Ka Nupepa Kuokoa, Volume XXX, Number 17, 25 April 1891 — Na Anoai o ka Ua Loku o Hanalei. [ARTICLE]

Na Anoai o ka Ua Loku o Hanalei.

Ua loaa i ka mea kakau ka hoike ana aku i keia mau wahi hunahuna mea hou o ka ua loku oia iho keia: Ua hoopihaia makou na makamaka o keia aina i ka hauoli nui i ko makou luna makai hou oia o Kepalo, mamuli o kona eleu a mikiala hana, a he loea maopopo hoi oia ma ke kanawai, a ke hana nei oia e like me ke kauoha a ke kanawai. E hoomau ia oia ma ia wahi. Ma ka la 2 iho o Mei, oia ka Poaono, e ike ia ana ma na kauhale a pau o Wainiha ka a o na imu puaa mamuli o ko lakou hoomanao ana, o ka la 3 o Mei o kela makahiki a me keia makahiki oia ko lakou la kulaia, a e hana ia ana na lealea kupono ma ia la na na keiki lalawai o ia aina. Mawaena o Wainiha a me Hanalei, ke hana ia nei ke alanui hou; i keia mau la, kokoke e holo ke kaa lio a hiki i Wainiha a me Haena. Mahalo i ka papa alanui o Hanalei. I keia mau la, ke noke nei na wahine o Wainiha i ka makaala i ka maliwai no ka hoohiehie ana i ka i-a kaulana o ia aina, oia ka hinana a ke noke nei makou i ka hoonuu. D KANEALII. Wainiha, Apr. 18, 1891.