Ka Nupepa Kuokoa, Volume XXXI, Number 6, 6 February 1892 — Hanee ke Alanui Pali o Nuuanu. [ARTICLE]

Hanee ke Alanui Pali o Nuuanu.

I ke kakahiaka Poakahi aku nei, Feberuari 1, ua loaa mai na lono mai Nuuanu mai, ua hanee ka pali o Nuuanu, mailuna loa iho o ka welelau pali, a ua lawe pu aku la he kanaono kapuai paha o ke alanui hou i eli ia ai e ke au Hoomaemae, me ke koli pu mai a ololi loa ma kekahi wahi o ke alanui, aneane kapuai wale no ke akea. Ua hoopilikia ia ka hele nui ana ma ke alanui pali i keia mau la aku nei.

Ma ke kakahiaka Poalua mai, ua ahai hou ia mai he lono i ke kulanakauhale nei, ua ike ia aku kekahi kino make e waiho ana ilalo ok a pali ma ka aoao Koolau o ka pali. Ua hoouna ia ka Hope Ilamuku Meherten e nana i keia poino o kela kino make. I kona hiki ana aku me kekahi mau makai me ka manao e lawe mai i Honolulu nei e koronelo ai, aia hoi aole e loaa aku oiai aia ma kela aoao o Koolau, a he nui ka makani a me ke alai a ka hanee ana o ka pali, hiki ole ke lawelawe aku mai keia aono aku. Nolaila, ua hoouna ia ka lohe telepone i ka Lunakanawai Apana o Koolaupoko e kii mai i kela kino make. Ma ka hora 4 me hapa o ke ahiahi, ua kapalulu mai ka waea kamailio e hoike ana, ua loaa ke kino make he lapana a ua auamo ia i ka Hale Hookolokolo o Kaneohe e koronelo ai. O ua lapana make Ia, he paahana oia no ka mahiko o Heeia. Ua manao ia, ua hele oia no Honolulu, a oiai paha e nihi ana ma kahi nihinihi o ke alanui ua kapeke a lele i ka pali. Ua noho ke kiure koronelo, a ua hoopuka i ka lakou olelo hooholo, ua make oia i ka haule ana i ka pali.