Ka Nupepa Kuokoa, Volume XXIX, Number 31, 2 August 1890 — Page 1
| This text was transcribed by: | Arnold Hori |
| This work is dedicated to: | Bishop Museum; Natural Science; Botany |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXIX, HELU 31. HONOLULU, POAONO, AUGATE 2, 1890. NA HELU A PAU, 2296
HOOLAHA LOIO-
NELLIE M. LOWREY.
Notari no ka Lehulehu.
----:A HE:----
Luna Hooiaio Palapala a me na Palapala Hoohiki.
Keena Hana me W. R. Kakela Loio ma ka aoao makai o ka Hale Leta, Honolulu 2241-3y.
CECIL BROWN.
LOIO A HE KOKUA MA KE KANAWAI?
ne Agena Hooiaio Palapala no ka Mo hupuni o Oahu
KEENA HANA: Ma alanui Kalepa
tf.
E G. HITCHCOCK.
(AIKUE HIKIKOKI).
LOIO A KOKUA MA NA MEA A PAU E
PILI ANA MA KA KANAWAI.
E ohi ia no na Bila Aie, me ku awiwi
HILO. HAWAII.
2114. 1yr.
A. ROSA.
(AKONI)
Loio a he Kokua ma
ke Kanawai.
Luna Hooiaio Palapala.
Keena hana, ma alanui Kaahumanu.
GEORGE P. KAMAUOHA.
He Loio a he Kokua ma ke Kanawai.
--A HA MEA--
A N A A I N A .
E loaa no ma Kohala Akau, Hawaii.
2001 1y
W R. KAKELA.
LOIO A HE KOKUA MA KE KANWAI
He Luna Hooiaio Palapala.
tf
ENOCH JOHNSON,
(Enoka.)
He Loio a Kokua ma ke Kanawai,
Imua o ua Ahahookolokolo a pau o keia
Aupuni.
Luna Hooiaio Palapala Kope o ka
apana o Kona, mokupuni o Oahu.
Keena hana, helu 15 alanui Kaahu manu, ma ke keena mua iho nei o W. C. Achi.
2263 1y
WILLIAM C. ACHI.
Loio a he Kokua ma ke kanawai mua o na Aha a pau o keia Aupuni.
He Notari no ka Lehulehu a Boroka no na waiwai paa
Keena Oihana, Helu 36, Alanui Kalepa, Honolulu, Oahu
2262 tf
WILDER & CO. (WAILA MA.)
Mea huai papa a me na lako huhulu hoi o na ano a pau, a me na ma no pono a pau a ho hale.
Kihi Alanu Moiwahine me Papu
JAMES M. MONSARRAT.
(MAUNAKEA.)
LOIO A HE KOKUA MA KE KANAWAI
He Luna Hooiaio Palapala.
E hana ia no na Palapala Kuai. Palapala Hoolimalima, a me na palapala pili kanawai e ae na ka olelo Hawaii. Dala no ka hoaie ma ka moraki ma na waiwai paa.
KEENA HANA: Hale Pohaku hou ma ka aoao ma Waikiki o ka Halewai, Alanui Kalepa.
J. T. Waterhouse,
(WALAKAHAUKI.)
Halekuai o na Lole Nani Panio
Lakohao,
Na Lako Hana Mahiko,
A PELA AKU HE NUI WALE.
Alanui Moiwahine, - - Honolulu
2262 1y
NANEA KAMAHAO
O KE
KEIKIALII
ROMEALA;
KA
Ui Kila Mageneti
O Parameri
Ka Nani e haule ai ka Honua;
Ka Mahina Meli o Salaredina;
Ka La alohi o Mulisedera;
Na Kulu Koko kamahao Ekolu.
Na Ui Hookelakela o ke Ao holooka.
Na Nani Puuwai Uahoa o ka Honua nei
A O KE
Kila Mageneti o ke aloha--"O Parameri no ia."
A aia i ke kiko waena o ua kumulaa@ va-bila ala, e kau haaheo ana he wahi opuu-pua va-bila, ka opuu pua hoi a Romeala i hooheno hou ae ai:
"O oe ko'u hoa lai ke kaunnu,
I ke kai mawehe ili a ka maiihini."
E like me na hana mua a ua keiki'lii nei i na ui mua pela no oia i haaheo nei i na ui mua pela no oia i haaheo hou iho ai i keia ua, a ma ka olelo pokole ana ae, ua pakolu ka noho alii o Parameri i ka lanakila ma o kona hooilina kalaunu la, (Romeara) a o keia mea paha ka mea i olelo ia ai:
"O'u mau hoa ekolu i ka puali
I ke alialia liu o Mana,
Gouve-hete iho oe, ha-gi-ha-gi no."
Nolaila, mahope iho o ka haaheo ekolu ana ae o ke keiki'lii Romeala i ka lanakila ma kona aoao hoomaikai hope aku la oia i ke annaina me keia mau olelo:
"Ua haaheo ae nei o Romeala he ekolu manawa o ka lanakila, a no ka hope loa o kana mau hana, ke kono hope aku nei ia i ke anaina e leha aku ko oukou mau maka ma ka paia hikina o ke keena a e ike no auanei oukou, na ke pohihihi iloko ona e puana mai keia mau olelo, "na ui kamahao iloko o ka lewa'na hoku hele oluolu eha iloko o ke aouli Ano e makaala, a e hoolohe pono i ka leo o ka pukaua o ka lanakila."
Alaila kahea ae la o Romeala me ka leo moakaka: E ka paia hikina kamahao o Sapeira, e wehe i ke pohihihi iloko ou, a e ka pua hooheno i ke kuluaumoe e ala, eia au ua hiki mai, ahea la oe onioni ae, oiai o kou aloha no eia me a'u, a ua makaukau hoi au e haha aku i ke kupaa o kou puuwai, no ka mea ua ike aku la au eia oe ma ka'u pae-opua, a ke hooheno ae au,
Hao na ke-pa hau o Lihue
Huki kapakahi na kaulawaha o Haleauau,
Maholehole i ka uhu a ka lio
Holo, lilo i ke kula o kanoenoe,
Momomoe hewa paha auanei kaua
Hihihina lalau i Moeawakea."
"Ae eke aloha, aole io no oe he ipo okoa, aka o ka mea i o me ka inoa ke Alaaumoe o na pua, Auwe--o ke Alaaumoe io ka oe o na pua alaila, ua eo oe ia romeala a hookahi mea i koe o ke kino kamahao a hoea mai, a o Romeala ke hoa e lealea ai."
I ka hooki ana iho o Romeala i kana mau olelo, olapa koke mai la ka uwila, nakolokolo ae la ka hekili me ka ikaika no ka hoike ana aku imua o na kupua o ke aupuni o Aina Ala, ua kahulihuli ka papa o Maukele, a o na hoku-hele o Kealohilani, ua hopipi ko lakou alohilohi i ke suita aila hoopahee i ka welowelo a ke keikialii Romeala o Parameri a oia ka ua poe kupua la i naka haalulu iho ai me ka weliweli nui no ka loea o ke ao holookoa; aka e ka mea heluhelu e hookuu aku kaua ia lakou pela, a e hoomau aku ko kaua kamailio ana no mua o ko kaua moolelo.
A nalohia aku la na hana hookalakupua a ka uwila me ka hekili, ia manawa no i hamama koke ae ia ka paia hikina o ua keena la a ike ia aku la ke kihapai pua o Sapeira e waiho kahelahela mai ana me kona mau luhiehu nani o na pua like ole, a o ko lakou mau ea aala wainuhea ke hooheno mai la ia i na aa loke ihu o kamahele me keia mau kanaenae:
"Po wale ke kini o Hilo i ke ala,
Puia i ka lehua me ka maile,
Lei kahiko ia o kuu aina,
O Panaewa mokulehua nui hoaeae.'
Oiai keia mau haawina ae la o ka nani e hooheno ala imua o na maka o kamahele, puana hou ae la o Romeala i keia mau olelo:
"He oiaio o na laau a me na launahele aala e ae o kela kihapai, ua noa ia ia'u nei, ke hoopa ma na kanawai o Alahe, a o kela laau e kupono ala iwaenakonu o ke kihapai ua kapu ia ia'u aole e hoopa; no ka mea i ke sekona a'u e hoopa ai he oiaio e make ana au e like me ka make ana o na anela haukae aka, ma ka inoa haaheo o Dubelo ke alii nui o ka po ke lawe nei o Romeala a haaheo iho i ka pua o kela laau iwaenakou o ke kihapai ma ka olelo ana he hae olioli no ke aloha, e kuikahi ai ka lewa me ka honua."
I ka pau ana o keia mau olelo a Romeala, ku ae la oia a hele aku la no kahi a ke kihapai kamahao e ku ana a iloko o kona mau luhiehu i nalo aku ai ua loea hookelakela ala a i ka hala ana o kekahi mau minute hoea mai la oia me ka pua "Hooheno Aumoe" (night blooming) ma kona lima, a iloko o na kunou a me na hoohie aka ana a ua kila mageneti nei. noho iho la ia iluna o kona noho, me ka hoopuka pu ana i keia mau olelo.
"E ka pua Hoheno Aumoe, eia au ke hoonoa nei i kanawai i kau paa loa ia ai maluna o oukou, aole hoi e a'e ia ko oukou mau mokuna; aka, e ka pua kamahao, o ka mea i hanau ia e ka wahine he hapa kona mau la, a ua piha me ka popilikia."
"Nolaila ma ke kaupaona ana ia'u a me ko'u hoa hookelakela noeau, ke hai aku nei au, eia au o--
Hakoi wai o Auki--ma ke ano he loea hookelakela no ka honua, a o kuu hoa o ka naueue a hoa hoi o ka inea aia oia ma ka hapa o na aupuni honua a me ka lewa i huiia; a i mea e ike ia ai ka moho lanakila o maua nolaila ke muki lehelehe nei au ia oe ma ke ano ua ikea ka nani iloko ou, alaila hooki iho la ua loea nei i kana mau kahoahoa.
Ia Romeala i hoomaha iho ai i kana mau olelo, ia wa oia i hoomau iho ai i kona mau lehelehe me na lihilihi palupalu o ka pua "Hooheno Aumoe,' a iloko o ka imo ana a ka maka, nalo aku la ua pua 'Hooheno Aumoe' ala, a ma kona wahi he pua hooheno aumoe okoa me kona mau kiionohi e hele ai a--
Lihilihi lehua makanoe,
Pehia e ka ua wali ka nahele.
A e ka mea heluhelu, wali io aku la ka nahele i neia hooheno aumoe, a wali wale ka hoi ka lihi kai o Ohele he ihu lio wale no ia, a o keia ka hoi he kihei pili maoli e mehana ai ke aloha kakia iwi, nolaila ua hooheno io aku la no.
Pohihihi paha oe e ka mea heluhelu no keia hooheno aumoe a ka mea kakau e poahi nei, alaila eia ka pane: Aole keia he mea okoa, aka o ke kino maoli no ia o kela pua hooheno aumoe a kaua i ike mua ae nei, a nona hoi ka inoa a kaua e hoomanao iho ai o ke Alaaumoe o na pua, nolaila ua maopopo aku la paha keia hooheno aumoe ia oe e ka mea heluhelu, alaila e hoi hou ae ko kaua kamailio ana ma ke alahele pololei o ko kaua moolelo.
Oiai ua ui Alaaumoe ala e ku hooheno ana i ka waahila, ua awala e mai la no oia i na mana ai a Wahie e hele ai a kanono pono i ka puniu lae o ke keikialii Romeala, a ina no he holona ina ua kala kahiko i poeleele mua ai ka la, aole hoi e hihi he Dubelo elua oia i poni ia no ke ao holokoa; nolaila ua lilo na olelo uahoa a me na hana hookelakela a ua ui Alaaumoe ala i mea ole, a oia ka ua loea kila mageneti ala i hookuu iho ai i kana ipu aila e pahee malie i ka welowelo, a i ka wa a ua keikialii la i kuupau iho ai na iniha he mea oiaio e ka makamaka heluhelu, ua nahaha a weluwelu liilii ka puuwai hao kila o ka ui Alaaumoe, a o kona kupaa ua hiolo iho la ia ilalo a palahe ka palu me ka puana ana ae i keia mau olelo:
'O Romeala! O Romeala ka helu ekahi o ka hookelakela a puni ke ao, a o Parameri hoi ke pookela a puni ka honua; no ka mea, wahi hou a ua ui la, "i ka leo no wau kupiliku--paa ole mai ka manao uhu ke uwale aku."
A ma ka olelo pokole ana ae no kaua e ka mea heluhelu, ua haulehia ua ui la malalo o Romeala e like me ka haule ana o na ui ekolu, a o na huaolelo kanaenae no ka lilo aku o Romeala i ipo na ua hooheno aumoe nei, o ia na huaolelo i puai ae mai na lehelehe mai o ka ui Alaaumoe.
ROMIANO;
Naita Hapakeko
O NA PALI EIWA.
Haku-alii Korila o na luahuna,
A LOLE
Ke Keikialii Kamehai loa me Italia.
MOKUNA III.
KE KEIKIALII OPIO MAALEA--KA MAHUKA ANA NO KONA OLA.
Oiai na la o Romiano e noho pio la, ua noho iho la ka aha kuka a na alii o Pelekane no ka noonoo ana i ka hoopai o ua Hapakeko nei, a iloko o na kukai olelo hahana ana, ua hooholoia iho la e hoopaahao ia o Romiano a pau ke ola; aole ma ke ano e hana oia i panai no kana mau hana ino, aka, i kumu e hiki ai ke hoolakalaka ia oia a pau kona manao uhu mahope o kona makuakane, a e lilo hoi oia i keikialii e hana ana i ke kaulike a me ka pololei
Oiai, wahi a Uilama ka mea nana keia olelo hooholo; he mea hilahila a he hana haahaa loa ka pepehi ana i ke keikialii oiaio o Italia, ka mea nona ka nohoalii mahope aku o kona makuahine. Nolaila o ka hana kupono wale no e hana aku ai e hookuu aku iaia ma ke ano he keiki alii oiaio no Italia nei aka koe nae kona hookuu lanakila loa ia ana aku me ke kiai ole ia.
A ke ole au e kuhihewa, aole no paha e loihi loa na la e lilo no oia i opio maikai, oiai o keia mea ana i hana ai, ua hana oia me ka maopopo ole iaia o ka pone a me ka hewa.
Mamuli o keia olelo a ke alii opio Uilama, ua lokahi ae la ka manao o na mea a pau me ka hooholo hou ana ae. Ia laua e hoi aku ai no Pelekane, e lawe pu aku laua (Uilama a me Rare) i na Romiano nei ilaila, a na laua e malama iaia a hiki i kona wa e laka ai no ka huli hoi ana aku e noho ma ke kalaunu alii o Italia.
Ua lilo keia olelo hooholo hope i mea maikai i na alii opio o Pelekane a ua hooholo iho la laua e lawe pu ia Romiano me laua no ke ao a hoomaa ana iaia mai ka noho na ahiu mai a i ka hooponopono aupuni kaulike ana iwaena o na aupuni nui o Europa.
Nolaila e like me ka olelo hooholo a ka aha kuka o na 'lii, ua hookuu ia ae la o Romiano mai ka noho paahao ana a i ke kulana o ke kanaka lanakila, a koe no nae kona hele ana e like me kona makemake iho.
Oiai aia mau ma na ooao o ua opio la he elua mau koa kiai no ka malama ana iaia, a o na palena a pau o ka pa alii, ua noa iaia e like me ka hiki i kona mau au ke lawe.
A ma ka nana io aku i ua opio la iloko o ia mau la, me he mea la ua ano akakuu mai kona manao uhu no na hana puni koko, aka e ka mea heluhelu, o keia mau hana a ua Romiano nei, he mau hana maalea wale no ia.
No ka mea, wahi a ua opio nei iaia iho, e maalea au a nui e like me ka hiki i loaa ia'u, a iloko auanei o na la pokole, e hoohoka aku no au i keia poe me ka hila o ko'u mau wawae.
Ua kuahaua pu ia ae la iloko o ia mau la a ka opio Romiano e noho ana ma ke ano paahao, ke kuahaua alii o ka maluhia a me ka pono kaulike o na aupuni o Europa, a o ke kuahaua alii hoi a ka mea nona keia moolelo i wawahi ai a weluwelu liilii me kona ikaika, a hahao iho la ma kona makalua i keia mau olelo.--
"Owau o Romiano ka haku powa o Europa--ka mea nana e hoonauoue ae i na aupuni o Europa--a e hoohalulu i ka papahele o ko lakou noho na aupuni kaulike."
Ua haawii he mau ahaaina hauoli e ke aupui o Italia mahope iho o ke kukala ia ana o ka maluhia no ka hanohano o na liona o Pelekane, ua ai me ka lealea, ua inu me ka hauoli, a iwae. na o ka lehulehu i hoea ae ma ka papaaina, o ka opio Romiano pu kekahi, e nuu ana i na kuhinia malalo o kona koloka hookamai o ka maalea nui.
Ua pahola pu ia ae he mau olelo hoomaikai no ua mau liona la mai kela a me keia hoa ai mai o ka papaaina, a o na kahoahoa ana no ke ola o ua mau moho la, ua lawa mauia me na kiaha aniani o ka waina o ke aloha a me ka hauoli palena ole o na hoa ai.
Ua hoomauia na lealea ana a hiki wale i na hora liilii o ke kuluaumoe, ua hoi aku kela a me keia me ka maluhia no ko lakou wahi iho.
I ka hoea ana mai o kahi la ae, ua pahola ia ae la ka lono a puni ke kulanakauhale alii o Italia, e i ana.--iloko o na la pokol@ e haalele mai ana na liona o Pelekane i kona mau kaiaulu, a huli hoi aku no ko lakou aina kulaiwi, ke aupuni hoi i akena ia puni ke ao, "aole e napoo kona la."
Iloko o keia mau la e lohe ia nei ko na keiki Pelekane huli hoi, aia ke keikialii Romiano ke hoolala la i kona alahele e puka ai me ka maalea nui, a ma ka nana aku i na hana a ua keikialii la, me he mea la, aole oia iloko o kekahi o na mea ano like e manao ia aku ai, eia oia ke hoao nei e mahuka mailoko aku o kona noho pio ana.
Aka a hiki mai nae i ka la e haalele iho ai ua mau alii opio la (Uilama a me Rare) me ko laua mau pualikaua i na kaiaulu o Italia, ia wa i ike ia iho ai ua lele ka manu mai ka punana ae.
Ua lilo keia nalowale honua ana o Romiano i mea pahaohao loa ia, a mahope o na huli ikaika ia ana, ua loaa e aku la ke kino make o na koa kiai iaia e waiho ana me ka manaonao nui iwaena o ka luhiehu o na pua o ke kihapai nani a uluwehiwehi.
Ua loaa pu aku no hoi ke kino make o ke kao kiai puka ua kukulu ia iloko o ka hale kiai me he kanaka ola la ke ano. I ka wa i loaa aku ai o keia mau kino make, akahi no a maopopo ae i na mea a pau ua mahuka maoli o Romiano.
Nolaila me ka hoohakalia ole iho, hoouna aku la na alii opio o Pelekane i ko laua mau koa no ka huli ana ia Romiano mawaho aku o na palena o ke kulanakauhale alii, me ke kauoha paa ia lakou e hopu pio iaia a hoihoi aku iloko o ka pa alii.
Mauli o keia kauoha alii ua hooko aku la na koa no ka hanu ana i ka meheu o ka Hapakeko o na pali eiwa, a i ka malu ana mai o ka la, huli hoi aku la lakou me ka nele, a hoike aku la i na alii, aole i loaa ke keikiahi Romiano ia makou.
Mamuli o keia mau olelo a na koa, ua kau ka lia anu maeele maluna o ke aloalii o Italia, oiai ua maopopo ia lakou, e hana aku ana keia keikialii i na hana puuwai eleele loa, oiai ua lawa na hoike oiaio ma o na kino make o na koa kaua i ike mua ae nei, a o kekahi hoi o na hana i hiki ole i kekahi opio ke lawelawe me ka makau ole e like me ko ua Romiano la.
No ka loaa ole ana o ua Romiano la, ua hoopau ae la na liona Pelekane i ko laua manao huli iaia, a haalele iho la laua ia Italia no Pelekane ka pahu hopu o ko laua manao.
I na alii opio me ko laua mau pualikoa i pae maalahi aku ai no Pelekane, ua noho iho la laua me ka maluhia no Europa holookoa no kekahi mau makahiki, a i ka elima o na makahiki o ka noho alii ana o ka maluhia, aia hoi, poha ae la he lono weliweli a puni o Europa, aia o Romiano ke keikialii kamehai o Italia ke ulupa mai la i na mana kaua o Italia me ka weliweli nui, ke olo la ka pihe mai o a o.
O ka poha ana ae o kela lono hoolele hauli a puni o Europa, ua like ia me kekahi puupuu ikaika loa nana i paluku aku na mana moi o na aupuni a puni o Europa, a naka haalulu ae la lakou iloko o ko lakou mau kamaa me ka weliweli nui.
A iwaena o ia heluna o na poo kalaunu i hoalii ia ko lakou mau houpo e ka hopohopo o ka makau, o na alii puuwai liona no kekahi o Pelekane (Uilama a me Rare) a oia ka laua i hoouna palapala mai ai i ka naita Apala, ka alihikaua nui o Italia ia wa, me ke kauoha paa e hopu pio koke ia o Romiano e pono ai, a e li koke ia oia ma ka amana o ka make.
Aka e ka mea heluhelu, a hala ae la kekahi mau makahiki o ko ua naita Apala nei hoao ana e hopu pio ia Romiano, ua kau mai la ka makau i ua naita la, a oia kana i palapala aku ai i kona mau alii opio me keia mau olelo o ka ho-he wale:--
O ka hoao ana e hopu pio ia Romiano, he mea paakiki loa ia mai ka olelo ana ae e hoo ko ia me ka hana nui ole a me ka pilikia ole.
(Aole i pau.)
Gaberiela Lenoa
----O KA----
Puali Kahiki Imeperiela o Farani.
Koa Opio Iloko o na Ulia o ka Laki.
Kukala Kaua a Perusia no
kekahi Wahine.
He Moolelo no ke Au-Weliweli
Nui o Europa
O na olelo koi a ke keikialii o Posetama i ke aliikoa Auseturia e nana ia kela mau malihini iloko o ke kaa, oia ka ua aliikoa la i pane mai ai ia Gaberiela i keia mau olelo,--
"E like me ke kauoha o ka'u oihana no ka malama i ka maluhia o na alahele akea ma ke kahua hoomaha o ke kiai, ua kono ia au e ninau aku ia oe i ka pili o kela mau malihini elua iloko o ke kaa, ko laua wahi e hele nei, a me ko laua mau palapala ae holo."
"E oluolu mai oe e Herr Aliikoa, o ko'u kaikuahine kela me kona lede ukali e hele ana no Auseturia, a eia mai ko laua mau palapala pasapota," wahi a Gaberiela i pane aku ai me ka haawi ana aku i ko laua mau palapala ae holo apuka ana i kakau ponoi ai mai Berelina mai.
Ua nana iho la ua aliikoa nei i na palapala pasapota no kekahi mau minute, a pane hou mai la i keia mau olelo,--
"Ua pololei no keia mau palapala pasapota o kou kaikuahine a me kona lede ukali, e like nae me ka hiki ke haawi ia na hilinai maluna o kou pasapota e ka Monisiua," wahi a ua aliikoa la i pane mai ai me ka nana pono ana ia Gaberiela mai luna a lalo, apane hou mai la no,--
"Aka hoi e ka Monasiua, maluna o keia kulana ou e ku nei, he ano pohihihi ka huli ana aku i na mea mahope o kou kua, a oia ka'u e kaumaha nei no ka hooko ana aku ana i ka makemake o ke kauoha, e kono aku ana au ia oe no ko'u ikemaka i na helehelena o kou kaikuahine malalo o keia mau kumu; Malia paha, aole kela he mau wahine io malalo o ke kino kane i komo i ke kahiko o ka wahine ma ke ano kiu, e like hoi me kou kulana a ke keikialii o Posetama e kapa nei ia oe, Nolaila, ke noi nei au ma ka inoa o ka Emepera o Auseturia iloko o ke kukala kaua, e nana mua au i ka helehelena o keia mau malihini ina he mau wahine io laua."
Na keia mau olelo a ke aliikoa Auseturia i haawi aku i ka manaolana ole ia Gaberiela, aohe o lakou kulana hou o ka pakele i koe, e like hoi me ke loihi a ke Keikialii o Posetama e ku mai ai imua o ko lakou mau alo. Ina aole ke keikialii malaila, ina aole he manao kanalua ia Gaberiela no ka ae koke ana aku i ke noi a ua aliikoa la e ikemaka oia i na helehelena o kana mau malihini elua. Malalo o keia kumu, ua koho mua iho la o Gaberiela iaia iho, e ulu mai ana he haunaele nui i ka wa a ke keikialii e ike ai, o ka wahine keia a ka Emepera Napoliona i haawi mai ai i wahine mare nana, a ua hoouna loa ia hoi i Berelina no ke kali i kona hiki aku i ka la o ka hoohui i hookahi kino ma ka berita maemae o ka mare.
"Ke noi nei au ia oe e Herr Aliikoa malalo o ka hanohano o ka olelo a kekahi aliikoa Farani," wahi a Gaberiela i pane aku ai. "E ae mai e hookua aku i kelamau malihini ma ko laua alahele a e lawe pio aku hoi ia'u e hoomalu e like me ka loihi a ke kanawai e mau ai o kona mana. Aole kela he mau kino kane aka he mau lede keia o ke kulana kiekie a'u i makemake ole ai e hoikeike wale ia ko laua mau helehelena ma ke ano hoohaahaa maluna o na alanui akea."
Ua kaumaha loa au e ka Monasiua, i ka hiki ole ia'u ke hahaki iho i ka waiho moakaka loa o ke kauoha. E wehe ia ka uhimaka o kela mau lede, a e nana ia ko laua mau helehelena ina aole laua he kino kane. A ina e hooko ole ia ana ka'u kauoha ia oe i keia manawa, alaila e kahea koke ana au i na koa e huki ia kela mau malihini iwaho nei malalo o ka iakika," wahi a ua alukoa la.
I kela wa i puka koke mai ai ka lede Madimosele mai loko mai o ke kaa, a pane ae la i keia mau olelo ia Gaberiela me ka leo haahaa.--
"Ua lawa kau mau hooikaika ana no maua e ka Monasiua, no ka hoopakele ana ia kakou. A owau ponoi hoi ke hoike aku i ko'u mau helehelena ia Herr Aliikoa,--aole maua he mau kino kane a me ke kiu."
I keia wa kea lede Madimosele i huli pololei aku ai imua o ke aliikoa Auseturia, a o kona kua hoi i ke keikialu o Posetama, huki kuke ae la i kona uhimaka iluna a nana pono aku la i na maka o ke alukoa Auseturia.
I ka ike ana mai la o ua alukoa nei i ka helehelena wahine o ka mea hiki ole iaia ke hoohewahewa iho, ua haawi mai la oia i ke aloha kunou me ka haahaa, a pane mai la i keia mau olelo,--
"Ua hookoia ke kauoha, a ua lawa hoi na hooiaio ana malalo o ke kanawai e ka Madimosele."
I ka wa a ke aliikoa Auseturia e hai nei i keia mau olelo, ua nee mai la ke keikialii a kokoke mahope o ka lede opio, a ua ike lihi mai la nae oia i kona ano, i ka huli ana mai o ua lede nei e hoi no ke kaa, ua hopu koke mai la ke keikialii i ke kihi o ka uhumaka a huki aku la iaia, a waiho wale ana na helehelena o ua kaikamahine nei i ka malamalama alohilohi o ke awakea.
"He kipi! He kipi!! E Herr Alii koa!!!" wahi a ke keikiahi i puoho ae ai me kona ano o ke kanaka pupule. "He kipi! He kipi!! Ke lawe aihue ia nei kuu wahine mare e keia kanaka kiu."
I keia wa i pii ae ai ka inaina wela ia Gaberiela, a iloko o ka hiki ole iaia ke uumi iho, ua lele aku la oia me ka mama nui maluna o ke keikialii, hopu ma kona kania-i a hamare i kekahi mau puupuu ma kona maka, me ka walawala pahu ana i ka honua a kuhea ae la i keia mau olelo,--
E kokua! E kokua!!" wahi a ke keikialii iloko o kona leo nawaliwali.
Ua holo koke mai la na koa a hookaawale i na mea hakaka, oia ka ua keikialii la i ala ae ai iluna a pane hou ae la i ke aliikoa me ke koko e hapala ana ma kona mau papalina,--
"He oiaio ka'u i olelo mua iho nei, he kanaka kiu keia e lawe aihue nei i kuu wahine mare, mai----"
"He hohe nui oe a ka laepaa, a he hoopunipuni ino hoi a ka pupule wahine. Mai keia la, e nele mau loa aku ai oe i ka wahine ole."
(Aole i pau.)
MALALO O KA MAMALU.
E kala kuu aloha ia ia'la ihuanu,
Ia Bela ka inoa anuhea;
Auume ka iini o ka'u eo ana nona,
Malalo o nei mamalu kahiko.
Keu a ka eena a ka pilipili ole mai,
Ka'u ia i kaomi iho ai iloko.
Pale ko'u hai aku he luina aukai.
No ka moana kaiuli lipolipo.
Ka maua holoholo ma na ala neoneo
I kela po ua nui'a ka'e mai,
Ma kuu aoao oia i pili mai ai,
A hoonani ae la au i ka ua.
"O! keu a ke kawakawa,--O, dia,
Ole lea au i ike mamua."
O ka'u ia e nalu ana iloko lilo,
E ua iho a mau loa no
Nani nae ka panee hou o kuu olioli,
Ka olapa a uwila ka hakui hekili;
Oiai o kana puliki oluolu i ko'u,
Me na lima liilii a paa loa.
" Aole oe e makau," wahi a'u iaia,
" O, no sa--mahalo," wahi ana.
A hehe iho la ka aka i ka lealea paha,
Me ka nee ana mai a pili loa.
A olapa ka uwila a hakui ka hekili,
Keu ka ulu o kuu hauoli;
I ka mao ana ae a kalae pa ao,
Ma kuu poohiwi kona poo
Ma kuu poohiwi kona poo
Ma kona mau lehelehe ka'u honi.
Owai ke manaoio, na kela po ua,
I haawi mai nei pomaikai.
J. Peluvisa, ka luina, me ka mahalo.
Malalo o nei mamalu kahiko;
I eo ai ka puuwai laahia o Bela
Me ke ki o kela Parediaso.
--B. G.