Ka Nupepa Kuokoa, Volume XXX, Number 29, 18 July 1891 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

ME

Ko Hawaii Paeaina i Huiia

No ka Makahiki, - - - $2 00

No Eono Mahina, - - - 1 00

Kuike ka rula.

            O na Olelo Hoolaha a pau e hoounaia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia. O ka uku he $1.50 no hookahi puka ana o ka Olelo Hoolaha hookahi iniha ke akea, a he 50 keneta no na puka ana pakahi mahope aku.

HOOPUKAIA E KA

HAWAIIAN GAZETTE CO.

H. M. WHITNEY, Luna Nui,

J. U. KAWAINUI, Luna Hooponopono.

POAONO, - - - - IULAI 18, 1891.

 

KULA SABATI.

IULAI 19. III.—3. Ka Iesu hana mua. Ioane 2:1—11.

I KE kolu o ka la, he ahaaina mare ma Kana i Galilaia; ilaila ka makuahine o Iesu.

            2 Ua oleloia o Iesu a me na haumana ana, e hele i ua ahaaina mare la.

            3 A nele i ka waina, i aku la ka makuahine o Iesu ia ia, Aohe o lakou waina.

            4 Olelo mai la Iesu ia ia, E ka wahine, o ke aha la ia ia kaua ? aole i hiki mai ko'u manaw.

            5 Olelo aku la kona makuahine i na kauwa, o ka mea ana e olelo mai ai ia oukou, oia ka oukou e hana'i.

            6 E waiho ana malaila na ipuwai pohaku eono, no ka hoomaemae ana o ka poe Iudaio, he iwakalua kumamahiku, he kanaha paha na galani e piha ai ka kekahi, ka kekahi.

            7 I mai la o Iesu ia lakou, E hoopiha i na ipuwai i ka wai. Hoopiha iho lakou i ua mau mea la, a piha loa.

            8 I mai hoi oia ia lakou, E hookahe mai ano, a lawe aku i ka lunaahaaina. A lawe aku la lakou.

            9 A i ka hoao ana o ka lunaahaaina i ka wai i hooliloia i waina, aole oia i ike i kahi i loaa'i, (o na kauwa, nana i hookahe ka wai ka i ike,) kahea aku la ka lunaahaaina i ke kanemare,

            10 I aku la ia, Lawe mua mai no kela kanaka keia kanaka i ka waina maikai, a nui ko lakou inu ana, alaila i ka waina ino: ua malama ka oe i ka waina maikai, a keia manawa.

            11 Hana iho la o Iesu i keia hana mana mua ma Kana i Galilaia, a hoike ae la ia i kona nani; a manaoio aku la kana poe haumana ia ia.

PAUKU GULA.

            Ioane 2:11. Hana iho la o Iesu i keia hana mana mua ma Kana i Galilaia, a hoike ae la Ia i kona nani.

OLELO HOAKAKA.

            Kolu, oia no mahope o ko Iesu kahea ana ia Pilipo a me Nataniela, Ioane 1:43. Ua noho o Pilipo ma Betesaida e like me Petero. Ua huli koke o Pilipe ia Nataniela mai Kana mai. O Baretolomaio kekahi inoa e ae no Nataniela.

            A pau kana mau hana ma Betabara, ua hele pu o Iesu me kana mau haumana i Galilaia. Ahaaina mamuli o ke ano hana maa mau o ka poe Iudaio, no kekahi mau la, Kin. 29:22 Ma ka Poakolu ka oihana mare no na kaikamahine; Poaha, no na wahine kanemake. Kana, he kauhale ma Gailaia, eha mau mile ma ka hikina akau, mai Nazareta aku. Kefr-kenna, kona inoa i keia wa, ke alahele i ka lokowai o Galilaia. Makuahine, ma ke ano he makamaka e kokua ana i ka paa mare. Oleloia, Oia hoi konoia no ka hoohanohano ana ia Iesu, ke kumuao hou i kipa ai me Natamela he mea pilikoko no hoi paha oia i ka paa mare. Haumana, eono paha. Nili, no ka nui paha o na malihini hou. Wahine, he inoa hoohanohano keia, aole hoohenehene, mamuli o ke ano kamailio maa mau o ka poe Iudaio. Kana, he hoike ana'ku i ka pau loa ana o ko Iesu makuahine hoomalu ana iaia. Manawa, no ka hoike ana aku i kona ano Akua ma kana mau hana mana. Olelo, me ka manao e hooko ana o Iesu i ka Mana noi i ka wa kupono. Ipuwai, ma ke keena mawaho no ka holoi ana i na lima. Ua maa mau i ka poe Iudaio e ai pu e like me ka ai poi ma Hawaii nei me na manamana lima. Aole no ka waina kela mau ipuwai. Hoopiha, aole he mea kupaianaha ka nui o kela wai. O keia ano piha he hoailona o ka palamimo ole ma ko Iesu hoololi ana i wai i waina. Lunaahaaina, kekahi makamaka e hoomalu ana i na hana. Inu a ona paha, a pau ka ike pono ana. Aole nae i oleloia ua ona kela poa hoaaina. He olelo hoike wale no keia i ke ano maikai o ka waina a Iesu i hoolako ai. Hana mana mua, aole ma Kana wale no. O keia ka mua o na hoailona lehulehu o ko Iesu ano Akua a me kana oihana hoola. Manaoio, oia no ka paa loa ana o ko lakou manao e pili ana ia Iesu ka Mesia i oleloia ma ke Kauoha Kahiko.

HE MAU NIELE.

I.—O Iesu ma ka ahaaina mare,

p., 1—4.

            Heaha ka olelo e pili ana i ko Iesu hana ma ka la ekolu mahope o kona kahea ana ia Pilipo? Mahea o Kana? Heaha ka aha malaila? Owai kekahi mea kokua? Owai kekahi poe i konoia? Heaha ka manao a Mana i kamailio aku ai ia Iesu? Pehea kana olelo pane? Ehia mau la no ke kaahele ana mai Ieriko a hiki i Kana? Ma keia ano hana ua hoapono anei o Iesu i na hana lealea paha, na hana luana paha? Ua kue anei ke ano haipule i ke ano oluolu? Ua nui ae nei ko kakou hoike ina paha ua launa pu o Iesu me kakou ma ka kakou mau hana? He oluolu maoli anei kekahi hana lealea hiki ole ia Iesu ke hoapono? Heaha kekahi mau kumu i kupono no ka Iesu haumana mua ma ka ahaaina mare? Pehea e hiki ai ia kakou ke launa pu me Iesu ma ko kakou mau home?

II—O Iesu me na kauwa

p., 5—8.

            Heaha ka olelo a Maria i na kauwa? Ua hoole anei o Iesu i ke noi a kona makua? Heaha na ipu mawaho o ke keena aina? Pehea ko lakou ano? Pehea ko lakou kulana a me ko lakou nui? Heaha ka Iesu kauoha i na mea lawelawe? Pehea ka lakou hana? Heaha ke ano hana maa mau o na Iudaio ma ka lakou mau ahaaina? Heaha ka manao ma ka waiho ana i na ipuwai ma ke keena? Ua hoolei anei ka manao o ka poe Katolika, o Mana ka mea lanakila ma ke noi ana iaia e huikala ae i ka poe hewa. Ua hoikeia anei o Iesu ma keia moolelo ma ke ano he mea i hoomaluia e kona makuahine?

III.—O Iesu a me ka waina,

p., 9—11.

            Ua lilo ka wai i aha? O wai ka poe ikemaka? Pehea ka olelo a ka lunaahaaina? I aha keia hana? Heaha ke ano maoli o na haumana? Pehea i pili ai ko Iesu nani i keia hana mana? Pehea i pili ai keia hana mana i ka manaoio o ka Iesu mau haumana? No keaha la ka nui o keia waina? Ua lilo anei ka wai a pau loa maloko o na ipuwai eono i waina? He wai ona anei keia? Ua inu anei o Iesu i ka waina? He hewa anei ka inu ana i na waiona? Ua like pu anei ko Iesu inu ana i ka waina me ka inu ana i na wai ona ma na halekuai rama? He pono anei i kekahi mau manawa ke inu i ka waina? Ina no paha o Iesu i keia wa ma Hawaii nei he mea hoole waiona anei oia, aole paha? Pehea ko Iesu hoololi ana i ko kakou ano? Ioane 3:3. Rom. 12:2. Pilipo 9:21. Pehea keia mau hana mana ma ke Kauoha Hou, he mau hoailona anei lakou e hooiaio ai i ko Iesu ano Akua?

Iulai 26. III—4. O Iesu a me Nikodemo. Ioane 3:1—17.

O KEKAHHI kanaka o ka poe Parisaio, o Nikodemo kona inoa, he alii o na Iadiao.

            2 Hele aku la i o Iesu la i ka po, i aku la ia ia, E Rabi, ua ike makou he kumu oe i hele mai nei mai ke Akua mai: no ka mea, aole e hiki i kekahi kanaka ke hana i keia mau hana mana au e hana nei, ke ole ke Akua me ia.

            3 Olelo mai la o Iesu ia ia, i mai la, Oiai, he oiaio ka'u e olelo aku nei ia oe, Ina e hana hou ole ia ke kanaka, aole e hiki ia ia ke ike aku i ke aupuni o ke Akua.

            4 Ninau aku la o Nikodemo ia ia, Pehea la e hiki ai i ke kenaka ke hanauia i kona wa kahiko? e hiki anei ia ia ke komo hou iloko o ka opu o kona makuahine, a e hana ia mai?

            5 Olelo mai la o Iesu, Oiai, he oiaio ka'u e olelo aku nei ia oe, Ina e hanau ole ia ke kanaka i ka wai, a me ka Uhane, aole hiki ia ia ke komo iloko o ke aupuni o ke Akua.

            6 O ka mea i hanauia ma ke kino, he kino no ia; a o ka mea i hanauia na ka Uhane, he uhane ia.

            7 Mai kahaha kou naau i ka'u i olelo aku ai ia oe, E pau oukou i ka hanau hou e pono ai.

            8 Ke pa nei ka makani i kana wahi i makemake ai, a lohe no oe i kona halulu, aole nae oe e ike i kana wahi i hele mai ai, aole hoi i kana wahi i hele aku ai; pela no hoi na mea a pau i hanauia e ka Uhane.

            9 Olelo aku la o Nikodemo, i aku la, Pehea, la e hiki ai keia mau mea.

            10 Olelo mai la o Iesu, i mai la ia ia, He kumu oe na ka Iseraela, aole anei oe i ike ia mau mea?

            11 Oiaio, he oiaio ka'u e olelo aku nei ia oe, O ka makou mea i ike ai, o ka makou ia e olelo nei, a o ka makou mea i nana'i, oia ka makou e hoike aku nei; aole hoi oukou i hoomaopopo i ka mea a makou e hoike nei.

            12 Ina ua olelo wau i na mea o keia ao, a manaoio ole oukou, pehea la oukou e manaoio ai, ke ole wau ia oukou i na mea iloko o ka lani?

            13 Aohe kanaka i pii iluna i ka lani, o ka mea wale no i iho mai, mai ka lani mai, o ke Keiki a ke kanaka, o ka mea iloko o ka lani.

            14 A e like me ka Mose kau ana i ka nahesa iluna ma ka waonahele, pela e pono ai ke Keiki a ke kanaka e kaulia'a;

            15 I ole e make ka mea manaoio ia ia, aka, e loaa ia ia ke ola mau loa.

            16 No ka mea, ua aloha nui mai ke Akua i ko ke ao nei, nolaila, ua haawi mai oia i kana Keiki hiwahiwa, i ole e make ka mea manaoio ia ia, aka, e loaa ia ia ke ola mau loa

            17 Aole no hoi i hoouna mai ke Akua i kana Keiki i ke ao nei, i hoohewa'i oia i ko ke ao nei; aka, i ola'i ko ke ao nei ma o na la.

PAUKU GULA.

            Ioane 3:16. No ka mea, ua aloha nui mai ke Akua i ke ao nei, nolaila ua haawi mai Oia i kana keiki hiwahiwa i ole e make ka mea manaoio Iaia, aka, e loaa iaia ke ola mau loa.

OLELO HOAKAKA.

            I ka wa koke mahope o ka ahaaina mau ma Kana, ua hele pu o Iesu me kona makuahine i Kaperenauma. Ua kali iki oia malaila. I ka ahaaina moliaola, ua hele aku oia i Jerusalema. Malaila ua komo oia iloko o ka pa luakini a hookuke aku la oia i ka poe kuai iwaho o ka pa. Ua nui ke kahaha ana o na kanaka Iudaio i kona mau hana a me kona mau olelo, ua paulele kekahi ia ia, ma ke ano Kaula paha, ma ke ano kumu paha, ma ke ano Mesia paha. O kekahi mea manaoio oia no o Nikodemo. Ma keia haawina Baibala, ua hoikeia ko Iesu ano hana hoonaauao ma ka hoohuli ana i keia alii Parisaio i ka manaoio hoohaahaa.

            Parisaio, he ano hoomana Iudaio, e noho ana ma ke ano haipule hookiekie. "Alii," kekahi lala o ka aha kiekie, i kapaia Sanhederui, he poe alii 70. "Rabi," oia hoi, kuu Haku Kuu kumuao. "Hanau hou," loaa ke ola ano hou, aole i loaa palua ke ano kanaka. "Ike" a ake a komo. "Wai a me ka Uhane," aole lawa ke ano noho hou, ano hana hou, aka nae, ka mea ano nui oia no ke ola ano hou o ka uhane. "Kino," mamuli o ke ano o na mea i ike makaia, me na hemahema ino o ke ano kanaka i keia wa. "Makani," ake mamuli o ka naauao o na kanaka, aka nae, mamuli o ko ke Akua manao hookele ke pa mai nei ka makani. "Keia ao," me na kumu hooiaio maanei. "Lani," ma na ano kupaianaha, aole hiki i na kanaka ke hoomaopopo iki. "Kieki a ke kanaka," ka inoa punahele o Iesu, Dan. 7:18, na hana oihana a ka Mesia i manaoia ma ke Kauoha kahiko. "Kauli'ia" ma ke kea kekahi, ma ka pii ana iluna kekahi, Ioane 12:32,33. "Manaoio," hilinai, paulele, hookipa, hahai, pili paa.

HE MAU NIELE.

            1. Ke kumuao mai ka lani mai, pp. 1—3. Owai kekahi kanaka Iudaio i hele ai ia Iesu i ka po? No keaha la kona hele po ana? Pehea kona, olelo hoike? Pehea ko Iesu olelo pane? Pehea ka manao ma ka olelo Hoohanau houia,? 2 Kor. 5:17. Pehea ka manao ma ka olelo e pili ana i ka ike ana i ke aupuni o ke Akua? Heaha ka manao mua o Nikodemo e pili ana ia Iesu? Ua hoohalike aenei o Iesu i na ano elua o ka hanau ana paha? Heaha na kumu hooiaio no ko Nikodemo paulele ana ia Iesu? He mau hana mana aenei keia ana o ka paulele ana i kekahi kahuna, ma ke ano he mea lawelawe no ke Akua?

            II. Ka mea emi malu, pp. 4—11. Pehea ka manao mua o Nikodemo ma ka lohe ana i ka Iesu olelo e pili ana i ka hanau? Pehea ko Iesu olelo pane i ka ninau a Nikodemo ? Ua kanalua anei o Nikodemo ma kana ninau elua, ua hoole anei paha oia? Pehea ko Iesu olelo hoohalike e maopopo ai kona manao oiaio? No ke aha la ka hoole ana i ko Iesu olelo hoike? 1 Kor. 2:14. Pehea ke ano like o ka pa ana o ka makani, ke ano hou o ke ola uhana? Heaha ke kumu hookahi e hookomo ai i kekahi iloko o ko Iesu aupuni? Hiki anei i kekahi ke ike pono i kona hoohanau hou ia ana? Gal. 5:22, 23. Pehea ko Iesu iho ana mai ka lani mai? He pono anei ke paulele wale ia Iesu? Heaha kou kumu o ka paulele ana i ka olelo a ke Akua? Hiki anei i keia olelo ke hoohemolele i kanaka?

            III. Ke ala hookahi o ke ola hou. p 12—17. Pehea na mea o keia ao, na mea o ka lani? Pehea e naauao ai ma na mea lani? No ke aha la ko Mose kau ana i ka nahesa? Nahelu 21:8, 9. No ke aha la ko Iesu kaulia ana? Heaha ka mea i loaa ai i ka mea manaoio mai a Iesu mai? Pehea ke ano like o ka hewa a me ka laau make? Pehea ke aloha o ke Akua i hoikeia ma ka laau kea o Iesu? Heaha keia haawina aloha mai ke Akua mai? Pehea ke ano maopopo o keia kauoha e manaoio ai ia Iesu? Owai ka mea ikemaka hookahi mai ka lani mai? Pehea ka hopena o ka mea manaoio ole?

HE MAU MANAO PILI.

            1 Ua kupono anei na kanaka e komo wale i ka pomaikai lani?

            2 Pehea e hoomakaukau ai ia lakou.

            3 Heaha ke ola hou i loaa ai mai a Iesu mai.

            4 Ua hoahewa anei o Iesu i ko ke Akua aloha ia kakou.

            5 Pehea ka pili ana o ka manaoio i ke ola hou.

 

Ka Huakai Makaikai

A KAUKA TALAMAGE I KA AINA HOANO.

[Hoomauia.]

            Hoomaha iho la makou maanei no kekahi mau la, a ma ka po ana iho, hoala ae la na hale lole o makou, a moe iho la makou ma ke kumu o ka halepakui o Babela, a he pohu maikai ia po me ka lai malie, a he mahana maikai hoi ke ea, a pela wale no makou i nanea ai ahiki wale i ko makou pau ana i ka hiamoe ma keia wahi kanaka ole, a i ala ae ka hana ua ao.

            Ala ae la ko makou kakahiaka, a hele aku la no ka auau ana ma na wai o Euperate, a me na lako lawaia no a makou mai ka loko mai o Galilaia mai ma Palesetine, ua lawaia iho la makou ma ka muliwai o Euperate, a aole i liuliu loaa iho la ka makou ia, a aole no nae i like me ko ka loko o Galilaia, he ano okoa no keia mau ia, ua ano like no me ko ka muliwai Misisipi ma America, a me keia mau ano laki o makou, hoi aku la makou no na hale lole o makou, hoomoa iho la a paina iho la, o ka hora 9 paha ia o ia kakahiaka.

            Pau ae la ka makou paina ana, luana iki iho la me na maka no nae e leha ana iluna o ua towera kamahao nui wale la o kela mau la i liu wale aku la, oiai he mea maopopo no ma ka nana ana i ka moolelo o keia mau hana i hanaia ai, ua hookumuia keia mau hana i ka B. C. 2247.

            A mai kela B. C. i koliu wale aku la a i keia A. D. 1891, (ka manawa a kakou e ola nei) he 5895 makahiki ia.

            Ma ka buke wehewehe hoi a Robert Sears i hiki pu ai no i keia wahi hookahi no i ka A. D. 10000, ua hoike mai oia, aia no ua halepakui la ke ku poomuku la me ia mau koena mai no i hoohiolo ia ai e Iehova ke Akua, a nolaila ke manaolana nei no ka mea unuhi, a hiki no i keia A. D. a kakou e ola nei, aia aku la no ua halepakui la ke ku poomuku la ma ka aina o Sinara e like me ia i hoikeia ma Kinohi.

            He elua o makou la maanei, a i ke kolu o ka la, hele iki ae la makou ma ka hema iki iho, a ma kekahi kahua palahalaha, ike iho la au me ko'u mau maka i ka maikai o keia mau wahi, a komo mai la ka haohao iloko o ko'u noonoo ana, aka no ka nui loa o ko'u pahaohao ana, nolaila ui ae la au i ko'u mau hoa, oiai ua maopopo mua no i kahi o makou ka hapa nui o keia mau wahi a makou e hele nei; oiai au me keia haawina, ua ui ae la au:

            Ea, heaha hoi ka mea i hanaia maanei i hanaia ai kela wahi a iliwai like?

            O keia ke kahua o ka hale o na akua Belehazara, ana hoi i hoopio ai ia Iohoiakima i ka B. C. 606, a lawe pu ia mai ai he mau ipu mai ka hale mai o ke Akua ma Ierusalema, a ma keia wahi i ku ai ua hale la me kona mau akua iloko nei, a hookomo pu ia aku ai me ua mau ipu la o ka luakini o Iehova iloko nei.

            Ke pii mau nei ka ka piha o ko'u mau noonoo ana me ka nui o na mea kupanaha a'u e lohe nei—ae, o keia kahi o ke Akua i kau ai i Kona inaina maluna o ka poe e kulou ana i na kii leo ole, a he lapuwale maoli no.

            Ke nana ae la au me na alawa akahele ana, me he la, o na hiona i koe iho, na pohaku i kalaiia e waiho liilii ana, na hapa o na pa pohaku kalaiia, na pohaku uwinihapa nunui a liilii, a e ulu ana na nahelehele loloa o na ano he nui, a ke kokolo malie ae la na hoomanao ana iloko o'u me he mau lima la o kuu Makua Lani e haha malie ana ma kuu umauma e nape malie ana i kau a mea o ke pahaohao i ke kupaianaha maoli no o na hana o ia au kahiko.

            O keia mau mea a pau a makou e ike nei, me he mau kolamu la ia no kekahi nupepa hou loa i piha i na mea hou he nui, a oia ka'u e heluhelu pakahi nei me ka malie loa, i na hana kupanaha hoi a na keiki a kanaka i hoao ai me ka naau paakiki ia Iehova o na Kaua.

            Me lakou no Oia i hoike pinepine ai i na hoailona kupanaha, a i kahi wa ua hoopoha maoli mai no Oia i Kona leo Akua; he keu maoli no a o ka paakiki o ka naau o na keiki a kanaka. Oki loa aku hoi keia wa e holomoku ana me he waikahe nui la e haluku ana.

            Me keia mau nanaina kamahao ua noho iho la au ilalo e kakau ai a e kaha ana i ke kii palapalaaina o keia wahi ma ke ano nui, a leha hou ae la ko'u mau maka ma o a maanei, aia no ka ua eli ia no kekahi mau wahi, no ka huli ana paha i na mea kupanaha he nui i hunaia, e na poe kaahele he nui i hoea mua ai ianei me ke ake nui ana e loaa na mea kupanaha he nui malalo o ka lepo, e laa na pohaku i kalaiia a kahakahaia me na kii he nui, a i palapalaia hoi me na huaolelo Caledea maluna o ia mau apana pohaku a i hiki ai hoi ke hoolaha ae i ke akea e like me kakou e ike nei ia mau kii ma kekahi mau buke wehewehe Baibala.

            No makou iho, aole paha i kupono loa ia makou e uwaa hou aku i ka lepo o Babulona nei, ua lawa ko makou ike ma keia mau hiohiona e kakau mai nei i na maka o kamahele.

            Ma keia mau wahi kokoke no a pau e pili koke mai ana no ka aina o Peresia, Kaledea, Media, Babulonia a me kekahi mau aina e iho, a ua apo ia keia mau mahele aina a pau malalo o ka inoa hookahi, "Aina Hikina."

            Eia kahi mea apiki, ke nanea loa nei makou i ka hele imna, a ke hala loa aku nei na wahi opeope o makou i hope loa a me na wahi holoholona o makou, nolaila he mea pono e hele pu no makou me na ukana no o makou a kahi e moe aku ai, a i ka mole kamahele. Nolaila paipai aku la au e hoi hou makou i hope, a ua hoi io aku la makou i hope, a i ka hora 2 p. m. ua hoea hon aku la makou i ke kahua hoolulu o makou.

            Manao iho la makou e hoaumoe hou, no ka mea ua ahiahi, a ua holo ia manao ia makou pela me ka nui no nae o ko'u kanalua a ano minamina e ake aku la no e hele no imua e nuu ai i na kupanaha i koe aku, aka, alia e hoomanawanui no hoi, aia no he manawa ke hoea mai la ike hou no makou i na kupanaha i koe aku, oiai ua po ka la.

            Nolaila, ma ia koena la ke hooipo pu hou nei no makou me ke towera o Babela.

 

J. HOPP & CO.,

Na Poe Hana ma na Lako Hale o na ano a pau!

Hana Moe, Na Uluna Pulu, Etc.

Noho no ka Hoolimalima ana, na Lako Hale me ke kumukuai emi.

Honolulu. 2331 tf.

 

Hale Hana Kopa o Honolulu.

            Ua paa aenei ka Hale Hana Sopa Mahu Hou o ka poe no lakou na inoa malalo iho a ua makaukau lakou e hoolawa aku i ka poe piepiele i na

Kopa Maikai Loa Maoli,

I hookomo ia iloko o na Pahu 100 paona, mai ke 42 a 56 auka Kopa pakahi.

Ke hooia nei makou i ka oi o la MAIKAI o ka makou KOPA mamua o na Kopa o waho mai.

            Ua kuni ia mawaho o ko makou mau Pahu me ka hoailona "HONOLULU SOAP CO.," a e

Kuai ia e na Halekaui Liilii a Pau.

HUI HANA KOPA O HONOLULU

M. W. McChasn@y & Sons,

            Na Egona.

2@40 1@r.

 

Hoolaha Kumau.

 

PAPA! PAPA!

AIA MA KAHI O

Lewers & Cooke

(LUI MA),

Ma ke kahua hema o Alanui Papu me Moi.

E LOAA NO NA

PAPA NOUAKI

O kela a me keia ano,

Na Pani Puka, na Puka Aniani, na Olepelepe, na Pou, na O'a, na Papa Hele, na Papu Ku, me na Papa Moe he nui loa.

NA PILI HALE O NA ANO A PAU

A me na

WAI HOOHINUHINU NANI

O na ano a pau loa.

Na Balaki o na Ano he Nui Wale

            Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana no ka

Uku Haahaa Loa,

E like me ka mea e holo ana mawaena o Laua a me ka Mea Kuai.

Hele Mai e Wae no Oukou iho.

2331-3m.

 

Ka Waiwai o ka Hilinai

Saseparila Ayer

AYER, laau Saseparila kai kaulana i hilinai nuiia no ka hoomaemae koko ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau. O keia

LAAU SASAPARILA, no loko ae ia o ke aa Sasaparila Honedura maoli; ua loaa ka mana hoomaemae ma o ka hui puia ana me kekahi mau aa laau e ae, a me kekahi mau mea no loko o ka honua a me ka hao.

HE koko inoino a nawaliwali a nei kou? Ua awili pu anei me na ano mai ikaika? A ua hui pu anei me na wai awaawa hoopehu. Na keia

LAAU e hoomaemae ia mau mea ino a pau a maikai. O na kauka lapaau a pau o Amerika i ike i ke ano o ka Ayer Sasaparila ua olelo lakou, aole he mea maikai e ae no ka hoomaemae koko ana mai na mai i awili puia, aka o keia wale no. No ka

HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka Ayer Sasaparila wale no ka laau nana e hoomaemae me ka hakalia ole mamua ae o kekahi ano laau e ae. O ke

KOKO ino hakuhaku a nawaliwali hoi kona holopono ana ma ke kino, e hoomaemae ia ana a e hooikaika pu ia no hoi ma o ka ai ana i keia Laau Sasaparila a Ayer. He maalahi a he

MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mai i keia laau mamua o kahi mau laau e ae

A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i, a pela aku. He nui na laau hoomaemae koko i hoolaha wahahee wale ia malalo o na inoa he lehulehu, aka, o na hilinai a me na hooia wale no a ke ao holookoa, maluna o ka

Ayer Laau Sasaparila,

I HOOMAKAUKAUIA E

Kauka J. C. Ayer & Co., Lowell Mass.

HOLLISTER & CO.

Na Agena ma ka Paeaina Hawaii.

2@1-@.

 

Hoolaha Kumau.

 

KAKELA ME KUKE

KA HALEKUAI NUI

O NA

WAIWAI LIKE OLE.

NA LAKO KAMANA!

E laa na Pahiolo, Koi Hole, Hamale, Koi nui a me liilii, Kila, Wilipuaa, Rula, Apupu, Kui o na ano a pau, Kala-kaa, Hao Hoopaa P@

Pohaku Hoana, Koa, Loi Ilio, Kaulahao Ilio, Pahi, Upa, Pahi-umiumi, Kalapu, Kope-hulu, Pulupulu, Pepa Kaa-kala, Lina Hao, Ami, Keehi a me

Kaula Opu.

PALAU!

O na ano he nui wale.

Oo, Ho, Kopala, Po, Kipikua, Hao Kope, @ Ho, a pela aku, Kua Bipi, Lei Bipi, Kaulahao Bipi, Uwea Pa, Uwea Koloawe, HAO PILI PIULA Kaa Palala, Ipu Hao, Ipu 'I'i, PA PALA@

Makau me Aho Lawaia

Iliwai, Papa Holoi, Kopa Ala, Kaula Kuaina, Hu'akai, Ehi Wawae, Hulu Pena, Kopaholoi, a pela aku, Pena Wali, Kini nui a me liilii o na ano a pau, me ka Pepa Kuhikuhi, Pena Keokeo, Aila Pena, Aila Hoomaloo, Vaniki Kaa a me Vaniki Moe,

Pena Hoomaloo

A ME ANIANI HALE.

Aila Mahu, Aila Mikini, Aila Hamo Ili, Aila Kaa, Inika Kamaa ; Pauda, Kukaepele, Kiano Pauda, Uiki Ipukukui o na ano he nui a lehulehu.

NA PAKEKE POI

O KE

ANO HOU LOA!

Na Mea Piula!

MIKINI HUMUHUMU.

MIKINI A WILCOX ME GIBBS,

Na Mikini a Remington.

            He nui loa na mea hao me na ukana e ae o na ano a pau, aole hiki ke hai p@ aku, hewa i ka wai na maka ke ike.

LAAU LAPAAU KAULANA LOA A

DR. JAYNE

Laau Hoomaemae Koko, Laau Hoopau Naio, Laau Kunu, Penikila, Huaale, Paakai, Laau Hoopau Hi me

Na Laau Hamo,

A PELA AKU, A PELA AKU

KAKELA & KUKE.

2@1-@tf