Ka Nupepa Kuokoa, Volume XXXI, Number 14, 2 April 1892 — Page 4
| This text was transcribed by: | Brandi |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
Me
Ko Hawaii Paeaina i Huiia
No ka Makahiki…$200
No Eono Mahina…100
Kuike ka Bala.
Hoopukaia I Ka
Hawaiian Gazette Co.
H. M. WHITNEY, Luna Nui,
J.U. KAWAINUI, Luna Hooponopono.
Poaono,.. Aperila 2, 1892
KULA SABATI.
Aperila 17. Na Hana a ke Akua a me ka Olelo a ke Akua. Halelu 19:1-14
Ke hoakaka mai nei na lani i ka nani o ke Akua;
Ke hoike mai nei ke aouli i kana hana io.
2 Ke hai mai nei kela la i keia la i ka olelo,
Ke ao mia nei kela i po i keia po i ka ike.
3 Aohe leo, aohe olelo ʻ
Aohe i lohea ko lakou leo.
4 Ua pae aku la ka lakou ao ana i na aina a pau.
Ua hiki aku la ka lakou olelo i na welau o ka honua:
Ma loko o lakou i kukulu ai oia i halelewa no ka la;
5 Ua like no ia me ke kane mare e puka mai ana mai kona keena:
Ua olioli ia me he kanaka ikaika la e heihei ana.
6 Mai ka welau mai o ka lani kopa hele ana;
A ua hiki kona poai ana i na welelau o ke ao:
Aole mea i hunaia i kona wela.
7 O ke kanawai o Iehova, he hemolele no ia, e hoohuli ana i ka uhane;
O ka olelo a Iehova, he oiaio no ia, e hoonaauao ana i ka mea naaupo.
8 O na kapu o Iehova, he maikai no ia, e hoohauoli ana i ka naau;
O ke kauoha a Iehova, he lealea no la, e hoomalamalama ana i na maka.
9 O ka makau ia Iehova, he maemae no ia, e oia mau ana no;
O na oihana a Iehova, he pololei no ia, a me ka pono wale io no.
10 He mau mea ia e makemake nui ia, aole ke gula, aole hoi ke gula maikai he nui wale;
Ua oi aku ko lakou ono i ko ka meli a me ka waihona meli.
11 A, ua aoia mai no hei kau kauwa o lakou;
No ka malama ana ia lakou he nui wale ka waiwai.
12 Owai ka mua i helu pono i kona lalau ana?
E hoomaemae oe i aʻu i na hewa i nalo.
13 E kaohi mai oe i kau kauwa mai na hewa nui, i pio ole ai au ia lakou;
Alaila e kupono au, a e kaawale hoi au i ka hewa loa.
14 I maikai ka olelo a koʻu waha, a me ka manao o koʻu naau,
Imua o kou alo, e Iehova, e koʻu Ikaika, a me koʻu Hoola.
PAUKU GULA.
Halelu 19:7. O ke kanawai o Iehova he hemolelo no ia, e hoohuli ana i ka uhane.
MANAO NUI.
E imi i ka naauao ma ka huli pu ana i na hana a me ka olelo a ke Akua.
Ina paha ua makemake ia he haawina no kea La Alahou o ka Haku, o ka pauku Baibala kupono oia no ma Mataio 28:1 - 20.
Ua haku o Davida i keia halelu no ka hoonani ana i ke Akua oiaio. Mai iaia wale no he olelo ao no na kanaka. Ua paa na maka a me ka noonoo o na kanaka, ke ole ka Palapala Hemolele, aole i ikeia ke Akua oiaio. Aole makemake na kanaka e ike i ko Akua maoli. Nolaila ua huli i hope kekahi hapa o keia lahui Hawaii, a noho ma kapa, me ka manao lapuwale, oia paha aole lakou i ike i ke Akua luaole, aole no hoi i ike ke Akua ia lakou. Aole pela ka oiaio. Ma ka huli ana i na manao o ke Akua ma kana mau hana a me kana Baibala, a me ka hooko ana i kona makemake ma keia ano hana wale no, ka pomaikai maoli no na kanaka. Ma ka hapa mua o keia halelu, ua mahaloia ko ke akua nani ma kana mau hana. Ma ka hapa hope, ua hoonani ia kana Olelo Hemolelo.
1. Lani, kahi i hoikeia ma na hoku ka mana loa o ke Akua hookumu, hooponopono no hoi. Ua loaa i kekahi mea huli na kanawai o ka holo ana o na hoku. Ia wa ua hauoli nui e kaena ana me ka noonoo haahaa, e olelo ana, "Ke manao nei au i kou mau manao, e ke Akua mahope ou." Hana, aole nae ma na lima e like me ka manao lalau o ka poe Moremona, e ao aku ana i ke Akua he mea kino no ia. 2. Hai, oiai aole no na hoku he elele, ua hoike aku nae lakou i ka naauao a me ka mana o ke Akua nona mai lakou. Ao, Ppo, aole apaapa, aole no he apaapani, ko laua mau olelo hoike. 4. Halelewa, ma ke ano he olelo hoohalike. I ka napoo ana o ka la, ua olelo ia, "ua opiopiia kona halelewe a mahuka aku ke ao." 5. Kanemare, no ke ano ikaika o ka la, oia na hoohalike ia, ka mahina me ka wahine, "ka Moiwahine o ka po." Heihei, ma kekahi keepena i hoike ia ka alaula ma ke ano he mea hooholokaa, me na hora 12 ma ke ano he mau lio, 7-9. Ma keia mau pauku he mau inoa eono no ka Palapala Hemolele. Kanawai, mai ka Moi mai, olelo mai ke kumu mai, kapu mai ke kahuna mai, kauoha mai ka makua mai, makau mai ka luna kanawai mai, oihana mai ka Haku mai. 12. Lalau, me ka ike ole i ke ano maoli o ka hewa, hewa, me ka ike ana i ka ino o ka hana. 13 Hewa nui, me ka hoomau ana i ka hewa, me ka mihi ole. Hewa ioa, aole i kalala
1. Ko ke Akua nani ma na hana, pp. 1-7. Heaha ka oiaio i hoikeia ma na lani? Heaha no na aouli mai? Pehea i pau ole ai? Heaha hekahi pauku kuhikuhi ma ke Kauoha Hou mai ka pauku 2 mai? Roma 10:18. Pehea i pili ai na manao? Heaha ka olelo hoohalike e pili ana i ka la? Heaha kekahi mau pomaikai ia kakou no ka la mai? Ua pono…
anei ka hoomana ana aku i ka la e like me na kahu o Lonoopuakau? O ka nani kumau o ka la, he kumu kupono anei ia no ka hoomana ana aku iaia ma ke ano heaha? Pehea e hiki ai ia kakou ke ike pono i ka nani maoli o ke Akua oiaio ma na lani? Ua kupono anei ka hoano ana i naʻlii ma ke ano he mea lani? Pehea e loaa ai na mea e kokua ai i ka ike Akua ma ka huli ana i na kanawai paa o na mea honua, a me ko lakou mau ano hana okoa? Ua lawa anei ka ike Akua no na mea o ka honua mai? He aha kekahi mau oiaio ano nui e pili ana i ke Akua, aole i hoikeia ma na mea lani ana i hanaʻi?
IL. Ko ke Akua nani ma ka Baibala, pp. 7-14. Heaha na inoa eono no ka Baibala ma keia mau pauku? Pehea ko lakou mau ano okoa? Heaha ke ano waiwai o ka Baibala i hookuku ia me na waiwai o na kanaka? No keaha la i oi aku na pomaikai mai ka Baibala mai, mamua o ko kakou noho kuonoono ana? Heaha ka uku no ka malama ana i na olelo ao o ka Baibala? Heaha ka Davida pule ma keia halelu? Heaha na ano okoa o na lalu, hewa, hewa nui, hewa loa? Heaha ka pule ma ka panina o keia halelu? Pehea e pono ai ia kakou ke huli i ka Baibala?
MANAO PILI.
1. He mea ono anei ka Baibala iaʻu?
2. Ua haalele anei au i koʻu mau hewa i koʻu wa i maopopo ai?
3. Heaha ka mea e noho alii ana ma koʻu naau, ka hewa paha, ka pono paha?
4. Ua loaa anei iaʻu ke ano kanaka hou ma ka manaoio ana aku i ke Akua hoola?
5. Ua pule anei au i ka pule maikai imua i ke alo o Iehova?
NANEA KAMAHAO
O KE
KEIKIALII
ROMEALA;
KA
UiKila Mageneti
O PARAMERI.
Ka Nani e haule ai ka Honua;
Ka Mahina Meli o Salaredina;
Ka La Alohi o Mulisedera:
Na Kulu Koko Kamahao Ekolu.
Na Ui Hookelakela
O KE AO HOLOOKA.
NA NANI
Puuwai Uahoa o ka Honua nei
A O KE
Kila Mageneti o ke Aloha -- "O Parameri no ia"
Oiai ua loea la ma kona alahele o ka makaukau nui no ka wa hope loa, aia hoi na minute no ka halawai ana he alo a he alo ua kokoke mai. O keia ka wa pihoihoi loa o ke Keikialii Romeala, a ua pana kapalili kona puuwai e pauma ala i ka iwihilo, me he la e hoomaoe ae ana i keia mau wahi lei lehua.
"Ka mailelauliii o ke kuahiwi Maile kaluhea kuu hoa ia,"
A i ke sekona hope loa o kana huakai i hiki mai ai i ka hopena, komo hope loa i na ipuka hao o Raianapo, a imua ponoi i kona mau kiionohi halawai mai la me kona mau ike kekahi halealii a ka nani launa ole, me he la e i okoa mai ana no i ua loea nei o ke ao -- "Noho ke ala i Hilo me ke onaona, Hoope ana i na lehua o Mokaulele."
Ae, e ka mea heluhelu; he halealii nani ia a me ka hihiu, he kilakila hoi a me ka hanohano e hewa ai ka maka ke ike, a ma kela a me keia kona mau aoao, he nani wale no ia me he wai la no Mana, a maluna o ua hale la i haawi aku ai ke keikialii Romeala i na nana ana me na maka pihoihoi o ka puuwai kapalili.
O ia mau minute a ke Keikialii hookelakela i pulelo hope aku ai ma keia aoao o ka ipuka komo hope loa o kela aupuni eha o Raianapo, oia ka wa a na leo aina nakolokolo o ka hekili i hamare iho me ka ikaika loa no ka hoike ana aku i ko Raianapo holookoa, eia he kupueu, a he hookalakupua ke hehiku nei iluna o na palena kapu o ko kakou aupuni a na ua mau leo hekili la o ka weliweli i hoopilipu aku i ko Raianapo mau kini, a ike aku la ua loea nei o ke ao i na kanaka e puhee liilii ana i o a ia nei.
O eia põe kanaka a ka loea o ke ao i ike aku la he poe kanaka ia a ke kupaianaha nui wale, oia hoi he poe kuapuu wale no lakou, keke na opu, a pekepeke pokole na wawae, wahi a ua loea nei o ke ao, he kupanaha, ua kaahele au a puni ke ao, aole loa au i ike i kekahi lahui kupaianaha e like me keia, a heaha la keia ano lahuikanaka, he poe Fere, (Fairy) anei keia? Aole, -- aole, aole keia oia poe, he poe liilii no lakou, aka nae, aole o lakou kuapuu e like me keia.
Me keia mau olelo a ua Keikialii Romeala nei iaia iho, ume hope mai ia oia i na mahele like ole o kona…
noonoo ma ka helu papa ana i na lahui makalii o ke ao holookoa a Alahe i hooulu mai ai maluna o ka honua, a i ka hope loa minoaka iho la ua loea nei o ke ao, a puana ae la i keia mau olelo.
Ha, ha o ka lahuikanaka ka keia o kela aina hoohiki o Kanaana, ka lahui hoi i piha i na momona he nui o ka honua, oia hoi ma kekahi olelo ia ana he "Meli hana momona." O keia mau olelo koho mua a ke keikialii Romeala a kaua e ike nei e ka mea heluhelu, ua pololei loa ia, a oia paha ka kaua e hoomanao iho ai i ka loea maoli o keia alii opio, malalo o na haawina kelakela o ka naauao.
Nolaila i ka manawa a ua loea nei o ke ao i hoopuka ae ai he Meli hana momona kela lahuikanaka kupanaha o Raianapo, hoomaikai hope ae la ia ma ka inoa o ke aupuni o Parameri, alaila luai hope ae ia ia i keia mau olelo.
O ke 52 keia o koʻu mau la hele o ka aea ana iluna o na aupuni eha o Raianapo a o ka hiki ana mai hoi o kaʻu huakai i ka huina helu o na ipuka komo he 366, ua ko ka mea i wanana ia noʻu e kekahi o koʻu mau kilo, aka, ua loaa nae iaʻu ka haaheo o ka lanakila o ka lilo ana he mea i nohoalii maluna o na panihao paakiki o Raianapo, Ua haule hoi o Raianapo a me kona mau panihao iaʻu iloko o na la hele he kanalima kumamalua, a he hookahi au panihao i koe e wawahi aku ai ke panihao paakiki e ike ia ai ke oolea o ke kila a me ka hao.
Aka e hele mua ka mea e pau ai kuhihewa a imua o kona paakiki e hookala ai ka oi o ko maua mau aoao pakahi iho, no ka mea nana e nohoalii ka hanohano o ka la. He puahiohio ana hoi, aia hoi meha laiku mai la na haawina hookalakupua o na minute aku i hala, a ia wa i ike ai aku ai ua keikialii Romeala nei e kamoe ana i kana huakai no ka halealii "Anapanapa Wailiula" o Raianapo ka pahu hopu. He mau kapuai koe alaila keehi aku na wawae o ke keikialii Romeala iluna o ka lanai o ka halealii Anapanapa Wailiula, aia hoi nalohia iho la na kanaka a Romeala i ike aku ai i ka holoke ma o a maanei o ka halealii, a o ka poe i halawai mai me kona mau minute, oia no na koa kiai maluhia e ku ana me ka hanohano piha o ka lakou oihano koa kiai, ua ku iho ke keikialii Romeala no kekahi mau sekona, alaila pane ae la oia i kana mau kauwa hoolohe, O ka lahuikanaka hookahi paha keia a Alahe i haawi mai ai maluna o ka honua, i haawi i ko lakou ola a me ko lakou ikaika a pau no ka pono a me ka hanohano o ko lakou nohoalii, a ma kekahi olelo ia ana he mea paakiki ka hiki ana e wawahi i ka paa o ko lakou noho aupuni me ka hoouka ole ia o kekahi kaua hahana, a ua olelo pu ia no hoi he pahuhuinaha-like ko lakou mau manao lokahi me he- Hau la no Heremona
Ka mea i haule ma na kuahiwi o Ziona.
Ae-i pane like mai ai na kulu koko ekolu, aka e ko makou haku, aole wale oia na mea i olelo ia no keia lahui, ua olelo pu ia keia lahui kanaka liilii he poe puni mele lakou, a e hosana mau ana lakou a puni ka makahiki me ka hoomana ole, a o ka lakou mau mele a pau e hosana ai imua o ke alo o ko lakou Moiwahine, oia no na kihapaipua nani o ke ao, na mahinaai pookela o ka honua a me na wahi puni ole o ke ao holookoa a lakou i aea ai no ka huli ana i na wai momona o na pua.
Ina kulu koko i hoike mai ai i keia mau mea i ke keikialii romeala, ia wa i lohe aku ai lakou i ke kani kohaihai mai o na leo mele me ka leo hone o na pila, a o ke mele a ke keikialii Romeala i lone aku ai, oia no kekahi o na mele kaulana loa o Arabia, ke kaahele o ke ao,--"Na po he hookahi tausani me hookahi."
Na keia mele a ke keikialii i lohe aku la, huai mai la iloko o kona mau hoomanao aloha ana no ka aina hanau ana i haalele hope aku la, e laa ke aloha o na makua, a me na nani he nui i hoomoamoa ia nona e ko laua puuwai makee keiki.
He nahenahe a me ka ilihia ua mele la e hookuu malie ia ana maluna o na eheu meha oia mau minute, a i ka wa i hoomaha iho ai, ia wa ke keikialii Romeala i haawi koke ae ai i kona loea puukani mele ma ka hookuu ana aku i kekahi o na mele kaulana o Parameri "ka honua kuewa--ke ao pahaohao."
He ilihia a me ka nahenahe kupilikii maoli no kela mele a ke kileo kani o ka loea o ka ao e hookuu la, a i ka hiki ana aku o ua mele nei i ka hopena, ia wa i ka hoahoa ae ai ua loea la o ke ao me keia mau olelo. E ke kiai maluhia o Raianapo, e ae mai iaʻu e ike aku i ko oukou Moiwahine malalo o ka hanohano o ka oihana, ka hookelakela o ke ao holookoa, a me ka loea o ka honua. O keia noi a ke keikialii Romeala imua o na koa kiai e holoholo ana ma ka lanai o ka halealii, oia ka kahi koa kiai i pane mai ai me na huaolelo o kalakala o ke pakike.
He Moolelo
NO
NIWELA!
KE
Kanaka Hana Pu o Mosekao
KA
Weli o ka Makakila.
Waladimira ka Moneka.
KE AUPUNI O RUSIA MALALO O PETERO KA NUI.
Ka Weli o ke Keneturia Umikumamahiku
MOKUNA X.
LIMAKOKO--UA IKE IA--RULEKA IMUA O DAMONOEA.
Huli aui iki ae la ke Kauna me ka nawaliwali, a me na papalina i hele a haikea a pane mai la:
"E kuu Ruleka hiwahiwa, ke hauoli nei kuu uhane no kou hele ana mai i oʻu nei. He nui koʻu makemake e hele mai oe, aka aole e hiki iaʻu ke kauoha aku ia oe, no ka mea aole au i ike i kou manao. He oiaio e Ruleka, ua hehena ia au a ua pupule hoi, nolaila, oiai au e haalele iho ana i keia nohoʻna, ke kala aku nei au ia oe me kuu puuwai a pau."
"Ua kala ia au. Auwe! E ae mai Oe e kuu Akua kiekie loa e hooloihi mai i ke ola o kuu hoaloha nei. Ua ike Oe e kuu Makua i na mea e lolii nei i kuu puuwai, oia hoi, e haawi mai i ke ola a e hooloihi hoi i na la o ke kauna ma keia aoao," wahi a Ruleka i pane ae ai me kona puliki hoomau ana i na lima o ke kauna.
"Ua lawa kou lokomaikai e kuu Ruleka, oiai ua hele mai la no oe e ike a e kuka pu me aʻu mamua o koʻu make ana. Nolaila e iho ana au iloko o ka luakupapau me ka hauoli nui," wahi a Demonofa.
I ka pau ana o keia mau kuka ana a laua ua iho makawaiu mai la ko laua mau waimaka, a mahope iho ua ninaninau pono aku la o Ruleka i ke kauna no ke ano o keia loli ana o kona maʻi, a owai la na poe nana e kiai mau loa ana iaia. Ua hoike mai la no hoi ke Kauna i na mea a pau, a i ko Ruleka lohe ana i ka inoa o Savotano ke kanaka punahele loa imua o ke Duke o Tula ua kulou iho ia kona poo ilalo me ka nalu nui ana i kona naau, a i kona kaana pono i kona mau manao ua loaa iho la iaia he kumu hoohuoi he hanai laau make ia paha ke kumu o keia pilikia. Hoomaka aku la oia e hoonohonoho i kana mau mea i kaa na pono ai imua o ke kauna, a o ia no hoi ka manawa i oili aku ai ke kahu wahine iwaho, oiai aohe on a makemake e noho pu iloko i ka wa a kela mau opio e kumakena ana.
"E hoomanao oe e Damonofa, he punahele loa kela kahuna Savotano i ke Duke, alaila e ninau iho oe, heaha la ke kumu i punahele loa ai kela kahuna limakoko i ke Duke? A ua lohe mai au he kanaka ino loa keia Savotano. Ina oe e make ana e lilo ana ke Duke o Tula i hooilina nou a he kumu ia e hoowaiwai loa ia aku ai oia. Oiai, eia ke ume liilii ia aku nei na loaa ponoi o ua Duke la. Ua ike no hoi oia ua aloha oe ia Roselina, nolaila imi iho la oia i kumu nou e make ai, me kona ike iho no he hana naʻu i hele a lehia ke kakapahi--ke hoomaopopo mai la anei oe i kaʻu mea e kamailio aku la? I kou make ole ana ma kela paio ana a kaua, ua hoouna mai la oia i kela wahi kauwa limakoko e hanai malu ia oe me ka laau make, a oia keia nawaliwali loa ou."
Mahope o ko Ruleka kamailio ana aku, ua ala ino ae la ke kauna a pane mai la: "Akahi no au a hoomaopopo. He keu io no koʻu naaupo. He oiaio ua pii hikiwawe mai koʻu ola a me koʻu ikaika, aka, mahope o ka hele pinepine ana mai o kela kahunapule kuapuu ua loli ano e ae la koʻu maʻi a ikaika loa mai la ka nawaliwali."
"I ka wa hea oe i hoomaopopo mua ai i ke ano e?"
"I ke kakahiaka Poalima iho la no," wahi a ke Kauna.
"Oia, oia maoli no ka pololei."
I kela wa ua hemo mai la ka puka a komo mai la ke kauka. I kona ike ana mai ia Ruleka ua hookuihe ia kona manao, aka nae ua ku koke ae la o Ruleka iluna a hele aku la e aloha i ke kauka, alaila hawanwana malu aku la, -- "Ke manao nei au ua hanai ia ko maʻi i ka laau make."
Luliuli iho ia ke poo o ke kauka me ke ano minoaka ana iho, aka ua pane hou aku la o Ruleka:
"E hoomanao oe, o ka Duke o Tula ka hooilina hookahi o ke Kauna, a in a o ia nei e make ana o ka lilo no ia o ka waiwai i ka Duke; a o kela kahunapule kuapuu he kanaka paahana ia no ka Duke. A ke ole au e kuhihewa oia maoli no ke kumu o keia pilikia."
I keia manawa ua hele aku la ke kauka e ninini i na laau a pau o ke kiaha a ka maʻi e inu mau ai iloko…
o kekahi kiaha okoa, alaila hoopiha hou ia iho la me on a laau hou a hoohainu ia aku la ka mea maʻi. Ua papa ia aku la ka wahine malama aole e hoike wale i keia mea i ke kahunapule. He elua hora mahope iho ua loli ae la ke kulana maʻi o ke kauna, oia hoi ua loaa ae la iaia ka oluolu. Akahi iho la no a hoomaopopo ke kauna a me ke kauka i ka Ruleka mau olelo.
[Aole i pau.]
KA MOOLELO O KA AHAHUI KULA SABATI O KA MOKUPUNI O HAWAII.
Halawai ka Ahahui Kula Sabati o ka Mokupuni o Hawaii, ma ka luakini o Puako Kohala Hema, i Maraki 11 M. H. 18892 hora 6 p.m.
Rev. W. M. Kalaiwaa--Lunahoomalu ma ka noho. Wehe ia ka halawai ma ka himeni Hoku Ao Nani aoao 282, a me ka pule a Rev. S. C. Luhiau.
Hoomaopopo ia na hoa o ka Ahahui na Kahu Kula Sabati nui W. A. Mio, no Hawaii Akau, a me na Hilo.
Na Kahu Kula Sabati: Haili Hilo, aole; Laupahoehoe, D. Kahooio; Hamakua Hikina aole; Hamakua Huiia, S. Kaili; Waimea, John Kalino; Kohala Komohana, s. C. Luhiau; Kohala Hema, T.X. K. Nakanelua; Kekaha, J. Kaumuloa; Helani, aole; Kona Waena, J. M. Kaiwipunakea; Kealakeakua, aole; Puula ,a aole.
Eia na elele Kula Sabati i hiki mai: J. Keliikahi, S. Konia, J. M. Kaia, P. Kaaekuahiwi, T. P. Kaaeae, C. Kaili, O. M. Kekauwea, S. Kailipua, Samesona, J. Mailolo, Keahi.
Hoa mau O. P. Emekona, a me na kahu, Kohoia na luna nui, ma ke noi ua kapae ia na rula koho balota.
Koho ia o W. M. Kalaiwaa i lunahoomalu, S. Kaili i kakauolelo. Koho ka lunahoomalu ia John Kalino, W. A. Mio me Kaumuloa i komite imi hana. Eia ka lakou hoike. 1--Hapaha hora haipule. 2--Hoike a na kahu kula Sabati nui. 3--Hoike papa helu kahu kula Sabati apana. 4--Hoike a na elele. 5--Koho ana i na kahu kula Sabati nui. 6--Na elele i ka Ahahui ma Honolulu. 7--Ka manawa e hoike ai na kula Sabati o Kohala Hema, me Waimea, 8--Ka manawa e halawai hou ai.
Apono ka Aha i keia mau kumuhana 2--Na W. A. Mio i ko Hawaii Akau, a me ko na Hilo, na ke kakau olelo i ko Hawaii Komohana.
Kumuhana3--Na D. Kahooio i ko Laupahoehoe, S. Kaili ko Hamakua Hawaii, J. Kalino ko Waimea, Luhiau ko Kohala Komohana, Nakanelua ko Kohala Hema, Kaumuloa ko Kekaha, Kaiwipunakea ko Kona Waena. Na ke kakauolelo i ko Haili, Onomea, Hamakua Hikina, Kohala Akau, Helani, Kealaakeakua, a me ko Puula. Waiho mai o C. M. Kama he hoike komite, no ke kokua o na kahu kula Sabati nui penei "Maka noonoo ana o ka oukou komite, ua loaa keia mau kumu eula."
1--He mea pono no e loaakekahi mau kokua mai na kula Sabati mai no na kahu kula Sabati nui.
2--Na kela a me keia kahu ekalesia a me kona kula Sabati e hooholo in a dala kupono e haawi aku ai i ke kahu kula Sabati nui oia mau kula Sabati." Na Komite, S. W. Kekuewa, C. M. Kamakawiwoole O.P. Emesona.
Kumuhana 4--Na S. Konia ko Laupahoehoe J. M. Kaia ko Hamakua Hikina, T. P. Kaaeae ko Waimea, O. M. Kekuewa ko Kohala Hema, na ke kakauolelo i ko Kohala Komohana. Noi mai o J. Kalino, e hoopanee ka halawai a apopo hora 8. p.m. hoopanee ia me ka pule a ka lunahoomalu.
LAHANA 2
Maraki 12 hora 8 p.m. Wehe hou ia ka halawai ma ka Himeni Hoku Ao 172 me ka pule a ka lunahoomalu, a me ka heluhelu Baibala.
Kahea ia na inoa, a heluhelu ia ka moolelo o ka halawai mua aponoia ke koena o ke kumuhana 4. Na Kaumuloa ko Kekaha, Kailipua ko Helani, Samesona ko Kona Waena.
Kumuhana 5--No Hawaii Akau, a me na Hilo, W. A. Mio; no Puna J. M. Kauila; Hawaii Kamohana C. K. Kapa.
Kumuhana 6--Noi mai o J. Kalino, o na elele o ka Ahahui Euanelio oia no na elele o ka ahahui kula Sabati aponoia.
Kumuhana 7--Hora 12 a.m. Koho ka Aha i komite hoike, Kalawe, Kahooio a me Keahi.
Kumuhana 8--Noi mai o Kekuewa ma kahi a me ka manawa e noho ai ka Ahahui Eunelio aponoi a waiho mai o G. B. Meheula he olelo hooholo penei: Olelo hooholo hooholoia.
"Ke haawi aku nei na hoa o ka ahahui kula Sabati i ka mahalo nui ia S. H. Mahuka Esq. a me na makamaka a o Puako nei i ka hoomakaukau ana i na mea e pono ai keia Aha." Lawe ka Aha a pono heluhelu ia ka moolelo aponoia, noi mai o G. B. Meheula, e hookomo i ka moolelo holookoa i ka nupepa KUOKOA apono ka Aha. Hookuu ia ka halawai me ka pule a O. P. Emesona.
SAM KAILI KUEWA.
Kakauolelo.
Ma ka po Poalua nei, ua lilo aku i ka aihue he elua mau kihei no kekahi wahine Potugala, mauka ae nei o Makaaho. He poe maau hele paha no ka po ka poe nana i lawe a malama, a i ole, na la auna lahui like no paha. Iwaho no o kahua kahi i waiho ai a lilo. Ua wawae paha? Aole. Ua puhi ia aku la e ka makani.
Hoolaha Kumau.
PAPA! PAPA!
AIA MA KAHI O
Lewers & Cooke
(LUI MA),
Ma ke kahua hema o Alanui Papu me Moi.
E LOAA NO NA
PAPA NOUAKI
O kela a me keia ano,
Na Pani Puka, na Puka Aniani,
na Olepelepe, na Pou, na Oʻa,
na Papa Hele, na Papu Ku,
me na Papa Moe he nui loa.
NA PILI HALE O NA ANO O PAU
A me na
WAI HOOHINUHINU NANI
O na ano a pau loa.
Na Balaki o na Ano he Nui Wale
Ke hai ia aku nei oukou e na makmaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana no ka
Uku Haahaa Loa,
E like me ka mea e holo ana wa@ o Lana a me ka Mea Kuai.
Hele Mai e Wae no Oukou iho.
2357-q
Ka Waiwai o ka Hilinai
Saseparila Ayer
AYER, Laau Saseparila kai kaulana i hilinai nui ia no ka hoomaemae koko ma na wahi a pau o ka honua, he aneane 40 makahiki i hala ae nei, a ua lawelawe nui ia hoi iwaena o na oihana lapaau O keia
LAAU SASEPARILA, no loko ae ia o ke aa Saseparila Honednra maoli; ua loaa ka mana hoomaemae ma o ka hui pu ia ana me kekahi mau aa laau e ae, a me kekahi mau mea no loko o ka hoau@ me ka hao.
HE KOKO inoino a nawaliwali anei kou? Ua awili pu anei me na ano maʻi ikaika? A ua huipu anei me na wai awaawa hoopehu? Na keia
LAAU e hoomaemae ia mau mea ino a pau a maikai. O na kauka lapaau a pau o Amerika i ike i ke ano o ka Ayer Saseparila ua olelo lakou, aole he mea maikai e ae no ka hoomaemae koko ana mai na maʻi i awili pu ia, aka o keia wale no. No ka
HOOMAEMAE ana i ke koko, a me ka hookahua pono ana i na mea a pau ma kekahi mau ano maʻi i ike ia, o ka Ayer Saseparila wale no ka laau nana e hoomaemae 20 me ka hakalia ole mamua ae o kekahi ano laau e no. O ke ano
KOKO INO hakukaku a nawaliwali hoi kona holopono ana ma ke kino, e hoomaemae ia ana a e hooikaika pu ia no hoi ma o ka ai ana i keia Laau Saseparila a Ayer. He maalahi a he
MAIKAI loa hoi keia laau, aole no ka hoomaemae wale ana no i ke koko, aka, no ka hookaawale pu ana kekahi i na maʻi, hoomomona hou ana i ke koko ino, a me ka hooikaika pu ana i ka holopono ana ma na aa. He lehulehu wale na hooia ana mai na wahi a pau o ke ao nei i hoohana mai i keia laau mamua o kekahi mau laau e ae
A HILINAIIA no ka ikaika kupono o ke ola kino, ma ka maemae ana o ke koko, hoomake pu ia ua maʻi, a pela aku. He nui na laau hoomaemae koko i hoolaha wahahee wale ia malalo o na inoa he lehulehu, aka o na hilinai a me na hooia wale no a ke ao holookoa, maluna o ka
Ayer Laau Sasaparila.
I HOOMAKAUKAUIA E
Kauka J. C. Ayer & Co., Lowell Mass.
HOLLISTER & CO.
Na Agena ma ka Paeaina Hawaii.
2857-q
KAKELA ME KU@
KA-HALEKUAI-@
---O MA---
WAIWAI LIKE@
NA MEA HANA@
KAMANAAP@
Pahi, Upa, Pulu@
NA PENA@
KAA-PALA@
IPUKUKU@
@ME---
KA AIL@
PALAU
A me na mea Mahiai.
NA PAKEKE P@
Ipuhao, Iliwai
Makau me Aho Lawa@
Mikini Humuhumu@
MIKINI A WILCOX ME GIB@
No Mikini a Remington
KAKELA & KUKE@
2871-q