatoba, o keia makahiki, hooholoia. No na keiki e ae, e hoomau aku no a noho hou keia aha hooholoia. Hoike mai ke komite imi haawina mamuli o ka hoopanee ana o keia aha i na haawina heluhelu, nolaila ua hooholo ko oukou komite e hoomau aku ia mau haawina. Pakui mai o Desha, e hoolaha hou aku ke kakauolelo no ia mau haawina. Aponoia ka pakui a me ka hoike a ke komite.
S W Kekuewa
W M Kalaiwaa Komite.
J Kauhane
Eia na haawina: Heaha na kumu e maopopo ai ko Iesu Akua ana? Rev S W Kekuewa. Heaha kekahi mau alakai lalau ana a ka poe Moremona? Rev. S L Desha. Wehewehe ia Ioane 3:5, Rev C M Kamawiwoole. O ka pule ana i na kanaka hoano a me na Anela; ua kupono anei ia i ka kanawai o ke Akua? Rev S C L@hiau. Wehewehe ia Rom 11:13, Rev S M Kalaiwaa. Heaha ko ke Akua aloha? J Kalino. Wehewehe ia Pilip 4:11, J N Kamoku. Ua papa ia anei ke kau ia ana o na kii ma na hale hoomana? W Kamau. Heaha ka mana o ke Akua? J S Kalana. Wehewehe ia Heb 11:25, S Kaili. Wehewehe ia 1 Kor 1:21, S Kaili. Wehewehe ia Kolos 2:8, D Kahooio. Wehewehe ia Dani 9:24, G W Waiau.
Na kula hanai. He nui na hoakaka naauao e pili ana no ke kula hanai ma Hilo a me Kohala akau, a ua kauoha ia na kahu e kokua no keia hana.
Komite hoike o na kihapai ma Honolulu, J Kalino. Komite hoike no na hana o keia aha ma Honolulu, S W Kekuewa. Koho ana i na elele ma Honolulu, Z Paakiki, D H Honuakau, J K Naeole, S H Haluapo, W A Mio, H K Unea. Kahi e noho ai ka aha. Ua hooholoia e noho ma Waipio, Hamakua, ma ka pule mua o Sepatemaba 1890, ke hoolaha aku ke kakauolelo.
Waiho mai o Kekuewa a me Kalino he mau olelo hooholo, a kokua @a ka Kekuewa penei: Olelo hooholo. Ke haawi aku nei na lala o keia aha i ko lakou hoomaikai i na kamaaaina no ko lakou malama ana i na lala o keia aha. Noi mai o S L Desha, e heluhelu ia ka moolelo, heluhelu ia a apono ia me ka hooponopono uuku. Mai iaia mai no e hoouna ia ka moolelo i ka nupepa KUOKOA, a hooholoia. Noi mai o Emekona, e lilo keia manawa mahope iho i hapa hora haipule. Noi mai o Haluapo e hoopanee keia aha, hoopane ia me ka pule a ka lunahoomalu.
C M Kamakawiwoole.
Kakauolelo
Waiohinu, Maraki 12, 1890.
-----------------------------
Hoole Waiona.
-----------------------------
[Na ka Ahahui W. C. T. U.]
Ma Kaleleonalani, oia hoi o "Ema Hale, ma Honolulu.
He halawai i kela me keia Poalima hora 7:30 o ke ahiahi.
He halawai Hoole Waiona, o ka Ahahui o ka Lipine Bolu o Honolulu.
Ke kono ia aku nei na kanaka, kane, wahine, keiki, na mea kiekie, na mea haahaa, ka poe waiwai, ka poe ilihune, ka poe hoole waiona, ka poe kanalua, na mea a pau, e akoakoa ma ia hale i kela me keiea pule. Pela no me na malihini mai na mokupuni e mai, e komo, a hui me makou ma keia hana kuonoono. "No ke AKUA a me ka HOME, a meka AINA HANAU!!"
---
HOOLAHA KUMAU.
---
I ka Poaha auwina la, ma ka hora 2, e hiki ana o Miss Mary E. Green, a me Miss Helen J.Judd ma Hale Ema e malama i ka Ahahui Hoole Waiona, i kapa ia "KA BANA O KA MANAOLANA," iweana o na keiki o ke kulanakauhale o Honolulu nei. Ke kono ia aku nei na keiki o ka aina makua, a me na keiki o na aina e, e hele mai. E malama ia ana he wahi paina meaono me ka inu ti a me ka haukilima, ma ka Poaha hope o ka mahina.
---
KA ONA.
---
"E hele pono kakou me ka hele ana i ka la: aole me ka uhauha ana, a me ka ona ana, aole me ka moekolohe ana a me ka makaleho ana, aole me ka hakaka ana a me ka ukiuki ana." --- Roma 13:13.
"O ka make ko lakou hope, o ka opu hoi ko lakou akua, a ma ka mea hilahila hoi ko lakou nani, ke manao nei hoi lakou i na mea o ka honua." --- Pilip@ 3:19.
"No ka mea, o ka poe hiamoe, ua hiamoe lakou i ka po; a o ka poe ona, ua ona lakou i ka po. Aka, o kakou o ka poe o ke ao, e kuoo kakou." --- Tesalonike 1, 517.8.
"He mea henehene ka waina, he walaau nui hoi ka mea e ona ai." --- Na Sol. 20:1.
"Ia wai la ka uwe ana? Ia wai la ka poino? Ia wai la ka hakaka? Ia wai la ka uuku wale ana? Ia wai la na palapu loaa wale? Ia wai la na maka ulaula? I ka poe e hoomau ana ma ka inu waina. I ka poe e hele ana e inu i ka waina i kawili ia. Mai nana oe i ka waina i kona ulaula ana, i kona aleale ana ma ke kiaha, a i kona hu au@ a maikai, mahope iho e nahu mai me he n@hesa la, a'e pa mai me he moonihoawa ia." --- Na Sol. 23:29 32.
"Auwe ka poe e ala ana i kakahiaka nui, e inu i ka mea awaawa, a kakali hoi molehulehu, @ wela ai lakou i ka waina! Auwe ka poe ikaika i ka inu waina, a me na kanaka ikaika a ke kawili i wai awaawa e inu ai." --- Isaia 5:11,22.
"Aole ka poe aihue, aole ka poe makee, aole ka poe ona, aole ka poe akiaki, aole ka poe alunu, aole e loaa ia lakou ke aupuni o ke Akua." --- Kor.1, 6:10
"A ua akaka ae la na hana o ke kino; oia ka moekolohe ka hookamakama, ka hoohaumia, ka makaleho, ka huahua, ka pepehi kanaka, ka ona ana, ka uhauha ana, a me na mea like; o ka poe i hana i ua mau mea la, aole e hooili ia no lakou ke aupuni o ke Akua." --- Galatia 5:19,21.
"Auwe ka mea i hoohainu i kona hoalauna, a e ninini i kou mea e wela ai iaia, i ona oia, i nana aku ai oe i kona olohelohe." --- Habakuka 2:15.
-------------------------------------
Olelo Hoolaha.
E @@@ AUANEI na kanaka a pau, owau o S. Ali MI & CO. o ka Hui Aina o Kamaole ma Kula, Maui, ke papa a ke hookapu loa aku nei au i na kanaka a pau loa, aole loa e hele wale maluna o na aina o ka Hui o Kamaole ma Kula, Maui, a lawe wale i kekahi mea maluna o ua aina la, a aole loa hoi e hopuhopu i na holoholona e hele ana maluna o ua aina la; a o na holoholona hele wale hoi, e like me ka puaa, bipi, hipa, lio, kao, a me na manu e ae e holo ana ma ua wahi la, ua kapu loa me kuu ae ole aku. A ua kapu pu no hoi me na Kai Lawaia o ka Hui o Kamaole, aole e hele wale kanaka e lawaia me kuu ae ole aku. O ka mea e kue ana i keia, e hoouku ia no e like me ke Kanawai; a e lilo keia i rula paa no ka Hui o Kamaole.
MA KE KAUOHA a ka
HUI O KAMAOLE.
Kahului, Maui, Feb. 22,1890.
2276-2ms
--------------------------------
Hale Hoolimalima.
He Hale Maikai
No ka noho ana a me ke akea, 1 rumi nui me 2 rumi liilii, he lanai a me ka rumi auau, rumi ai a halekuke e pili ana.
Aia ma ke alanui Kekaulike, ma kela aoao mai o alanui Hotele.
$10 no ka Mahina.
E ninau i ka hui
HAWAIIAN BUSINESS AGENCY
Kihi alanui Papu me Kalepa.
2572 3m
------------------------------------
Ka Waiwai o ka Hilina
---
Saseparila Ayer
---
A AYER, Laau Saseparila, kai kaulana a hilinai@ a@ia no ka hoomaemae koko, ma na wahi a pau o ka honua, he aneane 40 ma ka hiki i hala ae nei, a ua lawelawe nui ia ho iwaena o na oihana lapaau. O keia
LAAU SASAPARILA, no loko ae la o ke aa Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka honua a me ka hao.
HE koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoopehu. Na keia
LAAU e hoomaemae ia mau mea ino a pau a maikai. O na kauka lapaau a pau o Amerika ike ke ano o ka AYER SASAPARILA ua olelo lakou, aole he mea maikai e ae no ka hoomaemae koko ana mai na mai i awi@ pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano maii ikeia, o ka AYER SASAPARILA wale no ka laau nana e hoomaemahakalia ole mamua ae o kekahi ano laau e ae. O ke
KOKO ino hakuhaku, a nawaliwali hoi kona holo pono an ma ke kino, e hoomaemae ia e hooikaika pu ia no hoi ma o ka ai ana keia LAAU SASAPARILA A AYER. He maalahi a he
MIAKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na a@. He lehulehu wale na hooia ana mai na wahi a pau o ke ao nei i hoohana m@@ i keia laau mamua o kahi mau laau e ae
A HILINAIIA no ka ikaika kupono o ke ola kino, ma ke maemae ana o ke koko, hoomake pu ia na ma'i, a pela aku. He nui na laau hoomaemae koko i oolaha waha hee wale ia malalo o na inoa @@lehu, aka, o na hilinai a me na hooia wale no a ke ao holo okoa, maluna o ka
Ayer Laau Sasapar...
I HOOMAKAUKAUIA
@@@ J.C. A@@& Co. Lowell. Mass.
HOLLISTER & CO
Na A ena ma ka Paeaina Hawaii.
100, . . . . Alanui Papu, Honolulu
2086 tf
-----------------------
OLELO HOOLAHA.
---
Mamuli o ko'u hookohu kupono ia ana mai i Agena no ka Moiwahine, ke kauoha ia aku nei na mea a pau e noho hoolimalima ana maluna o na aina ma na Pa Hale, a i hiki mai ka wa kupono e hookaa ai i ko lakou uku hoolimalima e loaa no au ma ka Hale Akala ma Pa Alii.
H. C. ULUKOU,
Agena no ka Moiwahine Kapiolani.
2265-tf
-----------------------
Olelo Hoolaha.
---
Ke hoolaha ia aku nei ma ke akea, e noho ana ka halawai kuikawa o na Ona Hui o Aliomanu, Papaa, Moloaa, a me Kaapuna, ma ka luakini o Anahola, Kauai, i ka la 1 o Maraki, 1890, hora o a.m. e hele nui mai oukou a pau no ka pono a me ko oukou pomaikai.
JAMES K APOLO,
Luna Nui.
Papaa, Koolau, Kauai.
2270-4t
-----------------------
Spelterine.
HE LAAU LAPAAU.
O keia kekahi o na laau lapaau @@ kai loa no na eha e piloi ana i na @@ holoholona a pau a me ke kanaka. @@ apono ia hoi e kekahi mau ahahui @@ Amerika a me na wahi e ae.
Ua makaukau makou e waiho @@ na hooiaio i na poe mahiko a me poe malama lio maloko o keia a@@ me na hoomaikai.
HAWAIIAN BUSINESS AGEN@
Kahi o na alanui Papu a me Kalepa.
2257 3m
---------------------------------------
Hoolaha Hou.
HUI LAKOHAO PAKIPIKA
(KAUPALENAIA.)
Kihi alanui Papu me Kalepa.
---
Ke kono ia aku nei ka lehulehu holookoa, na Lede maka palupalu a me na Koonimana o ke kulanakauhale alii a hala loa aku i ko @@ mokupuni, e aui mai i na
WAIWAI MAKAMAE HOU!
-- I KUPONO NO NA --
Makana La Kulaia a me Mare!
--- :: ---
Na Lako aniani o na ano a pau.
Na kiaha, na pa, na omole wai, a pela aku.
Na Kii Nunui Kauhale no na Home.
He mau kii i pai ia me ka noeau iloko o na waihooluu like ole,
nona ke kumukuai haahaa loa, he $2.50.
Na Ipukukui Kauhale Nani
O na ano a pau, mai ke nui a ka liilii.
Na Laau Kii, e hana ia ma ke kauoha.
--- :: ---
Mamuli o ka wae akahele ia ana o keia mau waiwai, ua hiki loa ia makou ke kaena ae, o ka
Helu Ekahi keia o na Waiwai Makamae i ike ia ma Hawaii nei.
2262 1y
----------------------------------
B.F.EHLERS & CO.,
PAINAPA.
---
Poe Kuai i na Ano Lole a Pau.
Helu 99 alanui Papu. - Honolulu.
---
Ua loaa mai nei, ma keia mokuahi Austaralia he mau waiwai ano hou loa, oia hoi: Na Kakinia, Kinamu, a me na Kalakoa o kela a me keia ano. Nolaila, e kuai makepono aku ana makou no na kumukuai haahaa loa.
Pahu Hale Leta 351. Bel@ Telepone 274.
-------------------------------------
KA AGENA OIHANA HAWAII.
---
No. 68 ALANUI PAPU KIHI O ALANUI KALEPA, HONOLULU. @@
HE AGENA OIHANA, A ME AGENA OHI DALA NO NA @@
---
KEENA OIHANA.
Na Waiwai paa - kuai a hoolilo aku, a me auhau uku ana.
Na Hale hoolimalima, Rumi, Keena, Aina e hoolimalima, a aelike @@ na uku hoolimalima o na ano a pau.
Na Moraki e ae ia ma na ano waiwai a pau.
Na Pepa kuleana aina, e kakau a hooponopono ia me na Pepa a pau e pili ana ma ke kanawai.
Kope a me ka Unuhiolelo ma na olelo a pau iloko o keia aupuni.
Na Panihakahaka ola, Hale, a me na waiwai o na ano a pau i na Ahahui Pan@@ hakahaka helu ekahi.
Na Malama ana i na Buke a me ka hooponopono ana.
E haawi ia no ka mikiala no na Ohi aie ana.
Na Gula, Kala me na Bila kikoo dala, kuai a hoolilo.
Na Hooponopono Hale Dute e pili ana i na waiwai mai ko na aina e mai.
Na Ukana o kela a me keia ano, e kuai a hoolilo aku.
Na Kauoha o na Mokupuni, e hooko ia no me ka eleu.
O na hana a pau a na makamaka e haawi mai ana no ka hooko aku i ke kauoha, e hooko no me ka eleu @ me ka mikiala.
Agena Oihana Hawaii
2170 1yr. Mar.